گبتك يالهادي رجعت من جديد
رغم جور الناصبه التتبع يزيد
* * *
رجعت الگبه بعد ذيچ الشدد
وبيها كل زاير يجي يطلب مدد
وانته مولانه أبد مترد أحد
من نحلفك سيدي براس الشهيد

* * *
گبتك مولانه تبگه عاليه
رغم كل هاي الطغاة الباغيه
گبتك وشگد قداسه حاويه
اللي بيها تلتجي كل العبيد

* * *
گبتك بالنور تبگه ساطعه
ياللي ذاتك بالمعارف جامعه
تبگه لينه رحمة الله الواسعه
ومنها ناخذ ما نطلبه اشما نريد
* * *
گبتك ميهزها تهديد ومنع
لنها منهاج الديانه والشرع
الأصل أنته اوهيه منك فرع
وتظل أقرب ليها من حبل الوريد

* * *
گبتك من ذهب تسطع گبتك
وتظل مثل التاج عالي ابحضرتك
وبيها تتكحل نواظر شيعتك
وتجذب اعيون النظرها من بعيد

* * *
انته تدري بكل حوايجنه نبوح
من نعاين گبتك همنه يروح
وتختفي عنا يمولانه الجروح
وبالزياره نضمن الجنه أكيد

* * *

لخادم أهل البيت (ع):
عادل العبد الله

يلهادي بالمحفل جينه

*
جينه بالحفل والثغر باسم
اوبسمك كل محب دلاله هايم
يقرا ازيارتك وابفكره دايم
يصلي اعله النبي وي آله لازم

اوحاشا اترده ياوالينه
*
علي الهادي تظل نبع القواميس
اومن نورك ضوت كل الفوانيس
نصلي اعليك احنه بالاحاسيس
يمن صرحك جمع كل التضاريس

اوتدرينه نبعك يروينه
*
علي الهادي إلك سامره تفخر
نالت مرتبه من حگها تستر
جمعتنا ترى بـ الله أكبر
اوتظل إلنه بعد يالوالي مصدر

يم بابك انته متخلينه
*
يلهادي ابحروفك جننتنه
اوشهد ليك الگلب انته ملكنه
واحنه شيعتك بيك اتصفنه
واللي خالفك تدري اشيهمنه

والضدك انته ايعادينه
*
هادي للأمم ما تقبل العار
اولسان احسين انته اوفعل لطهار
اوبيك احنه عرفنا معنى لخطار
طلبه بس فقط اقبلنا زوار

ابطلبتنه ندري توفينه
*
عادل العبد الله
29.3.2017

يالهادي
. .امن الزياره الجامعه منبع هويتي
يالهادي
..بـيـهــا متمسك لـحـد سـاعـة منيتي. .
واصبحت ليّه ذخُر
وشمعتي ابيوم الحشُر
* * *
من قريت آنه الزياره ..
دمعتي تجري ابخشوع
وروحي حنت من تمنت
توصل لضي الشموع
اشگد معاني بيها تحوي
حيّرت عقل الجموع
سر من اسرار الجلاله
مستمر بيها ابخضوع

يالهادي
الجامعه حصني اوتظل كنز المواهب
يالهادي
منها اتعرّف على سر المراتب

تاجي هيّه وافتخُر
وشمعتي ابيوم الحشُر
* * *
من ضمن نص الزياره
اليلتجي بيكم يفوز
والبغضكم ياولينه
ابجنة الله مايحوز
اللي آمن بالولايه
عالصراط هوّ يجوز
ايحصّل الرحمه الچبيره
منكم ايحصّل كنوز

يالهادي
الشكر يوصل إلك في هالزياره
يالهادي.
ياسند كل البشر يبن الطهاره

انته ملهم بالذكُر
وشمعتي ابيوم الحشُر
* * *
ربنا عاصمكم ولينه
امن الزلل والأفتتان
وانطه ليكم كل كرامه
وبيها نشعر بالأمان
شنهي دنيا ابغير حبكم
انگول عالدنيا الهوان
ياللي بيكم ربنا خصص
كل سعاده بالجنان

يالهادي. .
ربنا تمم نعمته بيكم يمولاي
يالهادي. .
واصبحت إلنه كهف بالشده حماي

سلوه اسمك من يمُر
وشمعتي ابيوم الحشُر
* * *
كل مجد بيكم تحقق
سيدي وعم السلام
وارتفع شان التحبكم
وانكشف عنها الظلام
عنكم اشنحصي فضائل
احترنا ياابن الكرام
ياللي بيكم هالعوالم
استقرت بالوئام

يالهادي. .
انته لينه اعظم حرز ضد المخاطر
يالهادي. .
ومو عجب منك تشع كل الجواهر

تبگه محراب الفكُر
وشمعتي ابيوم الحشُر
* * *
يا اعز من نفسي واهلي
يا خطاب الله المبين
بيكم اتجلت قدرْتَه
وصرتو كهف اللائذين
والدليل اعله صراطه
بالمحب متكفلين
وما اظن يخذلنا عطفك
لن لزمنه باليقين

يالهادي. .
اشما عثت إيد الضلاله والله مَنْلين
يالهادي. .
عالعهد نقسم ولينه ابنحر لحسين

تحضر انته بالگبُر
وشمعتي ابيوم الحشُر
* * *
لخادم اهل البيت (ع):
عادل العبد الله

لوتجي شده. . بابه ميرده. . لك يحل المشكله

نادِ علياً مظهر العجائب. .
تجدهُ عوناً لكَ في النوائب

علي علي علي علي لك يحل المشكله

* * *
من تصير ابضيگه نادي . ياعلي ادركني
ارحم الدلال اصبح .ناره يلهبني
ياعلي اوحاشاك مره بطلبه اتردني
يامن اسمك حرز واقي ابكل وكت حصني

تجلي كل محنه .وبيدك الجنه. وعندك اسرار المَلَه

انتَ لواءُ الفخرِ والمناقب
وجوهرُ العزةِ والمواهب

علي علي علي علي لك يحل المشكله

* * *
قائدي انته يحيدر. واجب اتبعك
تدري بيه اشگد احبك .ذقت من نبعك
انته ترويني ابحروفك وتغمر ابنفعك
ما اتوهن يبوشبر اضوي من شمعك

ياعلي ابسمه. .اتنور الظلمه .يا شمس تزهي العُلا

نوركَ فوقَ شُعلةِ الكواكب
يلوحُ في الإشراقِ والمغارب

علي علي علي علي ..لك يحل المشكله

* * *
ياعلي طرواك يبگه يسحر ابياتي
وبيك تحلى كل قصيده وتحلى نغماتي
اسرح واصفن عسى لي تُمحى آهاتي
وتنكشف كل بلوه بسمك وتُطفى جمراتي

وبيك ياكرار. تنكتب لقدار. وما أشك بالمسأله

شأنُكَ فوقَ الشأنِ والمراتب
يا بُلغةَ الأحسانِ والمكاسب

علي علي علي علي لك يحل المشكله

* * *
ما أشك لحظه يحيدر. اتخيَب الرجوه
وانته معروف ابصفاتك. تسمع الشكوه
لوّن جار الزمن بيّه.. بيمن اتگوه
مو إلك يا بو الشدايد نعتني عنوه

حاشا اتحيّر يا بطل خيبر .بيك تمشي القافله

رغُم اولي الأطماعِ في المناصب
آتيك سعياً والهوى ركائب

علي علي علي علي. لك يحل المشكله

* * *
رغم كل ناصب امامي والله ما عوفك
ما أحيدن عن مسارك ذبت بوصوفك
ياللي شمس القُدره بيدك. حولك اتطوفك
ولوّن غابت لحظه عنك ترجع اتشوفك

رغم كل حاقد. الله الشاهد. كل محب ما تخذله

شمسُكَ تمحو ظُلمة الغياهب
وغايةً تسمو على الرغائب

علي علي علي علي
لك يحل المشكله

* * *
علي آياتك خلودك باقيه للحين
منهو مثلك بالخلايگ يملك التكوين
وكل نجم عالي ابسمانه نادى يا بوحسين
كلشي بالدنيا خضعلك يا بطل صفين

يا عُظم قدرك كلشي تحت امرك بيدك انته البوصله

سيقلبُ الأمرُ على النواصب
وينهلونَ الخزيَ في المشارب

علي علي علي علي
لك يحل المشكله

* * *

لخادم أهل البيت (ع):
عادل العبد الله

معگوده آمالي معگوده آمالي
في مولدك حيدر معگوده آمالي
* * *
هالليله ياحيدر في مولدك جينه عين العدو اشواك واعليها خطينه
ماننسى يابو حسين وفايّه تدرينه
صحناها من اسنين لا ما تخلينه

دايم على بالي .وانته اللي تحلالي
في مولدك حيدر معگوده آمالي

* * *
ياحجة الرحمان ياغاية الشيعه
واجب يانور الله نهجك علي نطيعه
وبساحة الإخلاص لحن الوفه نذيعه
وچلمة علي بكل دور معناها لك بيعه

وانادي هنيالي .غيرك مَلي والي
في مولدك حيدر معگوده أمالي

* * *
هالليله يابوحسين هنينه هادينه
ياسيدي وبسمك نبعث تهانينه
وكل الورود لجلك بهالبشره طشينه
گلوب التحب اوتار تعزف امانينه

يامغيّر احوالي صوت الفرح عالي
في مولدك حيدر معگوده أمالي

* * *
من نشأة التكوين بحبك تغذينه
وياسيدي وذكرك ظل منحفر بينه
غيرك يسر الدين ماشفنه واهوينه
وانته ولي النعمه وابدربك امشينه

صرت انت موّالي ياأول وتالي
في مولدك حيدر معگوده أمالي

* * *
تدرينه يوم الضيچ بس حبك احمانه
ياحاضر الشدات بس انته رجوانه
ويوم الحشر ندري يالمرتضى اويانه
وعند الصراط انته تحضر يمولانه

وجداني غنالي يهتف علي الغالي
في مولدك حيدر معگوده أمالي

* * *

لخادم اهل البيت / عادل العبد الله

چم مكرمه يابالحسن عادتلك
وندري شمس الله ابخجل عادتلك
بدنى سبب أهل الحقد عادتلك

شافوا على سيفك جرى دم الشر
.............

گلبي الرحابك ياعلي وديته
وفيته دين ازيارتك وديته
ماغيرك آنه عالبشر وديته

ياجوهر اسرار الخلگ ياحيدر

عادل العبد الله

.. انته خير العمل..
..تبقى نبض الأمل..
علي علي ..علي علي
----
يلهج لساني ابذكرك اويتعطر
يالبسمك آنه افتخر يا حيدر
تبقى حياتي والذخر بالمحشر
ياللي ضريحك بالنظر ظل يسحر

..ياللي كلك عجب..
..مدري شنهو السبب..
علي علي ..علي علي
----
غصن العشگ بسمك نمى يامولاي
يا اعذب اويا أصفى حتى امن الماي
يم عتبتك ظلت تشوبح عيناي
واتمنى بس طول الوكت تروي اضماي

..يحلى بيك الفرح..
..اوگلبي ليك انشرح..
علي علي ..علي علي
----
سجدت إلك كل الكُره الارضيه
يالذاتك امن المصطفى قدسيه
ياللي ابحروفك تنتعش كل ريه
اوكلمن يحبك يبقى صافي النيه

..كل محب مستجن..
..مايغمِّض جفن..
علي علي ..علي علي
----
ماي الوجه لجلك ترى ذبيته
اوفرض الموده بس إلك اديته
واللي يحبك عن عشگ خاويته
واللي يكرهك سيدي خليته

..آنه لجلك عبد..
..عالبلا مَرتعِد..
علي علي ..علي علي
----
يراية الله المُلهمه بلأقطار
صرحك فخر لهل الشرف ياكرار
اومن وجهك اقتبست شمسنا الأنوار
وابأسمك افلاك المجره تندار

..انته سر النعم..
..دافع الكل نقم..
علي علي ..علي علي
----
عادل العبد الله
٢٣.٣.٢٠١٨

والينا والينا انته الامير ابكل فخر والينا
*
يابوشبر .. حگنه نفخر
عالبشر بولايتك
مانساوم ..نبقى دايم
لك نجدد بيعتك
والعواذل لو تجادل
ماتروح امحبتك
يا سندنا ماكو عدنا
غير نرفع رايتك

تنجينا تنجينا بساعة عسر يابالحسن تنجينا
*
من مثيلك .. يالجزيلك
انطه للمعنى قيم
عالي وصفك ..يللي چفك
فاق انواع الكرم
بالمواقف ..انته هادف
بيك نوصل للقمم
كلك آمال ..وندري بالحال
ماتردنا ياشهم

توفينا توفينا بطلبتنا لو هيّه صعب توفينا
*
امنيتنا ..ياعشگنا
نعگد ابصحنك حفل
وكل رجانا ..ياحِمانا
كل شي نقراه ينقبل
مانجافي ..انته وافي
وابطريقك نمتثل
والهتفلك ..مانمّلك
تكتب اسمه بالسجل

تهدينا تهدينا بدرب الأمل انته الذي تهدينا
*
انته معروف ..بسمك انشوف
كل كرامات الوجود
ماكو غيرك ..ياللي خيرك
مانقيسه بالحدود
جننتنا ..وحيّرتنا
بسمك انهلكت ثمود
مانتركك ..واللي شكك
بنورك اتصيبه ابرعود

نادينا نادينا بسمك علي طول الزمن نادينا
*
تبقى حيدر ..اغلى جوهر
وبيك سابينا الهيام
مانعوفك ..وابحروفك
تدري خطينا الغرام
بالصراحه ..انته راحه
بذكرك انعيش ابوِئام
بكل بدايه تبقى غايه
يا نهايه ابلا ختام..

تنطينا تنطينا صك الجنان ابيمنتك تنطينا

*
عادل العبد الله

اللي عنده انته ميبدل حبيب.
واليحب اشلون يقبل بالبدل

عاصمة عشاگ انته بالگلوب..
جننت عقل المحب بيك انثمل

وشحلو اسمك ثلاث امن الحروف
سهل لفظه ماكو حاله امن الملل

دوم اصيحن ياعلي اوثغري بهيج
ابكل حياتي تبقى اروع مستهل

عادل العبد الله

على ذكرك ربينه
علي أنته ولينه
* * *
علي باقي خلودك باقي معناك
ياشمس الهدايا التجري لافلاك
يمن بيدك خدم أرواح واملاك
وصكوك الجنه كلها أسر يمناك
يا منجى السفينه
علي أنته ولينه
* * *
علي يانجم شعشع بالسموات
نزل قرآن مجدك مُحكم آيات
وعن دربك أبد منحيد هيهات
بأسمك بالحفل نرفع صلوات
يتحتم علينه
علي انته ولينه
* * *
يا فارس گدر يبرز بلاحزاب
وابخيبر بعد منهو الشلع باب
عجب أنته اومنك شفنه لعجاب
أصلك من ذهب تتسمى بو اتراب
أبونا وملجى لينه
علي أنته ولينه
* * *
من غيرك على افراش النبي نام
وعلا كتفه ابفقاره وكسر اصنام
ومن غيرك أبو الفقره والايتام
تحرسها ابعيونك لو بالاحلام
ننادي ابكل سكينه
علي انته ولينه
* * *
بالعين أصبحت عالي بالازمان
لامك عجبّت لولو أعلى مرجان
وياءك ياحبيبي درس إيمان
وإسمك ينطقك من غير شفتان
بيك أحنه رجينه
علي انته ولينه
* * *
لخادم أهل البيت (ع) :
عادل العبد الله

يشريان العشگ یمخالط اوي الدم
وبنفاس المحب اسمك عطر ينشم

تهيمنه حروفك
نموت او ما نعوفك

* * *
حروفك مدرسه واتخرج الأحرار
وابنهجك تروّه كل شخص بفكار
واحنه نقتدي من ميثم التمار
لأن شاف الحقيقه بامرتك تندار

واحنه عالعهد نمشي ابدرب واحد
والباري علينا يا علي شاهد

امل انته نشوفك
نموت او ما نعوفك

* * *

بيك اشچم عقل اتدبر اتحير
وراد ايوصفّك لاچنه ما يگدر
وبسمك كل موازين الفلك تفتر
يمن قرص الشمس رديته ياحيدر

عجيبه اشلون وانته اللي قلعة الباب
تضحك بالحرب بس تبچي بالمحراب

وبعد تكرم ضيوفك
نموت او ما نعوفك
* * *
حرب الله اوسلمه يا علي سلمك
وأسد انته بفقارك ينرعب خصمك
ويشوف الموت حتماً لودنى يمك
وهذا مو محاله وانته ميهمك

تحديت الكفر كل عمرك اتحارب
ولأن شمسك تشع ماتختفي ابحاجب

وآياتك تطوفك
نموت او ما نعوفك
* * *
مثل شخصك يوالينه صعب وصفه
أقل چلمه عليك الأمه مختلفه
تظل حامي الحمه يا صاحب الكلفه
والمهجه تظل لساعه متلهفه

يبگه لك عشقنه لو تِفَجَرنه
وتدري مايهمنه من يكفرنه

تعرفنه سيوفك
نموت او ما نعوفك

* * *
يسر الله وكتابه ومُحكم التنزيل
يمن كل آيه بس عندك لها تأويل
واگبالك يحيدر انحنى جبريل
يلبي ابخدمتك ويقدم التبجيل


وأحنه يا علي نفدي لك الارواح
يمن حبك ثبت بينا أبد منزاح

تسحرنه طيوفك
نموت او ما نعوفك
* * *
عادل العبد الله

ابليا انته مدري آنه وين اروح ..
واذا جيت الغيرك اتلگه الكلل

لا وِلد ينفع اذا صار الحساب..
هم بعد ما ينفع اتلبي الأهل

ماكو فرصه للي ماودك أكيد..
النار تصرخ يلا جيبوه ابعجل

وانا ما بين الجنان اويه الجحيم ..
بصوتي ناديتك علي خير العمل

انتشلني من ركام المذنبين..
ترجف ايديّه تعب من الوجل

حالي اصبح چن مثل حال الغريب..
ابلا هويه والغصن منه ذبل

تايه ابفكري يمين اويه شمال..
وخطوتي مستعجله مَمشي ابمهل

ياعلي وياك شوصل للختام..
وآنه لسه بالبدايه بي شلل

منك اتعلم دروسي ابهالحياة .
.ما اذلن روحي لصنام الجهل

وبالتجارب اصنع ادروع الإباء..
ومنك استلهم حروفي والجُمَل

ابراحتك بيّه وعلى كيفك يكون..
خادمك أبگه يحماي الدخل

عادل العبد الله

زينب اشگد انفجع بمصابها
والله ذنبي اعليها زاد اصوابها

* * *
انطبع ذنبي ابسجل الخاطئين
وين اودي وجهي ما ادري لاوين
صوب زينب لو لعد صوب الحُسين
ودمعة اعيوني اطلعت لغيابها

* * *
وچنه ذنبي خله زينب عالهزل
وخله دمعتها على خدها تهل
بسوط يقهرها ويلوعها النذل
ومختشى منها بعد سلابها

* * *
ابذنبي گلب الطاهره ظل منفطر
عالمكارم صرت ما عندي صبر
شلون وآنه الانفجع من تنذكر
واملي صفحات الحزن بكتابها

* * *
والله خجلان امشي مابين الانام
روحي ليها امقصره بنت الكرام
حگي ابچي وليلي كله ما انام
وليّه زينب حگها تبدي اعتابها

* * *
ياعجيبه لوّن جسمي ابمغتسل
الله عوني شلون ابگه ابلا امل
وعندي حب الحره بت خير العمل
محور الكون وجميع اقطابها

* * *
چني اتخيل مسيت ابحفرتي
وبس احاتي من يردها وحشتي
وتنجلي بعد الاماني شدتي
وزينب التاخذني صوب ارچابها

* * *
شلون روحي لو اجا وگت الحساب
شايل اذنوبي وعلى امتوني الكتاب
شنهو عذري بالله شنطي من جواب
وادري زينب ماترد طلابها

* * *
ولوّن بالمحشر بگيت آنه وحيد
وآنه بين الظلمه والوحشه طريد
غير بت المرتضى الگلبي تهيد
ما تخليني وأنا عد بابها

* * *
من فرط ذنبي بعد خف الوزن
ولا عمل عندي واموتن مطمئن
اتذكرت دمعي على زينب يحن
اليوم بدموعي لذت بترابها

* * *
لخادم أهل البيت (ع) :
عادل العبد الله

نزف عمري قهر من بعد لحسين
وگضيت آنه الدهر بس أهمل العين
زينب آنه اسمي.. عِشْرَه ويّه همي
نزف عمري قهر من بعد لحسين
*
انا اللي انحب وانعي. واغرّگ روحي بالعبره
ّما لحظه غمض جفني ..وابد مابردت الجمره
تبدّل حالي واتغيّر..حين الراحت الزهره
شسوي ابعمري مايجدي.. وعزي اتوسد ابحفره
تعثر صبري واتألم.. وجرح گلبي صعب يبره
واتذكر اخويه احسين. لمن عفته عالغبره

اوماانسى الگمر زيّد عويلي
خلاني ابكدر مهدود حيلي

ذابل صبح جسمي .. عِشْرَه ويّه همي
*
بعد حرگ الخيم بالطف.. الرعب يفتر على الاطفال
بعضهم يعثر ويرجع .. البعض يتلگه چم اهوال
البعض يحبس دموع العين .. خوفه من ضرب لانذال
وآنه حالتي صعبه.. وحدي ما إلي كفال
انخسف يم النهر روحي..واحس بيّه صبح زلزال
واظن ماتگوه لجروحي.. الصخور الراسيه ولجبال

اصبّح عالجرح يوميّه وانهان
واتلگه الهضم اشكال والوان

محد بگه يمي.. عِشْرَه ويّه همي
*
عانيت اشكثر عانيت ..حتى ذبلت اجفوني
ومن كثر الضرب بالسوط ..تورمن كلهن امتوني
وحين اللي دخلت الشام.. بني اميه يشتموني
يگلولي اخوتچ وين.. ولفظ گاسي يسمْعوني
(ها زينب چتلنا احسين) ابهالجُمله يأذوني
شحچي وآنه اتمنى.. على ذبحه يذبحوني

تمنيت العدا ايذبحوني يمه
ولا ابگه ابعذاب الصعب لچمه

فدوه يجري دمي.. عِشْرَه ويّه همي
*
اناظر راس ابن امي ..واتذكر طفولتنا
حين العشنا وي امنا ..وابونا الساس هيبتنا
وكتها چنا ملمومين.. اشحلاها ذيچ گعدتنا
ما صدگ بعد راحت ..سوالف كل مودتنا
وإجتنا النايبات ازحوف ..وانهانت كرامتنا
وبتنا بالخرابه آآه… ابوسطها شفنا ذلتنا

اصبّح بالضرب واتمسّه منه
وي كل الحرم تطلع لي ونه
بيّه اعداي ترمي.. عِشْرَه ويّه همي
***
متهنيت كل عمري.. شفت كل مِحنه تچويني
وتاليها ارجعت لحسين ..ارد راسه الـ يبچبني
واقرا كل مراثيّه… واصب الدمعه من عيني
وابثها شكوتي لعباس.. لاترضى تخليني
هذي قصتي الگشره.. منها اتخلد اونيني
وآخرها استلمت الموت.. بيْه انختمت اسنيني

وحدي ابغربتي مدفونه بالشام
ويايه ادفنوها كل لالام
تحضر عنوه امي .. عِشْرَه ويّه همي

لخادم أهل البيت (ع):
عادل العبد الله

على الكاظم تنوح الجعفريه

وتواسي فاطمه الزهره الزچيه

* * *

على الكاظم تنوح ابدمع لعيون

وأصبح كل گلب من أجله محزون

غصص شاهدها والـلـه ابذيچ لسجون

يا ويلي و گضه ابسم المنيه


* * *


انمرد چبد الإمام ابسم لوغاد

وشالوا اجنازته من جسر بغداد

وصبح زلزال نعشه ابن لمجاد

ويهز حكم الطغاة الجاهليه


* * *


ابگيد وسلسله متحمل الآه

موسى الكاظم احنا حاشا ننساه

ركضت شيعته وصاحت أويلاه

ليش أعله الجسر جثته رميه


* * *

وين أهله اويشوفون الجرى له

ابن جعفر أويلي شلون حاله

العـــالم على امصـــابه بچــــاله

وبچت لجله السموات العليّه


* * *

مولانه الصبر أبرز صفاته

وابوسط السجن خِلصت حياته

وشاعو بالخبر قصة مماته

وسف واشگد تحمل من أذيه

* * *

لجله ننصب الليله عزانه

وعليه انصيح وخل تشهد عدانه

لطمنا وأمه الزهره معانه

تنادي ابحسره والونه خفيه

* * *

صحنا والدمع منا تحدّر

ابهيبه اندفن موسى ابن جعفر

لاچن جده احسين أبو الأكبر

بگه مرمي على حر الوطيه


* * *


خادم أهل البيت (ع) :
عادل العبد الله

من ارشيف 1433

يالكاظم بابك دگيته
ودمعي دايم ليك اجريته
*
جيت البابك ابچي وانحب
وگلبي ابزود الحسره يلهب
من اهمومي اشگد اتعذب
وغيرك تدري مترجيته
*
تسبيحي انته وآياتي
وبسمك تحلى كل ابياتي
ياسلوة روحي وغاياتي
حبلك بالرجوه شديته
*
ارفع دايم بسمك چفي
وحاشا ابگربك يرتد طرفي
رايد چاره اعليّه تكفي
يامن ما گاصد خليته
*
عندي چم بلوه اوتعلمها
وادري ابحضنك انته اتلمها
روحي بس انته التفهمها
يامن كل عاسر فكيته
*
بشباچك لازم إيديّه
لاتحْرمني من كل جيّه
فكني من اخطار الدنيا
حگگ ليّه لتمنيته
*
اهوايه اتمنى الشيعه تمتد
من كل بقعه وعندك تسعد
متخوفها ارصاصة مُعتد
والجالك حتماً وفيته
*
يلبابك واضح نِندَله
توفي السايل حاشا اتخذله
ابگد اخلاصه انته اتقبله
لو معتل انته داويته
*
صرحك مشفى اوبيْه انداوي
او جودك من خير الله ايساوي
يلكل نعمه اسمك حاوي
والأصعب انته الحليته
***
لخادم اهل البيت (ع):
عادل العبد الله
2-5-2016

واجب عزانه انجدده

يا سابع أنوار الهُدى

عمرك گضيته بالسجن

ياعجبه غمضت الجفن

* * *
صرختنه بسمك ترتفع أقبلها يبن الزهره

ولجلك نهل دم ودمع ونار الگلب متوجّره

وعرش الـلـه أصبح منفجع ينعى عليك ابحسره

والدنيا ظلمه ابلا شمع وبينا الجرح ما يبره

معقوله يا نعم الولي

تتگيد ابأمر الشقي

ومن الأذى گلبك يحن

ياعجبه غمضت الجفن


* * *


چم صوره من حال الألم مرسومه يا مولانه

جسمك تعذب ما سلم .ريت الحصلك جانه

ومثلك ترى الحيل انهدم وصار اللظه بحشانه

وكل خادم اگليبه انهظم وما غمضت اجفانه

كل مره تبدي حسرتك

وندري مراره قصتك

مولانه حيرت الذهن

ياعجبه غمضت الجفن

* * *


ما واحد أعليك ارتهب .كلهم طُغاة الأمه

ذله ومهانه والعجب عدهم مَظلت رحمه

وانته ابسلاسل تنتحب وانهارك أصبح ظلمه

وگلبك جريح اويلتهب .ويصعب نزيفك لچمه

جرحك نزف من الدمه

وحلت عليك الموزمه

ودايم على أهلك تون

ياعجبه غمضت الجفن


* * *

صابر تظل رغم القهر .ما تخشى كل عدوانك

ومهما على شخصك جِسر .ما يُنتقص من شانك

تبگه المثل بين السير .ثابت يظل برهانك

ما تنمحي ويه الأثر .وانته الفخر نيشانك

يبن الوديعه الشافعه
ضاگت عليك الواسعه

وارث علامات الحزن

ياعجبه غمضت الجفن


* * *


اللي ابسجن تِلفي هله ويفرح دليله ويستّر

بس انته ما بين المله محد إلك يتخطّر

واللي إجه صوته أعتله .كافي بعد نتنطّر

أطلع يبن عقد الوله .للشيعه باحسن منظّر

جاوبته بالجُمعه الفرج
وبحساسه تسعد كل مُهج

خاب الرجا وحگه يجن

ياعجبه غمضت الجفن

* * *

لخادم أهل البيت (ع) : عادل العبد الله
من الارشيف