بغربة عاشو،، من بعد طه ودلاله غربه صارت
الزهره ويلي،، ادور النصره لعلي والدنيه دارت

النبي وخلصت حياته ،، وابتدت كل المحن
الوطن لاهل الحقيقه ،، وعاشو بغربة وطن
عاشو بغربة وهظيمه ،، والظليمه
ادور النصره اليتيمه ،، ومحد اعله العتره حن

محد حن ،،
اولا شالته الغيره ولا
ساند علي بوكفت زلم
كلهم حقد والما حقد خاف اعله روحه

وصه الرسول، ،
بنته وعلي بهذا الكلام
لنصرة علي لو اربعين
يلكه فلا يحركوله دار ومحد يلوحه

الزهره وعلي يفترون
اعله بيوت نصره يريدون
يكلوله وياك نموت
بضي الصبح يختلفون

علي غريب وفاطمة غريبه
،،،،،،،،،،،
ياحسافة ،، الامامه بعازت صارت كلهه خانت
والهظيمة ،، وجوه تتسمه الصحابه هسه بانت

ماتت اوجوه العباده ،، وبانت اوجوه البغض
واصدر اصدار السقيفة ،، حب الولي ينرفض
جهلو اميري ومقامه ،، اعله الامامه
هجمو ابلايه ندامه ،، اولا سيف حك ينتهض

لباب الحك، ،
وتوحيد الله وقدرته
هجمت جبابرة الكفر
وعتبت علي صارت جمر ودفعوله بابه

وأم الحسن، ،
مابين هالباب وجدار
يعصرهه كل حيله اللعين
وطك الضلع طاح الجنين ودمه خضابه

يوم العذاب المأمور
صار وكسر ضلع النور
وعتبت علي نداست حيف
وخد الزجيه المصطور
،،،،،،،،،،،،،،
هنانه حيره ،، لهاي العباره المؤلمه شتكفي عيني
من ألمهه ،، يافضه صاحت بالكسر اسنديني

الكسر بان بحجيهه ،، بيا فضه بان الألم
ابلا خمار الزجيه ،،، وركن الجلاله انهدم
طاحت وشافاهه حيدر ،، سيفه وحتر
وعالوصيه هو مجبر ،، لو لاهه ما تهجم زلم

الله يعين، ،
حيدر علي وعينه تشوف
ام بيته كدامة بكسر
الغيره شبت بس عرض وعد الوصيه

جبير الحصل، ،
المحد كدر سيفه يشيل
ومن اسمه تهتز الحروب
هالصارت اتعدو عليه حامي الحميه

جرحو علي جرح جبير
الحيرته ماصح تفسير
المحير الدنيه علي
اعله ام بيته بدموعه يحير
،،،،،،،،،،،،
يامصيبة ،،، الدمعه ماطاح الا بس وكت العباده
شكد غريبة،،، دموعه طاحت من هظمته اعله الوساده

لهاي الرزيه العظيمه ،، دموع كل طاهر تهل
صارت مصيبة شكبرهه ،، كوه حملهه العقل
حيدر علي يجتفونه ،، وياعيونه
ادير لاهله وما يجونه،، اهنانه الهظم ينحمل؟

شلون تصير ،،
هذا السؤال الماله حل
جفوف العزيز المقتدر
تتكيد ومحد فزع فكاله كيده

حك وراح ،،
مغصوب من بيته طلع
كون السمه اهناكه تطيح
مدنك طلع هذا المصاب مجتوفه ايده

دين الله بالباب وباد
ألحك وابو الحك انكاد
والله وبالله وتالله
هظم الشهم ما ينراد
،،،،،،،،،

اه وكسر

ملا احمد المياحي
الشاعر عباس اديب المالكي
هيئة حبيب فاطمة، (بغداد )

عزاء الليالي الفاطمية

قرارج واحد من ثنين
ماعندج وسط ياعين
لو تبجين لو تعمين ،،
زحمة تمر مصيبة وانتي مرتاحه

لو خيروني بين الشوف
لو بين الدمع معروف
اختار البجي بلا خوف
الكلب لوما البجي جاطابن جراحه

مصيرج للبجي من قبلُ أن مصيرج الشوف
عند اهل الجرح ياعين انه بدمعي معروف
اريدن دوم دمعي لخدي يبقه دومه ملهوف

دلالــي عـودته انــه بهــاي
شما ابجي انه يكثر اضماي
بس الدمع لجروحي حماي اباعبد الله

حبي بديته بدمعه مولاي
ورايد اموت ودمعي وياي
صار البجي ديني ودنياي اباعبدالله
،،،،،،،،
شاء الله المصاب يصير
بس ما شاء عين تحير
أُمرهن بالبجي لا غير
أمر كل عين تبجي شما يمر ذبحه

ياعين العذر مرفوض
بكل يوم البجي مفروض
حبيبي صدره ضل مرضوض
وأبد لا مابرد لاثاره لا جرحه

ماماخوذ ثاره اولا برد كلب ام الحسين
اين الطالب بدم الحسين وكطع الايدين
انصر قائمي بثار الذبح وسيفي دمع عين

مهجت محمد باقي ثاره
والثاره عشنه ابأنتضاره
الدمُ بالدم وبفقاره ،،، اباعبدالله

ثار الخيم دين الغياره
بكلب اليحب ماتطفه ناره
والما بجاه عمره خساره ،،، اباعبدالله
،،،،،،،،،،،،،،،
عن الصادق أمُر منقول
عالبلانعش مشيول
تباكى او بكى مقبول
رحم الله الينزف وي صواوينه

مقام الدمعة شيكدره
اليبجي بهظمته وكسره
يوصل فاطمة الزهره
وأدى حقنه كلما غوركت عينه

بقدر جنح الذبابه اليبجي للمذبوح عطشان
يوصل فاطمة ويأدي حقنه ويمنه اله مجان
ما استاهل انه هذا كله دخيل الحنان

مره اشتعل مره انه ابرد
وين انه حته ابهاي انعد
أأدي حق عترة محمد اباعبدالله

الدمعه لا ما تنخص شكد
للطايح وما يمه مسند
وفوك الثرى جسمه توسد اباعبدالله
،،،،،،،،،،،،،
عزيز الله ومصاب الروح
عهدي اويه امه اضل مجروح
وثاري ما ابطل النوح
على كل لحضه مرته بضمه ولوعه

سلام الله على العطشان
الما ضله ولد وخوان
وصار بولية العدوان
وعلى طول الدهر بي امه مفجوعه

مثكوله ابأبنهه بكل وكت مفجوعه للدوم
ابحملهه وبالولاده ومن ذبح مولاي لليوم
صوت بكل كلب محروك منهه ابني مظلوم

لايهنه عيشي ابلايه جرحه
وجرح العطش لازم افضحه
امغزر ابدلالي ملحه ،، اباعبدالله

بقضيتي شي لازم اوضحه
مجروح انه بكلشي يجرحه
اذبحت شبابي ويه ذبحه ،،، اباعبدالله
،،،،،،،،، ،

اخر دمعه طاحت جمره مو ماي
من عيون زينب بيهه حيره
دمعه اختصرت ألام وحجي هواي
دمعة راحه بس طاحت كسيره
دمعة راحه يعني اخر بجي هاذ
وترجع زينب اللا مو أسيره

ومكسورة طاحت هاي اشيحلهه
يعني العقيلة رادت اهلهه
هيبة الميت دمعة اخوته
وتحت التراب الجان يفزعلهه

رادت ام عون اخو ايخفف اعليهه ألمهه
بس سيف الفراك ذبح كل أمانيهه وحلمهه
المهموم يرتاح وكت موته بس ماتت بهمهه
اه يزينب ،، اه يزينب
،،،،،،،،،،
على القبله اليموت العاده يندار
وزينب دارت الذيج العشيره
حكهه أدير هيه بديرة الشام
الشام ابلا حياء ميت ضميره
اليفرح من تطبله أسره عالنوك
اليموت ابكاعه اضن واضح مصيره

اليفرح ابطبت الجرحو دلاله
ويكثر ضواه ويبين خياله
الشام اخ الشام ماله چاره
ضيع بنات امن اشرف سلاله

الطباله مره وشبع بالهظم طيح دمعته
وبثاني مره يطبله تره اتموته حسرته
والينكسر يم شماته منو ايداوي كسرته
اه يزينب ،،، اه يزينب
،،،،،،،،،،،،،،،،،،،
الشام الماعطف من عدله ام عون
تريده ابموت يعطف عالأميره
تريده ايشيع ويسجب دمع حار
وهو خير الشام ابلايه غيره
يضل امدنك الما عنده خوان
ولا وجهه الشماته ايضل يديره

ألمن يدير الما يمه اخوته
المحد يسمعه يذبحونه صوته
والموت نعرف مابي شماته
والشام شامت حته اويه موته

هذا الجره وصار يعالم تره بحال العقيله
الشام مايعرف امخدره وحرمه وجليله
وضل بيهه محتار نعشهه اولا واحد يشيله
اه يزينب، ،، اه يزينب
،،،،،،،،،،،،،،،،،،،،،،،،،،،
من بعد التعب بعد الهزيلات
انتهه ضيم السبي خلص مسيره
وانه بيه جرح ينزف معانات
جرح كلما نزف يترسني حيره
ملك الموت منهه شخذه محتار
وزينب ميته من ذيج الضهيره

ام عون ماتت من طلعوهه
ومن خيل شافت كصدت اخوهه
ويحسين روح ام عون ماتعوفه
وبس جسد ضلت من أسروهه

منهه خذه الموت حبل كاود جفوف العليمه
وخلاهه ترتاح لجن ضلت ابديره أليمه
تندفن بالشام أبد مو كدرهه يوادم هظيمه
اه يزينب ،، اه يزينب
،،،،،،،،،،،،،،،،،،،،