بعد ما تقعد مقدر كلب ولا كلبة يوم تجيك العضة ما تقولش ليش وكيف راجع روحك واعرف من تقدر

في ناس نستغرب منهم من شحتة قدرهم يشحتو بشكل غريب نين يخلوك تقول في نفسك كيف هذوم بلا عزة نفس انا شركة لبيانا بعد يكمل رصيدي قيمة السلفة 150 نتحشم ناخذ منهم جنية

كاس قدرك اشرب منا ما سدش نزيدك كاس حسيت انا ما صار شي اعرف انك مش متاع قدر

ديما حط في بالك انا القدر اسلاف وكل ما درتا حتلقاة مش اليوم بكرة مش بكرة بعد سنة عشان ولد الاصل ما ينسش ولو جيت عطيت قدر حتلقا قدر ولو حد مردش لك اعتبرة صدقة جارية واعتبر انك درت الي عليك وعاملته باصلك والي عليك درته

مش عيب إنك تتخطى شخص أثر فيك واجد… العيب إنك توقف حياتك عنده
ما تنظرش للموضوع بنظرة كسرة، انظر له بنظرة “درس”…
تعلمت، ووعيت، وتغيرت، عيش لنفسك كون نفسك غير من نفسك للأحسن واهم من هذا كله قربك من الله عزوجل ووقتها، حتلقى الدنيا تضحكلك من كل النواحي واسعى تكون خير من امس واحسن لي بكره صدقوني ما حد يستاهل توقفو ارواحكم عشانة
امشو… مش حتلقو الا ارواحكم

عارف شن يعني “واهجرهم هجرا جميلا”؟
يعني في ناس وعلاقات، القرب منها ما ينفعش،
واوقات، احسن حل هو البعد.

بس البعد مش ضروري يكون كره وزعل.
الهجر الجميل هو إنك اتباعد،
وانت متريح من جوا.
يعني لو شفتهم، تسلم عادي،
ولو احتاجوك، تساعدهم عادي،
لكن من غير ما ترجع تفتح أبواب سكرتها.

الله خلق قوانين تحمينا،
وتحافظ على توازننا النفسي والمعنوي ،
عشان نركزوا على رسالتنا في الحياة ونعبدوه حق عبادة،
وما نضيعوش جهدنا في أماكن غلط.

عمرك لاحظت إن ملامح الناس تتغير لما يوقف حبهم؟
ولا عمرك حسيت انا نبدا نشوفهم على حقيقتهم لما نتباعد عنهم؟

الحقيقة ان الملامح نفسها،
والأشخاص نفسهم،
والقلوب ما تغيرت ولا تبدلت،
بس اللي تغير هو نظرتنا.

تمينا نشوفو فيهم بعيوننا، مش بقلوبنا.
الملامح هي هي،
بس انت، حبك هو اللي كان محليهم،
كان يصورهم في أحسن صورة، طبع ومنظر.

انت اللي كنت تشوفهم كاملين،
رغم كل النقص اللي كان فيهم.

وفي رايي… الناس اغلاطهم هن الي يخسرن فيهم مكاناتهم والشي هذا هو الي يواعينا

عارفين الوعي الحقيقي يبدأ من اول لحظة خذلان بعد تحس روحك متكسر والدنيا كلها جايه ضدك ومفيش حد معاك.”

“وفي لحظة الوعي هذي، نعرفو ان الحب يخلينا عمى ما نشوفوش قدامنا، بس البعد يفتح عيونا ويخلينا نشوفو كل شي ونحطو كل شي في مكانة الصح.

وعلى نياتكم ترزقون…

هي من أكثر الجمل اللي تطمن الواحد لما يكررها،
وبالنسبة ليا نتريح كل ما نكررها.

جديات، لما يكون الإنسان نظيف من جوا،
ربي يرزقه وينور دربه ويدله ع الخير من حيث لا يحتسب،
وتلقى الناس تحبه بدون سبب،
ولما تعرفة هكي اتريح وتحس انك تعرفة من زمان.

صاحب النية الطيبة ديما يتمنى الخير للكل بدون استثناء،
لانه متاكد إن فرحة غيره ما تنقص من فرحته،
ورزقهم ما ينقص من رزقه،
وصحتهم ما تاخذش شي من عافيته،
ولمتهم بأحبابهم ما تبعدش احبابه.

صفوا نواياكم عشان ربي يعطيكم،
وما تقعدوش حسديه.

وديما الكلمة الكويسة كويسة،
مرات الانسان يكون في حاجة إنه يسمع كلمة خير
وتعطيه دافع معنوي في حياته عشان يغير من روحه.

واي حاجة خير حترد عليك،
وحاجة الشر، برضو حترد عليك.

ناس تحبك وتتطمن عليك،
وناس تفضى عشانك،
وناس وقت ما تفضى تجيك،
وناس ما تسأل إلا لما انت تسأل،
وناس تسأل بدون شي والنيّة بيضاء،
وناس وقت المصالح يجوك،
وناس تفرق عن ناس،
وناس تغيروا عشان ناس،
وناس يكذبوك عشان يرضو ناس،
وناس يرخو عشان ناس،
وناس بالوهم عايشين،
وناس يحبُ يخربُ بين الناس،
وناس مقدرهم أكثر من ناس وما ثمرش،
وطبعا الناس بالناس، والناس بالله،
في الي يعتمد ع روحه،وفي اللي يعزق فيها على الآخرين،وفي الي لايضرك لاينفعك،وانتو عارفين، وانا عارف،في الي راس ماله دوه ودفنقي، انتا الي عليك بس ما تعليش سقف طموحك بحد مهما كان يكون، عشان هم الوحدين الي يقدروا يأثرو فيك هم الي أميزهم على غيرهم ومعطيهم قدر ومخليهم ناس،صدقني عاملهم كلهم سواسيه، ان جاء مرحبا وان غاب ما يوجعني،والي يبيك حيقعد معاك
وكل شخص عارف السطر اللي ماشي معاه

قاعد تمر باصعب مرحلة في حياتك،
يمكن هذي اللي يقولوا عليها “مرحلة النضج”!

بـس اللي فهمته من شـعوري توا
ان النضج قبل ماتوصله حـ ياخذ:
• جزء مـن برائتك،
• جزء مـن نظافة نيتك،
• جزء مـن طيبتك،
• جزء مـن ثقتك فـي غيرك.

مافيش نضج بدون هذين كلهن،
نتحدى تلقوا إنسان ناضج بدون مامر بيهن او بنصهن.

اسمعوا لـ هلكم،
عطوا مـن وقتكم لـ دينكم،
عطوا فرصة لـ الاحساس اللي يقوللكم “لا”،
اسمعوه،
اسألوا نفسكم: ليش حست انّ في شي غلط؟

شوف لنفسك، مادوروش على اللي يشوفك،
عمرك محتلقى اللي يشوفك بعينه،
كلهم حيشوفوك بعيونك.

حبّوا انفسكم،
مافيش إنسان حيحبك مدامك ماتحبش نفسك.

بطلوا ادوروا على الحب،
حيجيكم بروحه،
حيجي زي ماتبون و احسن،
لانه حيكون حلال،
يرضي ربك و والديك.

بطل تسمع لـ الشيطان،
احكموا في انفسكم،
احتووا أرواحكم،
عطي روحك الحنان،
ماتراجيه من حد.

تقبلوا ماضيكم،
وحاولوا تتخطون،
فكروا في المستقبل بـ عقلانية بدون زيادة و فرط،
عيشوا “الحاضر”.

لو انت زعلان: عيش الزعل اللي انت فيه.
ولو فرحان: عيش فرحك.
لو مصدوم: عيش صدمتك.

بلاش تهربوا من إحساسكم،
عبروا عليه،
عيشوه بتفاصيله بالكامل،
ماحد حيعـيش شعورك بدالك،
ماحد حيشيل عليك ضيقتك.

نصيحة نصيحة:
رد بالك تفوت شعور فيك،
لانه يمكن وقتها حتحس بالإنجاز،
بس بعدها “حتندم”،
لانه حيرد على صحتكم،
و على شكلكم،
ويمكن يوصل الكتم و الكبت،
على انه يطفيكم بالكامل.

نصيحة اخيرة:
قربوا من ربي،
قربكم منه هو النجاة الوحيد
من كمية المشاعر السيئة هذي.