(١٦) ألم يَحِنْ للذين آمنوا بالله ورسوله أن تلين قلوبهم وتطمئنّ لذكر الله سبحانه، وما نزل من القرآن من وعد أو وعيد، ولا يكونوا مثل الذين أُعطوا التوراة من اليهود، والذين أُعطوا الإنجيل من النصارى، في قسوة القلوب، فطال الزمن بينهم وبين بعثة أنبيائهم فقست بسبب ذلك قلوبهم، وكثير منهم خارجون عن طاعة الله إلى معصيته؟!

- سورة الحديد | المختصر في التفسير🌿.

"إذا حزن الواحد منّا لمُصاب إخوانه المسلمين مؤقتًا ثم عاد إلى مواقعةِ ما حرّم الله تعالى والإعراض عن طاعة الله فليعلم أن هذا من الخذلان..
لأن الذل والهوان الذي نعيشه اليوم وتكالب الأمم علينا إنما سببه الإعراض عن طاعة الله تعالى وتوحيده وشريعته ..
فالنصرة الحقيقة أن يتوب الواحد منّا إلى ربه تعالى ويعمل ما يستطيع لرفعة نفسه عند الله تعالى ثم رفعة أمته، ولا يكلف الله نفسًا إلا وسعها.."


د.مطلق الجاسر.

#قصص_الأنبياء(٢)
#السيرة_النبوية
#الحلقة_الرابعة_عشرة
#الجهر_بالدعوة

وقفنا المرة إللي فاتت عند رسول الله صلى الله عليه وسلم لما كان بيدعو الناس في السر لمدة ثلاث سنوات،
في السنة الأولى من البعثة يُقال إنه اتولد لرسول الله صلى الله عليه وسلم ولد وسماه عبد الله،
لأن الموضوع فيه خلاف ، علماء قالوا اتولد قبل البعثة وعلماء قالوا اتولد بعد البعثة😉

وكنا قلنا قبل كده إن أبناؤه كانوا القاسم وزينب وأم كلثوم ورقية وفاطمة، وقلنا إن القاسم مات ومتبقاش غير البنات،
دلوقتي رسول الله رُزق بولد تاني من زوجته خديجة ، فهو لم يتزوج غيرها👌
فهي حملت تسعة اشهر وولدت ولد تاني بعد أربع بنات وموت الولد الأول،
فأكيد طبعا الفرحة هتبقى مختلفة ولد على أربع بنات😅
عدت الأيام ومات عبد الله، مات وهو صغير🙊

☆في ناس لو حصل معاها كده تقعد تقول والعياذ بالله طيب ليه بتعطيه لي يارب من الأول لما أنت هتأخذه مني تاني،
ليه تعلقني بيه من البداية...كان بلاشه أحسن😞

وطبعا ده إعتراض على قضاء الله، والناس دي مش فاهمة إن الإنسان مش هيأخذ أجر الصابرين غير لما يتعرض لمواقف شديدة يبان فيها صبره،
زي الطالب بالضبط مش هيبان مذاكرته وتفوقه وذكاؤه إلا لما يتحط في الإمتحان👌

رسول الله لم يعترض ورضي بقضاء الله وكمل حياته في الدعوة إلى الله، لأن الدنيا مش بتقف على موت أحد👌
وكأن ربنا بيقول لنا أهه بشر زيكم ومكنش عنده غير بنات وأولاده الصبيان بيموتوا ،
عادي يعني الحياة بتمشي...مش نهاية الكون..أيوة الإنسان ممكن يحزن لكن ميخليش الحزن ده يوقف حياته👌

خلال الثلاث سنوات الأولى من البعثة أسلم ستون رجل وامرأة فقط من قبائل متفرقة في مكة،
يعني لو قسمناها هنلاقي إن كل سنة بيسلم حوالي عشرين شخص🤔
والداعية هو رسول الله الصادق الأمين إللي مفيش أحد في أخلاقه ولا في بلاغته ولا في قوة اقناعه،
ومع ذلك أسلم العدد القليل ده👌
فما بالنا باللي أقل منه ...كل حاجة حصلت مع رسول الله لها معنى ومغزى،
وكأن ربنا بيقول لنا اصبروا ومتستعجلوش، الدعوة عايزة صبر وطولة بال،
إللي أحسن منكم لم يُسلم على إيده غير القليل فمتستعجلوش👌
من الناس إللي أسلمت في الثلاث سنوات دول كان《 خَبّاب بن الأَرَت》و《مصعب بن عمير》و《عبد الله بن مسعود》و《جعفر بن أبي طالب》و《 وسعيد بن زيد بن عمرو بن نفيل》
فاكرين زيد بن عمرو بن نفيل إللي كان موحد على دين إبراهيم عليه السلام وكان مستني نبي آخر الزمان ودعا الله إن ابنه يكون صاحب النبي ده😉
وسعيد بن زيد ده كان متزوج من ابنة عمه فاطمة بنت الخطاب أخت عمر بن الخطاب، فأسلمت فاطمة مع زوجها سعيد،
وكان إللي بيُسلم بيخفي إسلامه 👌
والناس إللي أسلمت دي كان اسمهم الرّعِيل الأول الأول يعني السابقون إلى الإسلام،
وكل إنسان رأى رسول الله صلى الله عليه وسلم أو اجتمع معه وآمن به واستمر على إيمانه حتى مات رسول الله ومات أو مات هو على الإيمان فده كده اسمه صحابي👌

فالستين رجل وامرأة الذين آمنوا برسول الله دول اسمهم صَحابة👌

☆قبل ما نبدأ في الدعوة الجهرية هنقول قاعدة مهمة لأنها مستمرة معانا في شرح السيرة وكمان دي عقيدتنا كمسلمين وهي :
إن القرآن الكريم《 كلام الله》 يعني كلام ربنا تكلم به بصوت وحرف ولكن بطريقة تليق بجلاله وكماله،
ولله المثل الأعلى مش احنا بنتكلم كلام عبارة عن صوت وحروف ؟
أهه برده القرآن ربنا تكلم وقال القرآن ، يعني القرآن مش مخلوق زي السماوات والأرض وزي البشر👌
والقرآن لم ينزل سور كاملة على بعض،
ولكن نزل آيات متفرقة على حسب الاحداث والمناسبات،
يعني ممكن النهاردة تنزل آية من سورة البقرة، غدا أربعة آيات من سورة الشعراء وهكذا😉
يعني لما كانت تحصل حاجة ربنا يقول لجبريل آيات القرآن وجبريل يأخذ الآيات 《من الله مباشرة》 ويقولها لرسول الله صلى الله عليه وسلم،
يعني ربنا بينَزّل الآيات على جبريل وجبربل ينزلها على محمد رسول الله ورسول الله يقولها للناس👌

لكن مش معنى إن القرآن نزل آيات متفرقة يبقى أي احد يحط أي آية مكان الثانية😅
لأن ترتيب الآيات في المصحف توقيفي، يعني رسول الله فقط هو إللي رتبها الترتيب إللي احنا عارفينه ده بوحي من الله👌
يعني كان بيقول لكتّاب الوحي خلوا آية كذا وييجي بعدها آية كذا في سورة كذا،
والقرآن كله عبارة عن مائة وأربعة عشرة سورة، نزل منها اثنان وثمانون سورة في مكة😉
السورة المكية التركيز فيها هيكون على العقيدة👌
يعني من هو الله والإيمان بالغيب ويوم القيامة والأحداث إللي هتحصل فيه،
وكمان هيحكي لهم أحداث الأمم السابقة ويدعوهم للتفكير العقلي المنطقي هل الكلام ده مقنع ولا لأ👌
يعني دي قاعدة ربنا بيضعها لأي إنسان عايز يتعلم الدين😉
تبدأ بالعقيدة يعني تعرف مين هو الله ،
وإيه هو اليوم الآخر ويعني إيه جنة ونار وشكلهم إيه،
ونتعلم أخبار الأمم السابقة عشان نتعظ ومنقعش في نفس أخطائهم،
ومع ده كله نتدبر في الآيات والكون وفي أحداث حياتنا عشان الإيمان يدخل القلب والعقل👌

لأن الإيمان لما

يدخل القلب والعقل بيترسخ في الإنسان ويبقى مستحيل أي عوامل خارجية تقدر تؤثر فيه زي ما هنشوف الصحابة وإللي حصل معاهم😊

بعد الثلاث سنوات من الدعوة سرا وإسلام الستين رجل وامرأة من قبائل مختلفة،
ربنا أمر رسوله بالجهر بالدعوة لأن دلوقتي بقى في قاعدة نقدر نبني عليها،
في أتباع للدين... أهل مكة مش هيقدروا عليهم لأنهم من قبائل مختلفة وكمان فيهم ناس كثيرة من أشراف مكة💁‍♀️

الجهر بالدعوة كان على مرحلتين :
المرحلة الأولى كانت إنه يجهر بالدعوة بين أقاربه،
ربنا أنزل عليه آية:
"وأنذر عشِيرتَك الأقربين"
والحكمة إن رسول الله يبدأ بأهله هي إن الأهل بيحبوا أبناءهم بالفطرة وأكثر الناس يحبوا لهم الخير،
فلو آمن الأهل هيكونوا سند له ويحموه من أي مخاطر ممكن يتعرض لها👌
وكمان الأهل أكثر ناس يتقبلوا كلام الداعية وخصوصا لو كان واحد في أخلاق وصدق رسول الله صلى الله عليه وسلم،
إللي الكل مجتمع على حبه😉
رسول الله عمل أكل ودعا أعمامه وأبناءهم من باب إنه يؤلف قلوبهم،
إنتم عارفين الإجتماع على الأكل والكلام والهزار وسط الأكل ده بيعمل جو حلو وبتخلي إللي قصادك يسمع لك😅

كان من أعمام رسول الله صلى الله عليه وسلم إللي حضروا عمه عبد العزى أو خلونا نقول أبو لهب،
وكان موضوع الإسلام اتعرف بين أهل مكة، إن محمد بن عبد الله بيقول إنه رسول بيوحى إليه وإنه بيعبد إله مختلف عن الآلهة بتاعتهم،
فأبو لهب قبل ما رسول الله يتكلم بأي كلمة راح قايل :
أنا بقول لك قصاد أعمامك واولاد أعمامك، سيبك من الكلام إللي إنت بتقوله ده، احنا مش هنقدر نواجه الناس إنت عايز تورطنا😑
ولو فضلت مصمم فاحنا نحبسك أحسن ما يجتمع عليك بطون قريش ومعاهم قبائل العرب فيقضوا عليك،
أنا مشفتش حد جاء لأهله بشر أكثر من إللي جئت به😤
فسكت رسول الله صلى الله عليه وسلم ومتكلمش،
ودي حكمة بالغة منه، أصل هيدخل في جدال معاه ويضيع هيبة الحق،
وخصوصا إن إللي قاعدين محدش منهم اتكلم ولا حد عارف أصلا إيه الحكاية🤷‍♀️
فالجو مكهرب دلوقتي وأبو لهب له أنصار فالأفضل إننا نقفل الموضوع ونتكلم بعدين😅

☆خدوا بالكم إن أبو لهب بيكلم رسول الله بالأسلوب ده وهو في بيته لسه واكل من أكله،
ومع ذلك رسول الله حتى مقلهوش عيب ده إنت في بيتي إزاي تتكلم كده👌
ركزوا مع تصرفات رسول الله صلى الله عليه وسلم لأنها دين واحنا بنتعلم منه👌

مرة ثانية رسول الله عمل طعام ودعا أقاربه مرة ثانية،
طبعا موضوع الأكل ده مكلف، يعني يُقال إنهم حوالي أربعين رجل 😅
فرسول الله دلوقتي مش بيشتغل ومتفرغ للدعوة😕
والدعوة محتاجة للمال فهيجيب منين الأموال🙊
زوجته خديجة قالت له إنه يتفرغ للدعوة وهي إللي هتتكفل بالمصاريف،
يعني خديجة رضي الله عنها كانت بتبذل مالها لخدمة دين الله👌
فقبل ما ابو لهب يتكلم بدأ رسول الله الكلام وقال:
"الحمد لله أحمده وأستعينه وأؤمن به وأتوكل عليه، وأشهد أن لا إله إلا الله وحده لا شريك له"

طبعا الكلام ده كان صدمة بالنسبة لهم🙊
وحده لا شريك له😳
أمال فين اللات والعزى ومناة وباقي الآلهة😐
وأكمل رسول الله كلامه:
"إن الرائد لا يكذب أهله، والله الذي لا إله إلا هو إني رسول الله إليكم خاصة وإلى الناس عامة، والله لتموتن كما تنامون ، ولتُبعثن كما تستيقظون ،
ولتحاسبن بما تعملون ، وإنها الجنة أبدا أو النار أبدا"

☆جملة الرائد لا يَكذب أهلَه ده مثل عربي معناه إن الشخص إللي بيكون متقدم على القافلة بيبحث عن العشب والماء،
عمره ما هييجي يكذب على أهله ويخدعهم😉

رسول الله لخص رسالة الإسلام كلها في الكلمتين دول، إله الكون هو الله وأنا رسوله، وهتموتوا وهتُبعثوا،
وهتتحاسبوا على أعمالكم وعلى حسب أعمالكم يا إما جنة أبدا أو نار أبدا 👌
ردة فعل أقارب رسول الله انقسمت لموقفين:
موقف ابو طالب عم رسول الله إللي كان مربيه وبيحبه أكثر من حبه لأبنائه،
قال له أبو طالب: أنا معاك وهقف جنبك وهدافع عنك،
فاعمل إللي إنت أُمرت به، فوالله لأعينك وأساعدك وأمنعك من الأذى👌
لكن نفسي مش مطاوعاني إني أسيب دين عبد المطلب😞

☆يعني أبو طالب تيقن وعرف إن ابن أخيه رسول من عند الله وإنه صادق ومع ذلك لم يؤمن،
يعني هو خالف الحق بسبب التقاليد وإن ميقدرش يسيب دين أباه،
وعلى فكرة الموقف ده بيحصل مع الناس في عصرنا😀
لما تكلمي واحدة في الإلتزام ،واتباع أوامر ربنا تقول لك:
أمي هتزعل، أبويا مش هيرضى،
أخوتي ...أعمامي و...و...
وكمان هم عايشين عمرهم كله كده..يعني هم غلط وإنتي إللي صح؟

الموقف الثاني موقف أبو لهب وهو إنه صمم على عدائه لابن أخيه أولا ورسول الله ثانيا👌
وقال لهم : امسكوه يا جماعة ووقفوه قبل ما حد تاني هو إللي يوقفه 🤦‍♂️
☆يعني يقصد اغسلوا عاركم بإيدكم 😅

فأبو طالب قال : والله لندافع عنه طول ماحنا عايشين😤

دي كانت المرحلة الأولى من الدعوة الجهرية،
المرحلة الثانية:
في يوم من الأيام خرج رسول الله صلى الله عليه وسلم من بيته،

لحد ما وصل جبل الصفا وطلع عليه ووجّه وجهه ناحية الناس وبدأ ينا

دي على كل أهل مكة بأسماء قبائلهم:
يااا بني فهر...يااا بني عدي...يااا بني هاشم..ياااا....ياااا
والناس سمعت الصوت..إيه ده ..مين إللي بينادي ده😦
الصادق الأمين...الصادق الأمين😮
أول مرة يعملها يبقى أكيد في حاجة 😱
فكل الناس بدأت تتجمع وإللي مش عارف يروح يبعت حد من عنده عشان يروح يشوف في إيه😳

أول ما الناس اتجمعت قال لهم محمد بن عبد الله بن عبد المطلب ..الصادق الأمين إللي عايش معاهم بقاله أربعين سنة وعارفينه كويس:
لو قلت لكم إن في جيش خلف الوادي ده جاي يهجم عليكم ...هل هتصدقوني؟
قالوا : طبعا احنا منعرفش عنك إلا الصدق وعمرك ما كذبت😲
فقال لهم : فأنا نذير لكم بين يدي عذاب شديد👌

☆رسول الله قبل ما يقول لهم أي حاجة أقام عليهم الحُجة
يعني خلاهم يعترفوا بلسانهم إنه صادق وإنهم كانوا هيصدقوه،
فاللي يخليهم يصدقوه في إنذاره لهم بهجوم الأعداء، فلازم يصدقوا إنذاره بالعذاب الشديد👌

◇في هنا نقطة مهمة عشان الناس إللي دايما بتقول إنتم بتخوفوا الناس من ربنا وتنفروهم،
ربنا غفور رحيم متقعدوش تخوفوا الناس و...و...
رسول الله أول ما أظهر الدعوة أول حاجة عملها إنه خوف الناس من العذاب 👌
في فرق بين إني أخاطب ناس بصفة عامة وإني أدعو شخص دعوة فردية،
لما أكون بتكلم مع الناس بصفة على اختلاف عقلياتهم يبقى التخويف من العذاب أولا،
لأن الغفلة والبعد عن ربنا بتكون منتشرة بين الناس،
فمينفعش واحد غافل غرقان في المعاصي ومش فارق معاه حاجة تيجي تقول له إن الله غفور رحيم😅
هتلاقيه ساق فيها وازداد في معاصيه، لكن لو اتخوف هينتبه ويقلق هنا بقى ممكن نستعمل معاه الترغيب،
لكن لما يكون الخطاب عاااام زي موقف رسول الله صلى الله عليه وسلم،
فيبتدي بالتخويف من العذاب عشان الناس تنتبه من غفلتها👌

ياترى أهل مكة كان ردهم إيه على الصادق الأمين؟

ده إللي هنعرفه الجزء الجاي إن شاء الله😊


#Eman_Shalapy

خروج الفتاة بلباس فاضح لأجل التنافس على قطعةٍ معدنية في لعبةٍ بقوانين غربية ليس قوةً ولا نجاحاً ولا هو مما يستدعي الفخر أو التصفيق أو الإعجاب..

اعتياد رؤية العورات في سياق أن “التركيز على الرياضة” وأننا “مشاهدون نقيّم الحركات” ونصفق لمن يلعب أفضل وغير ذلك.. هو من اعتياد المنكر وموت القلب في هذا الجانب..

تكريس الفتاة (أو الشاب) حياتهم للرياضة والسبق فيها أو إتقان مهارةٍ حركيّة معيّنة مع نوعٍ خاص من الرشاقة.. لا يصحّ ولا يستقيم مع رؤية المسلم للوجود وللحياة وللهدف منها..

تشجيع المسلمين من أهل كلِّ بلدٍ لمنافسيهم على “ألعابٍ” من أجل “ميداليّاتٍ” يحصدها البلد هو من تكريس العصبية القبليّة في العصر الحديث ومن إمعان سيطرة الحدود والقوميات على فكرنا ومشاعرنا..

وتزامن هذا مع مصاب أهلنا في غزّة وانشغالنا بأتفه التفاهات عن الدعاء لهم ونصرتهم والحديث عنهم والتوعية بحالهم ودفع من يتقاعس لمساعدتهم.. هو من حقيقة الخذلان والضعف الذي أوصلنا لهذا الموضع أصلاً..

#قصص_الأنبياء(٢)
#السيرة_النبوية
#الحلقة_الخامسة_عشرة
#بداية_محاربة_الدعوة

وقفنا المرة إللي فاتت عند رسول الله صلى الله عليه وسلم لما طلع على جبل الصفا وقعد ينادي في الناس ويقول لهم إنه نذير من عند الله،
وقلنا إن أهل مكة كلهم اجتمعوا عشان يعرفوا في إيه،
وكان من إللي جاء مع الناس عم رسول الله صلى الله عليه وسلم أبو لهب،
فلما سمع كلام رسول الله قال له : تبا لك سائر اليوم هو ده السبب إللي جمعتنا عشانه😡
يعني دعا عليه بالخسران😑
وبدأ يصرف الناس ويبعدهم عنه،
يعني كأن أبو لهب بيقول للناس بطريقة عملية بصوا أنا مليش دعوة بيه ، أنا بوقفه أهه حتى لا تؤذوني معاه وأنا مش راضي عن إللي هو بيعمله😤
ماهو قال لرسول الله من الأول احنا ملناش طاقة بالعرب مش هنقدر نواجههم...مش هنقدر نغير إللي الناس اتعودوا عليه😑
فمشكلة ابو لهب الخوف أو خلينا نقول الجُبْن الشديد،
كان جبان جدا لدرجة إنه رفض الإيمان بالله،
هو بالنسبة له عادي إنه يقف مع القوي ويعادي ابن أخيه ويخذله عشان يحمي نفسه،
الإنسان ممكن يخاف كطبيعة بشرية لكن الخوف إللي يوقف الإنسان عن العمل الصالح هو ده الخوف المُهلك👌
فربنا أنزل فيه :
"تبَّتْ يَدَا أَبِي لَهَبٍ وَتَبَّ *مَا أَغْنَى عَنْهُ مَالُهُ وَمَا كَسَبَ *سَيَصْلَى نَارًا ذَاتَ لَهَبٍ"
ربنا عالم إن الرجل ده خلاص هيموت كافر، وهنا في إعجاز سبحان الله😮
يعني أبو لهب كان بيسمع الآيات دي بتتقال عنه ومع ذلك مقلش مثلا طيب أنا هدخل في الإسلام وأثبت لكم إن القرآن ده كذب ،
وده دليل على أن القرآن من عند عالم الغيب 👌
وكان أبو لهب بيمشي وراء رسول الله صلى الله عليه وسلم وهو بيدعو الناس ،
فيقول للناس متصدقهوش إحنا أهله ..إحنا أعلم الناس به..ده كاذب ..ده مجنون.. متخلهوش يبعدكم عن دين آباءكم وأجدادكم😑
والناس مستغربة مين الرجل ده 😕
ماشي عمال يكذب محمد بن عبد الله ورسول الله مش بيرد عليه ولا بيلتفت له أصلا وبيحاول يبعد عنه وده وراه،

فلما سمع أبو لهب الآيات إللي نزلت فيه راح لأولاده الإثنين
《عتبة》 و《عُتَيبة》 وكانا متزوجين من ابنتي رسول الله صلى الله عليه وسلم،
رقية وأم كلثوم وقال لهم لو مطلقتوش بنات محمد لا أعرفكم ولا تعرفوني😤
☆خليكم فاكرين اسم عُتَيبة ده عشان له قصة بعدين 👌

ففعلا هم الإثنين طلقوا بنات رسول الله،
تخيلوا لما بنتين يتطلقوا في نفس الوقت، أبوهم هيكون شكله إيه قصاد الناس😞
هم بشر على فكرة.. بيتألموا وبيتعرضوا لضغط نفسي وكلام الناس بيأثر فيهم،
ومع ذلك رسول الله كمل في طريقه،
ومفيش بنت من البنات قالت لأبوها إنت ضيعتنا، ولا احنا اتطلقنا بسببك ولا كانوا حاسين إن طلاقهم ده نهاية العالم..الدنيا بتمشي عادي👌

☆ملحوظة بنات النبي كانوا عاقدين بس يعني مكنش لسه حصل بناء وكان سنهم صغير أصلا 😅
يعني السيدة رقية كان عمرها حوالي من إحدى عشر لثلاثة عشرة عام تقريبا، وأختها أم كلثوم أصغر منها بسنة.

وطبعا زوجة العم كان لها نصيب هي كمان😀
كانت بتجمع الشوك وتشوف فين الطريق إللي هيمشي فيه رسول الله وتحطه فيه عشان يدوس عليه ويؤذيه😑
فربنا أنزل فيها:
"وَامْرَأَتُهُ حَمَّالَةَ الْحَطَبِ*فِي جِيدِهَا حَبْلٌ مِّن مَّسَد"

☆تخيلوا لما يكون عم الرسول صلى الله عليه وسلم وأبناء عمه ومرات عمه بيعملوا معاه كده أمال باقي أهل مكة هيعملوا إيه😶

حصل قلق في مكة والدنيا اتقلبت والكل بيتكلم عن الدين الجديد😮
وإنتم عارفين إن الموجودين في مكة مش أهل مكة بس ده في ناس من قبائل تانية بتيجي لمكة،
فرسول الله بدأ يدعوهم هم كمان للإسلام،
يعني كده الدعوة بدأت بأهله وبعدين بأهل البلد إللي هو عايش فيها وبعدين الناس إللي بييجوا لمكة،
ربنا أمر رسوله بحاجتين:
"فَاصْدَعْ بِمَا تُؤْمَرُ وَأَعْرِضْ عَنِ الْمُشْرِكِينَ"

يعني ربنا أمره إنه يبلغ الدعوة وفي نفس الوقت لا يقاتل ولا يحارب ولا يهتم باللي المشركين هيعملوه ..يعني تجنب أي صدام مع المشركين...ركز بس في نشر الدعوة 👌

إللي بيجهر بالدعوة دلوقتي وبيكلم الناس كلهم في كل مكان هو رسول الله،
سادات مكة مش عاجبهم الوضع ...مين ده إللي عمال يتكلم عن آلهتنا بسوء وبيقول إنها لا تضر ولا تنفع😡
لازم يتصرفوا وإلا هيبتهم هتروح ومش هيبقى لهم مكانة في مكة😶
وأهم حاجة عندهم موضوع الشرف والمكانة ده😅
لأن مكنش في حاكم في مكة فكله نفسه يكون الحاكم فكانوا بيجتمعوا مع بعض ويتفقوا على قانون مثلا لأنهم كانوا متساويين تقريبا،
فكان كل واحد من زعماء القبائل بينافس التاني، عشان يأخذ الحكم وكانوا كلهم متساويين تقريبا،
فلما يطلع واحد من بني هاشم ويقول إنه نبي يأتيه الوحي من السماء،
هم هيكون موقفهم إيه...دي حاجة مش هيقدروا ينافسوا فيها ..هيقولوا احنا كمان عندنا نبي😅

◇فكان من أهم أسباب رفضهم لدعوة الإسلام تعصب كل واحد لقبيلته،
إللي هو إزاي يعني أنا أتبع القبيلة المنافسة وأمشي وراهم واسمع كلامهم😏

☆وللأسف في ناس من أعداء الإسلام استخدموا حتة التعصب دي عشان يفرق

وا بين المسلمين وبالتالي تضيع الدعوة،
زي إللي بيتعصب لمذهب معين حتى لو خالف الدليل من القرآن والسنة،

وزي إللي بيتعصب لجماعة معينة وبيبقى عايز ينصرها وخلاص حتى لو كانت على باطل ويا إما احنا إللي ننصر الدين ونكون إحنا إللي ظاهرين بين الناس يا إما هنخذلكم ونسلمكم للأعداء ونحاربكم،
وزي إللي بيتعصب لبلده وزي إللي بيتعصب لفريق كرة وغيرها وغيرها،
وإنتم ممكن تشوفوا الواقع وإنتم تفهموا قصدي😀

◇ومن الأسباب إللي منعت الناس برده من الإستجابة لدعوة الإسلام حاجة اتكلمنا عنها في قصص الأنبياء وكانت أول معصية عصي الله بها في السماء،
واستمرت معانا في كل قصص الأنبياء وبنشوفها مستمر لحد دلوقتي 😑
فاكرين وصية نوح إللي قالها لابنه😁
بالضبط كده منعهم الكِبر 👌
والكبر كما قال رسول الله صلى الله عليه وسلم:
"سَفه الحق - أو بَطَرُ- وغَمْط الناس"
سَفه الحق يعني تعرف الحق ثم تنكره، وغمط الناس يعني احتقارهم👌
فهم عرفوا إن القرآن ده فعلا كلام مش عادي ، ومع ذلك أنكروا،
وكانوا محتقرين لرسول الله ، كانوا بيقولوا :
"وَقَالُوا لَوْلا نُزِّلَ هَذَا الْقُرْآنُ عَلَى رَجُلٍ مِنَ الْقَرْيَتَيْنِ عَظِيمٍ"

يعني بيقولوا: يا سلام لو كان القرآن ده نزل على رجل عظيم كنا هنؤمن به☺
ورسول الله هو أعظم الخلق وأحسنهم أخلاقا،
لكن هم عندهم إن العظمة في إن الشخص يكون عنده أموال كثيرة جدا😑
فالرجلين إللي كانوا يقصدوهم هما:《 الوليد بن المغيرة 》 من مكة، و《عروة بن مسعود الثقفي》من الطائف،
ومن الأسباب إللي منعت أهل مكة من الإيمان إن رسول الله عايز يُحكّم شرع ربنا،
يعني الشرع هو إللي هيأمر وينهى وده هيأثر على مصالحهم وهيسحب البساط من تحت رجلهم، لأنهم عايزين يمشوا القوانين إللي تخدم مصالحهم💁‍♀️

◇وكمان كانوا خايفين على البلد ماهو محمد صلى الله عليه وسلم لو حارب العرب عشان ينشر دعوته،
العرب هيفرضوا عليهم حصار مثلا، والبلد الآمن هيتحول لبلد فتن وحروب ومش هتكون مهيأة للتجارة،
ومكة عايشة على التجارة أصلا فمن وجهة نظرهم هو كده هيضيعهم، فدعوة إيه وإسلام إيه بقى ..احنا عايزين ناكل عيش يابني.. إيه إللي إنت بتقوله ده🤓

◇وفي ناس رفضت عشان خايفة على شهواتها وملذاتها،
إنت جايب دين بيأمرني بالعفاف والفضيلة،
وأنا أصلا شغلي كله في نشر الفواحش والإباحية😏

☆ركزوا في الكلام وحاولوا تربطوا بين الواقع بتاعنا في السنوات الأخيرة وبين تفكير أهل مكة وأسبابهم لمحاربة دعوة الإسلام وشوفوا التشابه الشديد،
ودي مش حاجة جديدة الوضع ده مستمر ليوم القيامة لأن دي سنن كونية بس احنا نعرف نتعامل معاها إزاي من غير ما نقع في أخطاء السابقين👌

◇وفي ناس منعها غبائها من اتباع الحق تخيلوا 😳
يعني كانوا يقولوا إزاي يعني نعبد إله واحد ..إنت خليت كل الآلهة إله واحد..حاجة عجيبة 😕
"أَجَعَلَ الآلِهَةَ إِلَهًا وَاحِدًا إِنَّ هَذَا لَشَيْءٌ عُجَابٌ"
إزاي يعني ربنا يُحيينا تاني بعد مانموت 😏

فمكنوش مقتنعين أصلا بالفكرة ..زي لما تيجي تحاولي تقنعي حد بدليل واضح وهو مخه متربس😐
يابني مينفعش وهو مصمم.. يابني لا يجوز وبالعقل يعني ..وده مفيش🤦‍♀️

فكل واحد بقى يدافع عن موقفه باستماتة وعلى الرغم من التنافس إللي كان بينهم إلا إنهم اجتمعوا على حرب الدعوة😑
في الوقت ده رسول الله صلى الله عليه وسلم مستمر في الدعوة، ومكنش حد يقدر يقتله مثلا لأنه كان في جِوار أبو طالب😊
كان في أيام الجاهلية قانون اسمه الإِجَارة يعني الحماية، واحد ضعيف يطلب إنه يدخل في حماية شخص قوي شرفه عالي والناس بتعمل له حساب👌
ويدافع عنه هو وقبيلته لو أي أحد اعتدى على الشخص المستجير، وكان الناس أيام الجاهلية بيحترموا جدا موضوع الجوار ده،
على الرغم إن مكنش في قوانين بتحكمهم لكن كلمتهم كانت هي القانون👌
فكان رسول الله صلى الله عليه وسلم في جِوار أبي طالب عمه الكافر وهو سيد من سادات قريش الناس بتحترمه جدا وبتحترم قبيلة بني هاشم،

☆ممكن حد يسأل طيب إزاي رسول الله يكون في جوار كافر ويطلب منه الحماية🤔

رسول الله عنده فقه واقع، هو بيستغل أي ظرف لمصلحته ومصلحة نشر الدعوة بشرط مهم وهو إنه لا يتنازل فيها عن أي شيء من دينه👌
فالحكمة ضالة المؤمن أنى وجدها فهو أول الناس بها،
يعني وقت ما المسلم يلاقي حاجة تفيده حتى لو من كافر خلاص يستفيد بها👌
زي مثلا اختراع الهواتف النقالة.. الموبايلات يعني،
إللي اخترعها كافر لكن احنا كمسلمين بنستفيد منها عادي،
فأي حاجة تفيدنا كمسلمين نستعملها بشرط إنه ميكونش ده مقابل التنازل عن أي حاجة في ديني زي ما هنشوف مع رسول الله صلى الله عليه وسلم 😊

¤وبالمناسبة حديث الحكمة ضالة المؤمن حديث ضعيف لكن معناه صحيح 😉

فالمشركين في مكة مش قادرين يوقفوا رسول الله عن الدعوة، وهو مستمر في الدعوة ليل نهار عليه الصلاة والسلام،

كان بيروح عند الكعبة ويقرأ عليهم القرآن وبيروح للعبيد والأحرار ويشرح لهم الإسلام،
متخيلين واحد ماشي في الطريق عمال يوقف الناس ويشرح

لهم الدين 😮
أظن لو حد عمل كده دلوقتي الناس هتقول عليه مجنون وهيقعدوا يبصوا له نظرات غريبة ومش بعيد يسخروا منه، لمجرد إنه بيدعو لدين الله😞
كفار مكة مش عاجبهم الحال فبدأوا يأخذوا خطوات عشان يقضوا على الدين 👌
أول حاجة عملوها إنهم حاولوا يخلوا الناس إللي بتنصر رسول الله على الحياد مين إللي بينصر رسول الله وبيدافع عنه ؟
أبو طالب..يبقى خلونا يا جماعة نُحيّده يعني من الآخر نوقفه عن نصرته لابن أخيه،
راح مجموعة من سادات مكة من المشركين لأبو طالب قالوا له:
شوف يا أبا طالب ابن أخوك آذانا في مكان اجتماعنا وفي المسجد ،
هو عايز يعبد ربه خلاص يروح يعبده بعيد عننا ،
بييجي عندنا ليه في الأماكن بتاعتنا ،فإنت قول له إنه ميجيش ويبعد عننا😤
فأبو طالب حس إن الكلام منطقي..إيه إللي يودي ابن أخوه هناك ..هي الدنيا ناقصة مشاكل..بيروح يستفزهم ليه😕

فراح أبو طالب لرسول الله صلى الله عليه وسلم وقال له:
إن قومك هؤلاء اشتكوا عليك، وقالوا إنك بتروح مجالسهم وبتؤذيهم،
فبلاش تروح عندهم وتقول الكلام إللي بتقوله 😥
فقال لهم رسول الله : شايفين الشمس؟
قالوا : أه😕
فقال رسول الله :
"ما أنا بأقدر أن أدع ذلك منكم أن تشعلوا منها شعلة"
يعني لو قدرتم تشعلوا من الشمس شعلة فأنا مقدرش أسيب الدين ده👌
فأبو طالب لما شاف ثبات رسول الله صلى الله عليه وسلم اتأثر بكلامه وراح قايل لهم :
والله ابن أخويا ده ميكذبش أبدا، ارجعوا يا جماعة وسبوه أنا هفضل أدافع عنه 👌

☆حديث: "يا عم لو وضعوا الشمس في يميني والقمر في يساري على أن أترك هذا الدين ما تركته "
ده حديث ضعيف 👌

فرسول الله بيعلمنا إننا طول ماحنا ثابتين على موقفنا وعندنا ثقة في الله وفي الدين موقفنا ده هيأثر في إللي حوالينا إنهم يشجعونا ويقفوا جنبنا،
لكن لو الإنسان كان متردد في كلامه ومش واثق أوي هتلاقي إللي حواليكي بيضغطوا عليكي لحد ماتعملي إللي هم عايزينه👌
كده أول مرحلة منفعتش 😕
ندخل في مرحلة الحوار والإغراء بالعروض😈

فقالوا خلونا نتكلم معاه يمكن نقنعه ،فاختاروا واحد منهم عشان يروح يعرض على رسول الله صلى الله عليه وسلم شوية عروض،
فاختاروا عتبة بن ربيعة سيد من سادات مكة ،فراح لرسول الله صلى الله عليه وسلم عشان يكلمه،
قال له : يا محمد ! إنت عارف مكانتك إيه بيننا ، ونسبك إيه في مكة، وإنت جيت بأمر عظيم فرقت به بيننا ،
وعِبت في آلهتنا وديننا وكفرت آباءنا وأجدادنا،
فأنا هعرض عليك شوية عروض فكر فيها يمكن تقبل حاجة منها😓
فقال له رسول الله : قل يا أبا الوليد .
☆وأبو الوليد كانت كنية عتبة بن ربيعة 😉

فقال عتبة:
يابن أخي، لو إنت عامل القلق ده كله عشان محتاج أموال،
قول واحنا هنجمع لك أموال لحد ما تكون إنت أكثر الناس مالا،
ولو إنت عايز شرف هنخليك سيد مكة، منخدش قرار غير لما نرجع لك، ولو إنت عايز مُلك ..هنخليك ملك مكة تحكم زي مانت عايز،
ولو إللي بيجيلك ده مس من الجن هو إللي بيخليك تقول الكلام ده هنجيب لك أحسن الأطباء ودفعنا كل ما نملك لحد ما تخف 👌
كل ده ورسول الله يسمع ..مقطعهوش ولا مرة،يعني هو عمال يتهمه باتهامات باطلة ورسول الله بيسمع،
فبعد ما خلص قال له رسول الله : خلصت كلام؟
فقال له عتبة خلصت😅
فقال له رسول الله : فاسمع مني👌
وبدأ رسول الله صلى الله عليه وسلم يقرأ القرآن من بداية سورة فُصّلت،
"حم (1) تَنْزِيلٌ مِنَ الرَّحْمَنِ الرَّحِيمِ (2) كِتَابٌ فُصِّلَتْ آيَاتُهُ قُرْآنًا عَرَبِيًّا لِقَوْمٍ يَعْلَمُونَ (3) بَشِيرًا وَنَذِيرًا فَأَعْرَضَ أَكْثَرُهُمْ فَهُمْ لَا يَسْمَعُونَ "
واستمر رسول الله يقرأ ويقرأ وعتبة يستمع للآيات،
بيسمع القرآن بصوت رسول الله صلى الله عليه وسلم مباشرة متخيلين🙊
فلما وصل رسول الله عند آية:
"فَإِنْ أَعْرَضُوا فَقُلْ أَنْذَرْتُكُمْ صَاعِقَةً مِثْلَ صَاعِقَةِ عَادٍ وَثَمُودَ "
فهنا عتبة خاف وقام ووضع إيده على فم رسول الله صلى الله عليه وسلم وقال :
ناشدتك الله والرحم ..ناشدتك الله والرّحم.😰
يعني بيستحلفه بالله وصلة الرحم إللي بينهم إنه ميخليش
ربنا يعمل فيهم زي ما عمل في قوم عاد وثمود،

☆فاكرين قصتهم 😁

فأكمل رسول الله تلاوة باقي السورة لحد ما وصل لأية السجدة وسجد ،
وقال لعتبة: هذا ما عندي.
فقام عتبة من عند رسول الله ورجع لأصحابه إللي كانوا مستنيين الأخبار،
أول ماشافوه جاي عليهم في حالة ذهول ..وشه متغير..قالوا والله عتبة راجع لكم بغير الوجه الذي ذهب به😳
إيه جرى لك يا أبا الوليد😦

قال لهم: ......المرة الجاية إن شاء الله نعرف قال لهم إيه😅


#Eman_Shalapy

#قصص_الأنبياء(٢)
#السيرة_النبوية
#الحلقة_السادسة_عشرة
#الحرب_الإعلامية_على_الدعوة

كنا واقفين المرة إللي فاتت عند عتبة بن ربيعة لما راح لرسول الله صلى الله عليه وسلم وعرض عليه شوية عروض في مقابل إنه يسيب الدعوة إلى الإسلام،
لكن رسول الله كل إللي عمله إنه قرأ عليه القرآن فعتبة بعد ما سمع القرآن من رسول الله رجع لسادات مكة إللي كانوا منتظرينه عشان يعرفوا نتيجة الحوار،
فلما شافوه وهو جاي وكان وجهه متغير وسألوه إيه إللي حصل قال لهم:
أنا سمعت كلام عمري ما سمعت مثله أبدا😳
والله ماهو كلام شعر ولا هو كلام سحر ولا كهانة😳
يامعشر قريش اسمعوا كلامي وخذوا نصيحتي 👌
سيبوا الرجل يدعو الناس ومتقفوش في طريقه، فوالله ليكون للكلام إللي سمعته منه ده حاجة عظيمة في المستقبل😮
فلو حصل والعرب قتلوه خلاص يبقى هم كفوكم شره وخلصنا منه،
ولو ظهر عليهم وانتصر فملكه ملككم ..لأنه من قريش وعزه عزكم، وهتكونوا أسعد الناس به👌

☆أظن مفيش كلام منطقي عقلاني أكثر من كده💁‍♀️

فقالوا له: والله محمد سحرك بكلامه يا أبا الوليد😏
فقال لهم : ده رأيي وأنتم أحرار اعملوا إللي تعملوه😑

على الرغم من إن عتبة عارف إن رسول الله على حق لكنه برده لم يؤمن👌
☆احنا نستفيد من الحوار ده نقطتين مهمين:
أولا:
إزاي إن رسول الله صلى الله عليه وسلم عرف يكسب عتبة بن ربيعة بأسلوبه وحوله لداعية يدعو أصحابه بفن الإصغاء👌
يعني عتبة لما جاء لرسول الله وقعد يكلمه بكلام يعتبر إهانة وكله اتهامات باطلة، ومع ذلك رسول الله لم يقاطعه رسول الله ولا مرة لحد ما خلص كلامه،
رسول الله عارف إنه لما يقعد يسمع لكلام عتبة من غير ما يقاطعه ده هيديله فرصة إنه يعرف دماغ إللي قصاده بيفكر إزاي ويعرف يرد عليه بالكلام إللي يناسب شخصيته😉
هو اشمعنى رسول الله قرأ على عتبة سورة فصلت ليه مقرأش غيرها؟
لأنه فهم من شخصية عتبة إن آيات سورة فصلت هيكون لها الأثر الأكبر على عقليته😊
وكمان لما رسول الله كان بيسمعه ومكنش بيقاطعه، ده خلى عتبة يتجاوب مع رسول الله لما قال له اسمع مني،
فكان لازم عتبة يسمع من رسول الله بدون مقاطعة زي ما رسول الله سمعه بدون مقاطعة 👌
ده غير إن الواحد لما يسمع للي قصاده وخصوصا لو كان غضبان أو متحفز بدون مقاطعة فده بيخليه يهدى ويرجع لعقله،
بعكس لو قعدنا نقاطعه هتلاقيه بيتعصب أكثر وبيزعق أكثر،
فعتبة كان جاي متحفز ومتعصب،
حتى أصحابه قالوا إنه رجع بوجه تاني خالص غير إللي راح لرسول الله به😅
فرسول الله بيعلمنا إن ممكن مشكلة كبيرة يكون حلها في إننا نسمع الشخص ده بيقول إيه من غير ما نقاطعه ،
حتى لو الشخص ده بيعيب فينا وبيتهمنا اتهامات باطلة زي ما عتبة عمل مع رسول الله😊
جربوها كده.. فقد كان لكم في رسول الله أسوة حسنة😉

ثانيا:
إن أهل الباطل دائما وأبدا مفكرين كل الناس زيهم ممكن يبيعوا دينهم ودعوتهم في مقابل شوية أموال أو مناصب،
أيوة في ناس بتقبل وشفناهم 😀
لكن الداعية الحق الثابت الراسخ في إيمانه زي رسول الله صلى الله عليه وسلم عمره ما يقبل أبدا التنازل عن دينه في مقابل أي حاجة من متاع الدنيا الزائل👌
لأنه فاهم الدين فعلا صح وعارف إن الدنيا كلها لا تساوي عند الله جناح بعوضة،
لكن إللي بيقبل متاع الدنيا الزائل في مقابل التنازل عن دينه وعن دعوته وساعات كمان يحرف في الدين ويقول كلام باطل ، ده مكنش فاهم الدين ولا كان راسخ فيه أصلا👌

دلوقتي المرحلة الثانية من المراحل السلمية لصد دعوة الإسلام وهي الإغراء بالعروض فشلت 😕
ندخل المرحلة الثالثة وهي تشويه صورة الداعية 😈
حملة إعلامية لتشويه صورة رسول الله صلى الله عليه وسلم قصاد الناس 😀
لأن لو شوهنا صورة الداعية الناس هتفقد الثقة فيه ومحدش هيصدق الكلام إللي بيقوله،
فمش هيلاقوا حد ياخدوا منه الدين ويبقى خلينا الناس نفسها هي إللي تقضي على دين محمد 😈

بس هم مش هيقولوا أي كلام كده..لازم يكونوا متفقين على الكلام مع بعض عشان الناس متقولش ده كلامهم متناقض ويبقى الكلام مختلف فيكذب بعضهم بعض😑
وكان الزعيم إللي بيخطط بالذكاء ده هو
《الوليد بن المغيرة》👌
☆الرجل الأول إللي أهل مكة قالوا عنه عظيم ولو نزل القرآن عليه كنا آمنا به،
فهو كان شيخ كبير من حكماء العرب، وكان لقبه ريحانة العرب، وكانوا بينشدوا قصاده الأشعار فكان إللي يختاره من الشعر الناس تقدمه ويبقى مفضل عندهم👌

فكان بيقول لأهل مكة اتفقوا على رأي واحد وكلام موحد نقوله للناس في كل القنوات ...قصدي في كل مجالس أهل مكة☺
فقالوا له : قلنا إنت رأيك يا أبا عبد شمس نقول إيه🤔
☆أبا عبد شمس كنية الوليد بن المغيرة😉

فقال لهم : لا إنتم قولوا خلوني أسمع إللي عندكم الأول😈
فقالوا له : خلونا نقول كاهن😕
فقال لهم: لا لا ..هو مش كاهن أنا شفت الكهان وعارف كلامهم وسجعهم ...الناس مش هتقتنع ...غيره🙄
فقالوا: يبقى مجنون 🤪
فقال لهم: مش مجنون ..احنا شفنا المجانين وعارفينهم😒

فقالوا : يبقى شاعر 🤔
قال لهم: لأ..كلامه ليس شعر ..احنا عارفي

ن كل أنواع الشعر...ده احنا أهل الشعر😏
قالوا : بااااس يبقى ساحر😈
فقال لهم: لأ..حتى مش ساحر...احنا شفنا السحرة وسحرهم عامل إزاي، فكلامه مختلف تماما عن طلاسم السحرة 😑

فقالوا له:
خلاص إنت إيه رأيك ..احنا قلنا كل إللي عندنا😶
فقال لهم: بصراحة ...إن لقوله لحلاوة ..وإن عليه لطلاوة وإن أعلاه لمثمر وإن أسفله لمغدق وإنه ليعلو ولا يُعلى عليه😮
=نعم😳
هو إنت في صفه ولا في صفنا😳
وكان الوليد بن المغيرة سمع القرآن مرة من رسول الله صلى الله عليه وسلم،
فهو مقدرش يمسك نفسه من إنه يقول إللي حس بيه،
فهو بيقول إن القرآن بيجذب النفوس بترتاح له الأرواح، محلى بألفاظ جميلة وأنغام مقبولة،
عامل زي الشجرة الكبيرة غصونها مليانة بالثمار، وجذورها مستحكمة في الأرض واسعة الانتشار في أعماق الأرض،

فهو عارف دلوقتي إن القرآن ده فعلا مش من قول البشر، فأي كلام هيتقال ضد رسول الله، الناس هتعرف إنه غير صحيح،
=طب والحل😑
قعد يفكر لحد ما قال لهم :
أحسن حاجة نقول إنه ساحر 👌
لكن السحر بتاعه مختلف ..مستواه أعلى ..سحره بيفرق به بين الرجل وأبيه، وبين الرجل وأخيه وبين الرجل وزوجته وهكذا👌

يعني هم قاعدين بيفكروا ويخططوا ويمكروا ويدبروا المكائد وناسيين حاجة مهمة أوي😏
"أَلَمْ يَعْلَم بِأَنَّ اللَّهَ يَرَىٰ"
ناسيين أو متناسين او مش مستوعبين إن ربنا يراهم وسامعهم وعالم بكل صغيرة وكبيرة👌

فأنزل الله عالم الغيب والشهادة الآيات على رسول الله صلى الله عليه وسلم تعرفه إيه إللي بيحصل بالضبط:
"ذَرْنِي وَمَنْ خَلَقْتُ وَحِيدًا* وَجَعَلْتُ لَهُ مَالًا مَمْدُودًا *وَبَنِينَ شُهُودًا* وَمَهَّدْتُ لَهُ تَمْهِيدًا *ثُمَّ يَطْمَعُ أَنْ أَزِيدَ *كَلَّا إِنَّهُ كَانَ لِآَيَاتِنَا عَنِيدًا *سَأُرْهِقُهُ صَعُودًا "

لدرجة إنه وصف لرسول الله صلى الله عليه وسلم نفسية الوليد كانت عاملة إزاي😅

"إِنَّهُ فَكَّرَ وَقَدَّرَ * فَقُتِلَ كَيْفَ قَدَّرَ * ثُمَّ قُتِلَ كَيْفَ قَدَّرَ *ثُمَّ نَظَرَ *ثُمَّ عَبَسَ وَبَسَرَ* ثُمَّ أَدْبَرَ وَاسْتَكْبَرَ *
فَقَالَ إِنْ هَذَا إِلَّا سِحْرٌ يُؤْثَرُ*إِنْ هَذَا إِلَّا قَوْلُ الْبَشَرِ"

فربنا قال في الآخر إن مصيره هو وأي أحد بيحارب الدعوة زيه كده من غير ما يتوب هو النار👌
"سَأُصْلِيهِ سَقَرَ"
ومع كل التخطيط والمآمرات والاجتماعات و...و...وفي المقابل رسول الله إمكاناته ضعيفة إلا إنهم غير موفقين لأنهم بيحاربوا الله ، والحق بيوصل للناس وربنا بيفضح كل مؤامراتهم 👌

ولم يكتفوا بتشويه صورة رسول الله صلى الله عليه وسلم،
لكن بدأوا يشوهوا رسالة الإسلام نفسها 👌
بقوا يقولوا الكلام إللي محمد بيقوله ده هو إللي مؤلفه بمساعدة ناس تانية😒
"وَقَالَ الَّذِينَ كَفَرُوا إِنْ هَٰذَا إِلَّا إِفْكٌ افْتَرَاهُ وَأَعَانَهُ عَلَيْهِ قَوْمٌ آخَرُونَ"
وشوية يقولوا ده بيقول أساطير، يعني ناقل من كتب الأولين ،
مع إنهم عارفين كويس إن رسول الله صلى الله عليه وسلم أُمّي..مبيعرفش يقرأ ولا يكتب وهو قاعد في مكة طول عمره مكنش بيخرج منها إلا نادرا،
"وقَالُوا أَسَاطِيرُ الْأَوَّلِينَ اكْتَتَبَهَا فَهِيَ تُمْلَىٰ عَلَيْهِ بُكْرَةً وَأَصِيلًا "

☆ملحوظة مهمة👌
رسول الله صلى الله عليه وسلم كان أُمّي يعني مكنش بيعرف يقرأ ولا يكتب،
يعني مش إن أمي نسبة إلى أم القرى والكلام ده😅
والدليل قول الله:
"وَمَا كُنْتَ تَتْلُو مِنْ قَبْلِهِ مِنْ كِتَابٍ وَلا تَخُطُّهُ بِيَمِينِكَ إِذًا لارْتَابَ الْمُبْطِلُونَ"
وقوله:
"فَآمِنُوا بِاللَّهِ وَرَسُولِهِ النَّبِيِّ الْأُمِّيِّ "
وكلمة أُمّي في الآية هنا معناها من لا يقرأ ولا يكتب👌
وفي ناس كثيرة حاولت تشكك في أمية رسول الله صلى الله عليه وسلم،
ولكن الأدلة من القرآن والسنة قاطعة إن رسول الله كان أُمّيا لا يعرف القراءة ولا الكتابة👌

وادعى المشركين إن إللي بيعلم رسول الله القرآن غلام نصراني،
"وَلَقَدْ نَعْلَمُ أَنَّهُمْ يَقُولُونَ إِنَّمَا يُعَلِّمُهُ بَشَرٌ ۗ لِّسَانُ الَّذِي يُلْحِدُونَ إِلَيْهِ أَعْجَمِيٌّ وَهَٰذَا لِسَانٌ عَرَبِيٌّ مُّبِينٌ "
وقعدوا يطعنوا في فكرة البعث ...يعني إيه إننا هنحيا تاني بعد الموت،
"وَقَالَ الَّذِينَ كَفَرُوا هَلْ نَدُلُّكُمْ عَلَىٰ رَجُلٍ يُنَبِّئُكُمْ إِذَا مُزِّقْتُمْ كُلَّ مُمَزَّقٍ إِنَّكُمْ لَفِي خَلْقٍ جَدِيدٍ"
الكلام واضح فيه السخرية الكاملة😑
والمحاولات دي مكنتش يوم ولا يومين ولا شهر ولا شهرين دي قعدت سنين،
والصوت العالي للباطل بيشتت عقول الناس وبيخليهم يصدقوا الكلام الغلط مع كثرة الزن عليهم😑
ده الإسلام ده جه عشان يفرق بين الناس ، ويخلي الناس عبارة عن فِرق ويعمل عدوات بينهم🤓
إيه يعني لما كلنا نعيش مع بعض في سلام والدين لله والوطن للجميع ....وكل واحد على دينه الله يعينه🙃

وكمان مع ما سبق خلونا نُشغل الناس بشوية حاجات كده عشان قلوبهم تبقى غرقانة بالشهوات واللهو والتفاهة ،
لأن لما يكون القلب منشغل بالباطل صعب إنه

يستجيب لدعوة فيها إصلاح💁‍♀️
يعملوا إيييه😈
هاتوا يا جماعة النّضْر بن الحارث نخليه يقعد بين الناس ويحكي لهم حكايات وروايات ومسلسلات وأساطير ، وينوع بقى ما بين كوميديا على رومانسية على إباحية على شوية غموض، ومفيش مانع من الأغاني برده،
ماهو احنا لازم نرضي جميع الأذواق ..أمال إيه😀

☆مين أصلا النّضر بن الحارث ده🤨
ده كان رجل من كفار مكة لما رسول الله أعلن الدعوة إلى الله،
راح مسافر للحيرة في العراق وقعد يتعلم كتب الفرس ويحفظ القصص بتاعتهم زي كتاب 《كليلة ودمنة》 إللي هيترجمه للغة العربية ابن المقفع بعدين في العصر العباسي😉
وكان بيسافر كمان للشام وبلاد فارس بحكم التجارة فكان بيتعلم أساطير الروم ،
وخالط أهل الكتاب واتعلم منهم،
واتعلم عزف العود واشترى واحد وجاء به لمكة ، وأهل مكة مكنوش يعرفوا العود،
يعني عمل لنفسه خليط كده محترم ورجع لمكة عشان ينشر الثقافة الجديدة 🙃
فكان يقعد في الأماكن إللي رسول الله صلى الله عليه وسلم بيدعو الناس فيها ويخبرهم عن قصص الأنبياء السابقين وعن عاد وثمود ،
ويحكي لهم النضر بن الحارث عن القصص المشوقة من قصص فارس والروم ويقول لهم:
محمد أحسن مني في إيه هو بيحكي عن عاد وثمود وأنا بحكي عن فارس والروم😏
احنا سمعنا كلامه ولو عايزين هنقول زي ما بيقول، وكلامه كله من أساطير الأولين اتعلمها زي مانا اتعلمتها 💁‍♂️

فأنزل الله فيه:
"وَإِذَا تُتْلَى عَلَيْهِمْ آيَاتُنَا قَالُوا قَدْ سَمِعْنَا لَوْ نَشَاءُ لَقُلْنَا مِثْلَ هَذَا إِنْ هَذَا إِلا أَسَاطِيرُ الأَوَّلِينَ "
ولما كان يعرف إن في أحد عايز يدخل الإسلام كان بيروح له ومعاه العود ويقعد يغني له ويقول له الغناء والموسيقى أفضل من الصلاة والصيام واتباع دين محمد،
فنزلت فيه آية:
"وَمِنَ النَّاسِ مَن يَشْتَرِي لَهْوَ الْحَدِيثِ لِيُضِلَّ عَن سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا ۚ أُولَٰئِكَ لَهُمْ عَذَابٌ مُّهِينٌ"

وكان هو أول من أدخل العزف بالعود لمكة وهو إللي علمهم،
واشترى المغنيات عشان يلهي الناس بها،
ومكنش أهل مكة يعرفوا الغناء والألحان لحد ما جاء النضر وكان أول من ضرب على العود بألحان الفرس😑

☆ممكن حد يسأل إزاي يعني الناس تسيب القرآن وتروح تسمع للنضر ده وواضح طبعا إن القرآن مختلف وأحسن😕

بكل بساطة زي ما الناس دلوقتي سايبة القرآن ومشغولة بالمسلسلات والروايات والأفلام من هنا ومن هنا،
وبالأغاني والإباحية والمنكرات والمحرمات إللي بقت متاحة بضغطة زرار في أي وقت👌
وكل ده عشان يلهوا الناس عن الدين ، أمال نسيبهم يفوقوا ويقولوا عايزين الإسلام😏
القلب المشغول بالباطل لا يمكن إنه ينصر حق👌
خطة النضر بن الحارث كانت من أكثر من ألف وأربعمائة سنة وهي متكررة وشوفوا حالنا دلوقتي هتلاقوا الخطة دي بتتطبق بالضبط😞
التاريخ بيعيد نفسه ولأن الناس متعرفش حاجة عن تاريخها فهتلاقيهم بيقعوا في نفس إللي وقع فيه السابقين😓

قريش لسه عندها حيل ثانية بجانب الحيل السابقة،
استخدموا الضغط النفسي على أتباع رسول الله صلى الله عليه وسلم،
قالوا كل واحد يشوف إللي أسلم من أهله ويقنعهم إنهم يسيبوا الدين ده ويبعدوا عن محمد،
اسمعوا كلامنا لأن الكلام ده لمصلحتكم ومصلحة عيالكم👌
وكان معظم إللي أسلموا شباب،
زي سعد بن أبي وقاص ومصعب بن عمير مثلا ، فأم سعد حاولت معاه تقنعه من هنا لهنا مفيش،
راحت مستعملة عنصر الترهيب قالت لابنها : أنا مش هاكل ولا أشرب إلا لما تسيب الإسلام، خليني أموت بقى والعرب تُعيرك بأنك قاتل أمك😤
وسعد بن أبي وقاص كان أبر الناس بأمه، وكان معروف بين الناس بالبر ده😅
وده ضغط نفسي رهيب على شاب صغير، فقال لها بكل بساطة :
والله يا أماه لو كانت لك مائة نفس فخرجت نفسا نفسا ما تركت ديني هذا، فكلي أو متاكليش😊
فعرفت من ثباته وكلامه إنه مش هيغير دينه،
فأكلت أمه وهو بقي على الإسلام👌

☆وهنا رسالة من سعد بن أبي وقاص لكل واحد بيعصي الله عشان يرضي أمه أو أبوه😞
ربنا إللي أمرنا ببر الوالدين هو نفسه إللي أمرنا إن لما يكون حاجة متعلقة في الدين يبقى ننفذ أمر ربنا 👌
وإن ثبات الإنسان وإصراره على موقفه وإنه مش فارق معاه إيه إللي ممكن يحصل، بيخلي إللي قصادك يستسلم وينزل على رأيك،
غير لو حس إنك مترددة أو معندكيش الثبات اللازم، هتلاقيه بيضغط عليكي لحد ما ترجعي عن هدفك👌

والمثال الثاني هو مصعب بن عمير، إللي كان من أكثر شاب مكة رقة وثراء كان مُنعم وأمه كانت بتحبه جدا، وكانت غنية،
وكانت بتشتري له أفخم الملابس والعطور وكان أكثر شباب مكة ترفا، وطبعا مكنش بيشتغل،
فلما أسلم أمه منعت عنه كل ده وكمان طردته من البيت،
وبقى فقير وبقي يلبس الملابس الخشنة ،وجلده كان بيتقشر زي جلد الثعبان😥
ولما كان يمشي مدة كانت رجله بتجيب دم، ماهو مش متعود على حياة البهدلة والفقر😞
لدرجة إن الصحابة كانوا بيبكوا لما بيشوفوه كده، وهو مع ذلك مكنش في دماغه ولا مهتم،
احنا بس بنسمع قصته لكن هو عاش الحياة دي وعمره ماشتكى

،
ولا مَنّ على ربنا ولا على رسوله ولا قال للصحابة أنا كنت وكنت وسيبت كل ده عشان الإسلام زي ما في ناس بتعمل للأسف😞
إيه إللي يخلي شاب يسيب النعيم إللي كان فيه ده وإللي أي شاب يتمناه؟
إيه إللي يجبره إنه يعرض نفسه للأذى ده كله؟
هيستفيد إيه وهو عنده الدنيا كلها؟
الدافع إللي خلاه يسيب أحسن الأكلات وأحسن اللبس ويتعرض للعذاب الجسدي ويصبر عليه وكأنه ولا حاجة ، هو إنه عايز الدار الآخرة،
مشكلة الناس دلوقتي إنها عايزة الدنيا والآخرة، ومع أول اختبار أو ضغط نفسي للأسف تلاقيها أول حاجة تفرط فيها هي دينها،
وناسيين إن الدنيا دار ابتلاء ودار تنازلات عن إللي بنحبه سواء أموال أو أهل أو أصحاب أو وطن في مقابل رضا الله،
وهنشوف إزاي الصحابة عملوا كده فعلا👌

كل الوسائل دي مقدرتش إنها تقضي على الدعوة للإسلام،
ولقوا إن الناس ثابتة وبتزيد😕
فلجأوا بقى للوسيلة إللي كل ظالم على مر العصور بيلجأ لها ،
وسيلة التعذيب والتهديد بالقتل والقتل فعلا😑

عمل إيه كفار قريش مع المسلمين؟
وكان إيه رد فعل المسلمين؟
وكان إيه رد فعل رسول الله صلى الله عليه وسلم نفسه على حملة التعذيب دي؟

ده إللي هنعرفه الجزء الجاي إن شاء الله 👌



#Eman_Shalapy

حسبنا الله ونعم الوكيل😞💔

https://youtu.be/OSTyZSsDjWM?si=uXiyuqW_MoFiQBch

سلسلة عتبات العبودية، الحلقة الأولى 🌿

#عتبات_العبودية