ذکیه ذولفقاری
بعضا بیر سهو سؤز،  یا باخیش خالقین دیل آلیشقانلیغینا چئوریلیر.
نه قدر ده آچیقلاییرسان،  یئنه  ترک  ائدیلمیر و گون به‌گون ده،  عادت کیمی آغیزدان- آغیزا دئییلیر.
بونلاردان بیری، چیلله‌نی تبریک دئمکدی.
تبریک دئمک، ذاتا یاخشی بیر آنلامدی، آنجاق چیلله‌نی اؤز ماهیتیندن و آنلامیندان بوشالدیر.
ایل‌لردی آتا- بابالاریمیز چیلله‌نی قئید ائدیبلر.
من بو یاشایاجان چیله‌‌تبریکی ائشیتمه میشدیم.
عجیب بو کی، نئجه ایلدی چیله، بایراما چئوریلیب، تبریکلر یاغیش کیمی باشیمیزا یاغیر.
اوزون، قارانلیق گئجه‌نین، قار کولک، شاختانین گلمه‌سی‌نین تبریکی وار میه؟
چیلله گئجه‌سی خوفلو گئجه‌دی.  قارا قیش گلیر،  بویوک چیلله، بالا چیلله قارشیدادی.
قار قاپلاری، یول‌لاری باغلایا بیلر. شاختا، قار  یوخسول‌لاری، اوشاخلاری،  خسته‌لری اؤلوم حالینا سالا بیلر.
عائله باشچیلاری ایش‌سیز، پولسوز قالا بیلر.
ارزاق بیتیب، آجلیق اولا بیلر.
بولار کیمی تهلوکه‌لی حادثه‌لر قارشیمیزدادی.
اونون اوچون بیر یئره یغیشیب، دئییب گولمک، شادلیقلا کئچیرمک اونون قورخوسونو آزالدار دئیه، دوشونوبلر.
گلین بیر بیریمیزه تبریک یوخ،  دئیه‌ک.
چیلله‌نیز یونگول اولسون. شاد اولاسینیز.

1404/9/29
https://t.me/Adabiyyatsevanlar

چیلله موبارک اولسون .


https://t.me/Adabiyyatsevanlar

عاریف آجال‌اوغلو، جلال بیدیلی
سهمانلاییب ادبی‌لشدیرن: ویدا حشمتی


«چیلله‌نیز اوغورلو-خئییرلی کئچسین»



قیش قوجا بیر قاری ایدی‌. اونون اوچ اوغلو واریدی. بؤیوک چیلله، کیچیک چیلله، بوْز آی.
آیلارین بیرینجیسی، بؤیوک چیلله‌نی آداملارین آراسینا یوللاییر. بو گئدیب قاییدیر. آناسی سوروشور:
_ نه ائتدین؟
بؤیوک چیلله دئییر:
_ آداملاری اوجاغین قیراغینا دوزوب گلدیم.
سونرا کیچیک چیلله گئدیر. قاییداندا آناسی اوندان نه ائتدیگینی سوروشور. کیچیک چیلله جواب وئریر:
_آداملاری اوجاغین ایچینه دولدوردوم گلدیم.
آخیردا بوْز آی گئدیر. قاییدیب گلنده آناسی اوندان نه گؤردویونو سوروشور‌. بوْز آی دئییر:
_ من قارداشلاریمین ایشینی ترسینه ائتدیم. هامینی اوجاقدان چیخاریب قاییتدیم.

📚اساطیر، افسانه، اینانجلار کیتابیندان چیلله اوچون بیر روایت.

https://t.me/Adabiyyatsevanlar

مهناز. ص ( آیتای)

دادلی ، دوزلو صوحبتیمیز
قالدی قدیم ده چیلله میز
تانیش اولان غوربتیمیز
قالدی قدیم ده چیلله میز

ییغیشاردی قوهوم قارداش
آتا گیله یاواش یاواش
سوفرا دولاردی باشا باش
قالدی قدیم ده چیلله میز

تاپیلمیر سیرداشلیق داها
بیر چیمدیک یولداشلیق داها
ائل ده وطنداشلیق داها
قالدی قدیم ده چیلله میز

شام دان سونرا ، نخود_کیشمیش
قارپیز انار بیرده یئمیش
دوزمه لر کیمی دوزولمیش
قالدی قدیم ده چیلله میز

کورسو، اوستونده ایدی مویز
ایده ، خورما ، میلاخ جویز
ال آچیق لار اولوب چیلیز
قالدی قدیم ده چیلله میز

آغزیمدادیر هله دادی
اوشاقلیغین وار قانادی
گؤز قاباغیندادیر یادی
قالدی قدیم ده چیلله میز

ایندی ژله آناناس موز
پوللولارا اولوبدو پوز
کولتورونه اولماییر گؤز
قالدی قدیم ده چیلله میز

شادلیق یوخدو پولسیزلارا
یول آچیق دی یولسیزلارا
قول چکیریک کولسیزلارا
قالدی قدیم ده چیلله میز

سوفرالار داها بوشالیب
غم جیرماقلاری چوخالیب
قارغیشین سسی اوجالیب
قالدی قدیم ده چیلله میز.

https://t.me/Adabiyyatsevanlar

کریم گول اندام

بوچیلله

هرکیمه سالدیم نظر  آنلی قیریش-قیریشدیر
  ،توستو توتوب عالمی ، پاییزدی  یوخسا قیشدیر ؟!
پاییزدان اوچ آی کئچیر نه قار نه ده یاغیشدیر !
آی باهالیق سن ده  آز کله لری قیزیشدیر!
بوکله لر سن دئین کله لره بنزه میر!
چیلله  ده او ،گوُردویوم چیلله لره بنزه میر!

قیش دئینده دام ،دووار ،کوچه باجا قار ایدی
انسانلاردا دیل ،داماق ،ائوده زومهار وار ایدی
سوفره لرین بزه یی  حالوا ،قارپیز ،نار ایدی
اوشاق،قوهوم ،دوست ،تانیش بیزده قوناقلار ایدی
پیلله ده باشماق دولو پیلله لره بنزه میر !
چیلله ده او گوُر دویوم چیلله لره بنزه میر !

دوُرد دوواری قیزدیران بیزده قورو نفسدی
اوُلکه دئمه ، میللته  بیرداریسقال  قفسدی !
جینقیرینی چکرسن دوولت دئییر نه سسدی؟!
چیلله دئییب کوتلاماق چوخ باهالی هوسدی !
گولله یاغیر! قارتوپو گولله لره بنزه میر!
چیلله ده  او گوُردویوم چیلله لره بنزه میر!

اوُتدو فصیل بیر به بیر قیش عَلَمین میلله دی
وای اوکیچیک چیلله دن ،حالا بوُیوک چیلله دی!
ائوده نه یاغ که دویو جیبده سیچان زیلله دی !
اوزده یئری  قیرمیزی اولسا اگر سیلله دی !
سیلله ده  بوش ووردوغوم  سیلله لره بنزه میر !
چیلله ده او گوُدویوم چیلله لره بنزه میر !

اورمو -۱۴۰۴-چیلله گئجه سی
       https://t.me/Adabiyyatsevanlar

چیلله موبارک اولسون.


https://t.me/Adabiyyatsevanlar

رسول جوادی

چیلله گئجه سی موناسیبه تینه

فلک چکدی اوخون، چیلله اوزاندی
ظولمه تین باغرینی، یارا بیلمه دی
قارانلیق قالارغی،  گئجه اوزاندی
قالارغی دردلره، چارا بیلمه دی

گونش بیردایغادا؛ -گوزونو یومدو
چیچک لر نور پایین، بیرآز گئج اومدو
اولدوزون گوزونه توکولن قومدو
گئجه نی چکدیلر دارا، بیلمه دی

آراز آخدی لاپ اوزاتدی گئجه نی
کاروانچیلار چوخ یوباتدی گئجه نی
قارا باختیم راحات یاتدی گئجه نی
آرپا چایی جوشدو، سارا بیلمه دی

بولبول لر نغمه سین، گئج باشلادیلار
سون باهارین سونون آلقیشلادیلار
کولک لر اوشودو دای قیشلادیلار
شافاق تئز قارالدی ،قارا بیلمه دی

https://t.me/Adabiyyatsevanlar

اومود یاشامین بینؤوره‌سی‌دیر.
یاشام قارا گون‌لردن ایشیقلی گون‌لره گئدیر. بونون قاباغینی کیمسه آلا بیلمز...

حاق سئل کیمی دریایه آخیب، یول تاپاجاقدیر.

داش آتماق ایله کیمسه اونو دؤنده‌ره بیلمز.

دونیادا قارانلیق‌لار اگر بیرلشه با هم،

بیر خیرداجا شمعین ایشیغین سؤندوره بیلمز.

بیز بیرلیکده قارانلیق‌لاردان کئچه‌جه‌ییک. آیدین گونشله قول-بویون اولاجاغیق.
گلین، بوگئجه آتا- بابالاریمیز سایاغی بیر یئره ییغیشیب، کوره‌ک-کوره‌یه، ال-اله قارانلیغی قوواق ...
ادبیات سئونلر چیلله گئجه‌نیز یونگول،
گلن گون‌لریز آیدین اولسون.

ادبیات سئونلر 1403/9/30

https://t.me/Adabiyyatsevanlar

‌ادبیات‌سئونلرین چیلله پایی
بیرینجی بؤلوم

https://t.me/Adabiyyatsevanlar

کیتاب تانیتیمی
گوزل یازیلار،مکتوبلار،
ذکیه خانیم ذولفقاری نین سون اویغونلاشدیرماسی ایشیق اوزو گوردو.
ادبیات سئونلر خانیم ذولفقاری نی تبریک ائدره ک ،اوخوجوسو بول اولسون دئییر
بو کیتابی ادبیات سئونلر عاییله سی 450,000مینه ادبیات سئونلردن آلا بیلرلر

https://t.me/Adabiyyatsevanlar

ویدا حشمتی
کیتاب تانیتیمی

بو کتاب ادبیاتیمیزین اؤنملی قولو اولان، مکتوبلار شکلینده، اورتایا قویولان سس‌سیز سؤزلرین توپلوسودور.
عثمانلی‌دان جمهوریتە اوزانان تاریخی بیر خط‌ده، تورک ادبیاتی‌نین ۵۰دن چوخ سئچیلمیش سیماسی قلم‌لرینی مکتوبا چئویریب، دوشونجه‌لرینی، دویغولارینی و زامانلا گیزلی دیالوقلارینی کاغیذا امانت ائدیبلر.
«گؤزل یازیلار، مکتوبلار» بیر دؤورون فیکری ایقلیمی‌نی، ادبی ذوقونو و انسانی دینجسیزلیگینی مکتوبلارین سادە اما درین دیلین‌ده آچیر.
بو مکتوبلاردا ادیب‌لر سوسدوقلارینی آشکار ائدیرلر؛ سطیرلر آراسیندا قالمیش اومودلار، قایغی‌لار، وطن درد‌ی و اینسانین اؤزو ایله حسابلاشماسی اوخوجونو زامانلار آراسیندا گزدیریر.

ذکیه ذوالفقاری‌نین دقّت‌له سئچیلمیش بو توپلومو، ادبیاتین تکجه متنی دگیل، اینسان حافیظه‌سینی بیر داها خاطیرلادیر.
بو کتاب، اوخوجونو مکتوبلارین ساکین اما تأثیرلی دونیاسینا دعوت ائدیر؛ اورادا سؤز، زامانی آشان بیر یادگاردیر.

«گؤزل یازیلار، مکتوبلار»
ذکیه ذوالفقاری
نشر بیتیکچی
صفحه ۲۷۲
قطع رقعی
قیمت ۵۵۰,۰۰۰مین

بوکیتابی ادبیات سئونلر عایله سی(ادبیات سئونلردن ) 450,000مینه آلا بیلرلر.
زکیه ذوالفقاری شرف آباد
اقتصاد نوین(کارت نمرسی)

۶۲۷۴
۱۲۱۱
۵۴۹۸
۳..۱

https://t.me/Adabiyyatsevanlar