عن السيدة #رقيه سلام الله عليه

يبويه ..حياتي ابغيبتك غابت
يبويه..اوتدري مهجتي انصابت
من راسك لمحته
بجروحي حضنته
*
يبويه بنتك آنه وعاين ادموعي
تظل تجري أبد لا ما سكن روعي
ابمجامر فرگتك تتوگد اضلوعي
اوطفت بعدك يبويه شعلة اشموعي

وسافه.. من عيني الأمل مذبوح
وسافه ..بعدك ما تهيد الروح
.
اودمعي من ذرفته
بجروحي حضنته
*
لوّن ادري حياتي دونك ادفنها
يبويه جثتك ارد اسألك عنها
صدگ خيل العدى ابحافرها رضنها
اولمن شافتك عمتي اعتلا ونها

تنادي ..يحسين انوذر جسمك
تنادي ..عالغبره جرى دمك

والضيم اللي شفته
بجروحي حضنته
*
يا ريتك تصد ليّه وتحاچيني
من كثر التعب ما غمضت عيني
اوترى گوم العدا صارت تباريني
دايم بالضرب بويه تأذيني

عجيبه...من صغري لگيت اهوال
عجيبه..يگيدوني العدا بحبال

اوحزني ماصرفته
بجروحي حضنته
*

شلي ابعمري عسى ما طوّل ابلياك
ما ظنيت اشوفه راسك وانعاك
ولم طشت الرزيه وانتخي بحماك
واخضب راسي واتحنى بعد بدماك

اناشد ..عفتني اشلون يالغالي
اناشد ..وانته تعلم ابحالي

همي من حملته
بجروحي حضنته
*

ثنايه اتكسرن منك دگلي اشلون
صدگ بيها ابعصاته يضرب الملعون
اوبينه ارجاس اميه ظلن ايشتمون
مظن أهل الشيّم من هالفعل يرضون

تغير ..يبويه وضعي من بعدك
تغير ..اوچلمة ريت متردك

لو رد الفگدته
بجروحي حضنته

*
لحضان المنيه رفرفت روحي
من لمن تنثّر بالوجن موحي
صحت ياحسرتي من ارتفع نوحي
مع اهلي تسافر باقي اجروحي

تحتم ..رحيلي وانختم يومي
تحتم..اوصفت للعايله اهمومي
اومن اسمك ذكرته
بجروحي حضنته
***

لخادم أهل البيت [ع]:
عادل العبد الله

https://t.me/adela313
الفاتحة لروح من علمتني الخدمة الوالدة *آمنه العبدالله*

٢-١٤٣٦هـ

قصيدة عن #السيدة_رقية عليها السلام

مشتاگه أشوفك واغفه بحساسك
واريدن كل جمالك مو فقط راسك

بويه حن عليه
هاي آنه رقيه
*
يمن بسمك عشت كل لحظتي اويومي
واشوفن صورتك في صحوتي اونومي
وتاليها ابقهر تتحرگ اهدومي
وعلى حزني تون يالغالي انجومي

أحاچيك ابجروحي واهمل العبره
يمن بمصيبتك اتنفس الحسره
ماتنشد إليه
هاي آنه رقيه
*
شسولفلك يبويه ابحالي وشلوني
وانا صبغ الرماد امغيّر ابلوني
ومن هضم السبي امورمه امتوني
ريتك يمي بس اتخفف اشجوني

اتحسس هوا عطرك يبويه احسين
وابطول التعب مگدر اغمض العين
والحاله شجيه
هاي آنه رقيه
*
معذوره عيوني الـ شخصك اتساهر
وعنك لمن أسأل گالو امسافر
وابشوگي عليك اتفطر الخاطر
يا وكت الأشوفك هسه لو باچر

مخنوگه اظل لو ما اشوفنك
وتعرفني اريدن بس ألمنك
تدري باللي بيه
هاي آنه رقيه
*
ياللي ابأسمك اتنامت رياحيني
علامه بس ردت من الله ينطيني
على كوكب حنانك تكتحل عيني
ولا اشوفن كدر بيك اويأذيني

اريدن تستراح ابنظرتك روحي
واكمّل يالأبو وياك كل بوحي
يالشمسك مضيه
هاي آنه رقيه
*

اخر لحظه ماچانت على بالي
يجيبو لي جمالك بالطشت تالي
وتمنيتن اشوفك كامل اگبالي
ظني خاب لن راسك تراوالي

غفيت آنه اعله راسك واشبگ احلامي
النفس بيه اختنگ وانعدمت ايامي
معلومه القضيه
هاي آنه رقيه
*
عادل العبد الله

https://t.me/adela313
الفاتحة لروح من علمتني الخدمة الوالدة *آمنه العبدالله*


4.11.2016

على محنة رقيه
دموعي اتظل جريه

* * *
بنت احسين أهديها سلامي
هيه جننت عقلي وهيامي
صدگ بعد الأهل ماعدها حامي
حزينه والدمع ياحيف هامي

يتيمه ابلا حميه
دموعي اتظل جريه

* * *
رقيه اوهالأسم عايش ابالي
وتون روحي لجلها ونوحي عالي
وسـافه يسـروها ابليا والي
اوليزيد الرجس ودوها تالي

تون ونه خفيه
دموعي اتظل جريه

* * *
بخرابه نزلوها ويه زينب
وتناشد وين ابواليمه اوتنحب
ماتدري بدمومه من تخضب
بعد ما بالسهم گلبه تصوّب

اشعظمها من رزيه
دموعي اتظل جريه

* * *
صاحت وين ابويه عني غايب
وگلبها چالجمر من المصايب
لفو بالراس في طشت النوايب
بعد ما شافته خرت تعاتب

تدري اشصار بيه
دموعي اتظل جريه

* * *
تنادي بويه عگبك روعوني
من ابچي يويلي يضربوني
مدري شالجنيته مرمروني
طفله امدلله اوهم مارعوني

نهاري اوكل مسيه
دموعي اتظل جريه

* * *
تحچي اوي الأبو وزايد حزنها
وتقبّل راس ابوها وتبدي ونها
بعد ساعه هوت عالراس لنّها
يويلي واطلعت هالروح منها

بعد ويلي الشفيه
دموعي اتظل جريه

* * *

عادل العبد الله
27/1/1433
الارشيف

https://t.me/adela313
الفاتحة لروح من علمتني الخدمة الوالدة *آمنه العبدالله

نامت بالخرابه نومة الموت
يريت الها يبوها اتجيب تابوت
اهوايه آذوها أميه
شيّع ابچفك رقيه
---
ابنيّتك يحسين عانت..من بعد يوم المصيبه
ظلت اتناديك بويه.. والگلب شاجر لهيبه
مادرت جسمك توسد..اوشيبتك صارت خضيبه

نيران تسعر بالگلب..ازغيره اوتلاگي چم ضرُب
اهوايه مترحمها النُصُب..امن الحصل صارت كئيبه

تسأل عنك اوهم تبدي لونين
ابكل خطوه تنادي آه يحسين
ياوسف جتها المنيه
شيّع ابچفك رقيه
---
يبواليمه عن رقيه .. لازم انگول الحكايه
من بعد ديرة الكوفه .. دخلت الشام الرزايا
الحيل منها ويلي منهد..ولاحظت يمها السبايا

محترگه من عدها الجِدَم..چن نابت اعليها سهم
اولو تشهگ اتحس ابألم..آه من عظم البلايا

ماتنظر يبوها اشصار بيها
من ضرب العدا زرگه ايديها
اشكثر متحمله الرزيه
شيّع ابچفك رقيه
---
امن التعب تدريها نامت..رادت الراسك تشوفه
حلمت ابحلم الحسافه..والوضع بدل ظروفه
شافتك مدمي ابجراحك.. حضنك امحاله تعوفه

حسره عليها هالحلم..شافت جبينك منهشم
اوجرحك أبد مايلتئم..اوجسمك امبيّن خسوفه

مو كافي العدا داسوه صدرك
هسه اعله البِنِت لازم تكدرك
عجبه سموها سبيه
شيّع ابچفك رقيه
---
امن الحلم فَزّت رقيه..اتنادي بويه الغالي وينك
جابو العدوان راسك..لحظه بس تفتحها عينك
عاين الحالتها تبچي..ليها يتعالى ونينك

ذبلانه من گد القهر..اوخدها يواليها انسطر
اعليها العدو وشگد جِسَر..يضرب ابثمرة سنينك

ماخفّت ترى من البواچي
تگلك سلّبو حتى التراچي
تسمع الونه شجيه
شيّع ابچفك رقيه
---
حضنته راسك اوماتت..والجروح اهواي بيها
واعتلا صوت المناحه..عيلتك تبدي نعيها
واختك المقهوره زينب..اعليها هم زايد بچيها

انهض يبن خير العمل..حطوها فوگ المغتسل
اومنها الجسد ويلي انتحل..ازغيره ياويلي عليها

راحت هالعزيزه اوجلبت اجروح
اوليها بالمجالس نرفع النوح
بالله يا ابن الزچيه
شيّع ابچفك رقيه
---

عادل العبد الله
9/9/2021
https://t.me/adela313
الفاتحة لروح من علمتني الخدمة الوالدة *آمنه العبدالله

*يبوامحمد يريحة فاطمه أمي*
*إذا ترحل عليّه ينثگل همي*
*اوتكثر بيّه لجروح*
*واگضي وگتي بالنوح*
*خويه ..خويه*
---
زينب آنه خيتك..مَگدر احمل حسرتك
ابروحتك يبگه الگلب يسعر لهيب
روحي تبگه امعذبه..منهو لي يالمجتبى
وآنه مو متعوّده عني تغيب

عگب عينك انحرم..والگه المآسي
اوتبتدي اهمومي اويشيّب شعر راسي

*عسى اعيوني العمى والموت إلي حتّم*
*ولا اشوفك تصارع يالأخو هالسم*
*بعدك دمعي مسفوح*
*واگضي وگتي بالنوح*
*خويه ..خويه*
---
جرحي صعبه يلتئِم..هالحصل ريته حلِم
وسفه ياخويه على افراشك طريح
لجلك اگليبي انچوا.. ماكو من أجلك دوا
واعله حالك يبچي لحسين اويصيح

ياعضيدي ياللي باقي من أهلنا
ارتجي ساعه تظل ..لاتمشي عنا

*ترى فگدك يزيد النايبه اعلينا*
*اوتتشمت عدانه يالأخو بينا*
*تبچي اعليك كل روح*
*واگضي وگتي بالنوح*
*خويه ..خويه*
---
ينعى جاسم يالحسن..صوته يبدي بالشجن
جالس ابكترك واثر وجهه حزين
ابصدره حامل چم ألم..چن تصوب بالسهم
يلطم ابراسه اوعِله منه الونين

وجهك اليضوي الشمس ..وسفه تغيّر
اومن اثر سم العدا..چبدك تأثر

*ثلث چبدك وگع وسط الطشت عجبه*
*اومن منظر عذابك روحي ملتهبه*
*جفني ليك مشبوح*
*واگضي وگتي بالنوح*
*خويه ..خويه*
---
اتمكن اعليك الأجل..ابروحتك راح الأمل
بيش أصبُّر هالگلب حان الوداع
حگي أصرخ هَم أون..غمضت كل الجفن
وانهدم ركني اوصرت آنه ابضياع

شالو نعشك والكدر ..خيّم عليه
اوعيني بعدك ماتشوف.. الا الرزيه

*راح انصب عزاءك مو فقط مره*
*وادري اويايه تنعى فاطمه الزهره*
*اعليّه كل بَلا ايلوح*
*واگضي وگتي بالنوح*
*خويه ..خويه*
---
نعشك اتصوّب وسف..اودمك الغالي نزف
اومَندفن جسمك كتر گبر الشفيع
حگك اشلون انهضم ..ريته هالكون انعدم
صار دفنك يالأخو برض البقيع

بعد عينك طيبه صارت ..موحشه اهواي
ياللي وجهك يروي هَم ..يغني عن الماي

*ابرحيلك ترحل الفرحه عن العيله*
*اوتلفينا بلاوي صعبه واثجيله*
*حزني ابوجهي مفضوح*
*واگضي وگتي بالنوح*
*خويه ..خويه*
---
عادل العبد الله
12/9/2021

https://t.me/adela313
الفاتحة لروح من علمتني الخدمة الوالدة *آمنه العبدالله

وسفه أخويه المجتبى..خمدت انفاسه
اومن چبدته خاتم إلي..بلوة احساسه
وآنه بدموع الحسن..
أشرح ايام المحن
- - -
آنه زينب گلبي ينبض من حروفه
عشت كل عمري اضم نعمة چفوفه
صورة امي اووالدي آنه اشوفه
هوه لحسين السبط اسس طفوفه

أول مؤسس يعتبر.. حامل اسهامه
اعلنها وسط اجنازته..فدوه بآلامه
من دما اعيوني بچن
أشرح ايام المحن
- - -
اشگد ابومحمد تحمل من اذيه
گبره مو يم النبي خير البريه
لجله ادعي كل صباح اوكل مسيه
الله لا يرحم جميع الناصبيه

يومه فجع مني الگلب.. اوزيّد اوجاعي
اوخلاني محنية ظهر.. ويدي بضلاعي
وآنه من جور الزمن
أشرح ايام المحن
- - -
گبر اخويه بالجرح آنه گصدته
وادري خويه بالگبر يتنطر اخته
يمه اقرا الفاتحه اودمعي ذرفته
ولجله گلبي بالحزن آنه كسرته

ماشافت اعيوني فرح .. آنه من صغري
شفت الهضم يمشي إلي..وش ذنب عمري
من صحت سر اوعلن
أشرح ايام المحن
- - -
آنه من عگب الحسن افگد حبايب
وانسبي من كربله لشام المصايب
ريت مدفونه اظل تحت الترايب
اولاتجي لحظه اباتن بالخرايب

آنه اللي چانت هالبشر ..تحلف ابأسمي
تاليها وسفه انضرب .اوتنشتم أمي
وش اقدم من ثمن
أشرح ايام المحن
- - -
صفر وي امحرم اصعب ذكرياتي
منها شيّب راسي واتأذت حياتي
ثاكله اومحنيه هذي من صفاتي
اودايم اتجرع قساوة نايباتي

كل امنياتي اتفتت .. ما بگه اي شي
بس الحزن بيه انطبع..اوهم إلي يمشي
بگت انفاسي شَجَن
أشرح ايام المحن
- - -
عادل العبد الله
27-10-2017

https://t.me/adela313
الفاتحة لروح من علمتني الخدمة الوالدة *آمنه العبدالله*

رابع نعش ينشال..بعيوني شفته
اولجل الأخو الدلال..زايد جَمُرتَه
ايزلزل مُصابه اجبال..اوتبچي الحَسُرتَه
سم چبدته چتال..گطع مُهجتَه
خويه..فگده..يچوي دليلي واهمل العبره
----
خويه الحسن من غاب..وضعي تغيّر
اودمعي إله سچاب..واحمر تنثر
اوخنگه هوا الاحباب..من دونه يسعر
جدد جرح للباب..أُمنه اويه حيدر
خويه..فگده..يچوي دليلي واهمل العبره
----
نعشه انرمى بسهام..والحاله تشتد
اوعن جده الظلام..گبره تبعّد
هذا اللي چان ايتام..من ظله تمتد
عگبه ترى الايام..بالبلوه تسوَد
خويه..فگده..يچوي دليلي واهمل العبره
----
كل ليله كل مصباح..چان اهوّه يمي
ابسابع صفر من راح..جدد لي همي
اوصرت اصفچ آنه الراح..اودمعاتي تهمي
واجراحه من اجراح..ألزهره أمي
خويه..فگده..يچوي دليلي واهمل العبره
----
ابعيني صور لوعات.. تهدم لي حيلي
اوبشفافي كل بسمات..غابت اويلي
اوصار ابلظى الجمرات.. يسعر دليلي
والنايبه ___ مرات… صارت تجيلي
خويه..فگده..يچوي دليلي واهمل العبره
----
ابعيني نهر مرسوم.. يلمح عليّه
ابجنبه گمر مهشوم..هذا أخيّه
اوشمس الله كله ادموم..يبگه رميه
تنعد سنيني ابيوم..راح الشُفيه
خويه..فگده..يچوي دليلي واهمل العبره
----
عادل العبد الله
4.10.2019
https://t.me/adela313
الفاتحة لروح من علمتني الخدمة الوالدة *آمنه العبدالله*
..…

ريت يم گبرك نجي ونطوفك
يالحسن يلماخفى معروفك
*
ريت يم گبرك نجي ونقرا ابحزن
كل نواعينا اوبعد نشجي الذهن
ونشتم اتراب الگبر بسمك نحن
يللي فضلك ينعرف بچفوفك
*
ريت نلفيلك مواكب يالحسن
نحمل الرايات وانصيح ابعلن
يللي ذكرك بالگلب اكبر وطن
اوماترد حاشا ولينه اضيوفك
*
اشگد تمنينا إلك نبني گبب
بس لچن بحشانا يسعرنا اللهب
الحمامه تگدر اتزورك عجب
ورغم جور الناصبه منعوفك
*
لو يصح يالمجتبى ننصب مضيف
اويمك انوزع على حبك رغيف
يللي بيك اوصانا شرع الله الحنيف
وانته كلشي بالوجود انشوفك
*
كلشي يركع تحت جدمك يالكريم
يللي بيدينك يظل خير النعيم
اوبيك دلينا الصراط المستقيم
وجننتنا يالولي بحروفك
*
انته مصدر للعشگ ويه الجنون
وتبگه مرخوصه إلك هاي العيون
ابدربك امشينا يمن كن فـ يكون
ودوم تسحرنا بعد بطيوفك
***
عادل العبد الله
4.11.2016

https://t.me/adela313
الفاتحة لروح من علمتني الخدمة الوالدة *آمنه العبدالله*

يالرضا سجلني وي زوارك
تعب شوگي خلني بين انظارك
*
چن احس ابغربتي اودمعي يسيل
وانا صيح ابحرگتي بسمك دخيل
ما إلي غيرك يمولايه سبيل
بالله لا تحرمني شوف اقطارك..
*
اعليك اقسم باللي حزوله الوريد
اوبالگمر اقسم اريد اوصل اكيد
خلني بين احضانك ارجع من جديد
يمتى تتسهل واجي لديارك
*
يا أبوالجود اوكنوز المعرفه
يامن الكل العلل مركز شفى
حن عليّه رجوتك بالعاطفه
رايد اتقوّى فقط بنوارك
*
لو وصلت الحضرتك دمعي يجول
بين عتبك والصحن يبن الرسول
اوكل همومي ابگربك أدريها تزول
اوتدري اتمنى اظل بجوارك
*
روحي مالومه ولا تگوه الهجر
بالله أمر ازيارتك خله يسر
وافتح ابوابك اجيك ابلا عذر
واشتم ابكترك عبير أزهارك
*
عادل العبد الله
3/10/2020
https://t.me/adela313
الفاتحة لروح من علمتني الخدمة الوالدة *آمنه العبدالله*

كلنا ابابك ....نبچي امصابك
يابن موسى اوبينا جمره
نتمنى نوصل للحضره
- - -
كلنا اعله بابك نرتجي ترعانه
ونجري الدمع لمصيبتك مولانه
اوكل شيعتك من فرگتك حزنانه
اولزيارتك يبن النبي ولهانه

اشگد نتألم..وانته التعلم
من عندك نتأمل نظره
نتمنى نوصل للحضره
- - -
نقرا العزيّه والدمع دم سچاب
اوتدرينه نتحسر يبن داحي الباب
اويصعب علينه مانطب الاعتاب
اوبينا الگلب من البُعد ظل لهاب

كافي انتاني.. كافي انعاني
هجرك يذبحنا چم مره
نتمنى نوصل للحضره
- - -
خدامك اوكلنه رهن بچفوفك
اوماينمحي طول الزمن معروفك
حرزك كهف باين ترى بحروفك
لو ينعدل وضع الهجر بنطوفك

عشنا الغربه..انزورك صعبه
صحنه اتعدي هاذي فتره
نتمنى نوصل للحضره
- - -
شوگ اللي بينا يستعر چالنيران
يمتى ضريحك نلثمه بالاحضان
اوننصب إلك ماتم عويل اواشجان
اونتوسلك يابوالكرم والاحسان

اونقرا ابمنبر..يا بن حيدر
اوتسمع كلمن يلطم صدره
نتمنى نوصل للحضره
- - -
بوامحمد انته للعلل تشفيها
والواگعه ابشده فلا اتخليها
اوكل طلبه منا يالولي توفيها
حگنا ترى ادموع الجفن نجريها

حرزك آمن..وانته الضامن
يالصحنك بي عطر الزهره
نتمنى نوصل للحضره
- - -

عادل العبد الله
14.10.2019

https://t.me/adela313
الفاتحة لروح من علمتني الخدمة الوالدة *آمنه العبدالله*

ذكرى شهادة الامام الرضا عليه السلام

كل أمنياتي. .أگصد ضريحك وارتجي عطفك
كل أمنياتي. .أشتم عطورك واسرح ابوصفك
ياعلي اشلون..ألگه الوسيله
ياعلي اشلون..صحنك اجي له
*
الله يدري يالرضا.. بيّه ضيّق هالفضا
وآنه كل عمري نزف يمتى الزياره
..
يمتى ادخل جنتك..واقرا شعر امحبتك
وتدري بيّه خادمك رهن الإشاره

اي وحگ اميمتك ..لاتردني ابشيمتك
يللي بفضالك نجت كل الحياره
..
يللي ماصح لك مِثل ..حاشا عن جودك امِل
وانته ألطافك تغذي كل حضاره

اتمنى لحظه .. تنظرني بعيون اللطف مولاي
اتمنى لحظه.. والثم ضريحك سيدي ورجواي
ياعلي اشلون..دمعي اسيله
ياعلي اشلون..صحنك اجي له
*
گلبي بالحُرگه جزع..وعن ضريحك انمنع
اعليك اسلم عن بُعد بالهم انشدك

منحرم حتى النظر..اوليلي گضيته ابسهر
ارتقب لحظة علامه واجي عندك

شوگي لك ماينوصف..يا ابو اچفوف العطف
ومن معينك يرتوي گلب اليودك

ياما بسمك ارتجي. .خوف اموت اوما اجي
وامسي في گبري ولا اگدر اگصدك

دمعاتي بالخد..اشرح معاناتي إلك وانحب
دمعاتي بالخد.. كافي يمولايه الرضا اتعب
ياعلي اشلون..روحي عليله
ياعلي اشلون..صحنك اجي له
*
صرت اعد آنه الزمن..وچني غارگ بالمحن
دوم تچويني بعد صورة مزارك

عن قُرب لا عن بُعد..تشبح اعيوني وتُصد
أُمنيه لو تحصل ابگه في جوارك

يا اعز من النفس. .لشوگك آنه اشگد احس
ابيا وكت جدميني توصل يم ديارك

ضاعت اعليّه السبُل..وردت بس يمك اظُل
اعليك اقسم سيدي ابسورة تَبَارك

بعيوني حسره..وتدري بعد في حالتي مظطر
بعيوني حسره..وينزل من اجفوني دمع أحمر
ياعلي اشلون..افراگك اشيله
ياعلي اشلون..صحنك اجي له
*
إعله بالي مسأله.. يمتى اشد الراحله
وانظر الگُبْتَك واحس ابكل جنانك

يالرضا وابيا وكت..دمعي بالحضره يكت
واشتكي لك محنتي وانطر حنانك

لاتخليني ابقهر..ابچي وادموعي نهر
واستغيث ابرحتمك واطلب أمانك

ورجوتي ابيوم الحشُر..اسمي عندك ينذكُر
لاتردني سيدي رايد ضمانك

بس أنته كلشي..حاشا الـ مثل شخصك إلي يبخل
بس أنته كلشي.. ودوم أعله بابك اگعد اتوسل
ياعلي اشلون.. همي أزيله
ياعلي اشلون..صحنك اجي له
*
طاوعت دمعي الـ يصُب..وانفتح جرح الگلُب
فرگتك يبن الوصي عندي مصيبه

ياعسى ايروح العمُر ..او لا اظل بس انتظُر
ابعيني لوعه والجرح ماخذ نصيبه

ابروحي سافر كل أمَل.. اوتدري بيّه وش حصل
كل حياتي سيدي وحشه اوكئيبه

اصرخ ابسر اوعلن..مايهمني اي ثمن
كلشي يمك ارخصه يبن النجيبه

اتمنى لو يوم.. ارجع وانادي يالرضا زرتك
اتمنى لو يوم..واعلنها بضْرِيحَك أنا طِفتك
ياعلي اشلون.. نفسي ذليله
ياعلي اشلون.. صحنك اجي له
*
عادل العبد الله
16.11.2016

https://t.me/adela313
الفاتحة لروح من علمتني الخدمة الوالدة *آمنه العبدالله*

الاربعين…

حلم واتحقق اگبالي..اجيك ابلهفه مشايه
اجيك واجري دمعاتي ..اوبديّه احمل الرايه
*
اسرني الشوگ برحابك..واتعذب دليلي اهواي
شفت دربك خدم كلهم..يوزعون ابطريقك چاي
يحلّفون اليزورنك ..ابشرف اسمك يامولاي
وتعلم بيها نيتهم.. تظل كل لحظه وفايه
*
امشي اوكل اثر خطوه ..تسجلها يمحبوبي
بالف حجه بالف عمره.. وادري تمسح اذنوبي
يمن ذكراك إلي سلوه .. وانته الجنه بدروبي
لخلي دمعتي تحچي .. وترتل لك بعد آيه
*
ناري بالگلب تسري… ماتطفه يبو اليمه
اجيك ابحالة الفاگد .. حزين ودنيته ظلمه
اومثل طير انكسر جنحه… بوجهه ماتت البسمه
واذا تقبل زحف اگصد ..إلك واقرا لك اقرايه
*
اردد مستهل يحسين.. نذر كل عمري يتكرر
لو مهما الخطر جاني.. وگالو قدم المنحر
اقدمنّه إلك فدوه… ابعطايه الدنيا ما انغر
لن انته الحياة انته.. اوحبك معنى كل غايه
*
ياكعبة اوملاذ الناس ..ما أگوه على فرگاك
اتمنى الممات ايصير..لو اعكس غصب مسراك
عيشه اشتسوى من دونك.. يالحاشا يصح انساك
اوما ظنك يبواليمه ..تردني وانته رجوايه
*

لخادم أهل البيت (ع):
عادل العبد الله
1437
https://t.me/adela313
الفاتحة لروح من علمتني الخدمة الوالدة *آمنه العبدالله*

موشح (الاربعينية)

يللي رايح كربله مشايه
بالنيابه عني شيل الرايه
*
يللي گاصد بشتياقك كربلاء
اندعيلي ابخطوتك دعوة رجاء
عفيه عني اهتف ابصوت الولاء
وگله لحسين اشكثر بلوايه
*
ابخطوتك اذكرني ويّه الزائرين
اولمن اتكون انته بين الحرمين
اصرخ ابصوتك حبيبي ياحُسين
وخلي دمعاتك ترتل آيه
*
لاتطيح الرايه هذي ابذمتك
خلها يم عباس گله ابشيمتك
وانعي يمه اولاتنشف دمعتك
واقسم ابزينب يحبها اهوايه
*
بالنيابه عني ألطم يالتزور
واذكر ابجيتَك بعد ام الخدور
اوخلي گلبك يلتهب ليها ويفور
ابهمها لخوتها اعتنت شكايه
*
أبد لاتنسى مصاب آل الرسول
ابكل مواكب هالدمع خله همول
ابخطوتك واسي بعد روح البتول
اوعني أبچي ويّه هالبچايه
*
خلي خطواتك تحوم ابكل مضيف
اوبالله اذكرني اذا شفت الرغيف
وسمّي بسم احسين واشكر للطيف
وادعي ليّه حين تشرب مايه
*
من تجي حاير ابو اليمه العطوف
انوي عني من تقبِّل من تطوف
واعتني شباچ مگطوع الچفوف
عني زوره واقرا يمه اقرايه
*
گبل لا تنوي يزاير عالرحيل
انظر الگبة ابن حامي الدخيل
ابد لاتنساني وابدي له العويل
گله سجل اسمي يارجوايه
***
.
عادل العبد الله
19.11.2016
https://t.me/adela313
الفاتحة لروح من علمتني الخدمة الوالدة *آمنه العبدالله*

كلها زوار -الاربعين


كلها زوار..اتعنِتك رغم البعد يبن الزچيه
كلها زوار ..وآنه حسره منحرم واصفچ بديه
----
اتعنتك يابوعلي كل المجانين
ناس تمشي عالجدم ناس اعله ليدين
وآنه من اسمع ينادو جينا يحسين
اختنگ وابخدي تجري دمعة العين

كلها زوار..تلهج ابذكرك ترى صبح اومسيه
كلها زوار ..وآنه حسره منحرم واصفچ بديه
----
أحترگ مو مره تدري الف مره
وخاطري اشگد انكسر وانته تجبره
امقصر آنه واستحق ماألگه نظره
وأنته أدرى بلـ يجيلك أنته أدرى

كلها زوار..دوم تتحدى الخطر ويه المنيه
كلها زوار..وآنه حسره منحرم واصفچ بديه
----
زايرينك گاصده ابسود الملابس
اوتستجن بسمك يهلجنيت عابس
اوبالمشي تنصب الك اعظم مجالس
اشگد على حبك يوالينا تنافس

كلها زوار..تمشي ماهمها الألم يابورقيه
كلها زوار..وآنه حسره منحرم واصفچ بديه
----
تدري زوارك حضت باعلى المراتب
اوتفتخر بسمك رغم كل التحارب
شمسك البراقه ما يخفيها حاجب
اتموّت العاداك من اهل النواصب

كلها زوار..كل وكت يابوعلي تبقى وفيه
كلها زوار..وآنه حسره منحرم واصفچ بديه
----
ترفع الزوار رايتها ابحنينك
اوتعتنيك ابكل دمعها زايرينك
اتواسي زينب بالمشي ابيوم اربعينك
ابرغم كلشي خالده تبقى سنينك

كلها زوار..عالعهد وياك تبقى ياشفيه
كلها زوار..وآنه حسره منحرم واصفچ بديه
----
عادل العبد الله
22.10.2018
https://t.me/adela313
الفاتحة لروح من علمتني الخدمة الوالدة *آمنه العبدالله*

أصرخ ابصوت النحيب
ماكتب اسمي حبيب

وآنه دمعاتي على خدي جريه
اشلون اظلن منحرم يبن الزچيه
----
تخنگني جمرات البُعد..اومني الدمع ظل يجري
ما احتمل يابوعلي.. الفرگه تِكسر ظهري
جسمي انتحل وابچي واون ..اومني خلص كل صبري
من دونك اشيسوى العمر..ريتك تِقصفه عمري

جرحي لتظن يُستطاب
ابغيرك ابگه بالعذاب

دوم اذكرك كل صباح اوكل مسيه
اشلون اظلن منحرم يبن الزچيه
----
من هجرك اشلون ارتوي.. وآنه العطش بشفافي
اسهر واعد يومي ابشهر.. واهمومي فوگ اچتافي
اذكر أنا ابذيك السنه.. ماشي اعله جدمي حافي
بس هسه مذبوح الوضع..شوصف بعد موكافي

ادخيلك آنه ارتجيك
بالله خليني اجيك

العيشه دون ازيارتك چنها المنيه
اشلون اظلن منحرم يبن الزچيه
----
تعرفني باوقات العزا ..ناذر إليك اونيني
اوصدري اضربه ابراحتي..والدم يهل من عيني
اولمن يمر اسمك احس..شهگاتي بس تچويني
اوتدري بليا ازيارتك ..ظلمه تظل اسنيني

ابفرگتك صرت ابعويل
اودربي اصبح مستحيل

ارد ازورك اقسم ابخاطر رقيه
اشلون اظلن منحرم يبن الزچيه
----
العايش حياته ابحضرتك… معنى الهجر ميفهمه
والمبتعد عنك يظل.. مايعرف طعم البسمه
والمختنگ منه النفس .. ايريدك عطر يشتمه
والينظُرَك انته الضوا.. ابغيرك يشوف الظلمه

انته جنات النعيم..
اليتركك يلگه الجحيم

خل اجيلك وامحي كل دَين العَليه
اشلون اظلن منحرم يبن الزچيه
----
حضنك متى ارجع إله .. وانسى سعير الغُربه
واگعد على صحنك واحن..اوعيني اعله گُبْتَك تربى
وانظر مواكب بالزحف.. اوكلمن يرف ابگلبه
واللي يموت ابمرقدك .. تحضر إله موصعبه

بيدك الـ كاف اويه نون
يامُعين اهل الجنون

يمك اشملني مع الجاتك وفيّه
اشلون اظلن منحرم يبن الزچيه
----

عادل العبد الله

16.10.2019

https://t.me/adela313
الفاتحة لروح من علمتني الخدمة الوالدة *آمنه العبدالله*

..

للمحرومين (الاربعين)

شفت بعيوني زوارك..كلمن بيده الرايه
وانا المحروم واتمنى..أصيرن ليك مشايه
*.**
صعب اطري على نفسي. .مو مكتوبه لزياره
ولمن انظر الزوار . . ابقهرها عيني تتجاره
يريت اوچملة الـ ياريت. . تصيح اعليّه محتاره
حاولت اجبر احوالي..بس ماكو أبد چاره
ونار احشاي متفجره..وصرت اشكي من اضمايه
*
ضامي ومنحرم منك..واحسه ملتوي ظهري
وادري بالتعب يچوي..اوناره ياكل ابعمري
ما لومن على نفسي. .اذا يجزع بعد صبري
حگي ياحُسين اصرخ ..منو يجبر ألم كسري
تدريني أنـا لولاك..ما صح اكتب اقرايه
*
أنا لولاك يامولاي.. ميحق حتى اتنفس
ولا اقدر اشوف الكون.. اودونك مگدر اتحسس
يعين الله وأنا مشتاگ ..اوچني ابهالوضع اخرس
شلون اگدر على فرگاك ..وانته للگلب مأنس
خيره لو اظل محروم.. وانته ادرى بالغايه
*
اظل اتخيل اضريحك..من ألفي الحسينيه
واظل ابچيك واتحسر..يامولاي يوميه
واسولف قصة احزانك..واردد كل نواعيه
يمن بفضالك اشتاگت..بحضن شباچك الريه
وعلى گُبْتَك يبواليمه..اشكثر مشتاگه عينايه
*
اشكثر ناجيتك ابدمعي..واحس چن ضايع ابغربه
اوعيني سيدي اشتسوى.. اذا ما تنظر الگبه
وحگ امك يبوالشيمه..چَبدْتِي تبگه ملتهبه
واذا عنك تبعّدني..بيمن اطلب الگُربه
د رحم گلبي لمعذّب ..اوعليّه حن يرجوايه
***
عادل العبد الله
11.11.2016
https://t.me/adela313
الفاتحة لروح من علمتني الخدمة الوالدة *آمنه العبدالله*

للمحرومين (الاربعين)

شفت بعيوني زوارك..كلمن بيده الرايه
وانا المحروم واتمنى..أصيرن ليك مشايه
*.**
صعب اطري على نفسي. .مو مكتوبه لزياره
ولمن انظر الزوار . . ابقهرها عيني تتجاره
يريت اوچملة الـ ياريت. . تصيح اعليّه محتاره
حاولت اجبر احوالي..بس ماكو أبد چاره
ونار احشاي متفجره..وصرت اشكي من اضمايه
*
ضامي ومنحرم منك..واحسه ملتوي ظهري
وادري بالتعب يچوي..اوناره ياكل ابعمري
ما لومن على نفسي. .اذا يجزع بعد صبري
حگي ياحُسين اصرخ ..منو يجبر ألم كسري
تدريني أنـا لولاك..ما صح اكتب اقرايه
*
أنا لولاك يامولاي.. ميحق حتى اتنفس
ولا اقدر اشوف الكون.. اودونك مگدر اتحسس
يعين الله وأنا مشتاگ ..اوچني ابهالوضع اخرس
شلون اگدر على فرگاك ..وانته للگلب مأنس
خيره لو اظل محروم.. وانته ادرى بالغايه
*
اظل اتخيل اضريحك..من ألفي الحسينيه
واظل ابچيك واتحسر..يامولاي يوميه
واسولف قصة احزانك..واردد كل نواعيه
يمن بفضالك اشتاگت..بحضن شباچك الريه
وعلى گُبْتَك يبواليمه..اشكثر مشتاگه عينايه
*
اشكثر ناجيتك ابدمعي..واحس چن ضايع ابغربه
اوعيني سيدي اشتسوى.. اذا ما تنظر الگبه
وحگ امك يبوالشيمه..چَبدْتِي تبگه ملتهبه
واذا عنك تبعّدني..بيمن اطلب الگُربه
د رحم گلبي لمعذّب ..اوعليّه حن يرجوايه
***
عادل العبد الله
11.11.2016
https://t.me/adela313
الفاتحة لروح من علمتني الخدمة الوالدة *آمنه العبدالله*

أصرخ ابصوت النحيب
ماكتب اسمي حبيب

وآنه دمعاتي على خدي جريه
اشلون اظلن منحرم يبن الزچيه
----
تخنگني جمرات البُعد..اومني الدمع ظل يجري
ما احتمل يابوعلي.. الفرگه تِكسر ظهري
جسمي انتحل وابچي واون ..اومني خلص كل صبري
من دونك اشيسوى العمر..ريتك تِقصفه عمري

جرحي لتظن يُستطاب
ابغيرك ابگه بالعذاب

دوم اذكرك كل صباح اوكل مسيه
اشلون اظلن منحرم يبن الزچيه
----
من هجرك اشلون ارتوي.. وآنه العطش بشفافي
اسهر واعد يومي ابشهر.. واهمومي فوگ اچتافي
اذكر أنا ابذيك السنه.. ماشي اعله جدمي حافي
بس هسه مذبوح الوضع..شوصف بعد موكافي

ادخيلك آنه ارتجيك
بالله خليني اجيك

العيشه دون ازيارتك چنها المنيه
اشلون اظلن منحرم يبن الزچيه
----
تعرفني باوقات العزا ..ناذر إليك اونيني
اوصدري اضربه ابراحتي..والدم يهل من عيني
اولمن يمر اسمك احس..شهگاتي بس تچويني
اوتدري بليا ازيارتك ..ظلمه تظل اسنيني

ابفرگتك صرت ابعويل
اودربي اصبح مستحيل

ارد ازورك اقسم ابخاطر رقيه
اشلون اظلن منحرم يبن الزچيه
----
العايش حياته ابحضرتك… معنى الهجر ميفهمه
والمبتعد عنك يظل.. مايعرف طعم البسمه
والمختنگ منه النفس .. ايريدك عطر يشتمه
والينظُرَك انته الضوا.. ابغيرك يشوف الظلمه

انته جنات النعيم..
اليتركك يلگه الجحيم

خل اجيلك وامحي كل دَين العَليه
اشلون اظلن منحرم يبن الزچيه
----
حضنك متى ارجع إله .. وانسى سعير الغُربه
واگعد على صحنك واحن..اوعيني اعله گُبْتَك تربى
وانظر مواكب بالزحف.. اوكلمن يرف ابگلبه
واللي يموت ابمرقدك .. تحضر إله موصعبه

بيدك الـ كاف اويه نون
يامُعين اهل الجنون

يمك اشملني مع الجاتك وفيّه
اشلون اظلن منحرم يبن الزچيه
----

عادل العبد الله

16.10.2019

https://t.me/adela313
الفاتحة لروح من علمتني الخدمة الوالدة *آمنه العبدالله*

..

اگلوب كل التخدمه مفطوره
تنتظر يمتى تجي واتزوره
---
نية الخدام تلفي الكربله
اتزور ابواليمه اودمعها تهمله
السنه محروم اوتحسن بالبله
والچبود امن الألم مجموره
---
اشگد تمنت ترفع ابدربه العلم
أمنيه تتعنى مشايه الخدم
اوتدخل الصحن القداسه والقيم
وترتجي تتبرك اهيّه ابسوره
---
العام چانت هيّه بين الحرمين
نظره للعباس نظره للحُسين
تقرا لطميه اوتهل دمعة العين
هسه دون ازيارته مأسوره
---
اشتاگت الذاك التعب و الإزدحام
صعبه تسمعها مَزرتوه الإمام
هيّه دون ازيارته تبگه ابهيام
اوصارت ابهذا الوضع معذوره
---
چانت ابكل موكب اتحوم اوتنوح
اولجل ابو اليمه الگلب ينبض جروح
شلون حالتها السنه صعبه تروح
واصبحت من الجرى مقهوره
---
مانظن يحرمها أجر ازيارته
حتى لو ما زارته في حضرته
تكفي نيتها توّصل عتبته
لاشك ابهذا السعي مشكوره
---
عادل العبد الله
6/10/2020
https://t.me/adela313
الفاتحة لروح من علمتني الخدمة الوالدة *آمنه العبدالله*

*خويه..الگبرك..صارت نوايح والگلب يسعر*

ابيوم اربعينك جيت..وادموعي تجري
اوراسك ترى جبناه..وانته اللي تدري
ريتك إليّه اتگوم.. واتشوفه ظهري
محني اومن الآلام..نيراني تسري
*خويه..الگبرك..صارت نوايح والگلب يسعر*

مكسوره اتلگاك..روحي شجيه
راح اخبرك بالصار..من جور اميه
ضربوني ولعيناي..اشگف بديه
واعذرني ماهي اوياي..بنتك رقيه
*خويه..الگبرك..صارت نوايح والگلب يسعر*

طول الدرب انعاك..وانعى گمرنا
اوماتدري وابكل حين..زايد جمرنا
تشمت ترى العدوان..ابشوفة كسرنا
اوكل لحظه خويه احسين..تتعب نظرنا
*خويه..الگبرك..صارت نوايح والگلب يسعر*

ضيم السبي ياخوي ..چم مره يذبح
اوسوط الشمر ياحيف..بمتوني يجرح
اوماتدري چم اهوال.. بگليبي يفتح
ايسبني اويسب أمنا..بالگسوه صرّح
*خويه..الگبرك..صارت نوايح والگلب يسعر*

راسي امتلى بالشيب..ماچني زينب
ذبلانه كلي اهموم..واگليبي يلهب
واعظم عليّه يوم..جسمك تخضب
اوظلي صبح مكشوف..هالحاله تصعب
*خويه..الگبرك..صارت نوايح والگلب يسعر*

عادل العبد الله
16.10.2019
https://t.me/adela313
الفاتحة لروح من علمتني الخدمة الوالدة *آمنه العبدالله*