تعمل ايه لو حسيت ان جهازك متهكر ؟ ( PC )

من اول ما تلاحظ حاجة غريبة ف الجهاز زي ان الماوس بيتحرك لوحدو مثلا

1 - هتفصل النت عن الجهاز فـ اسرع وقت

2 - هتجيب اي لاب من عندك او بي سي تاني وتجيب فلاشه وتنزل عليها MalwareBytes

3 - هتثبت البرنامج علي الجهاز المتهكر وهتعمل فحص كامل بيه

برنامج مالوير بايتس بيديك فري تريال 14 يوم
من بعد الـ 14 يوم بييكون مميزاتو المجانية محدودة
تقدر تمسحو وتنزلو تاني وهيديك Free Trial جديد
او كلمني برايفت وهديلك اكونت مدفوع @Youssefxq
#how_to

هتكلم انهارده عن مشكلة شائعة كتير بين الجيمرز
وهي ان استخدام كرت الشاشة بيكون قليل او استخدامو مش بيكون 100%

هوضحلك هنا الموضوع ماشي ازاي وأمتي الموضوع يكون طبيعي وامتي بيدل علي انك عندك مشكلة فـ الجهاز

هقول شوية معلومات جديدة عن عنق الزجاجة او الـ Bottleneck
لإني لاحظت ان بعض الناس فاهمة الموضوع غلط
العنق بين كرت الشاشة والمعالج مش شرط يكون فيه استهلاك المعالج يكون 100%
وطبعا هديلك الحلول الي ممكن تعملها

الوضع المثالي لـ الكرت والمعالج :
الوضع الأمثل لـ الجهاز خلال اللعب ان يكون استخدام الكرت فيه 100% او علي الأقل فوق الـ 90%
وبالنسبة لـ استخدام المعالج علي عكس الكرت , من الضروري ميكونش استعمالو عالي
يعني من المفترض ميطلعش فوق الـ 90%
ودا بسبب ان المعالج بيكون مسؤول عن عمليات تانية كتير ..
كـ مثال : البرامج الي فـ الخلفية , نظام الويندوز إلخ ..

إذا كان المعالج استخدامه عالي هتشوف تقطيع ودروبات فـ الفريمات اثناء اللعب
وطبعا فـ حالة ان اغلب الألعاب الي بتلعبها بيكون استخدام الكرت فيها قليل
فا هنا انت بكل بساطة مش بتستفاد بكل قوة الكرت بتاعك الي انت شاريه
يعني انت فعليا دافع فلوس زيادة فـ كرت قوي ومش بتستغلو بشكل كامل
فا من الضروري جدا انك تشوف الموضوع ده عن طريق استخدامك برنامج MSI Afterburner
عشان تطلع الـ Stats ف اي لعبة بتلعبها

بكل بساطة هتفتح إعدادات البرنامج وهتروح علي اوبشن Monitoring
وهتحدد الأوبشنز الي هتحتاجها زي :
GPU Usage , Memory Usage , Framerate , CPU Usage , Clock Speed
هتختار اي حاجة انت عايزها وهتدوس علي اوبشن Show In On-Screen Display

بعد ما تظبط الإعدادات فـ البرنامج
هتروح تدخل علي كام لعبة من عندك مش بس لعبة واحدة
وشوف استخدام الكرت فيهم , لو كان استخدام الكرت عالي او فوق الـ 90% فا انت كدا وضعك تمام
لو كان استخدامه قليل , خلينا نخش فـ الأسباب والحلول



السبب الأول : انك ممكن تكون مفعل Framerate Limiter او FPS Limiter
وظيفتو انه يعمل ليمت لـ الـ FPS
طبعا اذا كرتك قادر انه يطلع FPS اكتر , كدا معناتها انك مجبر الكرت انه ميشتغلش بكامل قوتو
والشئ دا بيبان بسهولة , هتلاحظ ان الفريمات عندك مش بتطلع فوق رقم معين او ثابتة علي رقم معين

طب ازاي نشيل الليميت ؟
دا بيرجع لـ المكان الي انت عامل منو الليميت
ممكن تكون عاملو من إعدادات الكرت او من برنامج خارجي او من جوا اللعبة نفسها
او مشغل تقنية بتعمل حد لـ الفريمات زي الـ Vertical Sync
او تقنية الـ Radeon Chill لـ كروت AMD
او تقنيات تانية من نفس النوع
وبكل الحالات دي لازم انت الي تطفيه

بس في بعض الأحيان ممكن تكون مش مشغل اي حاجة من الي ذكرتها
ومع ذلك الفريمات معمولها Limit


ودا بينقلنا لـ السبب التاني : وهو الـ Game Engine تبع اللعبة نفسها
في بعض الألعاب المعينة هو بيكون معمولها ليميت لـ الفريمات
وغالبا بيكون علي الـ 60 الفريم ودا حاجة من اللعبة نفسها ومش هتقدر تشيلو من الإعدادات
وفـ الحالة دي من الطبيعي يكون استخدم الكرت قليل
وفـ بعض الحالات اذا اللعبة قديمة بيكون الـ Engine بتاع اللعبة قديم ومش محدث
وفـ الحالة دي المشكلة ف اللعبة نفسها مش فـ جهازك
ودا غالبا بيحصل فـ الألعاب القديمة فقط

طيب ولو اللعبة جديدة ومفيش اي فريم ليميت انت حاطه ولسه استخدام الكرت قليل ؟
فا هنا في بعض الحاجات الي ممكن تجربها من خلال داخل اللعبة نفسها

اولا إذا اللعبة بتدعم عدة Apis
كـ مثال : DirectX 12 , DirectX 11 x Vulkan

فا جرب تبدل بينهم وتشوف المشكلة هتنحل او لا
ودايما بيكون من الأفضل تشوف الإصدار الي عندك فـ الجهاز وتعملو علي اساسو
لو دخلت علي Nvidia Control Panel بعدها الـ System Information
هتلاقي إصدار الـ DirectX مكتوب عندك وبكون دايما الأصدار الأفضل هو 12

طيب لو كل ده منفعش ؟ , كدا هنخش علي السبب التالت والي يعتبر اكثر شيوعا :

مشاكل فـ السوفت وير / Software Problms
وعلي الأغلب بتكون مشكلة فـ الـ Driver بحد ذاته
واحيانا لما بواجه مشكلة زي كدا بحمل برنامج DDU
وبشيل من خلالو الدرايفر من الجزور مش بيترك اي اثر وبيشتغل علي اي كرت
وبرجع احمل اخر درايف لـ الكرت الخاص بيك من موقع الشركة الرسمي
ودي فـ اغلب الأحيان بتحل المشكلة

وفـ بعض الأحيان المشكلة بتكون من الويندوز نفسه
ودي بتتحل انك تشغل الـ Windows Update وتحمل اي ابديت موجود
بس احيانا لو الويندوز فيه مشاكل كتير , ساعات بتحتاج انك تعملو فورمات
في حالات بس نادرة جدا بس إذا حدثت الـ Bios بتاع الماذر بورد ممكن تتحل المشكلة
ودا خليه اخر حل لو كل الحلول الي فوق منفعتش معاك
#tech_information

Part [ 1 ]
ولو كل ده منفعش ؟ , هتخش علي السبب الرابع الي ممكن يكلفك شوية فلوس :

استخدام الرام / Ram Usage
لو كان جهازك مفيهوش مساحة رام كافية لـ اللعبة الي انت فاتحها
فا علي الأغلب هتلاقي استخدام الكرت قليل , وهتلاقي دروبات واضحة ف اللعبة
ودي حاجة سهلة جدا انك تميزها مباشرا بيبان معاك استخدام الرام من برنامج MSI Aferburner
لو لقيت استخدام الرامات 100% , اعمل حسابك انك تشتري حبة رام زيادة
حاليا 16 جيجا بايت رام كافية لـ كل الألعاب

السبب الخامس : عنق الزجاجة / Bottleneck
غلط جدا انك تحدد اذا كان عندك عنق زجاجة او لا من موقع Bottleneck Calculator
لإن اوقات كتير مش بيديلك نتائج صحيحة
موضوع عنق الزجاجة بيرجع علي حسب استخدامك انت لـ جهازك
وخليني اوضحلك الموضوع بـ مثال بسيط

لو عندك كرت RTX 3060 TI مع معالج Ryzen 5 3600
فا علي الكلام الموقع المفروض ميكونش في اي Bottleneck ابدا
حتي لو حطينا RTX 3070 علي كلام الموقع مفيش اي Bottleneck
بس زي ما قولتلك , الموضوع بيرجع علي حسب استخدامك لـ الجهاز

لو بتلعب العاب Story Mode بـ اعلي اعدادات غالبا مش هيكون عندك عنق زجاجة
لكن لو بتلعب العاب باتل رويال او بشكل عام العاب بتضغط علي المعالج
او بتلعب العاب اغلبها علي Low Setting 1080p
فا هيكون في عنق زجاجة اكيد

فا عندك حلين , لو حابب انك تستخدم قوة كارتك بـ الكامل
1 - تعلي إعدادات اللعبة
2 - تشتري معالج اقوي من الي معاك

وأعتقد والله اعلم معلومة مش متاكد منها
الألعاب لسه إلي الأن مش بتستغل الـ Hyper-Threading بشكل كامل
فا دا سبب الي بيكون بيعمل عنق زجاجة.

وفـ الأخر هوضح نقطة اخيرة..
في بعض الألعاب هي مصممة انها متكونش متطلبة علي كرت الشاشة
وبالذات لو بتنزلها لـ الـ Low Settings
زي مثلا لعبة CS:GO او Valorant او PUBG Mobile

بالنهاية هي العاب الجرافيك بتاعها خفيف علي كرت الشاشة بتاعك
صعب جدا العاب زي كدا توصل فيها استخدام الكرت لـ فوق الـ 90%
لإنها بكل بساطة مش بتطلب كل الأداء ده

اتمني اكون جاوبت علي كل الأسئلة الي جات فـ دماغك وأكون حليتلك المشكلة :"
#tech_information

ايه هو افضل برنامج Voicer Changer مجاني لـ البي سي ؟

1 - افتح البراوزر وحمل برنامج VoiceMod

2 - هتثبت البرنامج زي اي برنامج سهل هتضغط علي Next بس وهيتثبت معاك

3 - هتفتح البرنامج وهتسجل فيه وبعدها هيفتح معاك وهيكون جاهز

البرنامج مميزاتو حلوة فشخ لإنه كل يوم بينزلو اصوات مختلفة مش اصوات ثابتة

مش بيعمل منفذ جديد لـ المايك وكدا
بييكون علي نفس المايك

تقدر تعمل Keybind لـ اي صوت انت عايزه


#how_to

* الي عنده افكار او عايز شرح معين برنامج معين الحاجات دي يكتبلي عشان الأفكار خلاص بدأت تخلص مني *

ازاي ترفع عندك الـ FPS من 60 لـ 120 فـ اغلب الألعاب ؟

حبيت اشرحلكم الطريقة فـ فيديو عشان تكون اسهل عليكم
الطريقة شغالة وأنا عاملها وحسيت بفرق كبير جدا فـ الألعاب

HKEY_CURRENT_USER\System\GameConfigStore\GameDVR_Enable

HKEY_LOCAL_MACHINE\SOFTWARE\Microsoft\PolicyManager\default\ApplicationManagement\AllowGameDVR\Value

تقدر انك تاخد الـ Path كوبي وتحطو فـ السيرش بار علطول وهيدخلك علي المكان الي بقولك عليه لو مكسل يعني

#how_to

لما بتحمل اي ابلكيشن بتجيلك المساحة بتاعته
سواء كانت بـ الميجا بايت ( MB ) او بـ الجيجا بايت ( GB )

بس ايه معني المساحات دي بالظبط ؟

كلنا عارفين ان الأجهزة بتشتغل بـ نظام 1 و 0

الـ Bit هو اصغر حاجة وهو خانة واحدة فقط 1 او 0

بعدها الـ Byte وهو عبارة عن 8 Bit او 8 ارقام 1 او 0

بعدها الـ Kilobyte وهو عبارة عن 1024 Byte بالنسبة لـ نظام الـ 1 و 0

بعدها الـ Megabyte وهو عبارة عن 1024 Kilobyte

يعني كـ مثال : ابلكيشن الـ TikTok الي هو حجمه 102MB بيساوي 16.638.855 Bit او خانة 1 او 0

طبعا بعدها بييجي Gigabyte , Terabyte , Petabyte , Exabyte إلخ ..

ودي كلها بنسميها وحدات قياس لسعة التخزين في الاجهزة
زي المتر والكيلو متر بالنسبة لـ الأطوال.

#tech_information

هرد انهارده علي سؤال شائع وهو
" هل الأيفون أمن ولا يمكن اختراقه نهائيا ؟ "

هنرجع بـ التاريخ لـ ورا سنة " 2014 "
كان موجود ساعتها ثغرة الـ ICloud ومن خلالها تم اختراق 200 مشهور و مشهورة
وايضا ممثلين و ممثلات

ثانيا ثغرة الـ Pegasus الي موجوة من 2016
ومتمش إكتشافها إلا فـ عام 2020

من قوة الثغرات الي كانت موجودة فـ الأيفون
وصلت مع شركة NSO انها تعمل تصريح بـ ان اي ثغرة لـ الأيفون مش هتقبلها من كتر الثغرات الي موجودة عنده

طيب نيجي لـ سنة 2021
في مجموعة هكرز صينيين قدرو انهم يتخرقو الأيفون في 15 ثانية فقط!!
وقدرو انهم يخترقوه عن طريق ثغرة فـ متصفح سفاري

طيب تمام كل الثغرات الي فوق اتقفلت
نيجي لـ خبر تاني من شهر بالظبط

انه تم زرع برامج خبيثة فـ الأندرويد وايضا فـ الأيفون

هديلك نصيحة , اي نظام متصل بـ الأنترنت مش أمن 100%
لازم تلاقي فيه ثغرات , اختراقات و استغلال لـ الثغرات.

#tech_information

في بعض الهجمات الألكترونية الي بتحصل الفترة دي
وهي هجمات الـ Phishing

1 - ايه هي هجمات الـ Phishing ؟

بـ اختصار شديد ايميل بيوصلك من واحد بيتظاهر بـ انه جهة رسمية
او واحد يقولك سجل ف الموقع عشان اكسب نقاط والكلام ده
بهدف سرقة بياناتك او سرقة فلوسك

لنفترض ان مثلا الأيميل الوهمي بيكون من واحد بيتظاهر انه البريد المصري
هيطلب منك انك تدخل علي موقع وتحط فيه معلومات الفيزا بتاعتك او معلومات اخري ..
وفـ اللحظة الي هتحط فيها بياناتك خلاص هتكون عند الطرف التاني

ودايما اتأكد من الموقع الرسمي فـ الروابط الي بتدخل عليها

بالنسبة لـ الناس الي بتقول
" الويب سايت عليه علامة القفل " Https " يعني الموقع أمن "

الموضوع مش كدا نهائي , علامة القفل او الـ Https معناتها الويب سايت مشفر ومش معناتها انه أمن ولا موثوق

واصلا علامة القفل او الـ Https تقدر انك تطلعها مجانا ومدي الحياة
من Let's Encrypt بتسمح لـ الجميع انهم يعملو Https بضغطة زر
#tech_information

Part [ 1 ]

2 - بالنسبة لـ نوع الهجمات التانية من الـ Phishing

هي رسائل الأبتزاز وبتخوف ناس كتير
هيجيلك ايميل هيقولك فيه انه يعرف الباسورد بتاعك وهيحطلك باسورد من باسورداتك المشهورة

محتوي الرسالة هيكون حاجة مشابهة لـ كدا :
لقد قمت بـ اختراقك وشاهدتك عبر كاميرا هاتفك وأنت تشاهد مقاطع *** وبتعمل *** وقمت بتصويرك فيديو

وهيكون سايبلك الأدريس الخاص بـ البتكوين بتاعه وهيهددك انك لو مبعتلوش مبلغ من البتكوين فـ خلال يومين لـ 3 ايام
هينشر المقاطع لـ اصحابك وعائلتك


اولا الرسالة مزيفة 100%

طب ازاي عرفو الباسورد بتاعك؟
لو دخلت علي ويب سايت haveibeenpwned
وكتبت الأيميل بتاعك بعدها ضغطت pwned?
هيجيبلك كل المواقع الي انت مسجل فيها وأتعرضت لـ اختراق فـ البيانات وعن طريقها باسوردك اتسرب

ودول بيبعتو حملات بـ الملايين لـ كل الناس الي اتسربت باسورداتهم
فا هما مش مدينيلك اهتمام وعندك وقت انك تغير الباسورد وساعتها هيكون وضعك تمام.

#tech_information

في استخدامك لـ النت بشكل عام دايما بتسمع عن الـ 5G
بس ممكن تشوفها فـ شكلين ومهم جدا انك تعرف تفرق مابينهم

اول شكل : الـ 5G لـ Cellular Data
والمقصود بيه : شبكة الجيل الخامس من التكنولوجيا الخلوية من شركات الإتصالات
ومشهور بـ تطوره ف سرعة الانترنت وليه مميزات تانية
حرف الـ G بيرمز لـ Generation


تاني شكل : الـ 5G فـ الراوتر ودا بيكون بشكل إفتراضي

لو الراوتر عندك بيدعم تردد الـ 5GHz
وأنت بتظبط إعداداته الأساسية هتلاقي مسمي شبكة الـ 5G بـ اسم معين + ( - 5G )
كـ مثال : Home - 5G
5G = 5Ghz

حتي بنفس المبدأ هتلاقيه مسمي شبكة الـ 2.4Ghz بنفس الطريقة
وهو بيسمي كدا عشان تميز بين الشبكتين , عشان تتصل بـ المناسبة ليك وقت الحاجة

يعني كدا الـ 5G الأولي والتانية ملهومش علاقة بـ بعض


طب امتي نشوف الأتنين مع بعض ؟

دلوقتي انت عندك راوتر وبتاخد الانترنت من الراوتر عن طريق حاجة من الأتنين

1 - Ethernet Cable
2 - WI-FI

لو الراوتر عندك بيدعم تردد الـ 5Ghz
كدا الواي فاي هيبث إشارتين ( 2.4Ghz ) + ( 5Ghz )
وأنت بتاخد المناسب ليك حسب استخدامك


طب هو ايه الي بيزود الراوتر بـ الانترنت ؟

مصدر الانترنت عن طريق حاجة من الأتنين
عن طريق Direct Cable سواء كان DSL او Viper
او عن طريق SIM Card وممكن تكون 5G

بمعني ان شركات الأتصالات تقدر تزود الراوتر بتاعك بـ الانترنت
بدون اي كابلات عن طريق شريحة الـ SIM Card زي الموبايل بالظبط


ودا كان شرح عشان تفرق بين بث بـ شبكة الـ 2.4Ghz او 5Ghz

فا كدا الـ 2G او الـ 5G مسميات لـ الواي فاي
مش معناها خالص ان دي شبكة جيل تاني ودي شبكة جيل خامس.

#tech_information

ازاي مواقع الأفلام المقرصنة شغالة ومش بتتقفل او بيتمسك صاحبها ؟
مع انها مخالفة لـ حقوق الملكية فـ كل دول العالم

اصحاب المواقع بيستعينو بـ شركات إستضافة خاصة
والشركات دي مبيكونش ليها علاقة بـ شروط مكافحة المواد المقرصنة
وبتسمي بـ DMCA

فا لو عملت موقع افلام زي EgyBest , MyCima إلخ ..
علي استضافة معروفة او مشهورة زي HostGator او NameCheap
مش هيكمل وقت كبير قبل ما موقعك يتقفل لـ الأبد.

#tech_information