ده نفس الباور اللي بعته فوق بس ضفت عليه اسئلة تاني في الفصل الخامس الجزء الثاني والجزء التالت من المحاضرة

دي امتحانات سابقة تبع كليتنا
شوفوا كده الحل ولو حد شايف حاجة غلط يكتبها :

تعديلات :
سؤال رقم ٢ هتكون غلط لان حاسة التذوق بتتكون في الرحم قبل الولادة

رقم ٤ هتكون غلط لان مرحلة الكلمة الواحدة بتبدا من سنتين (جوجل)

رقم ١٠ هتكون صح (جوجل برضك)

٣ يا جماعة غلط
دي موجودة في صفحة ١٠٧ الطفولة المتوسطة والمتاخرة

دي غلط مش صح التنفس بيقل مع تقدم عمر الطفل

🧤 إعادة التدوير 🌨️
النهاردة أول مقال إن شاء الله.
8:01 PM

🤎 خطط ونوايا 💖

قبل التوغل في أدغال سنة قابلة، ننظر إلى منهج التفسير النفسي من واقع استقراء خافت لينبثق من.....

-ثواني بس أتكلم عادي عشان مش فاهم بقول ايه-

من الأول، إن شاء الله قبل ما ندخل سنة رابعة نكون خلصنا 3 حاجات. خلينا نسميهم
"ثلاثية البدء" شارحة نفسها اهي.
ثلاثية عشان عشان عددهم تلاتة،
البدء عشان هنبدأ بيهم إن شاء الله.

1) إعادة التدوير.
2) سلسلة الشيطان شاطر. ( سبب 70% من مشاكلنا في الدنيا )
3) Top Twenty.
( بعض التحسينات والتطويرات إن شاء الله ، عايزين صورة حية عن التعاون والإيجابية)

💖🤎💖🤎💖🤎💖🤎💖🤎💖🤎💖🤎

1) 🧤 إعادة التدوير 🌨️
لو نفتكر الترم اللي فات من سنة تالتة إزاي البوت اللي خدناه من طلاب سنة رابعة فادنا جداً.
وهنا نتعلم نستفيد من تجارب السابقين.
فكل اللي عايزينه إننا نشوف حد من سنة رابعة اللي خلصوا وناخد منهم الجروبات والتلخيصات والامتحانات والأسئلة اللي عملوها وكل حاجة. بس كدا خلصنا.

= وعمال تقولي مقال ، والساعة ٨ ودقيقة. خلص بالسرعة دي ؟
- اه اومال انتو فاكرين ده ايه ؟ مقال !

= عشان كدا يعني اسمها إعادة التدوير ؟ بنستخدم الحاجات تاني ؟

اسمها إعادة التدوير عشان حاولت أجيب الحاجات دي بس بتوع سنة رابعة مردوش عليا برد مفيد.
فاحنا محتاجين حد يدور على الحاجات دي تاني.
يعيد التدوير. عشان كدا اسمها إعادة التدوير 💁.
شارحة نفسها اهي. إعادة عشان بندور. التدوير عشان بنعمل إعادة.

فياريت لو حد قدر يوصل للجروبات دي يبعتها عشان ننشرها.

لحد دلوقتي جبنا منهم الكتب بس. وده إن شاء الله هيخلينا نصورهم علطول مش نستنى الكتب تنزل بالسلامة على آخر الترم.

وبكدا نكون النهاردة اتكلمنا عن
🧤 إعادة التدوير 🌨️

استعد نفسياً لسنة رابعة 💛
وعشان تعرف ازاي تابع المقالات القادمة إن شاء الله 🧡

😈 سلسلة الشيطان شاطر 😈

🥇 الحلقة الأولى 🌑
"أهمية السلسلة"

يقول الله سبحانه وتعالى {يَا أَيُّهَا النَّاسُ إِنَّ وَعْدَ اللَّهِ حَقٌّ فَلَا تَغُرَّنَّكُمُ الْحَيَاةُ الدُّنْيَا وَلَا يَغُرَّنَّكُم بِاللَّهِ الْغَرُورُ(٥)إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوًّا إِنَّمَا يَدْعُو حِزْبَهُ لِيَكُونُوا مِنْ أَصْحَابِ السَّعِيرِ(٦)}

وهنا نلاحظ إن الشيطان عدو للناس كلها
مؤمنين، كافرين، مطيعين، عاصين....
لكن الأغرب من كده إن في ناس كتير جدا مش بتتخذ الشيطان عدو رغم إنهم عارفين إن هو عدوهم. عشان كده كان تأكيد في الآية الكريمة (فاتخذوه عدوًا).

العداوة بين الشيطان والإنسان ممتدة على مدار العمر. والشيطان مش هيسيب الإنسان غير لما يموت.

أساليب الشيطان أساليب شيطانية، محترفة، دقيقة جداً.
الشيطان تحس إنه معاه كتاب لكل فرد، عارف إزاي يتعامل معاه خطوة بخطوة. عنده الخطة الأولى، لو منفعتش بيروح للتانية، لو ما نفعتش يروح للتالتة، عنده خطط كتير ومنظم.

🙇 الواد ده كان نفسه في حاجة جداً هيموت عليها لكن للأسف متحققتش. الشيطان هنا يبدأ يفكره كل شوية بالحاجة دي ويهجم عليه بالأفكار السلبية، ويقوله أنت ملكش حظ في الدنيا، ملكش نصيب، وملكش لازمة، وملكش عازة أصلاً.

👧 البنت دي حصل لها مشكلة زمان لخبطت حياتها، مع مرور الوقت الشيطان بيبدأ يفكرها كل شوية بالمشكلة، فاكرة المشكلة اللي حصلت زمان؟ فاكرة لما فشلتي؟ أنتِ مش هتنجحي في حاجة أبدًا، أنتِ فاشلة، مع أول صعوبة واجهتك فشلتي، كل النجاحات اللي كانت قبل كده كانت وهم، كانت بالحظ، لكن لما واجهتك صعوبة حقيقية فشلتي. عارفة ليه؟ عشان دي طبيعتك أنتِ فاشلة أصلاً، وملكيش عازة برضو زي الواد اللي فوق ده.

لكن رغم كل التخطيط والتنظيم يبقى كيد الشيطان ضعيف؛ لأن في النهاية إحنا اللي بنحدد إذا كان خطته هتنجح ولا لأ.  في النهاية إحنا اللي بنفذ أو بنرفض. 

⁉️ هنستفاد ايه لما نتكلم عن الشيطان وإحنا داخلين سنة دراسية؟ هو عشان الشيطان شاطر هنذاكر معاه؟

🧐 في نظرية بتقول إن عشان تنجح في حاجة لازم يتوفر عندك تلات حاجات:
1) الروح.
2) العقل.
3) الجسم.

محتاج حد أدنى فيهم مش شرط تبقى خارق في كل حاجة منهم عشان تعمل اللي بتعمله.

في السلسلة دي إن شاء الله هتركز على رقم 1) الروح. (الحالة النفسية).

أما بالنسبة لرقم 2) العقل. (الطريقة) فاحنا تكلمنا عن طريقة المذاكرة في سلسلة نصائح سعيدة.

أما رقم 3) الجسم: العب شوية رياضة ونام كويس واتغذى وكدا.

وزي ما عرفنا إن النفسية ليها علاقة بالنجاح، فلو جبنا واحد عبقرينو،  وجسمه كويس. لكنه فاقد التحفيز والأمل، فاقد معنى الحياة. بيسأل نفسه أنا عايش ليه؟ لماذا نحن هنا؟
في الغالب مش هيأدي ومش هيستخدم قدراته.

وكذلك لو جبنا حد متحفز جداً جداً وروحه المعنوية عالية جداً، لكنه لا يملك الطريقة (العقل)، فإن الحماسة وحدها لا تكفي، هيواجه صعوبات هتسحب عزيمته واحدة واحدة.

هي دورة،
الروح بتغذي العقل والجسد.
والعقل بيغذي الروح والجسد.
والجسد بيغذي الروح والعقل.

والروح بالذات بتغذي العقل وبتغذي الجسد لو كان فيهم نقص، فلو واحد روحه ونفسيته عالية وعنده مشكلة في الطريقة اللي بينفذ بيها الأعمال، هيبدأ يدور على الطريقة دي لحد ما يلاقيها، ولو عنده مشكلة جسدية، هيبدأ يشوف طريقة تانية عشان يتغلب عليها، ده كله نابع من الروح اللي هي الحالة النفسية يعني.

وهنا إحنا طبعاً بنتكلم عن المذاكرة لكن طبعاً أنت محتاج تطبق المعلومات دي في أبسط تفاصيل حياتك؛ عشان الشيطان بيطبق ضدها معاك من أول ما تصحى من النوم لحد ما ترجع تنام تاني واحتمال  في الأحلام.

معرفتك لهذه الأساليب الشيطانية الخبيثة خالص، هتوفر عليك جداً، ولكن الأهم من المعرفة، التطبيق والإدراك.
بإذن الله 70% من مشاكلك هتتحل لما تعرف الأساليب دي وتاخذ بالك منها.

والأساليب هي "دوامة الشيطان"
يُتبع...

😈 سلسلة الشيطان شاطر 😈

💥 الحلقة الثانية ❄️ 
"دوامة الشيطان"

كان في أستاذ معاه تلاميذ شاطرين جداً، لكن في سنة معينة، درجاتهم كانت أقل بكتير من المعتاد. بدأ الأستاذ يشك ويبحث عن السبب، فوجد أن المشكلة نفسية. اكتشف أن بعض الطلاب كانوا عايشين في الماضي، مشغولين بذكريات الفشل والإخفاقات، والبعض الآخر كان عايش في المستقبل، خايفين من المجهول.

الطلاب كانوا عايشين في الماضي أو في المستقبل، مكانوش عايشين في الحاضر. الأستاذ عطاهم دروس عن أساليب الشيطان وألاعيبه، وتحسنت حالتهم بشكل كبير. واحد من الطلاب كان في حالة سيئة لدرجة أنه قال "أنا مش لاقي معنى لحياتي"، لكن بعد الدروس قال "أنا حاسس إني كنت أعمى، ودلوقتي بقيت قادر أشوف".

في السلسلة دي، هنحاول نلخص الأساليب، لكن حاول تتوسع وتسمع قصص كتير؛ لأن القصص بتغير التفكير. الشيطان بيستخدم الأساليب دي في كل القصص، وفي ناس مشاكلنا بالنسبالهم ترفيه وقدروا يتغلبوا عليها بفضل الله وبأخذهم بالأسباب.

الأستاذ قرر يسمي كل أسلوب باسم عشان يساعد الطلاب إنهم يفتكروه. سمي الأساليب كلها "دوامة الشيطان". لما حد يقول إنه دخل في دوامة ومش معاه عوامة، هنا بيقصد "دوامة الشيطان".

🏁 لما تبدأ تعمل حاجة مفيدة، الشيطان بيبدأ باستخدام الدوامة خطوة بخطوة. الدوامة بتتكون من خمس خطوات:
1️⃣ الصدمة.
2️⃣ دروع الظلام.
3️⃣ مصيدة التشتت (التشويش والانشغال بدون إنجاز).
4️⃣ عصا الصياد النارية.
5️⃣ نقطة الصفر.

1️⃣ خلينا نتكلم عن أول وأخطر خطوة؛ لأن فيها أكبر خدعة عملها الشيطان. أكبر خدعة هي إقناع الناس بأنه غير موجود.

يُتبع.

والله عنده وجهة نظر برضو 😂😂

😈 سلسلة الشيطان شاطر 😈

💝 الحلقة الثالثة 💝
"الصدمة"

أول الأساليب اللي الشيطان بيستخدمها معانا لما ننوي نعمل حاجة مفيدة، هي الصدمة.

زي ما اتفقنا، الأساليب دي بيستخدمها في كل الحاجات المفيدة اللي بننوي نعملها. إحنا هنتكلم عن المذاكرة كمثال، وأنت طبق المثال ده على باقي الحاجات المفيدة اللي بتعملها.

دلوقتي إحنا رايحين نذاكر، نفذنا شوية النصايح اللي قلنا عليهم في سلسلة نصائح سعيدة. كدا العقل (الطريقة) ✅.
تقعد تذاكر أي مادة، تلاقي الشيطان بيذاكر جنبك، جايب كتاب اسمه "الصدمة".

الكتاب متقسم لـ 3 فصول، كلهم أفكار سلبية عشان يمنعنا عن الحاجة المفيدة.
دماغك لو شغالة، جسمك هيشتغل. لكن لو دماغك شغالة أكتر من اللازم (تفكير مفرط)، جسمك هيقف. وبالتالي، أحد الطرق للتخلص من التفكير المفرط هي الحركة، لما نتحرك، عقلنا بيوقف تفكير.
ودي حركة كان بيعملها أحد متحدثي التنمية البشرية قبل ما يطلع على المسرح، كان بيحس إنه هيموت من الخوف بالرغم إنه مشهور جداً، والساعة بتاعته كانت بتوصل لعشر آلاف دولار. فكان بيلعب ضغط لحد ما دراعه يتعب، وبالتالي مش هيقدر يفكر غير في الحاضر.

📕 كتاب "الصدمة"
1️⃣ الفصل الأول: النفس.
2️⃣ الفصل الثاني: البيئة.
3️⃣ الفصل الثالث: المهمة.

📝 الفصل الأول: النفس
نبدأ نذاكر، يجيبلنا كل الأفكار السلبية عن نفسنا:
(أنا + جملة سلبية).

☣️ وهنا أكبر خدعة عملها الشيطان، هو مش بيقول لك "أنت وحش". لا، بيقول "أنا وحش"، بحيث نعتقد إن الصوت بيمثلنا إحنا. لأن لو حد قالك "أنت وحش"، مهما كان، هتاخد موقف دفاعي وهترد عليه، لكن لما تقول لنفسك "أنا وحش"، فمش هترد على نفسك، بالعكس هتصدقها مع التكرار، حتى لو أنت أفضل واحد.

فلازم تميز الصوت اللي جواك، هو عايزلك الخير ولا الشر. لو كان عايزلك الخير يبقى ده فعلاً ضميرك، لو كان عايزلك الشر يبقى ده الشيطان.
خد بالك إن الشيطان هيحاول يخليك مش عارف انهي صوت نفسك وانهي صوت هو، لأنه بيتكلم باسمك.
فلازم تفصل اسمه عن اسمك وتديه اسم، عشان لما يتكلم، تقوله "بس يا ...."، وتاخد الكلام اللي جاي منه وتحلله.

لكن لو ظنيت إن الكلام ده نابع منك أنت، فمش هتحلله.

أمثلة على الفصل الأول:
😢 أنا ذاكرتي ضعيفة.
😢 أنا هذاكر وهنسى.
😢 أنا مليش في الفهم.
😢 أنا مفيش فايدة مني.
😢 أنا حاولت كتير قبل كده، بس مفيش ولا مرة قدرت أنجح.
😢 أنا المذاكرة بالنسبة لي عقدة.
😢 أنا، أنا، أنا... وهكذا.

كل "أنا" وراها حاجات سلبية كتيرة، ده لما يكلمك أنت عن نفسك. لكن لما هو تكلم عن نفسه، قال: "أنا خير منه".

وهنا ناخد بالنا، هو مش غبي عشان يجيبلك حاجات محصلتش. هو هيجيبلك حاجات حصلت بالفعل، بس هنا المفروض نقف مع نفسنا ونحلل الكلام، إحنا فشلنا في الماضي، بس الفشل ده كان نتيجة إيه؟ ممكن مكنش عندنا الطريقة أصلاً اللي نعمل بها الحاجة اللي كنا بنعملها. ممكن تكون ظروف خارجة عن إرادتنا، وهكذا. منجيبش كل العيوب على نفسنا ونفضل نجلد في نفسنا.

نشوف المشكلة فين، ونشوف الحل بتاعها وانتهى الأمر.

📝 الفصل الثاني: البيئة
أفكار سلبية عن البيئة اللي حوالينا:

🏜 المكان ده محدش هيعرف يذاكر فيه.
🏜️ بلدنا دي محدش بينجح فيها.
🏜️ اللي بيدرسوا لينا مش بيعرفوا يشرحوا.

🏜️ نظام الدراسة  مصعب علينا كل الأمور، حتى البسيطة منها.
🏜️ البيت مش مساعدني.
🏜️ السكن مش مساعدني.

🏜️ الأوضة مش مساعداني.
🏜️ القلم مش مساعدني.
🏜️ الكتاب مش مساعدني.

برضو ناخد الكلام ونحلله. إحنا مش بننفي المشاكل، وبنقول إننا عايشين في الجنة. لأ، في مشاكل فعلاً. بس طالما إحنا عرفنا إن في داء، ندور على الدواء بقا. وجود الداء قدر، ووجود الدواء برضو قدر. وفي عسر فعلاً، بس برضو في يسر. "(إن مع العسر يسراً)". هنصدق ربنا بقا ولا نخدع نفسنا؟ مفيش حل، مفيش فايدة؟

نحاول ونجرب ونسأل، ونفشل ونقع مرة واتنين وألف عادي. وبإذن الله نوصل.

📝 الفصل الثالث: المهمة
أفكار سلبية عن المهمة اللي بنعملها:

🦎 أصلاً المذاكرة ملهاش لازمة.
🦎 هم اللي ذاكروا خدوا إيه؟
🦎 مش كده كده في ناس بتغش، وأنا هتعب نفسي على الفاضي وفي الآخر هيجيبوا أكتر مني.

🦎 أصلاً ده علم لا ينفع.
🦎 المادة أصلاً معقدة، واللي حطينها مش فاهمينها أصلاً، عايزين يبينوا شطارتهم علينا وخلاص... وهكذا.

لو فاكرين إن محدش بيكتب عننا فالشيطان كاتب عننا كتاب كامل اسمه الصدمة، بس كله سلبي عشان متخذنا أعداء.

طب أنا بفضل الله عملت حاجات كتير حلوة أي نعم فشلت بس نجحت كتير. أنا حياتي فيها .... وفيها ..... وفيها .....
كل دي حاجات حلوة موجودة في حياتنا.
بس لأ، يخلينا نشوف الجانب المظلم بس ونركز عليه.
طب والنعم اللي إحنا فيها؟
لا لا سيبك منها خالص وركز على السلبي بس.

لو استمعنا للأفكار دي ومبدأناش، في الغالب هنقفل الكتاب ونروح نعمل حاجة تاني وفي الغالب برضو الحاجة دي هي النوم.

لكن لو صبرنا وتحملنا وسامحنا نفسنا. وبعدنا الأفكار السلبية. وقلنا مش مهم، اللي فات مات ومش هنقدر نغير الماضي لكن ممكن نتوكل على الله ونبدأ دلوقتي، النهاية هتكون سعيدة باذن الله.

😔 منتصرناش؟
عادي ايه المشكلة، دا حتى خير الخلق كلهم ﷺ منتصرش في كل غزواته، وكان قدوة في الصبر والتوكل حتى في المواقف الصعبة، والدنيا كدا، مش جنة.

♦️ اسأل نفسك سؤال بسيط جداً هل أنا كنت قاصد أفشل؟ الإجابة من غير تفكير لأ. خلاص بتلوم نفسك على ايه؟ ما أنت مش قصدك. هتخترق الواقع يعني ولا ايه؟

لو عدينا الصدمة هيبدأ الشيطان في تاني خطوة من الدوامة واللي هي دورع الظلام.

يُتبع.