هه‌ر مرۆڤێك به‌پێی ناخی خۆی ئاوات بۆ ئه‌وانی دی ده‌خوازێت
بۆیه‌ ئاواتی مرۆڤدۆستان ، هه‌ستاندنه‌وه‌و دڵخۆشكردنی نائومێدانه‌
ئاواتی داخ له‌دڵانیش ، شێواندنی ناوبانگ و شكاندنی شكۆی سه‌ركه‌وتووانه
سه‌رئه‌نجام مرۆڤدۆستان ئاسووده‌ن و ، داخ له‌دڵانیش ئازاری خۆیان ده‌ده‌ن

هاوڕێیه‌تیی ئاره‌زوومه‌ندانه‌و به‌ئازادیی دوو لایه‌نه‌ دروست ده‌بێت
راسته‌ هاوڕێن ، به‌ڵام مه‌رج نییه‌ هاوڕا بن له‌هه‌موو شتێكدا
بۆیه‌ ره‌وا نییه‌ هاوڕێ رای خۆی له‌سه‌ر هاوڕێ فه‌رز بكات چونكه‌
له‌هاوڕێیه‌تییدا رێزگرتن له‌ئازادیی بڕیاردانی هه‌ر كه‌سدا هه‌یه‌
له‌به‌ر ئه‌مه‌شه‌ له‌هاوڕێیه‌تییدا كه‌س پاشكۆ نییه‌و ، كه‌سیش سه‌ركرده‌ نییه

داننان به‌هه‌ڵه‌ نیشانه‌ی متمانه‌ به‌خۆبوون و به‌هێزیی مرۆڤه‌
ئه‌مه‌ جگه‌ له‌وه‌ی كه‌ یه‌كێك له‌سووده‌كانی داننان به‌هه‌ڵه‌دا ئه‌وه‌یه‌
كه‌ كه‌س ناتوانێت ئه‌و هه‌ڵانه‌ دژ به‌خاوه‌نه‌كه‌ی به‌كار بێنێت
چونكه‌ خۆی پێشتر به‌ئاشكراو به‌راشكاویی باسی كردووه

كه‌سی خراپ رقی له‌خودی خۆت نییه‌ ، رقی له‌سیفه‌ته‌ باشه‌كانته‌
چونكه‌ به‌بوونی سیفه‌ته‌ باشه‌كانت تۆ گه‌وره‌و ، ئه‌و بچوك ده‌رده‌كه‌وێت
به‌ڵام ئه‌گه‌ر خاوه‌نی سیفه‌تی خراپ بوویتایه‌ خۆشی ده‌ویستی
چونكه‌ ئه‌و كات تۆش بچوك ده‌رده‌كه‌وتی وه‌ك ئه‌و

یه‌كێك له‌گرفته‌كانت له‌م سه‌رده‌مه‌دا ئه‌وه‌یه‌ كه‌
ده‌ترسیت زیاد له‌ڕاده‌ ڕێز له‌هه‌موو كه‌س بگریت
چونكه‌ رێزی زۆرت له‌زۆر كه‌س گرتووه‌ كه‌ دواتر
بۆت ده‌ركه‌وتووه‌ شایانی ئه‌و رێزلێگرتنه‌ت نه‌بوونه
وایانزانیوه رێزگرتن هی لاوازییته‌ ، نه‌یانزانیوه ئه‌خلاقی خۆته

ئه‌وان ژیانیان به‌تۆ نه‌به‌خشیوه‌ تا به‌ئاره‌زووی ئه‌وان بژی و بدوێیت
بژی به‌و جۆره‌ی بڕیاره‌ راسته‌كه‌ت داوه‌ ، بدوێ وه‌ك ئه‌وه‌ی بڕوات پێیه‌تی
ئه‌گه‌ر نا ، ترسان له‌قسه‌ی خراپی ناحه‌زو ، تانه‌و ته‌شه‌ری خه‌ڵكی خراپ
مرۆڤ دووره‌ په‌رێز ده‌كات و ، له‌بچوكترین گۆشه‌ی ژیاندا به‌ندی ده‌كات
هه‌ر به‌م كاره‌ش ، مرۆڤی چاك خۆی له‌ژیانی شایان به‌خۆی بێبه‌ش ده‌كات

به‌شێك له‌مرۆڤی سه‌رده‌م له‌ساتی پێداچوونه‌وه‌ به‌ژیانياندا
زیاتر خوازیاری هێمنیی ده‌بن و ، زۆرتربش حه‌ز به‌بێده‌نگیی ده‌كه‌ن
خۆیان ناچار ناكه‌ن روونكردنه‌وه‌ له‌باره‌ی كاره‌كانیه‌وه‌ بده‌ن به‌خه‌ڵك
تێكه‌ڵیی و په‌یوه‌ندییه‌كانیان له‌گه‌ڵ ده‌وروبه‌ردا كه‌متر ده‌كه‌نه‌وه‌
واز له‌و بیرۆكه‌یه‌ش ده‌هێنن كه‌ له‌خه‌می راگرتنی دڵی هه‌مواندا بن

كه‌ وا په‌روه‌رده‌ كراویت زمانت پاك بێت و ، فێری وشه‌ی نه‌شیاو نه‌بوویت
مه‌چۆره‌ مه‌یدانی شه‌ڕ له‌گه‌ڵ زمان پیسان ، ئه‌و شه‌ڕه‌ براوه‌ش تیایدا دۆڕاوه

ژیانی راسته‌قینه‌ی مرۆڤ ئه‌و كاته‌ ده‌ست پێده‌كات
كه‌ ده‌گاته‌ ئه‌و راستییه‌ی ئه‌و ته‌نها یه‌ك جار ده‌ژی
ئیدی له‌ ساته‌وه‌ به‌و جۆره‌ ده‌ژی كه‌خۆی ده‌یه‌وێت
نه‌ك به‌و جۆره‌ی كه‌ خه‌ڵك نه‌خشه‌ی بۆ ده‌كێشن

لێره‌ بێت یان له‌وێ ، كه‌س له‌ سزا ده‌رباز نابێت
ئه‌وانه‌ی ئه‌مڕۆ له‌تاریكییدا به‌قسه‌ی درۆ ئازارت ده‌ده‌ن
سبه‌ی له‌روناكییداو به‌ده‌ركه‌وتنی راستییه‌كان ، په‌شیمانیی ئازاریان ده‌دات

هه‌میشه‌ باش به‌ ، به‌ڵام له‌سه‌رحیسابی مافه‌كانی خۆت نه‌بێت
كۆتایی به‌ هه‌ر كارێك بێنه‌ ، كه‌ شایانی ئه‌وه‌یه‌ كۆتایی پێبێت
له‌و كه‌سانه‌ دوور به‌ ، كه‌ به‌گومانی ره‌شیان رۆژی ژیانت تاریك ده‌كه‌ن

دوو جۆر خۆشاردنه‌وه‌ هه‌ن له‌په‌نای ناوو وێنه‌ی خوازراودا
جۆرێكیان ئه‌و كه‌سه‌ چاكانه‌ن كه‌ده‌یانه‌وێت زیانیان پێ نه‌گات
جۆرێكیشیان ئه‌و كه‌سه‌ خراپانه‌ن كه‌ ده‌یانه‌وێت زیان له‌خه‌ڵك بده‌ن
خوداش ئاگای له‌نییه‌ت و وته‌و كاری هه‌ردوو لایان هه‌یه

له‌مێژه‌ وتوویانه‌ : نهێنییه‌كانت دیلی ده‌ستی تۆن
ئه‌و كاته‌ی باسیان ده‌كه‌یت تۆ ده‌بیته‌ دیلی ده‌ستیان
بۆیه‌ نهێنییه‌كانت بۆ هه‌موو جۆره‌ كه‌سێك باس مه‌كه‌
چونكه‌ هه‌ندێك هه‌ن ته‌نها حه‌ز له‌بیستنیان ده‌كه‌ن
هه‌ندێكیشیان هه‌ن ئاره‌زووی گێڕانه‌وه‌یان ده‌كه‌ن

كه‌س مافی ئه‌وه‌ی نییه‌ هه‌موو پرسیارێك بكات
كه‌سیش ناچار نییه‌ وه‌ڵامی هه‌موو پرسیارێك بداته‌وه‌
بؤية رێگه‌ مه‌ده‌ به‌و كه‌سانه‌ی كه‌ ده‌تخه‌نه‌ ژێر پرسیاره‌وه‌
پرسیار له‌باره‌ی هه‌موو شتێكت ، ستایلی ژیانت ، تایبه‌تمه‌ندییه‌كانت
جۆره‌ پرسیارێك وه‌ك ئه‌وه‌ی تۆ تۆمه‌تبار بیت و خۆیان دادوه‌ر بن

هه‌رچی مرۆڤ ده‌یڵێت و ده‌ینووسێت ده‌بنه‌ خه‌رمانی وشه‌كانی
له‌دوا وێستگه‌ی ژیانیشدا مرۆڤ خه‌رمانی وشه‌كانی له‌گه‌ڵ خۆیدا ده‌بات
كه‌س حاڵی به‌حاڵی ئه‌و كه‌سانه‌ نه‌بێت كه‌ له‌ دادگای رۆژی دواییدا
لاپه‌ڕه‌ی پڕ له وشه‌ی ناپه‌سه‌ندو نه‌شیاویان له‌حزوری خوادا په‌خش ده‌كرێت

باشیی و خراپیی هه‌ر ده‌رچوونێنك له‌وه‌ڵامی ئه‌م پرسیاره‌دایه‌
ئایا مرۆڤ خۆی ده‌دا به‌ده‌م رێگاوه‌؟ یان مرۆڤ رێگای خۆی دیار كردووه‌؟
بۆیه‌ هه‌ندێك نازانن بۆ كوێ ده‌چن ، چونكه‌ ئامانجیان دیار نه‌كردووه‌
هه‌ندێكیش ده‌زانن بۆچی ده‌رچوون و ، ئاراسته‌ی خۆیانیان دیار كردووه

تۆ كاری چاك بكه‌ ، با ئه‌وان قسه‌ی خراپ بكه‌ن
قسه‌ی خه‌ڵكی بێئاگا ، هیچ بایه‌خێكی نامێنێت
كاتێك كاره‌ چاكه‌كانت ، ویژدانێكی ئاسووده‌ت پێ ده‌به‌خشن

له‌بنه‌ڕه‌تدا مرۆڤ خۆشحاڵ ده‌بوو به‌تێكه‌ڵبوون له‌گه‌ڵ ده‌وروبه‌ردا
به‌ڵام كه‌ ده‌وروبه‌ر هه‌ستی مرۆڤبوونیان ون كردو كه‌وتنه‌ ئازاردان
ئێستا مرۆڤ خۆشیی له‌ته‌نهایی و له‌ دابڕان له‌وانی دی ده‌بینێت
ده‌بێت چ ویژدانێكیان هه‌بێت ئه‌وانه‌ی مرۆڤ ناچار به‌ ته‌نهایی ده‌كه‌ن

كه‌ هه‌ڵه‌یه‌كیان به‌رامبه‌ر كردی
بیر له‌به‌هێزترین وه‌ڵامدانه‌وه‌ مه‌كه‌ره‌وه‌
بیر له‌چاكترین وه‌ڵامدانه‌وه‌ بكه‌ره‌وه‌
نه‌ك له‌به‌ر ئه‌وه‌ی ئه‌وان شایانی چاكترینن
به‌ڵكو له‌به‌ر ئه‌وه‌ی خۆت شایانی چاكترینی

ئه‌نجامی خوێندكاری كۆلێژێك به‌راورد ناكرێت به‌خوێندكاری كۆلێژێكی دیكه‌
چونكه‌ هه‌ر یه‌كێكیان به‌ پرسیاری جیاواز له‌وی دی تاقی ده‌كرێنه‌وه‌
بۆیه‌ نابێت كه‌س بڕیار له‌سه‌ر ژیانی خه‌ڵك بدات به‌ به‌راورد له‌گه‌ڵ ژیانی خۆی
چونكه‌ هه‌ریه‌كه‌یان رووبه‌ڕووی خۆشیی و ناخۆشیی جیاواز ده‌بنه‌وه