پیرۆز بێت ساڵی نوێی كۆچی
به‌هیوای ئه‌وه‌ی مرۆڤایه‌تی له‌ناخییدا كۆچ بكات
له‌ جه‌نگه‌وه‌ بۆ ئاشتیی
له‌ سته‌مه‌وه‌ بۆ دادپه‌روه‌ریی
له‌ نیگه‌رانییه‌وه‌ بۆ دڵنیایی

هه‌واڵی بێ بنه‌ما ، چوار ده‌وری مرۆڤی ئه‌م سه‌رده‌مه‌ی ته‌نیوه‌
هه‌واڵی ناڕاست تێكه‌ڵ به‌خۆراكی رۆژانه‌ی مرۆڤ بووه‌
بۆ ئاسووده‌یی ناخ و ، بۆ ئارامیی دڵ و ، بۆ پاراستنی مێشك
ئیدی‌ كاتی دووركه‌وتنه‌وه‌یه‌ له‌بیستن و بینینی ئه‌م جۆره‌ هه‌واڵانه

كه‌ رۆژانێكی سه‌ختت به‌ڕێ كردو ، كه‌س پێی نه‌زانی
كه‌ خه‌مبار بوویت و ، كه‌س هه‌ستی پێ نه‌كردی
كه‌ به‌رده‌وام بوویت ، بێ ئه‌وه‌ی كه‌س یارمه‌تیت بدات
دڵخۆش به‌ ، ئه‌وه‌ نیشانه‌ی گه‌یشتنه‌‌ به‌قۆناغی پێگه‌یشتن

باشه‌ هه‌موو كات بیر له‌خۆشیی ئه‌وانی دیكه‌ بكه‌یته‌وه‌
به‌ڵام به‌و مه‌رجه‌ی داهاتووی خۆشت له‌بیر نه‌كه‌یت

ناخی هه‌ر مرۆڤێك جیهانێكی فراوانه‌
ده‌ریایه‌كی قووڵه‌ له‌نهێنی و په‌نهانیی
ناخی هه‌ندێك پڕه‌ له‌ نهێنی چاك
هی هه‌ندێكیش پڕه‌ له‌ نهێنی خراپ
بۆیه‌ قه‌ت مه‌ڵێ فڵانه‌ كه‌س له‌خۆم باشتر ده‌ناسم

بۆ ئه‌وه‌ی ڕسته‌كان مانای خۆیان ببه‌خشن
بۆشایی و ماوه‌ی نێوان وشه‌و وشه‌ پێویستن
بۆ په‌یوه‌ندییه‌كی جوان و ماناداریش له‌گه‌ڵ كه‌سێكدا
به‌وردیی ماوه‌ی نێوان خۆت و ئه‌و بپارێزه‌
نه‌بادا له‌زۆر نزیكییدا ، دووركه‌وتنه‌وه‌ رووبدات

بۆ ئه‌وه‌ی خه‌م خۆت نه‌خوات
خه‌م له‌ هه‌موو كه‌س مه‌خۆ
بۆ ئه‌وه‌ی كه‌س بیرو هۆشت ڕه‌ش دانه‌پۆشێت
ئاگاداری وزه‌ی رۆح و ، هێزی ناخی خۆت به

له‌و شته‌ی له‌به‌ر ده‌ستی مرۆڤدایه‌ ، گرنگ ئه‌وه‌یه‌
كه‌ له‌و ساته‌و ، له‌و شوێنه‌و ، له‌و بارودۆخه‌دا
ئه‌وه‌ی لێ دروست بكات كه ‌پێویستیی پێیه‌تی
نه‌ك ئه‌وه‌ی لێ دروست بكات كه‌ حه‌زی لێیه‌تی

مرۆڤ ئه‌و ساته‌ ماندوو ده‌بێت كه‌ رۆح و جه‌سته‌ی پێكه‌وه‌ ناڕۆن
رۆحی سه‌ردانی هه‌ندێك شوێن ده‌كات
به‌ڵام جه‌سته‌ی هه‌ر له‌شوێنی خۆیه‌تی
بۆیه‌ پێشینان گوتوویانه‌ : به‌دوای چوان مه‌چۆ
چونكه‌ حه‌زی گه‌ڕانه‌وه‌ بۆ ئه‌و رۆژانه‌ی كه‌ نایه‌نه‌وه‌‌ زۆر سه‌خته

خه‌مبار مه‌به‌ كه‌ نه‌تتوانیوه‌ گوڵێك له‌باغی دڵی زۆر كه‌سدا بڕوێنیت
به‌س نییه‌ تا ئێستا دڕكێكت له‌سه‌ر ڕێگه‌ی كه‌سدا نه‌چاندووه‌
تا ئه‌و كاته‌ی زیانت بۆ كه‌س نه‌بێت و ، ژیانت بۆ خێری هه‌مووان بێت
هه‌میشه‌ سێبه‌رێك له‌میهره‌بانیی خودا ، وا به‌سه‌ر ناخته‌وه

ژیان ، ساته‌ وه‌ختی سه‌ختی تێدایه‌ له‌بواری هاوڕێیه‌تییدا
وه‌ك ئه‌و ساته‌ی كه‌ قسه‌یه‌ك هه‌یه‌ دوودڵی له‌وتنی
له‌نێوان وتن و بێده‌نگییدا بڕیارێكی خێرات بۆ نادرێت
ئه‌گه‌ر ده‌یڵێیت ، ئازاردانی هه‌ستی كه‌سێكی له‌دوایه‌
ئه‌گه‌ر نا‌یڵێیت ، ئازاردانی ناخی خۆتی به‌دواوه‌یه

رووخۆشیی و ده‌م به‌خه‌نده‌بوون له‌رۆژانی ژیاندا
مه‌رج نییه‌ هه‌میشه‌ نیشانه‌ی دڵخۆشیی بێت
به‌ڵكو نیشانه‌ی گه‌شبینیی مرۆڤ و متمانیه‌تی
به‌و راستییه‌ی كه‌ خودا له‌ڕێگه‌ی ژیاندا ده‌ستبه‌رداری نابێت

مرۆڤ له‌ڕۆژدا سه‌رگه‌ردانه‌ به‌ده‌ست خه‌می بیركردنه‌وه‌ له‌داهاتووی
له‌شه‌ویشدا یاده‌وه‌رییه‌كانی ده‌یبه‌نه‌وه‌ كوچه‌و كۆڵانی رابووردووی
له‌نێوان خه‌م له‌ئاینده‌و ، بیركردنه‌وه‌ له‌رابووردوودا ، ئێستای ون ده‌بێت
یه‌ك رێگه‌ش بۆ دڵنیابوون و ئارامیی و ئاسووده‌بوونی ناخی هه‌یه‌
ئه‌ویش خۆ سپاردنه‌ به‌خودای خاوه‌نی ئاینده‌و ئێستاو رابووردوو

زۆری پێده‌چێت تا مرۆڤ ده‌گاته‌ ئه‌و ساته‌ی
حه‌ز به‌دركاندنی هه‌سته‌كانی بۆ كه‌سێك بكات
به‌ڵام له‌كاتێكی زۆر كه‌مدا په‌شیمان ده‌بێته‌وه‌ له‌دركاندنی
چونكه‌ وه‌ك ده‌زانێت شاردنه‌وه‌ی هه‌ست به‌ئازاره‌
ده‌شزانێت كه‌ دركاندنی لای كه‌سێك كه‌ لێی تێناگات ، به‌ئازارتره

له‌نێوان مرۆڤ و هه‌ندێك له‌ ئاواته‌كانیدا ، دابڕانێك هه‌یه‌
له‌وانه‌یه‌ رۆژێك دابێت ، پردێك بۆ گه‌یشتن ده‌سته‌به‌ر بێت
ئه‌گه‌ر نه‌شبوو ، باش وایه‌ مرۆڤ ئه‌وه‌ی هه‌یه‌تی و له‌ده‌ستیدایه‌
نه‌یفه‌وتێنێ له‌پێناوی ئه‌و شته‌ی به‌په‌له‌و بێ پلان ده‌یه‌وێت پێی بگات

فرمێسكه‌كان دڵۆپێكی بچووكن ، به‌ڵام زۆر به‌نرخ و پڕ به‌هان
نابێت هه‌رزان بكرێن بۆ شتێك ، كه‌ شایانی فرمێسك ڕشتن نه‌بێت

به‌هه‌مان ڕێگه‌دا ده‌ڕۆن ، هه‌ر یه‌كه‌و به‌ره‌و ئامانجێك
بۆیه‌ كاتێك به‌هه‌مان ڕێگه‌ی ئه‌وانی دیكه‌دا ده‌ڕۆیت
مه‌ترسه‌ له‌وه‌ی هه‌مان شكستی ئه‌وان بێته‌ ڕێگه‌ت
چونكه‌ سه‌ره‌تا له‌یه‌كچووه‌كان ، كۆتایی له‌یه‌كچوویان نییه

ئه‌و كاته‌ی دڵخۆش ده‌بیت به‌دڵخۆشیی مرۆڤێكی دیكه‌
ئه‌و كاته‌ی دڵخۆشیی كه‌سێكی دیكه‌ ده‌پارێزیت
ئه‌وه‌ نیشانه‌ی پاكیی ده‌روون و ، به‌هێزیی باوه‌ڕی خۆته

مناڵیی .. لاپه‌ڕه‌ی سپی بێگه‌ردی ژیانه‌
پیریی .. حه‌زی مناڵبوونه‌وه‌یه‌ له‌مرۆڤدا
پیریی له‌زۆر شتدا له‌ مناڵیی ده‌چێت
دیارترینیان گه‌ڕانه‌وه‌یه‌ بۆ به‌رائه‌ت و پاكبوونه‌وه‌
بۆ به‌ڕێكردنی ژیانێكی بێ زیان

زه‌وی ماندوو نه‌بووه‌ له‌خولانه‌وه‌ به‌ده‌وری خۆیدا
بۆیه‌ تا ئێستا شه‌وو رۆژ بوونیان هه‌یه‌ له‌ژیانماندا
زه‌وی به‌رده‌وامه‌ له‌خولانه‌وه‌ به‌ده‌وری خۆردا
بۆیه‌ تا ئێستاش چوار وه‌رزی ساڵ به‌دوای یه‌كدا دێن
با ئێمه‌ش به‌رده‌وام بین ، ماندوو نه‌بین له‌خولی ژیاندا

گێل و گه‌مژه‌ نین
ئه‌وانه‌ی هه‌ڵه‌ی ئازیزانیان ده‌بینن به‌ڵام چاوپۆشییان لێده‌كه‌ن
ئه‌وان له‌پاكیی خۆیان ده‌یانه‌وێت ژیان به‌ساده‌یی بڕوات و
به‌كێشه‌ی بچووك ، گرفتی گه‌وره‌ ناخه‌نه‌ سه‌ر رێگه‌ی خۆیان