ئەبو عوبەیدە: ئێمە لە کەتائبی شەهید عزالدین قەسسام، لەبەرامبەر ئەو دۆخەی گەلەکەمان تێیدا دەژی، جەخت لەسەر ئەم خاڵانە دەکەینەوە:

یەکەم: دوژمنی ترسنۆک بزانێت کە شەهیدبوونی زەید و جەعفەر و عەبدوڵڵا کوڕی ڕەواحە (ڕەزای خوایان لێ بێت) نەبووە هۆی نەمان و کۆتایی هاتنی سەرکردە و بانگەوازی موسڵمانان؛ بە پێچەوانەوە، ئەوە سەرەتای دەرکەوتنی “شمشێری خوای هەڵکێشراو” سیف اللە المسلول بوو.

بۆیە ئەی دوژمنانی خوا، بەوە دڵخۆش مەبن کە هیچتان نەکردووە. هێشتا لەنێوماندا سەرکردە هەن کە بە ئامانج و بیرۆکەی قورئان و سوننەت پەروەردە بوون و لە دەستی سەرکردە شەهیدە گەورەکان فێربوون. ڕێگای ئێمە بۆ خوای گەورە ناوەستێت و ئاڵایەک کە پێغەمبەر (د.خ) بەرزی کردووەتەوە، ناکەوێتە خوارەوە.

دووەم: تاوانی تیرۆرکردن و زنجیرەی کوشتنی ڕۆژانەی گەل و خەڵکی ئێمە و بەرخودەرەکانمان، کە منداڵان و پیران و ژنانیشی گرتووەتەوە، هەروەها هەموو ئەو تاوانانەی لە کەرتی غەززە ڕوودەدەن و پێشێلکردنی ڕێککەوتنی ئاگربەست و هەڵهاتنی ئیسرائیل لە پابەندبوون بە بەڵێنەکانی، ناوەندەکان و بەڕێوەبەرانی ناوبژیوانی دەخاتە بەردەم تاقیکردنەوەیەکی گەورە. جا ئێوە لە کوێن؟ ڕۆڵتان چییە؟ و چی بەسەر گەرەنتییەکانتان هات؟

ئەبو عوبەیدە: کاتێک قسە لەگەڵ ناوبژیوانەکان دەکەین ـ بەدەر لە ویلایەتە یەکگرتووەکان ـ قسە لەگەڵ خەڵکی خۆمان و ڕۆڵەکانی ئوممەتەکەمان دەکەین. تکایە قوربانی و تاوانبار وەک یەک مەبینن. لە تەنیشت براکانی خۆتان لە غەززە بوەستن بە وەستانێکی شەرافەتمەندانە کە مێژوو تۆماری دەکات. هەموو هەوڵەکان یەکبخەن بۆ ڕاگرتنی دەستی داگیرکەر و ناچارکردنی بۆ جێبەجێکردنی پابەندییەکانی.

سێیەم: بۆ گەلە خۆڕاگرەکەمان لە هەموو شوێنەکان و بۆ تێکۆشەرانی ئوممەتەکەمان لە هەموو وڵاتە عەرەبی و ئیسلامییەکان دەڵێین: ئێوە ئەمڕۆ خاوەنی مافی خوێنن، و ئەرکی ئەم کاتە ئەوەیە بە شێوەیەکی کرداری بچنە ناو ئەو ملمڵانێیەی نێوان حەق و باطڵ. چیتر بێدەنگی و وەستان لە ناوەڕاستدا قبووڵ ناکرێت. هیواداریمان بە خوای گەورە و دواتر بە ئێوە هەروا بەردەوامە، و بانگەوازمان نوێ دەکەینەوە بۆ هەموو پێکهاتە و هێزەکانی ئوممەتەکەمان کە جیاوازییەکان لاببەن و ئاراستەی خۆیان بەرەو دوژمنی یەکەمی ئوممەت ڕاست بکەنەوە.

ڕاستی وت ئەو پیاوە دەمامکپۆشە کە کاتێک وتی: «هەمووتان لەسەر شاخی ڕەحمەت”عەرەفات” کۆدەبنەوە، سوننە و شیعە، دەست بەرزدەکەنەوە بۆ خوایەکی تاک، بە دەوری کەعبەیەکی تاکدا دەسووڕێنەوە، و ئوممەت لە بەرزترین وێنەی یەکگرتوویی خۆیدا دەردەکەوێت؛ لە بینینی خوایەکی تاکدا تواو دەبێت و لە بانگەوازی “لبیک اللهم لبیک”دا نوقم دەبێت.

پاشان گەشتەکەتان بەرەو مینا درێژ دەبێت، لەوێ پێکەوە شەو دەکەنەوە، چادری لەتەنیشت چادر، دەنگی تەلبیە هەموو گەرووتان یەکدەخات و دڵەکانتان بە هەمان خشوع و لەژێر هەمان ئاسمان بە ئیمان دەدەن.

لە موزدەلیفەش، بەردە بچووکەکان کۆدەکەنەوە بۆ ئەوەی شەیتانێکی تاک ڕەجم بکەن، وەک ئەوەی هەموو ئوممەت یەک جەستە بن لە نوێژ و نزاکان و ڕێوڕەسمەکانیاندا.

بەڵام هەر کاتێک کاتی ڕووبەڕووبوونەوەی داگیرکەر دێت و ئەو دوژمنە لەبەردەمتان ڕادەوەستێت کە قورئان بە ڕاشکاوی ئاماژەی پێداوە و بە “زۆرترین دوژمنی” ناساندوویەتی، ئەو یەکگرتووییە لەناکاو دەشکێت. هەر لایەنێک دەستی دەبات بۆ مێژوو و خوێنە ڕژاوەکان و ڕەت دەکات لە سنگەرێکی یەکدا لەگەڵ لایەنەکەی تر بوەستێت. لە شوێنە پیرۆزەکاندا جەستەیەکی یەک بوون کە تەلبیەتان دەگوت، بەڵام لە مەیداندا دەبنە هۆز و مەزهەب و ناکۆکییە جیاوازەکان. سوێند بە خوا، ئەمە وشەیەکی ڕاستە کە نقابی ئەو دژبەیەکی کوشندەی دڕاندووە.

سەیر نییە کە پێغەمبەر ﷺ لە زۆر فەرموودەدا ئاگاداری لەو فیتنەیە کردبێتەوە؛ چونکە فیتنەیەکی ئاسان نییە بۆ ناسینەوە و ڕزگاربوون لێی بە سادەیی ناکرێت. فیتنەیەکە کە زەمان تێیدا گەشاوە، بیروباوەڕ و نەوەکان لەسەر بنیات نراون و هەندێک زاناش لەسەر سووتەمەنی ئەودا دروست کراون، بۆ ئەوەی ئامرازی دابەشکردن و هەڵگیرسانی ناکۆکی بن، نەک ئامرازی یەکخستن و میهرەبانی. وەک دوژمنانی ئەم ئوممەتە دەیانویست، ئامانجەکەیان هەنگاو بە هەنگاو بەدی دێت؛ دەبینیت لەگەڵ برا موسڵمانەکەت لە یەک شوێندا ڕادەوەستیت و پێکەوە لە دوعادا تواو دەبن، بەڵام کاتێک باس لە ئیسرائیل دەکرێت، برینەکانی ڕابردوو دێنەوە یادت و خۆت جیا دەکەیتەوە، وەک ئەوەی ئەو دوژمنەی قورئان بە ئاشکرا دوژمنایەتییەکەی باس کردووە، ببێتە شتێکی لاوەکی لە بەرامبەر ناکۆکییەکانی نێوان خۆمان.

لێرەدا بە دڵێکی پڕ لە ئازار دەوەستم و ئەو دیمەنانە دەهێنمەوە یاد: فرمێسک لەسەر ڕووخساری حەجییەکان لە عەڕەفە دەڕژێت، پێیان بەردەکان لە مینا فڕێدەدەن، جەستەکان لە طەوافدا یەکدی دەنووسن وەک ئەستێرەیەک کە بە دەوری بازنەی بەندایەتیی پاکدا دەسووڕێتەوە. کەس لە کەس ناپرسێت مەزهەبەکەت چییە، چونکە هەموویان بەندەی خوایەکی تاکن. پاکی و ڕۆحانییەتیەکی تایبەت هەموو شوێنە پیرۆزەکان دەگرێتەوە، بەڵام پاشان پرسیارێکی ئازاردەر هەموو ئەو شکۆیە دەهەژێنێت:

چۆن پێکەوە لە مینا شەو دەکەینەوە، پێکەوە لە موزدەلیفە دەوەستین، پێکەوە لەنێوان سەفا و مەروە هاتووچۆ دەکەین، بەڵام پێکەوە لە دژی دوژمنێکی هاوبەش ناوەستین؟

سوێند بە خوا، ئەمە جێی سەرسوڕمانە، و ئەو دژبەییەیە کە ڕۆح بە خەم و پەژارە دەتووێنێتەوە.