قصيدة كَعده)
الله على كل ظالم
الماكل حق الوادم
اجهنم راحت تنتظره
محد يفزعله اينصره
الله على كل ظالم
------١
دار كل ظالم خرابه كلها هيجي تكَول عنّه
لا خُلق واخلاق عنده والخجل منزوع منّه
بكَصته ماكو كرامه وما يِشِم ريحة الجنّه

تالي الظلم بس الندم
بالحفره مو فوكَ القمم
من تقره تاريخ الأمم
الخالدين اهل المحنّه

كل واحد وفعاله
والعادل هنياله
والعايش بس عالعثره
محد يفزعله اينصره
الله على كل ظالم
------٢
أُظلُم وعيش بحياتك منهو كَلّك راح تربح
الله بيده الكون كله بهذا إعلَم لا ميسمح
حتى لو طوّل رخائك بلحظه وحده كلشي يمسح

عسبالك إنته المرتفع
وبهالظلم هل مندفع
باللحظه غصنك ينكَطع
لا يباطل لا متفلح

ما تخسر من عقلك
هيجي ايكَلّك جهلك
ما تدري اليترك ثغره
محد يفزعله اينصره
الله على كل ظالم
------٣
كل زمرتك ما تِفيدك مثلك ادور مصالح
بالحضيض اوياهم إنته وللخزي برجليك رايح
بهذا لا شك ويقيناً على راسك إنته طايح

وين الطغوا قبلك بقوا
للذله راحوا وانتهوا
وشما علوا والله نصوا
اِلعَدِل لا ما يسامح

لا ترحم لا آمن
لبسط حق ما ضامن
الما عنده الزينه بذكره
محد يفزعله اينصره
الله على كل ظالم

------٤
ناس من عدنه بينه وتالي كَامت تمشي أعوج
تركت المالات الله اتخذت الشيطان منهج
تلكَه خاين للأمانه لمكه قاصد ماشي للحج

متبري منّه كل نبي
لا عنده غيره ولا أبي
افعاله مثل الناصبي
بالنميمه صوته يلهج

لا يصلح لا يعدل
للحق لا ما ينزل
من غيره اشماخذ عِبره
محد يفزعله اينصره
الله على كل ظالم
------٥
اليمه ما يردون واحد يظلم وبيهم يسولف
اليمه للحق كلشي ضحوا ودمهم الهل ساعه ينزف
اليمه يردون الذي بالشدد تلكَاله موقف

كلمن رهين بموقفه
هذا اليحب المصطفه
وذاك اليعادي أهل الوفه
ويامه من الناس خاسر الفايز اللي حفظ دينه

أبو زهراء صالح الحلي
٤-٧- ٢٠٢٤

بس إنتو الصدكَ والباقي سرابْ
------١
يهل بيت النبوه ومعدن الايمان
ينور النور يامن عِدِل للقُرآن
أولكم محمد مُرسل الرحمن
آخركم محمد مُنقذ الإنسان

منجه الكل تقي لو صار الخراب
بس إنتو الصدكَ والباقي سرابْ
------٢
أبوكم حيدر الكرار ابو الغيره
عند الله ونبيه مخفي تفسيره
ما خاب الكَصدله وطايح بحيره
حامي الجار هو ولازم ايجيره

يكَضي الشدته ويحلها الصعاب
بس إنتو الصدكَ والباقي سرابْ
------٣
أمكم فاطمه الزهره وثلث تنعام
هيه ام الحسن وحسين والإسلام
لولاها ولا يطلع بدرنه التام
ذكرها ايداوي للعلاّت والآلام

تشفع للمحب في يوم الحساب
بس إنتو الصدكَ والباقي سرابْ
------٤
حسنكم بالكرم محد وصل حده
ماخذ كل صفاته امن النبي جده
قتلت روحها وما قتلته جعده
ظل عايش أبو محمد رغم جبده

دنيه أو أخره سيد عالشباب
بس إنتو الصدكَ والباقي سرابْ
------٥
حٌسين ابلا مُناصر لجن ظل منصور
المات الموت مو هو الذي منحور
شما جار الزمان بضده خله ايجور
خالد يبقه دمه اليوم نفخ الصور

الصار بكربله ميشبهه مُصاب
بس إنتو الصدكَ والباقي سرابْ
------٦
علي الساجد علي العابد علي الصامد
من بعد الحُسين اعله الخلكَ قائد
مو شرط بمعارك للذي ايجاهد
سل سيف الدعاء بوجه كل حاقد

أغلى امن الذهب واعداءه تُراب
بس إنتو الصدكَ والباقي سرابْ
------٧
أوسطكم محمد وشحلات اسمه
ماخذ من سجايه المصطفه ورسمه
باقر للعلم محد بلغ علمه
عدوانه الحُفَر والباقر القمه

عنده الكل علم لليسأل جواب
بس إنتو الصدكَ والباقي سرابْ
------٨
طبتم سادتي وطابت ذراريكم
الله بعزته من كلشي منطيكم
الصادق بالفعل من عدكم وبيكم
الكاظم غيضه جسدها المعانيكم

ابواب الكرم وامطار السحاب
بس إنتو الصدكَ والباقي سرابْ
------٩
ثامنكم علي موسى الرضا السلطان
وجواد اليمه تاسعكم أبو البرهان
والعاشر عليكم ثبّت البُنيان
وابو المهدي الحسن تاج بمدى الازمان

تجلون الفتن ويروح الضباب
بس إنتو الصدكَ والباقي سرابْ


أبو زهراء صالح الحلي
٨ -تموز-٢٠٢٤