معگوده آمالي معگوده آمالي
في مولدك حيدر معگوده آمالي
* * *
هالليله ياحيدر في مولدك جينه عين العدو اشواك واعليها خطينه
ماننسى يابو حسين وفايّه تدرينه
صحناها من اسنين لا ما تخلينه

دايم على بالي .وانته اللي تحلالي
في مولدك حيدر معگوده آمالي

* * *
ياحجة الرحمان ياغاية الشيعه
واجب يانور الله نهجك علي نطيعه
وبساحة الإخلاص لحن الوفه نذيعه
وچلمة علي بكل دور معناها لك بيعه

وانادي هنيالي .غيرك مَلي والي
في مولدك حيدر معگوده أمالي

* * *
هالليله يابوحسين هنينه هادينه
ياسيدي وبسمك نبعث تهانينه
وكل الورود لجلك بهالبشره طشينه
گلوب التحب اوتار تعزف امانينه

يامغيّر احوالي صوت الفرح عالي
في مولدك حيدر معگوده أمالي

* * *
من نشأة التكوين بحبك تغذينه
وياسيدي وذكرك ظل منحفر بينه
غيرك يسر الدين ماشفنه واهوينه
وانته ولي النعمه وابدربك امشينه

صرت انت موّالي ياأول وتالي
في مولدك حيدر معگوده أمالي

* * *
تدرينه يوم الضيچ بس حبك احمانه
ياحاضر الشدات بس انته رجوانه
ويوم الحشر ندري يالمرتضى اويانه
وعند الصراط انته تحضر يمولانه

وجداني غنالي يهتف علي الغالي
في مولدك حيدر معگوده أمالي

* * *

لخادم اهل البيت / عادل العبد الله

چم مكرمه يابالحسن عادتلك
وندري شمس الله ابخجل عادتلك
بدنى سبب أهل الحقد عادتلك

شافوا على سيفك جرى دم الشر
.............

گلبي الرحابك ياعلي وديته
وفيته دين ازيارتك وديته
ماغيرك آنه عالبشر وديته

ياجوهر اسرار الخلگ ياحيدر

عادل العبد الله

.. انته خير العمل..
..تبقى نبض الأمل..
علي علي ..علي علي
----
يلهج لساني ابذكرك اويتعطر
يالبسمك آنه افتخر يا حيدر
تبقى حياتي والذخر بالمحشر
ياللي ضريحك بالنظر ظل يسحر

..ياللي كلك عجب..
..مدري شنهو السبب..
علي علي ..علي علي
----
غصن العشگ بسمك نمى يامولاي
يا اعذب اويا أصفى حتى امن الماي
يم عتبتك ظلت تشوبح عيناي
واتمنى بس طول الوكت تروي اضماي

..يحلى بيك الفرح..
..اوگلبي ليك انشرح..
علي علي ..علي علي
----
سجدت إلك كل الكُره الارضيه
يالذاتك امن المصطفى قدسيه
ياللي ابحروفك تنتعش كل ريه
اوكلمن يحبك يبقى صافي النيه

..كل محب مستجن..
..مايغمِّض جفن..
علي علي ..علي علي
----
ماي الوجه لجلك ترى ذبيته
اوفرض الموده بس إلك اديته
واللي يحبك عن عشگ خاويته
واللي يكرهك سيدي خليته

..آنه لجلك عبد..
..عالبلا مَرتعِد..
علي علي ..علي علي
----
يراية الله المُلهمه بلأقطار
صرحك فخر لهل الشرف ياكرار
اومن وجهك اقتبست شمسنا الأنوار
وابأسمك افلاك المجره تندار

..انته سر النعم..
..دافع الكل نقم..
علي علي ..علي علي
----
عادل العبد الله
٢٣.٣.٢٠١٨

والينا والينا انته الامير ابكل فخر والينا
*
يابوشبر .. حگنه نفخر
عالبشر بولايتك
مانساوم ..نبقى دايم
لك نجدد بيعتك
والعواذل لو تجادل
ماتروح امحبتك
يا سندنا ماكو عدنا
غير نرفع رايتك

تنجينا تنجينا بساعة عسر يابالحسن تنجينا
*
من مثيلك .. يالجزيلك
انطه للمعنى قيم
عالي وصفك ..يللي چفك
فاق انواع الكرم
بالمواقف ..انته هادف
بيك نوصل للقمم
كلك آمال ..وندري بالحال
ماتردنا ياشهم

توفينا توفينا بطلبتنا لو هيّه صعب توفينا
*
امنيتنا ..ياعشگنا
نعگد ابصحنك حفل
وكل رجانا ..ياحِمانا
كل شي نقراه ينقبل
مانجافي ..انته وافي
وابطريقك نمتثل
والهتفلك ..مانمّلك
تكتب اسمه بالسجل

تهدينا تهدينا بدرب الأمل انته الذي تهدينا
*
انته معروف ..بسمك انشوف
كل كرامات الوجود
ماكو غيرك ..ياللي خيرك
مانقيسه بالحدود
جننتنا ..وحيّرتنا
بسمك انهلكت ثمود
مانتركك ..واللي شكك
بنورك اتصيبه ابرعود

نادينا نادينا بسمك علي طول الزمن نادينا
*
تبقى حيدر ..اغلى جوهر
وبيك سابينا الهيام
مانعوفك ..وابحروفك
تدري خطينا الغرام
بالصراحه ..انته راحه
بذكرك انعيش ابوِئام
بكل بدايه تبقى غايه
يا نهايه ابلا ختام..

تنطينا تنطينا صك الجنان ابيمنتك تنطينا

*
عادل العبد الله

اللي عنده انته ميبدل حبيب.
واليحب اشلون يقبل بالبدل

عاصمة عشاگ انته بالگلوب..
جننت عقل المحب بيك انثمل

وشحلو اسمك ثلاث امن الحروف
سهل لفظه ماكو حاله امن الملل

دوم اصيحن ياعلي اوثغري بهيج
ابكل حياتي تبقى اروع مستهل

عادل العبد الله

على ذكرك ربينه
علي أنته ولينه
* * *
علي باقي خلودك باقي معناك
ياشمس الهدايا التجري لافلاك
يمن بيدك خدم أرواح واملاك
وصكوك الجنه كلها أسر يمناك
يا منجى السفينه
علي أنته ولينه
* * *
علي يانجم شعشع بالسموات
نزل قرآن مجدك مُحكم آيات
وعن دربك أبد منحيد هيهات
بأسمك بالحفل نرفع صلوات
يتحتم علينه
علي انته ولينه
* * *
يا فارس گدر يبرز بلاحزاب
وابخيبر بعد منهو الشلع باب
عجب أنته اومنك شفنه لعجاب
أصلك من ذهب تتسمى بو اتراب
أبونا وملجى لينه
علي أنته ولينه
* * *
من غيرك على افراش النبي نام
وعلا كتفه ابفقاره وكسر اصنام
ومن غيرك أبو الفقره والايتام
تحرسها ابعيونك لو بالاحلام
ننادي ابكل سكينه
علي انته ولينه
* * *
بالعين أصبحت عالي بالازمان
لامك عجبّت لولو أعلى مرجان
وياءك ياحبيبي درس إيمان
وإسمك ينطقك من غير شفتان
بيك أحنه رجينه
علي انته ولينه
* * *
لخادم أهل البيت (ع) :
عادل العبد الله

يشريان العشگ یمخالط اوي الدم
وبنفاس المحب اسمك عطر ينشم

تهيمنه حروفك
نموت او ما نعوفك

* * *
حروفك مدرسه واتخرج الأحرار
وابنهجك تروّه كل شخص بفكار
واحنه نقتدي من ميثم التمار
لأن شاف الحقيقه بامرتك تندار

واحنه عالعهد نمشي ابدرب واحد
والباري علينا يا علي شاهد

امل انته نشوفك
نموت او ما نعوفك

* * *

بيك اشچم عقل اتدبر اتحير
وراد ايوصفّك لاچنه ما يگدر
وبسمك كل موازين الفلك تفتر
يمن قرص الشمس رديته ياحيدر

عجيبه اشلون وانته اللي قلعة الباب
تضحك بالحرب بس تبچي بالمحراب

وبعد تكرم ضيوفك
نموت او ما نعوفك
* * *
حرب الله اوسلمه يا علي سلمك
وأسد انته بفقارك ينرعب خصمك
ويشوف الموت حتماً لودنى يمك
وهذا مو محاله وانته ميهمك

تحديت الكفر كل عمرك اتحارب
ولأن شمسك تشع ماتختفي ابحاجب

وآياتك تطوفك
نموت او ما نعوفك
* * *
مثل شخصك يوالينه صعب وصفه
أقل چلمه عليك الأمه مختلفه
تظل حامي الحمه يا صاحب الكلفه
والمهجه تظل لساعه متلهفه

يبگه لك عشقنه لو تِفَجَرنه
وتدري مايهمنه من يكفرنه

تعرفنه سيوفك
نموت او ما نعوفك

* * *
يسر الله وكتابه ومُحكم التنزيل
يمن كل آيه بس عندك لها تأويل
واگبالك يحيدر انحنى جبريل
يلبي ابخدمتك ويقدم التبجيل


وأحنه يا علي نفدي لك الارواح
يمن حبك ثبت بينا أبد منزاح

تسحرنه طيوفك
نموت او ما نعوفك
* * *
عادل العبد الله

ابليا انته مدري آنه وين اروح ..
واذا جيت الغيرك اتلگه الكلل

لا وِلد ينفع اذا صار الحساب..
هم بعد ما ينفع اتلبي الأهل

ماكو فرصه للي ماودك أكيد..
النار تصرخ يلا جيبوه ابعجل

وانا ما بين الجنان اويه الجحيم ..
بصوتي ناديتك علي خير العمل

انتشلني من ركام المذنبين..
ترجف ايديّه تعب من الوجل

حالي اصبح چن مثل حال الغريب..
ابلا هويه والغصن منه ذبل

تايه ابفكري يمين اويه شمال..
وخطوتي مستعجله مَمشي ابمهل

ياعلي وياك شوصل للختام..
وآنه لسه بالبدايه بي شلل

منك اتعلم دروسي ابهالحياة .
.ما اذلن روحي لصنام الجهل

وبالتجارب اصنع ادروع الإباء..
ومنك استلهم حروفي والجُمَل

ابراحتك بيّه وعلى كيفك يكون..
خادمك أبگه يحماي الدخل

عادل العبد الله

زينب اشگد انفجع بمصابها
والله ذنبي اعليها زاد اصوابها

* * *
انطبع ذنبي ابسجل الخاطئين
وين اودي وجهي ما ادري لاوين
صوب زينب لو لعد صوب الحُسين
ودمعة اعيوني اطلعت لغيابها

* * *
وچنه ذنبي خله زينب عالهزل
وخله دمعتها على خدها تهل
بسوط يقهرها ويلوعها النذل
ومختشى منها بعد سلابها

* * *
ابذنبي گلب الطاهره ظل منفطر
عالمكارم صرت ما عندي صبر
شلون وآنه الانفجع من تنذكر
واملي صفحات الحزن بكتابها

* * *
والله خجلان امشي مابين الانام
روحي ليها امقصره بنت الكرام
حگي ابچي وليلي كله ما انام
وليّه زينب حگها تبدي اعتابها

* * *
ياعجيبه لوّن جسمي ابمغتسل
الله عوني شلون ابگه ابلا امل
وعندي حب الحره بت خير العمل
محور الكون وجميع اقطابها

* * *
چني اتخيل مسيت ابحفرتي
وبس احاتي من يردها وحشتي
وتنجلي بعد الاماني شدتي
وزينب التاخذني صوب ارچابها

* * *
شلون روحي لو اجا وگت الحساب
شايل اذنوبي وعلى امتوني الكتاب
شنهو عذري بالله شنطي من جواب
وادري زينب ماترد طلابها

* * *
ولوّن بالمحشر بگيت آنه وحيد
وآنه بين الظلمه والوحشه طريد
غير بت المرتضى الگلبي تهيد
ما تخليني وأنا عد بابها

* * *
من فرط ذنبي بعد خف الوزن
ولا عمل عندي واموتن مطمئن
اتذكرت دمعي على زينب يحن
اليوم بدموعي لذت بترابها

* * *
لخادم أهل البيت (ع) :
عادل العبد الله

نزف عمري قهر من بعد لحسين
وگضيت آنه الدهر بس أهمل العين
زينب آنه اسمي.. عِشْرَه ويّه همي
نزف عمري قهر من بعد لحسين
*
انا اللي انحب وانعي. واغرّگ روحي بالعبره
ّما لحظه غمض جفني ..وابد مابردت الجمره
تبدّل حالي واتغيّر..حين الراحت الزهره
شسوي ابعمري مايجدي.. وعزي اتوسد ابحفره
تعثر صبري واتألم.. وجرح گلبي صعب يبره
واتذكر اخويه احسين. لمن عفته عالغبره

اوماانسى الگمر زيّد عويلي
خلاني ابكدر مهدود حيلي

ذابل صبح جسمي .. عِشْرَه ويّه همي
*
بعد حرگ الخيم بالطف.. الرعب يفتر على الاطفال
بعضهم يعثر ويرجع .. البعض يتلگه چم اهوال
البعض يحبس دموع العين .. خوفه من ضرب لانذال
وآنه حالتي صعبه.. وحدي ما إلي كفال
انخسف يم النهر روحي..واحس بيّه صبح زلزال
واظن ماتگوه لجروحي.. الصخور الراسيه ولجبال

اصبّح عالجرح يوميّه وانهان
واتلگه الهضم اشكال والوان

محد بگه يمي.. عِشْرَه ويّه همي
*
عانيت اشكثر عانيت ..حتى ذبلت اجفوني
ومن كثر الضرب بالسوط ..تورمن كلهن امتوني
وحين اللي دخلت الشام.. بني اميه يشتموني
يگلولي اخوتچ وين.. ولفظ گاسي يسمْعوني
(ها زينب چتلنا احسين) ابهالجُمله يأذوني
شحچي وآنه اتمنى.. على ذبحه يذبحوني

تمنيت العدا ايذبحوني يمه
ولا ابگه ابعذاب الصعب لچمه

فدوه يجري دمي.. عِشْرَه ويّه همي
*
اناظر راس ابن امي ..واتذكر طفولتنا
حين العشنا وي امنا ..وابونا الساس هيبتنا
وكتها چنا ملمومين.. اشحلاها ذيچ گعدتنا
ما صدگ بعد راحت ..سوالف كل مودتنا
وإجتنا النايبات ازحوف ..وانهانت كرامتنا
وبتنا بالخرابه آآه… ابوسطها شفنا ذلتنا

اصبّح بالضرب واتمسّه منه
وي كل الحرم تطلع لي ونه
بيّه اعداي ترمي.. عِشْرَه ويّه همي
***
متهنيت كل عمري.. شفت كل مِحنه تچويني
وتاليها ارجعت لحسين ..ارد راسه الـ يبچبني
واقرا كل مراثيّه… واصب الدمعه من عيني
وابثها شكوتي لعباس.. لاترضى تخليني
هذي قصتي الگشره.. منها اتخلد اونيني
وآخرها استلمت الموت.. بيْه انختمت اسنيني

وحدي ابغربتي مدفونه بالشام
ويايه ادفنوها كل لالام
تحضر عنوه امي .. عِشْرَه ويّه همي

لخادم أهل البيت (ع):
عادل العبد الله

على الكاظم تنوح الجعفريه

وتواسي فاطمه الزهره الزچيه

* * *

على الكاظم تنوح ابدمع لعيون

وأصبح كل گلب من أجله محزون

غصص شاهدها والـلـه ابذيچ لسجون

يا ويلي و گضه ابسم المنيه


* * *


انمرد چبد الإمام ابسم لوغاد

وشالوا اجنازته من جسر بغداد

وصبح زلزال نعشه ابن لمجاد

ويهز حكم الطغاة الجاهليه


* * *


ابگيد وسلسله متحمل الآه

موسى الكاظم احنا حاشا ننساه

ركضت شيعته وصاحت أويلاه

ليش أعله الجسر جثته رميه


* * *

وين أهله اويشوفون الجرى له

ابن جعفر أويلي شلون حاله

العـــالم على امصـــابه بچــــاله

وبچت لجله السموات العليّه


* * *

مولانه الصبر أبرز صفاته

وابوسط السجن خِلصت حياته

وشاعو بالخبر قصة مماته

وسف واشگد تحمل من أذيه

* * *

لجله ننصب الليله عزانه

وعليه انصيح وخل تشهد عدانه

لطمنا وأمه الزهره معانه

تنادي ابحسره والونه خفيه

* * *

صحنا والدمع منا تحدّر

ابهيبه اندفن موسى ابن جعفر

لاچن جده احسين أبو الأكبر

بگه مرمي على حر الوطيه


* * *


خادم أهل البيت (ع) :
عادل العبد الله

من ارشيف 1433

يالكاظم بابك دگيته
ودمعي دايم ليك اجريته
*
جيت البابك ابچي وانحب
وگلبي ابزود الحسره يلهب
من اهمومي اشگد اتعذب
وغيرك تدري مترجيته
*
تسبيحي انته وآياتي
وبسمك تحلى كل ابياتي
ياسلوة روحي وغاياتي
حبلك بالرجوه شديته
*
ارفع دايم بسمك چفي
وحاشا ابگربك يرتد طرفي
رايد چاره اعليّه تكفي
يامن ما گاصد خليته
*
عندي چم بلوه اوتعلمها
وادري ابحضنك انته اتلمها
روحي بس انته التفهمها
يامن كل عاسر فكيته
*
بشباچك لازم إيديّه
لاتحْرمني من كل جيّه
فكني من اخطار الدنيا
حگگ ليّه لتمنيته
*
اهوايه اتمنى الشيعه تمتد
من كل بقعه وعندك تسعد
متخوفها ارصاصة مُعتد
والجالك حتماً وفيته
*
يلبابك واضح نِندَله
توفي السايل حاشا اتخذله
ابگد اخلاصه انته اتقبله
لو معتل انته داويته
*
صرحك مشفى اوبيْه انداوي
او جودك من خير الله ايساوي
يلكل نعمه اسمك حاوي
والأصعب انته الحليته
***
لخادم اهل البيت (ع):
عادل العبد الله
2-5-2016

واجب عزانه انجدده

يا سابع أنوار الهُدى

عمرك گضيته بالسجن

ياعجبه غمضت الجفن

* * *
صرختنه بسمك ترتفع أقبلها يبن الزهره

ولجلك نهل دم ودمع ونار الگلب متوجّره

وعرش الـلـه أصبح منفجع ينعى عليك ابحسره

والدنيا ظلمه ابلا شمع وبينا الجرح ما يبره

معقوله يا نعم الولي

تتگيد ابأمر الشقي

ومن الأذى گلبك يحن

ياعجبه غمضت الجفن


* * *


چم صوره من حال الألم مرسومه يا مولانه

جسمك تعذب ما سلم .ريت الحصلك جانه

ومثلك ترى الحيل انهدم وصار اللظه بحشانه

وكل خادم اگليبه انهظم وما غمضت اجفانه

كل مره تبدي حسرتك

وندري مراره قصتك

مولانه حيرت الذهن

ياعجبه غمضت الجفن

* * *


ما واحد أعليك ارتهب .كلهم طُغاة الأمه

ذله ومهانه والعجب عدهم مَظلت رحمه

وانته ابسلاسل تنتحب وانهارك أصبح ظلمه

وگلبك جريح اويلتهب .ويصعب نزيفك لچمه

جرحك نزف من الدمه

وحلت عليك الموزمه

ودايم على أهلك تون

ياعجبه غمضت الجفن


* * *

صابر تظل رغم القهر .ما تخشى كل عدوانك

ومهما على شخصك جِسر .ما يُنتقص من شانك

تبگه المثل بين السير .ثابت يظل برهانك

ما تنمحي ويه الأثر .وانته الفخر نيشانك

يبن الوديعه الشافعه
ضاگت عليك الواسعه

وارث علامات الحزن

ياعجبه غمضت الجفن


* * *


اللي ابسجن تِلفي هله ويفرح دليله ويستّر

بس انته ما بين المله محد إلك يتخطّر

واللي إجه صوته أعتله .كافي بعد نتنطّر

أطلع يبن عقد الوله .للشيعه باحسن منظّر

جاوبته بالجُمعه الفرج
وبحساسه تسعد كل مُهج

خاب الرجا وحگه يجن

ياعجبه غمضت الجفن

* * *

لخادم أهل البيت (ع) : عادل العبد الله
من الارشيف

يم حضرتك يالكاظم
جيت وإلهي العالم

جيت بخشوع
أجري الدموع
وانطر جوابك

* * *
جيت ابكل خشوعي الحضرتك مولاي
جيتك ألتمس كل منفعه لدنياي

وادري ماتخيّب سيدي رجواي
تگضي الحاجه لو مهما ثگل بلواي

يالأسمك حصن من كل ضرر حمّاي
لو بيّه سُقم اتشفى وانته ادواي

عبدك أنا واتنخاك
امسح عليه ابيمناك

وصلك وِئام
يبن الكرام
وآنه اعله بابك


* * *

يالنورك حواني ابجوهر المنظر
وعلى عتبة ضريحك روحي تتعطر

ضيفك آنه حاشا ارجع امحيّر
اقسم بالزچيه والوصي حيدر

إذا دهري معايه بالعكس يفتر
أظل وياك متمسك يبن جعفر

عهدك وسط دلالي

يا غايتي وآمالي

انته الأمان
عهدك ضمان
عشت ابرِحابك

* * *
أطوف اضريحك وارفع مناجاتي
واسلي روحي يمك تحلى أوقاتي

تخمِّد كل بدايه بيها جمراتي
ويمك تنتهي يالوالي آهاتي

تظل مثل النجم باعلى سماواتي
وادورك وادري انته عايش ابذاتي

انته الهوى البنفاسي
واتملكِت احساسي


طبعك عطوف
ولمن أطوف
أشتم ترابك

* * *
شباچك احضنّه سيدي ابلهفه
واذِكرك بسمّله اومني الفكر يصفه

صعب عيني التشاهد گبتك تغفه
واللي بخاطري ما غيرك ايعرفه

ومثل شخصك يقيناً موسهل وصفه

يالبيدك إمامي تنحل الكلفه

ذات القُدس من ذاتك
ومعروفه كل آياتك

في كل مُراد
عندي اعتقاد

بصفحة كتابك

* * *


يظل وسط الگلب يالوالي عنوانك
وتظل انته الشرف يالمرتفع شانك

يقرآني وثبت بالعزه برهانك
وأبد مالحظه انسى سيرة احسانك

وأنا الماخذ درس من فاضل ايمانك

ورغم كل القهر متهمني عدوانك

بيك الوسيله تجدي
والغيرك آنه اشعندي

دايم معاك
ياللي عِداك
كلها تهابك

* * *
لخادم أهل البيت (ع):
عادل العبد الله
من الارشيف

يا امامي بالسجن آية وجودك
ياعجب واتسبح الباري ابگيودك
وانگلب معنى الحبِس
صار حضره من قُدِس
* * *
. ..
السجن اصبح إلك موضع صلاتك
ومنه اتناجي العظيم ابكل حياتك
وتشكرالله لنه حقق امنياتك
وافرغك لجل العباده بتضحياتك

لو ردت تتوضا لجلك كلشي يخضع
وكلها اغلال الحديد اوياك تركع

ابوجهك اتضوه الشمِس
صار حضره من قُدِس
* * *
عينك ابوكت السحر يالوالي متنام
وابقنوتك تدعي ربنا طول لايام
ومنها سجّانك يهابك يبن لكرام
ابعزمك اتحارب ولينه كل لاوهام

حتى اصبح كل حقود ابأسمك انذل. .
واللي يتجرأ امامي عقله مختل

يامن ابفيضك نِحِس
صار حضره من قُدِس
* * *
ابثغرك اجمل ادعيه تسمعها لاملاك
اعليك والله اتعودت ارضك مع اسماك
وكل نجم وي رجوّتك يتوسل اوياك
وحين تسجد تزهر ابعطرك مُصلاك

وموغرابه تحتضن كل الكواكب
وابرحابك تقرا آيات المناقب

ولو ترب جسمك يمس
صار حضره من قُدِس
* * *
صبرك ابسجنك يظل عِبره للاجيال
وانته متهمك ولينه گوم لنذال
وكون تحت امرك بعد مولانه لغلال
ولو تحل شده تبدلها بالآمال

عطفك وجودك مِلى كل المجرات
وكل جزء منك يمثل معنى الايات
الكون منك يقتبِس
صار حضره من قُدِس
* * *
شنحچي عنك وانته اعظم قدوه لينه
ياللي بسمك صارت اتلوذ السفينه
صعبه نسمع عن امام امسممينه
وعالجسر كل شيعته مستقبلينه

عجبه يامن تلتجي ليك البريه
امصيبتك بيها شبه بالغاضريه

يومك اصبح چالأمس
صار حضره من قُدِس
* * *

لخادم اهل البيت :
عادل العبد الله

ليلك صاير ليل اجراح
اوجسمك عجبه مايرتاح

شنهو الحاصل.جسمك ذابل . يالكاظم
---
بالسجن محروم من شم الهوه
اوعينك القدسيه متشوف الضوه
واظن من جسمك غصن گوه ألتوه
وكل جروحك يصعب اعليها الدوه

ابگلبك يامولايه نار
ماتنطفي ليل انهار

كل عدوانك .هانو شانك . يالكاظم
---
نزفت اوياك السلاسل بالألم
والسجود اعليك يالكاظم لطم
ولجلك ابحسره اوقهر تبچي القمم
والوجود اعليك ياريت انعدم

بعيونك واشگد تنعاد
صورة سبايا واصفاد

تروي ازنودك .امصاب اجدودك. يالكاظم
---
بسيرتك اسمع واصيح امن القهر
اوگلبي مفطور ابسهم كله كدر
صدگ خدك بالسجن حيل انسطر
وليك شمس الله انكسر منها الظهر

مايرحم بيك السجان
خلاك ابسجنه تنهان

تظهر ونك. واحمر جفنك. يالكاظم
---
اعليك يبچي سيدي اجدار السجن
اومن تون وياك كل لحظه يون
والقنوت ابثگل گيدك ظل يحن
اولمصابك چاتل افادي الحزن

گيدك يحز بوريك
اوماتگدر ترفع ايدك

ابوجه الحاقد.صبرك صامد.يالكاظم
---
اعظامك الترفه اويلي امرضرضه
اوسلمت روحك لـ محتوم القضه
اوطلعوها اجنازتك يابو الرضه
وسفه شخصك احنه چيف انعوضه

ياللي شفت چم اهوال
اتحسر عليك الدلال

ياهالوالي.. اوداعك غالي. يالكاظم
---

عادل العبد الله
9.4.2018