Warning Notice to the Public: Danger from Naval Vessels, Jet Fighters, and Heavy Artillery Shelling– Stay Vigilant at All Times
 
September 4, 2026

အာရက္ခပြည်၊ သံတွဲ နှင့် ဂွမြို့တို့ကို ဖက်ဆစ် အကြမ်းဖက် စစ်ကော်မရှင်တပ်မှ လေကြောင်းနှင့် ရေကြောင်းတိုက်ခိုက်မှုများပြုလုပ်ခဲ့

၂၀၂၆ ခုနှစ်၊ စက်တင်ဘာလ (၈) ရက်

အာရက္ခပြည်၊ သံတွဲ နှင့် ဂွ မြို့တို့ကို ဖက်ဆစ် အကြမ်းဖက် စစ်ကော်မရှင်တပ်မှ ၂၀၂၆ ခုနှစ်၊ စက်တင်ဘာလ (၇) ရက်၊ နံနက် (၁၀) နာရီ (၂၇) မိနစ်အချိန်မှစ၍ လေကြောင်းနှင့် ရေကြောင်းတိုက်ခိုက်မှုများကို ဆက်တိုက်ပြုလုပ်ခဲ့သည်။

ဖက်ဆစ် အကြမ်းဖက် စစ်ကော်မရှင်တပ်သည် သံတွဲမြို့ကို ယမန်နေ့ နံနက် (၁၀) နာရီ (၂၇) မိနစ်အချိန်တွင် ဂျက်တိုက်လေယာဉ် တစ်စီးဖြင့် (၂) ကြိမ် ဗုံးနှစ်လုံး ကြဲချတိုက်ခိုက်ခဲ့သည်။ အဆိုပါ ဗုံးသီးများမှာ သံတွဲမြို့၊ အမှတ် (၈) ရပ်ကွက်သို့ ကျရောက်ပေါက်ကွဲခဲ့သဖြင့် ၎င်းရပ်ကွက်တွင် နေထိုင်သည့် အပြစ်မဲ့အရပ်သားပြည်သူ ဒေါ်သန်းသန်းကြွယ် (၈၃ နှစ်) မှာ နေရာတွင်ပင် ပွဲချင်းပြီး သေဆုံးခဲ့ပြီး မမို့မို့မြင့်အောင် (၂၈ နှစ်)၊ ဒေါ်အေးအေးကြွယ် (၆၆ နှစ်) နှင့် ကိုရန်နောင်ထက် (၂၈ နှစ်) တို့မှာ ဒဏ်ရာများ အသီးသီးရရှိခဲ့ကြသည်။ ထို့အပြင် ပြည်သူများ၏ နေအိမ် (၈) လုံးပျက်စီး ဆုံးရှုံးခဲ့ရသည်။

ဂွ နှင့် သံတွဲ ပင်လယ်ပြင်တွင် ကျောက်ချရပ်နားထားသော ဖက်ဆစ် အကြမ်းဖက် စစ်ကော်မရှင်၏ စစ်သင်္ဘောများပေါ်မှလည်း နံနက် (၁၁) နာရီ ( ၂၆) မိနစ် အချိန်မှ မွန်းတည့် (၁၂) နာရီအချိန်အထိ ကမ်းခြေတစ်လျှောက်ကို လက်နက်ကြီးများဖြင့် ရမ်းသန်းပစ်ခတ်မှုများကို လေကြောင်းတိုက်ခိုက်မှုအပြီး ရှေ့ဆင့်နောက်ဆင့် ပစ်ခတ်တိုက်ခိုက်ခဲ့သည်။

၂၀၂၆ ခုနှစ်၊ စက်တင်ဘာလ (၇) ရက်၊ နေ့လယ် (၂) နာရီ (၅၂) မိနစ်အချိန်ခန့်တွင် သံတွဲမြို့နယ်၊ ကျောက်ကြီးကျေးရွာနှင့် စပါးကြီးရွာတို့ကို ဖက်ဆစ် အကြမ်းဖက် စစ်ကော်မရှင်တပ်မှ ထပ်မံ လာရောက် ဗုံးကြဲတိုက်ခိုက်ခဲ့သည်။ အဆိုပါတိုက်ခိုက်မှုအတွင်း အရပ်သားပြည်သူများ ထိခိုက်ဒဏ်ရာရရှိမှု မရှိခဲ့သော်လည်း လူနေအိမ် (၈) လုံးမှာ လုံးဝပျက်စီး ဆုံးရှုံးခဲ့သည်။

ထို့အတူ ယမန်နေ့၊ စက်တင်ဘာလ (၇) ရက်၊ နံနက် (၉) နာရီခွဲအချိန်ခန့်တွင်လည်း ပုဏ္ဏားကျွန်းမြို့နယ်၊ ဖက်ကျ ကျေးရွာကို ဖက်ဆစ် အကြမ်းဖက် စစ်ကော်မရှင်တပ်မှ ဂျက်တိုက်လေယာဉ် တစ်စီးဖြင့် လာရောက်ဗုံးကြဲ တိုက်ခိုက်ခဲ့သဖြင့် ပြည်သူများ၏ နေအိမ် (၄) လုံး ပျက်စီး ဆုံးရှုံးခဲ့သည်။

ဓာတ်ပုံ - ၂၀၂၆ ခုနှစ်၊ စက်တင်ဘာလ (၇) ရက်နေ့တွင် သံတွဲ နှင့် ပုဏ္ဏားကျွန်းမြို့နယ် တို့ကို ဖက်ဆက် အကြမ်းဖက် စစ်ကော်မရှင်တပ်မှ လေကြောင်း ဗုံးကြဲတိုက်ခိုက်မှုအတွင်း အပြစ်မဲ့အရပ်သား သေဆုံးမှုနှင့် နေအိမ်များ ပျက်စီးဆုံးရှုံးမှု မှတ်တမ်းဓာတ်ပုံအချို့

သတင်းနှင့်ပြန်ကြားရေး
အာရက္ခတပ်တော်