متشوّقة للأيام اللي راح تكون قبل يوم عرفة وفي يوم عرفة وصباح العيد ، أحس الايام المُباركة تشحن روح الانسان وتجدد طاقته ومشاعره وتخليه يعيش في أمان الله ويستحضّر رمضان وأجواءه في لحظات أقل ومشاعر أعظم.. يارب بلغنا وأكرمنا ♥️♥️♥️♥️

أحب الوضوح في المشاعر ، وأحب التعبير الواضح والصريح والاهتمام الملحوظ ، أحب المبادرات الحقيقية واللفتات الكريمة النبيلة ، أحب أحس بالشعور أكثّر من أنه ينقال لي في لحظة حانية ويغيب عني أيام وشهور ، أحب أحس وطالما أنت تعبيرك مُش واضح وصريح لا تلومني في الغياب البطيء.
في المقابل ما أحب أبدًا الغموض في المشاعر ! إلاّ المشاعر والتساؤلات اللي تجيني من وراها لا تتركني في ضياع ونت قادر تطمني ، قادر تجاوبني ، قادر توصلي فكرة تخليني أكون مرتاحة ، لا تخليني في الرماد وفي نص نور ونص ظلام……

"زكاة العلم نشره" أثمن جملة ممكن تطبقها وتحفظها في حياتك ، وتصير كريييم كريم بنشر العلم، وكل معلومة تفيد غيرك حتى لو مو مصيرية، حتى لو كان أنسان بالشارع يسألك عن مكان، ولا في مول يسألك عن محل، كونوا كريمين بالمعلومة بعيدين أشد البُعد عن بُخل نشر العلم ، فلا تدري مدى أهميته للأخر.. وأتمنى كمان تكون روحك سمحة وخاطرك وسييييييع في إعطاء المعلومة وشرحها وتوصيلها ، بدون لا تأفف ولا غضب أو انسحاب بدون ردّت فعل ، وحُط نفسك مكان السائل لان مستحيل تعيش حياتك بدون ماتكون يوم من الايام مكانه وبحاجة معلومة مهما بلغت من العلم والمعرفة راح ينقصك العلم في أمور واااجد.

الحمدلله أن أتعاب ومشقات وأحزان الامس هي في الأمس ومجرد ما تنام وتصحى تلاقي نفسك بمشاعر مختلفة تمامًا وكأن شيئًا لم يكن ، لذلك ‏امتناني لهذا اليوم وكل يوم "على تجدد المشاعر والطاقة في كل يوم" ♥️.

يارب أرزقنا الحياة إللي نتمناها وتخلينا نحس أننا أحياء بالروح والجسد"..

وخير أنيس في طُلمة الليل كتاب الله وسجدة •

دايمًا نقرأ ونسمع "تمسك بالدعاء" لا تتردد في طلب أبسط أُمنياتك وأحلامك والنعم اللي غيرك مُحاط بها ، لا تخجل ، لا توقف ، لا تتردد وتتحطم لو ما أُجيبت دعوتك في الوقت الراهن ، وعشان كذا أحب أقولكم من عُمق قلبي وكل مشاعري تمسكوا بالدعاء مهما تأخرت الاجابة يكفيكم الراحة والانشراح بعد ما تطلّع كل اللي جواتك وتحس بأمان أن ضعفك وانكسارك والحاحك ما طلع إلا بين يدين ربك، ربك اللي اذا ظُلمت وتوجعت ردّدت بصوتك الخافت والمتوجع "حسبي الله ونعم الوكيل ، حسبي أنت" وأنت متيقن أنه هو وكيلك وكافيك ومعاك وراح ينصرك من كل شيء وراح يريح روحك، فكيف بأمور بسيطة خاطرك فيها ؟ مافي شيء مُحال مع رب خلق هالكون بكل اللي فيه يا أنسان ،يا مُضطر ، يامُحتاج ، ياضعيف أدعي مهما صغُرت حاجاتك ومطالبك ، مهما كانت تافهه ومُحالة بعين الجميع ♥️♥️♥️♥️♥️.

لا غيّب الله عنا المشاعر الصادقة والناس الطيبة وكُل ما يجعل الانسان أكثر رِضا و سرور.. أمين 🌈♥️♥️

اللهم لك الحمد والشكر الحمدلله مو مرّة عشرات الآلاف لأن للحظة تحمست وقررت أفتح هالقناة وأكتُب فيها كل فكرة وشعور ورسالة ونصيحة بخاطري ، بدون ما الناس يعرفوني ويعرفون من هذا الانسان ، والان أنا أكثر أنسان مستفيد منها وبمثابة المأوى والسلوى والطاقة لي بكُل مافيها.. الحمدلله على سنة وعدّة أشهر مضت سريعًا، والحمدلله على وجودكم الداعم لي في الاستمرار والعطاء ♥️♥️♥️♥️♥️♥️♥️.

صباح الخير.. فيه تغريدة قريتها معناها "أي فكرة وخطوة تجي على بالك بادر فيها ما تدري كيف ممكن تكبر بيوم وتصير ذات قيمة وأهمية وممكن هي أول أبواب النجاح لك" وهالشيء ذكرني لما قررت أفتح حساب بتويتر عشان أجرب ، ولما قررت أفتح قناة أكتب فيها ، ولما قررت أشارك الناس كتاباتي ، ولما قررت أشارك صوتي..
وبعدها صار يجيني دعم وتحفيز من الاصدقاء والاهل والغُرباء اللطيفين ، وتحمست أفتح قناة ثانية أنزل فيها صوتياتي عشان تبقى وعشان يسهل عليهم الوصول لها وعشان مدة الفويس تكون مريحة لي أيضًا ، وهالشيء أثر فيني كثير وخلاني أكثر جرأة ، وأرجع أسمع لنفسي وأشوف تطوراتي وتغيراتي وتأثيري..
وهالشيء فعلاً يأكد لي "أن الخطوات الصغيرة هذي فعلاً تفرّق فلا تتردد فيها ما تدري وش يكون نصيبك منها وكيف تأثر عليك وعلى غيرك " ويوم بعد يوم راح تشوف هالتأثير مهما ظهر لك بأنه بسيط وقليل إلا أنه طالما أنه حقيقي وصادق راح يثمّر يومًا ♥️♥️♥️♥️♥️♥️♥️♥️.

✨ تهنئة من نوع آخر ، ثم ألف مُبارك ✨

هذي الأيام لشحن الروح ولبث الطمأنينة والامان في الجسد ، لأنها بمثابة خلوة وبُعد عن كل شيء إلاّ الطاعة والخير ، وتصير تتعامل مع هالايام بأكثر انتباه واهتمام وحُرص لسبب وجودك في هذي الحياة ، وتعيش روحانية رمضان اللي كلنا نفقدها بغيابه.. شدوا الهمة وجددوا النيّة ياصحب، والعبادة الاسهل عليك والاقرب إلى قلبك كثّر منها في هذي الايام، سواء كانت صيام ولا ذكر ولا سُقيا ووِتر. اغتنّم هالليالي بالعبادة اللي ربي ميسرها لك ولا تتحمس في أول الليالي وتترك أواخرها ، سدّد وقارب لأجل الرِبح ، وهالله هالله بالدعاء لكافة المسلمين والمسلمات والثبات على الدين "..

ردّد اللهُ أكبر ، اللهُ أكبر ، اللهُ أكبر ، لا إله إلا الله ، ‏اللهُ أكبر ، الله أكبر ، وللهِ الحمد.. صغّر أمورك وتذكّر عظمة الرب الذي يتولى أمرك وهو وحدهُ كافيك ، وهو أكبّر من كل ما تشُعر وأُبتليت به"..

أنا إللي يقول "تراي دايم هنا لأجل سقاية روحك بصيفك وخريفك وربيعك وشِتاك ، لا تُمرك الايام وحدك ، أنا هنا لأجلك ولأجل روحك العزيزة علي" وفي نهاية المطاف أبكي لوحدي وأشكي من جُور الليالي لوسادتي ♥️!

• تصدق عن مفاصلك بركعتين ترا عُمرك قصير •

يارب الرحمة الدائمة والمغفرة لكُل روح طيّبة غادرت هذه الارض المُلوثة بالسوء، يارب جنات عدن لكُل روح غادرت ولم يُغادر ذِكرها الطيّب عن مسامعنا وافواهنا، يارب لهم الرحمة ولنا الصبر الجميل والجزاء العظيم.

كل شيء خاطرك فيه أدعي وأدعي وأدعييييييي لين تحس روحك خلاص أرتاحت وصوتك بح ودموعك نِشفت ، أدعي بالاشياء اللي ودّك فيها مستقبلاً وحاضرًا واللي تتمنى تحصل عليها حتى لو الآن مو وقتها ، وكيف ومتى ما كان وقتها ربي راح يستجيبها لك بطريقة غير عادية ولا يصفها شعورك ولا عقلك البشري ♥️♥️♥️".

اللهُ أكبر في صدري وقلبي ، اللهُ أكبر في روحي، الله ُ أكبر من مساوئ الحياة ومتاعبها وأحزانها، اللهُ أكبر من كل ضيق وحُزن، اللهُ أكبر في كل حال وترحال، اللهُ أكبر من كل شعور"..

تكبيرات العيد السّعيد".. وكُل عام ونتوا بخير ولله أقرب وأسعد وأطيّب وأخيّر ناس، كل عام ونتوا في رضا وأمن وأمان وصحة وسلام"..

منك النجاة ومنك الصبر ومنك الراحة المُستديمة يا الله ؛ فطهرني وساعدني وقويني ونجني ♥️🌱""