ا محتاجة صبر ..لأن الغنم بيروح هنا وبيروح هنا فبيجري ورا دي وبيروح يجيب دي،
فاتعلم الصبر من وهو في سن المراهقة زي ما بنقول، والسن ده أصلا تلاقي فيه الشباب مندفعين ومعندهمش صبر😅

فكان صبور وكان صادق لم يكذب أبدا👌
أصلا الكذب عند الناس في الجاهلية حاجة عيب جدا، فكان صفة الصدق منتشرة وصفة الوفاء بالعهد ،
وكان أمين جدا ومكنش بيقول أي كلام فاحش ، فكل الصفات دي اكتملت في أخلاق الشاب محمد، ومن الحاجات إللي تميز بها إنه لم يعبد الأصنام أبدا👌
مع إن قومه كلهم بيعبدوا الأصنام وعايش في وسط أهله إللي بيعبدوا الأصنام ومع ذلك كان بيكرهها وعمره ما عبدها👌
وحتى الأمور إللي تعتبر عادية بين أهل مكة ربنا عصمه منها،
يعني عمره ما حضر عرس فيه أغاني ومزامير أبدا،
حتى لما كان عايز يروح عرس لما راح العرس ربنا خلاه ينام ومصحيش غير تاني يوم 😅

لما وصل عمره عشرين سنة حصلت حادثة في مكة،
وهي إن واحد من التجار جاء مكة عشان يبيع بضاعته، فاشتراها منه العاص بن وائل، لكن مدفعش الفلوس وقعد يماطل في دفع الفلوس،
لحد ما العاص بن وائل قال للتاجر : ملكش حاجة عندي واعمل إللي تعمله😒
فراح التاجر واقف عند الكعبة وقعد ينشد شعر بيقول فيه لأهل المكة أنا هفضحكم في العرب إنكم أخذتم أموالي وظلمتوني 😡
فسمع الكلام الزبير بن عبد المطلب فجمع أشراف الناس واتفقوا إنهم هيعملوا حِلف ينصروا فيه المظلوم،
يعني يكون مجموعة من الناس تتفق على إن أي مظلوم يرجعوا له حقه،
فكان من ضمن الناس إللي اشتركت في الحِلف ده محمد بن عبد الله لما كان عمره عشرين سنة،
وفعلا رجعوا للرجل حقه وأي أحد مظلوم كانوا بيرجعوا له حقه،
والحلف ده قال عنه رسول الله صلى الله عليه وسلم دُعيت لحلف في الجاهلية لو دُعيت له في الإسلام هشترك فيه 👌
إللي هو حلف الفضول،
لأن هو قائم على أهداف نبيلة وهي نصرة المظلوم ، وعلى فكرة نصرة المظلوم مش بس للمسلم لكن لأي أحد مظلوم👌
لدرجة إن لو مسلم ظلم غير مسلم نقتص لغير المسلم من المسلم، مش عشان مسلم يبقى خلاص😑
الإسلام لا يرضى بالظلم لمسلم أو غير مسلم👌

اشتهر الشاب محمد بين أهل قريش بالصدق والأمانة والأخلاق العظيمة جدا، مين إللي سمعت عنه؟
امرأة اسمها خديجة بنت خويلد😊

ياترى إيه قصته مع خديجة ده إللي هنعرفه الجزء الجاي إن شاء الله😁


#Eman_Shalapy

عارف حاجة🤨
إيه يا جماعة في إيه؟
فحكوا له إللي حصل فراح قالع ردائه زي عباية كده بتتلبس عالكتف وقال لهم:
كل واحد يمسك بطرف الرداء ..فمسك كل واحد منهم بطرف الثوب بتاعه وراح 《الصادق الأمين》أخذ الحجر الأسود من مكانه وحطه على الثوب بتاعه،
وقال لهم:
امشوا به لحد ما نوصل لمكان وضع الحجر، فلما وصل للمكان بتاعه راح 《الصادق الأمين》 واخد الحجر ووضعه في مكانه المعروف لحد دلوقتي،
فكان إللي وضع الحجر الاسود في مكانه هو
《 الصادق الأمين محمد بن عبد الله بن عبد المطلب》
والناس اتبسطت والمشكلة اتحلت في ثواني💁‍♀️
وإلا كانت هتقوم حرب بين أهل مكة ويفنوا بعضهم😶

قبل ما يبلغ محمد بن عبد الله عمر الأربعين سنة ،
لما كان بينام ويشوف رؤيا كانت بتحصل بالضبط زي ما شافها في الرؤيا بالضبط😳
يعني تخيلي كده إنك شفتي رؤيا وبعد ما صحيتي وبتقضي يومك عادي لقيتي إللي شوفتيه في الرؤيا بيحصل قصادك🙊
ومش مرة ولا مرتين...ده أي رؤيا تشوفيها بتحصل وبتحقق بالضبط وأول ما تصحي..تخيلي إحساسك هيبقى عامل إزاي😳
وكان لما يمشي في مكان لوحده يسمع حد من وراه بيقول: السلام عليك يا رسول الله...فكان يبص وراه ميلاقيش حد😶
خدوا بالكم هو مجرد بشر زينا بالضبط👌
بيخاف..بيتألم..بيحزن..فلكم أن تتخيلوا واحد كل ما يمشي يسمع صوت من وراه ويبص ميلاقيش حد 😬
يعني الواحد لما بيكون لوحده وسمع صوت حاجة وقعت في المطبخ ولا أي صوت من هنا ولا من هنا بيبقى هيموت من الرعب 😅
فأنا عايزاكم تتخيلوا مشاعره كانت عاملة إزاي في موقف زي كده🙊
لا ولسه كمان لما 😱......لما إيييه 😁

نكمل الجزء الجاي إن شاء الله 😅


#Eman_Shalapy

ف يُعتبر بسيط جدا لكن لو فكرتي فيه بتدبر هتشوفي إزاي ربنا بيدبر الرزق لخلقه👌
رجل اتفق مع زوجته إنهم هيتغدوا اليوم ده غذاء معين، فنزل راح مشوار ،
بقدر ربنا يروح السوق يلاقي رجل بيبيع سمك فبعد ما اشترى منه وخلاص هيمشي شاف سمكة لوحدها فسأله على نوع السمكة دي لأنها جديدة بالنسبة له،
فقال له البائع : أنا كنت هشويها لنفسي خلاص خذها لأن حصلت ظروف ومش هعرف اشويها،
أخذ السمك ورجع البيت بيفتحوا السمكة إللي الراجل أعطاها له عشان ينظفوها لقوا فيها سمك صغير كثير السمكة دي كانت لسه واكلاه،
المهم قالوا :السمك ده كثير خلينا نجمعه في كيس ونروح نحطه للقطط.
ركزوا كده معايا السمكة إللي في البحر أكلت السمك الصغير والصياد خرج عشان يصطاد فاصطاد السمكة دي بالذات وتحصل له ظروف وميعرفش هو ياكلها،
عشان الرجل يأخذها ويروح البيت ويطلع السمك الصغير ده
ويحطه للقطة إللي بتمشي على الأرض عشان تأكله،
يعني رزق القطة إللي طبيعتها مبتحبش المية كان سمك من أعماق البحر 👌
إيه رأيكم في عبادة التدبر والتفكر 😁
وهتلاقوا أمثلة كثير في القرآن وفي انفسنا وفي حياتنا وحياة إللي حوالينا،
عبادة التدبر والتفكر من أعظم العبادات القلبية إللي بتزود الإيمان وتُعلق القلب بالله،
وكثير من الناس مش بياخد باله منها وبيركز على عبادات الجوارح زي الصلاة والصيام وقراءة القرآن،
فابدأوا في عبادة التفكر والتدبر زي ما كان محمد بن عبد الله بيعمل في غار حراء😉

في السنة إللي تم فيها عمره أربعين سنة ، خرج محمد بن عبد الله عشان يتعبد زي كل سنة في غار حراء،
والغار عبارة عن فتحة في جبل والغار عشان حد يوصله لازم يتسلق الجبل،
فلو حد جاء يتسلق هيعمل صوت والشخص إللي في الغار هيعرف إن في حد برة بيتسلق الجبل،
فالمكان إللي هو فيه كان مكان منعزل تماما عن الناس عشان يقدر يركز في العبادة ،
مفيش في المكان ده أي انسان مفيش أي صوت نهائي هدووووء تااام وهو قاعد لوحده جوه الغار بيتعبد زي ما بيعمل كل سنة...فجأة لقى انسان في وشه جوه الغار😱
متخيلين قمة الرعب إللي هو كان فيها 😶

احنا لو في البيت وسط أهلنا ودخلنا الأوضة وبعدين فجأة لقيتي حد وراكي من اخواتك مخدتيش بالك إنه دخل وراكي بيبقى قلبنا هيقف من الخضة🙊

ده بقى كان لوحده خااالص وفجأة بدون مقدمات لقى قصاده الإنسان ده ...وياريته مثلا بدأ يِهَدي فيه ويقول له متخافش وبدأ يعرفه على نفسه،

لأ ...ده دخل عليه أول وقال له : اقرأ👌
كده خبط لزق 😳
فمحمد بن عبد الله بكل أدب وأخلاق عالية قال له: أنا مبعرفش أقرأ!!
مع إنه من حقه إنه ميجاوبش على سؤاله ويقول له :
إنت مين أصلا وجيت هنا إزاي وأسئلة كثيرة، ومع ذلك رد على السؤال 👌
راح الرجل حضنه حضن شديد جدا لدرجة إنه حس إن روحه هتطلع من شدة ضغط الحضن😰
فالرجل تركه ، فمحمد بن عبد الله لسه بياخد نفسه راح الرجل قال له تاني: اقرأ👌
فقال له : أنا مبعرفش أقرأ!!!

فحضنه مرة ثانية لحد ما حس إنه روحه هتطلع وبعدين تركه وقال له تاني: اقرأ👌
فقال له : مبعرفش أقرأ!!!!
فراح حضنه مرة ثالثة لحد ما حس إنه روحه هتطلع برده😨
وبعدين تركه وقال له الرجل:

"اقْرَأْ بِاسْمِ رَبِّكَ الَّذِي خَلَقَ

خَلَقَ الإِنسَانَ مِنْ عَلَقٍ

اقْرَأْ وَرَبُّكَ الأَكْرَمُ

الَّذِي عَلَّمَ بِالْقَلَمِ

عَلَّمَ الإِنسَانَ مَا لَمْ يَعْلَمْ"

الرجل قال الكلام ده واختفى من قصاده😱

طبعا محمد بن عبد الله في قمة الذهول
إيه ده؟!!
قمة الرعب مع قمة الألم والعنف وإيه الكلام العجيب ده إللي أول مرة أسمعه؟!!
أنا أفصح وأبلغ العرب ..الكلام ده مش كلام بشر ... مفيش كلام زي الكلام ده!!!
ثم الرجل ده بيتكلم عن الإله إللي أنا بؤمن به من سنين لكن معرفش عنه حاجة،
تساؤلات كثيييرة وخوف شديد جدا خلاه ينزل من الغار ويطلع يجري بسرعة ،
لحد ما وصل لبيته ودخل على زوجته خديجة وجسمه بيرتعش من شدة الخوف وقلبه هيقف من الرعب وقعد يقول غطوني غطوني!!!

فخديجة لما شافته اتفاجئت أول مرة تشوف زوجها الطيب الشجاع الصادق صاحب الأخلاق العالية في الصورة دي😳
فعرفت إنها في موقف زي كده مينفعش هي كمان تخاف وإن زوجها محتاج حد يطمنه👌
فبدأت تهدّيه وتسأله إيه إللي حصل،
فحكى لها إللي حصل معاه وقال لها والله أنا خفت على نفسي !!!
فقالت له بكل هدوووء :
متخفش ربنا مش هيضيعك أبدا عارف ليه ؟
لأنك كنت بتُحسن لأقاربك بالمال أو الخدمة وغيرها،
وإنت صادق في كلامك عمرك ما كنت بتكذب، وكنت بتساعد الضعيف واليتيم وصاحب العيال الفقير،
وكمان كنت بتكرم ضيوفك وأي حاجة فيها خير مكنتش بتتأخر عنها👌
فهدأ زوجها واطمأن لكلامها كأنه تذكر إن صنائع المعروف تقي مصارع السوء 😊

مين الرجل إللي جاء لمحمد بن عبد الله؟
وليه عامله بالعنف الشديد ده؟
وإيه الكلام إللي قاله له ومشي؟
وهل رجع له تاني ولا لأ؟

ده إللي هنعرفه الجزء الجاي إن شاء الله😁



#Eman_Shalapy

زمّلُوني ...دثروني...يعني غطوني.
فسمع صوت بيكلمه:
يا أيها المدثر ..قم فأنذر وخوف الناس وحذرهم من عذاب ربك لو لم يؤمنوا👌
وربك فكبر ..عظّم ربك عما يقوله عبدة الاصنام،
وثيابك فطهرها من النجاسات إللي المشركين مكنوش بيتطهروا منها،
واجعل قلبك وعملك طاهرين👌

والرُّجْز فاهجر..يعني اترك كل حاجة من الأقوال والأفعال ممكن تكون سبب في العذاب 👌
ولا تَمْنن تستكثر..يعني متعطيش الناس العطاء وتستنى إنك تأخذ مقابل أكثر منه،
ولا تقعد تَمُن على ربك باللي هتتحمله من أعباء الدعوة،
تقول أنا بعمل كذا وكذا وبستحمل كذا...
ومتشوفش عملك إنه عظيم فتقول خلاص كفاية كده مش هزود من عمل الخير👌
ومتعملش طاعة لله وتطلب قصادها مقابل

لكن اصبر لحد ما ربنا هو إللي يعطيك الثواب من عنده👌

☆يعني زينا كده لما نقعد نقول أنا بسمع كلام ربنا أهه وبعمل الطاعات ..ليه ربنا بقى بيبتليني.. فين جزائي على الطاعة..فين من يتقي الله يجعل له مخرجا...فين...فين...
نعمل ومنطلبش نصبر لحد ما ربنا هو إللي يعطينا الأجر👌

ولربك فاصبر..يعني اصبر على الأذى في سبيل الله والدعوة وخلي صبرك على الأذى إللي هتشوفه ده لله👌

دلوقتي محمد بن عبد الله مبقاش إنسان عادي..بقى اسمه محمد رسول الله 🙊
حياته اتغيرت من اللحظة دي...بقى عنده رسالة..عنده هدف،
مهمته صعبة جدا..ويمكن تكون مستحيلة من وجهة نظرنا احنا كبشر😶
عارفين ليه؟
لأن مطلوب من إنسان عايش في قرية ناااائية لا تكاد تُذكر أصلا بين أهل الأرض في الزمن بتاعه، إنه يبلغ أهل الأرض كلهم إن هو رسول من عند خالق الكون،
وإنهم لازم يتبعوه😐
أقرب لكم الصورة...تخيلوا واحد من قرى العالم إللي منسمعش عنها فجأة كده طلع وطلب من رئيس أمريكا وروسيا وكل بلاد وشعوب الأرض إنهم يتبعوه ويسمعوا كلامه..رد الفعل هيكون عامل إزاي😳
حد هيسمع كلامه... حد هيهتم بيه أساسا😅

أهه بالضبط كده ده كان مع محمد رسول الله صلى الله عليه وسلم👌
لوحده في وسط الكرة الأرضية..مش معاه حد نهائي ..إزاي هيدعو الناس ويوصل رسالته😥

إن شاء الله الجزء الجاي هنعرف محمد رسول الله صلى الله عليه وسلم عمل إيه الخطوات إللي بدأها عشان يقدر يوصل رسالته 😊



#Eman_Shalapy

توصلي للناس الإحساس ده غير لما تكوني فعلا من قلبك حاساه،
لأن إللي في القلب بيوصل للقلب وهو ده إللي كان بيعمله رسول الله صلى الله عليه وسلم😊

مين بقى الأشخاص إللي ينطبق عليهم الكلام إللي احنا قلناه ده في حياة رسول الله صلى الله عليه وسلم💁‍♀️

أول واحدة كانت زوجته ورفيقة عمره وأم أولاده وإللي كانت دايما بتعينه على فعل الخير خديجة بنت خويلد 😊

فراح قال لها إن هو رسول من رب العالمين أرسله للناس عشان يدعوهم لعبادة الله وحده ،
وإنهم يتركوا عبادة الأصنام فآمنت خديجة على طول👌
ماهي متابعة الموضوع من البداية😅
وأكثر واحدة تعرف الرجل هي زوجته لأنها أكثر واحدة قريبة منه وعارفة مميزاته وعيوبه وعارفة صدقه أو كذبه😉

وبعدين رسول الله صلى الله عليه وسلم دعا ثلاثة أشخاص آخرين هم : 《عبد الله بن عثمان أو عبد الله بن أبي قحافة أو خلونا نقول : أبو بكر الصديق》
الثاني :《علي بن أبي طالب》 ،
والثالث : 《زيد بن حارثة》
رسول الله صلى الله عليه وسلم دعاهم للإسلام
مين هم الثلاثة دول وهل فعلا أسلموا زي خديجة ولا إيه كانت رد فعلهم؟
واشمعنى العرب بالذات إللي ربنا اختارهم عشان تكون فيهم رسالة الإسلام؟
ده إللي هنعرفه الجزء الجاي إن شاء الله 😊

#Eman_Shalapy

لأن للأسف حتى العرب دلوقتي مبقاش عندهم لا أخلاق الإسلام ولا أخلاق العرب في الجاهلية إلا القليل من الناس😔
ثالثا : نزول القرآن باللغة العربية بالذات
نزول القرآن باللغة العربية كان بسبب إن أهل المكة بيتكلموا باللغة العربية،
واحنا عارفين إن معجزة الأنبياء بتكون من نفس الحاجة إللي أهل البلد متميزين فيها ،
فكان أهل مكة بارعين في اللغة العربية لدرجة إنهم وصلوا فيها لقمة الإعجاز البشري وخصوصا الشعر😮
تلاقي واحد قال قصيدة يقوم التاني يرد عليه في نفس اللحظة...يبقى السيف على رقبته ويقول شعر 🤨
☆إنت في إيه ولا في إيه يابني😅

فكان الشعر عندهم زي الكلام عندنا وهنشوف إزاي الشعر ده كان وسيلة مهمة جدا لنشر الإسلام،👌
فهو كان عامل زي وسائل الإعلام عندنا..القنوات الإخبارية كده😉
ده غير إن اللغة العربية هي أثرى اللغات يعني لغة غنية بالمعاني والكلمات،
كان العرب مجرد ما يسمعوا آيات القرآن فقط كانوا بيدخلوا في الإسلام، بعكس دلوقتي نيجي نسمع القرآن عادي مفيش تغيير 😕
لأن احنا مش فاهمين ..اتعودنا على الآيات وسماعها من غير ما نفهم ،
عشان كده الجيل إللي هيقدر يعيد بناء أمة الإسلام لازم يكون جيل متقن للغة العربية ،لا يقدم أي لغة على اللغة العربية👌
إحنا شايفين دلوقتي الناس لازم تدخل في كلامها كلمات أجنبية 😑
الفستان بقى اسمه دريس.. لا ويجمعوه بدريسات 🙃
وبدل ما نعلم عيالنا اللغة العربية نكلمهم بلغات تانية روح يا حبيبي إلعب في 《الليفنج》 طب ما تقولي روح العب في الصالة ، طيب كلمة اللّيفنج أصلا معناها غرفة معيشة ..تقدري تقولي روح يا حبيبي العب في غرفة المعيشة🤓
لا ويكتبوها بالعربي كمان طب حتى اكتبي الحروف بالإنجليزي عشان نفهم أصلا الكلمة دي إيه إللي محصلتش
لا عربي ولا انجليزي أصلا 🤦‍♀️
وكله كوم وإللي بيكتبوا العربي بالحروف الإنجليزي دول كوم تاني خالص 🙃
فضيعنا اللغة العربية بإيدنا ومبقناش فاهمين حاجة وأول خطوة لضياع الدين هو ضياع اللغة العربية وضياع تعظيمها من قلوبنا👌

☆ثواني عشان محدش يفهم كلامي غلط😀
مش معنى كلامي إننا منتعلمش اللغات التانية 🙄
لأ ...بنتعلمها عادي لكن لها وقتها💁‍♀️
هنشوف من الصحابة إللي اتعلم لغات وكان متقنها وكان يعتبر هو الوحيد إللي متقنها كده،
ومع ذلك مكنش بيقعد يتكلم بها ولا كان بيدخل في كلامه كلمات من لغات ثانية😑
المقصود من الموضوع هو الفصل..نتكلم اللغة العربية فقط ونتكلم اللغات التانية في وقت ما نحتاجها👌

أنا عارفة إني طولت في الإجابة على سؤال لماذا العرب بالذات، مع إني اختصرت كثير والله😅
بس دي قاعدة أساسية انطلق منها الإسلام فلازم نعرفها،
لأن احنا مش بنتعلم السيرة من باب إنها قصة نتسلى بها👌

احنا بنتعلمها عشان نقدر على الأقل نبني نفسنا ونربي عيالنا
عشان لو مش هنقدر نبني أمة كاملة يبقى على الأقل شاركنا باللي نقدر عليه في البناء😊

نرجع لمحمد رسول الله صلى الله عليه وسلم 😁
دعا رسول الله علي بن أبي طالب للإسلام وكان عمره عشر سنوات وعلي بن أبي طالب هو ابن عم رسول الله إللي كان اسمه عبد مناف وكان لقبه أبو طالب😉
وسبب دعوته هو إن علي بن أبي طالب كان عايش مع رسول الله صلى الله عليه وسلم في بيته ،
وده كان بسبب إن أبو طالب كان رجل فقير زي ما قلنا قبل كده،
فحصلت أزمة اقتصادية في مكة فرسول الله راح لعمه العباس وقال له تعال نساعد أبو طالب في أزمته،
وكل واحد فينا يأخذ واحد من أبنائه عنده في البيت يصرف عليه ويبقى خففنا عليه شوية،
فراحوا لأبي طالب وأخذ رسول الله علي وأخذ العباس جعفر بن أبي طالب،
فلما بُعث رسول الله صلى الله عليه وسلم عرض الإسلام على علي بن أبي طالب وهو عمره عشر سنين فأسلم علي وكان أول من أسلم من الصبيان😊

متخيلين طفل عنده عشر سنوات يؤمن ..لأ والفكرة نفسها غريبة 🤔
فكرة عرض الإسلام إللي هو لسه محدش يعرف عنه حاجة على طفل صغير😮
هو مش وارد إن الطفل ده يروح يقول أصحابه وأصحابه يقولوا لأهاليهم والموضوع ينتشر في مكة😶
وعلي مكنش هيبقى غلطان لأنه طفل مش هيستوعب القضية الخطيرة دي 😅
لكن عليّ تربى على يد رسول الله فشاف من أخلاقه إللي خلاه يحبه حب أكثر من حبه لأبيه،
وكمان رسول الله كان عنده قاعدة في بداية الدعوة وهي إنه يدعو الشخص إللي هو بيحبه ويثق فيه،
وكمان الشخص ده بيبادل رسول الله نفس الحب ونفس الثقة،
بغض النظر الشخص ده كان امرأة زي خديجة ولا كان طفل زي علي بن أبي طالب،
ولا مَوْلى.. عبد مُحرر يعني زي زيد بن حارثة إللي هنعرف قصته المرة الجاية إن شاء الله😁


#Eman_Shalapy

ه من غير ما أي حد يطلب منه🤨
كان له أصحاب بيحبهم وبيحبوه وبيثق فيهم،
راح لهم وقال لهم على رسالة الإسلام وقعد يدعوهم لحد ما أسلموا،
يعني أصلا محدش طلب منه حاجة، مجرد ما عرف الصح تحرك على طول وكأن رسالة الإسلام دي بتاعته هو 👌
خلونا نشوف مين الناس إللي أسلمت على يد أبو بكر الصديق:
الأول: 《عثمان بن عفان》كان ٢٨ سنة 😮
الثاني: 《الزبير بن العوام》كان عنده ١٥ سنة😳
الثالث: 《سعد بن أبي وقاص》كان عنده ١٧ سنة😦
الرابع: 《طلحة بن عبيد الله》كان عنده ١٦ سنة😯
الخامس: 《عبد الرحمن بن عوف》 كان عنده ٣٠ سنة😧

متخلين ثلاثة منهم كان سنهم سن المرحلة الثانوية في عصرنا دلوقتي😳
شوفوا الشباب في السن ده حواليكم بيفكروا إزاي ولا دماغهم في إيه 😞
الثلاثة شباب دول ميغيروش أكل ولا شرب دول غيروا دين 😶
البنات لما بييجوا يلتزموا بيقولوا أهلنا والمجتمع وأصحابنا والظروف و..و...
دول غيروا دينهم في لحظة من غير ما يبصوا لمجتمع ولا أهل ولا أي حاجة..أول ما عرفوا إن ده الحق خلاص اتبعوا فورا😦
إنتم متخيلين الشباب الصغير ده هيواجه إيه...هم مفكروش في إللي أهل ممكة ممكن يعملوه فيهم؟
مفكروش في أهلهم ..مفكروش في حياتهم إللي هتتقلب رأسا على عقب😳
إزاي قدروا يأخذوا قرار زي ده في لحظة😶
سبب بسيط جدا وهو إنهم عرفوا إن هو ده الحق فآمنوا بقلوبهم وبعقولهم، ومكنش عندهم اتباع الهوى 👌
عرف إن ده الحق خلاص مش هسيبه مهما حصل😤

فهل نتعجب من الشباب دي ولا نتعجب من أبو بكر إللي راح دعاهم، إنتم متخيلين إن الخمسة دول بأعمالهم كلها في ميزان حسنات أبي بكر الصديق🙊
تخيلي إنك لو دعيتي حد إنه يعمل حاجة صح ويعملها عمله هيكون في ميزان حسناتك🙊
وفي نفس الوقت لو دعيتي حد إنه يتفرج على أغنية ولا فيلم ولا شجعتي صاحبتك إنها تخب شاب ولا شجعتيها على لبسها الغلط ولا...ولا... فهو في ميزان سيئاتك😞

أبو بكر مقلش أنا مليش دعوة محدش قال لي ادعي الناس، فكان ممكن يكتفي إنه يؤمن وخلاص،
لكن هو معملش كده راح وبدأ يدعو والغريب إن الخمسة دول من قبائل متفرقة وفيهم واحد هو ابن عمة رسول الله صلى الله عليه وسلم😳
إللي هو الزبير، كان ممكن يقول هو قريب رسول الله فهو يدعوه، لأ ...مكنش بيفكر في كده..كان بيفكر إنه عايز يُدخل في الإسلام كل إللي يقدر عليه،
كان بيسارع إنه يكون سبب في هداية الناس ، كان زي ما بيحب الخير لنفسه أحبه لأصحابه،
كان حاسس إن الدين ده مسؤوليته وإنه لازم يوصله لكل واحد يقدر يوصله له👌
وأبو بكر الصديق موقعش في خطأ بعض الدعاة في عصرنا ،
بيدعوا الناس وسايبين أهل بيتهم بدون دعوة😞
راح أبو بكر لبيته وكلم زوجته ودعاها للإسلام فأسلمت وأسلم كل أبناء أبي بكر الصديق ما عدا ابنه الأكبر عبد الرحمن أسلم متأخر زي ما هنشوف بعدين،
ودعا عبد له اسمه 《عامر بن فُهيرة》 للإسلام فأسلم راح مُعتِقه😳
إيه الحركة والنشاط دي والجهد لنشر الإسلام من أول يوم إسلامه دي😦
أمال بعد كده هيعمل إيه😶
ثم إيه إللي خلى الناس دي تسمع كلامه كده على طول من غير حتى ما تروح تسأل رسول الله صلى الله عليه وسلم وتتأكد هل الكلام إللي أبو بكر بيقوله ده صحيح ولا لأ😳
ورسول الله في الوقت ده عمل إيه ...دعا مين تاني من الناس 🤔

كل ده هنعرفه الجزء الجاي إن شاء الله😊



#Eman_Shalapy

ما في وسعي عشان أحافظ على نفسي😊

الدنيا كانت ماشية تمام خلال الثلاث سنين دول،
لحد ما جاء الأمر من الله لرسوله إنه يجهر بالدعوة😮

إزاي جهر رسول الله بالدعوة ؟
وكان إيه رد فعل أهل مكة مع الصادق الأمين؟

ده إللي هنعرف الجزء الجاي إن شاء الله😊



#Eman_Shalapy

دي على كل أهل مكة بأسماء قبائلهم:
يااا بني فهر...يااا بني عدي...يااا بني هاشم..ياااا....ياااا
والناس سمعت الصوت..إيه ده ..مين إللي بينادي ده😦
الصادق الأمين...الصادق الأمين😮
أول مرة يعملها يبقى أكيد في حاجة 😱
فكل الناس بدأت تتجمع وإللي مش عارف يروح يبعت حد من عنده عشان يروح يشوف في إيه😳

أول ما الناس اتجمعت قال لهم محمد بن عبد الله بن عبد المطلب ..الصادق الأمين إللي عايش معاهم بقاله أربعين سنة وعارفينه كويس:
لو قلت لكم إن في جيش خلف الوادي ده جاي يهجم عليكم ...هل هتصدقوني؟
قالوا : طبعا احنا منعرفش عنك إلا الصدق وعمرك ما كذبت😲
فقال لهم : فأنا نذير لكم بين يدي عذاب شديد👌

☆رسول الله قبل ما يقول لهم أي حاجة أقام عليهم الحُجة
يعني خلاهم يعترفوا بلسانهم إنه صادق وإنهم كانوا هيصدقوه،
فاللي يخليهم يصدقوه في إنذاره لهم بهجوم الأعداء، فلازم يصدقوا إنذاره بالعذاب الشديد👌

◇في هنا نقطة مهمة عشان الناس إللي دايما بتقول إنتم بتخوفوا الناس من ربنا وتنفروهم،
ربنا غفور رحيم متقعدوش تخوفوا الناس و...و...
رسول الله أول ما أظهر الدعوة أول حاجة عملها إنه خوف الناس من العذاب 👌
في فرق بين إني أخاطب ناس بصفة عامة وإني أدعو شخص دعوة فردية،
لما أكون بتكلم مع الناس بصفة على اختلاف عقلياتهم يبقى التخويف من العذاب أولا،
لأن الغفلة والبعد عن ربنا بتكون منتشرة بين الناس،
فمينفعش واحد غافل غرقان في المعاصي ومش فارق معاه حاجة تيجي تقول له إن الله غفور رحيم😅
هتلاقيه ساق فيها وازداد في معاصيه، لكن لو اتخوف هينتبه ويقلق هنا بقى ممكن نستعمل معاه الترغيب،
لكن لما يكون الخطاب عاااام زي موقف رسول الله صلى الله عليه وسلم،
فيبتدي بالتخويف من العذاب عشان الناس تنتبه من غفلتها👌

ياترى أهل مكة كان ردهم إيه على الصادق الأمين؟

ده إللي هنعرفه الجزء الجاي إن شاء الله😊


#Eman_Shalapy

لهم الدين 😮
أظن لو حد عمل كده دلوقتي الناس هتقول عليه مجنون وهيقعدوا يبصوا له نظرات غريبة ومش بعيد يسخروا منه، لمجرد إنه بيدعو لدين الله😞
كفار مكة مش عاجبهم الحال فبدأوا يأخذوا خطوات عشان يقضوا على الدين 👌
أول حاجة عملوها إنهم حاولوا يخلوا الناس إللي بتنصر رسول الله على الحياد مين إللي بينصر رسول الله وبيدافع عنه ؟
أبو طالب..يبقى خلونا يا جماعة نُحيّده يعني من الآخر نوقفه عن نصرته لابن أخيه،
راح مجموعة من سادات مكة من المشركين لأبو طالب قالوا له:
شوف يا أبا طالب ابن أخوك آذانا في مكان اجتماعنا وفي المسجد ،
هو عايز يعبد ربه خلاص يروح يعبده بعيد عننا ،
بييجي عندنا ليه في الأماكن بتاعتنا ،فإنت قول له إنه ميجيش ويبعد عننا😤
فأبو طالب حس إن الكلام منطقي..إيه إللي يودي ابن أخوه هناك ..هي الدنيا ناقصة مشاكل..بيروح يستفزهم ليه😕

فراح أبو طالب لرسول الله صلى الله عليه وسلم وقال له:
إن قومك هؤلاء اشتكوا عليك، وقالوا إنك بتروح مجالسهم وبتؤذيهم،
فبلاش تروح عندهم وتقول الكلام إللي بتقوله 😥
فقال لهم رسول الله : شايفين الشمس؟
قالوا : أه😕
فقال رسول الله :
"ما أنا بأقدر أن أدع ذلك منكم أن تشعلوا منها شعلة"
يعني لو قدرتم تشعلوا من الشمس شعلة فأنا مقدرش أسيب الدين ده👌
فأبو طالب لما شاف ثبات رسول الله صلى الله عليه وسلم اتأثر بكلامه وراح قايل لهم :
والله ابن أخويا ده ميكذبش أبدا، ارجعوا يا جماعة وسبوه أنا هفضل أدافع عنه 👌

☆حديث: "يا عم لو وضعوا الشمس في يميني والقمر في يساري على أن أترك هذا الدين ما تركته "
ده حديث ضعيف 👌

فرسول الله بيعلمنا إننا طول ماحنا ثابتين على موقفنا وعندنا ثقة في الله وفي الدين موقفنا ده هيأثر في إللي حوالينا إنهم يشجعونا ويقفوا جنبنا،
لكن لو الإنسان كان متردد في كلامه ومش واثق أوي هتلاقي إللي حواليكي بيضغطوا عليكي لحد ماتعملي إللي هم عايزينه👌
كده أول مرحلة منفعتش 😕
ندخل في مرحلة الحوار والإغراء بالعروض😈

فقالوا خلونا نتكلم معاه يمكن نقنعه ،فاختاروا واحد منهم عشان يروح يعرض على رسول الله صلى الله عليه وسلم شوية عروض،
فاختاروا عتبة بن ربيعة سيد من سادات مكة ،فراح لرسول الله صلى الله عليه وسلم عشان يكلمه،
قال له : يا محمد ! إنت عارف مكانتك إيه بيننا ، ونسبك إيه في مكة، وإنت جيت بأمر عظيم فرقت به بيننا ،
وعِبت في آلهتنا وديننا وكفرت آباءنا وأجدادنا،
فأنا هعرض عليك شوية عروض فكر فيها يمكن تقبل حاجة منها😓
فقال له رسول الله : قل يا أبا الوليد .
☆وأبو الوليد كانت كنية عتبة بن ربيعة 😉

فقال عتبة:
يابن أخي، لو إنت عامل القلق ده كله عشان محتاج أموال،
قول واحنا هنجمع لك أموال لحد ما تكون إنت أكثر الناس مالا،
ولو إنت عايز شرف هنخليك سيد مكة، منخدش قرار غير لما نرجع لك، ولو إنت عايز مُلك ..هنخليك ملك مكة تحكم زي مانت عايز،
ولو إللي بيجيلك ده مس من الجن هو إللي بيخليك تقول الكلام ده هنجيب لك أحسن الأطباء ودفعنا كل ما نملك لحد ما تخف 👌
كل ده ورسول الله يسمع ..مقطعهوش ولا مرة،يعني هو عمال يتهمه باتهامات باطلة ورسول الله بيسمع،
فبعد ما خلص قال له رسول الله : خلصت كلام؟
فقال له عتبة خلصت😅
فقال له رسول الله : فاسمع مني👌
وبدأ رسول الله صلى الله عليه وسلم يقرأ القرآن من بداية سورة فُصّلت،
"حم (1) تَنْزِيلٌ مِنَ الرَّحْمَنِ الرَّحِيمِ (2) كِتَابٌ فُصِّلَتْ آيَاتُهُ قُرْآنًا عَرَبِيًّا لِقَوْمٍ يَعْلَمُونَ (3) بَشِيرًا وَنَذِيرًا فَأَعْرَضَ أَكْثَرُهُمْ فَهُمْ لَا يَسْمَعُونَ "
واستمر رسول الله يقرأ ويقرأ وعتبة يستمع للآيات،
بيسمع القرآن بصوت رسول الله صلى الله عليه وسلم مباشرة متخيلين🙊
فلما وصل رسول الله عند آية:
"فَإِنْ أَعْرَضُوا فَقُلْ أَنْذَرْتُكُمْ صَاعِقَةً مِثْلَ صَاعِقَةِ عَادٍ وَثَمُودَ "
فهنا عتبة خاف وقام ووضع إيده على فم رسول الله صلى الله عليه وسلم وقال :
ناشدتك الله والرحم ..ناشدتك الله والرّحم.😰
يعني بيستحلفه بالله وصلة الرحم إللي بينهم إنه ميخليش
ربنا يعمل فيهم زي ما عمل في قوم عاد وثمود،

☆فاكرين قصتهم 😁

فأكمل رسول الله تلاوة باقي السورة لحد ما وصل لأية السجدة وسجد ،
وقال لعتبة: هذا ما عندي.
فقام عتبة من عند رسول الله ورجع لأصحابه إللي كانوا مستنيين الأخبار،
أول ماشافوه جاي عليهم في حالة ذهول ..وشه متغير..قالوا والله عتبة راجع لكم بغير الوجه الذي ذهب به😳
إيه جرى لك يا أبا الوليد😦

قال لهم: ......المرة الجاية إن شاء الله نعرف قال لهم إيه😅


#Eman_Shalapy

،
ولا مَنّ على ربنا ولا على رسوله ولا قال للصحابة أنا كنت وكنت وسيبت كل ده عشان الإسلام زي ما في ناس بتعمل للأسف😞
إيه إللي يخلي شاب يسيب النعيم إللي كان فيه ده وإللي أي شاب يتمناه؟
إيه إللي يجبره إنه يعرض نفسه للأذى ده كله؟
هيستفيد إيه وهو عنده الدنيا كلها؟
الدافع إللي خلاه يسيب أحسن الأكلات وأحسن اللبس ويتعرض للعذاب الجسدي ويصبر عليه وكأنه ولا حاجة ، هو إنه عايز الدار الآخرة،
مشكلة الناس دلوقتي إنها عايزة الدنيا والآخرة، ومع أول اختبار أو ضغط نفسي للأسف تلاقيها أول حاجة تفرط فيها هي دينها،
وناسيين إن الدنيا دار ابتلاء ودار تنازلات عن إللي بنحبه سواء أموال أو أهل أو أصحاب أو وطن في مقابل رضا الله،
وهنشوف إزاي الصحابة عملوا كده فعلا👌

كل الوسائل دي مقدرتش إنها تقضي على الدعوة للإسلام،
ولقوا إن الناس ثابتة وبتزيد😕
فلجأوا بقى للوسيلة إللي كل ظالم على مر العصور بيلجأ لها ،
وسيلة التعذيب والتهديد بالقتل والقتل فعلا😑

عمل إيه كفار قريش مع المسلمين؟
وكان إيه رد فعل المسلمين؟
وكان إيه رد فعل رسول الله صلى الله عليه وسلم نفسه على حملة التعذيب دي؟

ده إللي هنعرفه الجزء الجاي إن شاء الله 👌



#Eman_Shalapy

وش جدال ولا مفاوضات،مع إن رسول الله كان ممكن يتظاهر بعبادة الأصنام عشان هم يعبدوا الله ولما يعبدوه ويعرفوه ممكن يسلموا🤔
لكن ربنا قطع الطريق على أي مساومة في العقيدة👌

من المفاوضات إللي حصلت برده إنهم طلبوا من رسول الله المعجزات،
قالوا الأنبياء إللي قبلك جاءوا بمعجزات إنت مجبتش حاجة 🤷‍♂️
فقال لهم : ماهو أنا جئت لكم بكلام الله👌

قالوا : لأ..احنا عايزين معجزات تانية ، عايزين آااااا....
بكرة إن شاء الله نعرف هم عايزين إيه😅


#Eman_Shalapy

الله صلى الله عليه وسلم بيحكيه الصحابي عبد الله بن مسعود:
إنه مرة كان يصلي عند البيت ، وأبو جهل ومعاه أصحاب له قاعدين، فقالوا لبعض:
مين يروح يجيب أمعاء البعير بتاع آل فلان إللي ذبحوه ويضعه على ظهر محمد وهو ساجد😈
فقام أشقاهم وجاب الأمعاء واول ما رسول الله سجد راح حاطه على ظهره بين كتفيه،
وقعدوا يضحكوا على رسول الله لدرجة إنهم قعدوا يتمايلوا على بعض من الضحك😑
بيقول عبد الله بن مسعود إن رسول الله ظل ساجد لحد ما جاءت فاطمة وشالت الأمعاء من على ظهره وأنا مكنتش قادر أعمل حاجة😔
فقام رسول الله وقال : اللهم عليك بقريش ..اللهم عليك بقريش..اللهم عليك بقريش🤲

☆طبعا الدعاء هنا كان على الناس إللي عملت كده مش على كل قريش👌

◇لو انتبهتم إن كل مرة بيؤذوا رسول الله كان بيبقى وهو بيصلي،
يعني هو بيطيع ربنا ولم يؤذي أحد ومع ذلك كان رسول الله بيتعرض للأذى وساعات القتل،
ومفكرش مرة إنه يقول خلاص أنا مش هروح أصلي عند المجالس بتاعتهم تاني،
وده يعلمنا إننا نثبت على الحق مهما كان الأذى، ونستمر في الدعوة مهما كانت الناس مش عاجبها👌
ويعلمنا كمان إن مش معنى إن ربنا بيسلط بعض الكفار والظلمة على المؤمنين فده لِهوَان المؤمنين عليهسبحانه،
ولا لأنه غير قادر إنه يمنع الأذى عنهم ولكنه سبحانه له حكم وتدابير لا يعلمها غيره😊

وده يخلينا نسأل سؤالين مهمين🤔
¤ليه ربنا يبتلي المؤمنين وعلى رأسهم رسوله وأحب الخلق إليه كده ويسلط عليهم الكفار 😥

¤والسؤال الثاني ليه المسلمين ورسول الله صبروا ومردوش على الكفار وحملوا السلاح ودافعوا عن أنفسهم😑

هنعرف الإجابة إن شاء الله الجزء الجاي ، وهنشوف بدايات الفرج للمسلمين بعد ثلاث سنوات من القهر والتعذيب👌


#Eman_Shalapy

ي وصلوا لها لازم يمشي في نفس الطريق بتاعهم إللي مشيوا فيه،
غير كده هيضيع 🤚
"وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُونَ "

♡ثالثا:
في سنن كونية.. زي إللي بيقع في مياه عميقة وهو ميعرفش يعوم هيغرق،
ومن السنن الكونية إن الباطل له قوة فمينفعش للمسلمين إنهم يقولوا ربنا معانا واحنا على الحق ويدخلوا حرب خاسرة تقضي عليهم 🙃
أيوة جند الله هم الغالبون، لكن الإسلام دين واقعي عملي،
مش مبني على مشاعر البشر المتقلبة💁‍♀️
يشوف قوة العدو واحنا قوتنا أد إيه ونحط الخطط المناسبة عشان نقدر نحقق النصر👌
يعني باختصار نأخذ بالأسباب مع التوكل على الله،
فلو دلوقتي المسلمين قاموا وكلهم ثاروا وهم قلة مستضعفة معندهمش أي امكانيات نهائي ..ممكن يقتلوا واحد ولا اثنين ولا حتى مائة من كفار مكة،
لكن في المقابل هيتم إبادتهم جميعا، زي ما قلنا من شوية😅

ده غير إن القتال مكنش ضروري أوي لأن الغاية مكنتش حكم مكة، الغاية كانت نشر الإسلام في مكة،
هي الدعوة أه ماشية بمشقة وبطلوع الروح ..بس ماشية😅
بعكس لو اتفرضت فرض بالقوة على ناس أصلا العزة والشرف والعلو في دمهم،
محدش هيقبل بالدعوة ولا حتى هيسمعوا لها وهيعاندوا أكثر لو حصل صِدام بينهم وبين المسلمين،
ده هم أصلا من أسباب معاندتهم اتباع دين الإسلام ضعف المسلمين😏

☆وده يعلمنا إننا لما نيجي ندعي حد نشوف نفسية الشخص ده إيه،
هل هو من النوع إللي بيتأثر أكثر بمظاهر الرحمة فيّ ،
فأزود منها عشان ألين قلبه، ولا من النوع إللي بيتأثر لو شاف مني ذكاء ولا قوة،
ولا من النوع إللي بيتأثر لو شاف مني لطف وأدب في الحوار وهكذا 😉

♡رابعا:
من حكمة ربنا في إعراض المسلمين عن المشركين وميكونش في صِدام،
إن ربنا يعلم إن في ناس من كبار المشركين ومن أشدهم على المسلمين هيؤمنوا،
وهيتأثروا بثبات المسلمين برغم كل الشدائد والصعوبات 👌
ده غير إن تعرض المسلمين للظلم هيكون سبب في تحرك بعض المشركين لنصرتهم زي ما هنشوف بعدين في قصة الحصار في شعب أبي طالب،
وكمان سبب في إسلام واحد من أبطال المسلمين حمية للظلم إللي وقع على رسول الله صلى الله عليه وسلم😊

احنا دلوقتي لسه في السنة السادسة من البعثة،
والمشركين عمالين يعذبوا في المسلمين ويعتدوا على رسول الله صلى الله عليه وسلم،
وأعداد المسلمين بتزيد وكانوا يخفون إسلامهم ،لكن كده هيبدأوا يظهروا والمشركين يعرفوهم😕
ففي نفس الوقت إللي احنا مش عايزينهم يظهروا فيه عشان ميتعذبوش،
عايزين نخفف عن الناس إللي بتتعذب دي وفي نفس الوقت مش هينفع حرب أو إنهم يدافعوا عن نفسهم😑

احنا عايزين حل عملي ينفع مع المستضعفين دول وغيرهم من الناس إللي هتيجي في المستقبل🤔
هو ربنا كان ممكن ينقذ رسوله والمؤمنين بكلمة 《كن》
لكن دي مش سنة التغيير ، رسول الله بيعلمنا الأخذ بالأسباب إللي نقدر عليها،
عشان محدش بعدين ييجي يقول أصل ده رسول الله ومعاه المعجزات🙄
هنا مفيش معجزات ...كلها أسباب بشرية نقدر نعملها😉

فالحل كان إنهم يشوفوا مكان تاني برة مكة يهاجروا له عشان يعبدوا الله فيها بدون تعذيب أو تهديد بالقتل👌

يعني هيسيبوا أهلهم ووطنهم والأماكن إللي عاشوا فيها عمرهم وأموالهم وتجارتهم و....و...
وده مش قرار سهل ، احنا دايما نسمع إن المسلمين هاجروا ونعدي الموضوع وأهه كلمة بتتقال😞

متخيلين واحد يسيب حياته المستقرة في بلده إالي بيحبها وكان عايش فيها مرتاح عشان بس قضية الدين😐
يعني هم مش هيسيبوا البلد عشان يروحوا يشتغلوا ويحسنوا مستوى المعيشة بتاعهم مثلا،
ولا هيروحوا بلد أعظم رفاهية فالموضوع كان هيبقى سهل عليهم،
لكن دول هيسافروا للمجهول، يا ترى هيلاقوا شغل ولا لأ، ياترى البلد إللي هيروحوه ده حر ولا برد يا ترى...يا ترى...

☆ودي حاجة جديدة الإسلام بيعلمها للصحابة وبيعلمها لنا،
إن أرض الله واسعة، وإن أعظم قطعة في الأرض هي إللي نقدر نعبد ربنا فيها👌
يعني احنا مش بنفضّل أرض على أرض بالأنهار والأشجار والعشيرة ،
لكن هل نقدر نعبد فيها الله بدون أذى ولا لأ،
فهم هيسيبوا أشرف بقعة على الأرض وهي مكة ويروحوا مكان تاني بس عشان يعرفوا يعبدوا ربنا😊

رسول الله صلى الله عليه وسلم أمر بعض أصحابه بالهجرة للحبشة،
والحبشة بعيدة جدا عن مكة واللغة مختلفة تماما عن لغة العرب🤨
ليه رسول الله اختار الحبشة بالذات؟
هو لخص الموضوع كله في كلمتين:
إن فيها ملك لا يُظلم عنده أحد 👌
مين هو الملك ده واشمعنى رسول الله ذكر صفة العدل وإنه غير ظالم؟
ومين الشخصيتين إللي هيسلموا ويقلبوا الموازين لصالح المسلمين في مكة 😊
ده إللي هنعرفه الجزء الجاي إن شاء الله😁


#Eman_Shalapy

إنه مش على دين محمد وده عيب جدا عندهم،
ولا يروح ويرجع في كلامه ويقول إنه ساب الدين ولا يدخل في الدين وخلاص😵
فدعا😊
دعا الله بصدق : يارب لو دين محمد ده حق فاجعل تصديقه في قلبي، يعني خليني مؤمن،
ولو مش حق طلعني من الورطة دي😔
فوقع تصديق الإسلام في قلب حمزة واطمان له وراح تاني يوم لرسول الله صلى الله عليه وسلم يعلن إسلامه😊

☆طبعا مش هقول لكم على فرحة رسول الله كانت عاملة إزاي 😅
إنتم حطوا نفسكم مكانه هتحسوا إن شاء الله بالسعادة إللي هو حس بيها 😊
وطبعا قريش قللت من أذاها لرسول الله بسبب إسلام حمزة 👌
شوفتم إزاي إن الإنسان ممكن يكره شيء يحصل له لكن في النهاية هو خير💁‍♀️
رسول الله مكنش عارف إن الموقف المؤلم إللي حصل له ده هيكون سبب في سعادة له مكنش متوقعها أبدا 👌
ماهو بشر لا يعلم الغيب إلا لو ربنا قال له 😉
فكم في حياتنا من مواقف تضايقنا وتألمنا من بدايتها لكن العاقبة كانت خير😊
فأبشروا 😁
رُبّ أَمرٍ تَتّقِيهِ.... جَرّ أَمرًا تَرتَجِيهِ
خَفِيَ المحبوب منه... وبَدَا المَكرُوهُ فيهِ😉

بعد إسلام حمزة بثلاثة أيام فقط حصلت حادثة قلبت كل موازين القوى في مكة وهيكون لها الأثر على مدى التاريخ كله😍

ياترى إيه إللي حصل 😁
هنعرف الجزء الجاي إن شاء الله😊



#Eman_Shalapy

الأيام يُقال إنه بعد إسلام حمزة بن عبد المطلب بثلاثة أيام،
كان عمر رايح عند الكعبة فلقى رسول الله لسه جاي وهيصلي ،
فكبر رسول الله وبدأ في الصلاة وبدأ يقرأ سورة الحاقة وعمر يسمع القرآن من رسول الله
"الْحَاقَّةُ. مَا الْحَاقَّةُ. وَمَا أَدْرَاكَ مَا الْحَاقَّةُ.
كَذَّبَتْ ثَمُودُ وَعَادٌ بِالْقَارِعَةِ. فَأَمَّا ثَمُودُ فَأُهْلِكُوا بِالطَّاغِيَةِ......."

فيقول عمر أنا بسمع وأتعجب من الكلام 🤨
فقال عمر : ده والله شاعر🤔
فقرأ رسول الله :
" إِنَّهُ لَقَوْلُ رَسُولٍ كَرِيمٍ * وَمَا هُوَ بِقَوْلِ شَاعِرٍ قَلِيلًا مَا تُؤْمِنُونَ"
فقال عمر : يبقى كاهن🤔
فقرأ رسول الله :
" وَلَا بِقَوْلِ كَاهِنٍ قَلِيلًا مَا تَذَكَّرُونَ * تَنْزِيلٌ مِنْ رَبِّ الْعَالَمِينَ"
قال عمر:
فوقع الإسلام في قلبي..كل الشكوك راحت وتيقن إن هو ده دين الحق👌
وبعدها راح لرسول الله صلى الله عليه وسلم فأسلم،
وأصابته دعوة رسول الله :
"اللهم أعز الإسلام بأحب هذين الرجلين إليك بأبي جهل أو بعمر بن الخطاب ،
قال : وكان أحبهما إليه عمر "
وفرح به رسول الله والمسلمين فرح شديد جدا 😍
وبعد ما أسلم عمر بن الخطاب راح وسأل بين الناس مين أكثر واحد بينقل الكلام في مكة 🤔
فقيل له :
جميل بن مَعمَر🤨
فراح له عمر وقال له: يا جميل معرفتش إللي حصل 😈
أنا أسلمت ودخلت في دين محمد 😁
فجميل بن معمر مكلموش ولا سأله ولا رد عليه😳
راح واخد هدومه وطالع وعمر وراه لحد ما وصل لباب المسجد وصرخ بأعلى صوته:
يا معشر قرااااايش لقد صبأ عمر 📣📣
☆الصابئ يعني إللي بيغير دينه،
فقال له عمر:
كذبت...بل أنا أسلمت👌
فراح الناس قايمين عليه وقعدوا يضربوه🙊
وهو مسكتش😅
قعد يضرب فيهم هو كمان 😅
وقعدوا يضربوا في بعض مدة طويلة لحد ما عمر وقع مبقاش قادر يقوم😮
وراح قايل لهم:
اعملوا إللي تعملوه والله لو كنا ثلاثمائة رجل لنسيب لكم البلد أو نطلعكم إنتم منها😤
فوهم عمالين يتخانقوا كده عدى عليهم رجل كبير في السن من سادات مكة هو العاص بن وائل، شاف المنظر ...عمر بينضرب😦...فقال لهم إيه إللي حصل 😐
فقالوا له : صبأ عمر 😑
فقال لهم : وإنتم مالكم 😕...واحد اختار لنفسه حاجة إيه إللي يدخلكم في الموضوع🤨
إنتم مفكرين إن قبيلته هتسيبكم كده عادي من غير ما تنتقم منكم...اتركوه😑
فتركوا عمر وبدأ عمر يجهر بالإسلام في كل مكان محدش يقدر يتعرض له بأذى😊
وكان عمره يوم ما أسلم...المفاجأة : ستة وعشرين سنة 🙊
يقول عبد الله بن مسعود وكان من الصحابة الأوائل في الإسلام: إسلام عمر كان فتح لنا 👌
مكنش حد فينا من المستضعفين يقدر يصلي عند الكعبة،
أول ما أسلم عمر راح على طول صلى عند الكعبة،
فقريش ضربوه،
فضربهم لحد ما فرض نفسه عليهم وبقى يصلي والمسلمين وراه يصلوا ومحدش يقدر يتعرض لهم بأذى😊

¤ملحوظة مهمة😁
القصة المشهورة بتاعة إن عمر راح لأخته فاطمة البيت غضبان لما عرف إنها أسلمت مع زوجها وسمعهم بيقرأوا القرآن ودخل عليهم وضربهم وبعدين طلب يقرأ القرآن واغتسل وقرأ آيات سورة طه وبعدين راح لرسول الله دار الأرقم وأسلم.
القصة دي لا تصح متنا ولا سندا🙅‍♀️❌
《وهتلاقوا التفصيل في كتاب : ما شاع ولم يثبت في السيرة النبوية 》

دلوقتي الوضع اختلف بعد إسلام عمر وحمزة فهل الأوضاع هتستقر للمسلمين في مكة ويبدأ الفرج ولا هتشتد الأمور أكثر؟
ده إللي هنعرفه الجزء الجاي إن شاء الله 😊



#Eman_Shalapy

لمين تاني😑
عايزين يثبتوا للناس إنهم متبعوش محمد وإنه هو إللي سحرهم😶
ده غير إن المشركين عرفوا إن المسلمين إللي هاجروا للحبشة عايشين هناك مرتاحين من غير مشاكل والنجاشي استقبلهم استقبال حافل،
فكل ده غاظ الكفار فبدأوا يصبوا غضبهم في تعذيب المسلمين،
هنا رسول الله أمر المسلمين بالهجرة مرة ثانية للحبشة،
لكن للأسف المرة دي الموضوع صعب😥
قريش مفتحة عينها وحاطين حراس في كل مكان عشان محدش يقدر يطلع برة مكة من المسلمين أو حتى المشتبه فيهم إنهم مسلمين أو حتى إللي بيفكروا في الإسلام 🤨

☆سبحان الله فعلا ما أشبه اليوم بالبارحة👌

وطبعا السؤال إللي بيطرح نفسه هنا...هو ليه أهل مكة مضيقين على المسلمين كده😕
مش المفروض يسيبوهم يطلعوا برة البلد🤨
هم هيسيبوا لهم البلد يشبعوا بيها ويمشوا ..أهل مكة بقى زعلانين ليه بقى🙄

آاااااا....إن شاء الله نجاوب على السؤال ده المرة الجاية😁 ونشوف مع بعض هل المسلمين هيقدروا يخرجوا برة مكة ولا لأ😉



#Eman_Shalapy

الوفد الإسلامي،
يعني كأن المسلمين بيردوا بطريقة عملية على عمرو بن العاص بإن احنا مش غلمان سفهاء زي مانت قلت😏

☆شوفتم إزاي المسلمين همهم المصلحة،
مقعدوش يتخانقوا وكل واحد يقول لا أنا إللي اتكلم وده يقول أنا،
مش مهم مين يتكلم أهم حاجة إن الرسالة توصل مادام الشخص إللي بيتكلم مؤهل للكلام👌
يارب نفهم 😑

بدأ الحوار بين النجاشي وجعفر بن أبي طالب وسط اجتماع الوزراء والبطارقة وعمرو بن العاص والموقف مهيب 🙊

سأل النجاشي جعفر سؤال محدد ومباشر:
إيه هو السؤال😁
هنعرف الجزء الجاي إن شاء الله 😅


#Eman_Shalapy

بشة في حماية النجاشي ونرجع مع عمرو بن العاص لمكة،
عشان نشوف كفار قريش هيتصرفوا إزاي في الورطة إللي هم فيها دي 😶
تعذيب المسلمين فشل...المفاوضات مع رسول الله صلى الله عليه وسلم فشلت،
محاولاتهم لاستعادة المسلمين الهاربين فشلت...جربوا كل حاجة مفيش ولا طريقة نافعة... ناقص إيه تاني🤔

أيوااااا مش فاضل غير☻ ......
هنعرف إن شاء الله إيه آخر وسيلة المشركين استخدموها للضغط على رسول الله وعلى المسلمين 😊



#Eman_Shalapy

، فهشام بن عمرو هيستغل العصبية الفطرية إللي عنده😉
فقال له :
يا زهير! هو إنت عادي كده تاكل وتشرب وأخوالك بيحصل فيهم إللي إنت عارفه، وماشي ورا أبي جهل😒
وبعدين قال له كلمة خطيرة 😈
قال :
أحلف لك بالله إن لو كانوا دول أخوال أبي جهل وإنت إللي روحت قلت له تعال نقاطع الناس دي مكنش هيوافق😤

فزهير اتحمس وقال: طيب انا هعمل إيه وأنا رجل لوحدي، لو كان معايا حد تاني كنت قمت ونقضت الصحيفة دي😤
فقال له هشام : انا لقيته لك🤫
فقال له زهير مين:😕
فقال هشام : أنا 😅
فقال زهير: طيب شوف لنا واحد ثالث🤔
فهشام ترك زهير وراح لواحد ثاني من أصحاب الأخلاق والمروءة اسمه المطعم بن عدي،
وقعد يذكره بأرحام بني المطلب وبني هاشم فقال له المطعم:
وأنا هعمل إيه وانا رجل لوحدي😕
فقال له هشام:
لقيت لك واحد، فقال المطعم: مين🤔
فقال له : أنا
قال المطعم: شوف لنا ثالث، قال هشام في واحد فعلا هو
زهير بن أبي أمية، فقال له المطعم: طيب شوف لنا رجل رابع🤔
المطعم كان من قبيلة ثالثة، يبقى كده عندنا ثلاثة أشخاص من ثلاثة قبائل مختلفة،👌
المهمة صعبة ويمكن مستحيلة😑
الناس دي هتقف قصاد قريش كلها في حاجة كانوا اتفقوا عليها،
ومع ذلك هشام بن عمرو 《الكافر》 لم يستسلم👌
وراح فعلا يدور على رجل رابع،
فراح لأبي البختري بن هشام،
وقال له زي ما قال للمطعم بن عدي، فسأله أبو البختري:
هل في حد معانا على الموضوع ده🤔
فقال له هشام : أيوة ، أنا والمطعم بن عدي وزهير بن أبي أمية👌
فقال له أبو البختري: طيب شوف لنا رجل خامس😕
فسبحان الله خرج هشام بن عمرو بكل حماس يدور على رجل خامس😮

☆أظن لو حد مننا مكانه كان زماننا يئسنا من الرجل الثاني😅

فراح لواحد اسمه زَمعة بن الأسود وحكى له القصة وقال له إن في أربعة مجتمعين على الموضوع ده فقال له إنه موافق👌
☆الحمد لله مقلوش شوف لنا واحد سادس 😅

المهم الخمسة اجتمعوا وأخذوا القرار الجريء إللي هيعارضوا به كل سادات قريش، ورأيهم ممكن يؤدي لانقسام شديد في مكة، متخيلين هينصروا دين هم مش مقتنعين به أساسا 😶
فإيه إللي يجبرهم أصلا على كده وهم مش هيستفيدوا أي حاجة أصلا🤨
كل إللي حركهم كانت الحمية والنخوة👌
طبعا كله بتقدير ربنا، لأن ربنا إذا أراد شيئا هيأ أسبابه😉

اجتمعوا واتفقوا هيعملوا إيه واتفقوا على اليوم ،وقال لهم زهير إنه هو إللي هيبدأ الكلام وإنتم ادخلوا ورايا على طول😈
راح الخمسة في اليوم الموعود ، طبعا كل واحد لوحده عشان محدش ياخد باله🤭

دخلوا المسجد وقام زهير ونادى على أهل مكة وقال :
يا أهل مكة!
احنا نأكل ونشرب ونلبس وبنو هاشم هَلْكى محدش يبيع لهم حاجة ولا يشتري منهم😑
والله ما أنا قاعد غير لما نقطع الصحيفة الظالمة دي 😤

ّسمع الكلام أبو جهل اتعصب...إيه الراجل إللي هيضيع علي فرصتي دي😠
فراح قايم بكل حماسة وقال:
كذبت والله ما نقطعها😡
راح قايم زمعة بن الأسود 🤭 وقال لأبي جهل:
أنت والله أكذب😡
إحنا أصلا مكناش موافقين عليها لما اتكتبت من الأول 😠
فراح قايم أبو البختري بن هشام وقال:
صدق زمعة احنا مش راضيين عن إللي اتكتب فيها 😤
فقام المطعم بن عدي وقال:
صدقتما وأي حد يقول غير كده يبقى كاذب واحنا نتبرأ ألى الله منها😤
وبعدين قام هشام بن عمرو إللي جمعهم أصلا وقال نفس كلامهم وأصر على نقض الصحيفة هو كمان😅

إللي يشوف الموقف... يلاقي إن خمسة من سادات قريش عايزين ينقضوا الصحيفة وأبو جهل الوحيد إللي واقف بيدافع،
والباقيين قاعدين ساكتين بيتفرجوا والأغلبية الصامتة ملهاش أي لازمة 😀

وسط ماهم بيتخانقوا كده لقوا إللي داخل عليهم 😮

مين إللي دخل ...وعايز إيه؟
وهل الحصار اتفك ولا لأ...ده إللي هنعرفه الجزء الجاي إن شاء الله😊



#Eman_Shalapy