#aboutLaw
ከ2,000 ዓመታት በኋላ የቀረበው ታላቁ የዓለማችን ይግባኝ መዝገብ

በሕግ ታሪክ ውስጥ እጅግ አስገራሚ ከሚባሉት የፍርድ ቤት ክሶች አንዱ የተመዘገበው በጎረቤታችን ኬንያ ነው። ዶላን ኢንዲዲስ (Dola Indidis) ይባላል፤ የቀድሞ የኬንያ ፍርድ ቤት ቃል አቀባይ እና አንጋፋ ጠበቃ ነው። ኢንዲዲስ የሕግ መጻሕፍትንና ታሪክን ሲመረምር አንድ ትልቅ ሕጋዊ ስህተት ያያል «የኢየሱስ ክርስቶስ ስቅለት ፍርድ በወቅቱ በነበረው የሮም ሕግም ሆነ በተፈጥሮ ሕግ (Natural Justice) መሠረት ፈጽሞ ሕጋዊ አልነበረም!» የሚል ድምዳሜ ላይ ይደርሳል።
ኢንዲዲስ ዝም ብሎ ማጉረምረም አልፈለገም። የሕግ አቅሙን ተጠቅሞ ይኸንን ታሪካዊ ስህተት በሕግ ፊት ለማረም ወሰነ!
በ2007 እ.ኤ.አ ኢንዲዲስ የመጀመሪያውን እርምጃ ወሰደ። በናይሮቢ በሚገኘው የኬንያ ከፍተኛ ፍርድ ቤት የክስ አቤቱታውን አቀረበ።
ክሱ የቀረበው በእነ ማን ላይ ይመስላችኋል?
1. ጢቤሪዮስ ቄሳር (የወቅቱ የሮም ንጉሠ ነገሥት)
2. ጳንጥዮስ ጲላጦስ  (የይሁዳ ገዥ)
3. ንጉሥ ሄሮድስ
4. የይሁዳ የሃይማኖት ሽማግሌዎች
5. የጣሊያን እና የእስራኤል መንግሥታት (የቀደሙት የሮምና የይሁዳ ግዛቶች ተኪ በመሆናቸው!)
የኬንያ ከፍተኛ ፍርድ ቤት መዝገቡን ሲከፍተው ደነገጠ! ዳኞቹ አሰብ አደረጉና፡ «ወንድማችን ኢንዲዲስ... ይኸ ጉዳይ ከእኛ የዳኝነት ክልል እና ስልጣን  በላይ ነው፤ የውጭ ሀገራትንና የታሪክ አካላትን እዚህ ናይሮቢ መቀጣት አንችልም» በማለት መዝገቡን ዘጉት።
ኢንዲዲስ በተሰጠው ውሳኔ ተስፋ አልቆረጠም። «ሕግ የትም ሕግ ነው!» በማለት ጉዳዩን ይዞ በኔዘርላንድስ ሄግ ወደሚገኘው ዓለም አቀፍ የፍትሕ ፍርድ ቤት (ICJ) አቀና።
በክስ ማመልከቻው ላይ ያቀረባቸው ዋና ዋና ሕጋዊ ጭብጦች  እጅግ ድንቅ ነበሩ፦
እየሱስ ክርስቶስ የሕግ አማካሪ lawyer  አላገኘም፤ እራሱን በበቂ ሁኔታ እንዲከላከል እድል አልተሰጠውም።ክስ የቀረበበት አቤቱታ የሃይማኖትና የቤተ መቅደስ ህግ መጣስ ሆኖ ሳለ፣ ፍርዱ ግን የፖለቲካ አመፅ  ተደርጎ ተወሰዷል። በቁጥጥር ስር የዋለበት እና የተገረፈበት መንገድ የሰብአዊ መብት ጥሰት ነው የሚሉ ነበሩ።
የዓለም አቀፍ ፍርድ ቤት (ICJ) ማመልከቻውን ተቀብሎ መረመረው። ነገር ግን አዘጋጆቹና ዳኞቹ መዝገቡን ሳይከፍቱት አቤቱታው ውድቅ  ሲያደረጉት እንደምክንያት ያነሷቸው፦
1.  ICJ የሚዳኘው በሕይወት ያሉ ሀገራትን እንጂ ግለሰቦችን አይደለም።
2.  የተከሰሱት ግለሰቦች ከ2,000 ዓመታት በፊት የሞቱ በመሆናቸው በሕግ ፊት "Legal Personality" የላቸውም።
3. በወንጀልም ሆነ በፍትሐብሔር ሕግ ክስ ለማቅረብ የተቀመጠውን የጊዜ ገደብ በእጅጉ ያለፈ ነው በማለት ነበር።

ጋዜጠኞች ኢንዲዲስን «ግን ለምን ይህን አደረግክ?» ብለው ሲጠይቁት፡ «ዓላማዬ የኢየሱስን ንጹሕነት በሕግ ፊት ማረጋገጥ እና በታሪክ ውስጥ የተፈጸመውን ታላቅ የሕግ መጣስ ማጋለጥ ነው። እኔ የክርስቶስ ጠበቃ ነኝ!»* በማለት መለሷል።

🗄 higkeldenakumneger
Join &share👇🏼
@AAUMEREJA