اني مافهمتش شن قصة كل مرة طالعلنا حد يصورلنا في روتين حياته ومسمي روحه صانع محتوى، معقولة في ولاد عندهم روتين صباحي ومسائي؟ ولا البنات الي يصورو في حوشهم من داخل وتفاصيل حياتهم الشخصية
قبل كنت نسمع للبيوت اسرارها، توا تلقا روحك حتى في دار النوم في سبيل المتابعات والتفاعل

🇺🇸 : Unemployed
🇸🇦 : عاطل عن العمل
🇱🇾 : صانع محتوى

صنعة الي ماعنده صنعة

بعدين تلقا مداير بودكاست يحكي على نجاحاته والصراعات الي واجهها
شكله تمت منه الباقة لما كان بينزل فيديو

عصر التفاهة في أبهى حلة

اختصرها محمد صبحي من قبل.

مهما وصل ومهما دار من فلوس، التافه طول عمره يقعد تافه

مانحيروش علاش الجيل طالع هكي، لان القدوة غابت

قدوتهم انسان جاهل او صانع محتوى او مغني ولا ممثل اجنبي

معقولة شاب ولا شابة في العشرينات اتبع في كفار وتقتدي بيهم؟

والطامة الكبرى تسمي في روحك باسمهم!

في شخص على اليوتيوب اسمه إبراهيم العسيري، عنده سلسلة اسمها "عظماء غيروا مجرى التاريخ"، ضروري كل إنسان يشوفها.

يشوف الصحابة والتابعين كيف كانوا أولو قوة وبأس شديد، يشوفهم كيف كانوا يحبون الموت أكثر من الحياة، هادي الناس اللي المفروض نقتدي بها.

غياب القدوة هي الي خلت حالنا ضعفاء اذلاء ننجر وراء التوافه، لما تقرا على كتيبة الموت ولا معارك خالد بن الوليد الي قاعد تدّرس معاركه في الجامعات لتوا، حتعرف قداش ما حني مثيرين لشفقة حاليا

لما تقرأ عن غزوة المسلمين مع الروم، ثلاثة آلاف أمام مئة وعشرين ألفًا، حتشوف الفرق كيف حالنا حاليا مع ان اكثر عددا من السابق

ياريت يحاول كل حد يكون مصلح يبدا بعيلته صحابه زملاءه من اي منبر ، لو كلنا نصلحو الي حوالينا وننصحوهم حيكون حالنا احسن من هكي

"وَمَا كَانَ رَبُّكَ لِيُهْلِكَ القُرَى بِظُلْمٍ وَأَهْلُهَا مُصْلِحُونَ"