تخيل لو قابلك اعلان مكتوب فيه: مطلوب شباب وبنات للعمل بديسكو بمرتب 900 ألف جنيه

ولما سألت عن التفاصيل قالولك ان الشغل عبارة عن انك هتقف فقط على باب الديسكو تنظم الدخول ..

مش هسألك عن حكم الفلوس اللي هتاخدها، لأنك هتقولي حرام ..
.
بس أنا هسألك حرام ليه ؟
متوقع انك هتقولي علشان انا واقف بنظم لناس داخلة ترتكب كبائر، ناس بتشرب خمر ونساء عاريات و و...

هقولك بس انت لا شربت خمر ولا شوفت النساء دول، فحرام ليه ؟

هتقولي لأني مُعين ليهم على معصية الله، بساعدهم يعني على كدا..

طيب دا هيفرق كتير عن التيك توك؟ ناس بتعمل دعوات لناس علشان يحملوا التطبيق وياخدوا فلوس على كل واحد هيحمل التطبيق؟

لا مش هيفرق طبعا لأن التطبيق عبارة عن بنات عاريات بردو ورقص وأغاني وحاجة صعبة جدا !

طيب تحب تاكل وتشرب وتلبس بفلوس جاية من ورا بنات عاريات ورقص وشباب ضايع ومن تطبيق متصنف من ضمن التطبيقات سيئة السمعة؟

المصيبة الأكبر، انك لو عملت كدا الفلوس دي حرام وهتصرفها زي أي فلوس وخلصت على كدا، بس اللي مش هيخلص هي الذنوب اللي بتتكتب في صحيفتك بالملايين بسبب كل واحد حمل التطبيق عن طريقك وفضل يتفرج على الفيديوهات وكمان عمل دعوات لناس تانيين والتانيين اتفرجوا وعملوا دعوات لناس تانيين والتانيين عملوا دعوات لناس تانيين وآلاف الناس حملو التطبيق بسببك وأكلوا حرام بسببك، وشافوا فيديوهات زي دي بسببك !!

معقولة الواحد ممكن يوقع نفسه في المصائب دي ويبيع دينه علشان كام جنيه !!؟

انت أكبر من كدا ! اتركها لوجه الله ووالله سيعوضك الله أضعاف أضعافه.

-منقول.

#قصص_الأنبياء(٢)
#السيرة_النبوية
#الحلقة_مائة_وستة
#أحداث_السنة_السادسة_من_الهجرة
#برصيصا_العابد

قبل مانبتدي الجزء بتاع النهاردة عايزة أقول ملحوظة للأمانة العلمية 👌
◇العلماء اختلفوا في وقت غزوة بني المصطلق إللي حصل بعدها حادثة الإفك كانت امتى بالضبط🤔
في علماء قالوا إنها كانت في السنة الخامسة من الهجرة قبل غزوة الأحزاب أصلا، وفي علماء قالوا إنها كانت في السنة السادسة من الهجرة زي ما أنا شرحت،
وأنا اخترت الرأي إللي بيقول إنها كانت في السنة السادسة لأنه أقرب إلى المنطق،
لأن السيدة عائشة قالت إن صفوان كان يعرفها قبل فرض الحجاب ولما شافته غطت وجهها، والحجاب اتفرض بعد غزوة بني قريظة في يوم زواج رسول الله ﷺ من السيدة زينب رضي الله عنها في ذي القعدة سنة خمسة هجريا،
فإزاي بقى تكون حادثة الإفك قبل غزوة الأحزاب🤷‍♂️
أنا قلت لكم المعلومة دي عشان لو سمعتم الرأي إللي بيقول إن حادثة الإفك كانت في السنة الخامسة متستغربوش😊

◇وبرده العلماء اختلفوا في قصة العقد إللي وقع من السيدة عائشة وكان سبب في نزول آية التيمم هل كان في غزوة بني المصطلق زي ما شرحت ولاّ كان في غزوة تانية،
وأنا اخترت القول إللي بيقول إنه كان في نفس غزوة بني المصطلق، يعني العقد وقع من السيدة عائشة مرتين في نفس الغزوة،
فالموضوع مش هيفرق كتير هو كان في نفس الغزوة ولا في غيرها، يعني ممكن تاخدوا بالرأي إللي يناسبكم، أهم حاجة عرفنا أحداث نزول آية التيمم👌
أنا محبتش أدخل في تفاصيل الإختلاف بين العلماء عشان محدش يتلخبط 😅
إللي عايز بقى يتعمق ويعرف بالتفصيل هيلاقي في تعليقات الجزء إللي فات الروابط إللي فيها التفصيل ده ،
وهي سلسلة شرح حديث الإفك للشيخ أبو اسحاق الحويني ورابط لموقع أهل الحديث فيه التفصيل عن حادثة الإفك كانت امتى👌

ندخل في شرح الجزء بتاع النهاردة😁
قلنا المرة إللي فاتت إن رسول الله ﷺ موقّفش حركة الجهاد على الرغم من إن الأحداث كانت شديدة وصعبة عليه ﷺ وعلى الصحابة،
وده علّم الصحابة إنهم يفصلوا بين حياتهم الشخصية وحزنهم وابتلاءاتهم وبين الواجبات المفروضة عليهم،
يعني مهما كان الإنسان في ابتلاءات أو مهموم أو حزين ده مش مبرر إنه يعطل حياته وخصوصا خدمته للدين،
وده إللي المفروض احنا كمان نتعلمه👌
في ناس حياتها بتقف حرفيا لما تتعرض لابتلاء صعب شوية،
لكن رسول الله ﷺ كان غير،
هو عارف إن الحزن أو الألم مينفعش يوقفوه عن العمل الواجب عليه،
رسول الله ﷺ رئيس دولة كل الناس بيعادوها، واحنا مصدقنا إن الدولة الصغيرة الناشئة دي بدأت تقف على رجلها وتثبت وجودها بين العرب، فكان لازم يستمر في تثبيت دعائم الدولة الإسلامية وخصوصا بعد المكاسب إللي حققتها الدولة الإسلامية من بعد غزوة الأحزاب👌
ده غير كده لما رسول الله ﷺ يستمر على نفس منهجه في الجهاد برغم الفتن والمصائب ده فيه رسالة واضحة جدا للمنافقين وللعرب إن مفيش حاجة هتأثر فينا حتى المشاكل الداخلية هنقدر نحلها من غير ما حياتنا تقف،
ففي نفس الشهر شهر شعبان إللي حصلت فيه حادثة الإفك أخرج رسول الله ﷺ سريتين،
السرية الأولى كانت بقيادة عبد الرحمن بن عوف رضي الله عنه وجهز معاه سبعمائة مقاتل من الصحابة،
وكانت مهمة السرية دي إنها تتجه لديار بني كلب في مكان اسمه دَوْمة الجَندل يعني الحصن الذي بناه دوما، وكانت بعيدة جدا عن المدينة على حدود الشام كدن وهي أبعد مكان وصلت إليه الجيوش الإسلامية،
واتسمت السرية دي باسم سرية دومة الجندل، وكان الهدف من السرية دي هو الدعوة إلى الإسلام،
أمر رسول الله ﷺ عبد الرحمن بن عبد عوف إنه يخرج في الليل مع جيشه ووصاه بإنه يقاتل الكفار في سبيل الله،
ولا يغدر ولا يقتل أطفال👌
فانطلق الجيش في وقت السّحر وكانوا معسكرين في مكان اسمه الجُرْف، وصلى عبد الرحمن بن عوف الفجر مع رسول الله ﷺ فاستغرب رسول الله ﷺ من وجود عبد الرحمن بن عوف معاهم مع إنه كان المفروض يكون مع الجيش وسأله ﷺ انت بتعمل إيه هنا؟!
فقال له عبد الرحمن : أحببت يا رسول الله أن يكون آخر عهدي بك وأنا لابس لبس السفر😊
وخرج بعدها عبد الرحمن ولَحق بأصحابه ومشيوا في الصحراء لحد ما وصلوا ديار بني كلب وعسكر هناك وقعد يدعوهم إلى الإسلام لمدة ثلاثة أيام،
في البداية رفضوا الإسلام وكانوا ناويين على قتاله، لكن في اليوم الثالث سيدهم الأصبغ بن عمرو الكلبي أسلم وكان نصرانيا،
فأسلم من قومه ناس كثير بسبب إسلامه ومحصلش قتال وأرسل عبد الرحمن بن عوف لرسول الله ﷺ رسالة يحكي له إللي حصل وقال له إنه عايز يتزوج من القبيلة دي،
فرسول الله ﷺرد عليه برسالة قال له فيها إنه يتزوج تُمَاضِر بنت الأصبغ سيد القبيلة، فتزوجها عبد الرحمن ورجع بها إلى المدينة،
السرية الثانية إللي أخرجها رسول الله ﷺ في شهر شعبان في نفس وقت حادثة الإفك كانت سرية علي بن أبي طالب إلى ديار بني سعد في منطقة فَدَك،
والسبب في إخراج السرية دي إن رسول الله ﷺ عرف إن يهود خيبر برئاسة اليسير بن رَزَام بيجمعوا العرب عشان

يهجموا على المدينة مرة ثانية، يعني عايزين يعيدوا الأحزاب مرة ثانية😶
فبنِي سعد بيجهزوا نفسهم عشان يتعاونوا مع اليهود للهجوم على المدينة، فأرسل لهم رسول الله ﷺ علي بن أبي طالب ومعاه مائة من الصحابة عشان يقاتلوهم ويفرقوا تجمعهم،
وبكده رسول الله ﷺ قضى من البداية على تجمع كان هيهدد المدينة كلها مرة ثانية زي ما حصل في الاحزاب،
تخيلوا بقى لو رسول الله ﷺ كان منشغل بالأحداث الداخلية من غير ما يتابع الأخبار في الجزيرة العربية ويعرف أخبار التجمعات إللي بتهدد أمن المجتمع المسلم في المدينة النتيجة كانت هتبقى كارثية إزاي🙊

بعد حادثة الإفك نزلت سورة مهمة وفيها أحكام شرعية كثيرة للمسلمين بصفة عامة وللنساء بصفة خاصة وهي سورة النور👌
وسورة النور ربنا بدأها بقوله :
"سُورَةٌ أَنزَلْنَاهَا وَفَرَضْنَاهَا وَأَنزَلْنَا فِيهَا آيَاتٍ بَيِّنَاتٍ لَّعَلَّكُمْ تَذَكَّرُونَ "
يعني هو ربنا مأنزلش القرآن كله 🤨
لأ، ربنا أنزل القرآن كله ولكنه هنا خص السورة دي بالإنزال لمزيد من الإعتناء بها، يعني بيلفت نظرنا لأهمية الأحكام إللي في السورة دي👌
وقال فرضناها يعني الأحكام إللي فيها فرض عليكم العمل بها وعلى إللي هييجوا من بعدكم وكلكم ملزمين بتنفيذ الأحكام دي،
فسورة النور زي السور كده، إللي هيلتزم بأحكامها كأنه وضع سور مرتفع يحمي به نفسه وأهل بيته من كل شيء شيء ممكن يضره به لأن فيها مبادئ عظيمة منها:

◇تعليم الناس الثقة بالله وإن المبادئ والأحكام إللي ربنا بيفرضها ربنا عليهم هي لمصلحتهم في الدنيا والآخرة وهو أعلم بهم لأنه هو من خلقهم.
◇ تجريم عقوبتي الزنى والقذف، فاللي هيعرف العقوبة مش هيقرب من الفعل.
◇تعليم الناس إن الأصل هو حسن الظن بالمسلم مادام مفيش دليل واضح يفيد عكس كده من خلال حادثة الإفك.

◇ تأديب أهل البيت الواحد بأدب الاستئذان على الأسرة نفسها.
◇ وسائل الوقاية من الجريمة، وتجنيب النفوس أسباب الإغراء والغواية؛ وده عن طريق توضيح آداب البيوت والاستئذان على أهلها،
والأمر بغض البصر والنهي عن إبداء الزينة لغير المحارم، والتشجيع على تزويج على الشباب ولو كانوا فقراء، فإن الله سبحانه سيغنيهم من فضله، وفيها النهي عن البغاء ووسائله.

◇ التحذير من اتباع خطوات الشيطان، وتوضيح أن اتباع خطوات الشيطان تؤدي إلى كوارث لأن الشيطان مش هيسيب الإنسان وهيفضل يجره واحدة واحدة لحد ما يوصله للكفر زي إللي حصل مع بِرْصِيصَا العابد.

☆مين برصيصا ده🤨
برصيصا كان رجل عابد من بني إسرائيل،
وقصته من الإسرائيليات التي لا نكذبها ولا نصدقها إللي اتكلمنا عنها في الجزء الخامس من سلسلة قصص الانبياء لو تفتكروا 😊
حكى علماء التفسير قصة برصيصا وهم بيفسرو قول ربنا في القرآن:
"كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِّنكَ إِنِّي أَخَافُ اللَّهَ رَبَّ الْعَالَمِينَ "
برصيصا كان أعبد أهل زمانه، عبد ربنا حوالي سبعين سنة وكان معتكف في صومعته للعبادة ومكنش بيسيبها، ولم يذنب أي ذنب ظاهري ولم يستطع الشيطان أن يغويه ويفتنه طول الفترة دي حتى مردة الشياطين مقدروش عليه😕
والكل بيتكلم عن برصيصا العابد وعن تقواه وكان مضرب المثل في العبادة،
والعبادة يعني مكنش وراه غير الصيام والصلاة والذكر فقط متخيلين، لا بيقابل ناس ولا بيرفه عن نفسه ولا غيره،
خدوا بالكم هو كان عابد مش عالم👌
المهم كان في القرية إللي هو فيها ثلاثة إخوة وعندهم أخت واحدة، وكانوا عايزين يخرجوا للجهاد في سبيل الله،
لكن مش عارفين هيسيبوا أختهم مع مين يكون أمين عليها ويرعاها🤔
فملقوش غير برصيصا العابد، لكن برصيصا قاعد في صومعته هيسبوها إزاي عنده، فقالوا هنبني جنب الصومعة بتاعته غرفة تجلس فيها أختهم ،
راحوا كلموه وقالوا له عايزين نسيب أختنا عندك فرفض، فقعدوا يتحايلوا عليه وقالوا له احنا هنخرج للجهاد يعني عايزين نعبد الله وهي في غرفة جنب الصومعة بتاعتك، وانت بس مطلوب منك إنك تاخد الأكل وتحطه على باب غرفتها وحتى مش هيبقى بينكم كلام🤷‍♂️
بس الناس هتبقى فاهمة إن في رجل بيرعى المرأة دي، فوافق برصيصا لأن الموضوع بسيط ومش هيعطله عن العبادة وكمان ده باب خير وطاعة لله،
سافر الثلاثة إخوة وتركوا أختهم في الغرفة وكان برصيصا بيضع لها الطعام أمام باب الغرفة ويخبط عالباب ويرجع لصومعته من غير ما يكلمها كلمة واحدة ومن غير ماهي كمان تكلمه،
واستمر الوضع كده فترة واتعود على فعل الخير الجديد ده، ومفيش أي حاجة مخالفة خالص أهه وكله تمام💁‍♂️
في يوم من الأيام جاءه الشيطان ووسوس له وقال :
انت عارف البنت دي عايشة ولاّ ميتة 😑
ولاّ ممكن تكون مريضة ومحتاجة حاجة وهي متقدرش تكلم حد، واخواتها سايبينها أمانة عندك، هتقول لهم إيه لو جرى لها حاجة وانت كده هتضيع الأمانة، وهتقول إيه لربنا لو ضيعت الأمانة دي،
على الأقل سلم عليها وهي لما ترد السلام هتعرف إنها كويسة وكل ده من وراء الباب🤷‍♂️
وبرصيصا مكنش راضي يعمل كده، مع ا

لأيام ومع إلحاح الشيطان أخذ برصيصا الخطوة الأولى وبقى يسلم على المرأة ،
يعني يحط الأكل قصاد الباب ويخبط على الباب ويسلم على المرأة فقط وميكلمهاش أي كلمة تانية وهي ترد السلام وبعدين يرجع للصومعة بتاعته، واستمر الحال ده فترة من الزمن،
"يَا أَيّهَا الَّذِينَ آمَنُوا لَا تَتَّبِعُوا خُطُوَات الشَّيْطَان "
برصيصا اتعود إنه يسلم على المرأة خلاص وبقى الموضوع طبيعي بالنسبة له، بعد فترة جاءه الشيطان يوسوس له تاني وقال له:
المرأة لوحدها في البيت ويمكن محتاجة لشيء ومكسوفة تكلمك واخوانها اتأخروا عليها، فاسألها بس وشوفها لو محتاجة حاجة،
وانت رجل صالح مش هتعمل حاجة يعني ده انت بتساعدها بس، ولو انت مسألتهاش مين إللي هيسألها😕
فأخذ برصيصا الخطوة إللي بعد كده، وبقى يضع الطعام ويخبط على الباب ويسلم على المرأة ويسألها : محتاجة حاجة؟
فلو كانت محتاجة لشيء قالت له ولو مكنتش محتاجة قالت : لأ، وبعدين يرجع للصومعة يتعبد فيها لله،
"يَا أَيّهَا الَّذِينَ آمَنُوا لَا تَتَّبِعُوا خُطُوَات الشَّيْطَان "

☆كل الكلام لحد دلوقتي مفهوش أي مشكلة خالص أهه🤷‍♂️

برصيصا اتعود على سماع صوت البنت، والطبيعي إن إللي بيتعود على سماع الصوت بيشتاق إنه يشوف الشخص ده سواء رجل أو امرأة، فالكلام يدعو للنظر👌
برصيصا بدأ يتكلم مع البنت باستفاضة، مبقاش مجرد إنه بيسألها عن حالها وخلاص ده الكلام بقى يجيب كلام بحجة إن مفيش حد معاها يؤنسها،
وأكيد البنت هي كمان كانت بتسرح بخيالها وتتصور إن برصيصا مهتم بيها ويا سلام بقى لو تتزوج الرجل الصالح ده،
واستمر الوضع ده فترة من الزمن،
ماهو كل خطوة عشان تتثبت وتبقى عادي عند برصيصا محتاجة زمن والشيطان فاضي، همه كله إنه ينفذ خطته🙂
جاء الشيطان يوسوس لبرصيصا تاني وقال له:
انت واقف تكلم البنت من وراء الباب والناس رايحة جاية وشايفينك، شكلك إيه قصاد الناس دلوقتي وهيقولوا عليك إيه، ادخل على البنت كلمها واطلع على طول،
وانت رجل صالح ومستحيل تعمل حاجة تغضب ربنا👌
ضعف برصيصا وبقى يدخل على البنت يكلمها فقط ويخرج،
واستمر الوضع كده والشيطان يزينها له ويزينه لها وما اختلى رجل بامرأة إلا كان الشيطان ثالثهما،
مرة في مرة بدأ ينظر إليها، وبعدين بدأ يلمسها حتى وقع معها في الفاحشة😓
رجع لصومعته خائف إزاي وقع في الكبيرة دي وهو العابد الزاهد، مبقاش يكلمها وبقى يضع لها الطعام أمام الباب ويمشي، فنادت عليه مرة وقالت له، إنها حامل،
فخاف برصيصا من الفضيحة وهيعمل إيه، فاستغل الشيطان ضعفه ووسوس له وقال له اقتلها، ولو اخوتها سألوك عنها قل لهم إنها مرضت وجاء أجلها وماتت وانت دفنتها،
ومحدش هيشك فيك 😈
فأخذها برصيصا وقتلها ودفنها، بعد فترة جاء إخوة البنت وبحثوا عنها ملقوهاش، سألوا برصيصا قال لهم مرضت وماتت، شكروه وأكرموه على عنايته بأختهم ورجعوا للبيت،
الشيطان بقى جاء للثلاثة إخوة في الحلم وقال لهم القصة الحقيقية وإن برصيصا زنا بأختهم وحملت وبعدين قتلها ودفنها عند صخرة معينة،
تاني يوم لما صحيوا تكلم الأخ الأصغر وقال:
أنا شوفت رؤيا أفزعتني😣
فسألوه إخوته : ماذا رأيت😥
فحكى لهم الرؤيا، فقال الأوسط :أنا كمان شوفت نفس الرؤيا😳
وقال الأكبر : وأنا كمان شوفت نفس الرؤيا بتاعتكم😲
فقالوا يبقى أكيد الموضوع فيه إن، خلونا نتأكد، راحوا عند الصخرة إللي شافوها في الحلم ونبشوا القبر لقوا جثة أختهم وهي مذبوحة😶
راحوا لبرصيصا ونزلوه من صومعته وجروه والناس عرفت بالموضوع واتفضح أمره والناس بقت تشتمه وتضربه بقى انت العابد الزاهد وتعمل كده،
تخيلوا حياته اتقلبت إزاي، وإحساسه كان إيه وهو مصلوب مستني حكم الإعدام وشايف نظرات الإحتقار من الناس وسامع الشتيمة، يتمنى إنه كان استمر في العبادة ومتّبعش خطوات الشيطان،
في وسط الإحباط واليأس إللي كان فيه جاءه الشيطان في صورة بشر وقال له :
أنا إللي عملت معاك كل ده، وأنا دلوقتي أقدر أنجيك من إللي انت فيه👌
فقال له برصيصا : فعلا تقدر تخلصني😥
فقال له الشيطان : سأنجيك بشرط إنك تسجد لي سجدة واحدة وكل إللي انت فيه ده ينتهي وترجع لحياتك 👌
رفض برصيصا في الأول إنه يسجد له، لكن مع إغواء الشيطان ووعوده له والموقف الصعب إللي كان فيه سجد للشيطان سجدة فقتلوه الناس ومات على الشرك😞
"كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِّنكَ إِنِّي أَخَافُ اللَّهَ رَبَّ الْعَالَمِينَ *
فَكَانَ عَاقِبَتَهُمَا أَنَّهُمَا فِي النَّارِ خَالِدَيْنِ فِيهَا ۚ وَذَٰلِكَ جَزَاءُ الظَّالِمِينَ"

☆لو كان برصيصا صادق الإيمان بالله وعنده علم بالله مكنش وقع في الشرك في آخر لحظة ومكنش طلب من الشيطان إنه ينجيه، بقاله أكثر من سبعين سنة بيعبد الله غلط... في قلبه شبهة أو مرض أو جهل بالله أو...أو... عشان كده كانت النتيجة هي حبوط عمله ودخوله النار،
بعكس جُريج العابد فاكرينه،
جريج تعرض للفتنة ولأنه كان عالم عابد استطاع إنه يتجنب الفتنة وميقعش فيها،

وكان عنده ثقة في الله إنه هينجيه لما صلى ودعا الله وبعدين سأل الطفل الرضيع وقال من أبوك فأنطق الله الطفل الرضيع لجريج👌
العبادة لوحدها مش كفاية للنجاة من الفتن لازم العلم، لازم المسلم يعرف مين هو ربنا إللي بيعبده وإيه هي أسماءه وصفاته، من غير العلم الإنسان هيضل ويقع في الفتن،
يا جماعة ربنا لا يضل من كان صادق من قلبه في عبادته سبحانه، عشان بس الناس إللي دايما تقول محدش بعيد عن الفتنة ويبقى قصدهم إن ممكن ربنا في لحظة يُضل إنسان عابد طائع مخلص في ظاهره وباطنه كده وخلاص،
مش فاهمين إن ربنا هو الصادق الوفي ، وإنه يعامل الناس بكسبهم ، ويجازيهم بأعمالهم ولا يضيع عمل محسن أبدا ، ولا يضيع على العبد مثقال ذرة 👌
خدوها قاعدة لو شوفتم إنسان ربنا أضله بعد هدى فهو بسبب:
◇إما ذنوب خلوات تجرأ فيها العبد على الله وشايف إن ده حاجة عادية وغير نادم ومش بيحاول يصلح من نفسه،

◇أو إنه كان بيعمل الأعمال الصالحة عشان الناس، وفي قلبه مرض، سواء عجب أو رياء أو أي مرض من أمراض القلوب وهو مش بيصلحه👌

نسأل الله أن يثبتنا ويغفر لنا وألا يزيغ قلوبنا بعد إذ هدانا وأن يبعدنا عن اتباع خطوات الشيطان 🤲

◇ملحوظة:
المراجع في التعليقات👇

إن شاء الله المرة الجاية هنكمل الكلام عن السرايا وبعض آيات سورة النور😊



#Eman_Shalapy

مهما اختلفت الأزمنة والمعطيات يظلُّ بيتُ النبوّة مناطَ التأسّي الأعظم بجميع معانيه ولابد 🎀
هذه المرةُ رحلَتنا في رِحابِ الصِّدِّيقيّة، مُمتثِلين أُنمُوذَجَينِ فَريدينِ لفاضِلتينِ خَصّهما اللهُ بأشرفِ المنازلِ، فكانت إحداهُما عائشةُ أمُّ المؤمنينَ، زوجَ أشرَفِ الخلقِ وابنةَ صاحِبه صديِّق الأُمّة، والأخرى فاطِمةُ بِنته صلى الله عليه وسلم وأشْبهَ النّاسِ بِه، هذه المزيّةُ لكلٍ منهما كانَ لها عظيمُ الأثرِ في تكوينِ شخصيتِهما
وبذاتِ النّهجِ الذي اعتدناه نريد أنْ نسلّط الضوءَ على أبرزِ المواقفِ في حياتهما لننظُرَ كيف كانتِ الواحدةُ منهما مُزدانَةً بالتوازن؛ فلا تُمِيلُ إحدى الكِفّتين أو تُخوِي الأخرى..🌸🌧

أكاديمية أساور التكميلية تقدّم لكنّ:
دورةً في كتابِ (الصِّدِّيقَتانِ) للشيخ: وِجدان العلي

ضمن مسار راسيات
المسار المختصّ بالسير والتراجم

📌تنبيه: الدورة عامة للجميع ولا يُشترط الحصول على الرقم الأكاديمي.. 🌸

🔗 بين أيديكن رابط التسجيل للدورة فبادرن:
https://docs.google.com/forms/d/e/1FAIpQLSe0XaZtpHxzHDL4ZoNFgbjPHP-CTCpYTZhJ1Y95XfqT7VNGbg/viewform?usp=sf_link

🌷
#أساور_الأنثوية
#أساور_لكل_مسلمة

أذكار المساء💛

💌

عن جابر بن عبدالله رضي الله عنهما،
أن النبي ﷺ قال: ((مَنْ قَالَ سُبْحَانَ اللهِ العَظِيمِ وَبِحَمْدِهِ غُرِسَتْ لَهُ نَخْلَةٌ فِي الجَنَّةِ))
رواه الترمذي.

بفضل الله ثم تبرعاتكم حالة العروسة بتاعت الأسبوع اللي فات تمت 💚💚

حالة الأسبوع دا..

السلام عليكم ورحمة الله وبركاته ..")
معانا حالة عروسة مستعجلة ، فرحها بعد 10 أيام ..
الأُسرة مكونة مِنْ 6أفراد [ أم وأخ و ولدين وبنتين ] الأب كبير في السن وعنده مشاكل في الضهر ، والأم بتاخد علاج سكر على نفقة الدولة ، لا يوجد أي مصدر دخل غير قبض الأم تكافل وكرامة 460ج ..
الأم جابت الرفايع بالقسط وبتدفع القبض في القسط ومفيش جنيه بيدخل البيت 💔 محتاجين نجمعلها 9750 للاجهزة الكهربائية ، عشان نكمل فرحة العروسة على خير .💚💚🌸
متنسوش قوله ﷺ : [ ومَنْ كَانَ فِي حاجةِ أَخِيهِ كانَ الله فِي حاجتِهِ ] ، من لها؟؟

اللي حابة تستفسر تتواصل معايا هنا
@zra555

#غيث

أذكار المساء💕

#قصص_الأنبياء(٢)
#السيرة_النبوية
#الحلقة_مائة_وسبعة
#أحداث_السنة_السادسة_من_الهجرة
#وليضربن_بخمرهن_على_جيوبهن
#آثار_الغزوات_والسرايا_بعد_الأحزاب

اتكلمنا المرة إللي فاتت عن نزول سورة النور وشوفنا بعض النقط إللي بتتكلم عنها السورة ومن النقط دي كان الأمر بغض البصر والنهي عن إبداء الزينة لغير المحارم،
خلونا نشوف الآية :
"وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ"

والمقصود إن المرأة تصرف نظرها عن مَن تشتهي رؤيتَه من الرجال الأجانب، وتُنقص من النظر إلى الشهوات؛ للحذر من الفتنة في الدين،
فالكلام معناه إن غض البصر أنواع:
◇الأول :
هو عدم النظر إلى الجنس الآخر،
◇ الثاني :
غض البصر عن عورات النساء فيما بينهن أو عورات الرجال فيما بينهم، يعني مش عشان النساء أو الرجال زي بعض بقى يبقى مفيش بينهم عورات،
لأ...المرأة يجب عليها غض البصر عن عورة المرأة إللي زيها و كذلك الرجل يجب عليه غض بصره عن عورة الرجل إللي زيه،
◇ الثالث:
غض البصر عن رزق الناس و أملاكهم، لأن ده سبب في فتنة الإنسان، لما مثلا امرأة تشوف عند صاحبتها ولا قريبتها ذهب ويعجبها وتشوف الإعلانات عن متاع الدنيا باختلاف أنواعه وكذلك الرجل لما يشوف متاع من الدنيا لا يملكه، إيه إللي هيحصل🤔
الطبيعي إن النفس هتشتهي الحاجة دي، طيب مفيش أموال، يبقى هيعرض نفسه إنه يشتغل بزيادة ويضيع حقوق ربنا عليه،
وممكن مع زيادة إطلاق النظر وشدة الرغبة في متاع الدنيا الإنسان يقع في المحرم زي السرقة أو إنه يحصل على المال بطريقة غير مشروعة،
وهتلاقوا إن كل مصائبنا كبشر نتيجة اهتمامنا بأملاك وأرزاق بعضنا البعض، وحتى الحروب إللي عرفتها البشرية كانت بسبب الجشع و النظر و الطمع فى ما عند الآخرين🤷‍♂️
فأقوى الحواس ارتباطا بالقلب هي حاسة البصر، لأن الإنسان إذا شاف حاجة عجبته وخلاص دخلت قلبه بقى عايزها،
عشان كده رسول الله ﷺ قال :
" انظروا إلى من هو أسفل منكم في الدنيا وفوقكم في الدين فذلك أَجْدرُ ألا تَزْدَروا نعمة الله عليكم"👌
وإطلاق البصر سواء في المحرمات أو الشهوات بيخلي في القلب حسرة وحُرقة،
لأن الواحد بيشوف حاجة نفسه فيها ومش قادر يحصل عليها وده من أعظم العذاب للإنسان😓
وطبعا مش هتكلم عن العشق المحرم المنتشر بين الشباب دلوقتي وإنه كان بدايته النظر😑
في حين إن إللي بيغض بصره ربنا بينور له بصيرته ويشوف بعين قلبه وفِراسته إللي غيره ميشفهوش، وبالتالي يتجنب الوقوع في مشاكل كثيرة،
واحنا اتكلمنا قبل كده عن البصيرة في الجزء السابع والثمانون لو حبيتم ترجعوا له وتفتكروا معناها وإزاي الإنسان يكون عنده بصيرة 😊
وغض البصر بأنواعه الثلاثة له فوائد كثيرة ،
من أهمها من وجهة نظري 😅
الأنس بالله وإن الإنسان يبقى عنده بصيرة👌

☆وهتلاقوا رابط في التعليقات فيه فوائد غض البصر ممكن تقرأوا الفوائد دي عشان تساعدكم على غض البصر👇

وإللي هيحفظ بصره هيقدر يحفظ فرجه في الغالب، عشان كده ربنا ربط بين الإثنين، أمر بحفظ البصر ووراه على طول أمر بحفظ الفرج سواء عن الزنا والسّحاق أو غيره،
ولأن النظر هو سبب كل المشاكل والفتن ربنا أمر المرأة إنها لا تُظهر زينتها وهي خارجة من بيتها عشان متلفتش النظر إليها، لأن الطبيعي إن العين هتلقط أي حاجة شكلها حلو ومُزينة🤷‍♂️

واحنا اتكلمنا قبل كده في الجزء بتاع لماذا النساء ووضحنا أد إيه المرأة فتنة شديدة على الرجل،
فربنا أمر النساء إنهن لا يُظهرن زينتهن واستثنى إللي يظهر منها غصب عنها،
يعني ربنا قال إلا ما ظهر منها مقلش إلا ما أظهرن منها، يعني المرأة متتعمدش إنها تبين منها شيء،
"وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا "
وطبعا المرأة مباح لها إنها تُظهر زينتها أو مواضع زينتها أمام المحارم،
"وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُولِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَىٰ عَوْرَاتِ النِّسَاءِ"
وزيادة في الستر ربنا أمر النساء أنهن يغطين فتحة الصدر إللي كانت في الجلابيب إللي كانوا لابسينها، لأن النساء كانت بتسيب شق كده من عند الرقبة لحد أسفل الصدر عشان يقدروا يرضعوا أولادهن، فكانت منطقة الصدر دي بتظهر غصب عنها،
"وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ"
فلما نزلت الآية دي نساء المهاجرات الأُوَل شققن أُزُرَهن فاختمرن بها زي ما قالت السيدة عائشة رضي الله عنها ،
يعني كل واحدة جابت الإزار بتاعها وشقته ولبسته من على رأسها وغطت بيه فتحة الجيب، والإزار يعني ما يُلبس على الجزء الأسفل من الجسم،
وخدوا بالكم إن اتفاق الصحابيات على تطبيق الآية بالمنظر ده حجة، لأ

ن رسول الله ﷺ شافهم وهم متغطيين كده،
ولو كانوا فهموا غلط أو تطبيقهم للآية كان غلط كان رسول الله ﷺ اعترض وقال لهم لأ انتم فهمتوا غلط والصح كذا وكذا👌
فالآية دي مكملة وشارحة لآية سورة الأحزاب
" يَا أَيُّهَا النَّبِيُّ قُلْ لأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ"

فالنساء زودوا الستر مش قلّلوه، أو إنهم مكنوش مغطيين وجوههم فغطوها، أو إن الآية دي بتنسخ آية سورة الأحزاب وبتقول إن النساء عادي يكشفن وجوههن،
فالآية بتأكد على تغطية المرأة لجميع جسدها بما فيه الوجه،
"وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ"
واحنا قلنا إن زوجات رسول الله ﷺ وزوجات المؤمنين كانوا مغطيين وجوههن من ساعة نزول آية سورة الأحزاب واتكلمنا بالتفصيل عن تفسير الآية في جزء الحجاب في الإسلام،

☆بكرر وبعيد 😊
أنا بشرح السيرة يعني بشرح أفعال رسول الله ﷺ والصحابة كانت إيه ورد فعل رسول الله ﷺ على أفعالهم،
موضوع بقى اختلاف العلماء وقول ابن العباس إن إللي ظهر المقصود به في الآية الوجه والكفين،
"إِلَّا مَا ظَهَرَ مِنْهَا"
كل ده مخالف للتفسير الصحيح للآية وفعل الصحابيات زي ما شوفنا،
وبالمناسبة كل الكلام المنسوب لعبد الله بن عباس عن الوجه والكفين فهو كله روايات ضعيفة، ويقابلها روايات صحيحة بتقول عكس الكلام،
وحتى لو سلمنا باختلاف العلماء فالقول الراجح من الإختلاف بتاعهم إن تغطية الوجه والكفين فرض على كل امرأة حرة،
فيا ترى بقى إللي عايز يتبع رسول الله ﷺ وصحابته عشان يُحشر معاهم يوم القيامة هياخد بالصحيح ولاّ بالضعيف💁‍♂️
وبالنسبة لتفسير إلا ما ظهر منها فدي معناها ثياب المرأة الظاهرة إللي مفيهاش زينة،
《الكلام عن تفسير الآية باختصار من كتاب عودة الحجاب الجزء الثالث الباب الخامس للشيخ محمد إسماعيل المقدم 》
رابط الكتاب في التعليقات👇 والكتاب ده مهم جدا يا جماعة إللي يقدر يقرأه هيستفيد منه جدا👌

نرجع لأحداث الجهاد والسرايا ،قلنا إن رسول الله ﷺ مهما كان مشغول بالأحداث الداخلية في المدينة فهو كان متابع للأخبار في شبه الجزيرة العربية عن طريق العيون إللي زارعها هنا وهناك ومهمتها إنها تعرف أخبار وتحركات القبائل زي فريق استخبارات كده،
وصل الخبر لرسول الله ﷺ إن امرأة من بني فَزَارة اسمها أم قِرْفة في منطقة وادي القرى جهزت فرقة من ثلاثين أو أربعين فارس من أولادها وأحفادها مهمتها اغتيال رسول الله ﷺ وأم قرفة كانت زعيمة في بني فزارة لها شأنها ومكانتها وقومها بيعظموها،
فجهز رسول الله ﷺ سرية بقيادة زيد بن حارثة رضي الله عنه، ومهمة السرية دي القضاء على الثلاثين فارس،
فخرجت السرية في شهر رمضان وتوجهت لمنطقة وادي القرى،
هجمت السرية على الفرسان وقتلتهم جميعا، وقتلوا أم قرفة لأنها كانت تقاتل وتحرض على قتل رسول الله ﷺ،
لكن الأصل إن النساء لا تُقتل، فلو قاتلت وحرضت على قتال رسول الله ﷺ والمسلمين تُعامل معاملة المحارب وتُقتل في المعركة زيها زي الرجل،

☆وفي هنا شبهة أعداء الإسلام بيفتروها على رسول الله ﷺ، بيقولوا إن رسول الله ﷺ لما قتل أم قرفة ربط كل رجل من رجلها في حصانين وخلى الحصانين يجروا عكس اتجاه بعض فانفسخت المرأة وقُتلت بالطريقة دي😑

طبعا الكلام غير صحيح، لأن زيد بن حارثة هو إللي قتلها أصلا في بلدها مع الثلاثين فارس وأخذ درعها وأرسله لرسول الله ﷺ في المدينة،
يعني رسول الله ﷺ مشفهاش من الأساس🙄
وكمان رسول الله ﷺ كان دائما ينهى الصحابة عن التمثيل بالقتل وهو القائل :
"إن الله كتب الإحسان على كل شيء، فإذا قتلتم فأحسنوا القتلة، وإذا ذبحتم فأحسنوا الذبح وليحد أحدكم شفرته، وليُرِح ذَبِيحته"
فإذا كان إحسان القتلة مأمور به عند ذبح البهيمة، فكيف بالإنسان 🤷‍♂️
فكل الروايات إللي بتتكلم عن طريقة القتل دي روايات ضعيفة، وروايات السّيَر وقصص التاريخ لا يُثبت بها حكم وخصوصا لما تناقض الأحكام الشرعية إللي جاءت في الأحاديث الصحيحة👌

في نفس شهر رمضان حصل جَدب شديد ومفيش مطر بينزل، وجزيرة العرب معتمدة في الأساس على الأمطار،
فاشتكى الناس لرسول الله ﷺ،
فقام رسول الله ﷺ وجمع الناس وصلى ركعتين ودعا الله عز وجل فأنزل الله المطر عليهم كالسيل،

☆ودي اسمها صلاة الاستسقاء، وصلاة الاستسقاء زي صلاة العيد كده، الركعة الأولى سبع تكبيرات وبعدين الفاتحة وما تيسر من القرآن والركعة الثانية خمس تكبيرات والفاتحة وما تيسر من القرآن،
وبعد الصلاة الإمام يخطب في الناس ويعظهم ويدعو الله عز وجل والناس تُأَمّن على الدعاء.

في شهر شوال رسول الله ﷺ أخرج سريتين:

◇السرية الأولى كانت لقتل مجموعة من المشركين من قبائل عَكَل وعُرَيْنَة، والمجموعة دي كان عددهم ثمانية جاءوا للمدينة وأسلموا عند رسول الله ﷺ وبعدين لقوا إن المدينة مش مناسباهم ومش عاجبهم يقعدوا فيها، وكانوا مرضى وفي رواية إنهم اشتكوا وجع في بطونهم،
فاشتكوا لرسول الله

ﷺ من مرضهم، فأرسلهم رسول الله ﷺ مع راعيه ومعاه إبل الصدقة لطرف المدينة ناحية قُباء ، وقال لهم يقعدوا هناك ويشربوا من لبن الإبل دي ومن بولها،
فلما خفّوا من المرض وصحتهم رجعتلهم قطعوا يد راعي رسول الله ﷺ ورجليه وسخنوا مسامير ووضوعها في عين الراعي وتركوا كده لحد ما مات😥
وأخذوا الإبل ومشيوا بيها...سرقوها يعني،
وصل الخبر لرسول الله ﷺ فجهز بسرعة سرية من عشرين فارس بقيادة كِرْز بن جابر الفهري وأرسلهم وراء العُرَنِيّين الثمانية المشركين دول،

☆وكرز بن جابر ده لو تفتكروا لما حكينا في الجزء الخامس والخمسين كان هو إللي هجم على أطراف المدينة وحصلت بسببه غزوة سَفْوان أو غزوة بدر الأولى، وأسلم بعدين😊

المهم الأحداث دي كانت في أول النهار، على آخر اليوم كان العشرين فارس لحقوا الثمانية من المشركين وقبضوا عليهم وكتفوهم واسترجعوا الإبل ورجعوا لرسول الله ﷺ،
وأنزل الله تعالى:
"إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَن يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُم مِّنْ خِلَافٍ أَوْ يُنفَوْا مِنَ الْأَرْضِ ۚ
ذَٰلِكَ لَهُمْ خِزْيٌ فِي الدُّنْيَا ۖ وَلَهُمْ فِي الْآخِرَةِ عَذَابٌ عَظِيمٌ"

لما وصلوا لرسول الله ﷺ أمر بهم رسول الله ﷺ فقطعت أيديهم وأرجلهم ووضعت المسامير المُسخنة في أعينهم زي ما عملوا في الراعي بالضبط، وتركهم في الصحراء ليموتوا👌
وده كان أشد عذاب عذب به رسول الله ﷺ أحد،
وده بسبب جرائمهم إللي وراء بعض: ردة عن الإسلام وتعذيب وقتل وسرقة وكل ده كان مقابل الإحسان إللي أحسن به رسول الله ﷺ إليهم،

◇السرية الثانية في شهر شوال كانت بقيادة عبد الله بن رَوَاحة، ومهمة السرية دي كانت اغتيال اليُسير بن رزام،
واليُسير بن رزام ده كان زعيم اليهود في خيبر بعد مقتل أبو رافع سلاّم بن أبي الحقيق،
مش يتعظ بقى ويحافظ على حياته بعد مقتل حيي بن أخطب وأبو رافع، لأ...ده قعد يجمع اليهود في منطقة خيبر ومنطقة وادي القرى ومنطقة فَدَك،
ومش بس كده ده بدأ يجمع غطفان مرة ثانية عشان يحارب المسلمين ويعيد الأحزاب مرة ثانية😶
يعني عايز يقوم بنفس الدور إللي قام به حُيَي بن أخطب وأبو رافع اليهودي،
وعشان مأساة حصار المسلمين في المدينة متتكررش رسول الله ﷺ كان حريص إنه يتخلص منه قبل ما يحقق هدفه في تجميع المشركين، وبكده هيحمي المسلمين من أزمة كبيرة جدا ممكن تحصل لهم،
وكان عدد السرية دي ثلاثين فارس وقدروا إنهم يقتلوا اليُسير بن رزام، وبكده أمن المسلمون من شر يهود خيبر،
ولكن بصفة مؤقتة😕
احنا أه خلصنا من زعيمهم بس اليهود نفسهم موجودين وهي مسألة وقت لحد ما يجمعوا نفسهم تاني ويحاولوا يهجموا على المسلمين،
عشان كده لازم حل نهائي لمشكلة اليهود في خيبر عشان نخلص من شرهم زي ما خلصنا من بني قينقاع وبني النضير وبني قريظة👌
لكن المشكلة إن رسول الله ﷺ مش هيقدر يدخل دلوقتي في حرب مع يهود خيبر، لأن قريش ممكن تستغل فرصة خروج رسول الله ﷺ من المدينة ويقوموا جايين هاجمين على المدينة أو هيجموا على جيش رسول الله ﷺ من خلفه،
ويبقى رسول الله ﷺ محصور بين جيش اليهود من الأمام وجيش المشركين من خلفه 😶
وبكده المسلمين هيتعرضوا للإبادة زي إللي كان هيحصل بالضبط في غزوة الأحزاب، وخصوصا إن حصون خيبر قوية محتاجة حصار ومقاتلينها أقوياء جدا، فالموضوع محتاج له وقت،
عشان كده رسول الله ﷺ اكتفى بس إنه يقتل رأس الفتنة اليُسير بن رزام لحد ما يشوف هيعمل إيه مع قريش👌

كده يبقى عدى على غزوة الأحزاب سنة كاملة، من شوال سنة خمسة هجريا إلى شوال سنة ستة هجريا، حصل خلال السنة دي حوالي عشرين غزوة وسرية زي ما شوفنا،

والغزوات والسرايا دي كان لها أثار كثيرة منها:
♡ تحسن الوضع الأمني للمسلمين في الجزيرة العربية، مبقاش في حد بيعتدي على المسلمين زي ما كان بيحصل في الأول.
♡ تحسن المستوى العسكري والأداء القتالي للمسلمين جدا، لأن الغزوات والسرايا دي كانت زي دورات عسكرية عملية،
واحنا عارفين إن التجربة العملية مختلفة تماما عن الكلام النظري👌
♡ تحسن الوضع الاقتصادي للدولة الإسلامية، لأن الإستقرار بيشجع على التجارة، وكمان بسبب الغنائم إللي أخذها المسلمين في الغزوات والسرايا.
♡بقى في علاقات دبلوماسية بين المسلمين وقبائل العرب القوية، زي بني المصطلق إللي رسول الله ﷺ تزوج من بنت ملكهم جويرية،
وزي بني كلب في دومة الجندل إللي عبد الرحمن بن عوف تزوج من بنت ملكهم، ومننساش موقف ثمامة بن أثال وإسلامه بسبب أسره في سرية محمد بن مسلمة.
♡قريش بدأت قوتها تضعف لأنها خسرت التحالف مع القبائل إللي رسول الله ﷺ كسبها في صفه، وبكده بدأت قريش تفقد سيادتها على العرب 🤭
ده غير بقى ضعف قوة اليهود بسبب خسارة زعماءهم الواحد وراء التاني، يعني إللي يشوف الحال يلاقي إن دولة الإسلام بتفرض سيطرتها شوية شوية ومفيش حد قادر يوقف السيطرة دي،
وخدوا بالكم إن لو كان مجتمع الصحابة مش متربي ت

ربية إيمانية مكنش قدر يفرض سيطرته دي👌
الصحابة لما كان يأتيهم الأمر من الله أو من رسوله كانوا بينفذوه فورا من غير أي اعتراض، واحنا شوفنا رد فعل الصحابة لما نزل تحريم الخمر مثلا وشوفنا النساء عملت إيه لما نزلت آية الحجاب،
ومش كده وبس ده في مواقف للصحابة الواحد يستغرب منها جدا،
يعني مرة رسول الله ﷺ كان في المسجد بيخطب فقال للصحابة إللي كانوا في المسجد اجلسوا، فسمعه عبد الله بن رواحة وهو خارج المسجد فراح قاعد في الأرض لحد ما رسول الله ﷺ خلص الخطبة بتاعته،
رسول الله ﷺ لما عرف إللي عمله عبد الله بن رواحة دعا له وقال :
زادك الله حرصا على طواعية الله تعالى وطواعية رسوله👌
مع إن عبد الله بن رواحة كان ممكن يقول لنفسه ده رسول الله بيقول للناس إللي في المسجد،
أو على الأقل كان يدخل المسجد الأول وبعدين يقعد فيه بدل ما يقعد في الشارع كده لوحده، مفكرش في شكله قصاد الناس ولا إن الناس ممكن تتريق عليه ولا تنتقده،
هو سمع كلمة من رسول الله ﷺ فنفذها في نفس اللحظة،
موقف تاني،
رسول الله ﷺ كان بيصلي وهو لابس نعله، حذاءه يعني فخلعهما وهو بيصلي راح الصحابة كلهم خالعين نِعالهم هم كمان في الصلاة🤨
فبعد الصلاة رسول الله ﷺ سألهم إنتم ليه خلعتم نعالكم؟!
قالوا له :
شوفناك خلعت نعالك فخلعنا😅
فقال لهم إن جبريل عليه السلام جاءه وقال له إن نعله فيه قذرا، فعشان كده خلعهما،
شوفتم اتباع الصحابة لرسول الله ﷺ عامل إزاي، مع إنهم لو استنوا لحد ما رسول الله ﷺ يخلص صلاة وسألوه مكنش هيبقى في مشكلة،
تعتقدوا أمة زي دي يقدر حد يغلبها، وربنا وعدهم بالاستخلاف في الأرض ماداموا طائعين:
"وَعَدَ اللَّهُ الَّذِينَ آمَنُوا مِنكُمْ وَعَمِلُوا الصَّالِحَاتِ لَيَسْتَخْلِفَنَّهُمْ فِي الْأَرْضِ كَمَا اسْتَخْلَفَ الَّذِينَ مِن قَبْلِهِمْ وَلَيُمَكِّنَنَّ لَهُمْ دِينَهُمُ الَّذِي ارْتَضَىٰ لَهُمْ "
فانتشار سيطرة المسلمين خارج المدينة كانت نتيجة لطاعتهم لله ولرسوله وأخذهم بأسباب النصر،
وأي حد عايز يحقق النتائج إللي حققوها يبقى لازم يلتزم بنفس منهجهم وهو الطاعة العمياء لله ولرسوله👌
"وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ"

في نفس الشهر شهر شوال رسول الله ﷺ شاف رؤيا، وبسبب الرؤيا دي هتحصل أحداث كبيرة جدا هيكون لها الأثر مش بس على شبه الجزيرة العربية لكن كمان على العالم كله😮

إيه هي الرؤيا دي وإيه الأحداث إللي حصلت بعد كده ده إللي هنعرفه المرة الجاية إن شاء الله 😊


#Eman_Shalapy

أذكار الصباح🧡

أذكار المساء🧡

#قصص_الأنبياء(٢)
#السيرة_النبوية
#الحلقة_مائة_وثمانية
#أحداث_السنة_السادسة_من_الهجرة
#الطريق_إلى_الحُدَيْبِيَة

وقفنا المرة إللي فاتت عند الرؤيا إللي شافها رسول الله ﷺ،
وقلنا إن بسبب الرؤيا دي هتحصل أحداث كبيرة جدا هيكون لها الأثر مش بس على شبه الجزيرة العربية لكن كمان على العالم كله👌
إيه بقى الرؤيا دي🤔
رأى رسول الله ﷺ إنه أخذ أصحابه وذهبوا لمكة وطافوا بالبيت الحرام،
ورؤيا الأنبياء وحي، يعني كده ربنا أمر رسول الله ﷺ إنه يأخذ الصحابة ويروحوا يعملوا عمرة،
لكن إزاي رسول الله ﷺ والصحابة معاه هيروحوا يعملوا عمرة وفي حرب قائمة بينهم وبين قريش،
وقريش من سنة واحدة بس كانوا جايبين عشرة آلاف مقاتل وجايين يحاربوا المسلمين، ده كده هيبقوا بيسلموا لهم نفسهم وخصوصا إن مفيش بينهم أي معاهدات😳
رسول الله ﷺ أخبر الصحابة بالرؤيا وقال لهم يتجهزوا للعمرة، الصحابة بدأوا يتجهزوا للعمرة من غير ما يسألوا ولا يعترضوا ولا أي حاجة خالص😮
مع إن السفر لمكة في الوقت ده فيه خطر عليهم، ومع ذلك رضيوا وقبلوا وبدأوا يتجهزوا للخروج مع رسول الله ﷺ،
قريش كان عندها قانون مُتعارف عليه بين العرب وهو إن إللي يذهب إلى مكة لأداء العمرة فهو آمن مهما كان الخلاف إللي بينه وبين قريش👌
والقانون ده كان في مصلحة رسول الله ﷺ والصحابة، كده قريش مش هتقدر تعمل لهم حاجة🤷‍♂️
فرسول الله ﷺ استغل القانون ده لمصلحته وبكده قريش مش هتقدر تتعرض للمسلمين بأذى،
لكن هل قريش بقى هتلتزم بالقانون ده ولا هييجوا لحد المسلمين وميطبقوش القانون🙂
ده إللي هنعرفه كمان شوية،
تجهز ألف وأربعمائة صحابي للخروج للعمرة مع رسول الله ﷺ، وطبعا المنافقين كلهم إلا رجل واحد مخرجوش مع رسول الله ﷺ لأنهم كانوا شايفين إن المشوار ده مُهلك،
إزاي يروحوا للأعداء في عُقر دارهم ومش معاهم غير سلاح المسافر فقط وهو السيف مش سلاح المحارب، يعني دي عملية انتحارية من وجهة نظرهم،
فكل إللي خرج مع رسول الله ﷺ للعمرة كانوا من المؤمنين الصادقين ما عدا منافق واحد وهو الجَدّ بن قَيْس،
خرج مع رسول الله ﷺ من زوجاته في السفر ده السيدة أم سلمة رضي الله عنها،
خرج رسول الله ﷺ من المدينة مع الصحابة في اتجاه مكة وكان خروجهم في شهر ذي القعدة من السنة السادسة للهجرة، وأخذ معاه مجموعة كبيرة من الإبل وقلّدها يعني وضع في رقبتها جلدة عشان يتعرف إن الإبل دي من الهَدْي إللي هيُذبح في مكة،
ووصل إلى ذي الحُلَيفة أو ما يسمى الآن بأبار علي، وهو المكان إللي بيُحرِم منه القادم من المدينة إلى مكة،
يبقى رسول الله ﷺ لبس ملابس الإحرام وبدأ بالتلبية والصحابة معاه،
وبقى واضح جدا إن رسول الله ﷺ رايح للعمرة، وهو يعلم ﷺ إن في عيون لقريش على الطريق والعيون دي هتنقل الخبر لقريش،
ورسول الله ﷺ مش عايز قتال مع قريش هو شاف في الرؤيا إنه بيعتمر فقط، مكنش في أي قتال👌
فكده قريش على حسب قانونها ملهاش أي حجة إنها ترد المسلمين أو تمنعهم من أداء العمرة🤷‍♂️
رسول الله ﷺ كان عايز يعرف رد فعل قريش على خروجه للعمرة فأرسل واحد من الصحابة اسمه بِشر بن سفيان الخزاعي يستطلع الخبر،
فلقى إن قريش جمعت جيش وجمعت الأحابيش عشان يمنعوا رسول الله ﷺ من الدخول لمكة،
والأحابيش دول مجموعة من القبائل تحالفت مع قريش عند جبل اسمه حبشي وعاملين مع بعض اتفاقية دفاع مشترك للدفاع عن مكة،
رجع بِشر لرسول الله ﷺ وأخبره الخبر،
فقال رسول الله ﷺ:
يا ويح قريش! قد أكلتهم الحرب،
يعني الناس دي مشتاقة للحرب بشكل غير مفهوم، يعني احنا اتحاربنا مرة واتنين وثلاثة خلاص بقى،
وأنا موضح إني جاي أعمل عمرة ومش معايا غير سلاح المسافر فليه التصميم على القتال ده،
ولو إنهم فكروا بعقل شوية مش هيبقى في مشكلة لو خلوا بيني وبين العرب أقابلهم وأدعوهم، فلو قتلوني خلاص هو ده إللي هم عايزينه،
ولو ربنا أظهرني عليهم يدخلوا في الإسلام من غير ما حد يموت منهم، أو على الأقل هيقاتلوني وهم فيهم قوة لأنهم كانوا مرتاحين وأنا إللي تعبان في الحروب🤷‍♂️
وصل رسول الله ﷺ في طريقه لمنطقة اسمها كُرَاع الغَميم،
وهي على بعد حوالي ستين كيلو من مكة،
وهناك كان مستنيه خالد بن الوليد ومعاه فرقة مقاتلة مكونة من مائتين فارس واقفين بكامل سلاحهم عشان يَصُدوا رسول الله ﷺ عن العمرة،
مع إن على حسب القانون بتاعهم رسول الله ﷺ له الحق الكامل إنه يدخل مكة مُعزز مكرم وكمان في حماية أهل مكة وأهل مكة مُلزمين إنهم يراعوا حقوق المسلمين ويخدموهم زي ما بيخدموا أي حد تاني بييجي للعمرة🤷‍♂️
لكن زي مانتم عارفين القوانين إللي فيها مصلحة بتيجي عند المسلمين وتقف🙂
العالم ينادي بالحرية للجميع وإعطاء الناس حقوقهم، لكن ييجوا عند المسلمين ويقولوا لأ ويمعنوهم من ممارسة حقوقهم😑
المهم يعني قريش ضربت بقوانينها عرض الحائط وبدأت تتعامل بنوع من الغدر ومخالفة القوانين والعهود التي بينها وبين العرب، وكل ده عشان تمنع رسول الله ﷺ من أداء العمرة،
دلوقتي رسول الله ﷺ في موقف صعب، مستنيه جي

ش مُجهز ومستعد للحرب وهو مش معاه غير ألف وأربعمائة مش معاهم غير سلاح المسافر إللي هو السيف فقط زي ماقلنا من شوية،
فجمع رسول الله ﷺ الصحابة وبدأ يستشيرهم يعملوا إيه في الموقف ده👌
رسول الله ﷺ كان دائما يستشير أصحابه في كل المواقف إلا لو في وحي فيبقى مفيش استشارة، في تنفيذ أوامر فقط زي خروجهم للعمرة كده،
فرسول الله ﷺ لم يستشِر الصحابة في الخروج للعمرة ولكنه أمرهم بالخروج،
هنا مفيش وحي يقول لرسول الله ﷺ يعمل إيه بالضبط،
هل يُقاتل الجيش إللي اتجمع ده ولاّ يرجع للمدينة ولاّ يدخل مكة غصب،
ولاّ يروح يهجم على قبائل الأحابيش إللي دلوقتي مفيهاش مقاتلين يدافعوا عنهم وبكده هتقوى شوكة المسلمين أكثر؟
كل دي أفكار مطروحة أمام الصحابة،
أبو بكر الصديق رضي الله عنه قال لرسول الله ﷺ :
احنا جئنا للعمرة ولم نأتِ لقتال أحد، ولكن إللي هيقف قصادنا ويمنعنا من العمرة هنقاتله👌
يعني رأي أبي بكر إنهم يتقدموا ويكملوا الطريق لحد ما يوصلوا لبيت الله ولو جيش مكة اعترضهم بالقوة، المسلمين هيقاتلوهم لكن المسلمين نفسهم مش هيسعوا للقتال،
فالصحابة عجبهم رأي أبي بكر رضي الله عنه وكملوا الطريق،
لكن قريش مصرة إنها تمنع رسول الله ﷺ من الدخول لمكة، لما اقترب رسول الله ﷺ من فرقة خالد المقاتلة كان جاء وقت صلاة الظهر،
وقف الصحابة يصلون خلف رسول الله ﷺ صلاة الظهر قصرا يعني ركعتين فقط لأنهم كانوا مسافرين،
ركعوا وسجدوا وخالد بن الوليد شايفهم من بعيد وبيراقبهم😈
ودي كانت أول مرة خالد بن الوليد يشوف المسلمين وهم بيصلوا بالشكل ده، فلاحظ إن المسلمين وهم ساجدين مش بيشوفوا إللي قصادهم، فلقى إن دي فرصة مناسبة جدا للهجوم على المسلمين👌
وسأل المشركين إللي معاه هل في صلاة تانية للمسلمين زي الصلاة دي؟
فقال له بعض المشركين إللي يعرفوا أحوال المسلمين:
عندهم صلاة ثانية اسمها صلاة العصر وهي أحب إليهم من أنفسهم وأبنائهم👌
فقرر خالد بن الوليد في نفسه من غير ما يقول لأي أحد إنه هيهجم على المسلمين وهم ساجدين في صلاة العصر،

☆واخدين بالكم إن المشركين قالوا عن صلاة العصر إنها أحب للمسلمين من أنفسهم وأبنائهم، يا ترى إيه إللي المشركين شافوه من الصحابة عشان يوصلوهم إنهم يقولوا الكلام ده عنهم😮
إزاي وصل للمشركين إن صلاة العصر أحب للصحابة من أنفسهم وأبنائهم😶
هو أكيد لما نعرف حديث رسول الله ﷺ:
"من ترك صلاة العصر فقد حبط عمله"
هنفهم أد إيه الصحابة كانوا حريصين على صلاة العصر بالذات،
والعلماء قالوا في شرح الحديث إن إللي يسيب صلاة العصر بالكلية عمله كله يحبط،
أما إللي ميصليش صلاة العصر في يوم مع القدرة على الصلاة فعمل اليوم ده كله يَحبط😓
ده غير تخصيص الأمر بالمحافظة على صلاة العصر بالذات في قوله تعالى:
"حَافِظُوا عَلَى الصَّلَوَاتِ وَالصَّلَاةِ الْوُسْطَىٰ "
وغيرها من الأحاديث،
والصحابة بصفة عامة مكنوش بيضيعوا الصلاة ولا بيأخروها عن وقتها إلا في الظروف الضيقة جدا زي ما شفنا كده إللي حصل في غزوة الأحزاب،
غير كده كانوا حريصين جدا إنهم يؤدوا الصلاة في وقتها، حتى وقت القتال والجهاد ولو اشتد القتال كانوا بيصلوا وهم على الخيول بإيماء الرأس،

لما جاء وقت صلاة العصر اصطف المسلمون للصلاة، وهنا هتبقى فرصة خالد بن الوليد للهجوم على المسلمين، لكنه شاف إن الصلاة اتغيرت😳
لقى إن نص الصحابة واقفين للحراسة والنص الثاني بيصلي مع رسول الله ﷺ،
والصلاة دي اسمها صلاة الخوف نزل بها الوحي بين صلاة الظهر وصلاة العصر،
وربنا شرعها عشان حماية الجيش المسلم أثناء الحروب،
وصلاة الخوف دي من الأدلة إللي بيستدل بيها العلماء على وجوب صلاة الجماعة على الرجال،
لأن لو صلاة الجماعة مش فرض على الرجال كان ربنا أسقطها وقت الحرب على الأقل🤷‍♂️
بعد ما رسول الله ﷺ صلى الركعتين مسلمش، فضل قاعد والصحابة إللي كانوا بيصلوا معاه سلموا وقاموا أخذوا الأسلحة بتاعتهم وبدأوا يقوموا بدور الحراسة،
والنص إللي كان واقف بيحرس جاء ليصلي خلف رسول الله ﷺ،
وصلى بهم رسول الله ﷺ ركعتين تانيين وسلم وسلموا معاه،
خالد بن الوليد لما شاف الموقف إللي حصل ده قال:
إن القوم مَمْنوعون👌
يعني الناس دي عندهم حماية إلاهية، ده خارج حدود البشر،
هو مقلش لأي حد إطلاقا على الخطة بتاعته والصلاة دي أول مرة يصلوها بالطريقة دي، فاشمعنى المرة دي يعني إللي صلوا الصلاة دي🤨
فكان واضح جدا لخالد بن الوليد إن في إله بيدبر للمسلمين أمورهم ويعلم ما نفسه،

☆ولعل الموقف ده كان هو السبب في إسلام خالد بن الوليد بعد كم شهر فقط👌

دلوقتي رسول الله ﷺ ممكن يقاتل فرقة خالد وينتصر عليهم بسهولة لأنهم ألف وأربعمائة وفرقة خالد مائتين فقط،
لكن رسول الله ﷺ مش جاي لقتال أصلا،
فاختار إنه يشوف طريق تاني يمشي منه عشان يتجنب المواجهة مع خالد، وده يديهم دليل أكبر إنه مش جاي لقتال، فبعد ما خلصوا الصلاة قال رسول الله ﷺ :
من فيكم يقدر يخرج بنا من المكان ده ويوصلنا لمكة من طريق تاني؟
فمشى بهم رجل من قبيلة