زۆرن ئه‌وانه‌ی وه‌ك تۆ هه‌موو سپێده‌یه‌ك بڕیار ده‌ده‌ن
تووڕه‌ نه‌بن و ، ئه‌و رۆژه‌یان به‌هێمنی به‌ڕێ بكه‌ن
به‌ڵام نه‌زانێك یان له‌خۆباییه‌ك یان حه‌سوودێك
دێت رێگه‌ی لێده‌گرێت و ، به‌ره‌فتاری نه‌شیاوی رۆژه‌كه‌ی لێ تاڵ ده‌كات
بۆیه‌ هه‌ندێ جار رۆژه‌كه‌ت وه‌ك ئه‌وه‌ نابێت كه‌چاوه‌ڕێی ده‌كه‌ی

كه‌س ناخی كه‌س نابینێت
ئه‌وه‌ وشه‌و قسه‌كانی هه‌ر مرۆڤێكه‌
كه‌ ئه‌وه‌ی له‌ناخیدایه‌ پیشانی هه‌مووانی ده‌دات

هیچ رووداوێك خۆی دووباره‌ ناكاته‌وه‌
ئه‌وه‌ مرۆڤه‌ هه‌مان رووداو دووباره‌ ده‌كاته‌وه‌
ئه‌وه‌ مرۆڤه‌ (هه‌ڵه‌)ی رابووردوو دووباره‌ ده‌كاته‌وه‌و
(هه‌ل) و ده‌رفه‌تی ئێستاشی به‌فیڕۆ ده‌دات

سه‌ركه‌وتنت به‌ فه‌رامۆشكردنی كه‌سی نه‌زان و له‌خۆبایی
باشتره‌ له‌ وه‌ڵامدانه‌وه‌یه‌ك كه‌ بتهێنێته‌ ئاستی نزمی ئه‌وان

هه‌ندێك كات واباشه‌ ته‌نها رووی ده‌ره‌وه‌ی ره‌فتاره‌ بینراوه‌كان زیزت نه‌كه‌ن
چونكه‌ زۆر كات دیمه‌نه‌ به‌رچاوه‌كان ئاوێنه‌ی هه‌موو راستییه‌كان نین
وه‌ك (مه‌ی زیاده‌)ی نووسه‌ر ده‌ڵێت: من به‌یه‌ك ده‌ست خوداحافیزییم لێ ده‌كرد
به‌ڵام ئه‌و نه‌یده‌زانی ‌چه‌ند ده‌ستی دیكه‌ له‌دڵمدا پێیان ده‌گوت: تكایه‌ مه‌ڕۆ

هه‌ستكردنی خراپ ئاكام و ئه‌نجامی خراپی ده‌بێت ، بۆیه‌ باش نییه‌
وابزانیت هه‌موو دنیا چاویان له‌سه‌ر تۆیه‌و ، چاوه‌ڕێی كه‌وتنت ده‌كه‌ن
جاك كانفیڵد ده‌ڵێت: له‌ته‌مه‌نی 18 ساڵییدا واده‌زانیت هه‌مووان چاویان له‌سه‌رته‌و تۆ ده‌بینن
له‌ 40 ساڵییدا هه‌وڵ ده‌ده‌ی گوێ نه‌ده‌ی به‌وه‌ی خه‌ڵك چۆن باست ده‌كه‌ن
له‌ 60 ساڵییدا بۆت ده‌رده‌كه‌وێت نه‌دنیا به‌تۆوه‌ سه‌رقاڵ بووه‌و ، نه‌ زۆربه‌شیان ئاگایان له‌تۆ بووه

خراپ تێڕوانینی مرۆڤ بۆ شته‌كان هۆكارێكه‌ بۆ خه‌مباریی
وه‌ك به‌گه‌وره‌ زانینی ئه‌و شته‌ بچووكه‌ی له‌ده‌ستمان ده‌چێت
وا ده‌كات ئه‌و شته‌ گه‌وره‌یه‌ی له‌به‌ر ده‌ستماندایه‌ به‌بچووك بزانین

بێ ویژدانن ئه‌وانه‌ی‌ ئازاری ده‌روونی مرۆڤێك ده‌ده‌ن
بۆ ئه‌وه‌ی له‌كاردانه‌وه‌دا هه‌ڵه‌یه‌كی پێ بكه‌ن
پاشان ره‌خنه‌ی لێ بگرن له‌سه‌ر ئه‌و هه‌ڵه‌یه‌ی كه‌ ئه‌و نه‌یده‌كرد
ئه‌گه‌ر ئه‌وان به‌ئه‌نقه‌ست و به‌رده‌وام پاڵنه‌ری هه‌ڵه‌پێكردنی نه‌بوایه‌ن

له‌هه‌ر زه‌مان و بارودۆخێكدا كارێكی باش هه‌یه‌ بۆ كه‌سێكی بكه‌ین
ره‌نگه‌ له‌م زه‌مانه‌دا باشترین كارێك بۆ هه‌ر مرۆڤێكی بكه‌ین ئه‌وه‌ بێت
كه‌ ده‌ست نه‌خه‌ینه‌ نێو ورده‌كاریی و تایبه‌تمه‌ندیی ژیانییه‌وه‌و
هه‌وڵی كردنه‌وه‌ی ئه‌و باسه‌ش نه‌ده‌ین كه‌ ئه‌و حه‌ز به‌داخستنی ده‌كات

خراپه‌ هه‌میشه‌ خۆت به‌گوناهبار بزانیت له‌به‌رامبه‌ر ئه‌وانی دیكه‌دا
نه‌بادا بۆ هه‌میشه‌ ببیته‌ قوربانیی بۆ هه‌ڵه‌و كه‌مته‌رخه‌مییه‌كانی ئه‌وان
بۆیه‌ له‌دوای هه‌ر (هه‌ڵه‌)یه‌ك (راست)ێك ئه‌نجام بده‌
له‌خۆت ببوره‌و ، به‌رده‌وامیی بده‌ به‌ ژیان

خۆشیی زۆرت بینیوه‌ له‌سه‌ر رووی زۆر كه‌س
به‌ڵام جوانترین دیمه‌نی دڵخۆشیی ئه‌و خۆشییه‌یه‌
كه‌ له‌سه‌ر روخساری كه‌سێكدا ده‌رده‌كه‌وێت
كه‌ تۆ بوویته‌ هۆكاری ئه‌و دڵخۆشییه‌ی ئه‌و

هه‌ر كه‌س له‌ڕووانگه‌ی خۆیه‌وه‌ ده‌ڕوانێته‌ ئه‌وانی دی
بۆیه‌ كه‌سانێك هه‌ن بڕوا به‌پاكیی ناخی كه‌س ناكه‌ن
كه‌سانێكيش هه‌ن ده‌ڵێن یه‌ك كه‌سی باش له‌دنیادا نه‌ماوه
بێ ئاگا له‌وه‌ی له‌وانه‌یه‌ خۆیان یه‌كێك بن له‌و كه‌سه‌ خراپانه

ئه‌و ساته‌ له‌خه‌ڵوه‌ت ، كه‌ خه‌ڵك بێ ده‌نگ ده‌تبینێت
تۆ له‌حزوری په‌روه‌ردگاری خۆتدا ده‌دوێیت
رازی دڵ و سكاڵای ناخی خۆتی بۆ باس ده‌كه‌یت
بێده‌نگییت ده‌بیستێت ، ناخت ده‌بینێت ، ئارامییت پێده‌به‌خشێت

به‌جێهێشتن و چاوه‌ڕوانیی دوو شتی ئازارده‌رن
بۆیه‌ له‌ چاوه‌ڕوانیی كه‌سێكدا مه‌به‌ ، كه‌ دڵنیایت به‌جێیهێشتوویت
كه‌سێكیش به‌جێ مه‌هێڵه‌ ، كه‌ دڵنیایت له‌ چاوه‌ڕوانی تۆدایه

له‌و كاته‌ی ئازیزێكت هه‌ڵه‌یه‌ك ده‌كات
بیر له‌كارێكی چاكی پێشووی بكه‌ره‌وه‌
چونكه‌ له‌ژیانی هه‌ر یه‌كێكدا چاكه‌یه‌كی گه‌وره‌ هه‌یه‌
كه‌ خراپه‌یه‌كی بچوكی ئه‌ومان له‌بیر به‌رێته‌وه

ناخۆشییه‌كانی ژیان ئاوێنه‌ی ده‌رخستنی هه‌ندێك له‌راستییه‌كانن
بۆیه‌ ئه‌گه‌ر بارودۆخه‌ ناخۆشه‌كانی ژیانمان نه‌بوایه‌
وامان ده‌زانیی گشت ئه‌وانه‌ی ده‌یانناسین پشت و په‌نامانن

هه‌میشه‌ ئومێدێك بۆ كردنه‌وه‌ی ده‌رگای راستییه‌كان به‌ڕێوه‌یه‌
دڵنیاش به‌ كه‌ خودا ئاگاداری ناخ و نییه‌تی پاكی تۆیه‌
بۆیه‌ خه‌می زۆر له‌گومانی خراپی خه‌ڵك مه‌خۆ
بیر له‌ماندووبوونی رێگاو ، تاڵیی چاوه‌ڕوانییش مه‌كه‌ره‌وه

دڵخۆش مه‌به‌ به‌كه‌وتنی مرۆڤێك ، كه‌ زیانی بۆ كه‌س نه‌بووه‌
حوكم له‌سه‌ر كه‌سێك مه‌ده‌ ، كه‌ خۆت له‌نزیكه‌وه‌ نه‌تناسیوه‌
پێمه‌كه‌نه‌ به‌ هه‌ستی كه‌سێك ، كه‌ سه‌ختی ژیان گریاندوویه‌تی

رێز له‌وانه‌ بگره‌ كه‌ دڵی خه‌ڵك خۆش ده‌كه‌ن
هه‌رچه‌نده‌ خۆیان خه‌مبارن
رێز له‌وانه‌ش بگره‌ كاتێك توڕه‌ ده‌بن
په‌نا بۆ ته‌نیایی ده‌به‌ن ، نه‌ك بۆ ئازاردانی خه‌ڵك

هه‌موو ئه‌و گرفتانه‌ی دێنه‌ سه‌ر رێگات زیانبه‌خش نین
وه‌ك ئه‌و ره‌شه‌بایه‌ی واده‌زانیت له‌دژی تۆ هه‌ڵی كردووه‌
به‌ڵام له‌وانه‌یه‌ بۆ لادانی ئاسته‌نگ و پاككردنه‌وه‌ی رێگاكانت بێت