#قصص_الأنبياء(٢)
#السيرة_النبوية
#الحلقة_السادسة_عشرة
#الحرب_الإعلامية_على_الدعوة

كنا واقفين المرة إللي فاتت عند عتبة بن ربيعة لما راح لرسول الله صلى الله عليه وسلم وعرض عليه شوية عروض في مقابل إنه يسيب الدعوة إلى الإسلام،
لكن رسول الله كل إللي عمله إنه قرأ عليه القرآن فعتبة بعد ما سمع القرآن من رسول الله رجع لسادات مكة إللي كانوا منتظرينه عشان يعرفوا نتيجة الحوار،
فلما شافوه وهو جاي وكان وجهه متغير وسألوه إيه إللي حصل قال لهم:
أنا سمعت كلام عمري ما سمعت مثله أبدا😳
والله ماهو كلام شعر ولا هو كلام سحر ولا كهانة😳
يامعشر قريش اسمعوا كلامي وخذوا نصيحتي 👌
سيبوا الرجل يدعو الناس ومتقفوش في طريقه، فوالله ليكون للكلام إللي سمعته منه ده حاجة عظيمة في المستقبل😮
فلو حصل والعرب قتلوه خلاص يبقى هم كفوكم شره وخلصنا منه،
ولو ظهر عليهم وانتصر فملكه ملككم ..لأنه من قريش وعزه عزكم، وهتكونوا أسعد الناس به👌

☆أظن مفيش كلام منطقي عقلاني أكثر من كده💁‍♀️

فقالوا له: والله محمد سحرك بكلامه يا أبا الوليد😏
فقال لهم : ده رأيي وأنتم أحرار اعملوا إللي تعملوه😑

على الرغم من إن عتبة عارف إن رسول الله على حق لكنه برده لم يؤمن👌
☆احنا نستفيد من الحوار ده نقطتين مهمين:
أولا:
إزاي إن رسول الله صلى الله عليه وسلم عرف يكسب عتبة بن ربيعة بأسلوبه وحوله لداعية يدعو أصحابه بفن الإصغاء👌
يعني عتبة لما جاء لرسول الله وقعد يكلمه بكلام يعتبر إهانة وكله اتهامات باطلة، ومع ذلك رسول الله لم يقاطعه رسول الله ولا مرة لحد ما خلص كلامه،
رسول الله عارف إنه لما يقعد يسمع لكلام عتبة من غير ما يقاطعه ده هيديله فرصة إنه يعرف دماغ إللي قصاده بيفكر إزاي ويعرف يرد عليه بالكلام إللي يناسب شخصيته😉
هو اشمعنى رسول الله قرأ على عتبة سورة فصلت ليه مقرأش غيرها؟
لأنه فهم من شخصية عتبة إن آيات سورة فصلت هيكون لها الأثر الأكبر على عقليته😊
وكمان لما رسول الله كان بيسمعه ومكنش بيقاطعه، ده خلى عتبة يتجاوب مع رسول الله لما قال له اسمع مني،
فكان لازم عتبة يسمع من رسول الله بدون مقاطعة زي ما رسول الله سمعه بدون مقاطعة 👌
ده غير إن الواحد لما يسمع للي قصاده وخصوصا لو كان غضبان أو متحفز بدون مقاطعة فده بيخليه يهدى ويرجع لعقله،
بعكس لو قعدنا نقاطعه هتلاقيه بيتعصب أكثر وبيزعق أكثر،
فعتبة كان جاي متحفز ومتعصب،
حتى أصحابه قالوا إنه رجع بوجه تاني خالص غير إللي راح لرسول الله به😅
فرسول الله بيعلمنا إن ممكن مشكلة كبيرة يكون حلها في إننا نسمع الشخص ده بيقول إيه من غير ما نقاطعه ،
حتى لو الشخص ده بيعيب فينا وبيتهمنا اتهامات باطلة زي ما عتبة عمل مع رسول الله😊
جربوها كده.. فقد كان لكم في رسول الله أسوة حسنة😉

ثانيا:
إن أهل الباطل دائما وأبدا مفكرين كل الناس زيهم ممكن يبيعوا دينهم ودعوتهم في مقابل شوية أموال أو مناصب،
أيوة في ناس بتقبل وشفناهم 😀
لكن الداعية الحق الثابت الراسخ في إيمانه زي رسول الله صلى الله عليه وسلم عمره ما يقبل أبدا التنازل عن دينه في مقابل أي حاجة من متاع الدنيا الزائل👌
لأنه فاهم الدين فعلا صح وعارف إن الدنيا كلها لا تساوي عند الله جناح بعوضة،
لكن إللي بيقبل متاع الدنيا الزائل في مقابل التنازل عن دينه وعن دعوته وساعات كمان يحرف في الدين ويقول كلام باطل ، ده مكنش فاهم الدين ولا كان راسخ فيه أصلا👌

دلوقتي المرحلة الثانية من المراحل السلمية لصد دعوة الإسلام وهي الإغراء بالعروض فشلت 😕
ندخل المرحلة الثالثة وهي تشويه صورة الداعية 😈
حملة إعلامية لتشويه صورة رسول الله صلى الله عليه وسلم قصاد الناس 😀
لأن لو شوهنا صورة الداعية الناس هتفقد الثقة فيه ومحدش هيصدق الكلام إللي بيقوله،
فمش هيلاقوا حد ياخدوا منه الدين ويبقى خلينا الناس نفسها هي إللي تقضي على دين محمد 😈

بس هم مش هيقولوا أي كلام كده..لازم يكونوا متفقين على الكلام مع بعض عشان الناس متقولش ده كلامهم متناقض ويبقى الكلام مختلف فيكذب بعضهم بعض😑
وكان الزعيم إللي بيخطط بالذكاء ده هو
《الوليد بن المغيرة》👌
☆الرجل الأول إللي أهل مكة قالوا عنه عظيم ولو نزل القرآن عليه كنا آمنا به،
فهو كان شيخ كبير من حكماء العرب، وكان لقبه ريحانة العرب، وكانوا بينشدوا قصاده الأشعار فكان إللي يختاره من الشعر الناس تقدمه ويبقى مفضل عندهم👌

فكان بيقول لأهل مكة اتفقوا على رأي واحد وكلام موحد نقوله للناس في كل القنوات ...قصدي في كل مجالس أهل مكة☺
فقالوا له : قلنا إنت رأيك يا أبا عبد شمس نقول إيه🤔
☆أبا عبد شمس كنية الوليد بن المغيرة😉

فقال لهم : لا إنتم قولوا خلوني أسمع إللي عندكم الأول😈
فقالوا له : خلونا نقول كاهن😕
فقال لهم: لا لا ..هو مش كاهن أنا شفت الكهان وعارف كلامهم وسجعهم ...الناس مش هتقتنع ...غيره🙄
فقالوا: يبقى مجنون 🤪
فقال لهم: مش مجنون ..احنا شفنا المجانين وعارفينهم😒

فقالوا : يبقى شاعر 🤔
قال لهم: لأ..كلامه ليس شعر ..احنا عارفي

ن كل أنواع الشعر...ده احنا أهل الشعر😏
قالوا : بااااس يبقى ساحر😈
فقال لهم: لأ..حتى مش ساحر...احنا شفنا السحرة وسحرهم عامل إزاي، فكلامه مختلف تماما عن طلاسم السحرة 😑

فقالوا له:
خلاص إنت إيه رأيك ..احنا قلنا كل إللي عندنا😶
فقال لهم: بصراحة ...إن لقوله لحلاوة ..وإن عليه لطلاوة وإن أعلاه لمثمر وإن أسفله لمغدق وإنه ليعلو ولا يُعلى عليه😮
=نعم😳
هو إنت في صفه ولا في صفنا😳
وكان الوليد بن المغيرة سمع القرآن مرة من رسول الله صلى الله عليه وسلم،
فهو مقدرش يمسك نفسه من إنه يقول إللي حس بيه،
فهو بيقول إن القرآن بيجذب النفوس بترتاح له الأرواح، محلى بألفاظ جميلة وأنغام مقبولة،
عامل زي الشجرة الكبيرة غصونها مليانة بالثمار، وجذورها مستحكمة في الأرض واسعة الانتشار في أعماق الأرض،

فهو عارف دلوقتي إن القرآن ده فعلا مش من قول البشر، فأي كلام هيتقال ضد رسول الله، الناس هتعرف إنه غير صحيح،
=طب والحل😑
قعد يفكر لحد ما قال لهم :
أحسن حاجة نقول إنه ساحر 👌
لكن السحر بتاعه مختلف ..مستواه أعلى ..سحره بيفرق به بين الرجل وأبيه، وبين الرجل وأخيه وبين الرجل وزوجته وهكذا👌

يعني هم قاعدين بيفكروا ويخططوا ويمكروا ويدبروا المكائد وناسيين حاجة مهمة أوي😏
"أَلَمْ يَعْلَم بِأَنَّ اللَّهَ يَرَىٰ"
ناسيين أو متناسين او مش مستوعبين إن ربنا يراهم وسامعهم وعالم بكل صغيرة وكبيرة👌

فأنزل الله عالم الغيب والشهادة الآيات على رسول الله صلى الله عليه وسلم تعرفه إيه إللي بيحصل بالضبط:
"ذَرْنِي وَمَنْ خَلَقْتُ وَحِيدًا* وَجَعَلْتُ لَهُ مَالًا مَمْدُودًا *وَبَنِينَ شُهُودًا* وَمَهَّدْتُ لَهُ تَمْهِيدًا *ثُمَّ يَطْمَعُ أَنْ أَزِيدَ *كَلَّا إِنَّهُ كَانَ لِآَيَاتِنَا عَنِيدًا *سَأُرْهِقُهُ صَعُودًا "

لدرجة إنه وصف لرسول الله صلى الله عليه وسلم نفسية الوليد كانت عاملة إزاي😅

"إِنَّهُ فَكَّرَ وَقَدَّرَ * فَقُتِلَ كَيْفَ قَدَّرَ * ثُمَّ قُتِلَ كَيْفَ قَدَّرَ *ثُمَّ نَظَرَ *ثُمَّ عَبَسَ وَبَسَرَ* ثُمَّ أَدْبَرَ وَاسْتَكْبَرَ *
فَقَالَ إِنْ هَذَا إِلَّا سِحْرٌ يُؤْثَرُ*إِنْ هَذَا إِلَّا قَوْلُ الْبَشَرِ"

فربنا قال في الآخر إن مصيره هو وأي أحد بيحارب الدعوة زيه كده من غير ما يتوب هو النار👌
"سَأُصْلِيهِ سَقَرَ"
ومع كل التخطيط والمآمرات والاجتماعات و...و...وفي المقابل رسول الله إمكاناته ضعيفة إلا إنهم غير موفقين لأنهم بيحاربوا الله ، والحق بيوصل للناس وربنا بيفضح كل مؤامراتهم 👌

ولم يكتفوا بتشويه صورة رسول الله صلى الله عليه وسلم،
لكن بدأوا يشوهوا رسالة الإسلام نفسها 👌
بقوا يقولوا الكلام إللي محمد بيقوله ده هو إللي مؤلفه بمساعدة ناس تانية😒
"وَقَالَ الَّذِينَ كَفَرُوا إِنْ هَٰذَا إِلَّا إِفْكٌ افْتَرَاهُ وَأَعَانَهُ عَلَيْهِ قَوْمٌ آخَرُونَ"
وشوية يقولوا ده بيقول أساطير، يعني ناقل من كتب الأولين ،
مع إنهم عارفين كويس إن رسول الله صلى الله عليه وسلم أُمّي..مبيعرفش يقرأ ولا يكتب وهو قاعد في مكة طول عمره مكنش بيخرج منها إلا نادرا،
"وقَالُوا أَسَاطِيرُ الْأَوَّلِينَ اكْتَتَبَهَا فَهِيَ تُمْلَىٰ عَلَيْهِ بُكْرَةً وَأَصِيلًا "

☆ملحوظة مهمة👌
رسول الله صلى الله عليه وسلم كان أُمّي يعني مكنش بيعرف يقرأ ولا يكتب،
يعني مش إن أمي نسبة إلى أم القرى والكلام ده😅
والدليل قول الله:
"وَمَا كُنْتَ تَتْلُو مِنْ قَبْلِهِ مِنْ كِتَابٍ وَلا تَخُطُّهُ بِيَمِينِكَ إِذًا لارْتَابَ الْمُبْطِلُونَ"
وقوله:
"فَآمِنُوا بِاللَّهِ وَرَسُولِهِ النَّبِيِّ الْأُمِّيِّ "
وكلمة أُمّي في الآية هنا معناها من لا يقرأ ولا يكتب👌
وفي ناس كثيرة حاولت تشكك في أمية رسول الله صلى الله عليه وسلم،
ولكن الأدلة من القرآن والسنة قاطعة إن رسول الله كان أُمّيا لا يعرف القراءة ولا الكتابة👌

وادعى المشركين إن إللي بيعلم رسول الله القرآن غلام نصراني،
"وَلَقَدْ نَعْلَمُ أَنَّهُمْ يَقُولُونَ إِنَّمَا يُعَلِّمُهُ بَشَرٌ ۗ لِّسَانُ الَّذِي يُلْحِدُونَ إِلَيْهِ أَعْجَمِيٌّ وَهَٰذَا لِسَانٌ عَرَبِيٌّ مُّبِينٌ "
وقعدوا يطعنوا في فكرة البعث ...يعني إيه إننا هنحيا تاني بعد الموت،
"وَقَالَ الَّذِينَ كَفَرُوا هَلْ نَدُلُّكُمْ عَلَىٰ رَجُلٍ يُنَبِّئُكُمْ إِذَا مُزِّقْتُمْ كُلَّ مُمَزَّقٍ إِنَّكُمْ لَفِي خَلْقٍ جَدِيدٍ"
الكلام واضح فيه السخرية الكاملة😑
والمحاولات دي مكنتش يوم ولا يومين ولا شهر ولا شهرين دي قعدت سنين،
والصوت العالي للباطل بيشتت عقول الناس وبيخليهم يصدقوا الكلام الغلط مع كثرة الزن عليهم😑
ده الإسلام ده جه عشان يفرق بين الناس ، ويخلي الناس عبارة عن فِرق ويعمل عدوات بينهم🤓
إيه يعني لما كلنا نعيش مع بعض في سلام والدين لله والوطن للجميع ....وكل واحد على دينه الله يعينه🙃

وكمان مع ما سبق خلونا نُشغل الناس بشوية حاجات كده عشان قلوبهم تبقى غرقانة بالشهوات واللهو والتفاهة ،
لأن لما يكون القلب منشغل بالباطل صعب إنه

يستجيب لدعوة فيها إصلاح💁‍♀️
يعملوا إيييه😈
هاتوا يا جماعة النّضْر بن الحارث نخليه يقعد بين الناس ويحكي لهم حكايات وروايات ومسلسلات وأساطير ، وينوع بقى ما بين كوميديا على رومانسية على إباحية على شوية غموض، ومفيش مانع من الأغاني برده،
ماهو احنا لازم نرضي جميع الأذواق ..أمال إيه😀

☆مين أصلا النّضر بن الحارث ده🤨
ده كان رجل من كفار مكة لما رسول الله أعلن الدعوة إلى الله،
راح مسافر للحيرة في العراق وقعد يتعلم كتب الفرس ويحفظ القصص بتاعتهم زي كتاب 《كليلة ودمنة》 إللي هيترجمه للغة العربية ابن المقفع بعدين في العصر العباسي😉
وكان بيسافر كمان للشام وبلاد فارس بحكم التجارة فكان بيتعلم أساطير الروم ،
وخالط أهل الكتاب واتعلم منهم،
واتعلم عزف العود واشترى واحد وجاء به لمكة ، وأهل مكة مكنوش يعرفوا العود،
يعني عمل لنفسه خليط كده محترم ورجع لمكة عشان ينشر الثقافة الجديدة 🙃
فكان يقعد في الأماكن إللي رسول الله صلى الله عليه وسلم بيدعو الناس فيها ويخبرهم عن قصص الأنبياء السابقين وعن عاد وثمود ،
ويحكي لهم النضر بن الحارث عن القصص المشوقة من قصص فارس والروم ويقول لهم:
محمد أحسن مني في إيه هو بيحكي عن عاد وثمود وأنا بحكي عن فارس والروم😏
احنا سمعنا كلامه ولو عايزين هنقول زي ما بيقول، وكلامه كله من أساطير الأولين اتعلمها زي مانا اتعلمتها 💁‍♂️

فأنزل الله فيه:
"وَإِذَا تُتْلَى عَلَيْهِمْ آيَاتُنَا قَالُوا قَدْ سَمِعْنَا لَوْ نَشَاءُ لَقُلْنَا مِثْلَ هَذَا إِنْ هَذَا إِلا أَسَاطِيرُ الأَوَّلِينَ "
ولما كان يعرف إن في أحد عايز يدخل الإسلام كان بيروح له ومعاه العود ويقعد يغني له ويقول له الغناء والموسيقى أفضل من الصلاة والصيام واتباع دين محمد،
فنزلت فيه آية:
"وَمِنَ النَّاسِ مَن يَشْتَرِي لَهْوَ الْحَدِيثِ لِيُضِلَّ عَن سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا ۚ أُولَٰئِكَ لَهُمْ عَذَابٌ مُّهِينٌ"

وكان هو أول من أدخل العزف بالعود لمكة وهو إللي علمهم،
واشترى المغنيات عشان يلهي الناس بها،
ومكنش أهل مكة يعرفوا الغناء والألحان لحد ما جاء النضر وكان أول من ضرب على العود بألحان الفرس😑

☆ممكن حد يسأل إزاي يعني الناس تسيب القرآن وتروح تسمع للنضر ده وواضح طبعا إن القرآن مختلف وأحسن😕

بكل بساطة زي ما الناس دلوقتي سايبة القرآن ومشغولة بالمسلسلات والروايات والأفلام من هنا ومن هنا،
وبالأغاني والإباحية والمنكرات والمحرمات إللي بقت متاحة بضغطة زرار في أي وقت👌
وكل ده عشان يلهوا الناس عن الدين ، أمال نسيبهم يفوقوا ويقولوا عايزين الإسلام😏
القلب المشغول بالباطل لا يمكن إنه ينصر حق👌
خطة النضر بن الحارث كانت من أكثر من ألف وأربعمائة سنة وهي متكررة وشوفوا حالنا دلوقتي هتلاقوا الخطة دي بتتطبق بالضبط😞
التاريخ بيعيد نفسه ولأن الناس متعرفش حاجة عن تاريخها فهتلاقيهم بيقعوا في نفس إللي وقع فيه السابقين😓

قريش لسه عندها حيل ثانية بجانب الحيل السابقة،
استخدموا الضغط النفسي على أتباع رسول الله صلى الله عليه وسلم،
قالوا كل واحد يشوف إللي أسلم من أهله ويقنعهم إنهم يسيبوا الدين ده ويبعدوا عن محمد،
اسمعوا كلامنا لأن الكلام ده لمصلحتكم ومصلحة عيالكم👌
وكان معظم إللي أسلموا شباب،
زي سعد بن أبي وقاص ومصعب بن عمير مثلا ، فأم سعد حاولت معاه تقنعه من هنا لهنا مفيش،
راحت مستعملة عنصر الترهيب قالت لابنها : أنا مش هاكل ولا أشرب إلا لما تسيب الإسلام، خليني أموت بقى والعرب تُعيرك بأنك قاتل أمك😤
وسعد بن أبي وقاص كان أبر الناس بأمه، وكان معروف بين الناس بالبر ده😅
وده ضغط نفسي رهيب على شاب صغير، فقال لها بكل بساطة :
والله يا أماه لو كانت لك مائة نفس فخرجت نفسا نفسا ما تركت ديني هذا، فكلي أو متاكليش😊
فعرفت من ثباته وكلامه إنه مش هيغير دينه،
فأكلت أمه وهو بقي على الإسلام👌

☆وهنا رسالة من سعد بن أبي وقاص لكل واحد بيعصي الله عشان يرضي أمه أو أبوه😞
ربنا إللي أمرنا ببر الوالدين هو نفسه إللي أمرنا إن لما يكون حاجة متعلقة في الدين يبقى ننفذ أمر ربنا 👌
وإن ثبات الإنسان وإصراره على موقفه وإنه مش فارق معاه إيه إللي ممكن يحصل، بيخلي إللي قصادك يستسلم وينزل على رأيك،
غير لو حس إنك مترددة أو معندكيش الثبات اللازم، هتلاقيه بيضغط عليكي لحد ما ترجعي عن هدفك👌

والمثال الثاني هو مصعب بن عمير، إللي كان من أكثر شاب مكة رقة وثراء كان مُنعم وأمه كانت بتحبه جدا، وكانت غنية،
وكانت بتشتري له أفخم الملابس والعطور وكان أكثر شباب مكة ترفا، وطبعا مكنش بيشتغل،
فلما أسلم أمه منعت عنه كل ده وكمان طردته من البيت،
وبقى فقير وبقي يلبس الملابس الخشنة ،وجلده كان بيتقشر زي جلد الثعبان😥
ولما كان يمشي مدة كانت رجله بتجيب دم، ماهو مش متعود على حياة البهدلة والفقر😞
لدرجة إن الصحابة كانوا بيبكوا لما بيشوفوه كده، وهو مع ذلك مكنش في دماغه ولا مهتم،
احنا بس بنسمع قصته لكن هو عاش الحياة دي وعمره ماشتكى

،
ولا مَنّ على ربنا ولا على رسوله ولا قال للصحابة أنا كنت وكنت وسيبت كل ده عشان الإسلام زي ما في ناس بتعمل للأسف😞
إيه إللي يخلي شاب يسيب النعيم إللي كان فيه ده وإللي أي شاب يتمناه؟
إيه إللي يجبره إنه يعرض نفسه للأذى ده كله؟
هيستفيد إيه وهو عنده الدنيا كلها؟
الدافع إللي خلاه يسيب أحسن الأكلات وأحسن اللبس ويتعرض للعذاب الجسدي ويصبر عليه وكأنه ولا حاجة ، هو إنه عايز الدار الآخرة،
مشكلة الناس دلوقتي إنها عايزة الدنيا والآخرة، ومع أول اختبار أو ضغط نفسي للأسف تلاقيها أول حاجة تفرط فيها هي دينها،
وناسيين إن الدنيا دار ابتلاء ودار تنازلات عن إللي بنحبه سواء أموال أو أهل أو أصحاب أو وطن في مقابل رضا الله،
وهنشوف إزاي الصحابة عملوا كده فعلا👌

كل الوسائل دي مقدرتش إنها تقضي على الدعوة للإسلام،
ولقوا إن الناس ثابتة وبتزيد😕
فلجأوا بقى للوسيلة إللي كل ظالم على مر العصور بيلجأ لها ،
وسيلة التعذيب والتهديد بالقتل والقتل فعلا😑

عمل إيه كفار قريش مع المسلمين؟
وكان إيه رد فعل المسلمين؟
وكان إيه رد فعل رسول الله صلى الله عليه وسلم نفسه على حملة التعذيب دي؟

ده إللي هنعرفه الجزء الجاي إن شاء الله 👌



#Eman_Shalapy

السلام عليكم ورحمة اللَّه وبركاته

*أذكِّركم إن التقديم في أكاديميَّة زاد لسه مفتوح*

رابط صفحة الأكاديمية:
https://www.zad-academy.com/


لاَ تُفوّتوا هَذا الخَير يَا كِرام 🌿🤎 "..

هو فيه حد هنا لسه مقدمش في أكاديمية زاد؟

طيب يلا مستنيين إيه؟

الحقوا سجلوا بسرعة قبل ما التسجيل يقفل لأنه بياخد عدد معين

( دي شوية معلومات عن الأكاديمية للي مش عارفها )

- احنا في الأكاديمية بندرس 7 مواد شرعية، وهي :

- ‏" سيرة نبوية ، حديث ، فقه ، تفسير ، تربية إسلامية ، لغة عربية ، عقيدة "

- الدراسة #مجانية تمامًا

- المحاضرات والكتب والامتحانات كلها أون لاين .. وفيه كتب ورقي بردو للي بيحب الورقي
- ‏
( يعني لو عندك واي فاي تقدر تشوف المحاضرات على قناة زاد على التلفزيون أو على اليوتيوب .. وتذاكر من على موبايلك أو لابك وبعدها تدخل الامتحان )

( ولو باقة يبقى تشوف المحاضرات على التلفزيون وتذاكر الكتاب على موبايلك وتمتحن من الباقة عادي )

( لو مفيش وقت عندك لمشاهدة المحاضرات خالص .. عادي بردو ممكن تكتفي بمذاكرة الكتاب ، وعامة الامتحان مش بيخرج منه .. بس المحاضرات ممتعة ومفيدة جدًا )

- كتب الأكاديمية مختصرة وملونة وجميلة فعلًا .. يعني مش بيطلع عينينا واحنا بنذاكر زي أيام الجامعة

- بيكون فيه امتحان أسبوعي #سؤالين صح وغلط أو اختياري ، وامتحان شهري 8 أسئلة ، قبل الامتحان النهائي .. وده بيخلينا نذاكر أول بأول
-
- مدة الدراسة في الأكاديمية #سنتين .. 4 مستويات .. يعني مستويين كل سنة.. كل مستوى 3 شهور وبعده إجازة.

- محاضرات الأكاديمية 5 أيام في الأسبوع .. 3 محاضرات كل يوم .. المحاضرة حوالي 35 دقيقة

- الأكاديمية نساء ورجال عادي

- الأكاديمية مش محتاجة تفرغ، يعني لو بتدرس أو عندك شغل أو مسئوليات ممكن بردو تقدم وتنجح فيها زي ناس كتير قبلك جربوا ونجحوا الحمد لله

أي حد خايف أو حاسس إن معندوش وقت ومش هيعرف يكمل ..

بنصحه بجد إنه يجرب .. الموضوع جميل فعلًا .. ولو معرفتش تكمل مش هتكون خسرت حاجة ، بالعكس على الأقل هتكون جربت حاجة جديدة في حياتك، وبقى معاك الكتب تقرأها في أي وقت

أما بقى لو ربنا وفقك لدراسة العلم ده .. فده باب خير كبير ليك ..

بلاش تكسلوا .. علشان أنا شخصيًا كنت خايفة من خطوة زي دي خصوصًا في وجود ابني .. بس الحمد لله الموضوع طلع أيسر مما توقعت وحاليًا خلاص اتخرجت الحمد لله 💜

وأي سؤال تاني اتفضلوا

#رقية_طه

«لا تُقتل نفسٌ ظلما، إلا كان على ابن آدم الأول كِفلٌ من دمها، لأنه كان أول من سَنَّ القتل» حديث شريف صحيح.
يعني كل حادثة قتل ظلم بتحصل حتى يوم القيامة قابيل له نصيب من ذنبها لأنه أول واحد قتل في التاريخ.
قيس على الحديث ده:
أول مطرب عمل حفل غنائي، وأول منتج وممثل عمل فيلم سينما، وأول مسلمة خرجت بدون حجاب أول مسلمة لبست بنطلون في الشارع مثلا، أول واحد أخذ رشوة، أول واحد منع البنات ميراثهن..... إلخ

هناك جانب أسوأ للذنوب يا صديقي
والموازين يوم القيامة مختلفة تماما

‏«صلّى عليك الله ما لفظ الورى
حرفًا من الأذكار والقرآن» ﷺ

#قصص_الأنبياء(٢)
#السيرة_النبوية
#الحلقة_السابعة_عشرة
#بداية_تعذيب_المسلمين

كنا واقفين عند قريش ومحاولاتها لصد الدعوة الإسلامية،
وقلنا الوسائل إللي استعملها كفار قريش زي تحييد أنصار الدعوة ،
والإغراء بالعروض المادية ،وتشويه صورة الداعية وتشويه صورة الدعوة نفسها وشغل الناس بالباطل عن طريق النضر بن الحارث،
وآخر حاجة كانت استعمال الضغط النفسي من الأهل على أقاربهم إللي أسلموا زي سعد بن أبي وقاص ومصعب بن عمير😉
لما لقى كفار مكة إن مفيش حاجة جايبة نتيجة قالوا بس احنا نعذب الناس إللي أسلمت دي لحد ما يرجعوا عن دينهم👌
فكل واحد من سادات مكة يشوف إللي أسلم من قبيلته وهو إللي يعذبه،
فبدأ كل واحد يشوف مين إللي أسلم من قبيلته ويعذبه،
حر أو عبد😑
=عثمان بن عفان كان عمه بيلفه في حصير من ورق النخيل يكتفه يعني وبعدين يشعله من تحته ويطلع دخان على وشه لحد ما كان كأنه بيموت من الخنقة،
الواحد لما يشم شوية دخان بس من بعيد بيبقى مش قادر يتنفس،
ده بقى الدخان تحته وطالع على وشه كله😞

=بلال بن رباح كان عبد من الحبشة يملكه واحد من السادة اسمه أمية بن خلف،
فكان يحط في رقبته حبل ويعطي الحبل للصبيان يلعبوا به،
يشدوه ويوقعوه،
وكانوا بيطلعوه وقت الظهر في صحراء مكة وينيموه على الرمل الساخن ويضعوا على صدره صخرة كبيرة جدا،
ووقت الظهر في مكة في الصيف في الصحراء درجة الحرارة ممكن تعدي الخمسين😞
وكانوا يقولوا له:
هنسيبك كده لحد ما تموت أو ترجع عن دين محمد وتعبد اللات والعزى😤
وهو يقول لهم : أحد أحد☝️
فكانوا بيتغاظوا منه ويزودا عليه العذاب وهو ميسكتش يغيظهم برده ويقول لهم أحد أحد☝️
يعني الله واحد👌
وكان يقول لهم وهو بيتعذب :
والله لو أعرف كلمة تغيظكم أكثر من الكلمة دي كنت قلتها👌
والكلام ده مكنش يوم ولا يومين ده كان فترات طويلة،
احنا بس مجرد تخيل الموقف بنحس بوجع القلب،
أمال حصل معاه كده كان ألمه عامل إزاي😞

وفضلوا يعذبوا فيه لحد اشتراه أبو بكر صاحب رسول الله صلى الله عليه وسلم من أمية بن خلف واعتقه لوجه الله.

=عمار وأبوه ياسر وأمه سمية ،
وكان ياسر شيخ كبير في السن وكان بيعذبه واحد من سادات بني مخزوم قبيلة الوليد بن المغيرة اسمه《عمرو بن هشام》 إللي كنيته أبو جهل👌
فكان أبو جهل هو المسؤول عن تعذيب الشيخ الكبير ياسر،
وزوجته المرأة العجوز سمية، وكانوا بيطلعوهم في الصحراء ويعذبوهم في الحر ،
وطبعا مفيش لا أكل ولا مية، وكان رسول الله صلى الله عليه وسلم بيعدي عليهم وهم بيعذبوا ويقول لهم:
"صبرا آل ياسر فإن موعدكم الجنة"

فياسر مات تحت التعذيب وأبو جهل قعد يعذب في سمية وقال لها : إنتي إزاي تسيبي آلهة آبائك وتتبعي محمد، وريني إلهك إللي بتعبديه ده😡

فقالت له: لا تدركه الأبصار وهو يدرك الأبصار وهو اللطيف الخبير👌
فراح ماسك حَرْبة وطعن سمية في موضع عفتها، يعني في فرجها من الأمام فماتت 😞
وكانت أول شهيدة في الإسلام، ومتبقاش غير عمار...شاف أبوه قتل تحت التعذيب وشاف أمه طعنت وماتت،
وهو نفسه بيتعذب أشد العذاب، كانوا ساعات يلبسوه الدروع الحديدية في شدة الحر،
وساعات يحطوا على صدره صخر أحمر ثقيل ، وساعات يحطوه جوه بئر ويغطوه بالماء،
فكان من شدة التعذيب كان بيوصل لمرحلة إنه مش بيبقى عارف هو بيقول إيه😞
فقالوا مش هنسيبك غير لما تشتم محمد وتمدح الآلهة بتاعتنا😤
فمع شدة التعذيب قال لهم عمار إللي طلبوه منه فتركوه،
وراح عمار لرسول الله صلى الله عليه وسلم وهو حزين فسأله رسول الله: إيه إللي حصل معاك؟
فقال عمار والله يا رسول الله لم يتركوني إلا لما شتمتك ومَدَحت آلهتهم😔
فسأله رسول الله : وحال قلبك إيه؟
هل إنت راضي بالكلام إللي قلته ولا رافض؟
فقال له عمار: طبعا رافض يا رسول الله 😥
فقال له رسول الله:
لو عادوا لتعذيبك تاني وأمروك إن تشتمني فاعمل إللي يقولوا لك عليه👌
ونزلت في عمار آية :
"مَن كَفَرَ بِاللَّهِ مِن بَعْدِ إِيمَانِهِ إِلَّا مَنْ أُكْرِهَ وَقَلْبُهُ مُطْمَئِنٌّ بِالْإِيمَانِ "

☆محتاجين نقف هنا وقفة👌
بلال بن رباح فِضل مصمم على إيمانه وكمان كان بيغيظ الكفار،
عمار بن ياسر مقدرش وأخذ بالرخصة،
طيب مين الصح في الموقفين دول ،أو خلونا نقول مين الأفضل أو الأصح🤔
هل الأفضل إن لو الإنسان حد فتنه في دينه يثبت ويقاوم حتى لو كانت نهايته القتل زي بلال وياسر وسمية،
ولا يستعمل التقية ويأخذ بالرخصة عشان ينجي نفسه وقلبه مطمئن بالإيمان زي عمار 🤔

الأفضل والأَوْلى إن الإنسان يصبر ويتحمل الأذى حتى لو أدى ذلك للقتل،
ولو قُتل هيكون شهيد فهو هيبقى مأجور💁‍♀️
وده إللي اتفق عليه المذاهب الأربعة👌

وخصوصا بقى لو كان الشخص ده عالم ممكن بعدم ثباته الناس تُفتن في دينها أو دينها يتغير👌
زي قصة الإمام أحمد بن حنبل😉
لولا ثباته على الحق بالرغم من شدة تعذيبه لدرجة إنه كان بيفقد الوعي ،كان زمان وصل لنا الدين غلط وإن القرآن مخلوق🤷‍♀️
وطبعا الكلام ده لا يتعارض مع النقطة إللي اتكلمنا عنها قبل كده

،
إن العالم أو الداعية لازم يحافظ على حياته عشان يوصّل دين ربنا 😉

لأن في الأساس هو محافظ على حياته من أجل الدعوة، فلو تعارضت حياته مع مصلحة الدين يبقى يفدي الدين بحياته👌
فالصح إن الإنسان يصبر ويثبت على دينه مهما حصل له زي ما رسول الله صلى الله عليه وسلم قال ووصى الصحابي أبو الدرداء :
"أَنْ لَا تُشْرِكْ بِاللَّهِ شَيْئًا وَإِنْ قُطِّعْتَ وَحُرِّقْتَ،
وَلَا تَتْرُكْ صَلَاةً مَكْتُوبَةً مُتَعَمِّدًا فَمَنْ تَرَكَهَا مُتَعَمِّدًا فَقَدْ بَرِئَتْ مِنْهُ الذِّمَّةُ وَلَا تَشْرَبْ الْخَمْرَ فَإِنَّهَا مِفْتَاحُ كُلِّ شَرٍّ"

لكن مش معنى الحديث إننا لا نأخذ بالرخصة لما نحتاجها😉
وخصوصا إننا مأمورين باتباع رسول الله وصحابته،
فربنا قدر لعمار الموقف ده عشان الناس إللي معندهاش قدرة تحمل زي بلال بن رباح😊

=من الصحابة إللي اتعذبوا 《صهيب بن سنان الرومي》
وهو عربي الأصل ولكن وهو صغير أُخِذ أسير واتربى في بلاد الروم،
فبقى يتكلم بلغتهم لحد ما واحد من أهل مكة اشتراه ورجع به لمكة،
وكان صهيب ذكي جدا لدرجة إن سيده أعجب بذكائه وحرره وشاركه في تجارة لحد ما أصبح عنده أموال كثيرة😮
وكان صاحب لرسول الله قبل البعثة،
فلما بُعث رسول الله أسلم صهيب مع عمار بن ياسر في نفس الساعة،
وكان من السبعة الذين أظهروا الإسلام بين الناس وهم
رسول الله صلى الله عليه وسلم ،
وأبو بكر وبلال وصهيب وعمار بن ياسر وسمية أمه وخَبّاب بن الأرت.

=خبّاب بن الأَرَتْ كان من أشد الناس عذابا، كان الكفار بيولعوا الفحم أو الحجر بالنار،
لحد ما يبقى جمر وينيّموا خبّاب على الجمر ده لدرجة ان الشحم اللي بينزل من ظهره بيطفي الجمر فكان ظهره مليان حُفر😞
ومع ذلك ظل ثابت على الدين ومقلش إللي الكفار عايزينه،
ده غير الجواري إللي كان الكفار بيعذبوهم،
فكان أبو بكر الصديق بيشتري العبيد والجواري المسلمين إللي بيتعذبوا ويحررهم،
لدرجة إن أبوه مرة بيقول له:
إنت بتحرر الناس الضعيفة، فلو إنك حررت رجال أقوياء يقدروا يدافعوا عنك ويمنعوا عنك أذى الناس😕
فقال له أبو بكر:
أنا بعتقهم لوجه الله 🤚
فنزلت آيات القرآن تمدحه وتذم أعداءه،
"فَأَنذَرْتُكُمْ نَارًا تَلَظَّىٰ* لَا يَصْلَاهَا إِلَّا الْأَشْقَى"
الأشقى إللي هو أمية بن خلف وإللي زيه من إللي كانوا بيعذبوا المسلمين،
"وَسَيُجَنَّبُهَا الْأَتْقَى* الَّذِي يُؤْتِي مَالَهُ يَتَزَكَّىٰ*وَمَا لِأَحَدٍ عِندَهُ مِن نِّعْمَةٍ تُجْزَىٰ* إِلَّا ابْتِغَاءَ وَجْهِ رَبِّهِ الْأَعْلَىٰ"

والأتقى هو أبو بكر الصديق إللي سخر ماله لفداء وتحرير المستضعفين من المسلمين👌
وكان من أشد الناس تعذيبا للمسلمين المستضعفين رجل من أهل مكة اسمه : 《عمر بن الخطاب》
كان بيتطوع لتعذيب المسلمين ،
وكان بيعذب امرأة فكان لما يسيبها يقول لها والله ما تركت تعذيبك إلا لأني زهقت😅
فكانت تقول له : والله ده ربنا هو إللي صرفك عني👌

المستضعفين إللي أسلموا كان أهل مكة بيعذبوهم ، أما الأشراف زي أبو بكر ورسول الله كان أشراف مكة هم إللي بيؤذوهم ويسخروا منهم فقط،
مكنوش يقدروا يعذبوهم لأن لهم قبيلتهم تحميهم،
في يوم من الأيام ورسول الله حاطط ردائه ونايم عليه عند الكعبة ،
جاء خبّاب بن الأرت بعد ما اشتد به وبباقي الصحابة العذاب بدأ يكلم رسول الله،
قال له: يا رسول الله ألا تدعو لنا؟ ألا تستنصر لنا😔
متخيلين الألم إللي خباب فيه، طبيعي طبعا إنه يطلب من رسول الله إنه يدعو ربنا بأنه ينصرهم😥

وهو دلوقتي متوقع ومستني إن رسول الله صلى الله عليه وسلم يرفع إيده ويدعو لهم بالنصر على الناس إللي عذبت أصحابه وقتلتهم،
لكن المفاجأة إن رسول الله صلى الله عليه وسلم غضب🙊 ووشه احمر من الغضب وقام قعد وقال لخبيب :
في الناس إللي كانت قبلكم ..كانوا بيجيبوا الرجل ويحفروا له في الأرض حفرة ويحطوه فيها ،
ويجيبوا منشار ويضعوا المنشار على رأسه ويشقوه نصفين ومفكرش إنه يرجع عن دينه،
والله ليتم الله أمر الإسلام حتى يسير الراكب من صنعاء إلى حضرموت لا يخاف إلا الله والذئب على غنمه ولكنكم تستعجلون👌

☆صنعاء إللي كانت في اليمن في زمن رسول الله كان بيحكمها الفرس بعد ما حكمها الحبشة إللي جاء منها أبرهة،
فهو بيقول له إن الإسلام هينتشر لدرجة إن أملاك أقوى دولة في العالم هتبقى تحت حكم المسلمين👌

◇أنا عايزاكم تحطوا نفسكم مكان خباب وهو رايح متألم وبيشكتي ورسول الله صلى الله عليه وسلم غضب وسمعه كلام يعتبر شديد جدا عليه في موقف زي ده،
مش كان المفروض على الأقل إنه يواسيه بكلمتين الأول وبعدين يفهمه،
لكن رسول الله معملش كده😳
والأعجب بقى رد فعل خباب 😶
تخيلوا إنه معترضش ولا قال له بقى أنا جايلك تواسيني ولا تخفف عني بكلمتين ولا حتى تدعيلي إن ربنا يصبرني،
تقومي تقول لي الكلام ده...هو إيه الدين ده وانا إيه إللي يصبرني عالهم ده أصلا 🙄

ويسيبوا الدين والإلتزام بسبب شوية ابتلاءات أو واحدة تقولك أصل الداعية أسلوبه وحش وكرهني في الدين،
ولكنت فظا غليظ

القلب ..إيه الناس دي😤
بيحصل الكلام ده في عصرنا ولا لأ😀

طيب رسول الله كان شديد في كلامه مع خباب وكلم بغضب واحد مطحون من العذاب جاي يشتكيله ،
هل خباب ترك الدين بسبب رد فعل رسول الله؟
لأ...فضل ثابت ومكمل💪🏻
خلونا نشوف السبب إللي خلى رسول الله يرد على خباب كده👌
خباب لما جاء يشتكي لرسول الله كان بيتكلم بيأس،
وحس منه إنه فقد الأمل،
فهو خاف على خباب أحسن ييأس من نصر ربنا ورحمته فيكون من الكافرين👌
"إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ"

يعني هو مغضبش منه عشان طلب الدعاء فقط، وإلا فالدعاء أصلا سلاح المؤمن والمسلمين مطلوب منهم الدعاء من باب الأخذ بالأسباب،
لكن المشكلة كانت في اليأس إللي كان في كلام خباب ووجهه لما شافه رسول الله،
فهو كان شديد معاه عشان ينبهه لحاجة أخطر من مجرد عذاب الجسد،
الجسد كده كده هيفنى ومش هيتبقى غير الإيمان بالله ، فلازم يحافظ على الإيمان ده،
ورسول الله رجع له الإيمان تاني من خلال كلامه :
أولا :
ذكّره بالمؤمنين إللي كانوا قبله واتعرضوا لعذاب أكبر ،لأن الناس في العادة بيهون عليها مصيبتها لما تشوف حد مُبتلى بمصائب أشد👌
ثانيا:
زرع جواه الأمل إن ربنا هيتم الإسلام مش بس في مكة ده حتى في ممتلكات أقوى دولة في العالم👌
يعني باختصار لو وصلت لدرجة شديدة من الإيذاء متستعجلش،
ربنا هيمكن لدينه أكيد👌

طيب خباب المتألم المعذب إزاي تقبّل الكلام كده بكل بساطة من غير حتى ما يقول لرسول الله : يارسول الله كنت واسيني بس، الواحد ساعات حد يطبطب عليه😅
مقلش كده،
بالعكس ده رضي وثبت زي سمية وياسر إللي كان رسول الله بيعدي عليهم ويقول لهم كلمتين: اصبروا وهتدخلوا الجنة👌
إيه إللي يخلي المسلمين دول يستحملوا العذاب ده ويثبتوا كده😶
ماهو الصحابة أصلا متوجدوش بين يوم وليلة 😀
دول كانوا بيتربوا تربية إيمانية لمدة ثلاث سنين قبل الجهر بالدعوة👌
فتخيلوا إن رسول الله كان بيعلمهم تعظيم قدر ربنا في قلوبهم،
♡كان بيعلمهم من هو رب العالمين، مين هو الرحمن الحكيم ، اللطيف...الخبير ..السميع ..الجبار.. القاهر فوق عباده،
بيعلمهم إن لو ربنا قدر عليك أي ضرر فمحدش هيكشفه غيره،
"وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ ۖ وَإِن يُرِدْكَ بِخَيْرٍ فَلَا رَادَّ لِفَضْلِهِ"

♡كان بيعلمهم يعني إيه الدار الآخرة، يعني إيه إنك لو احتسبت وصبرت على كل حاجة بتؤذيك فهي في ميزان حسناتك،
♡كان بيعلمهم إن أكثر رجل شقاء في الدنيا لو اتغمس غمسة واحدة في الجنة هينسى شقاءه كله، أمال إللي هيعيش فيها هيبقى عامل إزاي👌
♡وصف لهم الجنة عاملة فيها إيه، وصف لهم أكلهم وخدمهم ولبسهم في الجنة،
ومش هيبقى في الجنة سنة ولا سنتين ده هيبقى خالد مخلد فيها😮
♡كان بيعلمهم قصص السابقين، حكى لهم قصة موسى مع فرعون،
وإزاي ربنا نصر موسى على فرعون بعد سنين وسنين من القتل والتعذيب لبني إسرائيل 《وارجعوا للقصة واقرأوها تاني عشان تستشعروا إحساس الصحابة》

♡كان بيزرع الأمل والثقة في نفوسهم وبيعلمهم إن إللي عايز ربنا يمكن له في الأرض لازم يصبر👌
"اسْتَعِينُوا بِاللَّهِ وَاصْبِرُوا ۖ إِنَّ الْأَرْضَ لِلَّهِ يُورِثُهَا مَن يَشَاءُ مِنْ عِبَادِهِ ۖ وَالْعَاقِبَةُ لِلْمُتَّقِينَ"

♡كان الصحابة بتقيم الليل فهو من أكبر الأسباب إللي بتعين على الصبر،
وكانوا بيقرأوا القرآن وبيذكروا الله، وبيبعدوا عن المعاصي والذنوب.
تخيلوا ثلاث سنوات متصلة رسول الله بيعلمهم الكلام ده وعايشينه ،فأكيد طبعا لما يحصل البلاء ربنا هيثبتهم👌

فرسول الله لما قال الكلام إللي قاله لآل ياسر وقاله لخباب كأنه كان بيذكرهم بالسنين الأولى إللي كانوا بيتعلموا فيها الإيمان، وإن هو ده إللي كنت بحكي لكم عنه فاثبتوا وانتظروا الغلبة في النهاية للإسلام👌

ده كان الحال بالنسبة لضعفاء المسلمين وإللي كان بيحصل معاهم من بعد الجهر بالدعوة ، واحنا دلوقتي في السنة السادسة للبعثة،
هننتقل لرسول الله صلى الله عليه وسلم ونشوف كان كفار قريش بيؤذوه إزاي،
وإيه أخبار المفاوضات إللي كانت بينه وبينهم خلال الثلاث سنوات بعد الجهر بالدعوة،

مكنش حد يقدر يؤذي رسول الله من عامة الناس لأن رسول له كان في جوار أبي طالب، فكان إللي بيؤذي رسول الله هم السادة،
قبل ما نشوف الأذى حصل بين رسول الله وسادات قريش مفاوضات منها إنهم قالوا له :
شوف يا محمد احنا هنقبل بالدين بتاعك لكن بشرط إنك تعبد إلهنا سنة ونعبد إلهك سنة 💁‍♂️
يعني نشارك بعض في الآلهة ، لو احنا آلهتنا فيها خير يبقى إنت شاركت في الخير ده،
ولو إلهك فيه خير يبقى احنا كمان شاركنا في الخير💁‍♂️

فربنا أنزل :
"قلْ يَا أَيُّهَا الْكَافِرُونَ* لا أَعْبُدُ مَا تَعْبُدُونَ*وَلا أَنتُمْ عَابِدُونَ مَا أَعْبُدُ* وَلا أَنَا عَابِدٌ مَّا عَبَدتُّمْ*وَلا أَنتُمْ عَابِدُونَ مَا أَعْبُدُ*لَكُمْ دِينُكُمْ وَلِيَ دِينِ"
ربنا بيقول للمسلمين على مر العصور إن أمر العقيدة
مفه

وش جدال ولا مفاوضات،مع إن رسول الله كان ممكن يتظاهر بعبادة الأصنام عشان هم يعبدوا الله ولما يعبدوه ويعرفوه ممكن يسلموا🤔
لكن ربنا قطع الطريق على أي مساومة في العقيدة👌

من المفاوضات إللي حصلت برده إنهم طلبوا من رسول الله المعجزات،
قالوا الأنبياء إللي قبلك جاءوا بمعجزات إنت مجبتش حاجة 🤷‍♂️
فقال لهم : ماهو أنا جئت لكم بكلام الله👌

قالوا : لأ..احنا عايزين معجزات تانية ، عايزين آااااا....
بكرة إن شاء الله نعرف هم عايزين إيه😅


#Eman_Shalapy

*صيام الخميس💙*

#قصص_الأنبياء(٢)
#السيرة_النبوية
#الحلقة_الثامنة_عشرة
#أذى_المشركين_لرسول_الله

كنا واقفين المرة إللي فاتت عند كفار مكة لما طلبوا من رسول الله معجزات ورسول الله صلى الله عليه وسلم قال لهم إنه أتى لهم بكلام الله وهو أعظم معجزة،

فقالوا: لأ ..احنا عايزين معجزات نشوفها بأعيننا😤
عايزنا نؤمن بك 😒
فَجّر لنا من الأرض ينوع ماء، بلادنا مفيهاش مياه فخلي الينابيع تنبع من أرض الجزيرة وتخرج فيها الحدائق والنباتات،بدل ماهي كلها صحراء كده😑
"وَقَالُوا لَن نُّؤْمِنَ لَكَ حَتَّىٰ تَفْجُرَ لَنَا مِنَ الْأَرْضِ يَنبُوعًا"

فقال لهم رسول الله : أنا لم أُبعث بهذا ..أنا بشير ونذير ودي حاجة ترجع لربنا،
فقالوا له :
طيب بلاش دي ...عايزنا نؤمن ابعث آباءنا وأجدادنا من الموت وخلي من إللي تبعثهم 《قصي بن كلاب》 لأنه كان رجل صدوق،
فهنسأله عنك لو قال إنك صادق هنصدقك احنا كمان 💁‍♂️
فقال لهم : أنا لم أُبعث بهذا ...دي حاجة ترجع لربنا هو إللي بيبعث الموتى👌

فقالوا له:
إنت بتقول إن الملائكة تأتيك صح ..خلينا نشوف الملائكة دي عشان نصدقك😕
فقال لهم: مش هتقدروا👌

☆احنا فاكرين لما رسول الله شاف جبريل مرة واحدة بس كان خايف إزاي ومكنش مستحمل من هول خلق الملائكة😮

فقالوا له : نقدر😒
فقال لهم : أنا مجرد بشير ونذير ..أنا لم أبعث بهذا👌
فقالوا:
إنت محققتش لنا أي حاجة😑
وعايزنا نتبعك وانت فقير...لو انت غني تستاهل إننا نتبعك، فعلى الأقل ادعي ربك إنه يجعل لك جنان وقصور وأموال فتستحق إننا نتبعك🤷‍♂️
فقال لهم : أمر الله مش بالغنى والفقر، ده بالإيمان👌
" أَوْ تَكُونَ لَكَ جَنَّةٌ مِّن نَّخِيلٍ وَعِنَبٍ فَتُفَجِّرَ الْأَنْهَارَ خِلَالَهَا تَفْجِيرًا"
"أَوْ يَكُونَ لَكَ بَيْتٌ مِّن زُخْرُفٍ "

فقالوا له: إنت بتهددنا بالعذاب لو لم نؤمن بك...خلاص هات العذاب إللي انت بتقول عليه ده، وقّع علينا السماء قطعة قطعة🙄
"أَوْ تُسْقِطَ السَّمَاءَ كَمَا زَعَمْتَ عَلَيْنَا كِسَفًا"

فقال لهم : هذا إلى الله🤚
"قُلْ سُبْحَانَ رَبِّي هَلْ كُنتُ إِلَّا بَشَرًا رَّسُولًا"
فقالوا له: والله إنك لكذاب 😡
مقدرتش تحقق لنا أي حاجة من إللي احنا طلبناها، ولكن إللي بيعلمك الكلام بتاعك ده رجل من مدينة اليمامة اسمه الرحمن😤
"وَإِذَا قِيلَ لَهُمُ اسْجُدُوا لِلرَّحْمَٰنِ قَالُوا وَمَا الرَّحْمَٰنُ أَنَسْجُدُ لِمَا تَأْمُرُنَا وَزَادَهُمْ نُفُورًا"

☆مكنوش معترفين بأن الرحمن اسم من أسماء الله 😑

فراح قام واحد منهم وقال لرسول الله:
كل إللي طلبناه منك عجزت عنه، وأنا لن أؤمن بك إلا لو شفتك بتطير في الهواء لحد ما توصل للسماء وتجيب لي كتاب من السماء وألمسه بإيدي ،
وحتى لو عملت كده فأنا هعتقد إنك ساحر برده😤
"أَوْ تَرْقَىٰ فِي السَّمَاءِ وَلَن نُّؤْمِنَ لِرُقِيِّكَ حَتَّىٰ تُنَزِّلَ عَلَيْنَا كِتَابًا نَّقْرَؤُهُ"
فرسول الله مردش عليه...واضح من كلامه إنه معندهوش أي نية للتصديق أصلا😑
قالوا والله لن نؤمن بك حتى نرى الله ونشوف الملائكة كلهم
😡
" أَوْ تَأْتِيَ بِاللَّهِ وَالْمَلَائِكَةِ قَبِيلًا"
فرسول الله راح قايم وسابهم ومشي وهو حزين.

☆وهنا ممكن حد يسأل هو ليه رسول الله ما استجبش لمطالب قريش مش يمكن كانوا يؤمنوا😕

هو مش الأنبياء السابقين جاءوا بالمعجزات؟
كانت إيه النتيجة😑
كلهم كذبوا... فاكرين ثمود لما طلبوا معجزة الناقة وربنا أعطاها لهم زي ما طلبوا وفي الآخر كفروا بها👌
"وَآتَيْنَا ثَمُودَ النَّاقَةَ مُبْصِرَةً فَظَلَمُوا بِهَا ۚ وَمَا نُرْسِلُ بِالْآيَاتِ إِلَّا تَخْوِيفًا"
موسى عليه السلام مش جاء بتسع معجزات إلى فرعون وقومه ومحدش منهم آمن😑
فطلبهم للمعجزات مش عشان الإيمان ولكن جدل وخلاص،
زي ما تيجي تقولي لواحدة على حكم شرعي وتقول لك فين الدليل ولما تقولي لها الدليل،
تقعد تجادل وتجيب كلام من هنا وكلام من هنا،
وتقول لك لأ.. المعنى مش كده وتقعد تجادل وخلاص😶

بعد ما حصل الحوار ده بين رسول الله والمشركين ،بعث الله جبريل لرسول الله عشان يقول له:
يا رسول الله لو إنت عايز ...ربنا ممكن يعطيهم كل إللي طلبوه 👌
لكن لو كذبوا بعد ما يشوفوا المعجزات دي هيهلكوا جميعا،
زي الأمم السابقة ، أو إنك تصبر عليهم 👌
فرسول الله قال : لأ..هصبر عليهم لعل الله يخرج من ذريتهم من يؤمن بالله.
هم مفيش فيهم فائدة لكن ممكن أولادهم يبقوا مختلفين ويؤمنوا🤷‍♂️
فربنا أنزل تعقيب على الحادثة دي بقوله:
"وَمَا مَنَعَنَا أَن نُّرْسِلَ بِالْآيَاتِ إِلَّا أَن كَذَّبَ بِهَا الْأَوَّلُونَ ۚ "

وربنا عالم الغيب بيقول لرسول الله إنه حتى لو فتح لهم باب إلى السماء وصعدوا فيه هيقولوا سحرنا محمد😑
"وَلَوْ فَتَحْنَا عَلَيْهِم بَابًا مِّنَ السَّمَاءِ فَظَلُّوا فِيهِ يَعْرُجُونَ *
"لَقَالُوا إِنَّمَا سُكِّرَتْ أَبْصَارُنَا بَلْ نَحْنُ قَوْمٌ مَّسْحُورُونَ"

بدأ المشركين يسخروا ويؤذوا رسول الله والمؤمنين، اتكلمنا عن أذى المستضعفين من المؤمنين في الجزء إللي

فات،
النهاردة هنتكلم عن أذى المشركين لرسول الله،
◇كانوا بيشتموه ويقولوا عنه مجنون
"وَقَالُوا يَا أَيُّهَا الَّذِي نُزِّلَ عَلَيْهِ الذِّكْرُ إِنَّكَ لَمَجْنُونٌ"
◇اتهموه بالسحر
"وَعَجِبُوا أَن جَاءَهُم مُّنذِرٌ مِّنْهُمْ ۖ وَقَالَ الْكَافِرُونَ هَٰذَا سَاحِرٌ كَذَّابٌ"

◇كانوا بيسخروا منه وقال أبو جهل مرة قصاد رسول الله بسخرية : يارب لو إللي محمد جاء به ده هو الحق من عندك فخلي السماء تمطر علينا حجارة أو ابعث علينا عذاب أليم😏
"وَإِذْ قَالُوا اللَّهُمَّ إِنْ كَانَ هَذَا هُوَ الْحَقَّ مِنْ عِنْدِكَ فَأَمْطِرْ عَلَيْنَا حِجَارَةً مِنَ السَّمَاءِ أَوِ ائْتِنَا بِعَذَابٍ أَلِيمٍ"

◇كان رسول الله لما يقرأ القرآن عند الكعبة بيوصوا بعض إنهم يعملوا ضجة ودوشة عشان محدش يسمع القرآن ويؤثر فيه،
"وَقَالَ الَّذِينَ كَفَرُوا لَا تَسْمَعُوا لِهَٰذَا الْقُرْآنِ وَالْغَوْا فِيهِ لَعَلَّكُمْ تَغْلِبُونَ"

◇وكانوا بيقولوا إزاي يعني ربنا يبعث رسول من البشر بيأكل الطعام ويمشي في الأسواق زينا، المفروض الرسول يكون من الملائكة مش بشر😒
"وَقَالُوا مَالِ هَٰذَا الرَّسُولِ يَأْكُلُ الطَّعَامَ وَيَمْشِي فِي الْأَسْوَاقِ ۙ لَوْلَا أُنزِلَ إِلَيْهِ مَلَكٌ فَيَكُونَ مَعَهُ نَذِيرًا"

☆إزاي أصلا الرسول يكون من الملائكة 🤦‍♀️
الرسول وظيفته إن الناس تعمل زيه وتقلده،
فإزاي أنا هقلد حد وهو عنده قدرات مش موجودة عندي🤷‍♀️
يعني لما يأمرهم بالصلاة والصيام وطاعة الله هيقولوا أصل هو ملك فيقدر على كده،
إنما احنا بشر فمش هنقدر نعمل زيه😒
ده الناس دلوقتي لما نقول لها رسول الله كان بيعمل كذا ونقول لهم اعملوا زيه يقولوا ده رسول الله ، فتخيلوا لو كان ملك بقى 😶
حتى ربنا قال لو بعثنا ملك هيكون في صورة رجل، لأن البشر ميستحملوش رؤية الملائكة، هيخافوا ويترعبوا منهم،
فإزاي هيوصل الرسالة أصلا؟
"وَلَوْ جَعَلْنَاهُ مَلَكًا لَّجَعَلْنَاهُ رَجُلًا وَلَلَبَسْنَا عَلَيْهِم مَّا يَلْبِسُونَ"

◇كانوا بيشتموا القرآن ومن أنزله ومن جاء به،
أول ما يسمعوا رسول الله بيقرأه بين المسلمين، فأنزل الله :
"ولَا تَجْهَرْ بِصَلَاتِكَ وَلَا تُخَافِتْ بِهَا وَابْتَغِ بَيْنَ ذَٰلِكَ سَبِيلًا"

يعني متعليش صوتك لدرجة إن المشركين يسمعوها ولا توطي صوتك أوي لدرجة إن أصحابك ميسمعوش خلى الموضوع وسط👌

◇كانوا بيدورا عن أي حاجة يعجزوا بها رسول الله صلى الله عليه وسلم، راحوا لليهود إللي كانوا بيسكنوا المدينة وقالوا لهم:
احنا عندنا واحد بيقول إنه رسول وإنتم أهل الكتاب إيه رأيكم😕
فقال لهم أحبار اليهود اسألوه ثلاثة أسئلة لو عرف يجاوبكم عنهم يبقى هو فعلا رسول لو مجاوبكوش يبقى كذاب👌
اسألوه عن ملك طاف مشارق الأرض ومغاربها،
إيه هي قصته،
واسألوه عن فتية اختفوا في الزمن البعيد إيه إللي حصل معاهم، واسألوه إيه هي الروح👌
فرجعوا لمكة وراحوا لرسول الله صلى الله عليه وسلم وسألوه الأسئلة دي فقال لهم :
هقول لكم غدا ومن الحماس نسي أن يقول إن شاء الله،
ولما جاؤوا له ثاني يوم قال لهم غدا،
والوحي انقطع حوالي من خمسة عشرة يوم لشهر على حسب الروايات،
وطبعا كفار قريش قالوا إنه كاذب أهه بقالنا خمسة عشر يوم ومفيش أي حاجة😤
فحزن رسول الله لانقطاع الوحي ومن كلام أهل مكة،
فنزل جبريل عليه السلام بسورة الكهف بيشرح فيها قصة ذو القرنين وفتية الكهف،
واحنا اتكلمنا عنهم بالتفصيل في قصص الأنبياء ممكن ترجعوا لهم لو حابين😉
الروح قال إن ميعرفش عنها حاجة لأن كل الأنبياء السابقين محدش اتكلم فيهم عن الروح،
وهي أمرها عجيب فلو كان ربنا أوحى لرسوله معلومات عن الروح مش موجودة مع الأنبياء السابقين كانوا هيقولوا عن رسول الله إنه كذاب،
لأن الروح بالذات من الأمور الغيبية إللى محدش يعرف إيه هي 🤷‍♀️
"وَيَسْأَلُونَكَ عَنِ الرُّوحِ ۖ قُلِ الرُّوحُ مِنْ أَمْرِ رَبِّي وَمَا أُوتِيتُم مِّنَ الْعِلْمِ إِلَّا قَلِيلًا"

كل ده كان إيذاء نفسي لكن تجرأوا عليه بإنهم يؤذوه إيذاء جسدي،
◇لما كان رسول الله بيصلي عند الكعبة في يوم جاءه واحد من الكفار اسمه : عقبة بن أبي مُعيْط وأخذ رداءه.. عبياته يعني ولفها حول رقبة رسول الله صلى الله عليه وسلم من وراه وخنقه جدا،
لحد ما جاء أبو بكر الصديق وخلصه منه وهو بيقول له:
أتقتلون رجلا لمجرد إنه بيقول ربي الله😡

◇في يوم من الأيام سادات مكة قاعدين عند الحجر وكانوا حوالي سبعة،
منهم أبو جهل وأُبَي بن خلف فعمّالين يتكلموا عن رسول الله ويقولوا:
احنا مصبرناش على أحد زي ما صبرنا على محمد ،شتم آباءنا وشتم آلهتنا وعاب في ديننا وفرق بين جماعتنا،
واستصغر عقولنا وطريقة تفكيرنا 😡
وهم عمالين يتكلموا كده لقوا رسول الله جاي عليهم عشان يطوف حول الكعبة فكان كل ما يمر بهم يسمعوه الكلام إللي بيقولوه،
فرسول الله وجهه يتغير من كلامهم،
زي كده لما تبقي معدية على ناس ويقعدوا يتريقوا عليكي،
في الرايحة وفي الجاية فيتحرق دمك😑
فعدى عليهم أول مرة فقع

دوا يتكلموا ويشتموه ووجهه يتغير،
والمرة الثانية برده وهو ساكت وصابر،
ولما عملوا كده في المرة الثالثة وقف وبص لهم وقال لهم:
عارفين يا معشر قريش...والذي نفس محمد بيده إنما جئتكم بالذبح👌
السبعة إللي كانوا قاعدين تنحوا واتصدموا من الكلمة 😳
أصل إللي قال الكلام 《الصادق الأمين》
هم أه بيكذبوه بس هم عارفين من جواهم إنه صادق وإنه على حق، فلما يقول لهم إنما جئتكم بالذبح يبقى هو فعلا جاءهم بالذبح😨
فراحوا كلهم قايمين له وقعدوا يستسمحوه، ويقولوا له الكلام اللين وقالوا له :
انصرف يا أبا القاسم، انصرف راشدا والله ما كنت جهولا😊
فلما مشي رسول الله قالوا لبعض:
بقى احنا عمالين نتكلم ومتفقين ننتقم منه ولما بس هو هددنا بشوية كلام خفتم منه🤨
لما ييجي بكرة هنتصرف معاه👌

وأول ما جاء رسول الله تاني يوم راحوا قايمين عليه مرة واحدة وحاوطوه وواحد منهم مسك رسول الله من ردائه من عند رقبته كده،
ماسك في خناقه يعني، ووقعدوا يقولوا إنت إللي بتشتم آلهتنا، إنت إللي بتقول كذا وكذا😡
فقال لهم رسول الله: نعم أنا إللي بقول كده🤚

فشاف الموقف أبو بكر الصديق وراح مخلص رسول الله منهم وهو بيبكي وبيقول : "أتقتلون رجلا أن يقول ربي الله" 😥

☆طبعا حديث إنما جئتكم بالذبح ده ناس أخذته وقعدت تبرر به قتل الأبرياء، ده غير الناس إللي مصدقت تطعن في رسول الله،
ده غير الشك إللي ممكن يدخل في قلوب المسلمين،
إزاي ربنا بيقول وما أرسلناك إلا رحمة للعالمين، ومنين رسول الله بيقول إنما جئتكم بالذبح😳

أولا الحديث ده خاص بقريش يعني رسول الله قال يا معشر قريش،
يعني هو كان بيخاطب قريش في النقطة دي ،وحتى مش كل قريش ده كان الكلام موجه للسبعة إللي كانوا قاعدين في الحجر ،
والسبعة دول إللي كانوا مصرّين على الكفر، وكانوا بيعذبوا المسلمين أشد العذاب،
وقتلوا سمية وياسر وعذبوا عمار وبلال وصهيب وكل المستضعفين😞
وكانوا عايزين يقتلوا رسول الله👌
، في مرة ثانية كانوا قاعدين عند الكعبة وقعدوا يحلفوا بآلهتهم إنهم أول ما يشوفوا محمد هيقوموا عليه قومة رجل واحد فيقتلوه،
فسمعتهم فاطمة بنت رسول الله وراحت لأبوها تبكي وتحكي له على إللي سمعته،
فقام رسول الله وتوضأ وراح لحد عندهم عند الكعبة،
فمحدش قدر حتى يرفع عينه في عين رسول الله ولا حد قدر يقوم يقوم له،
ومسك رسول الله شوية تراب ورماهم بها وقال لهم:
شاهت الوجوه يعني قبُحَت الوجوه ، فمحدش أصابه من التراب ده إلا وقُتل يوم بدر كافرا زي ما هنشوف،
ودي معجزة لرسول الله صلى الله عليه وسلم، إن الوعيد بتاعه تحقق👌

فعشان الناس بس إللي بتاخد الحديث وتطلع الكلام من سياقه وتقول إن الإسلام أو رسول الله جاء بالذبح ،
ويبقى حجة بالنسبة لهم لقتل ناس أبرياء لمجرد إنهم كفار ولم يتبعوا دين الإسلام، أو عشان يطعنوا في رسول الله🙄

ثانيا:
رسول الله جاء رحمة للعالمين أيوة، ولما قيل له يا رسول الله ،ادع على المشركين!
قال : إني لم أُبْعث لعّانا وإنما بُعثت رحمة👌
وزي ما شفنا إنه رفض إن ربنا يرسل المعجزات عشان أهل مكة ميكذبوش فربنا يهلكهم😉
فرسول الله لا ينطق عن الهوى فزي ماهو رحمة للعالمين، فهو بيتوعد أشد الناس كفرا وتعذيبا للمسلمين ،
ولسه هنشوف مواقف لهم عملوا إيه مع رسول الله ومع المسلمين😑
ومكنش الوضع شهر ولا شهرين ولا سنة ولا سنتين دول قعدوا أكثر من عشر سنين👌

◇فالمختصر المفيد إن حديث جئتكم بالذبح كان لناس معينة في ظرف معين، مش إن الإسلام جاء بالذبح👌

من الناس إللي أذوا رسول الله جدا كان أبو جهل،
في مرة كان راح عند الكعبة وسأل الناس الموجودين هل محمد بييجي يسجد عند الكعبة يصلي😡
فالناس قالت له: نعم😕
فقال : واللات والعزى لو شفته بيعمل كده لأدوس على رقبته أو أُعَفّر وجهه في التراب😤
فجاء رسول الله عشان يصلي عند الكعبة ، فراح أبو جهل قايم عشان يدوس على رقبته، وفجأة لقوا أبو جهل بيرجع لورا بسرعة ،
وحاطط إيده على وشه، كأنه بيحمي وشه من حاجة 😮
فالناس سألته: مالك 😳
قال لهم : بيني وبينه خندق من نار وأجنحة 😰
فقال رسول الله: لو كان قرّب مني لاختطفته الملائكة عضو عضو👌
فأنزل الله فيه :
"كَلَّا إِنَّ الْإِنْسَانَ لَيَطْغَى (6) أَنْ رَآهُ اسْتَغْنَى (7)
إِنَّ إِلَى رَبِّكَ الرُّجْعَى (8) أَرَأَيْتَ الَّذِي يَنْهَى (9) عَبْدًا إِذَا صَلَّى (10) أَرَأَيْتَ إِنْ كَانَ عَلَى الْهُدَى (11)
أَوْ أَمَرَ بِالتَّقْوَى (12) أَرَأَيْتَ إِنْ كَذَّبَ وَتَوَلَّى (13) أَلَمْ يَعْلَمْ بِأَنَّ اللَّهَ يَرَى (14)
كَلَّا لَئِنْ لَمْ يَنْتَهِ لَنَسْفَعًا بِالنَّاصِيَةِ (15) نَاصِيَةٍ كَاذِبَةٍ خَاطِئَةٍ (16) فَلْيَدْعُ نَادِيَهُ (17) سَنَدْعُ الزَّبَانِيَةَ (18) كَلَّا لَا تُطِعْهُ وَاسْجُدْ وَاقْتَرِبْ"

☆شوفوا سبحان الله 😏
يعني أبو جهل شاف معجزة قصاده أهه ومع ذلك لم يؤمن👌
"فَإِنَّهَا لَا تَعْمَى الْأَبْصَارُ وَلَٰكِن تَعْمَى الْقُلُوبُ الَّتِي فِي الصُّدُورِ"

ومن الأذى إللي تعرض له رسول

الله صلى الله عليه وسلم بيحكيه الصحابي عبد الله بن مسعود:
إنه مرة كان يصلي عند البيت ، وأبو جهل ومعاه أصحاب له قاعدين، فقالوا لبعض:
مين يروح يجيب أمعاء البعير بتاع آل فلان إللي ذبحوه ويضعه على ظهر محمد وهو ساجد😈
فقام أشقاهم وجاب الأمعاء واول ما رسول الله سجد راح حاطه على ظهره بين كتفيه،
وقعدوا يضحكوا على رسول الله لدرجة إنهم قعدوا يتمايلوا على بعض من الضحك😑
بيقول عبد الله بن مسعود إن رسول الله ظل ساجد لحد ما جاءت فاطمة وشالت الأمعاء من على ظهره وأنا مكنتش قادر أعمل حاجة😔
فقام رسول الله وقال : اللهم عليك بقريش ..اللهم عليك بقريش..اللهم عليك بقريش🤲

☆طبعا الدعاء هنا كان على الناس إللي عملت كده مش على كل قريش👌

◇لو انتبهتم إن كل مرة بيؤذوا رسول الله كان بيبقى وهو بيصلي،
يعني هو بيطيع ربنا ولم يؤذي أحد ومع ذلك كان رسول الله بيتعرض للأذى وساعات القتل،
ومفكرش مرة إنه يقول خلاص أنا مش هروح أصلي عند المجالس بتاعتهم تاني،
وده يعلمنا إننا نثبت على الحق مهما كان الأذى، ونستمر في الدعوة مهما كانت الناس مش عاجبها👌
ويعلمنا كمان إن مش معنى إن ربنا بيسلط بعض الكفار والظلمة على المؤمنين فده لِهوَان المؤمنين عليهسبحانه،
ولا لأنه غير قادر إنه يمنع الأذى عنهم ولكنه سبحانه له حكم وتدابير لا يعلمها غيره😊

وده يخلينا نسأل سؤالين مهمين🤔
¤ليه ربنا يبتلي المؤمنين وعلى رأسهم رسوله وأحب الخلق إليه كده ويسلط عليهم الكفار 😥

¤والسؤال الثاني ليه المسلمين ورسول الله صبروا ومردوش على الكفار وحملوا السلاح ودافعوا عن أنفسهم😑

هنعرف الإجابة إن شاء الله الجزء الجاي ، وهنشوف بدايات الفرج للمسلمين بعد ثلاث سنوات من القهر والتعذيب👌


#Eman_Shalapy

•

قال الشيخ د.خالد السبت -حفظه الله- :

كانَ الشَّيخ محمد الأمين الشنقيطي -رحمه الله- كما حدَّثني أحد أبنائه، لا يمكِّن أحدًا في مجلسهِ أن يخوضَ في أعراض النَّاس؛ فكان ينهاهم عن ذلك، ويُسكتُهم، ويقول: "أنا شايب قليل الحسنات؛ فلا تُذهبوا حسناتنا بغيبتكم للناس" فكان لا يسمح لأحدٍ مهما كان قدرُه أن يغتابَ أحدًا بحضرته!

- أعمال القلوب لـ خالد السبت ١ / ٣٢٥

@ys_multazim