راح اشيل الراية واعتني مشايه
=====================
اليوم اعلن خلي تسمعني المله
كون كَبر حسين ماشي اوصله
ضعن زينب انه اريد استقبله
تجي لزيارة اخوها ابكربلا

النيه صارت هايه واعتني مشايه
====================
ما منعني الخوف ما هماني
بجنة احسين السَنة تلكَاني
لو تعبت من المشي وأذاني
هناك ابو السجاد يتلكَاني

هدف عندي وغايه واعتني مشايه
=====================
اكَصد حسين العهد خطيته
العالم ابكبره أنه اتحديته
لون انطي العمر ما وفيته
احسين نص كَلبي انه خليته

مال اعوفه احجايه واعتني مشايه
====================
روحي لحسين اشكثر مشتاكَه
غالي حيل وصعب والله افراكَه
نار هجره ابكل وكت حراكَه
الناس كلها ابكربله تتلاكَه

كعبته مسمايه واعتني مشايه
====================
نِحسب ايام السنه ضلينه
الاربعينيه اشوكت تلفينه
للمشي متلهفه رجلينه
للزياره وحق علي اشتاكَينه

الها احِن اهوايه واعتني مشايه
====================
اندعي كل يوم رب العالمين
كون ازور حسين يوم الاربعين
ارفع الرايه واصيحن ياحسين
نزور ابو اليمه نظل امعاهدين

لكربلا عنايه واعتني مشايه

===================

الشاعر حسن بشير السوداني


https://telegram.me/aabas78
قصائد لكل ايام محرم اشترك بالقناة

للاربعين جديد
الـيــوم أجـــت كــل الــحــــــرم ... عــاالـكَــبــر تـبـجــــي بــألـــــم
تـصـيـــح بــاالــونّـــه الــشـجــيّـــــــه
ويـــن حــمّـــــــاي الــحــمــــيّــــــــــه
يــاحُــسـيــن - يــا حُــسـيــن - يــا مـظــلــــــوم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الـيــوم أجـت مـن الـسـبــي وعـلـى كَـبــر أبــن الـنـبــي
كـلـّـهــن أنــجـمـعـــن بـنـــات الــهــــــادي
تـبـجــي بـاالـون والـقـهــــر تـشـكــي مـن ظـيـم الـسـفـر
بــجـــمـــــــرة آلام الـعــــذاب تــنــــــــادي

ويـن حــمّــاي الـحـمــــــه ... والــدمــع صـــب أبّــدمـــه
هــاالـوصــــل ضــعـــن الـــزجــيّـــــه
ويـــن حــمّـــــــاي الــحــمــــيّــــــــــه
يــاحُــسـيــن - يــا حُــسـيــن - يــا مـظــلــــــوم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

شــوف يـبـن الـمـرتـضــى بـاالـكَـلـب سـهّـمـك مـضــه
مـن غـيـابـك هـاالـحــرم هـضّـمـــوهــــــا
شـافــت هـمــوم وبــلــــــه يـا فـحــل مـن كــربــلــــــه
لـديــــرة الـغــربــــه بـهـظـــــم ودّوهــــــا

تـمـشــي وسّـيـاط الـشـمـــر ... ورّمــت مـتـــن الـخِـــــــــدر
وأنـت عــاالـغــبــــــره رمـــيّـــــــــــه
ويـــن حــمّـــــــاي الــحــمــــيّــــــــــه
يــاحُــسـيــن - يــا حُــسـيــن - يــا مـظــلــــــوم
عــافــتـــك فــــوكَ الــتـــرب أمـخـضّـب ودمّـــك يــصـــب
وراســك بــراس الــرمـــح ويّــــاهـــــــه
مـن بـلــد تـمّـشــي لـبـلــــد أنـشـل كَـلـبـهــه وأنّـمـــــرد
جـيــش أمـيّــه بــس هــظـــم راواهـــــــه

شـوف باالـشـام أشـحـصـل ... والـظـعــن لـمّـن وصـــــــل

مـن دخــــــل لـبـــن الـــدعــيّـــــــــــه
ويـــن حــمّـــــــاي الــحــمــــيّــــــــــه
يــاحُــسـيــن - يــا حُــسـيــن - يــا مـظــلــــــوم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
شـافــت أيــزيـــد أللّـعـيـــــن بـيـده راســك يــا حُـسـيـــــن
بـالـعـصـا يـضّـرب يـحـيـف أشّـفــافـــــه
صـاحـت بـصــوت ودمــــــع عـسـى جـفـّـــك تـنّــكَـطـــــع
شــوف أوّصــــاف الـنـبــي أوّصــافـــــه

شـيــل أيــدك يـا نـــــذل ... هـذاأبـن خـيــر الـعـمـــل

ريــتـــه حــي بـهـــــل الـمــســيّـــــــه
ويـــن حــمّـــــــاي الــحــمــــيّــــــــــه
يــاحُــسـيــن - يــا حُــسـيــن - يــا مـظــلــــــوم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الـيـوم أجـن مــن الـغــرب يـا فـحـل مـدّمـي الـكَـلــــب
جـابــن الــــرووس وأجـــن شــجّـــايـــــه
بـأرّبـعـيـنــك مــن أجــــــن بـاالـقـهــر والـهـم لــفـــــن
عـاالـكَـبــــر صـاحــن يــحـامـي الـثــايـــــه

يـاالـعـفـتّـنـه بـهـاالـمـحــن ... كَــوم ردّنــــه لـلــــوطــــن

شــفــنــه بـاالـشـــام الــمــنــيّــــــــــه
ويـــن حــمّـــــــاي الــحــمــــيّــــــــــه
يــاحُــسـيــن - يــا حُــسـيــن - يــا مـظــلــــــوم

الشاعر السيد علاء الحيدري


https://telegram.me/aabas78
قصائد لكل ايام محرم اشترك بالقناة

مِن عاوِدَت مِن الشَّام..ومِن وصلت الولياهه
زينب على گبر حسين..صَبَّت دمع عيناهه
ومن كثر مامشتاگه...حَنَّت اوياهه الناگه
صبت دمع عيناهه

اليسمع ردت امن الشام مَحنيَّه
حَگَّه ايگول زينب هِيَّه مو هِيَّه
الفگدت كل اهلهه ومشت مسبيه
زين وطوّلت للأربعينيه
أم الخدر والنوماس..ذبحتهه طبت الكوفه
زين وبگت عدهه انفاس...زين ودربهه اتشوفه
مِنهه الدَّلاَل اشباگه...حنت اوياهه الناگه
صبت دمع عيناهه

خَذَو درب الطفوف وسارو ابهِمَّه
وزينب نادت السجاد ياعمَّه
خَبِّرني اعله گبر حسين ابو اليمه
تره گلبي بعد ماينحمل هَمَّه
ياروحي مليانه اجروح..شبعت هظم ياروحي
من اشكي يم الوليان..بلچن تهيد اجروحي
نار اليسر حراگه...حنت اوياهه الناگه
صبت دمع عيناهه

زينب هاي بنت اليامن ادخيله
تالي اميسَّره والمدمع اتسيله
رَدَّت من سبيهه احمولهه اثجيله
لخوهه اتريد عن الصار تشكيله
صاحت علي يالسجاد..ياعَمَّه شو دلِّيني
گاللهه ياهو اتريدين...گالتله اريد حسيني
واشلون صار املاگه...حَنَّت اوياهه الناگه
صبت دمع عيناهه

وصلو كربله واگبورهم لاحت
واعله الناگه زينب وَنَّت او ناحت
وصلت للحسين وعالگبر طاحت
على الدنيا العفه ياهيبتي صاحت
يحسين لا تسألني...عن بنتك العفناهه
ماتت رقيه وبالشام...ياخويه خليناهه
ذاب الگلب بَشواگه...حنت اوياهه الناگه
صبت دمع عيناهه

كل حرمه الوليهه عقدت اقرايه
ومشو بجروحهم للعلگمي ومايه
كلهه اتصيح ها ياصاحب الرايه
هاي اضعونكم من اليسر جايه
زينب تدگ اعله الراس...ياخويه ياوالينه
لرض الوطن ياعباس...ياريتك اترد بينه
واعليهه طال افراگه...حنت اوياهه الناگه
صبت دمع عيناهه

سيد علي الموسوي


https://telegram.me/aabas78
قصائد لكل ايام محرم اشترك بالقناة

وصلت ام الحزن عشرين بصفر (موشح)

وصلت أم الحزن عشرين بصفر
الگبر أخوها حسين مَحْنيَّة ظهر

أجت زينب كربله بنوح أوونين
صاحت شحالك يبو گلب الحنين
وياي راسك جبته يوم الاربعين
جسمك أموذر صدگ تحت الحفر

صاحت ابدونك يبن خير العمل
مثل وجهك بالشمس وجهي ذبل
چم خرابه بنوگنه الحادي نزل
اتشَفَّه چتالك ابلوعتنه ابتشر

من رحت بيه  الدهر ياخويه مال
وحالي بعدك بالأسر مامثله حال
بعد لتظن زينب أنا أم الدلال
أم الحزن والظيم بعدك والقهر

جيش مايرحم عگب عينك لفه
لاظمير العدهم    ولاعاطفه
ياوكت نسوان تمشي مچتفه
وبدربنه الناس ترمينه ابحجر

خويه بعدك بينه ماواحد رحم
خويه شحچيلك على الجيش الهجم
وعلى متوني الزرگه لوحال الحرم
لوعليل بهظم دلاله انفطر

راح اروحن للمدينه شلون أطب
روحي يمك ظلت وظل الگلب
ريت يلفي الموت ماكمل الدرب
ولا امر بالدار اموتن بالسفر

الشاعر حسن لعيبي الحريشاوي


https://telegram.me/aabas78
قصائد لكل ايام محرم اشترك بالقناة

الخدم صاحت ياهله
بلي گاصد كربله

مشايه مشايه

~

أمن البحر للنحر مصطفه الخدم
بكل شبر موكب يرف به العلم
بيهم امن الطف احس جمرة خيم
وكل تعبهم راحة الزاير نعم

تراب جدمه تقبله
بلي گاصد كربله


مشايه مشايه

~~

من سنه لداير سنه يزيد العدد
بيا علي ويا فاطمه تنادي مدد
فتحو بيوت وگلبهم عالعهد
لأن يستقبل الخادم اي بلد

يا دلال ادلاله
بلي گاصد كربله

مشايه مشايه

~

ترحب بزوار الحسين الشهيد
عدها حب حسين بالدم بالوريد
كلمن يضوگ العذب يلعن يزيد
الخدم بالمشايه عتقت جم عبيد


تلگو اجم قافله
بلي گاصد كربله

مشايه مشايه

~~~

عيونهم ما نامت أيام المسير
گلوبهم لو شافت الزاير تطير
من الفرح فتحو بيوت الهم حرير
صاحو الزاير لبو اليمه أمير


خبلو كل المله
بلي گاصد كربله

مشايه مشايه

~~~

الزاد والجاي المهيل جهزو
محزمين براية العباس اخو
حسين ما ينساهم الي يخدمو
بساط فرشو روحهم للي اجو


تنادي يا مية هله
بلي گاصد كربله

مشايه مشايه

~~~~

ادلل الزاير دلال انشوفها
من البيشه لكربله معروفها
بساق عرش الله أربع اهيه حروفها
حاء سين وياء نون انطفوها


كعبه حلها المساله
بلي گاصد كربله

مشايه مشايه

~~~

لخادم الحسين عليه السلام
وخادم خدام الحسين ومشاية الحسين عليه السلام
عمار المنصوري


https://telegram.me/aabas78
قصائد لكل ايام محرم اشترك بالقناة

بسرعه خلصن * شهر عاشور وصفر
خوفي ترحـل * ياحبيبي المنتظـر
باقي بس يوم الرســول
خايـف غيابــك يطــول
وين اشوفك * وين اشوفك
ــــــــــــــــــــ
مو لساني يخاطبك گلبي الشجي
خاف مــا عيشن بعد عـام اليجـي
لهالسبب جيت اعله بابك ارتجي
اعليك ضـلع الرضّه حافر اعوجي

العشره الاولى * ندري تگضيها لطم
ولذلــــك * كـل محـرم بــي طـعـم
خاف هالنعــمه تـزول
خايف غيابك يطــول
وين اشوفك * وين اشوفك
ـــــــــــــــــــــ
ويوم عاشر ادري بي تشبع الم
انته گايلها دموعك تجـــري دم
گوه بالركضه تشيل انته الجدم
بعده يخنگ بيك دخان الخيــم

وي ركضتك * خطوه خطوه تضل تعد
ومن ضريحه * يصيحلك عبد الله رد
تأخرت يمته الوصول
خايف غيابك يطــول
وين اشوفك * وين اشوفك
ـــــــــــــــــــــ
ثاني عشره اگضيتها تنوح وتــون
نحت من يوم اهدعش لــم الحزن
وندري يوم اثلطعش بي ممتـحن
احضرت وي زين العباد انته الدفن

وبدفنتـــــه * اضــن ايدك حـاضـره
بصلب جدك * وانته تبچي لخنصره
شگد عليه مرّن خيول
خايف غيابك يطــول
وين اشوفك * وين اشوفك
ــــــــــــــــــــــ
ادري ثالث عشــره وين توجهت
بوسط هاي العشره للغرقد رحت
يم گبر زين العبــاد انتـه گصــدت
بس صحن ماكو لعد وين گعــدت

أرد اسألك * لچــن كاتلـنــي القهـــر
گبره طفته * شلون طفت اعله الصخر؟
انته زرته احنه شــنگول
خايف غيــابك يطــــول
وين اشوفك * وين اشوفك
ــــــــــــــــــــــ
اول العشــره بصفـر لمن يهـــل
موعــدك للشــــام لازم تنـــتقل
يم رقيه تفك اديها من الحــبل
زغيره عمتك عالهجر ما تحتمل

و ابو محمد * يوم سابع ليه ترد
وبالمديــنه * للمآتـــم تســتـعد
وهم تمر اعله عالبتول؟
خايف غيابك يطـــول
يمته اشوفك * يمته اشوفك
ـــــــــــــــــــــــ
وترجع وتلگه المواكب تنّصـب
وتبقى عينك بس تباوع عالدرب
باربعــين حسين عمتك من تطب
تضمها بعيونك عن عيون الغــرب

وانته بيدك * تترس الشارع عبــي
حتـــى زيـنب * تنســى ايام السبي
لأن عمتك بت أصول
خايف غيابك يطــول
وين اشوفك * وين اشوفك
ــــــــــــــــــــــــ
بهذن كلهن جفني صاحي وماغــفه
وشمعي ضل يتاني تحضــر ما طفى
دخيل عندك بس وفاة المصطفى
رايـــدك بـــس هالعــــزاء تشــــرّفه

راح اخلي * عيون گلبي مركـّـزه
بلكي اشوفك * لان هذا آخر عزه
الورد ما يحمل ذبـول
خايف غيابك يطـول
وين اشوفك * وين اشوفك
ـــــــــــــــــــــــــــ


الشاعر مهدي التقي


https://telegram.me/aabas78
قصائد لكل ايام محرم اشترك بالقناة

انتظرونا قريبا نشر قصائد استشهاد الرسول صلى الله عليه واله وسلم
https://telegram.me/aabas78

يامحمد منك انريد البشاره
من حسينك هسه خلصّنه الزياره
وابمصابك نختم ازيارتنه اجينه
***
نخدم وكل شيعي منّه بگلبه كاتب
خدمة اهل البيت من اعلى المراتب
رافضيه وما ندوّر عالمناصب
عدنه افضل رتبه خادم بالمواكب

ماكو نفسه هالفخر لاماكو نفسه
غالي تاج الخدمه هنياله اليلبسه
يعله صيته وبالحشر ماتبچي عينه
****
عدنه يرفع راسه اليصيحوله خادم
هذا ياهو الاكرم امن اهل المآتم
احنه لو ضيف الحسين نشوفه قادم
مو فرس نذبح عمرنه شنهو حاتم

تشهد اعلينه المگابر لو خدمنه
مو فقط ماي بثوابه ننطي دمنه
كنه فدوه للحسين وأربعينه

*
عدنه للخدمه عشگ ماكو مثيله
اشما تطول ايامهه انحسهه قليله
تدري باخر ليله عدنه اشگد ثگيله
چنهه ليلة وحشه وشلون العقيله

ليله وحشه يانبينه ليله وحشه
هذا ياطير الينام ابلايه عشه
وانت تدري احنه بمواكبكم ربينه
***
كلهه تبچي الخدم بالليله الاخيره
ياحسافه خلصت ابساع المسيره
احنه حته عيوّنه مليانه غيره
تعشگ الزوار والباقي ضريره
شنهو حاله الفارگ اهله شنهو حاله
ما تجف ادموعنه اشلون الثكاله
بلكي نجبر خاطر الزهره ابچينه
**
فرگة الزوار صعبة وانت تشهد
عدنه اصعب شي نشوفه يامحمد
من نطب للموكب ومانلگه احد
حيلنه ويالموكب امن انهده ينهد

طحنه من ثگل الهجر لا ماتعبنه
الله يدري للحسين اشكبره حبنه
صعبة والفارگ حبيبه الله يعينه
**
الشاعر وليد العكيلي


https://telegram.me/aabas78
قصائد لكل ايام محرم اشترك بالقناة

موشح للرسول
،،،،،
اليوم هاشم خل تصيح احزانها

راح ابو ابراهيم سيد اكوانها

...............................

راح ابو ابراهيم سيد الانبياء

الارض صاحت يامحمد والسماء

بهالمصيبه تعزي اصحاب الكساء

والدمع من كل كتر نيشانها

....................

. الدمع لمن يون يرسم صور

وعلى كل خد يترك لحزنه اثر

آه واويلاه ياسيد البشر

امتك صار الدمع عنوانها
.
.................

. امتك يالهادي ضلت للدمع

اختلف عكبك يبو ابراهيم الوضع

وراح ابدي وياك من كسر الضلع

من ضلع فاطمه ونوح اشجانها

................

من ضلع فاطمه ضلوع مكسره

بيها يالمختار گلبك مادره

بلوعة المحراب صابو حيدره

وردت الكوم لهبل ووثانها .

..................

نكرت وصييّتك عُباد الوثن

ودار يالهادي على العتره الزمن

من عكب حيدر يغدرون الحسن

يسمونه بالغدر عدوانها

....................

يارسول الله بالطف الدموع

على كل خد صارت احزان وتلوع

هناك من حسين مهشومه الضلوع

مصيبه يسعر بالگلب بركانها

...............

زينب اعله الحزن ضلت حايره

راحو اخوتها الگلب شيصبره

تصيح وينك آ يسبع الكنطره

وكلها نومه اعله الارض وليانها

الشاعر جواد الخطيب


https://telegram.me/aabas78
قصائد لكل ايام محرم اشترك بالقناة

لا تسافر -- بويه وتخليني
لاتسافر - وانته كل اسنيني
والله اموت ابلا ضواك ▪▪ ورده واحتاج الهواك
بويه بويه
- - - - - - - - - - - - - - - - - - - - - - - - - - - -
1 ) يلي ماشي ---- ابعيد عني --- والله بفراكك دمع يشبك دمع
حال شمعه - اكليبي بعدك -- ونار هجرك تأكل ابروح الشمع
من عفتني -- يامحمد --- دنيتي ابفكدك احس كسرت ضلع
يلي رايح - - وين اروحن ---- وانته تعرف بويه بعدك انفجع
☆ اه يروحي - ابياوكت نتلاكه ▪ اه يروحي - والله الك مشتاكه
كلبي ظل يركض وراك ▪▪▪ ورده واحتاج الضواك
بويه بويه
- - - - - - - - - - - - - - - - - - - - - - - - - - - -
2 ) ابعيني ظلمه - الدنيه صارت --- والجروح امرادف ابهذا القهر
ياغلاتك - تدري عندي -- ومن غبت بين على اجفوني السهر
بويه ارجع - كمت اصيحن - الخاطر اعيوني الصفت بعدك نهر
ابغربه روحي - جنها ظلت - اوجن أعيش ابغيبتك بويه ابخطر
☆ بلكي ترجع - حتى تغفه اجروحي ▪ بلكي ترجع - يااعز من روحي
الدنيه تذبحني ابجفاك ▪▪▪ ورده واحتاج الهواك
بويه بويه
- - - - - - - - - - - - - - - - - - - - - - - - - - - -
3 ) أمن البواجي --- بيه تدري ---- فارك اعيوني أو رحل عنها الضوه
يالعفتني --- أنفاسي ضاكت---- والهوه ابغيرك فلا جنه هوه
أمنيتي اسمع ---- هسه صوتك ------ واسمع احجاياتك الجانت دوه
أنه ورده ---- أومن ربيعك ----- غصني يابويه احس توه ارتوه
☆ ماتردلي -- اوتسمع احجاياتي ▪▪ ماتردلي -- ماغفت حسراتي
اعيوني متفارك كفاك ▪▪▪ ورده واحتاج الهواك
بويه بويه
- - - - - - - - - - - - - - - - - - - - - - - - - - - -
4 ) امنيتي بويه -- ابداري اشوفك --- واحجي وياك أو اسولف عالجرح
الماتركني ---- اوكام يكبر ----- اومايخلي اجفوني تطبك للصبح
أومن اصيحن ----- اه يغالي ----- ايكوم يطعني مثل طعن الرمح
وين اروحن ---- واشكي حالي ---- بويه مثلك بالأرض ماظن يصح
☆ يمته اشوفك - يلي ساكن بالي ▪▪ يمته اشوفك - وانته تدري ابحالي
صعبه أعيش ابلا سماك ▪▪ ورده واحتاج الهواك
بويه بويه
- - - - - - - - - - - - - - - - - - - - - - - - - - - -
5 ) بيه حركه -- اتهد رواسي --- أمن الحزن بكليبي يالغالي انشتل
وحشه دارك --- من عفتها --- اوجفني بفراكك يبو الغيره ذبل
شرد اوصف --- حالي بعدك --- والحزن من شاف دمعاتي خجل
اشسوه دهري --- ابليل هجرك --- وبرحيلك بيه يالغالي اشعمل
☆ كلمه عندي -- اوحكي من احجيها ▪ كلمه عندي -- ابروحي ماخليها
الدنيه ابجيها ابعزاك ▪ ورده واحتاج الهواك
بويه بويه
- - - - - - - - - - - - - - - - - - - - - - - - - - -
خادم أهل البيت - أبو أحمد المجراوي


https://telegram.me/aabas78
قصائد لكل ايام محرم اشترك بالقناة

نزله الوفاه الرسول محمد (ص)


تجرح دليلي بروحــتك .......يالغالي
وضلمه الحياة بــغيبتك.......... يالغالي
___
نهل الدمع وبفركتك ياصعب الوداع
باجر تروح وماتضل تمشـي ع الكاع
ماتدري عمري ياجرح بين اليتم ضاع
مو هاذا وعدك والعهد ياحلو الطباع


صعبه اليعشي بفركتك................ يالغالي
وضلمه الحياة ابغيبتك............... يالغالي
___

صبعه اليعيش ابفركتك ومرافج الموت
المن مشيت بهل المسه ماتسمع الصوت
باجر على داري العـدو ياوالدي ايـــفوت
بااليل اليجــن ياوالدي يطلـــعلي تابوت


تانيني فدوة امروتك. ............ يالغالي
وضلمه الحياة بغيبتك...................يالغالي
__

حـــــيرني دهرك والهجــر يافكد العزاز
مشتاقكه بويه الشوفتك وكليبي محتاز
الحــــيدر علي جنت السند صايرله عكاز
عن دينك وذاك الشــرع صاحـبنه منحاز

خان لوعد وي صحبتك.............. يالغالي
وضلمه الحياة ابغيبتك.............. يالغالي
___
تفرح سمانه والارض تبجي على الصار
حان الوداع ويه الدمع صايرالي مدرار
هليــــله مو مثل الاأجن ســترك يستار
شفت البــجي ويه الحزن يـتملك الدار

مابيه حيل الوحشتك ........ يالغالي
وضلمه الحياة ابغيبتك........... يالغالي
___
وحشه اليالي ياضوة ولــيلي فلا انام
نوح وبجي لوجه الصبح ياولدي دام
ادري غيابك مو سهل جن طعنت اسهام
انته الامل وانته الامل يافخـــر السلام


انته الامـــل البــــنيتك.......... يالغالي
وضلمه الحياة ابغيبتك............يالغالي
____


خادمكم مرتضى مكطوف


https://telegram.me/aabas78
قصائد لكل ايام محرم اشترك بالقناة

مقدمه للرسول الاعظم محمد (ص)

يـا محـمد يـا نبيـــنه ــ يصعب امصابك علينه

يا حبيب الله مصابك حيل أذانه وفجعنه
لجلك انقـيم المئـاتم ونلطم ونهمل دمعنه
ابمجلسك يابوالزچيه الله وفقنه وجمعنه
مانعوفك تدري بينه ــ يصعب امصابك علينه


العـالـــم بأســره ينــادي لا تســـافر يـا محمد
جمرة اغيابك چوتنه سيـدي ومالحضه تخمد
بعدك اجروح المصيبه بالگلب ماضنهه تضمد
اصبحت ظلمه المدينه ــ يصعب امصابك علينه


حضرت الزهره ابعزائك تلطم ومحني ظهرهه
اهـواي أذاهـه مصـابك اشـد من لوعة كَسرْهه
ليلة اوداعك مئاسي ابكل وكت يسعر جمرهه
ليلتك وحشه وحزينه ــ يصعب امصابك علينه


حيدر ابدمعاته ناده يارسول الله افجعتنه
غمضت عيـنك يغــالي جنه انتـه وفارگتنه
يالچنت منبع ترافه سافرت وسفه وعفتنه
يا محمد مـو بديـنه ــ يصعب امصابك عليمه


يارسول الله مصابك موسهل والباري يشهد
حتـى عزرائيك اجالك مستحي وعنك تردد
والاذان انسمعه ناده اشـهدُ قد غاب احمــد
بعـدك اشينفع بچينه ــ يصعب امصابك علينه


الخادم
كامل السعيدي


https://telegram.me/aabas78
قصائد لكل ايام محرم اشترك بالقناة

قصيدة بحق النبي محمد (ص) عن الزهراء


يامحمد.. تنــــــادي الزهرة حزينة
يامحمد.. انطـــــــَـفة نور المدينة
يامـحمد   يامحــمد    يامحمد
-----------------------------
ينوح دين الله وينادي   يامحمد يا امين
لجلك الاسلام ينحـب  كَلبة مجروح وحزين
الزهرة صاحت يتمتني  ها يسيد المرسليـن
فاركَتنة ليش نادة  الحسن وينادي الحسين
من عفتنه   انكَلبت الامة علينة
يا محمد   يا محمد   يا محمد
-----------------------------
فاطمة الزهرة تنادي  انهدم بيت الفقير
وصرنة يابوية يتـــامة  بعد بيمن نستجير
اتيتم الاسلام كــــلة  بعدك ازغير وچبير
واظلم الكون بغيابك  راح نور البي ينير
ابغيــــــــابك    ايتــــام يابوية بقينة                                                                           يامحمد  يامــــحمد    يامحمد
-----------------------------
بوية ال البيت تدري   انفجعوا بهذا المصاب
فاركَـتنا ويتمتنـا   عـــــاتبوا هذا العتاب
دارت الايام بيهم   من نمت تحت التراب
انكَلبت اعلى اعقابها امتك  يوم طولك عنةغاب
حاربونـة    ولو تشوف اشصار بينة  يامحمد   يامـحمد    يامحمد
__

چنت دوم اتوصي بيهم   الكتاب وعترتك
بوية بعدك حاربـونة   شوف حالت امتك
شوف حال الامة بعدك  ابعـترتك خانتك
مارعوا هالدين بعــدك  وبغيابــــك نكرتك
انكرونــة   من غفت عينة ولينة
    يامحمد   يامحمد    يامحمد
-----------------------------
حاربوني اعلى البواچـي   وعلى دمعات الحزن
طلعوني من المـدينة   ما رظوا بـــيهة اون
وكَطعوا الشجرة من ننوح   عليك يمهة استچن
بوية من يوم العفتنة  شفنة اشكال المحن
نـــشتكيلـك   بوية ما تسمع بچينة
    يامحمد    يامحمد    يامحمد -----------------------------
حاربوا دين الالـه  وحچيك لحيدر نسوه
بوية والكرار بعدك  حاربـــوني وحاربوه
كل شي منك ظل الـية  بـوية بالكَوة خذوه
هجموا اعلى الدار بعدك   بيتي بالنار احركَوه
اظلمونـي   ما رعوا كَلبي او ونينة
يامحمد   يامحمد     يامحمد

========================
أسالكم الدعاء رائد الاسدي


https://telegram.me/aabas78
قصائد لكل ايام محرم اشترك بالقناة

غاب وحي الله وبجت دم فاطمه
ام ابوها من ابوها ميتمه
==========
فاطمه الليله الگلب منها انكسر
بدت رحله اه ومصاب وقهر
الليله ابو ابراهيم ناوي اعل السفر
الليله تبجي الزهره والمدمع دمه
==========
حيل مهضومه الزجيه وتنتحب
اه يافكد الابو كلش صعب
يلچم امصابه وبعد فت الگلب
باتت بحسرتها تبجي العالمه
==========
الجان يفكدها بمسه وبكل صبح
راح بس خله بمكانه جم جرح
امصابه باب امصابها هم ينفتح
وتبدي هجمتها العصابه المجرمه
==========
ياعلي ريض يمن شلت النعش
گلبي من شلت الابو والله انخمش
مصاب ابويه عليه ياويلي غبش
وانصب جادر حزن وسط السمه
==========
يادمع ينفع بعد عاللي اندفن
بلاوطن اني ومشه وياه الوطن
حسين يبجي وگابله يون الحسن
يگله ياخويه بقينا ابلا حمه
==========
غمضت عينك فتح عينه الغدر
وبعد عينك بويه ظلعي الينكسر
من اجيلك شوف خدي المنسطر
هجمت اصحاب السقيفه ناقمه
==========
الشاعر علي النائلي


https://telegram.me/aabas78
قصائد لكل ايام محرم اشترك بالقناة

(( نزله    حماسيه ))

وداعاً يا محمد والدي
وداعاً يا محمد والدي

___

راح اودعنك يبويه وتجري دمعة عيني
بويه لاترحل دخيلك فدوه هاك اسنيني

والله مـن ترحـل يبويه مايهود أونيني
بويه من أنحب ونوحاً يبجي حته حسيني

وداعاً يا محمد والدي
وداعاً يا محمد والدي
___
خذني وياك بمنيتك والله ماريـد العمر
كون اموتاً  هسه أنه بويه موعـده شهر

سوده صارت كل حياتي يامحمد ياذخر
كلبي مابطل نياحه ومدمعي حد الفجر

وداعاً يا محمد والدي
وداعاً يا محمد والدي
___
بيتي يفرغ من حنانك يالحنين لغالي
خالي من نور الهدايه بيتي بعدك خالي

بويه لا تترك يتيمه وارحم انته بحالي
فكدت بعمر الطفوله امها وانته التالي

وداعاً يا محمد والدي
وداعاً يا محمد والدي
___
وهذه حيدر وبغيابك  خيم عليه الحزن
ظهره محني يامحمد مدمعة مذبل جفن

والله يشتاق الكيانك بويه وكلش يحن
الفارك أحبابه يويلي يكره  اليل اليجن

وداعاً يا محمد والدي
وداعاً يا محمد والدي
___
وأرد اسولفك يبويه من يطول غيابك
هجمو علينه بحقدهم وعتنو يم بابك

بالشماته يا محمد سحكو على عتابك
لحركو البيت بغيابك همه من أصحابك

وداعاً يا محمد والدي
وداعاً يا محمد والدي
___

فاطم توأن من ضلعها اه يجرحه والكسر
مااسامح بـويه أنه  وأبقه اليوم الحشر

انصب بيوم القيامة محكمه الاهل الكفر
فلان وفلان بجهنم  ومنهم  مااقبل عذر

وداعاً يا محمد والدي
وداعاً يا محمد والدي

___

كلمات
الشاعر الحسيني

مرتضى مكطوف .

https://telegram.me/aabas78
قصائد لكل ايام محرم اشترك بالقناة

يمعوضني الحنان/بعدك ماظل أمان/يقسي وياي الزمان/يابوية
__
يالتارس عيوني ضوه… ويه الشمس متوارد
انته رسول الامتك…. بس انته اليه الوالد
من گال اعيش بغيبتك.. ما اگدر الله شاهد
هوه انت مو حي الله ابو.. ماخلق مثلك واحد

ياسيد الكون ول الله حبيبه
من بعدك اتعيش بنتك غريبه
ما اتحمل جروح/خليني وياك اروح/ماعيش بلايه روح/يابوية
___
يابوية اني ام الحسن… واتمنى لو تسمعني
ترحل وماترجع بعد… .واني الهجر يوجعني
الدنيا غابه بغيبتك… .چف القدر يصفعني
اعيوني ماتشبع بچي… من البچي يمنعني

تچويني الدموع وبگلبي نيران
مجبوره سويت بيت من الاحزان
بوية وبعد المصاب/ربعك طلعو ذئاب/شفت انواع العذاب/يابوية
__
بس غمضت عيونك ترى… انكشفو اعله الواقع
تحت السقيفه اجمعو… والتمو امن الشارع
اسم الخليفه وكنيته… انكتبو اعله الجامع
يم الله من بعدك علي… ويم الجماعة الرابع

هوه الله وصاك بعدك خليفه
رابع يخلو اهل السقيفه
ماعدهم كل ضمير/هذا البعدك يصير/حيدر خلو اخير/يابوية
___
عادات عد كل العرب… والوادم ايعرفوها
بت الشيوخ وبت اصل… تستاهل يكرموها
ليش اني بت سيد الرسل… وياي ما سووها
سلبو فدك مني غصب…. ونار الحقد ضرموها

هجمو عله الدار الچانو اصحاب
محسن صگط ليش يم عتبت الباب
بعدك عاشو ظلام/سلبو حق الامام/تسمع هذا الكلام /يابوية
___
يابوية عينك غمضت… تدري اشجرى اعله الزهره
الليل يخلص بس اون ..كاتلني ظلعي وكسره
گنفذ سطرني بيمنته… منهو اليرد السطره
امدلله ابوكتك چنت… هسه اختنگ بالعبره

ياروحي شكواچ ل الله وحبيبه
من بعد الفراگ عشتي غريبه
عيني وكسر الظلوع/ابني وصب الدموع/ل الله وليك الرجوع/يابوية

الشاعر حيدر الخفاجي


https://telegram.me/aabas78
قصائد لكل ايام محرم اشترك بالقناة

اغتيــــال

.
.
..

اغتيال .. يقـره تقـريـر الـوفـاة
اغتيال .. سَمَّوا الهادي الطغاة
ابچي دم يـا كـوثـره
سَممُــوه خيـر الـوره

.
.
.
من بعد هاي الرزيه الحَلَّت و هذا المصاب
شدي حيلچ يالزچيه للمصايب و العذاب
انعقدت اليوم السقيفه و عم على الدين الخراب
بس يغمض عينه طه و بس يظم جسمه التراب
.
اغتيال .. راح باچر يبدي بيچ
اغتيال .. يندفع بـابچ عليچ
.
مـن بعـد كـل الجَـره
سَممُــوه خيـر الـوره

.
.
.

الحنين بحجره خله راس ابن عمه الحنين
شما عرگ و الله جبينه بوجهه يمسحله الجبين
حسين گاعد عن يساره و الحسن عن اليمين
و الحزن خَيَّـم عليهم منظر ايبچي الجنين
.
اغتيال .. اعتله صوت الامام
اغتيال .. سمموه ولد الحرام
.
بصوته نـادى حيدره
سَممُــوه خيـر الـوره
.
.
.

راد قرطاس و دواته قبل لحظات الوداع
يدري يتمنون موته ابابه منتظره الضباع
يدري بس تِغمَض عيونه الدين يركن للضياع
و هُمَّه هم يدرون حيدر بالوصيه اسمه يُذاع
.
اغتيال .. عرفوا ابحيدر يصير
اغتيال .. من بعـد عينه الأمير
.
الكافر بكفـره اِعتِـره
سَممُــوه خيـر الـوره
.
.
.

هالخبر يا شيعه موجع عالگلب و الله و أليـم
يگول عـن هادينه يهجر هالعتل أبن الـزنيم
صاحب يگولون عنه النبي ما صاحب لئيم
يمنـع القرطاس حتـى لا يوصي بالقسيم
.
اغتيال .. أولاً سَــم الـرسـول
اغتيال .. بعـده يغتال البتول
.
بـالسقيفــه الـغـادره
سَممُــوه خيـر الـوره
.
.
.

بعده ما ناشف ترابه و بَيَّن الحقد الدفين
اجتمعوا أبـاب الامـامـه كـل كفـار لعيـن
دفعوا الباب اعله بنته بكل حقد هالحاقدين
رضوا ضلوع الزچيه وختنگ صوت الانين
.
اغتيال .. طاح محسنها قتيل
اغتيال .. الدمع عالخد يسيل
.
وعله ابـوهـا امكدره
سَممُــوه خيـر الـوره

.

         كريم الحاج فليح
ـ          ١٠ - ٩ - ٢٠٢٣

https://telegram.me/aabas78
قصائد لكل ايام محرم اشترك بالقناة

من غمضت عيون الرضا   ركضت تشيعه الرافضه
وكلهم يصيحون    نتفارك اشلون
**
اتنوح الاملاك   وتنعه الافلاك   والسمه سوت حداد اويالمجرات
حته الأقمار   تنزف اعبار   وترجف الوديان وتصيح الرضا مات

ناده المنادي بدمعته    خل شيعته ايشيعونه
وعالراس مو فوك المتن   نعش الرضا ايشيلونه
اكلوب اليتامه تصدعت    من رادو ايدفنونه
وينادي حفار الكبر   ليش الرضا ايسمونه

يتمنه جان بموتته    كلهم يحضرون اخوته
ويم نعشه يبجون   نتفارك اشلون
*
التمت الناس  وفاض الاحساس   ليله اوداع الرضا ما منها ليله
نعشه مطروح   وكلشي مجروح   كلها ملتمه اعله بابه وتشتكيله

هنياله اليغمض الجفن  واحبابه كلهم يمه
ويا ناس من مات الرضا   بس الغرب ملتمه
لا يمه واحد من هله   يشبك عليه ويشمه
لو همه ينحط عالجبل   ايذوب الجبل من همه

ضل الصخر ينحب اله   كلهم ذبح خلصو هله
يا ضي العيون   نتفارك اشلون
*


اتغير الحال   والدمع سال   وذبلت عيون الجواد الهل مصيبه
تنعه الكوان   وغيمه الاحزان   اجنازته اشلون الرضا ضلت غريبه

صله الجواد اعله الرضا   وبجفوفه غمض جفنه
وبطوله نام اويالابو   يبجي ويقبله بحزنه
افراك الابو كسرت ضهر   وشلون راح ايدفنه
كضه العمر ضيم وهظم   وبعيد عايش عنه

عالمغتسل خله الابو   واعله الرضا اينوح بدفو
اينادي اظلم الكون   نتفارك اشلون
***
اهتزت الكاع   بيوم الوداع   طلعت الناس بمدامعها تشيعه
كلشي مفجوع   وعالرضا ايلوع   وحته ملك الموت يم جثمانه ينعه

مفجوعه بمصاب الرضا   اهل السمه ومنكسره
الفاركله غالي بدنيته   لمن يحن شيصبره
يم نعشه هليله اعتنت   تبجي تنوح الزهره
وتصيح ويلي اعله الرضا   وتجذب اكباله الحسره

مسموم مهجة فاطمه   بيد العصابه المجرمه
ويا فاجعه تهون   نتفارك اشلون
**

بدمعة الاه   صيحو ويلاه   راح واليكم يشيعه هالمسيه
دفنو النور   وسط الكبور   وحلت اعلينه المصايب والرزيه

ليش المحنه تنجرح   ويموت اليداويها
والدنيه ما تحله اذا  وجه الرضا ما بيها
محتاره ضلت شيعته   ونار الحزن تجويها
بثوبه اليتامه امن البرد   جان الرضا ايدفيها

غصن الامل توه نكسر   وفركنه يا حيف الدهر
لينه يرد كون   نتفارك اشلون
**
تمت
تحسين الخفاجي


https://telegram.me/aabas78
قصائد لكل ايام محرم اشترك بالقناة

عكيلي بحق الامام العسكري (ع)




للمجلس بالمدمع جينه
وانادي احضر يامهدينه
١

نحضر يامهدي بيادمعه
وانوح اعله والد ننعه
صوت الخدام انته تسمعه
نلطم عالوالد خلينه
٢

نلطم والعالم يسمعنه
يابو المهدي يامرجعنه
انته اتوحدنه وتجمعنه
وبأسمك احنه اتسمينه
٣

هالليله انوح اعله مصابك
ونتمنه انشم احنه اترابك
خدام ومن نوصل بابك
نتمنه اترد انته اعلينه
٤

يبن الهادي انلوذ بعطفك
محتارين ابيش انوصفك
من جودك نترجه ولطفك
تشمل خدامك والينه
٥

الخدام الليله بيا حاله
تنحب بدموع الهماله
لجلك واليلطم هنياله
هالليله المهدي الله ايعينه

٦
ودعناك ابدمعه وحسره
حزنك يابو المهدي اشكبره
الله يساعد كلب الزهره
والزهره انحبك تدرينه
٧

مسموم وترحل هالليله
والله ايساعد كلب العيله
للباري ابمدمع نشكيله
زين الباري يدري اشبينه





لاتنسون والدي وابني عباس من الرحمه والمغفره
خادمكم رياض الرسل الجابري

https://telegram.me/aabas78
قصائد لكل ايام محرم اشترك بالقناة

ذكرى إستشهاد الإمام الحسن العسكري عليه السلام

تنحب وگلبك جريح
بالصحـن لو بالضــريح ؟
تبچي سكته ....وينك إنته
بالصحن لو بالضريح ؟
****
الليله ليلة والدك الله اليعينك
أرد أواسيك بيميني تكض يـمينك
يا إمامي الـمنتظر جاوبني وينك
عالي حظي إنچان عيني تلاگي عينك
تشوف مدمع ناظري
عالإمـــــــام العسكري
يالفگدته ....وينك إنته
بالصحن لو بالضريح ؟
****
يابو صالح هاك إخذ عمري اعله عمرك
إنطيني بس لحظة أمل بيهه أنظرك
يالجزع حتى الصبر من طول صبرك
أدري بيد الباري يالـمحجوب أمرك
گلبي إجاك بهالـمسه
ينتظر جيتك عسه
تشفي علته ....وينك إنته
بالصحن لو بالضريح ؟
****
چم جرح گلبك حمل بس الله يعلم
ليا مصيبه بعترتك حيلك تهدّم
لطبرة الوالي علي الـمخضوب بالدم
لو على الزهره وضلعها إلي تهشم
گلبك شگد إنفجع
على الـمحسن من وگع
يالذكرته ....وينك إنته
بالصحن لو بالضريح ؟
****
لو غدر سم لو ذبح كل الـمصايب
عالحسن يبن الحسن گلبك الذايب
لو على حسين الذبيح اعله الترايب
لو على طول البُعد حزنك يغايب
لكل إمام وفجعته
شال گلبك لوعته
النوح عشته ....وينك إنته
بالصحن لو بالضريح ؟
****
أرد أحلفك وبحزن هاي الـمسيه
بيها أبوك العسكري شاف المنيه
نظره رايد عمري ما ظن بي بقيه
يگصر شما غيبتك طالت عليه
أقره وأنعى هالمصاب
أحمل هموم الغياب
شگد حـملته ....وينك إنته
بالصحن لو بالضريح ؟
****
آنه والحضروا نواسيك بعهدنه
ننتظر يالـمهدي وبلهفه بعدنه
طلب عدنه وكلنا نعرف ما تردنه
ردنه تحضر جيشنا وتحضر حشدنه
يلي تنصر شيعتك
والعراق بذمتك
ما تركته ....وينك إنته
بالصحن لو بالضريح ؟
****


خادم الإمام الحسين عليه السلام
عمار هليل الواسطي

https://telegram.me/aabas78
قصائد لكل ايام محرم اشترك بالقناة