خلونا نتفق أن الملامح لها القبول الأولي والمبدئي في كل علاقة، ومجرد ما تشوف هذا الإنسان يا قلبك ينقبّض منه أو يأمن معه، لكن والله ثلاثًا أن الروح والعقل واللسان الحلو هي أسباب إنك تكمل وتواصل معه، وبعدها تجي المواقف الي تثبت لك حقيقة هذا الانسان ومعدنه، توضح لك نواياه تجاهك..
وتخليك تقرر تستمر بجوهر هذي العلاقة ولا تقتلها وتحط نقطة وتنهيها للابد، وهنا كلامي عن العلاقات المباحة، كالصداقة والزمالة والزواج، فلا نقول الشكل أبدا مو مهم ولا نقول أن الشكل هو الأساس، لكنهم مكملين لبعضهم بالتناسب
‏فبطلوا تتفاجئون وتنتقدون كيف المتزوجين مختارين بعض حسب تقييمكم وظنكم أنتم !
فكُل إنسان ما اختار شخص ورِضى فيه إلا وهو ملاقي فيه الشيء المريح والمناسب له، سواء تفكيره ووعيّه، تسامحه لطفه كرمه تعاطفه، يونسّه ويضحكه، لقى فيه ما يكمل نواقصه، لقى فيه نفسه المفقودة أو جزء منها،
‏والله محد بيختار شخص يكمل معاه كل عُمره بس عشان ملامح أو عشان بس يملك الثرى فقط..
وطبعًا أتكلم عن الناس الناضجة الفاهمة الي تبي تبني صداقات حقيقة وعلاقات وثيقة وبيت هادئ ومستقر مريح وسعيد، باقي العقليات ما يشملها الكلام ولا يهمني الأسباب الي وصلتهم لهذي المرحلة من الاعتماد على المظاهر وترك الجواهر ».

الحمدلله امتنانًا وحُبًّا وشكرًا ».

ناسٍ تسهل عليك دروب الحياة وناسٍ تِصعبها ».

الأشخاص الي يسهلون علينا الحياة ويبسطونها نعمة

يارب
ساعدني أكون أفضل نُسخة من نفسي وساعدني أعطي كُل ذي حقٍ حقّه بلا إجحاف ولا جحود، ولا تحطني بـ مواقف أكون فيها النادم الوحيد على ما فات، وأجعل الحياة هينة وسهلة على قلبي وعقلي.

سبحان الله
‏الحمدلله
‏لا إله إلا الله
‏الله أكبـر
‏لا حول ولا قوة إلا بالله
‏اللّهم صلِ وسلم على نبينا محمد
‏لا إله إلا أنت استغفرك وأتوب إليك
‏اللهم اغفرلي ولوالديّ وللمؤمنين والمؤمنات
‏والمسلمين والمسلمات الأحياء منهم والأموات

الحمدلله على الرِضا والخير الذي يأتي بشكل كامل ورائع ».

تاج الدعاء: ربنا اتنا فى الدنيا حسنة وفى الأخرة حسنة وقنا عذاب النار.

الان كل الانتظار لليلة عرفة ودعوات عرفة الي بتُرفع للسماء بيقين عظيم! والله السنوات الأخيرة ما أنقذتني إلا دعواتي
‏سواء في رمضان ولا في صلاة الضحى ولا في صُبح عرفة، ما أنسى اثرها بقلبي وحياتي وأثر استجابتها الي خلاني أتحسس محبة الله لي ومدى قُربه مني، وأنه لطيف بي رُغم تقصيري

والله مافي شيء يداوي الروح ويرتبها وينقذها من الانتكاسه غير الدعاء، سواء كان الأمر عاطفي ولا إيماني ولا نفسي ولا جسدي
‏ربي سبحانه إذا مسَح على صدرك نسّاك كُل هم وضيق وموقف خذا من عاطفتك وصحتك وروحك، يجبرك حتى لا يبقى أثر ولا شعور ولا استذكار وذكرى

الحمدلله الحمدلله الحمدلله، الحمدلله بكامل الامتنان والسرور والرضا، الحمدلله بعمق الشعور وعظمة الموقف،
‏ادعوه سبحانه بيقين الإجابة وتوسلو له بعمل صالح خفي لا يعلم عنه أحد، وبضعفكم وانكساركم التجئو إليه ».

تساؤل /
هل الناس الحلوة ما تدري إنها حلوة؟ ما تشوف ملامحها مثل ما حنا نشوفها؟
لان مو طبيعي كمية عمليات التجميل الي وصلنا لها!
يزعل مرة إن وحده ملامحها جميلة متناسقة وبعد مدة تغير في خلقتها بس عشان مو عاجبتها أو عشان تبغى تصير مثل أحد
معين!
وفوق العمليات فلاترررررر.. طيب خلونا نتفق إن الفلاتر صعبّت علينا نتقبل صورنا بدونها لكن الأكيد نحب ملامحنا بطبيعتها في المرايا
صح ولا !
فكّرت وما لقيت إلا إن الثقة كنززززززز كنز لدرجة ممكن من شدة ثقتك بنفسك الناس تظنك مغرور وشايف نفسك، وأنت بس تحب نفسك ولا قللت من غيرك ولا فكرت حتى..
لان الواثق مهما كنت أنت تشوفه عادي راح يبهرك بثقته بنفسا وراح يجذبك غصب عنك مع مرور الوقت، وراح تلاقي حاجة تلفتك وتردد تقول "هذا الإنسان صح ملامحه عاديه لكنه جذاب-بينما الجميل فعلاً وانت متأكد من جماله بتصير تشوفه عادي لو ما عجبتك اطباعه كلامه..
أسلوبه شخصيته والخ من المنفرات وبتردد -الزين ما يكمل- أو يا زينه وهو ساااااااكت- أو -المظاهر خداعه والجمال مو كل شيء-
فأنت وحدك تصنع جمالك بقبولك التاااا١١١ام لنفسك، وبتطوير ذاتك وتحسين ألفاظك وشخصيتك وأفكارك، وتنمية وعيّك ».

تحمست ليوم عرفة الي عسى ربي يبلغني إياه، عشان أدعييييييييييي لنفسي ولقلبي وحياتي، لأن كل مافيني بحاجة إلى الدعاء والانشراح والأُنس به، صحيح الله معنا دايم وقريب لنا بكل وقت وما نحتاج يوم معين، لكن طالما جاني هالشعور باذن الله ما أفوته وباستغل كل ثوانيه، لأن متأكدة بعيش بانشراح

بعد كل الدعوات الي راح تُرفع لخالق السماء، ولو ما أُستجيبت راح أكون أفضل وبخير أكثر، مثل العام دعيت كثير وبكيت كثير وما أذكر شيء من دعواتي إلا أبي أحس بتحسُن فقط، وهذي الفترة استشعرت أني جالسة أتنعم واعيش في رحاب دعواتي وأنا في غفلة- ما صار الي أبي مثل ما ودي لكن تطمنت وارتحت

وهذا سبب كافي يخليك ترجع للدعاء بكل وقت عشان الراحة الي تحس فيها بعد ما تكب كل الي فيك لخالق هذا الجوف، الي يعرفك أكثر من نفسك، ويعرف مطالبك قبل لا ترفعها، يعرف ويدبر لك كل الامور بشكل يرضيك حتى لو كانت النتايج مُخالفة، لذلك الحمدلله دايم على نعمة الاسلام ومعرفة الله واللجوء إليه ❤️❤️❤️❤️❤️❤️❤️"

لا إله إلا الله وحده لا شريك له له الملك وله الحمد وهو على كل شيء قدير ».

اللّهم صلِ وسلم على نبينا محمد

لعنة الوعي، والسخط على مشاعر وذكريات الماضي، ملحجة المواقف والتصرفات في سنوات مضت، كُلها أشياء ما أسعى لفعلها والتركيز عليها، لأنها كانت حقيقتي في وقتها، ومن الجيد إني كبرت ونضجت وتغيرت عندي مفاهيم واطباع وأعدت تعديل اخطائي، ومحاولة إصلاحي..
ورُبما كنت واعية لبعض السخافات سابقًا ولم
افعلها لذلك أنا ما اندم على الي راح لانه كان صادق وحقيقي ومرات حماس الوقت وطيش النفس، وكُل فترة من حياتنا بتجي مثل هذي التصرفات ولكن من الجيد نحمد اللّٰه ونشكره إننا قدرنا نعيش أيام ولحظات ومشاعر بشكل حلو وعبيط، قدرنا ننبسط بأبسط الأشياء،
وكانت ولازالت نعم ربي تنزل علينا وماليه حياتنا، ومن جُحدان ونكران النعم السخط عليها بين الحين والآخر وكأنها لا تستحق الامتنان والتقدير.

الحلقة تتكلم عن -أثر الكلمة في حياتك- وكيف بالكلمة أنت قادر تكسب وظيفة وتكسب صديق أو تحافظ على زواج أو تتواصل مع الآخرين بشكل مثالي.. والكثير من جمال اللغة العربية والتفاصيل الثرية. مدتها ثلاث ساعات لكن أسلوب المتحدث وثراه المعرفي واللغوي مُشوّق للمتابعة »
https://youtu.be/OJ2_PLte5nk?si=mkbSZnL8VDK0QdyU

الكلمة لها قيمة ومعنى مهما قلنا أن الكلام مجرد كلام! هذا الكلام الحنون العذب، يخليك سعيد ويخليك تضحك، ويخليك تبكي وتمتنّ لله، ويواسي خاطرك ويجبر بقلبك ويطمنك مرات كثير، ومن خلاله تشوف خاطرك عزيز، ‏الكلمة الوحدة الصادقة من قلب حنون قادرة تصنع الكثير، وقادرة تهدي وتِصلح وتُرشد وتدمر

الكلمة منك تصنع وتغير وتؤثر وتُثمر، الكلمة الوحدة منك تعطي أمل وتحيي روح وتنقذها من تعبها ورُبما هلاكها، كلمة منك قادرة تكون بمفعول المُسكن والدواء ، قادرة تكون بمثابة المطر على الأرض والماء على الزّرع ، كلمتك الطيبة الحانية الصادقة العطوفة الرحيمة تصنع كُل هذا أن أردت أنت ذلك ♥️♥️♥️♥️♥️