فێریان مه‌كه‌ هه‌میشه‌ داوای روونكردنه‌وه‌ت لێبكه‌ن له‌باره‌ی خۆته‌وه‌
نه‌ تۆ شایانی ئه‌و ماندووبونه‌یت ، نه‌ ئه‌وانیش مافی پرسیاركردنیان هه‌یه‌
رۆژێك دادێت ده‌زانیت چه‌ند كاتت به‌فیڕۆ داوه‌
له‌پێناوی جوانكردنی وێنه‌ی خۆت له‌چاوی ئه‌وانه‌ی
كه‌ هه‌ر چییه‌ك بكه‌یت ، بڕیاریان داوه‌ هه‌ر به‌ناشیرین بتبینن

بۆ ئاسووده‌بوون پێویسته‌ هۆیه‌كانی خه‌م له‌سه‌رچاوه‌وه‌ بنبڕ بكرێن
چونكه‌ مرۆڤ ده‌توانیت له‌و خه‌مه رابكات كه‌ به‌دواوه‌یه‌تی
به‌ڵام ناتوانیت له‌و خه‌مه‌ رابكات كه‌ له‌ناخیدایه‌ نه‌ك به‌دواوه‌ی

هه‌رچه‌نده‌ ئاگاداریش بوایه‌ هه‌ر نه‌یده‌گه‌یانده‌ جێگه‌ی مه‌به‌ست
به‌ڵام ماف به‌خۆی ده‌دات بپرسێت: كه‌ی سه‌فه‌ری كرد؟ ئه‌ی بۆ پێی نه‌وتم؟
هه‌رچه‌نده‌ نیازیشی نه‌بووه‌ یارمه‌تی بدات و كۆمه‌كی بكات
به‌ڵام ماف به‌خۆی ده‌دات بڵێت : ئه‌وه‌ خانووی كڕیوه‌؟ ئه‌ی بۆ نه‌مزانی؟
با دڵخۆش بین به‌خۆشی یه‌كدی و ، نه‌چینه‌ نێو ورده‌كاریی ژیانی كه‌سه‌وه

زۆر جار ته‌نهایی بریتییه‌ له‌دووریی له‌وانی دی
هه‌ندێك جاریش ته‌نهایی بریتییه‌ له‌نزیكیی له‌وانی دی
به‌ڵام ئه‌و نزیكانه‌ ئه‌وانه‌ نین كه‌ ناخی مرۆڤ پێیان شاد ده‌بێت
بۆیه‌ هه‌ندێك جار ته‌نهایی پیاسه‌یه‌كی مرۆڤه‌ له‌گه‌ڵ خۆیدا
ئه‌و ساته‌ی قه‌ره‌باڵغیی ژیانی ساده‌ی لێ ئاڵۆز ده‌كات

ره‌نگه‌ مرۆڤ هه‌موو كات قسه‌ی باشی بۆ نه‌كرێت
به‌ڵام كه‌ قسه‌ی باش ده‌بیستێت ، ده‌توانێت بیگه‌یه‌نێت
بۆیه‌ واباشه‌ مرۆڤ خۆی روناكی بێت له‌ڕێگه‌ی ئه‌وانی دیكه‌دا
ئه‌گه‌ر پێی نه‌كرا ، با ئاوێنه‌ بێت بۆ دانه‌وه‌ی روناكی ئه‌وانی دی

شوێن زۆرن ، هه‌ر شوێنه‌و مایه‌ی ئارامیی ده‌روونه‌ بۆ جۆرێك له‌مرۆڤ
به‌ڵام زۆرینه‌ هه‌ر له‌رووبه‌رێكی بچوكدا قه‌ره‌باڵغیی دروست ده‌كه‌ن
بێ ئاگا له‌وه‌ی كه‌ زۆر جار خۆشیی هه‌ر له‌و شوێنه‌دایه‌
كه‌ كه‌س شه‌ڕی له‌سه‌ر ناكات و ، كه‌سيش سه‌رنجی ناخاته‌ سه‌ر
بۆیه‌ جوانترینه‌كان ئه‌و شوێنانه‌ن كه‌ جگه‌ له‌خۆت كه‌س ئاوریان لێناداته‌وه

ئه‌و كاته‌ی ده‌گه‌ڕێیت به‌دوای ئه‌وانه‌ی له‌پێناویاندا ژیایت
به‌ڵام نایاندۆزیته‌وه‌ ، هه‌ست ده‌كه‌یت بێ ئاگا بوویته‌
له‌وه‌ی خودی خۆت مافی زۆری له‌سه‌رت هه‌بووه‌
یه‌كێك له‌و مافانه‌ش ده‌بوایه‌ فه‌رامۆشكردنی ئه‌وانه‌
بوایه‌ كه‌ به‌های راسته‌قینه‌تیان نه‌زانیوه

نیگه‌ران مه‌به‌ له‌رووداوێك كه‌ هێشتا رووینه‌داوه‌
چونكه‌ ئه‌و جۆره‌ نیگه‌رانییه‌ دوو جار ئازارت ده‌دات
یه‌كه‌میان پێش روودانی و له‌چاوه‌ڕوانیی روودانییدا
دووه‌میان له‌كاتی روودانییدا
له‌وانه‌شه‌ هه‌ر روونه‌دات

ره‌نگه‌ تا ماوه‌یه‌ك مرۆڤ ببێت به‌خاوه‌نی شتێك كه‌ هی خۆی نه‌بێت
به‌ڵام ماڵی كه‌س به‌كه‌س حه‌ڵاڵ نییه‌ ، هه‌ق دواجار هه‌ر هی خاوه‌نه‌كه‌یه‌تی‌
له‌به‌ر ئه‌وه‌ی خاڵییبوونی شوێنێك له‌خاوه‌نه‌كه‌ی ، مانای بێ خاوه‌نیی نییه‌
بۆیه‌ له‌شوێنێك دامه‌نیشه‌ كه‌ ده‌زانیت هی یه‌كێكی دیكه‌یه

له‌وانه‌یه‌ بڕوا نه‌كه‌یت ، به‌ڵام خولانه‌وه‌ له‌بازنه‌ی ژیاندا هه‌ر ئاوا بووه‌
وه‌ك لاواز بووی ، به‌هێزیش ده‌بیت ، وه‌ك كه‌وتی ، هه‌لیشده‌سیته‌وه‌
وه‌ك نه‌دار بووی داراش ده‌بیت ، هه‌تا بژیت ئومێد هه‌یه‌
ئازاری ئه‌مڕۆت ، مایه‌ی به‌هێزبوونته‌ سبه‌ی ، ته‌نها ویست و ئیراده‌ هه‌بێت

كاری كه‌س به‌كه‌م ته‌ماشا مه‌كه‌
چونكه‌ مرۆڤ له‌ده‌روونی خۆی ، له‌جه‌سته‌ی خۆی
له‌هزری خۆی ، تواناو هێز قه‌رز ده‌كات و ده‌یبه‌خشێته‌ كاره‌كانی

با رێگریی و ئاسته‌نگ خستنه‌ سه‌ر رێگه‌ت هه‌ر هه‌بن
تۆ به‌رنامه‌ی خۆت و كاره‌كانت به‌هێمنیی و بێده‌نگیی ئه‌نجام بده‌
دواتر سه‌ركه‌وتنه‌كانت خۆیان به‌ده‌نگی به‌رز ده‌دوێن

ماسی له‌ئاودا ده‌ژی و ، له‌وشكانیدا ده‌خنكێت
مرۆڤ له‌وشكانییدا ده‌ژی و ، له‌ئاودا ده‌خنكێت
وانه‌یه‌ك كه‌ لێره‌وه‌ فێری ده‌بین ئه‌وه‌یه‌ كه‌
ئه‌و شوێنه‌ی بۆ یه‌كێك مایه‌ی ژیان و هه‌ناسه‌ی ئارامه‌
له‌وانه‌یه‌ بۆ یه‌كێكی ده‌یكه‌ جێی هه‌ناسه‌ ته‌نگیی و مه‌رگ بێت

با ده‌وره‌ش درابیت به‌زۆرێك له‌وانه‌ی خه‌مخۆری تۆن
به‌ڵام له‌م سه‌رده‌می ونبونی مرۆڤایه‌تییه‌دا
هه‌ر پێویستت به‌وه‌یه‌ له‌گۆشه‌یه‌كی رۆحتدا
خه‌ڵوه‌تگه‌یه‌كت بۆ موناجات له‌گه‌ڵ خودای خۆتدا هه‌بێت
په‌ناگه‌ت بێت هه‌ر كات ترسای یان خه‌م دایگرتی یان ئازاریان دای

بڕیاره‌ راسته‌كان زۆر جار زاده‌ی ئه‌زموونه‌كانن
ئه‌زمونه‌كانیش زۆر جار وانه‌ی وه‌رگیراون له‌ هه‌ڵه‌كان
كه‌واته‌ هه‌ڵه‌كان هه‌لێكن بۆ به‌هێزبوون ، بۆیه‌
له‌پێشترین كه‌سیش بۆ هه‌ستانه‌وه‌ت هه‌ر خۆتی

خه‌مبار مه‌به‌ كه‌ هێشتا پێگه‌ی شایان به‌خۆتت
له‌لای هه‌ندێك كه‌سه‌وه‌ پێ ره‌وا نه‌بینراوه‌
چونكه‌ سروشتی ئه‌و كه‌سانه‌ ئاوایه‌
هه‌تا پێگه‌و به‌های نزمي ئه‌وانی دیكه‌ نه‌زانن
به‌هاو پێگه‌ی بڵندی تۆیان بۆ ده‌رناكه‌وێت

ئه‌و په‌یوه‌ندییه‌ درێژخایه‌نه‌ی كه‌ له‌ نێوان دوو كه‌سدا هه‌یه‌
مانای ئه‌وه‌ نییه‌ هه‌ردووكیان بێ هه‌ڵه‌و كه‌م و كورتین
به‌ڵكو مانای وایه‌ گیانی لێبوردن و ، سنگفراوانیی و
توانای فه‌رامۆشكردنی هه‌ڵه‌و ورده‌ كێشه‌ی نێوانیانیان هه‌یه

هه‌ندێك جار ناچار نیت بۆ هه‌ندێك قسه‌ وه‌ڵامت هه‌بێت ، چونكه‌
بردنه‌وه‌یه‌ك كه‌ به‌بێده‌نگییه‌كی مانادارو شكۆدار به‌ده‌ستی ده‌هێنیت باشتره‌
له‌ دۆڕانێك كه‌به‌هۆی وه‌ڵامێكی ئاست نزمه‌وه‌ تووشی خۆتی ده‌كه‌یت

هه‌ر مرۆڤێك به‌پێی ناخی خۆی ئاوات بۆ ئه‌وانی دی ده‌خوازێت
بۆیه‌ ئاواتی مرۆڤدۆستان ، هه‌ستاندنه‌وه‌و دڵخۆشكردنی نائومێدانه‌
ئاواتی داخ له‌دڵانیش ، شێواندنی ناوبانگ و شكاندنی شكۆی سه‌ركه‌وتووانه
سه‌رئه‌نجام مرۆڤدۆستان ئاسووده‌ن و ، داخ له‌دڵانیش ئازاری خۆیان ده‌ده‌ن

هاوڕێیه‌تیی ئاره‌زوومه‌ندانه‌و به‌ئازادیی دوو لایه‌نه‌ دروست ده‌بێت
راسته‌ هاوڕێن ، به‌ڵام مه‌رج نییه‌ هاوڕا بن له‌هه‌موو شتێكدا
بۆیه‌ ره‌وا نییه‌ هاوڕێ رای خۆی له‌سه‌ر هاوڕێ فه‌رز بكات چونكه‌
له‌هاوڕێیه‌تییدا رێزگرتن له‌ئازادیی بڕیاردانی هه‌ر كه‌سدا هه‌یه‌
له‌به‌ر ئه‌مه‌شه‌ له‌هاوڕێیه‌تییدا كه‌س پاشكۆ نییه‌و ، كه‌سیش سه‌ركرده‌ نییه