اهلا الصراحه كنت متردده اذا
اكتب تجربتي اولا لكن قلت بكتب
للذكرى وعلشان الدفعه الجايه🥺
بتكلم عن مصادر المذاكرة:-
ذاكرت المعاصر ٣ كان هو الشي الاساسي
وكنت استعين باليوتيوب بشكل كبير لتوضيح اشياء كثير
راجعت من ناصر بعض الاقسام الي احس نفسي فيها مش تمام
واكيد التجميعات جدا مهمه والتسريبات
وحابه اقول اذا بتدخلوا دورات خلوها للمراجعه جدا تساعد
والصراحه اختباري حق الفتره الاولى كان افضل من الثاني بكثير عشان كذا لحد يستسلم اذا ما جبت الفتره الاولى درجه حلوه تقدر تجيب ان شاء الله بالفتره الثانيه
وانتم قدها

شكرا للحوت من اعماق قلبي
اختكم taif💜

اهلاً صباحكم خير جميعًا أنا سُندس 🤍
الحمدلله طلعت درجتي وبصراحة ماكنت متوقعه ابدًا ، حتى لما كنت أحط احتمالات عشان أحسب الموزونة كنت أحط تحت الـ٨٠ ، وانصدمت مره فـالحمدلله على كرم ربي 🤍
بالنسبة لمذاكرتي شهر شعبان بديت بكتاب ناصر وكنت متحمسة مره لدرجة لما بدأ رمضان ماكان باقيلي إلا قسم الكيمياء ، وفجأه تأجل التحصيلي وسحبت من يوم التأجيل إلى نص رمضان يمكن ! كنت اذاكر يوم واسحب يومين وللأسف ماكفاني الوقت اذاكر تجميعات ابدًا ابدًا ، فقبل اختباري بيوم تركت كتاب ناصر وذاكرت التسريبات ، تسريبات غشام تسريبات الحوت تسريبات المخفي تسريبات رغد وصح نسيت التيك توك بعد صدق فادني كثيير يالأسئلة والربط وبس ..
بالتوفيق للجميع واللي ماجاب الدرجة اللي يتمنى باقي نتائج الاختبار الثاني تفائلوا وادعوا ربي كريم وينتظر عبده يطلبه 🤍
وبالنهاية أي درجة بتجيبها هي مكتوبة لك ومابيدك شي عشان تغيرها الاختبار وأنتهى ، لاتضيعون وقتكم بالندم وياليت ذاكرت وياليت فعلت استمتعوا بإجازتكم واستغلوها بدورات انجلش وخلونا نستعد ورانا جامعة ومستقبل باهر ان شاء الله 🤍

السلام عليكم حابه اكتب تجربتي بالبدايه اعترف لكم اني الصراحه الكيمياء والاحياء بالاختبار الاول ماتأسست فيها ولا حرف ولا فتحتهم اكتفيت بالرياضيات والفيزياء وهذا غلطتي داهمني الوقت، بس تأسيسي كان قوي بالرياضيات والفيزياء وهذا اللي ساعدني اجيب هالدرجه طبعاً تأسست فيزياء من دورة علي السبيعي لكن يمديكم تأسسون باليوتيوب فيه مقاطع له مره شرحه ناسبني وكنت يوم اشوف الدورة اتدرب بكتاب ناصر وأحل كل المسائل بنفسي واروح احل تجميعات غشام بنفس الوقت عشان كذا ثبت بمخي، والرياضيات تأسست مع كتاب المعاصر وعدته مرتين ورحت لناصر اتدرب ورحت للملحق اكثر بس ماذاكرت تجميعاته للاسف، كيمياء واحياء كان اخر الايام يمكن بقى يومين وداهمني الوقت ف ذاكرت تسريباتهم من الحوت وانا مو عارفه شي حرفياً داهمني لان عطيت الفيزياء والرياضيات وقت اطول، افادتي لكم بالفيزياء والرياضيات فقط بالكيمياء والاحياء ومصادري بالفتره الثانيه بعد مذاكرتهم كلهم ان شاء الله اكتب لكم تجربتي كامله بأذن الله ، صح درجتي مو اللي في البال لكن الجاي افضل ان شاء الله 🤍

اللهم لك الحمد احس مره مبسوطه بالدرجه لاني اصلا كنت احسب بجيب اقل بالسبعين او الستين مره كنت خايفه وسويت غلط كبير وهو اني ذاكرت قبل اختباري ب ١٠ ايام ذاكرت التسريبات والرياضيات والكيمياء من تجميعات غشام كان اكبر غلط سويته الصراحه ضغطت نفسي مره مره وندمت شويه لو ذاكرت ابكر من كذا كنت بجيب اعلى!

عالعموم مره مبسوطه انها جات كذا ولا نقصت وإن شاء الله ارتفع بالفتره الثانيه🙏🏻❣️

درجتي بالفترة الاولى بالبركة ما ذاكرت الا تسريبات وانا داخلة الاختبار وطبعا هالشي ما انصح احد يسويه ودعواتكم اجيب بالفترة الثانيه ٩٥+ وانقبل بالتخصص الي ابيه🤍

اهلاً حبيت اشارككم نسبتي الي نوعاً ما مرضيه وتمشي الحال ولو انها مش ولا بد ،، انا من الي اختبروا يوم 13 الي كان الكل يقول عن اختبارنا اصعب اختبار لكن الحمدلله طلعت بنسبه حليوه ودعواتكم الفتره الثانيه تكون اعلى💙

شكرًا لكم قروبكم متعاون جدًا كان بكل مره يصعب علي سؤال، الاقي اللي يساعدني في قروبكم
وكمان تجميعات الحوت منظمه ومرتبه جدًا يعطيكم العافية♥️

السلام عليكم
معكم سعد
الحمدلله جبت ٨٥ كنت اتوقع والله اقل من ال٨٠🥲
بقولكم وش ذاكرت اول شي بديت شهر ٨ شعبان وقعدت شهر كامل اتأسس كل المواد من كتاب ناصر الا الرياضيات من كتاب المعاصر وفادني التأسيس بشكل كبييير لأني يوم دخلت على التجميعات بعد التأسيس صرت احل بسررعه وخلصت تجميع غشام وتجميع بصمه فرح وتجميع الحوت ثم يوم قرّب اختباري بديت اذاكر التسريبات وفادتي بشكل كبيييير الحمدلله وجاني في الاختبار منها اسئله كثيره والله
وبس والله حبيت افيدكم وماابي منكم الا الدعاء اني انقبل في التخصص اللي ابيه الله يسعدكم ويوفقكم ويجعلكم تجيبون الدرجات اللي تتمنونها وتدخلون التخصص اللي تبونه يارب 🤍🤍🌹.

الحمد لله الدرجه مو بالكثير ولكن فرحتي فيها وفرحه اهلي وبالذات اني عانيت كثير من السبعينات طيبت خاطري فيها الحمد لله

طيب ايش ذاكرتي
بالنسبه لي الرياضيات ما كان عائق الحمد لله ذاكرته من التجميعات السؤال اللي ما افهمه اتجه لاستاذي
باقي المواد حرفيا نااااصر وما بعده اي شي ثاني
كويزاتكم فادتني بشكل كبير بالذات بالبدايات وما انسى كويزات ريون ومسابقاته كمان فادتني مررره

طبعا هالدرجه كانت للتأسيس فقط ولكن بعد الاختبار شفت اسئلتي كلها بتجميع غشام وتجميع الحوت

بالتوفيق جميعا وفالكم الدرجات العاليه يارب🤍🧚🏻‍♀️✨

السلام عليكم ورحمة الله وبركاته .
بديت مذاكرة من بداية الترم الثاني لكن شديت ع نفسي فعلاً من شهر ٧ ذاكرت كتاب ناصر عبدالكريم وبعدها دخلت ع التجميعات خلصت تجميعات غشام بفههم وبعدها اخذت بصمة فرح ووقتها ناويه اخذ تجميع غيرهم ولكن داهمني الوقت وبديت بالتسريبات اليوميه ، الاختبار يعتبر سهل وخاصه اقول للدفعات الجايه ترا مره اسهل من القدرات بكثيير وتجي التجميعات نسخ لصق بالضبط ممكن بس تتغير الارقام واحياناً يجي نفسها وبس والله دعواتكم اكون مرتفعه بالفتره الثانيه وانقبل بالتخصص اللي ابيه 💛.

السلام عليكم ..
في البداية الاساس لمذاكرتي كان من كتاب ناصر واخذت وقتي فيه الين اكتفيت وبديت اذاكر تجميعات اخذ هذا كله شهرين تقريبا ً واكثر لحد م بدينا اختبرنا الفتره الاولى ولما بدت بديت اذاكر التسريبات سؤال سؤال وطبعا كان كثييير اسئلة متكررة والاختبار بشكل عام كان سهل مو مثل م توقعت وبإذن الله لسا قدامي الفرصه الثانية اشوف فيها درجتي متوقعه تكون احسن ان شاء الله والله يوفقنا 🤍🤍.

السلام عليكم ورحمة الله وبركاته .
اهلاً بالاصدقاء ..

حبيت اعطيكم تجربتي البسيطة لكي افيدكم واتمنى ان اتوفق في سردها .

حقيقة بدون مقدمات عن التحصيلي حاب ادخل مباشرة على المصادر بس مثل ما تعرفون مثل اي اختبار في قياس هناك مفتاحين : تأسيس + تدريب

١) التأسيس / بما انه منهج درسته حيكون التأسيس سهل جداً ، الكتب التجارية : ١) ناصر ( للمواد الاتيه / فيزياء ، كيمياء ، احياء ) ٢) المعاصر ( الرياضيات )
تقدر تستفيد من الكتب المدرسية في التاكد من صحة المعلومات والمراجعة .


٢) التدريب / يوجد تجميعات كثيرة للتحصيلي ، وغالباً تكون تكرار فاذا وقتك محدود راح انصحك بالافضل بالترتيب
١) غشام
٢) الحوت ( تجميعات وتسريبات يوميه وقت الاختبارات )
٣) بصمة فرح

هذا كل ما لدي بالتوفيق لكم اصدقائي
تمنياتي لكم بالتوفيق والنجاح 💙

هذي درجتي بصراحه ارتحت يوم شفتها وبعد الاغلاط الكثير اللي شفتها إلا اني مره انبسطت على هالدرجة بالنسبة للمذاكره اعتمدت اكثر على كتاب ناصر والتسريبات حق الايام اللي قبلي بس التسريبات كانت فيها اغلاط كثير وانا حليت مع هذي الاغلاط🌚 تحطمت صراحه بس ما فقدت الأمل لأن ربي مستحيل يضيع تعب احد حتى لو ذاكر لمدة يوم بس وادعولي الفترة الثانيه ان شاءالله اجيب فوق ال٩٠ وتذكروا دايماً انه الدرجة اللي تجيبونها لازم تكونون فخورين في انفسكم انكم حققتوها لأن المحاولة والوقوف في وجه الأختبار هذا بحد فخر وشجاعة واكيد ربي كاتب لكم شي جميل في المستقبل بالتوفيق يارب وفالكم ال١٠٠ بالفترة الثانيه♥️🙏

صباح الخير يا اصدقاء🤍
بديت اذاكر يوم سجلنا اول شي مسكت كتاب ناصر وذاكرته كله جا رمضان وانا مخلصته وتأجل الاختبار وبديت اذاكر التجميعات غشام وبصمه فرح وافانين وصراحه جدا جدا جدا فادتني في اني اتدرب وبالأخص تجميع الاستاذ غشام ماخفي لكم اني بعد ماذاكرت كتاب ناصر كنت شوي مشتته يوم دخلت التجميعات بس بعد مده من التدريب صرت اعرف الحمدلله برضو ذاكرت الرياضيات من ناصر بس حسيته مافادني! رجعت للمعاصر وانصحكم فيه وبقوه للرياضيات في دروس صعبه لكن الاستاذ عماد يخليها لعبببه بسيطه ولذيذه ايضا قروب الحوت يالله على الاحتواء الي فيه!! في كل مسأله صعبه في كل تعسيره الى تلاقي احد فيه يجيب لك الحل ويطبطب عليك بشرحه مشكوره وجداً لهم ،
الحمدلله على كل حال موعدنا الفتره الثانيه بأذن الله درجه اعلى نراكم على خير يا اصدقاء 🤍

السلام عليكم
معاكم مروان الحمدلله بفضل الله ثم بفضل دعاوي اهلي واخوياي الي وقفو معايا والي ازعجتهم انهم يدعون لي حقيقي ماخليت احد الا نشبتله يدعيلي جد
الحمدلله جبت درجة 90 اممم يمكن تكون عاديه نوعا ما بس بالنسبه لي اكون امنت نفسي من جميع النواحي وحققت الي ابغاه .
طبعا في البداية الموضوع كلو بدا بتاريخ 7/21 اي تقريبا قبل رمضان بشهر وتسعة ايام بديت اذاكر لناصر عبدالكريم وكانت بدايتي للمادة الاحياء كنت مستصعبها بصراحة لان معلوماتها كثيير
وبعدها انتهيت منه وذاكرت الكيم بعدها الفيز طبعا كنت متأسس في الرياضيات من كتاب المعاصر اعطاني تأسيس قوي جدا ولله الحمد طبعا شي ضروري الكل يعرفه ان المذاكرة بدون مراجعه حقيقي مابتستفيد شي وهذا اول غلط سويته في الفتره الاولى قفلت الكتاب ورميته ولا بديت اراجع الا قبل الاختبار بكم يوم الاهم من هذا كلو ان وقت اختباري الفتره الاولى كان يصادف اختبار CPP ارامكو فكان صعب جدا اني اوازن بينهم للاسف اني اختبرت في ارامكو وانرفضت والحمدلله ربي عوضني في هالاختبار .... طبعا يومها وانا خارج منه كنت متوقع اقل شي 30 غلط يعني ثمانين يمكن .. بس الصراحة انصدمت امس لما شفت الدرجة الي عارف كيف كان هم وضيقه في صدري وراحت .. المهم ان ربي عوضني وربي مايضيع تعب احد ابدا وحط ببالك مهما اشتغلت وسويت وانرفضت بترجع لك الافضل والافضل منها ان شاء الله وموفقين جميعا

بالبدايه الحمدلله دائماً وابداً ، بدون كثرت كلام بقولكم تجربتي الرهيّبه بديت بثاني اسبوع من رمضان بجد واجتهاد وختمت كتاب ناصر ، ذاكرت الرياضيات مع عمر عزب وكنت احل ملحق الرياضيات بعد كل درس والفيزياء مع علي السبيعي والباقي ذاكرته من نفسي بعدها بديت بـ تجميعات غشام ختمتها واكتفيت فيه لانه ماكان في وقت ، وبديت اذاكر التسريبات الي كانت قبل اختباري والحمدلله

ودعواتكم 93+ اختباري بكراً ولكم بالمثل يارب♥️

الحمدلله رغم انها ليست مرتفعه الا انها نوعاً ما مقبوله تجربتي الصراحه كانت اغلب اخطأئي صور الأحياء ورسوم البيانية اتمنى من الجيل القادم يركز عليها والسلام عليكم ودعواتكم لي بالتوفيق ♥️

الصدق الدرجة ابداً ما اطمح لها بس كوني مذاكر بس خمس ايام بحكم اني كنت اذاكر لاختبار أرامكو صارت مقبوله شوي ذاكرت ناصر قسم الفيزياء و الكيمياء كامل و الباقي ما خلصته وذاكرت التسريبات اليوميه خشيت الا أختبار وانا بارد نوع ما لاني حاط في راسي ان الاختبار ذا تحصيل حاصل و الحد في الاختبار الجاي لقيت اسأله كثيير من ناصر بالنسبة لاسألة التسريبات ما حصلت الباقي حليته من ذاكرتي من المدرسة وتوقت اني في الثمانين يعني لا تتوتروا وادخلوا وانت واثقين من انفسكمم اهم نقطتين الكثير مهملها وخل املك بالله