و ياما نحلم نحكي ليك ..
عن المسافة و نشتهيك 💔 ...
♡

ارود الرمل لا ابني به بيتا لاحلامي ..
ولكني افتش عن فتاتات الإغاثات ..
فصوغوا وقع موسيقاكم المحزون
من رجع استغاثاتي ..
فقرض الخبز....... قرص الشمس
ينأي عن حشاشاتي ..
وراء سرابه المؤود لهفاتي ولهثاتي .

اوبريت طفل العالم الثالث ..
مصطفى سيد أحمد ‎
محمد وردي - يوسف الموصلي - ليلى المغربي ..
♡

و مرقت من قلبك مشيت
طفت الشوارع و المدن
لفيت حوارى الدنيا جيت
فتشت فى عيون الزمن 
لى سكتك و كم من مشيت
لا لقيتك انت و لا بقيت
القى المواعيد يصدقن
لا بعدك الايام صفن
لا قدرت اعرف وجهتك

و سرحت فى خاطرى 
وسهيت فى ذكرتك 
سفرك و مشاويرى
و تباريح سكتك 
خرز السبح
ممدودة فى جيد 
الامانى المستحيل
شهقة حروف اللقيـا
فى غفلة أسى 
الزمن البخيل
رنة خطاك 
سايقانى للحلم القبيل
نتلاقى ما نعرف مدى
و اتجاوز النغم الصدى
و اتسابق العمر الجميل

أصحى و معاى 
يصحى الشجن
و يفيق أساى 
و اساك يجن
و القاكى يغلبنى الكلام
و يشرقنى بالاسف الحزن
و يكفيك خيال 
فى غمرة 
الاسى و المحال
القاك شقى العمر اللى فات
و القاك فرح فى غفلة مات
و يلقانى فيك مسدار 
يغنيلك أساى
دوبيت يجر نمك 
على حرقة حشاى
قمرا طلع فى غيم سماى
بقّ وخبا و حاريهو 
فى الزمن اللى جاى 
و حاريهو فى 
الزمن اللى جاى ..

مرقت .. على محطات
السفر .. غربة
وما لقيتك .. أمل شارد
مع إنك معاى
فى زحمة المشوار
وحتى يقينى عاد من تانى
صحـّاك من حنين ذاتى ..
نجم الفرحة يا عايد
♡

وكت ضليت ...
قعدتّ براى .. وحسيتك
بتطلعى من نفس طورية
ضامـّة الطين ..
ومن دمعة وجع طوّل
ندا العرق البنادى .. حنين ..
♡

عينيك وحاتك غربتى .. وأهلى
وبلادى الفيها ضايع لى زمن ..
عينيك وحاتك شوقى لى زولاً ولوف
من بعدو ساب عينى .. سهن..
وانا كنت داير من زمان
أشرح حكايتى معاك ألف ..
أحكيك .. وأزيد القول .. إلِفْ ..
وأتمنى لو قلبك عرف ..
كان من زمان
من قبل ما فى قلبى يتحكّر
زمان الغربة فى جرح الأسى ..
من قبل ما حرف الحقيقة الحلوة
.. يتبدل عسى ..
ويصبح أمانى كسيرة في خاطر الحناان ...
♡

كنت غريب الوجه ... معذب ..
♡

و إن طق الزمن ... لازمك توب جديد ..
و بأي تمن .. غصبا للظروف .. و الحال الحرن ..
♡

أديني إحساس بالأمل

في كل رحلة شوق تطول

وادى الخطاوى الراجعة ليك

في سكتك عشم الوصول

ما الدنيا كلها انتظار

و الارتحال قدر الفصول

الموجة تحلم بالضفاف

والغيمة تحلم بالهطول

راحل معاي ضي الأماني

وذكرى في الأيام هناك

لحظات بتذخر بالمعانى

وكيف أنسى تذكارات هواك

نتحمل الغربة ونعاني

و نصبر عشان نكسب رضاك

ونغنى لو زاد الحنين

ويارتيو كان سفرا معاك

مداك اتعدى حد الشوق ..
دخلت على الشعر انسان ..
هواك اتختى جوى الجوف ..
انتحر النهار هسي ..
نغنيك لمدن شاخت ..
خلاص يا غربة ما ترسي ...
♡

حاتجى البت البريــدة ..
ضاحكة .. منتصرة .. وعنيدة
آملة .. مزدهرة .. وجديدة
ناقشة فى الزول .. أغنيات
حاتجى المن بدرى جات
ناسفة ازمان الثبات ..
واصفة لى الناس الطريقة
ولى العصافير .. الجهات


♡

يا طبيب أنا سألك قول لي بكل صراح

النسيم يشفيني أم يزيدني جراح 
يا ال مارأينا جمالك فى عجم وفصاح

يا الشلتّ عقلي الشارد نور جمالك لاح

الشغل افكاري قول ليّ إيه ياصاح

نحنا هل جنينا ام عقولنا نصاح ؟!
♡

ولا برقت شموس منّك
ولا دخلت شموس فينى
ولا أظنّك بتدّى شموس
ويطلع من عيونك ضى
ولا لِمِس الجفاف خدّك
ولا ركّ الندى المحروق
فراشات فى شذاك .. دخان
شعاعات من بريق لحظك
فهل يرجع زمن جيتك
حضور تانى ؟
♡

يا إيد أبوي على إيد أخـوى
على إيدى أنا
على إيد و إيـد
تجدع بعيد في اللجة
في من راس ميضنة
حيكومة الفقر الدمار
الكضبن و الصهينة
اللي نقاص أيامنا كاس
اليالطيف سوس البحر
نرجم قفاهو حجر حجر
من ها الرصيف
الما قدر قدام
سريحة الموج يقيف
الما انستر
الارزقية وناس مو يا
نسقيها كاس أسقتنا يا
نوريها كيف عشق الحياة
سنانا فوق حجر القصاص
سوانا ناس ارض البحر
جوانا احد من الرصاص

كرباجك الـ قطرانو حزب السارقين ..

نازل علي ضهر القوي .. و الجسمو ضللاتو اليقين ..

ما بستكين .. لو روحو فاضت بتقت في كل ربوع وطنو الحزين..

 

لو انتو شلة مسخرة و عبدة كراسي و مفترين..

نحنا البلد .. درقة و سيوفا صانعة و شلال يقين..

 

بنقولكم يا مفترين .. بنقولكم يا مفترين ..

 

العندو دين .. ما بسرق البلد العبادو موحدين..

 

العندو دين .. ما بنبي قصرو العالي فوق جوع الغلابة المسلمين ..

 

العندو دين .. ما بسمي أعداء الوطن جند الوطن و الحادبين..

 

العندو دين .. ما بسمي من قالوا الحقيقة المرة خونة و مارقين..

 

بنقولكم يا مفترين .. حالفين يمين .. .....

 ♡

سنّى على النضال إيدى

 

سوّكى بى الهتاف .. فمّى

 

شوارعك لى .. دويها .. على

 

إذا ما آخر العلاج الكى ...

 

مراويدك حُمر يا أمْى

 

 

 

هردت لهاتى بى الغنوات

 

وقتْ يبرد حشاك .. يا أمّى

 

من التعب البلا صالح ...

 

تفيقى .. تروقى .. تنجمّى

 

تسوّى مكانسك المطرة

 

تضوى البيت وتنجمّى

 

تمرقى صبوحة لى الجيران

 

قدح فوق إيد ... (وفْيد) ألمى

 

 

 

يلاقوك شفّع الكتـّاب

 

نضاف وظراف بلا النسمى

 

يغنولك غناوى السـاب

 

وفى بيوضة مافى سراب

 

جبال كجمى وفيافى الكاب

 

تميد بى الخضرة ...منقسمى

 

فيافى الصّى وبيوضة ..

 

البراسيم فيها مفروضة

 

خدارا يرارى شوف عينى

 

على الأبواب .. طواريها وحواريها

 

بقت روضة

 

بقت تشرب من الحامداب ..

 

تشوفى رهاب ... بُعُد نجمى

 

.. بشوفو قريب قُرُب نضمى

 

بشوف العالم التحتانى هيلاهوب وقف ناهض

 

وهدّ عمايد الفوقانى ..

 

جوّة الجُب رمى العارض

 

وفى الساقوا الدمار أفراد

 

عريق الحب نبض قابض

 

متل قبض الحروف فى إسمى

 

وغناوينا القبيل .. رقراق

 

علينا تصب برد .. قارض

 

وأجر نمّى ...

 

أدوبى لهاتى بى الغنوات ..

 

عُقُب يبرد حشاك .. يا أمّى

 

 

 

وطنى ولا ملى بطنى

 

سكاتى ولا الكلام النّى

 

بليلتى ولا ضبايح طى

 

قليلتى ولا كُتُرْ سمّى

 

سلام يا أمّى

 

سلام لا هكمى .. لا دكْمى

تجمع المهنيين السودانيين

إعلان الحرية والتغيير

نحن شعب السودان في المدن والقرى، شمالاً وجنوباً وشرقاً وغرباً ووسطاً، بكافة قوانا الشعبية والسياسية والاجتماعية والنقابية والمدنية وأصحاب المطالب، نؤكد عبر هذا الإعلان إننا لن نتوقف عن استخدام كافة أساليب النضال السلمي حتى يتم الخلاص من نظام الإنقاذ الشمولي وتحقيق الأهداف التالية:

اولاً: التنحي الفوري للبشير ونظامه من حكم البلاد دون قيد أو شرط.

ثانياً: تشكيل حكومة انتقالية قومية من كفاءات وطنية بتوافق جميع أطياف الشعب السوداني تحكم لأربع سنوات وتضطلع بالمهام التالية:

١- وقف الحرب بمخاطبة جذور المشكلة السودانية ومعالجة آثارها بما في ذلك إعادة النازحين واللاجئين طوعاً إلى مواطنهم الأصلية وتعويض المتضررين تعويضاً عادلاً و ناجزاً ومعالجة مشكلة الاراضي مع المحافظة على الحواكير التاريخية.

٢- وقف التدهور الاقتصادي وتحسين حياة المواطنين في كل المجالات المعيشية.

٣- عمل ترتيبات أمنية نهائية مكملة لاتفاق سلام عادل و شامل.

٤- الإشراف على تدابير الفترة الانتقالية وعملية الانتقال من نظام شمولي يتحكم فيه حزب واحد إلى نظام تعددي يختار فيه الشعب ممثليه، مع إعادة هيكلة الخدمة المدنية والعسكرية (النظامية) بصورة تعكس استقلاليتها وقوميتها وعدالة توزيع الفرص فيها دون المساس بشروط الأهلية والكفاءة.

٥- إعادة بناء وتطوير المنظومة الحقوقية والعدلية، وضمان استقلال القضاء وسيادة القانون.

٦- العمل على تمكين المرأة السودانية ومحاربة كافة أشكال التمييز والاضطهاد التي تتعرض لها.

٧- تحسين علاقات السودان الخارجية وبناؤها على أسس الاستقلالية والمصالح المشتركة والبعد عن المحاور مع إيلاء أهمية خاصة للعلاقة مع أشقائنا في دولة جنوب السودان.

٨- التزام الدولة بدورها في الدعم الاجتماعي وتحقيق التنمية الاجتماعية من خلال سياسات دعم الصحة والتعليم والاسكان مع ضمان حماية البيئة ومستقبل الأجيال.

٩- إقامة مؤتمر دستوري شامل لحسم كل القضايا القومية وتكوين اللجنة القومية للدستور.

ثالثاً: وقف كافة الانتهاكات ضد الحق فى الحياة فوراً، وإلغاء كافة القوانين المقيدة للحريات وتقديم الجناة في حق الشعب السوداني لمحاكمة عادلة وفقاً للمواثيق والقوانين الوطنية والدولية.

• بالتوقيع على هذا الإعلان الذي تظل بنوده مفتوحة للإضافة، خاصة فيما يتعلق بمهام الحكومة الانتقالية وذلك لاستيعاب جميع هموم وطموحات الشعب السوداني والذي سيتم فيه أيضاً المزيد من التفصيل باستصحاب كافة المواثيق والاتفاقات الموقعة سابقاً من قبل الكتل والأحزاب السياسية المعارضة؛ نؤكد إننا سنظل بالشوارع متمسكين بكافة أشكال النضال السلمي إلى أن تتحقق مطالبنا، وندعو إخواننا و أبناءنا في كافة القوات النظامية للانحياز إلى جانب الشعب ومصلحة الوطن والمواطن وعدم التعرض للمواطنين العزل بالقتل والتنكيل لحماية البشير ونظامه الذي سقط فعلياً أمام إرادة الجماهير الباسلة.

الخرطوم – ١ يناير ٢٠١٩م

#مدن_السودان_تنتفض