رابعة تمريض

🤍 سلسلة نصائح سعيدة 🤍

الحلقة الأخيرة:
"لمسات"

س1) بكون بادية السنة كويس خالص، بس بعدين في أيام الامتحانات طاقتي بتقل بشكل كبير وده بيأثر على النتيجة، في حل؟

ج1) التنظيم. كل ما كنا منظمين ده بيقلل التسويف وبيساعد على الإنجاز. يعني أيام الامتحانات نكون حاطين جدول (مكان، زمان، جهد) بعدد المحاضرات والأيام الباقية، ونحط وقت زيادة احتياطي.
الحل التاني بسيط وهو الريكورد اللي بتسجله لنفسك. تسمعه أيام الامتحانات بدون مجهود يذكر، هتلاقي الدنيا أبسط بكتير إن شاء الله.
"الريكورد هو بذرة، تظهر ثمارها نهاية العام."
ومننساش إن الطبيعي تقل طاقتنا، عشان كدا في المذاكرة بنكتب ونخطط ونجتهد عشان نسهل المراجعة إن شاء الله.

---

س2) السرحان؟

ج2) السرحان له تلات أنواع:
1) سرحان طبيعي: معانا كلنا، بيحصل عشان العقل عايز يريح شوية. ناخد راحة، نتمشى في المكان، ناكل حاجة خفيفة، أو نغير حاجة من التلات عناصر (مكان، زمان، جهد). وده برضو يمشي مع الزهق والملل من الدراسة.

2) سرحان من موضوع معين: نحاول نخلص الموضوع ده ونرجع بعدها نذاكر. سواء نخلصه مع نفسنا، أو نستشير حد ممكن يفيدنا.

3) سرحان من موضوع خارج السيطرة: موضوع شاغل بالي بس أنا مش هقدر أعمل حاجة فيه ولا أقدم حل، زي ذكرى من الماضي، أو خوف من المستقبل، أو مشكلة معينة، بس ده كله خارج السيطرة.
الحل هنا إننا ندرك إننا في النوع التالت ونعرف إننا مش بنستفاد حاجة من التفكير، بالعكس، بيأثر علينا بشكل سلبي. هنا نفتكر القاعدة المشهورة خالص خالص "اتنين ملهمش أمان: العاطفة والحنان" ونرجع بشكل عقلاني نكمل المشوار.

---

س3) مش بعرف أتعامل مع السؤال بالرغم من المذاكرة وكمان المراجعة؟

ج3) طالما مذاكرين كويس وحصل كدا، يبقى مش فاهمين السؤال عايز إيه. في أسئلة بتكون واضحة: أعراض كذا، مضاعفات كذا، أسباب كذا. دول مفيش مشكلة معاهم، لكن في أسئلة بتيجي بصيغة تانية بس بيكون قصدها حاجة من الحاجات الواضحة.
يعني مثلاً يقولي "المرض ده بيحصل فيه كذا وكذا ولا لأ؟" طبعاً هتقول فين دي وأنا إيه اللي عرفني بيحصل فيه دول ولا لأ، لكن السؤال هنا قصده على الأعراض.
أهو لو كان قالك الأعراض كنت هتجاوب بكل سهولة. وهكذا يعني ركز في السؤال، هتلاقي إنه قصده حاجة أنت مذاكرها وعارفها بس غير صيغة السؤال. فأنا أحدد هو بيسأل في أي محاضرة وبعدين أحدد أي جزئية، وبعدين أشوف السؤال عايز إيه.

---

س4) بكون مذاكر المحاضرة كويس خالص وعارف المعلومة، لكن في الامتحان أو الشفوي بتروح مني.

ج4) كده أعرف علطول إنك بتراجع وأنت فاتح الكتاب. في فرق بين الاستذكار والاستدعاء، لما تكون فاتح الكتاب وبتراجع بتكون معتقد إنك كده تمام، لكن ده اسمه استذكار.
الاستدعاء بقى هو اللي محتاجينه، نقفل الكتاب ونسمع ونستدعي المعلومة.

---

س5) جربت الحلقات اللي فاتت من السلسلة دي وكانت نتايج رهيبة فعلاً، بدون مبالغة، الدنيا بقت أسهل بكتير والتنظيم بقى أوقع. حرفياً النصايح دي بتختصر شهور من التفكير والخبرة والتجريب. في حاجة تاني ممكن نعملها عشان نسهل المذاكرة؟

ج5) كل واحد ليه أساليب بيعتبرها نقاط قوة بتسهل عليه المهام، وحاجات تانية بتعطله وهي نقاط ضعف.
عشان يتحسن يكتب نقاط القوة ونقاط الضعف ويزود القوة ويشتغل على الضعف.
في حتة صغيرة مفيدة: بسط.
بسط الشرح لنفسك، مش لازم ناخد الكلام أكاديمي رتيب مملل.
لو في معلومة جديدة عايزة تدخل العقل، الدماغ بيعملها حوارات "ومين اللي باعتك وحكايتك إيه"، لكن لو في معلومة قريبتها موجودة جوا العقل بتقول للعقل "دي تبعي عديها".
يعني نحاول بعد ما نفهم المعلومة نربطها بمعلومة تانية في دماغنا إحنا عارفينها حتى لو كانت تافهة وملهاش لازمة، حتى لو هنخترع لها معلومة نربطها بيها.
الخلاصة: ذاكر مذاكرة مصاطب، واكتب في الكتب جمل بالعامية حتى لو محدش هيفهمها غيرك.

---

س6) مش بحب المذاكرة أصلاً ولا الكلية؟

ج6) يا ترى ليه؟ نسأل نفسنا السؤال ده، ليه بنكره المذاكرة؟ نكتب الأسباب اللي خلتنا نقول كده، نفكر في كل واحد، هتلاقي الدنيا بقت أوضح.
أحياناً الخوف من المذاكرة مبيكونش خوف، بيكون حرص على الكمالية. "أنا عايز أذاكر المحاضرة دي بنسبة ١٠٠٪"، فده بيخلينا نأجل المهام اللي علينا.
الجاهزية مش بتيجي قبل ما نبدأ، الجاهزية بتيجي في الطريق.
متستناش تكون جاهز، امشي وأنت مش جاهز، هتوصل جاهز. اتكلمنا قبل كده عنها في مقال سابق.

👍4

1.44K viewsماجد كامل, edited 16:58