ዳግም ጥሪ፦

አዲስ አበባ ዩኒቨርስቲ ሙስሊም ተማሪዎች ላይ እየፈፀመ ያለው በደል እንደቀጠለ መሆኑ፤ ያወጣው ጨቋኝ መመሪያ አለመሻሻሉ እና አጥፊዎችም ተጠያቂ አለመደረጋቸው ይታወቃል። ሌሎችም እርሱን በመከተል ኒቃብን የሚከለክል መመሪያ እያወጡ እንደሆነ ተስተውሏል። ይህንን አጀንዳ ለአንዴ እና ለመጨረሻ ጊዜ መፍታት ካልተቻለ ክልከላው ከዩኒቨርስቲ ዩኒቨርስቲ መሸጋገሩ አይቀሬ ነው።

ስለሆነም በነገው እለት ሁሉም የዩኒቨርስቲ ጀመዓዎች፤ የመስጂድ ኢማሞች እና ኸጢቦች በኹጥባዎቻችሁ ውስጥ የአዲስ አበባ ዩኒቨርስቲ በኒቃብ ላይ ያደረገውን ክልከላ በማንሳት ታወግዙ ዘንድ፤ መልዕክት በማስተላለፍ እየደረሰ ስላለው ነገር ለማህበረሰብ ታደርሱ ዘንድ እንጠይቃለን።

ጥያቄው የሕዝበ ሙስሊሙ ነው!
ጥያቄ አለን _ ፍትሐዊ መልስ እስኪመጣ!

@aaumsu

ባለፈው ሳምንት _ በወሎ ዩኒቨርስቲ ከተደረገ የጁምዓ ኹጥባ !

"የአዲስ አበባ ዩኒቨርስቲን ፕሮጀክት ተመልከቱ። መራቆትን ባህል አድርገው እንደ ምዕራባውያን ካልሆናችሁ እያሉ ነው። ጉዳዩ የባህል ከሆነ ለምን የአፋር እና ሶማሌን ባህል አያከብሩም? ኒቃብ ለአፋር ባህሉ ነው። ኒቃብ ለሶማሌ ባህሉ ነው።"

@aaumsu

"የሙስሊም ተማሪዎች የመብት ጥያቄ ከትውልድ ትውልድ እየተሸጋገረ በሁሉም የሚደረስ ታዚያ መሆን የለበትም። በዚህ ዘመን በዚህ ትውልድ የሚቋጭ እንጂ።"

@aaumsu

وَلَا تَهِنُوا​(አትድከሙ/አትስነፉ)፦

የሰበሰባችሁት 1,141 ፊርማ በ "X" ሲሰረዝ፣ የተወካዮቻችሁ ድምፅ "አናውቃችሁም" ተብሎ ሲናቅ፣ በሩ ላይ ያሉት ጥበቆች መንገዱን ሲዘጉባችሁ... አትድከሙ! የእናንተ ጥንካሬ የሚለካው በሮች በመከፈታቸው ሳይሆን፣ በሮች ተዘግተውባችሁም ለቆማችሁለት አላማ ባለመደላደላችሁ (resilience) ነው።

وَلَا تَحْزَنُوا​(አትዘኑ)፦

ርቦሽ ከካፌ ስትባረሪ፣ ታመሽ ከክሊኒክ ስትገፊ፣ ወይም መምህራን ማርክሽን ቀንሰው ሊያሸማቅቁሽ ሲጥሩ... አትዘኚ! ይህ የአጭር ጊዜ እንግልት ነው። እነሱ 'እየቀጣናችሁ ነው' ብለው ቢያስቡ፣ አላህ ግን በሰማይ ቤቱ ለአንቺ የክብር ማዕድ 🍱 እያዘጋጀ ነው። ውጤትሽን በወረቀት ላይ ቢቀንሱትም፣ በእርሱ ዘንድ ያለሽ ደረጃ ግን ከፍ ያለ ነው።

وَأَنتُمُ الْأَعْلَوْنَ​(እናንተ የበላይ ናችሁ)፦

ሀቅ ነው! ኒቃብሽን እንደ "ስጋት" ለሚቆጥሩት፣ ክብራቸውን ለዲግሪ ለሸጡትና የሌላውን ጥላ ለሚከተሉት ሰዎች አትሸማቀቂ። "በጥላ ውስጥ የሚቆይ ሰው ጥላ የለውም!" እንደሚባለው፣ ማንነታቸውን ደብቀውና የሌላውን ቀለም ለብሰው የሚሄዱት እነርሱ እንጂ፣ በፀሐይ ተቃጥለሽም ቢሆን የራስሽን የፅናት ጥላ ይዘሽ የቆምሽው አንቺ የበላይ ነሽ! ዲግሪ ካንቺ በታች ነው፤ ኒቃብሽ ግን የፈጣሪሽ አደራ በመሆኑ ካንቺ ጋር ከፍ ያለ ነው።

       ​ ባርነት ወይስ ዕውቀት?

ዛሬ ላይ ባለመማር ሊቀጡሽ የወሰኑ አካላት አንድ ነገር ሊረዱ ይገባል፤ ጥያቄሽ አንድና ግልፅ ነው— "መማር እፈልጋለሁ!" ነገር ግን ስትማሪ ክብርሽን፣ ሞገስሽንና ኒቃብሽን ጠብቀሽ ነው። ያለ ዲንሽ ሕይወት የለሽም፤ ያለ ተቅዋ ትምህርት ትርጉም አይሰጥሽም። የታላቁ ነቢያችን (ሰ.ዐ.ወ) አደራ የሆነውን ዲን አጥፍተሽ የምታመጪው ዲግሪ ለቤትሽም ለሀገርሽም በረካ አይሆንም። አንገትሽን አስደፍተው፣ በራስሽ ማንነት እንድትሸማቀቂ አድርገው የሚሰጡሽ እውቀት እውቀት ሳይሆን 'ባርነት' ነው።

        ​አብሽሪ! አንቺ አትሰበሪም!

ለካፌና ለክሊኒክ ስትከለከዪ፣ በሩ ላይ ስትገፊና ስትገለዪ "ተሰበረች" ብለው ለገመቱ ሁሉ የምንለው፤ ይሄ ጫና የሚጨምረው ጥንካሬሽን እንጂ ድካምሽን አይደለም። ዛሬ በሩን ቢዘጉብሽ፣ ተቅዋን በልብሽ ካኖርሽ..

ረቡና በውብ ንግግሩ እንዲህ ሲል አብሽር ይልሻል፦

وَمَن يَتَّقِ اللَّهَ يَجْعَل لَّهُ مَخْرَجًا ۞ وَيَرْزُقْهُ مِنْ حَيْثُ لَا يَحْتَسِب

      ...አንቺ ብቻ እኔን ፍሪ እንጂ ላለሽበት ጭንቀት እና ጫና መውጫን አደርግልሻለሁ፤ ምን እሱ ብቻ ባላሰብሽው ​በኩልም ሪዝቄን እረዝቅሻለሁ ይልሻል። አንገትሽን ሊያስደፉሽ በሞከሩ ሰዎች ፊት፣ በኩራት ቀና ብለሽ የምትሄጂበት ቀን ደግሞ እሩቅ አይደለም። Inshallah ❤️

​.... أَلَا إِنَّ نَصْرَ اللَّهِ قَرِيبٌ
(እውቁ! የአላህ እርዳታ ቅርብ ነው) ፦

የእርሱ እርዳታ በቢሮክራሲና በሰው ፍቃድ የታጠረ አይደለም። ለጊዜው ነገራቶችን እያየ ዝም ያለው አንቺ እንድትሰበሪ or ሊቀጣሽ ሳይሆን፣ በፅናትሽ ታሪክ ሰርተሽ ለድል እንድትበቂ ነው።

     ሀስቡነላህ ወኒእመል ወኪል!

ሰዎች "ተከታታይ ክስ መስርተንባችኋል፣ አናውቃችሁም፣ ዲግሪ የላችሁም" ብለው ሊያስፈራሯችሁ ሲሞክሩ፣ ቁርአን የሚሰጣችሁ 'ወኔ' ግን ፍፁም የተለየ ነው ፦

​الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ

​Look... እነሱ 1,141 ፊርማን ሲንቁ፣ አንቺ ግን "አላህ በቂዬ ነው" ስትይ፣ ሰማይና ምድር ካንቺ ጋር ይቆማሉ። ዲግሪ ወረቀት ነው፤ ኒቃብሽ ግን 'ሞገስ' ነው። ዛሬ አንገትሽን ሊያስደፉሽ የሞከሩ ሁሉ፣ ነገ በፅናትሽ ብርሃን አይናቸው ሲታወር ታያለሽ።

​አብሽሪ እህቴ! አንቺ የአላህ እንግዳ እንጂ የካምፓስ ስደተኛ አይደለሽም። ዛሬ በካፌው በር ብትከለከዪም፣ ነገ በጀነት በር 'ያለምንም ሂሳብ' የምትገቢው አንቺ ነሽ!

​"ኒቃቧንም ትለብሳለች... ትምህርቷንም ትማራለች!"

❤️‍🩹ከ ቁርአን አያህ...

©ከቁርአን አያህ

#AAUMuslimStudents #DignityOverEverything #KeQuranAyah #JusticeForNiqabis #Ethiopia

@aaumsu

ጥያቄ አለን ማለት ከጀመርን 624 ቀናት ሞላ። መመሪያው በረቂቅነት ደረጃ ሳለ በመስከረም 15, 2017 ዓ.ል ነበር ጥያቄ አለን በማለት በአምስት ኪሎ ግቢ ድምፃችንን ከፍ አድርገን ያሰማነው። የዚያኔ ለጥያቄያችን ምላሽ ላለመስጠት መድረኩን ረግጠው ቢሄዱም ቢሯቸው ድረስ ተሰብስበን በመሄድ ደጋግመን ጠይቀናቸው ነበር። ከዚያን ጊዜ ጀምሮ ለ20 ወራት እና 19 ቀናት ብንጠይቅም በውይይት አምኖ ለጥያቄያችን ምላሽ ለመስጠት ከጠረጴዛ በአግባቡ የተቀመጠ አካል የለም። ለጥያቄያችን የተነፈገው ትኩረት እና በሂደቱ የተሰጠው ግብረመልስ በከፍተኛ ትምህርት ተቋማት ውስጥ ያለውን ውይይት ጠል እና ሙስሊም ጠል አካሄዶችን የሚያሳይ ነው። ምንም ቢሆን ምን መብቶቻችንን በመጣሳቸው ፍትሕን ለመጠየቅ የጀመርነው ጉዞ አይቋጭም። በሰላማዊ መንገድ በአስቸኳይ መፍትሔ ይመጣ ዘንድ ዳግም እንጠይቃለን።

ጥያቄ አለን _ ፍትሐዊ መልስ እስኪመጣ !

@aaumsu

ሒጃቧ - ማንነቷ!

መገለጫዋ ነው
ማንነት ምስጢሩ፥ የተወጠነበት፣
የሴትነት ሀሁ
የተፈጥሮ ሚዛን፥ ጸንቶ የቆመበት።

እሷነት ነው ሒጃብ
ጥንት የተሰጠችው፥ የገጿ ላይ አርማ፣
በወቅት አይደበዝዝ
አረጀብኝ ብላ፥ እትጥለው ከርማ።

እቃዋም አይደለም
ሲያሻት የምትጥለው፥ ደግሞ 'ምታነሳው፥
የመኖር ምሷ ነው
ከራሷ ተገምዶ፥ እሷው የምትለብሰው።

ማንነት ነውና
ነፍስና ስጋዋን፥ ተዋሕዶ ያለ፣
እሷን ከሂጃቧ
የምትነጥልበት፥ ጉልበት ወዴት አለ?

©EHEMSU

@aaumsu

60 ቀናት ሞላ

በዚህ ምሽት ዩኒቨርስቲው ካዘጋጀው የኢፍጣር መድረክ የተገኙ ሒጃቢስቶች "ጥያቄ አለን! መልስ ስጡን!" - በማለት ድምፃቸውን ከፍ አድርገው ማሰማታቸውን ታሪክ በወርቃማ ብዕር ከትቦ አልፏል። ሒጃቢስቷ "ከምግቡ በፊት ነፃነቴ ይቀድማል። ካከበራችሁኝ መብቴን አክብሩ።" - በማለት ተናግራ ነበር። ምሽቱን የነበሩ የግቢው አካላት በማግስቱ ፕሬዚዳንቱ ባሉበት ውይይት ተደርጎ መፍትሔ እንደሚመጣ ቢገልፁም ጁምዓ ሲደረስ ደግሞ ከአዲስ አበባ ከተማ ፀጥታ እና ብልፅግና ቢሮ የመጡ አካላት ቀጠሮው ለሰኞ ይዛወር ብለው መድረክ እንደሚዘጋጅ ቃል ገብተው ነበር።

ሆኖም ይህ ቀን ካለፈ ዛሬ 60 ቀናት ሞላ። ጥያቄያችንን እንመልሳለን ያሉ አካላት ሳይመልሱ፤ ውይይት ይካሄዳል ብለው ቃል የገቡት ቃላቸውን ሳያከብሩ 60 ቀናት ሞላ። በሒጃብ ምክንያት ሰብዓዊ መብቷ ለተገፈፈው እህት ፍትሕ ይሰጥ ዘንድ፤ ችግሮች በውይይት ተፈተው የዩኒቨርስቲው ስም ይመለስ ዘንድ፤ አጥፊዎች ይቀጡ ዘንድ መድረክ ይዘጋጃል ተብሎ ሳይዘጋጅ 60 ቀናት አለፉ።

ቀናት አለፉ ማለት ግን ጥያቄውም አለፈ ማለት አይደለም። ውይይትን ተመራጭ መንገድ አድርጎ መፍትሔን መሻት ፍርሃት ሳይሆን ብስለት ነው። ሆኖም ግን ለውይይት የተጋበዙ እና እንደሚካሄድ ቃል የገቡ አካላት ቃላቸውን ባለማክበራቸው መፍትሔ ሳይመጣ ቀርቷል። ስለሆነም መፍትሔው ይመጣ ዘንድ ጠንከር ብሎ መጠየቅ፤ ጠንከር ብሎ ድምፅን ማሰማት፤ ተቀናጅቶ እና ተናቦ መንቀሳቀስ ግድ ነው። ይህ ይሆናል። ሲሆንም መፍትሔው በቅርቡ ይመጣል። ኢንሻአላህ!

ጥያቄ አለን _ፍትሐዊ መልስ እስኪመጣ !

@aaumsu

በሁዳ መልቲሚዲያ

2000 ላይ ሒጃብን የሚከለክለው የመጀመሪያው መመሪያ ሲወጣ የነበረው ትንቅንቅ ተዳሷል። ከዚያ በፊት በሙስሊም ተማሪዎች ላይ ሲደርሱ የነበሩት፤ አሁን ላይ እየደረሰ ያለው ተጠቅሷል። የአዲስ የአበባ ዩኒቨርሲቲ ሙስሊም ተማሪዎች ላይ እየደረሰ ያለው የመብት ጥሰትም የተዳሰሰ ሲሆን ብቸኛ መፍትሔውም በዝርዝር ተቀምጧል።

ሊንኩ https://youtu.be/eM0omRXNjIM?si=lKtxA0iK3NW96kMO ነው። በደንብ ያዳምጡ። የቤት ስራዎንም ይውሰዱ። ለሌሎችም ያሰራጩ።

@aaumsu

ኒቃቢስቷ፦ እምነቴን መተው አለብኝ?
የAAU ጥበቆች፦ እምነት ብሔር የሚባል ነገር የለም። እምነት በልብ ነው።

ይህ ኒቃቢስት እህት ላይ በር ያለች ጥበቃ አትገቢም ብላ ካቆመቻት ቡሃላ የተናገሩት ንግግር ነው። እዚህ እምነት የሚባል ነገር አይሰራም በማለት የእምነቷ ክፍል የሆነን አለባበስ ከበር ጥላ እንድትገባ ጠይቋታል። እርሷም "እና እምነቴን መተው አለብኝ?" - በማለት እየጠየቀች ነው። እምነቷን መተው አለባት? እምነታችንን መተው አለብን? ገብተን እንማር ዘንድ እስልምናችንን ከበር ጥለን መግባት አለብን? ይህ ድፍረትን የቀላቀለ የሙስሊም ተማሪዎችን መብት የሚጥስ ንግግር ነው። እስልምና ከዩኒቨርስቲ በር ተጥሎ የሚገባ ሐይማኖት አይደለም።

ኒቃብን በመመሪያ በመከልከል መብታችን የሆነን አለባበስ ከመከልከል ጀምሮ ጥላቻ አዘል ንግግሮች እንዲደርሱብን እየሆነ ነው። ይህ ለምን እንደተፈለገ አሁንም ጥያቄ አለን። መመሪያው ይሻሻል ዘንድ በሁሉም መንገድ ስንጠይቅ እንደነበረውም መመሪያው ተሻሽሎ መብታችን ይጠበቅ ዘንድ በትብብር፣ በአንድነት፣ በጋራ እና በሕብረት ድምፃችንን ማሰማት፤ ስለመብታችን መጠየቅ፤ የእኛ ስለሆነውም መሞገት ግዴታችን ሆኗል። በአላህ ፈቃድ ይህ እሮሮ በእኛ ትውልድ ይቋጫል። መብታችን ተከብሮም ፍትሕ የሚሰፍን ይሆናል። ኢንሻ አላህ!

ጥያቄ አለን _ ፍትሐዊ መልስ እስኪመጣ !

@aaumsu

ሒጃቧ - መብቷ!

እኩል ግብር ከፍሎ
እኩል ደሙን ሰጥቶ፥ ባጸናት ሐገሩ
ልጄን ላስተምር ሲል
አይሆንም ሲባል ግን፥ አለመታፈሩ?!

የነጻነት ምድር
ቀበርኩት ብትልም፥ ጭቆናን ምድሯ ላይ
አይኗ ተሸፍኗል
ልማር የምትላት፥ ልጇን ዞራ እንዳታይ።

ለስሙ እኩልነት
ሲሰበክ ቢውልም፥ መድረክ ተፈልጎ
የታለ እኩልነት
ያ'ገሪቷን ግማሽ፥ ወደ ጎን አድርጎ?!

ትዝብት እንጂ ትርፉ
ፍትሕ ስሟ ቀርቶ፥ ግብሯ ቢሆን ኦና፣
ሀገር አትሰራም
ከግለሰቦች ደጅ፥ መብት እየተጠና።

ሌሎች እኩዮቿን
መብት እንደሆናቸው፥ ትምህርትና ስራ፣
እሷም ትማራለች
(እሷም ትሰራለች)
እምነቷን አክብራ፥ መብቷን አስከብራ።

©️EHEMSU
@aaumsu

70 ቀናት ሞላ
ብልፅግና ፓርቲ ጽ/ቤት

አስቸኳይ የሆነ የፖለቲካ አመራር እና ውሳኔ በማሳለፍ በአዲስ አበባ ዩኒቨርስቲ ሙስሊም ተማሪዎች ላይ እየደረሰ ያለውን ስልታዊ የመብት ጥሰት እና ማግለል ያስቆም ዘንድ ለብልፅግና ጽ/ቤት ደብዳቤ ከገባ 70 ቀናት ሞልቷል። ሆኖም ግን እስካሁን ባለው ጊዜ ተማሪዎች ላስገቡት ደብዳቤ የተሰጠ ምላሽም ሆነ የተፈጠረውን ችግር ለመፍታት የተወሰደ ቁርጠኛ እርምጃ አልታየም።

መሠል ምላሾች አግባብነት የሌላቸው እንደሆኑ እናምናለን። ተማሪዎች የደረሰባቸው በደል ተሰምቶ መፍትሔ ይመጣ ዘንድ ሁሉንም አማራጭ ተጠቅመዋል። ቅሬታዎችን ሰምቶ አጥፊዎችን በመቅጣት መፍትሔ መስጠት የመንግስት ሀላፊነት ቢሆንም መፍትሔው ሳይመጣ እስካሁን አለ።

መመሪያው ይስተካከል ዘንድ ዳግም እንጠይቃለን። መመሪያው እስኪስተካከልም ጥያቄ አለን እንላለን። የደረሰብንን በደል አሳውቀን ምላሽ ላልሰጡን ስለምን ምላሽ እንዳልሰጡ ጥያቄ አለን። መፍትሔ እንደሚያመጡ ቀጠሮ ሰጥተው ቃላቸውን ላጠፉ አካላት ስለምን ቃላቸውን እንዳጠፉ ጥያቄ አለን። መመሪያውን ሳያሻሽሉ በደላቸውን ለቀጠሉ አካላት ስለምን በበዳይነታቸው ለመቀጠል እንደቆረጡ ጥያቄ አለን።

ጥያቄያችንንም ሳንሰለች ሳንደክም ሳንፈራ ሳናፍር በቢሮ ውስጥም ሆነ በአደባባይ እናቀርባለን። በሚዲያም ሆነ በአካል እናሰማለን። ፍትሐዊ መልስ እስኪመጣ!

@aaumsu

የሙስሊም ተማሪዎች የመብት ጥያቄ የዚህ ትውልድ አማና ነው ደጋግመን የተናገርነው ቃልኪዳን ነበር።

ቃልን በተግባር !

@aaumsu