إظهار الفرحة في العيد عبادة حتي وإن كانت الهموم تتساقط من روحك..

﴿ذلِكَ وَمَن يُعَظِّم شَعائِرَ اللَّهِ فَإِنَّها مِن تَقوَى القُلوبِ﴾.

كل عام وحضراتكم بخير وسعادة ديما إن شاء الله 💫🦋
وإن شاء الله السنة الجاية نكون في 2022 🥺

بنحضر لكم في العيدية إن شاء الله تكون أحلى عيدية 👌
أسرار الدحيحة ، المذاكرة لعبتي ، أعلى الدرجات بأقل مجهود .

سميه زي ما تسميه ، إن شاء الله المقال ده هيعمل ذهول للدكاترة من أين جاءت كل هذه الإمتيازات 🤔
ايه اللي حصل للدفعة ، دفعة مفترسة 🐈

وإن شاء الله لا هتحتاج ليلة الإمتحان ولا هوليداي سيزون ولا زين ولا عين 🥱

بس كدا مش هنطول عليكم ، إن شاء الله لما المقال ينزل كل اللي عليك إنك تفكر كويس عشان تاخد القرار السليم في الجسم السليم 🥺

شكراً .
ملحوظة مش هحط اللايك والديس لايك
عشان تفاعلكم بيرفع معنوياتي 😌

معقولة مفيش ديس لايك واحد 🤔
طب حتى حد يعترض عشان ميقولوش متفقين مع بعض 🤠

❤️ وتبقي هي أعظم إنتصاراتي وأجمل إختياراتي ❤️

الحكاية إن دي جملة قالها شخص ما - رحمه الله - عن زوجته
ولكن أعظم انتصاراته وأجمل اختياراته قد قتلته بالنهاية بسبب خلاف بينهما.

مش عايز أتكلم عنهم ولا أدخل في تفاصيل ولا اعرف اكتر من كدا ولا أشغل بالي بحاجة مش هتفيدني ومش هقدر اغيرها لا وكمان ممكن تأثر على نفسيتي. عشان كدا ادعوك تلغي كل متابعات الفيسبوك وبإذن الله النفسية هتكون أحسن بكتير.

أنا عايز اتكلم عننا إحنا كتمريض ، في ناس لحد دلوقتي لسه مش راضية عن حالها وعن حياتها. لسه بيبصوا لكلية كذا اللي كانوا عايزينها ويقولوا حلمنا متحققش ، في ناس بيعتبروا كلية كذا لو كانت جاتله كانت هتبقي أعظم انتصاراته وأجمل اختياراته. ودا مبني على المعلومات اللي زرعها فينا المجتمع.


سلم أمرك لله وتوكل على العزيز الرحيم.
وديما قول الحمد لله . مش في حكاية الكلية بس ، لأ في كل حياتك الكلية كانت مثال وطبق بقا القاعدة على الحياة : حد بتحبه مبقيش من نصيبك ، حاجة عايزها راحت لحد تاني ...... وهكذا.

مش معنى كده إننا نستسلم للظروف و منحاولش نغير حالنا للأفضل ، لأ مش كدا خالص . تخلص من أحزانك وهمومك .
خليك زي واحد كدا -بدون ذكر أسماء-
اسمه ساهر دا كان بيتدرب على ركوب الأمواج ودا شيء مش سهل خالص كان بيقول
" أراجع حساباتي بهدوء لأكتشف أي خطأ ارتكبته وبذلك أعود بسرعة إلى موج البحر بعزيمة أقوى. "

يعني شوف ايه اللي مزعلك وحط له حلول !
إزاي اخليه في صفي ؟

هل ينفع تطفي المروحة وتقول ايه دا هي الدنيا حر ليه ؟
طب ما أنت اللي لسه طافي المروحة.

🦋 - مفهمتش.

قصدي يعني متروحش عند النار وتقول أنا اتلسعت ليه ؟

🦋 - مفهمتش.

بص اقولك جملة علمية جداً وممكن يتكتب فيها محاضرات وكتب ومقالات . واحد صاحبي اسمه عز
بس مش مهم تعرف اسمه - بدون ذكر أسماء - الجملة دي جابها منين ؟ الله أعلم.
بس لو هو اللي قايلها فدا بيدل على رزانته ورجاحة عقله ورصانة علمه. أو لو كان جايبها من حد يبقي كدا برضو. جملة بصراحة خيالية حاولوا تحفظوها.

المهم كان بيقول : " واحد مصاحب علوكة و كُخة ! مستني منه ايه ؟ يطلع طيار مثلاً !! "

🦋 : 👍

في حد أعرفه شخصياً ، واعرف اسمه واحفظه كويس دا لازم نقول اسمه
المهم كان بيشوف ايه اللي زعله في يومه ويكتبه ويحطله حلول ويتجنبه. مش كدا وبس دا كمان كان بيحاول يعمل حاجة تفرحه ! دا تتوقع حياته هتكون إزاي ؟

نختم المقال بجملة :
ما قد تعتقد أنه أعظم انتصاراتك وأجمل اختياراتك ممكن يقتلك في

٠٠٠٠ النهاية ٠٠٠٠

#نظرة

" هدية لن أنساها "
هذا الجزء بعنوان ( التخلية قبل التحلية )

ملحوظة : أنا مش بحكي قصة حياتي ، ولولا إن المقال جزء منها مكنتش حكيت ، أنا عارف إن محدش مهتم يعرف قصة حد . بس بحكي عشان حضراتكم تكونوا في الصورة وأنا بحاول اتجنب التفاصيل على قدر الإمكان

ضيوف :
😠 : الأغضبني : شخصية منفعلة .
😂 : الأضحكني : خط النعنشة والفرفشة .
👿 : الشر : شخصية شريرة .
🧐 : المحلل : شخصية عميقة .

😂 : شخصية عبيطة إزاي يعني ؟

المهم توقفنا لما كانت الإمتحانات على الأبواب والمنهج شبه ضايع خالص ، مذاكرة ضعيفة ونسيان كبير ، خوف كبير ، وياه لما تقارن نفسك بحد كدا بتدخل في اكتئاب علطول .
طب ايه الدنيا الوقت بيضيع مني مفيش تقدم مفيش مذاكرة مفيش حاجة إيجابية خالص . فتحت اليوتيوب ، دروس اونلاين أحمد أبو زيد .

لقيته بيقول الغي الفيسبوك الغي كل المتابعات هو اللي بيضيع الوقت ومخلي النفسية متجمدة تحت الصفر . أنا كدا كدا مش عارف اذاكر ، اجرب كلامه وخلاص ، مكنتش مقتنع تماماً كنت بلغي المتابعات اهو عشان اريح ضميري اللي مبينمشي . الغي الغي الغي فضلت كتير الغي ، كنت متابع كتيير .

صحيح أحمد أبو زيد هو اللي قال الحل بس قريب عرفت إن الحل ده _ تخلص من اللي بيبعدك عن هدفك _ موجود في القرآن الكريم وتحديداً في سورة ص . اللي عايز اقوله إن القرآن فيه حل لكل المشاكل مهما كانت انت بس دور .

والتخلية اتت بالتحلية ، مفيش منشورات بتظهر وبالتالي فرصة الإعلانات اكبر إنها تظهر وفجأة لقيت إعلان بعد ما قريته حسيت الأمل رجع تاني حالي اتغير خالص الروح رجعت من جديد ، مش معقول هو في حاجة زي كدا .
لازم اعرف تفاصيل اكتر . عرفت فعلاً الموضوع مش نصب ده حقيقة هي دورة بتشترك فيها . وقدرتك على الحفظ بتروح في حتة تانية خالص ، بتعلى بشكل رهيب . أنت شخصياً هتكون مستغرب .

دخلت الصفحة اسأل عن تفاصيل لقيت سعر الاشتراك تقريباً 400 ريال سعودي ، بس فعلاً تستحق .

😂 : تستحق ايه انت لو معاك 400 ريال كنت هتقعد في البلد ؟

طب شكراً ، نشوف حاجة مصرية بقي مش بنفس الكفاءة بس اهو نحاول . كورس مذاكرة فعالة ب 300 جنيه . بس هو ده .

😂 : هو ده ايه أنت لو معاك 300 جنيه كنت هتقعد في البلد ؟

😠 : لا احنا نكتفي بهذا القدر ... يُتبع .

" هدية لن أنساها "
الجزء الأخير النظري بعنوان ( بداية التحسن )

ملحوظة : أنا مش بحكي قصة حياتي ، ولولا إن المقال جزء منها مكنتش حكيت ، أنا عارف إن محدش مهتم يعرف قصة حد . بس بحكي عشان حضراتكم تكونوا في الصورة وأنا بحاول اتجنب التفاصيل على قدر الإمكان

ضيوف :
😠 : الأغضبني : شخصية منفعلة .
😂 : الأضحكني : خط النعنشة والفرفشة .
👿 : الشر : شخصية شريرة .
🧐 : المحلل : شخصية عميقة .

وقفنا لحد ما لقينا الكورس بس المشكلة إنه مش مجاني ،
على فكرة أنا مكنش عندي مشكلة ادفع ال 400 ريال ولا ال 300 جنيه ، كل المشكلة كانت في حاجة واحدة بس ، عارفين ايه ؟ عارفين ؟ عارفين ايه ؟ مش هكمل غير لما تقولوا ايه .

😂 : A
🧐 : ماذا ؟
👿 : ويحك .
😠 : اخلص !

جدعان 👌 المشكلة اللي كانت معايا كانت إني مش معايا الفلوس دي .

😂 : لا دا انت تاخد مكاني بقا 😏 .
👿 : ويحك مرة أخرى 😏 .

المهم بحثت عنها طلعتلي دورة تاني كانت بفلوس وبعدين بقيت ببلاش ، ( هي هي أم 300 جنيه ) . قولت بس دا كدا تمام . إن شاء الله هتألق زي ما بيتألق بوو تريكة في المباريات ، زي الشناوي في التصديات ، زي محمد النني في مباراة البرتغال وهولندا 💪

🧐 : النني في مباراة البرتغال وهولندا كان بيعمل ايه ؟ كان بيشجع ؟ ما هو لا بيلعب للبرتغال ولا لهولندا !!!!!

بدأت الكورس وكام يوم والدنيا اتحسنت مش كتير بس أحسن من الأول . لإن الكورس تقريباً من وجهة نظري عايز شهر تدريب . كانت فترة عصيبة جداً محدش يعرفها غير ربنا . بجد أتمنى الفترة دي متتكررش أبداً بأي ثمن .

🧐 : الموضوع ليس بهذا القدر ، تخيل لو مكنتش تعرضت للضغط والخوف والتوتر ، معتقدش إنك كنت هتشعر بشعور الآخرين . ومعتقدش إن ليلة الإمتحان ولا المقال ده كان هيبقى موجود . لانك مش حاسس بحد ولا مجرب شعور الضغط . لعله خير ❣️

النهاية 🏁

كدا خلصنا الجزء النظري . وقريب إن شاء الله نبدأ الجد الجزء العملي ، اللي إن شاء الله هيحدد إذا كان سعادتك عايز تتغير وتبعد عن الضغط النفسي في فترة الامتحانات وكمان الدراسة ولا حضرتك راضي بالضغط والطاقة السلبية . نصيحة حقيقية الفرصة اللي مش هتستغلها هتندم عليها . استعد !! 🦋✨

الجزء الأول من مقال الحزن والسعادة
🖤🤍
إن شاء الله هينزل النهاردة الساعة 8 بالدقيقة
7:59 ❌
8:00 ✅
8:01 ❌

يا ريت تتعب نفس سعادتك وتقرا المقال ده خلاصة فيديوهات وتجارب وحاجات كتير ، سعادتك بتقرا في حاجات ملهاش اى ٦٠ لازمة 🤝 مجاتش على الكلمتين دول يعني . إن شاء الله لو طبقت هيفرق معاك كتير ولما نتكلم عن التطبيق فهما 5 % بس اللي بيطبقوا . أنت هتكون أول حد في الخمسة في المية دول . وعد ؟

الحزن والسعادة 🖤🤍

ضيوف :
😈 : يمثل دور الشيطان .
😂 : الأضحكني .
🖤 : يمثل دور الحزين .
🧐 : عميق .

مش أي حد يتكلم عن الحزن ،
لو مش حاسس بيك لإنه معداش باللي أنت عديت بيه أو حتى عنده خبرة ، هتلاقيه بيتكلم كلام عام وبيقدم حلول عامة ممكن متفيدكش بالقدر المطلوب .
أما لو شخص حزين هو اللي بيكلمك في الغالب حزنه هيضيفلك مشاكل لحلولك .
محتاجين حد يكون واقعي ويقدم حلول منطقية وياه لو تبقى عن تجربة شخصية .
. . . . . . . .
الجزء الأول نظري .

🖤 : هل ممكن السعادة تتصنع ؟

السعادة بتتصنع ملهاش حل تاني مش مكتسبة ودي نقطة لازم تكون ثابتة في دماغنا ، هو أنا لو مقتنع إن السعادة مش بتتصنع يبقي مش هتعب نفسي واطبق خطوات على حاجة مش بتتصنع .

🖤 : إزاي نصنع السعادة ؟

السعادة ستة جوانب لو طبقتهم إن شاء الله الوضع هيختلف تماماً ، وممكن نقول عنها إنها الخلاصة ، وهي :
1) الجانب الروحاني
2) الجانب الصحي
٣) الجانب المادي
4) الجانب المهني
5) الجانب الشخصي
6) الجانب الاجتماعي

😂 : بعيداً عن المقال ، ليه رقم ٣ كتبته بالعربي والباقي بالإنجليزي ؟

🧐 : هم مترتبين من الأهم للأقل أهمية . فيهم حاجات ممكن تكون خارجة عن إرادتنا بس مش بشكل كلي ، وحاجات نقدر نتحكم فيها بدرجة كبيرة .

شوف كل واحد منهم واسأل نفسك أنا كويس فيه ولا لا :

1) هل أنا محافظ على الفروض وبصلي نوافل ؟ بقرأ قرآن كريم كل يوم حتى لو نص صفحة ؟ بسبح وبستغفر ؟ الأذكار ؟
2 ) ازي الصحة ؟ مهتم بنفسي ؟ أكلي ؟
٣ ) معاك فلوس ؟ معاك احتياجاتك ؟ مش شرط تبقي مليونير ، طالما عندك اللي يكفيك فأنت سلطان زمانك .

😂 : عذرا على المقاطعة ، بس يعني ايه فلوس ؟ يعني ايه مليونير ؟ تقصد مديونير ؟ سيبك من كل ده اللي مش قادر افهمه ليه برضو بتكتب رقم ٣ بالعربي ؟

4) شغلك حابه ؟ متمكن منه ؟
5) نفسك ؟ مهتم بيها ؟ متسامح مع نفسك ؟ بتكرهها ؟
6) العيلة ؟ الصحاب ؟ الجيران ؟

😈 : أنا طبعا مش سايب اي جانب منهم سايب .
😂 : سايب ولا جوكر ؟
😈 : 1) بذمتك بتصلي ؟ أنا مخليك تعرف يعني ايه صلاة ؟ قدرت اوصلك إن العبادة صعبة ؟ بخليك تقرأ القرآن ؟ طب آخر مرة مسكت المصحف كانت أمتي ؟ مش فاكر صح ؟ طب آخر مرة مسكت التليفون ؟ التليفون في ايدك دلوقتي ، مش بعيد تكون بتستخدمه وهو على الشاحن .

2) وصلت لك فكرة الاكتئاب ، طول اليوم نايم مش عايز تصحي ملكش نفس تاكل ولا تتحرك ، المخدة زهقت من دماغك .
٣ ) ودي بقا لعبتي بخليك تقارن نفسك بناس تافهة بس معاهم فلوس كتير ، بخليك تقول الناس دي معاها فلوس وأنا لأ ، والسوشيال ميديا أداتي . عكست النظرة : بص للي فوق في العلم والدين وللي تحت في الجانب المادي . أنا خليتك تبص للي فوقك في الفلوس وتتحسر ، وتبص للي تحتك في الدين وتقول أنا داخل الجنة وش .

😂 : أنت ليه بتعمل كدا ؟ حتى أنت ؟
😈 : يبني أنا عدوك لو معملتش كدا مين هيعمل ؟ يرضيك انت تبقي سعيد وأنا ادخل النار ؟
😂 : اه يرضيني جدا ، بس أنا مش بتكلم على كدا أنا بتكلم على رقم ٣ حتى أنت شيطان وشاطر وبرضو كتبته بالعربي ؟
😈 : الغلط من الكيبورد أنا مبغلطش .

يُتبع .....

إن شاء الله آخر جزء نظري نزل النهاردة بالليل الساعة 8 .

كدا فاضل العملي اللي هو اهم حاجة . أنا عايزك تنفذ عمياني وملكش دعوة .

4) أنا هخليك في اي مجال تدخله تكره المجال وتكره نفسك حتى لو المجال اللي بتتمناه .
5) المجال الشخصي وده المفتاح السحري عندي ، كرهتك في نفسك كل يوم بخليك تطلع القطط الفطسانة في نفسك : أنا مليش لازمة ، أنا الناس كلها بتكرهني ، حتى اهلي بيكرهوني . فلان ده أحسن مني ، عايش حياته ومحدش زيه ، أنا ملييش حظ .

🧐 : في معلومة سمعتها إن الناس بتشوفك اعلى من ما أنت شايف نفسك عشر مرات . بينما أنت بتقول أنا مليش حظ في حد بيقول يا ريتني مكانه .

😈 : 6) الجانب الاجتماعي : بحاول اخليك تحس كل الناس عايزة تنتقم منك . الناس كلها مركزة معاك ومستنيين غلطة ، والحقيقة إن كل واحد فيه اللي مكفيه ومركز مع نفسه بالعافية .

طب طالما أنا مركز مع نفسي بالعافية ، وأنت برضو وهو وهي يبقي نستنتج إن مفيش حد.مركز معاك زي ما انت متخيل 💁
.........

عشان تحقق أكبر قدر من سعادة سعادتك لازم تعمل إنجاز ولو بسيط في كل مجال من الستة اللي فوق .

🖤 : يعني ايه

يعني 1) حاول تقرأ حتى نص صفحة من القرآن ، تصلي حتى لو ركعتين قيام ليل حتى ركعة واحدة أقرأ فيها سورة الكوثر .

🖤 : الموضوع بسيط اهوه .

2) حاول تهتم بصحتك وأكلك .
3) اعرف فلوسك بتضيع على حاجات أنت في غني عنها ، يعني ليه أكل اكلة من مطعم ب ٥٠ جنيه وأنا ممكن اعملها في البيت من غير فلوس خالص ، بالحب .
4) اعرف معلومات عن شغلك ، اسأل ناس قبلك اعرف اخطاء الناس وتجنبها .

5) حب نفسك ، أنت بطل حياتك مش حد تاتي أنت فارس أحلامك ، مش مهم رأي الناس حتى لو كلهم بيقولوا أنك مش كويس انت قول أنا كويس والناس دي كلها متعرفش حاجة . اتعلم مهارات جديدة ، طور نفسك !!
6) قرب من أهلك افهمهم ، جاملهم اضحك معاهم ، اسمع كلامهم .

🖤 : كلام جميل جداً ، بس هعمل ايه برضو ؟

في حاجات واضحة وفي حاجات إن شاء الله نوضحها في الجزء العملي ، شوية أسرار عملي إن شاء الله تعجبك .

🧐 : النظري بيتبخر مع الوقت ، كويس إن في جزء عملي .

أكيد وإن شاء الله هنخليه مميز بمعنى أنك إن شاء الله هتنجز كتير بس من غير بذل مجهود كبير . الحكاية عقل وعضلات إحنا إن شاء الله هنحاول نخلي العقل يتحمل اكبر جزء والعضلات تتحمل جزء بسيط .

إن شاء الله المقال اللي جاي يعجبك جداً ، وإن شاء الله مش هتلاقي سبب إنك تكون حزين إن شاء الله هتقول أنا مش فاكر آخر مرة زعلت فيها .

🖤 : صعب جداً الكلام ده وخصوصاً معايا أنا .

أنا زيك كنت بقول كدا لحد ما لقيته نفع فعلاً ، احنا نتفق اتفاق انت فاضي مش بتعمل حاجة ، اعمل اللي بقولك عليه وجرب . نفع معاك خير وبركة . منفعش معاك ودا إن شاء الله مش هيحصل ، اهو كسبت خبرة ممكن تكون البداية . دا نفع مع ناس كانت أحزن منك بمراحل . أنت بس جرب . اتفقنا ؟

🖤 : اتفقنا .

يُتبع...


😈 : أنت موهوم !! مش هتفيد حد ولا حد هيطبق ولا حتى هيقرا الكلام أصلا . مفيش فايدة . أنت بتضيع وقتك . الموضوع ده كبير عليك جداً ، بلاش تجرب . أنت فاكر إن هما ساكتين على نفسهم أكيد دوروا عند ناس متخصصة اكتر منك وجربوا كلامهم ومنفعش . ايه اللي مختلف يعني عندك ؟

لا تعليق ، إن شاء الله هتشوف . ولو واحد بس هيطبق الكلام أو نقول هيجرب الكلام فأنا عايزك أنت يا اللي بتقرأ دلوقتي ، أيوة أنت ومفيش حد غيرك . أنا من البداية بتكلم عليك أنت ، عشانك أنت . المقال ده كله واللي كانوا قبله عشانك انت وأنت عارف كدا كويس .

😂 : سيبني أنا أرد على ابن الأبالسة ده ، يا شيطان أنت كائن مبيفهمش . عارف ليه ؟ لأنك اتكلمت بعد ما قلنا يُتبع وحطينا تلات نقط بعدها كدا يعني

يُتبع...

1) 🖤 : ليتنا نستطيع إيقاف الزمن على لحظات كنا فيها سعداء .

ده ممكن يحصل على فكرة .
. . . . . . . .
المقال الأخير اخر حاجة | عملي | مهم ، موضع اختبارات الدنيا .
. . . . . . . . .
الجزء الأول بعنوان
⭐ عندك تليجرام ؟ إذن أنت شخص ناجح .
⭐⭐⭐⭐⭐

زي ما اتفقنا جرب حتى لو مش مقتنع وادينا بنتسلى .
وقف الزمن على اللحظات السعيدة ، إزاي ؟
هتعمل قناة تليجرام خاصة بيك لوحدك 😴 وأي حد يقولك كلمة تفرحك ، حد منزل حالة ليك ، حد بعت لك ريكورد كلام فرحك .... دا كله تبعته على القناة اللي لسه عاملها . اختار لها اسم على ذوقك !! وكل كام يوم كدا اسمع الريكوردات وشوف الكلام ...

2) - حل المشاكل بلا حل :
اعمل قناة تاني تليجرام اكتب فيها الغلطات اللي وقعت فيها ، الغريب إنك لما تقرأهم مش هتحتاج تفكر في حل هتلاقي الحل تلقائي .

- لو معاك مشكلة كبيرة زي مثلاً المذاكرة ، الاكتئاب ، ذنب معين . في الحالة دي الافضل انك تعمل قناة خاصة بالمشكلة دي بس . وكل ما تلاقي حل او حاجة او فيديوهات ممكن تساعدك ابعتها للقناة .

3) ناسي ؟ :
اعمل قناة لمهماتك النهاردة وثبتها في أول المحادثات ، فاكرين لما قلنا المقال نزل الساعة 8 . الخاصية دي في تليجرام نفسه ممكن تكتب رسالة دلوقتي وتخليها تتبعت بعد شهر بعد سنة براحتك . ممكن نستفيد من الخاصية دي في تذكيرنا بمهماتنا .

4) اضحك حافظ على الجزء المرح في شخصيتك بغض النظر عن رأي الناس :
اعمل قناة تاني لما يحصل معاك موقف طريف ، حاجة ضحكت عليها ، ابعتها للقناة دي .
حاجات كتير تاني في التليجرام أنا اديتك فكرة وانت اكتشف المزيد . ضيف تاني قنوات ، كنت ممكن اقولك اكتر من كدا بس أنت دور وعشان منطولش المقال . استغل التليجرام واليوتيوب . كنوز حرفياً .
. . . . . . . .
الجزء الثاني بعنوان : نصائح عامة .

1) أقرأ : القراءة ( المعرفة ) هي طريق النجاح المختصر .
2) العقل زينة : الناس مش عايزة تطلعك برا البلد ، المروحة مش هتقع فوق دماغك ، انت مش هتقع قدام الناس في مناسبة مهمة . الدكتور مش هيستعندك . الناس مش بتتكلم عليك . مفيش عفريت تحت السرير . الناس اللي ماشيين وراك مش عايزين يخطفوك ، الناس اللي بتضحك لما تعدي قدامهم مش بيضحكوا عليك .

3) اعمل إنجاز ولو بسيط في الستة جوانب اللي قولناها وقناة المهمات اللي عملتها هتساعدك إن شاء الله .
4 ) الفراغ هو القاتل الصامت .

5) سعادتك مش معتمدة على حد غيرك 🥱 ، محدش هيساعدك. ، مفيش حاجة اسمها فارس أحلام ولا مصباح علاء الدين .
6) متحطش شخص كهدف في حياتك ، لو مبقيش من نصيبك تزعل ، لأ أنت اللي بتصنع الفارق مش هو أو هي . ناس كتير ممكن تعجب بيها بس في الحقيقة هما وهم كلامهم الجميل ناسخينه ، افكارهم مقتبسينها ، حتى حركاتهم مقلدينها .

7) نادراً ما حد يرتبط بحد في نفس مجاله ، فمتحطش الفكرة في دماغك عشان قلبك ميتكسرش . لو أنت ولد فهي مخطوبة دلوقتي وإن شاء الله بعد ما تكون نفسك بنتها هتقولك ازيك يا عمو . لو انتي بنت فهو محجوز ل 27 واحدة من العيلة غير البنت اللي كانت معاه في الإبتدائية .

8 ) متشغلش بالك :
متدخلش في مناقشات مع حد ، لو حد قالك أنت غلط قوله أنت صح . لو قالك أنت عندك غلطات كذا وكذا قوله ياريت تقولي ايه الصح . ...وهكذا اختصر على قدر استطاعتك .
- متكتبش تعليق لحد ، متردش على حد في حالة الواتس اب . إلا عند الضرورة طبعا أو لو شايف إنه مش هيأثر عليك .
- نزل الواتساب الذهبي هيساعدك متشغلش بالك .
9) اهرب :
اهرب من الصفحات اللي متابعها في الفيسبوك . بالله عليك في حد يتابع صفحات زي ( مكتئب ، منطفئ ، حزين ، فاقد الشغف ....... ) حرام عليك يا جدع ومستغرب انك حزين طب ما ده طبيعي جدا . لو معانا كوب كبير كل يوم نحط فيه نقطة مية وحدة بس ، ايه اللي ممكن يحصل ؟ بعد فترة هيتملي مع إننا قولنا دي نقطة واحدة مش هتأثر يعني . الكوب اللي معاك اتملي كآبة والأغرب أنت مش واخد بالك .
- اهرب من نفسك : احذف كل الكلام السلبي اللي كاتبه على صفحتك ، اللي بتنزله في حالاتك . احذف ( وبالمناسبة لما تكتب احذف أو حذف ارجوك اكتبها بالذال عشان لما بشوفها مكتوبة حزف او احزف او هحزف ، أنا بتأثر نفسياً 😔) المهم احذف الصورة الحزينة اللي حاططها خلفية للتليفون للواتس للفيس للتليجرام . اللي تابع الكورس عارف إن العقل مبيفرفش بين الحقيقة والخيال . قولتله أنا حزين وكررتها هتبقى حزين فعلاً . في عز حزنك اضحك وقول أنا مبسوط شوية هتلاقي عقلك بيقلك دا انت مبسوط جدا .
- اهرب من صحابك : اللي بينزل حالات حزينة أو بيكتب كلام حزين ، خليه في الحالات غير المهمة . أو امسح رقمه خالص . سعادتك اهم من صداقتك .

10) اعمل حاجتين في نفس الوقت إن أمكن :
ممكن انت وماسك التليفون تشغل قرآن كريم ، حضرتك لما تغسلي او تطبخي ممكن تسمعي قرآن ممكن تسبحي وتستغفري .... وهكذا .
11) محتاج دعم :
كل يوم أنت محتاج تسمع كلام إيجابي حتى لو نفس الكلام
. زي التلفون محتاج يتشحن كل يوم وأنا متأكد أنه كل يوم .

12) متفكرش في الماضي إلا بغرض التعلم ومهما ساء بيك الحال . إن شاء الله تدخل الجنة 💚 . لو كل ثانية صعبة عشتها في الدنيا خدت قبالها مليار سنة سعادة في الجنة ، بجد عايز ايه تاني ؟
13) اجتهد اكتر من أي حد ومتقارنش نفسك بحد ، عشان تعرف أنت عملت اللي عليك ولا لا . قارن اللي قدمته باللي تقدر تقدمه . وملكش دعوة بالناس حتى لو لقيت حد بيطير في الهوا .
14) مفيش أعذار :
ينفع تروح في الإمتحان تكتب أنا كنت حزين ، مكانش ليا نفس اذاكر ، في حد قالي كلام زعلني .... طبعاً مينفعش تكتب كدا . طب ما انت عارف اهو إن الأعذار مش هتفيدك ليه متمسك بيها ؟

15 ) خليك ممثل :
الممثل شخص بيخطف الأضواء بالرغم من أن هو مكتبش السيناريو ولا ألف القصة ولا ابتكر الحركات ولا عمل حاجة . في حاجات كتير في حياتنا زي كدا ، حاجة ممكن تاخد فيها اللقطة من غير مجهود كبير . أنت يدوب بتعمل جزء بسيط بس لا غنى عنه . دور على الحاجات دي واستغلها .

16) لما تلاقي ميزة عند حد حاول تاخدها لنفسك وتحسنها ، لو عملت كدا إن شاء الله تبقى بطل خارق . ممكن تتقمص شخصية حد في طريقة كلامه في حركاته في أسلوبه دا بيساعدك تحس انك عندك حلول كتير وانك مش لوحدك .
17) طب حط نفسك مكاني :
حاجات كتير بتزعلك بس لو حطيت نفسك مكان الشخص اللي عملها ممكن جدا تعذره !!

18) غير اسم الناس اللي عندك في جهات الاتصال . أنت مش بتطلع لهم بطاقة . خلي الاسم طريف كدا . والنصيحة دي عكس التراكمات اللي بتسبب الحزن . دي حاجات بسيطة جدا بس تراكمها بيسبب السعادة بإذن الرحمن الرحيم .
19) ادعي كتير بس خد بالأسباب طبعاً ، بتدعي انك تنجح ، طب أنت ذاكرت ؟ بتدعي بحاجة ، طب أنت عملت ايه عشانها ..... وهكذا .

20) ازعل :
ايوة زي ما قريت كدا . احنا بشر مش آلات . لو قابلك موقف محزن في يومك اقعد مع نفسك وطلع كل الحزن ابكي كتير لحد ما تحس انك أحسن . تفريغ الحزن بيساعد على انك تكمل بدل ما تقعد اليوم كله زعلان وكاتم في نفسك . فرغ حزنك في ساعة وكمل باقي اليوم عادي .
21) اعمل فريقك الخاص :
في وسطة اللمة بنكون فرحانين ، ممكن تعمل فريق لنفسك حتى لو أفراد وهميين .
. . . . . . . . . . . . . . . .
الجزء الثالث : كلمة أخيرة .
كل حد هيقول كلمة بمناسبة النهاية :

😈 : كلمتي بقولك متجربش مفيش فايدة . حتى لو نفعت معاك النصايح دي أنا مش هسيبك في حالك انتوا كلكم عايشين في وهم، بس أنا الحقيقة أنا الكسبان . وأنت هتخسر وخليك فاكر . المسألة مسألة وقت وأنا اللي هكسب .
...
🧐 : احنا بناخد بالأسباب وبنعمل اللي علينا ولو وقعنا بنقوم تاني ، مفيش استسلام مفيش أعذار . مش هنقف إلا لما نخلص . اما نخلص مهمتنا أو نخلص أنفاسنا ووقتنا في الدنيا .

😂 : جماعة الموضوع ( ليث 🦁 ) صعبا . احنا بنحاول نحط النقاط على ال ( خروف 🐏 ) مش ه(نمل 🐜 ) لأ بنحاول إننا نعمل ( نمرة 🐅) كويسة ودا ك(فيل 🐘 ) إننا نخلي حياتنا في غاية ( الزرافة 🦒) . احنا مش ( غراب 🥚 ) عن التحديات . حتى لو كنت ( تعبان 🐍) حاول !! هنحاول ( نحل 🐝 ) المشاكل . ونقتل ال(فراخ 🐔) ودي قمة ( الجمال 🐪 ) والتحديات كتير ( بطريق 🐧) النجاح .
ملحوظة ملقيتش غراب فحطيت بيضة . مش احتمال تكون بيضة غراب ؟
. . . . . . . . . . . .
لو عايز تستفسر عن حاجة أو في جزء مش واضح في الكلام أو في الكورس أو عايز تقول اقتراح ابعت هنا 👇
@Exam_night_bot

النهاية

🖤 : ثواني نسيتوني أنا برضو عندي كلمة .

أكيد طبعاً تفضل !!

🤍 : الحمد لله .
النهاية

مفاجأة مش كدا ؟ كدا نقدر نقول بقلب كله أمل احنا خلصنا .
القناة هتقف لحد سنة تالتة إن شاء الله .
دمتم بخير .
النهاية ✨

23) اطفي النار :
لو أنت في أوضة فيها حاجات كتير بتضايقك بس الأوضة مضلمة بالتالي أنت مش هتشوف الحاجات دي حتى وأنت عارف إنها موجودة .

دا نفس اللي بيحصل ، مثلاً حد عايش في البيت عادي ليه حوالي 17 سنة مشتكاش ، بس بعد ما اتحط تحت ضغط في حياته بدأ يشتكي ويقول البيت مش عاجبني وازاي احنا عايشين كدا و ..... طب ما أنت ليك 17 سنة والحال متغيرش ليه بتشكي دلوقتي ؟

لإن الضغط اللي اتعرضله كان هو النار اللي نورت له وخلته يشوف الحاجات اللي مكانش بيشتكي منها . دا كان مثال . شوف بقا ضغط ، مشكلة ، فكرة ، خوف ، .....

شوف النار اللي في حياتك واطفيها !
لو مش عارف تطفيها إزاي دلوقتي غمض عينيك لحد ما تعرف ازاي .
النار مش بس بتنور ، النار بتحرق وبتضيع الحاجات الحلوة .
. . . . . . . . . .
دي حتة حبيت أضيفها .
ايه الأخبار دلوقتي



@Exam_night_bot
تواصل بشكل سري 👆

24) ممكن صورة ؟ :

لما تكون مضغوط أو متضايق جرب الطريقة دي طلع التليفون واتصور صورة سيلفي .
بس كدا خلصت . على فكرة بقا دي ليها تأثيرين مش تأثير واحد :
1) في الحاضر : أنت بتشوف نفسك من برا في الموقف اللي أنت فيه . بيديك فرصة تفكر بهدوء وتهدي في نفس الوقت .

2) في المستقبل إن شاء الله : لما تشوف الصورة بعدين بعد يوم بعد شهر بعد اتنين بعد سنة تفتكر اد ايه أنا كنت مضغوط ومهموم بس ايه ده ؟ في حاجة غريبة حصلت ! الموقف عدا عادي وأنا كنت مكبر الموضوع . دا غير أنه بيخليك تفتكر الموقف وبالتالي فرصة الحل أو التجنب للخطأ تكون أكبر إن شاء الله .
جرب 🥱 .

وعجبي .

يا عم شكراً :

شكراً جداً وجداً تاني وكتير جداً بقا الناس اللي دعت لي ورسايل الشكر اللي مش بس بقرأها ، لا ، أنا بحتفظ بيها .

بعد ما طبقوا الكلام اللي كنا بنقوله ولاحظوا تغير ملحوظ في حياتهم .

الغريبة إن أغلبهم إن مكانش كلهم مكانوش متفائلين يعني احنا بنجرب اهو وخلاص لحد ما التغيير حصل . ومن هنا كانت البداية إنطلاقة واختراقة وأي استفاقة كانت . انتفاضة محلية تسعى للعالمية .

كانت مجرد قطرة قطرة واحدة لكن سرعان ما تحول نهراً ، من ذلك النهر وُلد الأمل ، من هذا الأمل ارتفع الطوفان ، موجة مدٍ من التغيير .

والناس اللي دعت لي أنا كمان دعيتلها .
الشكر لله وحده ، أنا معملتش حاجة بيا أو من غيري كان الموضوع هيتم .

وإن شاء الله في سنة تالتة هيكون معانا بوت للمحاضرات ، إن شاء الله هيكون قنبلة 🥱💣🤭

@Exam_night_bot
تواصل بشكل سري. 👆👆👆

25. على مهلك ترجع سليم لأهلك:

لما بنشوف الحاجة كبيرة على بعضها، بنميل نسيبها ونريح دماغنا 🚶

"إيه ده كل ده كتاب؟ طب مش مذاكر 🚶"

"إيه ده كل دي محاضرة؟ طب مش مذاكر 🚶"

"إيه ده كل ده تعريف؟ طب مش مذاكر 🚶"

"إيه ده كل دي كلمة؟ طب مش مذاكر 🚶"

"إيه ده كل ده حرف (مكتوب كابتل)؟ طب مش مذاكر 🚶"


وهكذا مع حاجات كتير (هحل كل مشاكلي؟ هحفظ 30 جزء؟ هتغلب على كل أحزاني؟ ...)

المفروض نعرف إن لو ذاكرنا نص الكتاب بس، ده أحسن من إننا نسيب الكتاب كله. ومحاضرة واحدة أحسن من ولا حاجة، ولو حفظت 3 أجزاء فده برضه أحسن من بلاش.

كتير الرغبة في المثالية بتخلينا نقف، ومنبدأش أصلاً. لكن لو بدأنا بحاجة بسيطة، الدنيا بتوضح معانا، وفرصة إننا نكمل بتكون أكبر.

الخلاصة:
✍🏻 ما لا يُدرَك كله لا يُترَك كله.
✍🏻 اكسر حاجز البداية!
✍🏻 الطريقة الوحيدة لإنهاء عمل ما هي البدء فيه.


وفيه تلات نقط مهمين جداً:
. . .

(إيه ده كل ده مقال؟ طب مش مكمل) وادي قعدة 🧘‍♂️

26) إن العدو الأسوأ أصبح الصديق الأفضل :

- ياه لو التليفون يتلغي من حياتي كنت هخلص كل حاجاتي ، خلاص أنا قررت أنا هقفل السوشيال ميديا واعمل حاجة مفيدة خلاص ده قرار نهائي .

* النت قطع خمس دقايق *
- هتجنن ليا خمس دقايق مدخلتش على النت ، مش معقول والله كتر خيري بجد الواحد تعب خالص .

...........
بعيداً عن هذا الرجل اللي بيمثلنا ، يا ترى ليه معتقدين أنه لو في تليفون يبقي مفيش فايدة .
بالعكس التليفون ممكن يساعدك جدا فوق 👆 ما تتصور .
فعلاً فوق ما تتصور بيه سيلفي 🥱
لا بجد التليفون لازم يكون صديقك اللي بيساعدك وتقدر تعتمد عليه من خلال التطبيقات المفيدة .

زي :
- التليجرام : أستاذ التنظيم ، رمانة الميزان ، العقل المفكر ، سميه زي ما تسميه
التليجرام بالحاجات اللي قولناها قبل كدا في مقال سابق يستحق يكون اللاعب رقم 10 اللي بيحرك الملعب كله .
- عمو اليوتيوب : خبرات السنين بتاخدها في دقايق . رهيب والله رهيب .
- سلطة الإنجاز : شوفه بنفسك ⚡

* بطلنا اللي يعطلنا :
ليه في عندك تطبيقات ملهاش أى 60 لازمة ❤️ زي تطبيق صراحة مثلاً ليه عايز تعيش تحت حكم الناس وتشوف نفسك بعينهم .
اسأل التطبيق اللي معاك : أنت لازمتك ايه ؟
لو مالوش لازمة خالص ودعه 🚶
لو ليه فوايد وأضرار قلل الاضرار واستفاد من الفوايد بتاعته .

أنا هقف عشان من المقال اللي فات وأنا قاعد 🧍

لو هتبعت رسالة ابعت رسالة ليها معنى
بلاش النقط اللي بتتبعت ، افتح الاقي نقطة يعني دي شكوى ؟ @Exam_night_bot