တိုက်ပွဲသတင်းထုတ်ပြန်ချက်

၂၀၂၂ ခုနှစ်၊ စက်တင်ဘာလ (၁၈) ရက်

ပလက်ဝမြို့နယ်၊ နှမဒါရွာ၏ တောင်ဘက်၊ အရှေ့မြောက်ဘက်နှင့်သူဌေးကုန်းရွာ အနောက်မြောက်ဘက် စသည့်နေရာ (၃) နေရာတို့တွင် မြန်မာစစ်တပ်သည် ရက္ခိုင့်တပ်တော်အား လေကြောင်း၊ လက်နက်ကြီးပစ်ကူများအပါအဝင် မြေပြင်၊ ဝေဟင်ပူးပေါင်း၍ ထိုးစစ်ဆင်တိုက်ခိုက် နေခဲ့သည်မှာ တစ်လနီးပါးကြာမြင့်ခဲ့ပြီဖြစ်သည်။

ရက္ခိုင့်တပ်တော်သည် ရက္ခိုင်၊ ပလက်ဝဒေသအတွင်းရှိ မြန်မာစစ်တပ်၏ အထိုင်ချတပ်စခန်းအချို့ နှင့် ၎င်းတို့၏ လှုပ်ရှားစစ်ကြောင်းအချို့အား ဖြတ်တောက်ပိတ်ဆို့ ဝိုင်းထားသောကြောင့် မြန်မာစစ်တပ်အနေဖြင့် ၎င်းတို့၏ အထိုင်ချတပ်စခန်းများ၊ လှုပ်ရှားစစ်ကြောင်းများ၏ ရိက္ခာ၊ ထောက်ပို့၊ ဒဏ်ရာရလူနာသယ်ယူပို့ဆောင်ရေးလမ်းကြောင်းများ ပွင့်နိုင်ရေးအတွက် အထူးကြိုးပမ်းဆောင်ရွက်လျက်ရှိသည်။ ထို့ကြောင့် ၎င်းတို့ကို ပိတ်ဆို့ထားသော မိမိတို့၏ စစ်ကြောင်းများကို လေကြောင်း၊ လက်နက်ကြီးပစ်ကူများဖြင့် နေ့တိုင်းနီးပါး မရရအောင် အသည်းအသန် ကြိုးပမ်းဆောင်ရွက်လျက်ရှိသည့်ကြားမှ ရက္ခိုင့်တပ်တော် တပ်ဖွဲ့ဝင်များသည် ရန်သူအား ဆက်လက်ပိတ်ဆို့ထားဆဲဖြစ်သည်။

ရက္ခိုင်-ဘင်္ဂလားနယ်စပ်ရှိ ရန်သူ၏ မိုင်တိုင်အမှတ် (၄၀) အနီးရှိစခန်းအား တစ်လနီးပါးကြာ ဖြတ်တောက် ပိတ်ဆို့လျက် ၂၀၂၂ ခုနှစ်၊ သြဂုတ် (၃၁) ရက်နေ့၌ ရက္ခိုင့်တပ်တော်မှ အပြီးသတ် သိမ်းပိုက်နိုင်ခဲ့ပြီး ၂၀၂၂ ခုနှစ်၊ စက်တင်ဘာလ (၁၀) ရက်နေ့တွင် ခမရ (၃၅၂) တပ်ရင်း စခန်းကုန်းတစ်ခုကို ထပ်မံသိမ်းပိုက်နိုင်ခဲ့သည်။ ထို့အပြင် ရန်သူ၏ သံတောင်ဗျူဟာ စခန်းကုန်းကိုလည်း (၃) လကျော်ကြာ ဖြတ်တောက်ထားနိုင်ခဲ့ကာ ၎င်းသံတောင်ဗျူဟာ စခန်းကို ရက္ခိုင့်တပ်တော်မှ ယခုအချိန်တွင် သိမ်းပိုက်ထားနိုင်ခဲ့ပြီး ဖြစ်သည်။ ရန်သူသည် ၎င်းတို့၏ နယ်စပ်ရှိ စခန်း မြောက်မြားစွာကို စွန့်လွှတ်ထားရပြီးဖြစ်သည်။

မိမိတို့သည် ရန်သူ၏ နောက်ထပ်စခန်းအချို့ကိုလည်း ယခုနည်းတူဖြတ်တောက်ပိတ်ဆို့ထားဆဲ ဖြစ်သည်။ ထိုအထဲတွင် အိန္ဒိယ-ဘင်္ဂလာ-မြန်မာ သုံးနိုင်ငံနယ်စပ်အနီးရှိ "မြိတ်ဝ စခန်း"လည်း ပါဝင်သည်။

တစ်ပြိုင်နက်တည်းတွင် ပလက်ဝမြို့နယ်၊ နှမဒါရွာ၏ တောင်ဘက် (၂) ကီလိုမီတာခန့်အကွာရှိ မိမိတို့တပ်ဖွဲ့ဝင်များရှိရာနေရာသို့ မြန်မာစစ်တပ်သည် ထိုးစစ်ဆင်တိုက်ခိုက်လျက်ရှိသည်မှာ ယခုဆိုလျှင် တစ်လနီးပါးခန့်ကြာမြင့်ခဲ့ပြီး တိုက်ပွဲများမှာ ၎င်းပတ်ဝန်းကျင်၌ နေ့စဉ်ရက်ဆက် ဖြစ်ပွားနေခဲ့သည်။

၂၀၂၂ ခုနှစ်၊ စက်တင်ဘာလ (၁၈) ရက်၊ နေ့လယ် (၁) နာရီ (၄၈) မိနစ်မှစ၍ နှမဒါရွာ၏တောင်ဘက် (၂) ကီလိုမီတာအကွာအဝေးရှိ မိမိတို့တပ်ဖွဲ့ဝင်များရှိရာနေရာသို့ ရန်သူသည် ဂျက်တိုက်လေယာဉ် (၃) စီး၊ စစ်ရဟတ်ယာဉ် (၂) စီးဖြင့် ညနေ (၃) နာရီခန့်အထိ တစ်လှည့်စီ လာရောက်ပစ်ခတ် တိုက်ခိုက်ခဲ့သည်။ ယနေ့ ရန်သူ့လေကြောင်းတိုက်ခိုက်မှုအတွင်း ဂျက်တိုက်လေယာဉ် (၃) စီးမှ ဗုံး၊ ရော့ကတ် (၁၁) ကြိမ်တိုင်တိုင် ပစ်ခတ်တိုက်ခိုက်ခဲ့ပြီး တစ်ပြိုင်နက်တည်း တောက်လျှောက် မရပ်မနားဘဲ မိနစ် (၃၀) ခန့်ကြာ ဆက်တိုက် အကြိမ်အများဆုံး တိုက်ခိုက်ခဲ့ခြင်းလည်း ဖြစ်သည်။ ထို့နောက် စစ်ရဟတ်ယာဉ် (၂) စီးဖြင့် နာရီဝက်ကျော်ခန့် တစ်လှည့်စီ လာရောက်ပစ်ခတ်တိုက်ခိုက် ခဲ့သည်။ ရန်သူ၏ မီးဝဗျူဟာနှင့် မြေပြင်မှ လက်နက်ကြီးပစ်ကူများမှာလည်း အဆိုပါနေရာသို့ တောက်လျှောက် ပစ်ခတ်တိုက်ခိုက်နေခဲ့သည်။ ထို့ကြောင့် မိမိတို့ဖက်မှ မီးဝဗျူဟာအား လက်နက်ကြီးများဖြင့် ပြန်လည်ပစ်ခတ်တိုက်ခိုက်ခဲ့သည်။

ရန်သူသည် အဆိုပါနေရာအား ယနေ့ကဲ့သို့သော လက်နက်ကြီးပစ်ကူ၊ လေကြောင်းပစ်ကူများနှင့် အတူ မြေပြင်မှ ထိုးစစ်ဆင်တိုက်ခိုက်မှုကို (၇) ကြိမ်တိုင်တိုင်ပြုလုပ်ခဲ့ပြီးဖြစ်သော်လည်း ရက္ခိုင့်တပ်တော်တပ်ဖွဲ့ဝင်များသည် ပြောင်မြောက်သောသတ္တိ၊ ကြံ့ခိုင်သောတိုက်ပွဲစိတ်ဓာတ်၊ အမိန့်နာခံမှု၊ အတက်အဆုတ်ကောင်းကောင်းဖြင့် ရန်သူ့ထိုးစစ်ကို ဆက်လက်ကြံ့ကြံ့ခံ တိုက်ပွဲဝင်လျက်ရှိသည်။

အမိန့်နာခံမှုကောင်းကောင်းဖြင့် သတ္တိပြောင်မြောက်စွာတိုက်ပွဲဝင်နေကြသော အာရက္ခစစ်သည်တော်များအား လေးနက်စွာဂုဏ်ပြုမှတ်တမ်းတင်အပ်ပါသည်။

သတင်းနှင့်ပြန်ကြားရေး
ရက္ခိုင့်တပ်တော်

Website Link: https://bit.ly/3Uv4bEC
VK Link: https://vk.com/arakanarmyinfodesk

Statement

Website Link: https://bit.ly/3LezxuH
VK Link: https://vk.com/arakanarmyinfodesk

စစ်ကောင်စီတပ်မှ ၎င်းတို့၏ တပ်ဖွဲ့ဝင်များအသက်အန္တရာယ်နှင့် ရင်ဆိုင်နေရချိန် ရဲဘော်ရဲဘက်စိတ်ကင်းမဲ့စွာဖြင့် စွန့်ပစ်ကာ သစ္စာဖောက်သောလုပ်ရပ်အပေါ် စစ်သုံ့ပန်းတစ်ဦးဖြစ်သူ တပ်ကြပ်အောင်အောင် (ကပအမ - တ/၂၁၈၃၄၂) ၏ ဖွင့်ဟပြောကြားချက်

Website Link: https://bit.ly/3BQ36yI
VK Link: https://vk.com/arakanarmyinfodesk

စစ်ကောင်စီတပ်၏ ဂျက်တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် အသက်သေဆုံး၊ ဒဏ်ရာရ ၎င်းတို့၏ တပ်ဖွဲ့ဝင်များနှင့်ပတ်သက်သောသတင်းထုတ်ပြန်ချက်

၂၀၂၂ ခုနှစ်၊ စက်တင်ဘာလ (၂၈) ရက်

ရက္ခိုင်နှင့်ပလက်ဝဒေသတို့တွင် ရက္ခိုင့်တပ်တော်နှင့်စစ်ကောင်စီတပ်တို့အကြားတိုက်ပွဲများမှာ ယခုလအတွင်းတစ်ရက်ထက်တစ်ရက် ပိုမိုပြင်းထန်လာနေပြီး တိုက်ပွဲများအတွင်း စစ်ကောင်စီတပ်ဖက်မှ အထိအခိုက် အကျအဆုံး များပြားခြင်း၊ စခန်းစွန့်ခွာရမှုများခြင်းနှင့်အတူ စစ်ကောင်စီတပ်၏ တပ်ဖွဲ့ဝင်များမှာ ဆက်လက်တာဝန်ထမ်းဆောင်လိုစိတ်မရှိတော့သဖြင့် ရက္ခိုင်၊ ပလက်ဝ စစ်မြေပြင်များ၌ ထွက်ပြေးမှု(တပ်ပြေးမှု)များမှာ တစ်ရက်ထက်တစ်ရက် ပိုမိုများပြားလျက်ရှိသည်။ ထို့အတူ ဤကဲ့သို့ စစ်ကောင်စီတပ်မှ တပ်ပြေးမှုများမှာ တစ်နိုင်ငံလုံးနီးပါး၌ပင် ဖြစ်ပေါ်လျက်ရှိသည်။

စစ်ကောင်စီတပ်ဖွဲ့ဝင်များသည် မိမိတို့ ရက္ခိုင်ပြည်သူ့အာဏာပိုင်အဖွဲ့ ၊ ရက္ခိုင့်တပ်တော်သို့ နီးစပ်ရာမှတစ်ဆင့် လက်နက် (သို့မဟုတ်) လက်နက်မပါဘဲ ဝင်ရောက်လာကြသူများနှင့် မိမိတို့မှ ဖမ်းဆီးရမိထားသော စစ်ကောင်စီတပ်ပြေးများမှာ ယခုအချိန်တွင် အရေအတွက် (၁၅၀) ကျော်အထိ ရှိခဲ့ပြီးဖြစ်သည်။ မိမိတို့အနေဖြင့် ၎င်းတို့ကို ကောင်းမွန်စွာ ထိန်းသိမ်းထားကာ ၎င်းတို့ထဲမှ အချို့ကို ၎င်းတို့သွားလိုသည့်နေရာသို့ အန္တရာယ်ကင်းစွာ ပို့ဆောင်ထားပြီးဖြစ်သည်။

၂၀၂၂ ခုနှစ်၊ စက်တင်ဘာလ (၂၃) ရက်၊ ည (၁၁) နာရီတွင် စစ်ကောင်စီတပ်မှ ဂျက်တိုက်လေယာဉ် (၃) စီးဖြင့် နာရီဝက်ကြာ ဗုံးကြဲတိုက်ခိုက်ခဲ့သောကြောင့် မောင်တောမြို့နယ်အတွင်းရှိ လက်ပံတောင်ကြောပေါ် မှ မိမိတို့၏ အကျဉ်းထောင် (၂) ခုအား ထိမှန်ကာ ယင်းအကျဉ်းထောင်ရှိ စစ်ကောင်စီတပ်သား၊ နယ်ခြားစောင့်တပ်ဖွဲ့ဝင်နှင့် အခြားသောအကျဉ်းသားအချို့သေဆုံး၊ ဒဏ်ရာရရှိမှုများရှိခဲ့သည်။

စစ်ကောင်စီတပ်၏ ပစ်ခတ်မှုကြောင့် ဒဏ်ရာရရှိသွားခဲ့သော နယ်ခြားစောင့်ရဲတချို့နှင့် စစ်ကောင်စီတပ်ဖွဲ့ဝင်တချို့ကို မိမိတို့မှ လူသားချင်းစာနာထောက်ထားကာ ဆေးကုသပေးထားသော်လည်း ဆေးဝါးအခက်အခဲတချို့ကြောင့် တချို့မှာ အသက်သေဆုံးသွားပြီး တချို့မှာဂျက်တိုက်လေယာဉ်မှ ဗုံးထိမှန်၍ရရှိသော ပြင်းထန်ဒဏ်ရာများကြောင့် ဆက်လက်အသက်ရှင်ရန် မျှော်လင့်ချက် နည်းနေသေးသည်။ ၎င်းတို့အသက်ရှင်ရေးအတွက် ၎င်းတို့၏သက်ဆိုင်ရာမိခင်အဖွဲ့အစည်းမှ တာဝန်ရှိပုဂ္ဂိုလ်များထံသို့ ၎င်းပြင်းထန်လူနာများကို အမြန်ဆုံးလာယူရန် အသိပေး အကြောင်းကြား ခဲ့ပြီးဖြစ်သည်။

သို့သော်လည်း စစ်ကောင်စီတပ်သည် တပ်ဖွဲဝင် စိတ်ဓါတ်၊ ရဲဘော်ရဲဘက်စိတ်ဓါတ် ကင်းမဲ့စွာဖြင့် လျစ်လျူရှုထားဆဲဖြစ်သည်။ ယခုအချိန်၌ အဆိုပါ ပြင်းထန်ဒဏ်ရာရသူများမှာ (၅) ရက် ကြာပြီဖြစ်သော်လည်း ၎င်းတို့၏ ရဲဘော်ရဲဘက်များ၏ အသက်ကို ကယ်တင်ရန် ၎င်းတို့၏ မိခင်အဖွဲ့အစည်းမှ ဆက်သွယ်လာခြင်းမရှိသေးသောကြောင့် ထပ်မံသေဆုံးသူ (၁) ဦးရှိခဲ့သည်။

ထို့ကြောင့် မြန်မာ့တပ်မတော်သားများအနေဖြင့် ၎င်းတို့ အသက်စွန့်၍ တာဝန်ထမ်းဆောင် ခဲ့ကြပါသော်လည်း ဒဏ်ရာရလျက် အသက် အန္တရာယ်နှင့် ရင်ဆိုင်ကြုံတွေ့နေရသည့်အချိန်တွင် မိခင်အဖွဲ့အစည်းမှ ၎င်းတို့၏ တပ်ဖွဲ့ဝင်များအပေါ်ရဲဘော်ရဲဘက်စိတ်ကင်းမဲ့စွာ စွန့်ပစ်သည့်လုပ်ရပ်မှာ မြန်မာ့တပ်မတော်ဟုခေါ်သော စစ်ကောင်စီမှ ၎င်းတို့တပ်ဖွဲဝင်များအပေါ်ထားသော သဘောထားအမှန်ပင်ဖြစ်သည်။ တနည်း မိမိရဲဘော်ရဲဖက်အပေါ် တာဝန်ယူမှုမရှိခြင်းပင်ဖြစ်သည်။

လက်ရှိတွင် အဆိုပါဒဏ်ရာရ နယ်ခြားစောင့်ရဲတချို့ နှင့် စစ်ကောင်စီတပ်ဖွဲ့ဝင်တချို့ အသက်ဆက်လက်ရှင်သန်ရေးအတွက် မိမိတို့ ရက္ခိုင့်တပ်တော်မှ မိမိတို့တွင်ရှိသော ဆေးဝါးများဖြင့် အကောင်းဆုံးကြိုးစား ဆေးကုသပေးလျက်ရှိပါသည်။

တာဝန်ခံမှု၊ တာဝန်ယူမှုမရှိသော စစ်ကောင်စီတပ်(မြန်မာ့တပ်မတော်)ထဲတွင် ဆက်လက်တာဝန်ထမ်းဆောင်လိုစိတ်မရှိသော မြန်မာ့တပ်မတော်သားများအနေဖြင့် မိမိတို့နှင့် အနီးဆုံးနေရာသို့ အမြန်ဆုံးဆက်သွယ်နိုင်ပါသည်။

သတင်းနှင့် ပြန်ကြားရေး
ရက္ခိုင့်တပ်တော်

Website Link: https://bit.ly/3BQ36yI
VK Link: https://vk.com/arakanarmyinfodesk

စစ်ကောင်စီတပ်မှ ၎င်းတို့၏ တပ်ဖွဲ့ဝင်များ အသက်အန္တရာယ်နှင့်ရင်ဆိုင်နေရချိန် ရဲဘော်ရဲဘက်စိတ်ကင်းမဲ့စွာဖြင့် စွန့်ပစ်ကာ သစ္စာဖောက်သောလုပ်ရပ်အပေါ် စစ်အကျဉ်းသားတစ်ဦးဖြစ်သူ တပ်သားမြင့်ဆွေ(ကပအမ - လ/၄၀၄၁၉) ၏ ဖွင့်ဟပြောကြားချက်

Website Link: https://bit.ly/3BQ36yI
VK Link: https://vk.com/arakanarmyinfodesk

၂၀၁၉ - ၂၀၂၀ ခုနှစ်အတွင်း ရက္ခိုင်၊ ပလက်ဝဒေသများတွင်ဖြစ်ပွားခဲ့သော တိုက်ပွဲကာလများအတွင်းတွင်လည်း စစ်ကောင်စီတပ်သည် ၎င်းတို့၏ တပ်ဖွဲ့ဝင်များအပေါ် အသက်အန္တရာယ်နှင့်ရင်ဆိုင်နေရချိန် ရဲဘော်ရဲဘက်စိတ်ကင်းမဲ့စွာဖြင့် စွန့်ပစ်ကာ သစ္စာဖောက်ခဲ့သော လုပ်ရပ်အား ယင်းကာလ၌ သုံ့ပန်းတစ်ချို့၏ ဖွင့်ဟပြောကြားခဲ့မှုများ

အပိုင်း (၁)

Website Link: https://bit.ly/3e1hTys
VK Link: https://vk.com/arakanarmyinfodesk

၂၀၁၉ - ၂၀၂၀ ခုနှစ်အတွင်း ရက္ခိုင်၊ ပလက်ဝဒေသများတွင်ဖြစ်ပွားခဲ့သော တိုက်ပွဲကာလများအတွင်းတွင်လည်း စစ်ကောင်စီတပ်သည် ၎င်းတို့၏ တပ်ဖွဲ့ဝင်များအပေါ် အသက်အန္တရာယ်နှင့်ရင်ဆိုင်နေရချိန် ရဲဘော်ရဲဘက်စိတ်ကင်းမဲ့စွာဖြင့် စွန့်ပစ်ကာ သစ္စာဖောက်ခဲ့သော လုပ်ရပ်အား ယင်းကာလ၌ သုံ့ပန်းတစ်ချို့၏ ဖွင့်ဟပြောကြားခဲ့မှုများ

အပိုင်း (၂)

Website Link: https://bit.ly/3e1hTys
VK Link: https://vk.com/arakanarmyinfodesk

၂၀၂၂ ခုနှစ်၊ အောက်တိုဘာလ ပထမ အပတ်အတွင်း ရက္ခိုင်၊ ပလက်ဝဒေသ တိုက်ပွဲများနှင့် မြေပြင်အခြေအနေများ

( ၂၀၂၂ ခုနှစ်၊ အောက်တိုဘာ (၇) ရက်၊ သောကြာနေ့ထုတ်ပြန်သည်)

ရက္ခိုင်၊ ပလက်ဝစစ်မျက်နှာ၌ အထိနာနေသော စစ်ကောင်စီတပ် နှင့် ရက္ခိုင့်တပ်တော်တို့သည် အဆိုပါဒေသများ၌ တိုက်ပွဲများမှာ နေ့စဉ်ရက်ဆက် ဆက်တိုက်ဖြစ်ပွားလျက်ရှိသည်။ ၂၀၂၂ ခုနှစ်၊ အောက်တိုဘာ ပထမအပတ်အတွင်း အောက်ပါနေ့ရက်များနှင့်နေရာများ၌ ဖြစ်ပွားခဲ့သည်။

(၁) အောက်တိုဘာလ (၁) ရက်၊ နံနက် (၉) နာရီခန့်အချိန်တွင် ဖရုံချောင်းရွာအနောက်ဖက်၌ မိနစ် (၂၀) ခန့်ကြာ တိုက်ပွဲ ဖြစ်ပွားခဲ့သည်။

(၂) အောက်တိုဘာလ (၂) ရက်၊ ညနေ (၅) နာရီ (၀၇) မိနစ်တွင် ပလက်ဝမြို့နယ်၊ မြိတ်ဝကျေးရွာ၏ အရှေ့တောင်ဖက် (၃.၈) ကီလိုမီတာအကွာအဝေး၌ မိနစ် (၂၀) ခန့်ကြာတိုက်ပွဲဖြစ်ပွားခဲ့သည်။

(၃) အောက်တိုဘာလ (၃) ရက်၊ နေ့လယ် (၁) နာရီ (၃၀) မိနစ်တွင် ဘူးသီးတောင်မြို့နယ်၊ ကျောက်စာတိုင် (မြိုခမီ) ရွာ၏ တောင်ဖက် (၁.၃) ကီလိုမီတာအကွာအဝေး၌ ဖြစ်ပွားခဲ့သော (၅) နာရီခန့်ကြာ တိုက်ပွဲ (ပြင်းထန်သောတိုက်ပွဲတစ်ပွဲဖြစ်ခဲ့ပြီး ရန်သူ့ဖက်မှ (၁၇) ဦး သေ ဆုံးကာ (၁၅) ဦးဒဏ်ရာရရှိခဲ့ပြီး မိမိတို့ဖက်မှ ရန်သူ့ လက်နက်ခဲယမ်း၊ စစ်အသုံးအဆောင်ပစ္စည်းအများအပြား သိမ်းဆည်း ရမိခဲ့သော တိုက်ပွဲတစ်ပွဲလည်းဖြစ်သည်။

(၄) အောက်တိုဘာလ (၄) ရက်နေ့တွင် မိမိတို့အနေဖြင့် တိုက်ပွဲများမရှိသော်လည်း စစ်ကောင်စီဖက်မှ ရမ်းသန်း ပစ်ခတ် တိုက်ခိုက်မှုများရှိခဲ့သည်။

(၅) အောက်တိုဘာလ (၅) ရက်၊ နံနက် (၉) နာရီ (၅၂) မိနစ်တွင် ဘူးသီးတောင်မြို့နယ်၊ ဂူဒါပြင်(မူဆလင်) ရွာ နှင့် တောင်ရွာ (မူဆလင်) အကြားတွင် မိနစ် (၃၀) ကြာတိုက်ပွဲ ဖြစ်ပွားခဲ့သည်။ ထို့အတူ အောက်တိုဘာ (၆) ရက်နေ့၌လည်း ဤပတ်ဝန်းကျင်၌ နှစ်ဖက်တိုက်ပွဲများ ဆက်လက်ရှိခဲ့သည်။ နှစ်ရက်တာတိုက်ပွဲအတွင်း ရန်သူ့ဖက်မှ မျက်မြင် (၁၀) ဦး သေဆုံးပြီး နောက်ထပ် (၁၀) ဦးခန့် ဒဏ်ရာရရှိခဲ့သည်။

(၆) အောက်တိုဘာ (၇) ရက်နေ့၊ နေ့လယ် (၁၂) နာရီ (၂၂) မိနစ်တွင် မင်းပြားမြို့၊ ကြပ်စင်တံတား၌ စခန်းချပြီး ပြည်သူလူထုကို ဒုက္ခပေးနေသော စစ်ကောင်စီတပ်ဖွဲ့အား မိမိတို့မှ ဝင်ရောက်တိုက်ခိုက်ခဲ့သည်။ ဤတိုက်ပွဲအတွင်း ရန်သူ့ဖက်မှ မျက်မြင် (၈)ဦး သေဆုံးပြီး၊ နောက်ထပ် ဒဏ်ရာရသူတချို့လည်း ရှိခဲ့သည်။ ရန်သူသည် တောင်မော်ဦး (မယ်တော်တောင်)နှင့် ကြပ်စင်တံတားအနီး ယာယီတပ်စွဲထားသည့် နေရာမှ အနီးအနားရှိ ရပ်ရွာများသို့ လက်နက်ကြီးများဖြင့် (၂၅) ကြိမ်ခန့် ရမ်းသန်းလှမ်းပစ်နေခဲ့ရာ လက်နက်ကြီး ကျည်ကျရောက် ပေါက်ကွဲ၍ အပြစ်မဲ့ပြည်သူ (၆) ဦးလည်း ထိခိုက်ဒဏ်ရာများ ရရှိခဲ့သည်။

ယင်းအပြင် ရန်သူသည် အောက်တိုဘာလ (၇) ရက်နေ့ နံနက် (၁) နာရီ အချိန်ကလည်း မောင်တောမြို့နယ် မြောက်ပိုင်း ဝေလာတောင်တန်းတဝိုက်နေရာများ၌ ဂျက်တိုက်လေယာဉ် နှစ်စီးဖြင့် ဗုံးကြဲတိုက်ခိုက်မှုများကို လုပ်ဆောင်ခဲ့သေးသည်။

ထို့အတူ အထက်ဖော်ပြပါတိုက်ပွဲဖြစ်ပွားခဲ့သောနေရာများ၌ နှစ်ဖက်အပြန်အလှန် ပစ်ခတ်တိုက်ခိုက်မှုများ နှင့်အတူ တိုက်ပွဲငယ်များမှာ ရံဖန်ရံခါရှိခဲ့သောကြောင့် အောက်တိုဘာလ၊ ပထမပတ်အတွင်း တိုက်ပွဲကြီး (၁၀) ကျော် နှင့် တိုက်ပွဲငယ် (၁၀) ကျော်ရှိခဲ့သည်။ ၎င်းတိုက်ပွဲများအတွင်း ရန်သူဖက်မှ (၄၀) ဦး သေဆုံးခဲ့ပြီး၊ နောက်ထပ် (၂၅) ဦးထက်မနည်း ဒဏ်ရာရရှိခဲ့သည်။ မိမိတို့ဖက်မှလည်း ထိခိုက်ဒဏ်ရာရသူ အချို့နှင့် ကျဆုံးသူအချို့ရှိခဲ့သည်။ တိုက်ပွဲများအတွင်း ထူးချွန်ပြောင်မြောက်စွာ တိုက်ပွဲဝင်ခဲ့ကြသည့် အာရက္ခစစ်သည်တော်များအား လေးနက်စွာဂုဏ်ပြုမှတ်တမ်းတင်အပ်ပါသည်။

ရန်သူသည် လက်နက်ကြီးများကို -

(က) ဘူးသီးတောင်မြို့နယ်၊ လက်ဝဲဒက်ကျေးရွာ၏အနောက်တောင်ဖက် (၁.၂) ကီလိုမီတာခန့် အကွာအဝေး၌ရှိသော (၃၇၈) အမြောက် တပ်ရင်း၊

(ခ) ဘူးသီးတောင်မြို့နယ်၊ တင်ဆက်ရွာအနီးရှိ တပ်မ (၂၂) လက်အောက်ခံ၊ ခမရ (၂၁၀) တပ်ရင်း နှင့် ကြာညိုပြင်တံတားအနီးရှိ၊ တပ်မ (၂၂) လက်အောက်ခံ (၂၀၉) တပ်ရင်း၊

(ဂ) ဘူးသီးတောင်မြို့နယ်၊ လသာ (မူဆလင်) ကျေးရွာ၏ အနောက်ဖက်၊ မီတာ (၅၀၀) ခန့် အကွာအဝေး၌ရှိသော နခခ (၈) နှင့် နခခ (၆) အင်းဒင် နယ်ခြားစောင့်တပ်စခန်းများ၊

(ဃ) မောင်တောမြို့နယ်၊ ကြိမ်ချောင်း (၂၄) ဂိတ်၊

(င) ရသေ့တောင်မြို့နယ်၊ ရေစိုးချောင်းဗျူဟာကုန်း၊

(စ) ရသေ့တောင်မြို့နယ်၊ ချိန်ခါလိန်ကျေးရွာအတွင်းရှိ၊ နခခ (၄) လက်အောက်ခံ၊ ချိန်ခါလိန်ရဲစခန်း၊

(ဆ) ကျောက်တော်အခြေစိုက် ခမရ (၅၃၉) တပ်ရင်းနှင့် ဆနွင်းတောင်ကုန်း၊ စကခ (၉) ကျောက်တော်၊

(ဇ) မြောက်ဦးမြို့နယ်၊ သင်းကျစ်တောင်ဗျူဟာကုန်း၊

(စျ) မင်းပြားမြို့နယ်၊ ကျိန်းတောင်ဘုရားကုန်း၊ တောင်ဦးစခန်းကုန်း၊ ကျီးကန်းတောင် ( ပွိုင့် ၇၁၉ ဗျူဟာကုန်း) နှင့် မင်းပြားမြို့ အခြေစိုက် ခမရ (၃၇၉) ၊ ခမရ (၃၈၀)၊ ခမရ (၅၄၁) တပ်ရင်းများ၊

(ည) ပလက်ဝမြို့နယ်၊ မီးချောင်းဗျူဟာကုန်း၊

(ဋ) စကခ (၉) ၊ (၁၅) လက်အောက်ခံ တပ်ရင်းဌာနချုပ်များရှိသည့်နေရာများ မှ ပစ်ခတ်တိုက်ခိုက်ခဲ့သည်။

စိတ်ဓာတ်ပိုင်းဆိုင်ရာ ယိုယွင်းပျက်စီးပြီး အနိမ့်ဆုံးအဆင့်သို့ ရောက်ရှိနေသော စစ်ကောင်စီတပ်သည် တိုက်ပွဲဖြစ်ပွားနေသည့် နေရာများရှိ ၎င်းတို့၏ လှုပ်ရှားတပ်ရင်းများမှနေ၍ လက်နက်ကြီးများဖြင့် တိုက်ပွဲဖြစ်သည့်နေရာများသို့သာမက မည်သည့်တိုက်ပွဲ ဖြစ်ပွားခြင်းမျှ မရှိသည့်နေရာများသို့ပါ ပစ်ခတ်တိုက်ခိုက်လျက်ရှိသည်။

အောက်တိုဘာလ၊ ပထမပတ်အတွင်း ရန်သူ့ဖက်မှ မည်သည့်တိုက်ပွဲမျှ ဖြစ်ပွားခဲ့ခြင်းမရှိဘဲ လက်နက်ကြီးများဖြင့် အချိန်မတော် နေ့၊ ညမရွေး ရပ်ရွာများကိုပစ်မှတ်ထား ဦးတည်တိုက်ခိုက်မှုကြောင့် ရွာ (၁၃) ရွာထိခိုက်ခဲ့ကာ၊ အိမ် (၁၄) လုံးပျက်စီး၍ လူ (၁) ယောက် သေဆုံး၊ (၉)ယောက် ထိခိုက်ဒဏ်ရာရပြီး၊ နွား (၃) ကောင် သေဆုံးခဲ့ရသည်။

ယင်းအပြင် စစ်ရေး၊ နိုင်ငံရေး အဖက်ဖက်၌ ချွတ်ခြုံကျလျက်ရှိသော စစ်ကောင်စီတပ်သည် သံတွဲ၊ တောင်ကုတ်၊ မာန်အောင်၊ ရမ်းဗြဲ၊ ကျောက်ဖြူ၊ အမ်း စသည့်မြို့နယ်များမှ အပြစ်မဲ့အရပ်သား ပြည်သူများအား အပြစ်မရှိအပြစ်ရှာကာ အရှိန်အဟုန်မြှင့် ဖမ်းဆီးလျက် ရှိနေသည်။

စစ်ကောင်စီတပ်သည် ၎င်းတို့အထိနာတိုင်း လုပ်လေ့လုပ်ထရှိသော လုပ်ရပ်များကို ပြုလုပ်ရင်း စစ်ရာဇဝတ်မှု၊ လူသားမျိုးနွယ်အပေါ် ပြစ်မှုကျူးလွန်ခြင်း၊ လူ့အခွင့်အရေးချိုးဖောက်ခြင်းများကို ဆက်တိုက်ပြုလုပ်လျက်ရှိသည်။ ဖြတ်လေးဖြတ်ဟူသော ခေါင်းစဉ်အောက်တွင် ပြည်သူလူထုများ၏ စားဝတ်နေရေး၊ အခြေခံစားသုံးကုန်များ၊ ဆေးဝါးများအပါအဝင် မရှိမဖြစ်သော အခြေခံလူသုံးကုန် ပစ္စည်းများသယ်ယူခွင့်မရအောင် ကုန်းလမ်း၊ ရေလမ်းများအား တင်းကျပ်စွာပိတ်ဆို့လျက် ပြည်သူများ အငတ်ဘေး မဆိုက်ဆိုက်အောင် လုပ်ဆောင်လျက်ရှိသည်။

စစ်ကောင်စီတပ်၏ ယခုကဲ့သို့ ပြည်သူများအပေါ် လူမဆန်စွာ ဖမ်းဆီး နှိပ်စက်သတ်ဖြတ်ကျူးလွန်နေခြင်း၊ ပြည်သူလူထုများကို အဓိကပစ်မှတ်ထား၍ ဦးတည်တိုက်ခိုက်နေခြင်း၊ ရက္ခိုင်နှင့်ပလက်ဝရှိ ၎င်းတို့၏တပ်စခန်းများသို့ စစ်အင်အား၊ လက်နက်ခဲယမ်းများကို အဆမတန်ဖြည့်တင်းနေခြင်းတို့ကြောင့် ရှေ့ရက်များတွင်လည်း ရက္ခိုင်နှင့်ပလက်ဝဒေသများ၌ တိုက်ပွဲများမှာ နေရာအနှံ့ ဆက်လက် ဖြစ်ပွားလာနိုင်ပါသည်။

သတင်းနှင့်ပြန်ကြားရေး
ရက္ခိုင့်တပ်တော်


Website Link: https://bit.ly/3yn7wvQ
VK Link: https://vk.com/arakanarmyinfodesk