በአማራ ክልል የ8ኛ ክፍል ክልላዊ ፈተና ከነገ ጀምሮ ይሰጣል

ሰኔ 27/2014 (ዋልታ) በአማራ ክልል የ8ኛ ክፍል ክልላዊ ፈተና ከነገ ጀምሮ እንደሚሰጥ ተገለጸ፡፡

የአማራ ክልል ትምህርት ቢሮ የ2014 ዓ.ም የስምንተኛ ክፍል ክልላዊ ፈተና አሠጣጥን አስመልክቶ መግለጫ ሠጥቷል።

የአማራ ክልል ትምህርት ቢሮ ምክትል ኃላፊ ሙላው አበበ የስምንተኛ ክፍል ክልላዊ ፈተና ለመስጠት የቅድመ ዝግጅት ሥራ መጠናቀቁን ገልጸው ፈተናውም ከሰኔ 28 እስከ 30/2014 ዓ.ም ይሠጣል ብለዋል፡፡

በ2014 ዓ.ም የትምህርት ዘመን በመደበኛ፣ በማታ እና በግል የስምንተኛ ክፍል ትምህርታቸውን ለተከታተሉ ከ359 ሺሕ በላይ ተማሪዎች በ5 ሺሕ 395 ትምህርት ቤቶች ላይ ክልላዊ ፈተና እንደሚወስዱም ገልጸዋል።

ፈተናውን በተሳካ ሁኔታ ለማከናወን ከ10 ሺሕ በላይ መምህራን እንደሚሳተፉና የጸጥታ ችግር እንዳይከሰት የጸጥታ አካላት ዝግጅት ማድረጋቸውን ተናግረዋል።

ተማሪዎች ፈተናውን በተረጋጋ እና ሥነምግባር በተሞላበት ሁኔታ እንዲፈተኑ መምህራን፣ ወላጆች እና የጸጥታ አካላት ኃላፊነት አለባቸው ብለዋል።

በፈተና ወቅት ኩረጃ ሊያስከትል የሚችለውን ቅጣት በተዘጋጀው የፈተና ማስፈጸሚያ መመሪያ ላይ አብሮ የወረደ በመሆኑ ተማሪዎች ወደ ቅጣት እንዳይገቡ ጥንቃቄ ሊያደርጉ ይገባልም ነው ያሉት፡፡

የወላጅ መምህር ኅብረት አባላት ፈተናው ታሽጎ ፈተና ጣቢያው ላይ መድረሱን እና በተማሪዎች ፊት መከፈቱን ማረጋገጥ እንደሚገባቸውና የፈተና ጣቢያ ኃላፊዎች ኃላፊነታቸውን በአግባቡ እንዲወጡ ማሳሰቡን የአሚኮ ዘገባ ያመለክታል።

ለፈጣን መረጃዎች፦
ፌስቡክ https://bit.ly/3Ma7QTW

መንግሥት ሀገራዊ ምክክሩ እንዲሳካ አስፈላጊውን ድጋፍ ለማድረግ ዝግጁ ነው - ጠ/ሚ ዐቢይ አሕመድ

ሰኔ 27/2014 (ዋልታ) መንግሥት የሀገራዊ ምክክር ኮሚሽን ሥራ እንዲሳካ አስፈላጊውን ድጋፍ ለማድረግ ዝግጁ መሆኑን ጠቅላይ ሚኒስትር ዐቢይ አሕመድ (ዶ/ር) ተናገሩ።

የሀገራዊ ምክክር ኮሚሽን ባለፉት አራት ወራት ባከናወናቸው ሥራዎች ዙሪያ ከጠቅላይ ሚኒስትሩ ጋር መክሯል።

ሀገር እንድትረጋጋ እና ስርዓት ባለው መንገድ እንድትመራ እንዲሁም ሀገራዊ መግባባት እንዲፈጠር ትልቅ ትልም ይዞ እየተንቀሳቀሰ የሚገኘው ኮሚሽኑ ከተቋቋመበት ጊዜ አንስቶ የተሰጠውን ሀገራዊ ተልዕኮ ለመወጣት ጥሩ እንቅስቃሴ ላይ ይገኛል ብለዋል ጠቅላይ ሚኒስትሩ፡፡

መንግሥት በኮሚሽኑ ሥራ ጣልቃ የመግባት ፍላት የለውም ያሉ ሲሆን እንደማንኛውም የፖለቲካ ፓርቲ ተሳትፈን የውጤቱ ተካፋይ ለመሆን ነው ፍላጎታችን ብለዋል።

ስለሆነም ኮሚሽኑ የሚፈልገውን ድጋፍ ለማድረግ መንግሥት ቁርጠኛ ነው ሲሉ ገልፀዋል።

የሀገራዊ ምክክር ኮሚሽን ሰብሳቢ መስፍን አርዓያ (ፕ/ር) በዚህ ወቅት እንዳሉት ኮሚሽኑ ባለፉት አራት ወራት በእቅዱ መሠረት ተጨባጭ ሥራዎችን አከናውኗል፡፡

በዚህም ቀሪ ሥራዎችን እስከ መስከረም ድረስ በማጠናቀቅ የምክክር ሂደቱ በተያዘለት ጊዜ ለማካሄድ ዝግጅት ተጠናቋል ብለዋል።

በአስታርቃቸው ወልዴ

ለፈጣን መረጃዎች፦
ፌስቡክ https://bit.ly/3Ma7QTW
ቴሌግራም https://t.me/WALTATVEth
ዩቲዩብ https://www.youtube.com/c/WaltaTV/featured
ቲዊተር https://twitter.com/walta_info
አብራችሁን ስለሆናችሁ እናመሰግናለን!

የሸኔ ቡድን በምዕራብ ወለጋ በዜጎች ላይ አደጋ እያደረሰ በመሸሽ ላይ ነው - ጠ/ሚ ዐቢይ አሕመድ

ሰኔ 27/2014 (ዋልታ) የሸኔ ቡድን በምዕራብ ወለጋ በዜጎች ላይ አደጋ እያደረሰ በመሸሽ ላይ መሆኑን ጠቅላይ ሚኒስትር ዐቢይ አሕመድ (ዶ/ር) ተናገሩ።

ጠቅላይ ሚኒስትር ዐቢይ በማኅበራዊ ትስስር ገጻቸው ባሰፈሩት መልዕከት “የጸጥታ አካላት ከሚያደርሱበት ዱላ የፈረጠጠው የሸኔ ቡድን በምዕራብ ወለጋ በዜጎች ላይ አደጋ እያደረሰ በመሸሽ ላይ ነው” ብለዋል፡፡

በኦሮሚያ ክልል፣ ቄለም ወለጋ ውስጥ የሚገኙ ዜጎች ጭፍጨፋ ተፈጽሞባቸዋልም ነው ያሉት፡፡

“በዜጎቻችን ላይ በደረሰው መከራ እያዘንን ይሄንን አሸባሪ ቡድን እስከመጨረሻው ተከታትለን ከሕዝባችን ጋር እናስወግደዋለን” ሲሉም ገልጸዋል፡፡

ለፈጣን መረጃዎች፦
ፌስቡክ https://bit.ly/3Ma7QTW
ቴሌግራም https://t.me/WALTATVEth
ዩቲዩብ https://www.youtube.com/c/WaltaTV/featured
ቲዊተር https://twitter.com/walta_info
አብራችሁን ስለሆናችሁ እናመሰግናለን!

ምክር ቤቱ በምዕራብ ወለጋ በንጹሀን ዜጎች ላይ የደረሰውን ግድያ በፅኑ አወገዘ

ሰኔ 28/2014 (ዋልታ) የሕዝብ ተወካዮች ምክር ቤት አሽባሪው የሸኔ ቡድን በምዕራብ ወለጋ በንጹሀን ዜጎች ላይ ያደረሰውን አደጋ በፅኑ አወገዘ።

አሸባሪው የሸኔ ቡድን በጸጥታ ኃይሎች በከፍተኛ ሁኔታ ጥቃት እየደረሰበት በመሆኑ ከጥቃቱ በመሸሽም በምዕራብ ወለጋ ንጹሀን ዜጎች ላይ አደጋ ማድረሱን ጠቅሷል።

በኦሮሚያ ክልል፣ ቄለም ወለጋ ዞን ውስጥ የሚገኙ ንጹሀን ዜጎቻችን ላይ የፈጸመው ጭፍጨፋ በእጅጉ የሚወገዝ መሆኑን ምክር ቤቱ ገልጿል።

ከምክር ቤቱ ያገኘነው መረጃ እንዳመላከተው አሸባሪ ቡድኑን ለማስወገድ መላው ሁሉም ዜጋ በተለይም የአካባቢው ማኅበረሰብ ከጸጥታ ኃይሎች ጋር በመተባበር እስከመጨረሻው እንዲያስወግድ ጥሪ ቀርቧል፡፡

አሰልጣኝ ውበቱ አባተ ለ23 ተጫዋቾች ጥሪ አቀረቡ

ሰኔ 28/2014 (ዋልታ) በሀገር ውስጥ ሊግ በሚጫወቱ ተጫዋቾች የሚዋቀሩ ብሔራዊ ቡድኖች መካከል ለሚካሄደው የአፍሪካ ሀገራት ዋንጫ ውድድር ማጣርያ አሰልጣኝ ውበቱ አባተ ለ23 ተጫዋቾች ጥሪ አደረጉ።

ከደቡብ ሱዳን ጋር የቻን ማጣሪያ የሚጠብቀው የኢትዮጵያ ብሔራዊ ቡድን ስብስቡን ይፋ አድርጓል።

በአልጄሪያ አስተናጋጅነት ለሚከናወነው የቻን የአፍሪካ አገራት ዋንጫ የኢትዮጵያ ብሔራዊ ቡድን ከደቡብ ሱዳን ጋር የቅድመ ማጣሪያ ጨዋታ እንደሚጠብቀው ይታወቃል።

ሐምሌ 15 እና 24 ቀን 2014 ዓ.ም ለሚደረጉት እነዚህ ሁለት ጨዋታዎች የዋልያዎቹ አሰልጣኝ ውበቱ አባተ ለ23 ተጨዋቾች ጥሪ ማድረጋቸውን የኢትዮጵያ እግር ኳስ ፌዴሬሽን ይፋ አድርጓል፡፡

ግብ ጠባቂዎች ፋሲል ገብረሚካኤል፣ በረከት አማረ እና አላዛር ማርቆስ ጥሪ እንደተደረገላቸው ከእግር ኳስ ፌዴሬሽን ያገኘነው መረጃ አመላክቷል፡፡

ከተከላካዮችም ሱሌይማን ሀሚድ፣ ሄኖክ አዱኛ፣ ምኞት ደበበ፣ ያሬድ ባየህ፣ ሚሊዮን ሰለሞን፣ አስራት ቱንጆ፣ ረመዳን የሱፍ እና ጊት ጋትኩት በጥው ተካተዋል፡፡

ጥሪ የተደረገላቸው አማካዮች ጋቶች ፓኖም፣ከነዓን ማርክነህ፣ ሱራፌል ዳኛቸው፣፣በዛብህ መለዮ፣ በረከት ደስታ፣ አማኑኤል ዮሐንስ እና መስዑድ መሐመድ ናቸው፡፡

አጥቂዎች ደግሞ ቸርነት ጉግሳ፣ አማኑኤል ገብረሚካኤል፣ ዳዋ ሆቴሳ እና ብሩክ በየነ መሆናቸውን ተነግሯል፡፡

ጥሪ የተደረገላቸው ተጫዋቾችም ሐምሌ 4 ቀን 2014 ዓ.ም በፌዴሬሽኑ ጽሕፈት ቤት ተገኝተው ሪፖርት እንዲያደርጉ ጥር ቀርቧል፡፡

ጨፌው አሸባሪው ሸኔን ለመደምሰስ እየተወሰደ ያለው እርምጃ ተጠናክሮ ይቀጥላል አለ

ሰኔ 28/2014 (ዋልታ) የኦሮሚያ ክልል መንግሥት አሸባሪው ሸኔን ለመደምሰስ እየወሰደ ያለውን እርምጃ አጠናክሮ እንሚቀጥል ጨፌ ኦሮሚያ አስታወቀ።

አሸባሪው ሸኔ በቄለም ወለጋ ሐዋ ገላን ወረዳ በንፁኃን ላይ ባደረሰው አሰቃቂ ጭፍጨፋ ከፍተኛ ሀዘን የተሰማው መሆኑን ጨፌው ባወጣው መግለጫ አስታውቋል።

የሽብር ቡድኑ መንግሥት የሕዝቡን ሰላም ለማስጠበቅ ሲል እየወሰደበት ያለውን የተቀናጀ እርምጃ መቋቋም ሲያቅተው በሰላማዊ ዜጎች ላይ አሰቃቂ ጭፍጨፋ እየፈፀመ ነው ብሏል።

ሕዝብ ከዚህ አደጋ፣ ስቃይ እና እንግልት ለማዳን መንግሥት እየወሰደ ያለውን እርምጃ አጠናክሮ መቀጠሉን ገልጾ፣ በዚህ መንግሥት እየወሰደ ባለው እርምጃ በደረሰበት ሽንፈት ተቆርጠው የቀሩ የሽብር ቡድኑ አባላት በሕዝብ ላይ በድንገት አሰቃቂ አደጋዎችን እያደረሱ ነው ብሏል።

በመሆኑም ኅብረተሰቡ ከፀጥታ አካላት ጋር በመቀናጀት የአካባቢውን ሰላም መጠበቅ እና ማረጋገጥ እንደሚጠበቅበት እንዲሁም ተንጠባጥበው የቀሩ የአሸባሪው ሸኔ አባላት ላይ የማያዳግም እርምጃ ሊወስድባቸው እንዲገባም ጨፌው ጥሪ ማቅረቡን ኢብኮ ዘግቧል።

ጨፌ ኦሮሚያ አሸባሪው ሸኔ በንፁሃን ዜጎች ላይ ባደረሰው አሰቃቂ ጭፍጨፋ ሕይወታቸውን ላጡ ዜጎች ሀዘኑን ገልጾ ለሟቾች ቤተሰቦች እና ዘመዶቻቸው እንዲሁም ለመላው ሕዝብ መፅናናትን ተመኝቷል።

ጠ/ሚ ዐቢይ በ39ኛው የኢጋድ ልዩ የመሪዎች ጉባኤ ላይ ለመሳተፍ ናይሮቢ ገቡ

ሰኔ 28/2014 (ዋልታ) ጠቅላይ ሚኒስትር ዐቢይ አሕመድ (ዶ/ር) በ39ኛው የምሥራቅ አፍሪካ የልማት በይነ መንግሥታት (ኢጋድ) ልዩ የመሪዎች ጉባኤ ላይ ለመሳተፍ የኬንያ መዲና ናይሮቢ መግባታቸውን የጠቅላይ ሚኒስትር ጽ/ቤት አስታወቀ።

ዛሬ በሚጀመረው የመሪዎች አስቸኳይ ስብሰባ በጉባኤው መሪዎቹ በአካባቢው የሚከሰተውን ድርቅ ማሸነፍ በሚቻልበት ሁኔታ፣ በሰላም እና ፀጥታ ጉዳዮች ላይ ይወያያሉ ተብሎ ይጠበቃል።

ለፈጣን መረጃዎች፦
ፌስቡክ https://bit.ly/3Ma7QTW
ቴሌግራም https://t.me/WALTATVEth
ዩቲዩብ https://www.youtube.com/c/WaltaTV/featured
ቲዊተር https://twitter.com/walta_info
አብራችሁን ስለሆናችሁ እናመሰግናለን!

የአማራ ክልል መንግሥት በቄለም ወለጋ በሚኖሩ ንጹሃን ዜጎች ላይ በደረሰው ጭፍጨፋ የተሰማውን ጥልቅ ሀዘን ገለጸ

ሰኔ 28/2014 (ዋልታ) የአማራ ክልል መንግሥት በኦሮሚያ ክልል ቄለም ወለጋ ውስጥ በሚኖሩ ንጹሃን ዜጎች ላይ በደረሰው ጭፍጨፋ የተሰማውን ጥልቅ ሀዘን ገለጸ።

የክልሉ መንግሥት ኮሙዩኒኬሽን ቢሮ ኃላፊ ግዛቸው ሙሉነህ በሰጡት መግለጫ አሸባሪው የሸኔ ቡድን ዛሬም ሰላምን በሚሻው ንጹሃን ሕዝብ ላይ የሞት ጽዋን የሚያዘንብ የጥፋት መልአክ ሆኗል ብለዋል።

የጥቃቱ ሰለባ የሆኑ ወገኖች ሰላምን በማይሹ የሀገርና የሕዝብ ጠላቶች እንዲህ የመጠቃታቸው ብቸኛው ግብ ኢትዮጵያንና ኢትዮጵያዊነትን ለማንበርከክ አልመው መሆኑን ገልጸዋል።

በኦሮሚያ ክልል ቄለም ወለጋ ውስጥ በሚኖሩ ንጹሃን ዜጎች ላይ በደረሰው ጭፍጨፋ ለመላው ሕዝብ መጽናናትን ተመኝተዋል።

ዛሬም ሆነ ነገ የዚህ ችግር ብቸኛው መፍትሔ የሕዝባዊ አንድነት ጠላት እና በጋራ ሰርቶ የማደግ ደመኛ የሆኑ ፀረ ኢትዮጵያና ኢትዮጵያዊነት የሆኑ ሁሉንም ኃይላት ያለ ምንም ቅድመ ሁኔታ እንደ ሕዝብ በአንድነት ታግሎ ማሸነፍ ሲቻል ብቻ መሆኑን አመላክተዋል።

ይህን መሰል ጥቃቶችን በመፈጸም መሪር ሀዘን ላይ የሚጥሉ ጠላቶቻች ታግሎ ለማሸነፍና ለዚህ ጉዳይ ከሥሩ መፍትሔ ለመፈለግ ደግሞ ሁሉም ኢትዮጵያዊ በአንድ ድምጽ ይህን ድርጊት በመቃወም የመፍትሔው አካል ሊሆን ይገባል ማለታቸውን የክልሉ ኮሙዩኒኬሽን ቢሮ መረጃ ያመላክታል፡፡

ኢትዮጵያና ሱዳን ችግሮቻቸውን በሰላማዊ መንገድ ለመፍታት ተስማሙ

ሰኔ 28/2014 (ዋልታ) ጠቅላይ ሚኒስትር ዐቢይ አሕመድ (ዶ/ር) እና የሱዳን ሉዓላዊ ሽግግር ምክር ቤት ፕሬዝዳንት ጄኔራል አብደል ፈታህ አል-ቡሁራን በሁለቱ ሀገራት መካከል ያልተፈቱ ችግሮችን በሰላማዊ መንገድ ለመፍታት ተስማሙ፡፡

ሁለቱ መሪዎች በሁለቱ ሀገራት የሁለትዮሽ እና ቀጣናዊ ጉዳዮች ላይ በናይሮቢ እየተካሄደ ካለው 39ኛው የኢጋድ ልዩ የመሪዎች ጉባኤ ጎን ለጎን ተገናኝተው መምከራቸውን የጠቅላይ ሚኒስትር ጽሕፈት ቤት አስታውቋል።

በውይይቱ ሁለቱ ሀገራት በሰላማዊ መንገድ ሊሠሩባቸው የሚችሉ በርካታ የትብብር መሠረቶች እንዳሏቸው ተጠቅሷል።

ጠቅላይ ሚኒስትር ዐቢይ አሕመድ የሀገራቱ ትሥሥር ከየትኛውም መከፋፈል የሚበልጥ ነው ብለዋል።

"ሁለታችንም ያልተፈቱ ቀዳሚ ጉዳዮችን በሰላማዊ መንገድ በውይይት ለመፍታት ቁርጠኝነታችንን ገልጸናል" ሲሉም በማኅበራዊ ትስስር ገጻቸው አስፍረዋል፡፡

ኢትዮጵያ ከሱዳን ወንድም ሕዝብ ጋር በትብብር ለመልማትና በሰላም ለመኖር ፅኑ አቋም እንዳላትም አረጋግጠዋል።

የሱዳን የሽግግር መንግሥት ሉዓላዊ ምክር ቤት ሊቀመንበር ሌተናል ጀኔራል አብዱልፈታህ አል ቡርሃን በበኩላቸው ከጠቅላይ ሚኒስትር ዐቢይ ጋር እንደ ወንድም በመወያየት በሀገራቱ መካከል ያሉ አለመግባባቶችን በሰላማዊ መንገድ ለመፍታት ተስማምተናል ነው ያሉት።

ኢትዮጵያና ሱዳን ጠንካራ መሰረት ያለውና የቆየ ወዳጅነት ያላቸው እህትማማች ሀገራት ናቸው ያሉት አልቡርሃን ከግጭት ምንም አናተርፍም ብለዋል።

https://www.facebook.com/489211707826282/posts/pfbid0YvCKNBHeE7EVnW8mRu6P4g6roEELD9q2qYzo489eY5eHRr2ewCU56zsisoMSmbNql/

ምክትል ጠ/ሚ ደመቀ ተጨማሪ ጥቃትና ጭፍጨፋ እንዳይከሰት የሚሊሻ እና የኮሙኒቲ ፖሊሲንግ ስርዓት ተጠናክሮ እንዲቀጥል ይደረጋል አሉ

ሰኔ 28/2014 (ዋልታ) በወገኖቻችን ላይ ተጨማሪ ጥቃትና ጭፍጨፋ እንዳይከሰት በሁሉም አካባቢዎች ተጋላጭ ቀበሌዎች እና መንደሮችን በመለየት አስፈላጊው ጥበቃ እንዲደረግላቸው እንዲሁም ነዋሪው ራሱን በተደራጀ መልኩ እንዲከላከል የሚሊሻ እና የኮሙኒቲ ፖሊሲንግ ስርዓት ተጠናክሮ እንዲቀጥል ይደረጋል ሲሉ ምክትል ጠቅላይ ሚኒስትርና የውጭ ጉዳይ ሚኒስትር ደመቀ መኮንን ገለጹ፡፡

በወለጋ አካባቢ አሁንም አሸባሪው የሸኔ ቡድን በንፁሃን ወገኖቻችን ላይ አሳዛኝ ጭፍጨፋ ማካሄዱን ገልጸው፤ “ጥቃቱ የአማራ ብሄር ተወላጆችን ዒላማ ያደረገና ተጠቂዎችን ለመከላከል ሙከራ ባደረጉ የኦሮሞ ተወላጆች ላይ ጭምር ያነጣጠረ ነው” ብለዋል።

ይህ ቡድን ህፃናትን፣ እናቶችን እና ደካማ አረጋውያንን ለይቶ ተደጋጋሚ ጥፋት በመፈፀም ሀገር የማፍረስ ግልፅ ተልዕኮ ያነገበ የተስፋ ቢሶች ጥርቅም መሆኑን በተግባር አረጋግጧል ሲሉ ሚኒስትሩ በማኅበራዊ ትስስር ገጻቸው አስፍረዋል።

መንግሥት በመላው ሀገሪቱ በተለይም ተደጋጋሚ ጥቃት በሚፈፀምባቸው አካባቢዎች ህግ ለማስከበር፣ ሰላም እና ፀጥታ ለማስፈን እንዲሁም ዜጎች የተረጋጋ ህይወት እንዲመሩ ለማስቻል ጠንካራ ርብርብ እያደረገ ቢሆንም፤ አሁንም በተለያዩ አካባቢዎች አሸባሪ ቡድኑ በንፁሃን ዜጎች ላይ ያነጣጠረ ጥፋት ...
https://www.facebook.com/489211707826282/posts/pfbid02XTtEwG6NFdY3LvKTWPzDTB4Wbkx3GhbYwHRacqnUSya3pnxKzpLLJ3VFmZXWdyT8l/