‏صباح الخيرِ بقولِ السعديّ:
‏وإياك والتحسرَ على الأمور الماضية التي لم تُقَدَّر لك؛ من فقد صحة، أو مال، أو عمل دنيوي ونحوها، وليكن همُّك في إصلاح عمل يومك؛ فإنّ الإنسان ابنُ يومِه لا يحزن لما مضى، ولا يتطلع للمستقبل حيث لا ينفعه التطلع.

علمتني الأيام ان الإنسان مش بإيده يرد كل أذي، بس بإيده يحسن وجهته لله ويحفظ أخلاقه. خصومات كتير مكانش بدايتها إساءة صدرت منك، وإنما من ضيق نفس مش طايقة تشوف في غيرها فضل فاتها، أو خصلة عجزت عن وصولها، أو حقيقة مقدرتش تتصالح معاها.

في نهاية كل هدف، غُربة صغيرة محدش بيتكلم عنها، ودي بالنسبة لي أصعب حاجه في الوصول، كون الطريق كان مشحون وزحمة، أما النهاية؛ هادية لدرجة تقلق.

علشان تشوف الجمال، وتقدّر الفرصة، وتدي بتوازن، استمر في التشافي. علشان تكون أحلامك حقيقية، وتقديراتك واقعية، وخطواتك أغلبها حكيمة، استمر في التشافي.
‏أي هدف يسبق عافيتك مهما كان، هدف ثانوي.
‏أي خطوة تنويها مبتخدمش استقرارك النفسي أولاً، مضيعة للوقت.

خد بالأسباب دايمًا، وربك كريم.

‏كل يوم بيزيد إيماني بان الحياة لمن يجرُؤ، للي بيجازف خطوة، بيرمي بنفسه لأحضان التجربة، ويخوض ما دام وجوده محتوم. وفجأةً، يلاقي نفسه بيحب الارض باللي فيها، بيوصل لأماكن متوقعهاش، لأبعاد تانية.. لأن الحياة بتجيله كل ما يديها الفرصة.

نصيحة اليوم وكل يوم: إغصب نفسك علي كل حاجة بتكسل فيها سواء مشي، رياضة، أكله صحية، قراءة قرآن أو كتب نافعة، دراسة.. إلخ؛ وقيس عليها. متعتمدش علي المزاج لأن دايماً النفس تحب ترتاح، والراحة تولّد الكسل، والكسل ينتج عنه الفشل والندامة. وزي ما قال ابن القيم «من آثر الراحة فاتته الراحة».

مفيش إنسان أقدر علي الارتقاء قد اللي بيسحب نفسه من شهواته ومطامع نفسه، كل اللي وصلوا للقمم، اتخلوا في رحلة صعودهم عن أغلي واحب الأشياء لقلوبهم، ومكانش أقل مشقة وقتها من كونه علي حد فينا دلوقتي. لكنهم عرفوا ان كل مُتعة تلهي الإنسان عن شغله بتشده للهبوط، وبتأخره عن بلوغ مقاصده وأهدافه.

من مفاتيح الرضا بقضاء الله وأقداره، انك متشوفش جريان الحياة الطبيعية عند غيرك مهانة وتقصير ناحيتك، في ناس لو وقعت في ضيقة تطلب من كل العالم العزوف عن البهجة لمواساته، وده دلال نفسي مستفز.