‏" فلي شعرك علمينا كيف تقدر مَرَه
‏تزرع الليل صبح وتزرع الصبح ليل "

- مطلق الجبعاء

‏لبيه يا الراحه وذعذاع الصباح
‏وأنا مصلي الفجر في توقيتها

‏أحس في صدري سكينه وإنشراح
‏من يوم أذن للصلاة وجيتها

‏مذنب وأحبّ الخير وأسعى للصلاح
‏وأندم على الغلطه ليا سويتها

هذي حصيلة ليله أسهر لحالي
أشرب من الأكواب ما أشرب من الكُوس

يوم أتقهوى ويوم أقهوي الليالي
عزلة تعب ماهي إحترازات فيروس

أنا شماليه .. وقلبي بعد شمالي
لي كبد لا بِرْدَت يورّى لها الموس

‏وأنا إليا جيت أحب أكون طاغية حضور
‏أحسن من اللي يجي محدٍ درا بـ جيته

‏أما إني أجمل أسمي لا أنكتب لي ظهور
‏أو يلعن أبو الظهور وتنلعن مُيته

‏غزالٍ والعقل في راسي وصوتي جهور
‏ويمناي من دون حقي ماهي مَيته

‏" تغاضي يا عيوني والسنين قصار
‏ما دام الوقت لا أنصفني ولا أنصفته

‏ أحب اللي مضى لي وأكره التكرار
‏وأشوف اللي يخوفني ولا خفته

‏غريب شعور والواقع غريب أطوار
‏كثر ما كنت راضي كثر ما عفته ..

‏يا كثر اللي تحاشيته يصير وصار
‏ويا كثر اللي تمنيته ولا شفته "

‏كبيرة قدر وما تحاتي فعايلها تصغّرها
‏تشوف الرد ما يسوى إذا كان العقل جاهل

‏عليها الوقت متعجّب في كل مره يكاسرها
‏مهي بتطيح وإذا طاحت مهي بتطيح بالساهل

‏عزيزة حزن ما تشرح وش اللي في خواطرها
‏تخاف إن حزنها ينقال على صدرٍ ما يستاهل

أعمق من أن أنطق الكلام كتعبير مجازي .. عندما أقول لك " عمري " فأنا أدخلك فيه
‏- سُرى عشاو وأنا

الوتر ♡︎

" جيتك بقلبٍ أبيض ولا يعرف اللعب
‏ولعبت به لعب الهوا بالستاير "

" أنثى ولا مثلك أنثى في نسا العالمين
لو تنجب الحور حور فـ كل مطلع شهر "

‏" لو تذبحين الشعور وتذبحين الحماس
‏العشق ماله حكم ثابت وكاتب عدل

‏تبرد على كلمة لسانك جميع الحواس
‏لو كان ليلة وصالك جوّها معتدل

‏جمال وجه ودماثة خاطر وطيب ساس
‏مافيه قبلك ولا بعدك شبيه وبَدل

‏إنتي جمالك لـ كل الغيد وحدة قياس
‏حتى جديلك مع العالم يثير الجدل " 💘

‏هات من جمرها وشوي من كاسها
ضحكتك طفلةٍ مرفوع عنها العتب

‏طفلةٍ تسهر الغيمه بـ كراسها
‏ترسم النجمه اللي غافيه بالهدب

خلها تقلب أيامي على راسها !
ليتها ما تمل ولا يجيها التعب

‏خلّها بالضلوع تشب مرواسها
‏القصايد تبي دافع قويّ وسبب

كل ما جاء يزخ العطر نسناسها
ثوبها من رذاذ وشالها من قصب

خبني بين حد الصحو ونعاسها
لحظةٍ فارهه لين أتساقط رطب

لحظةٍ باذخه تذبحك بإحساسها
كنها تبعدك عني وهي تقترب

‏هاتها يا بعد عمري بعد ناسها
‏ضحكة ماربت بـ شفاك ما تنحسب

‏عاد لا ريـّع النعناع بأنفاسها
لعنبو شعر ذاك الوقت ما ينكتب
‏
- مساعد الرشيدي

أقرأ تعابير الحشا بالحجاجين
كنّه تقول أن العسل في شفاهي

حمّرة غروب .. وجمرةٍ بالشفاتين
ونحرٍ يشابه مطلع الشمس باهي

ويشدني خصرٍ تقل رسم قوسين
لو كل قوس يغيّر الإتجاهي

وإن قصرت توصيفي لازم تعذرين
لقيت شيٍ ما خبر له مضاهي

الزول .. والمنطوق .. والخد .. والعين
شيٍ يخلي كامل العقل فاهي

وإن قلت وين علاجي اللي تخبرين ؟
ثم دمجت حكي الغنج بالتباهي 💘

‏" قبلة الشاعر وقافه وإتزان أبياته
‏جعلهم يفدونك اللي ماهم بيثرونك

‏إنتي الفكره وأنا اللي فكرته لا جاته
‏صبها بإبداعه اللي تكتحله جفونك

‏ويوم ساد الليل والراقد هناه سباته
‏همي أصبحك بأبيات ٍ تفوق ظنونك

‏دونك يموت الشجاع فداك يا رغباته
‏من وقف دونك محال إنه يعيش بدونك "