ادبیات سئونلر

640 viewsedited 06:54

اوشاق ادبیاتی

آذربایجان افسانه لری

سؤیله ین:«صمد بهرنگی - بهروز دهقانی»
چئویرن:«منیژه جم‌نژاد»

«نار قیزلاری۲»

👩‍🦰 قاراواش یاواشجا بویون باغینی آچیب اونو آشاغی ایته له ییب سویا سالدی. قیز نسترن آغاجی اولوب سو قیراغیندا دوردو. بیر آز سونرا اوغلان گلیب دئدی: ائن گل گئده‌ک. قاراواش دئدی: من کی بو اوجا آغاجدان ائنه بیلمرم. اوغلان دئدی: مگر اؤزون دئمه دین منیم نارنج آغاجیم باشیوی ای، نارنج دا اییلدی؟ قاراواش دئدی: اوندا اییلدی، ایندی ایستمیر اییلسین. اوغلان آغاجا چیخیب اونو ائندیردی. دئدی: بو پالتارلاری هاردان تاپمیسان؟ دئدی: بیر قاراواش دان بورج ائله میشم. اوغلان دئدی: او٘زون نیه بئله قارالیب؟ قاراواش دئدی: یئل دن، گو٘ندن. اوغلان دئدی: گؤزلرین نیه چئری اولدو؟ قاراواش دئدی: سنین یولونو گؤزلمکدن. اوغلان دئدی: آیاقلارین نیه بئله یئکلدی؟ قاراواش دئدی: دوروب اوتورماقدان. دا اوغلان بیر سوز دئمه دی. بیر دسته نسترن دردی. قاراواشی گؤتوروب یولا دو٘شدو. قاراواش گؤردو ائله گو٘للر له اویناییر، اونو سایمیر. گول لری آلیب پرپر ائله دی. اوغلان اییلدی گو٘للری ییغسین، گؤردو یئره بیر عاراقچین دو٘شوب. گوتوردو یوللاندی. قاراواش گؤردو ائله عاراقچین لا اویناییر، اونو سایمیر. عاراقچینی الیندن آلیب آتدی. اوغلان عاراقچینین دالینجا گئتدی، گؤردو گوزل بیر گؤیرچین اوتوروب. گؤیرچینی گؤتورب گئتدی. ائوه یئتیشدیلر. هامی قاراواشی گؤروب دئدیلر: قاراواشلیغین بیر بئله فیس افاده سی اولماز! اوغلان او٘زونه گتیرمه دی، تویونو سس سیز صداسیز توتدو. نئچه گو٘ن سونرا قاراواش گؤردو اوغلان ائله گؤیرچین له اویناییر، اونو سایمیر. دئدی: من یئریکلیرم، گرک گؤیرچینی کسه‌سن من یئیم. اوغلان دئدی: نئچه گؤیرچین ایستیرسن دئییم گتیرسینلر. قاراواش دئدی: من بو گؤیرچینین اتینی ایستیرم. اوغلان قبول ائلمه دی. بیر گو٘ن اوغلان ائوده یوخ کن قاراواش ناز غمزه یله پادشاها دئدی: من یئریکلیرم، اوغلون دا قویماییر بو گؤیرچینی کسسینلر. پادشاه وئردی گؤیرچینی کسدیلر. قانی تؤکولن یئردن بویوک بیر چنار آغاجی بیتیب اوجالدی. اوغلان قاییتدی. چناردان چوخ خوشو گلدی. همشه دؤوره سینه دولانیب اونا یئتیشیردی. قاراواش ایکی آیاغین تپدی بیر باشماغا کی گرک بو آغاجی کسیب اوشاغیما نننی دو٘زلده سن. اوغلان دئدی: آغاج قحط لییی دئییل. هانسی آغاجدان ایستیرسن وئریم نننی دو٘زلتسینلر. گئنه بیر گو٘ن اوغلان آوا گئتمیشدی. قاراواش پادشاها اولانلاری دئدی. پادشاه وئردی آغاجی کسدیلر، نننی دو٘زلتدیلر. بیر پارچاسی قالدی، بیر یانا آتدیلار. بیر قوجا آرواد واریدی، هردن پادشاهین ائوینه گلیب پالتار یویاردی، ائوی سیل سو٘پور ائلردی، اونو گؤروب خوشو گلدی. دئدی خانیم بونو وئر منه جهره مین آلتینا قویوم. قاراواش دئدی: گؤتور آپار. قوجا آرواد آغاج پارچاسینی گتیریب قویدو جهره سینین آلتینا. صاباح آخشام ائوه گلنده گؤردو هر یئر گول کیمی تپ تمیزدی، سیلیب سو٘پوروبلر. اؤز - اؤزونه دئدی: ایشین ایچینده ایش وار. صاباح پرده دالیندا گیزلنیب گؤردو جهره نین آلتینداکی آغاجین ایچیندن بیر قیز چیخدی هر یئری سیلیب سوپوردو. یئرینه قاییتماق ایستینده قوجا آرواد پرده دالیندان چیخیب دئدی: سنی آللاه گئتمه. منیم ده کیمسم یوخدو، گل منه قیز اول. قیز داها آغاجین ایچینه قاییتمادی، آروادین ائوینده قالیجی اولدو. بیرگون شهرده جار سالدیلار هر کیم باشارا بیلر، گلیب شاهین ایلخی سیندان آت سئچیب بؤیوتسون. قیز قاریا دئدی: سنده گئت بیر آت آل. آرواد دئدی: بیزیم یئمیمیز یوخدو کی. قیز دئدی: ایشین اولماسین. قوجا آرواد دوروب گئتدی پادشاهین یانینا دئدی: آتلاریوین بیرینی ده منه وئر. پادشاه دئدی: ننه، سنین یئمین زادین یوخدو. آتی نه ائدیرسن؟ دئدی: بیریجیک قیزیم آت ایستیر. پادشاه قادینین اوره یین سیندیرماسین دئیه ایلخیچیا دئدی: قوجا چلاق بیر آت وئرین، اؤلورسه ده اولسون. قوجا آرواد آتی گؤتوروب گلدی. قیزین الی اونا دیینجه، دو٘ز عمللی بیرآت اولدو. قیز ساچلارین ایسلادیب حیطه سپدی. هر یئر اولدو گؤم گؤی اوت علف. نئچه آی سونرا پادشاه دئدی: گئدین آتلاری گتیرین. آتلاری ییغدیلار. قوجا آروادین ائوینه گلدیلر، آتین اؤلوب، قالدیغینی گؤرسونلر دئیه. آت ائله کیشنیردی کی آدامین باغری چاتدیردی. اونو چیخارمایا طؤیله یه گئتدیلر، قاباغا گلنی قاباغ آیاقلاریلا، دال دا کی لاریدا دال آیاقلاریلا ووردو شیریم شهره ائله دی. پادشاهین قول لاری دئدی: آخی ننه جان، بیز بو آت لا باشارا بیلمیریک. بیری گلسین بونو چیخارتسین بیز آپاراق. قیز گلدی الین آتین بئلینه چکدی دئدی: دیلسیز حئیوان چیخ گئت. صاحابیندان نه وفا گؤردوم سندن نه گؤرم. قوللار آتی گؤتوروب آپادیلار. بیر گو٘ن ده قاراواشین بویونباغی قیریلدی. کیمسه اونو ساپا دو٘زنمه دی. قیز دئدی: ننه گئت پادشاها دئنه من باشاریرام.
آردی وار...

406 views06:57