ለ33 ቀናት የሚቆይ ነፃ የሕክምና አገልግሎት መሰጠት ተጀመረ

በአዲስ አበባ ከተማ ቦሌ ክፍለ ከተማ “እሺ ለበጎ ተግባር” በሚል መሪ ቃል የተዘጋጀው የክረምት የበጎ ፈቃድ ነፃ የሕክምና አገልግሎት ዛሬ ሐምሌ 20 ቀን 12018 ዓ.ም በይፋ ተጀምሯል።

ይህ የበጎ አድራጎት መርሃ ግብር ከአዲስ አበባ ዩኒቨርሲቲ ጤና ሳይንስ ኮሌጅ ጥቁር አንበሳ ስፔሻላይዝድ ሆስፒታል፣ ከአዲስ አበባ ከተማ አስተዳደር ጤና ቢሮ እና ከቦሌ ክፍለ ከተማ አስተዳደር ጋር በመተባበር የተዘጋጀ ነው።

በአገልግሎቱ መክፈቻ ስነ-ስርዓት ላይ የቦሌ ክፍለ ከተማ የብልጽግና ፓርቲ ቅርንጫፍ ጽህፈት ቤት ሃላፊ አቶ ክፍሌ ለማ፣ የአዲስ አበባ ከተማ አስተዳደር ጤና ቢሮ ሃላፊ ዶክተር ዮሐንስ ጫላ፣ የአዲስ አበባ ዩኒቨርሲቲ ፕሬዝዳንት ጽህፈት ቤት ሃላፊ ፕሮፌሰር ማቴዎስ እንሰርሙ እና የጥቁር አንበሳ ስፔሻላይዝድ ሆስፒታልና የጤና ሳይንስ ኮሌጅ ቺፍ ኤግዚኪውቲቭ ዳይሬክተር ዶክተር ራሔል አርጋው ጨምሮ ሌሎች ከፍተኛ አመራሮችና የህክምና ባለሙያዎች ተገኝተዋል።

ከፍተኛ የሕክምና ባለሙያዎች እና ስፔሻሊስቶች እየተሳተፉበት ባለው በዚህ መርሃ ግብር በርካታ የአካባቢው ነዋሪዎች የነፃ ሕክምናው ተጠቃሚ መሆን መጀመራቸው ታውቋል።

በጥቁር አንበሳ ስፔሻላይዝድ ሆስፒታል “እሺ ለበጎ ተግባር” የተሰኘ የደም ልገሳ መርሃ ግብር ተካሄደ፡፡

የአዲስ አበባ ዩኒቨርስቲ ጥቁር አንበሳ ጤና ሳይንስ ኮሌጅ የተማሪዎች አሶሴሽን ከኢትዮጵያ ጤና ባለሙያዎች ማህበር ጋር በመተባበር የተዘጋጀ ሲሆን በክረምት የበጎ አድራጎት ከሚከናወኑ ተግበራት አንዱ ነዉ፡፡

ሆስፒታሉ ከሃገሪቱ የተለያየ ክፍል የሚመጡ ከፍተኛ ስፔሻሊቲ ህክምና የሚያስፈልጋቸዉ ህሙማን አገልግሎት የሚሰጥ ተቋም መሆኑን የገለጹት የጥቁር አንበሳ ስፔሻላይዝድ ሆስፒታል ሃላፊ ዶ/ር ብርሃኑ ሰንደቅ ናቸዉ፡፡

ይህ አይነቱ የደም ልገሳ መርሃ ግብር 4ተኛ አመቱን መያዙን አስታዉሰዉ፤ የተሰበሰበዉ ደም ለሆስፒታሉ ብሎም ለሌሎች የህክምና ተቋማት ደም ለሚያስፈልጋቸዉ ህሙማን የሚዉል መሆኑን አስረድተዋል፡፡

በመርሃግብሩ ላይ ደም ሲለግሱ ያገኘናቸዉ ፕ/ር ብሩክ ላፒሶ በበኩላቸዉ ደም የሚያስፈልጋቸዉ ታካሚዎች በምንም መድሃኒት የማይተካ ብሎም የህሙማንን ህይወት የሚያስቀጥል መሆኑን ገልጸዋል፡፡

እሺ ለበጎ ተግባር የደም ልገሳ መርሃ ግብር የህክምና ሙያተኞች ግንዘቤ ከማስጨበጥ ባለፈ በተግባር ማህበረሰቡ የሚያስተምሩበት መሆኑን አስረድታዋል፡፡

ፕ/ር ብሩክ አክለዉ ደም መለገስ ለተቀባዩ ተካሚ ባለፈ ለለጋሹ ግለሰብ ዘርፈ ብዙ የጤና ጠቀሜታ እንዳለዉ አስገንዝባዋል፡፡

“እሺ ለበጎ ተግባር” የደም ልገሳ መርሃ ግብር የአዲስ አበባ ዩኒቨርስቲ ጤና ሳይንስ ኮሌጅ ተማሪዎች የሆስፒታሉ የህክምና ባለሙያዎች እና አስታማሚዎች በልገሳዉ እየተሳተፉ ሲሆን፤ይኸዉ መርሃ ግብር በቀጣዮቹ ሁለት ቀናት የሚቀጥል ይሆናል፡፡