نرجاك في المطرة

ارجع تعال يا شليل

درع الأميرة سرق

سووهو حدوة خيل

بحر العطاشا نشف

نشرب بواقي السيل


♡

الحزن لا يتخير الدمع ثياباً
كى يسمى بالقواميس بكاء
هو شىء يتعرى من فتات الروح
يعبر من نوافير الدم الكبرى
ويهرب من حدود المادة السوداء
شىء ليس يفنى فى محيط الكون
او يبدو هلاما فى مساحات العدم
♡

سألتك بى حجا الأمات ودعواتنا ..


سألتك بى كبيداتن و دمعاتنا


شليل وين راح ..


يكون ضل الخريف فاتنا


وشليل وين راح

♡

مليت تبآريح الجراحات .. البقت بعدك اسى
وزمنا قسى .. حالا اسيف ..
ومشيت افتش .. في خطاويك القبيل ..
واضاري من زمنا وراك .. ملاني خوف ..
إحتجت ارتاح عن عيون ..
فيهن ملامحك ذاتا من آي زيف ..
وإشتقت لي .. ضحكه صباحك ..
والدعاش عطر رزاز مطر الخريف ..
♡

{وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا} [النساء : 93].

اختر مكانك و احترق حيث انتهيت ...
.
#نناضل_لا_نساوم
#مليونية_30_يونيو

و من يعيد لنا الرفاق ؟

قل للذين يوزعون الظلم 
باسم الله فى الطرقات
الله فى نار الدموع
وفى صفوف الخبز والعربات والاسواق
والغرف الدمار
البحر يا صوت النساء الامهات
القحط يا صمت الرجال الامهات
الله حى لا يموت .
♡

كل البشاشات القبيل

تلقاه ميتة مسممة

والجاتا جاتا من الارض

ما جاتا من تالا السما

مااعتى غبنك ياولد

واعدل قضيتك وأعظما

لاترجّع السيف الجفير

والدنيا فايرة مصادمة

من غير تجيب تار البلد

ريح العوارض تهزما

وتطرد مع إبليس الأخير

دعة الضلال من جنتك يا آدما

تاكل من الشدر الحلال

يغشاك نعاس في ضل رمى
 

تحتاك هضاريب الصعب

كربة ليالى الَمظْلمة

يا نيل قُبل خاطرك يطيب

أرضك تفذّع باللهيب

تكشح تواريب الغضب

صعب المِراس

نوبة وزنوج بجه وحلب

رطانة عربان مواشو

ومولدين تلقانا أو

نلقاك ضوء

ضلمة لياليك العِجاف

رشة نهاراتنا النشاف

آمنا بيك وموحدين

في إيدنا فاس… وقلم رصاص

شتلة وكمنجة ومسطرين

وطبنجة في خط التماس

حرآسة من كيد البكيد

ضد الرصاص والإنتكاس

نبنيك جديد واشد باس
♡

يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا رغبة الرعد البيسكن ..
بين غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا
♡

قلت ليها ..
وكنت راجع لي عينيها ..
من اسى الزمن المسافر
في المشاوير العصيبة
من متاهات الاماسي
الفي مداها الحزن مضناها وحبيبها
بيني لا بينك مزار
لا محطات انتظار..
لا مواعيدك قريبة ..
انت ياالفرح الحقيقة ، المستحيل ..
هدهدي الصبر الجميل
وامسحي الالم المخيم..
في المدارات الرحيبة
♡

الحقيقه الضايعه بين قلبي وعيونك
اني لا قادر افوتك لا اجيك
♡

حبالنا الجوة .. ما تخنت
حبال السما الممدود
حبال الصوت وكت يرجع
يجيب الخاطر المردود

تعالى نشوف..
غنواتنا البقت فى الدنيا ما بتشوف
تعالى نشوف..
حروف البكا .. الجوّاها مافى حروف
تعالى نشوف .. تعالى نطوف
على المدن البِقت أشباح
على الجوع القعد مرتاح
على الكلمة البِقت فى الجوف
تفتش سكة الأفراح

تعالى نشوف
منو البقدر يخاصم طفلة
صِبحت هازلة فوق مدّ
الأسى .. الحرّاق
يا غنوتنا ما تفوتى
ويا كلمتنا ما تموتى
فتشى فوق ضمير الكلمة
عن وتراً رحل ... فرّاق
وعن ولداً رحل ... فرّاق
وعن بلداً رحل ... فرّاق
وعن عِلماً رحل ... فرّاق
تعالى نشوف ..
غُنانا الفينا ما بشفع
حديثنا الجوّة ما بِنفع
زمنا الفينا ما بشفع
تعالى نشوف .. تعالى نطوف
تعالى ..نعلم الشُفّع
تعالى ..نعلم الشُفّع
♡

كم شوق اختصرو مصطفى سيد أحمد لما قال بكل الصوت الجواهُ :
" وسرحتَ يا مهوّن تهوّن شان أجيك" ..
عارف إنو المسافة طويلة ، والطريق أشتَر ، والأيام معاندة ، بس عارِف كرم ربّنا وإنو لو أراد مصيرو يوم يوصَل ، وناداها:
" كان أصَل يوم لي حضورك كُت بريدك ومُشتهيك"
ماعارف الطريقة أو الزمن ، بس كل العارفو ، إنو محتاج يوصل ليها ، بس لأنو بحبها..
كم زول فينا دعا ، وسرح ، وصبَر ، ونادى عشان يوصل وحلِم بنهاية مافيها ضيق ومُر ؟ كم زول فينا قال ولو في سرو " يا مهوّن تهوّن " عشان يوصل وتنتهي كل المسافات.

"وحبوك حُب.. قدر الحروف الحايمة في بطن الكُتب ، قدر الخيال ما مدَ إيدو على السُحب ..♥️

اصلو العمر شوقا كان .. حزنا كان .. و صبرا كان .. فسيح و فسيح ... اصلو العمر كان دربا مشيتو كسيح ... كااان غرسا سقيتو بكا و قبضت الريح .. ♡

ما اصلو .. حال الدنيا .. تسرق منيا .. في لحظة عشم ...
♡

من المدفع طلع خازوق ..خوازيق البلد ذاادت..

اصلو الوجع رااااقد ..
اربعينية الشهداء ..
#مليونية_13_يوليو

عزة في هواك عزة نحن الجبال

وللبخوض صفاك عزة نحن النبال

عزة ما بنوم الليل محال

وبحسب النجوم فوق الرحال

خلقه الزاد كمل وأنا حالي حال

متين أعود أشوف ظبياتنا الكحال

عزة ما سليت وطن الجمال

ولا ابتغيت بديل غير الكمال

وقلبي لي سواك ما شفتو مال

♡

عقب سيرة البلد سارت

علي النغم العديل الزين

بعد ها الحال بلا مرسال

يجوا العمال

يجو الكداح

يجوا الناس البخبرو شليل

وشقيش راح

وقمريتين جناحن دلّ فوق الصاح

من الغفلة ورياح الليل

وفي الدنيا الجديدة جناح
♡

يوم ما كان ميلاد شهيدك

يلا غني ولاقي عيدك

ولى ثمارك لقي ايديك

جيل مكافح حلَّ قيدك

فى غضبنا الحر ولافح

وياما باكر وفى زنازين العساكر

نبني مجدك ومهرجانك

وكل قطرة دم عشانك

ولى جديدك يا جميلة
♡