« سكتنا وإستحينا والحيا ماصار له مردود
قليّلين الحياء لو إستحينا ما استحوا منا »

« ايه يا أول من بنى بيته على خفاقي
مانت باللي مرّ في عمري وأخذ له لفه

وانت حلمٍ لو كسرته كني اكسر ساقي
مثل حلم القدس في رام الله وفي الضفه

انكسرت من الفراق وحزن قلبي راقي
والشجاع ان حب تاخذ بندقه من كفه »

يكفيني رحلت ولا حصل مني خطأ وقصور
وانا حتى وداعي فيه بصمه تثبت اخلاقي .

ماقدر وجيهنا وجه الزمان الشحوب / وجّهه علينا الفلاش وحطنا محتوى .

« على شان الصداقة وانت مالك في رقبتي دين
سعيت لحاجتك وانا ادري ان ماهيب مكتوبه

تعرف ان قدرتي تشغلك العالم على بيتين
تهيض خاطر اللي يحسب انها وجهت صوبه

ماهيب القدرة اللي ترجع الموتى مع الحيين
لكنها تقدر ترد الحبيب لـ قلب محبوبه »

يازين فنجال الضحى من عقب شوط من الهداد
باطراف روض وسطها اصناف الشجر متداخله

عرفج ورمث وشيح وشنان وشرايد من كداد
ذا شوف عيني دجت به مهوب قول مقوله

قاعً تنسيك المدينه والمشاغل والنكاد
لو طبها محمد ولد عبده يغني مذهله .

يشوف الغلا فـ عيونك الناعسات الحور
مثل من يشوف الموت في عيون ذباحه

يبين لك انه هادي وخاطره مسرور
وهو والله انه يزعجه صوت مسباحه

شجاعٍ حذف لك بندقه والرصاص يثور
ولا تذبحينه عقب ماسلم أسلاحه

وعلى كل كسرة خاطر وكل جرح شعور
تمونين وقلوب المحبين دماحه .

وإن عذربوك الاوادم خل صدرك وسيع
ماعذرب عناقيد العنب غير الذي ماطالها .

اوقف وأتباهىء لا دعتني ساعة الميقاف
حسب مبدأ الثقه ماني ب متغطرس ومتعالي

ماعفت الطلوع إلا طلوع الي على الاكتاف
وا أحب النزول إلا النزول ل رغبة الغالي

وانا يا فاتنة نجد العذيه ما علي اخلاف
لا قفيتي على فال الغلا وأنا على فالي

بدايه كل ثورة كبرياء من نظرة استعطاف
وش اسوي وانا راسي عزيز وقلبي اموالي

دفعنا بـ المشاعر كلها في حرب الاستنزاف
ما باقي غير يفصل في ألامور ويلحق التالي .

رعاك الله يابيت ليا مني بغيت اجيه
توقفني تقاليد القبايل دون بيبانك .

«السنين تركد اللي كان طايش وانتحاري
خلت اللي فوق ألارض يعيش ذنب الي تحتها»

« مافيه داعي التفت وادورك بين الجموع
من لذة الطعنة عرفت إيدك وانا ماشفتها»