Crypto Notes

" ኤሴቅ "
ክፍል ~፻፵፮~ ( 146 )
በአምባዬ ጌታነህ @adwa1888
"እስካሁን ዘና እያላችሁ እንደሆነ ተስፋ አደርጋለሁ ክቡራትና ክቡራን። አሁን ወደ ፕሮግራም ማጠቃለያችን ከመሄዳችን በፊት የየቅርንጫፉ ትምህርት ቤት ስራ አስኪያጅና ርዕሰመምህራን ሰብሳቢ የሆኑት ዶክተር ሰለሞን መኃሪን ወደ መድረክ እጋብዛለሁ። እባካችሁ በጭብጨባ ወደ መድረክ ጋብዙልኝ"ብሎ መድረክ መሪው ወረደ። ጨብ ጨብ ጨብ ዶክተር ሰለሞን መኃሪ ከወገባቸው ጎንበስ በማለት መድረኩ ላይ ወጥተው ንግግር ማድረግ ጀመሩ። "በቅድሚያ መምህራን እንኳን ደስ አላችሁ።ገበሬና መምህር ብዙ የሚያመሳስለው ነገር አለ። ሁለቱም ለም መሬት ላይ ዘራቸውን ይዘራሉ በእነሱ የአዘራር መጠን ልክ ቡቃያዎች ድንቅ ማሳ ሆነው ለእሸት ደርሰው ለሁሉም ይዳረሳሉ። እናንተ መምህራንም መሬቶቻችሁ ተማሪዎቻችሁ ናቸው። እነሱ ላይ የእናንተን ምርጥ ዘር ዘርታችኋል። ያ ዘርም ፍሬ አፍርቶ በአመቱ ማጠቃለያ ላይ ደርሰናል። እስካሁን በደረሰኝ መረጃ የደገመ ተማሪ እንደሌለ ነው። በዚህም ትውልድ ያብብ ትውልድ ይንቃ በሚለውና ትውልድን ለሀገር መታደግ የሚለውን የትምህርት ቤታችን የተፅዕኖ ቃል ስላከበራችሁ ልትመሰገኑ ይገባል። በመቀጠል ከልጆቻችሁ እኩል ስታነቡ ስታስጠኗቸው የነበራችሁ ወላጆችም ክብርና ምስጋና በእኔም ሆነ በትምህርት ቤቱ ስም ዝቅ ብለን ምስጋና ልቸራችሁ እፈልጋለሁ" ጨብ ጨብ ጨብ። አሁን አስራ አንደኛ ክፍልን ጨርሳችኋል። የሕይወት መንገድን ጀመራችሁት እንጅ አልቋጫችሁትም። ልትቋጩትም አትችሉም። ሕይወት ማለቂያ አልባ ጎዳና ናት። ብንሔድ ብንሔድ አንጨርሳትም። ትምህርትም እንደዛው ነው። ቀጣይ አመት አስራ ሁለተኛ ክፍል ናችሁ። ዋነኛውን የሕይወት መስመራችሁን የምትጀምሩት ከዚህ ክፍል ነው።ብዙ ነገሮችን የምታዘጋጁት፣የምትመሩት በዚህ ትምህርት ደረጃና ዕድሜ ነው። ስለዚህ መጪው ጊዜ የዩኒቨርሲቲ መግቢያ ፈተና የምትወስዱበት አመት ስለሆነ ከመቼውም ጊዜ በላይ የምትዘጋጁበት አመት ነው። ጥንቃቄ አድርጋችሁ ማጥናት መዘጋጀት ይኖርባችኋል።ወላጆችም እንደ ከዚህ ቀደሙ ከልጆቻችሁ ጎን በመሆን የወላጅነታችሁን ኃላፊነት እንድትወጡ አሳስባለሁ። ንግግሬን ስላስረዘምኩ ይቅርታ እጠይቃለሁ "በማለት ንግግሩን አቋርጦ ከመድረክ ሞቅ ያለ ጭብጨባ ተለግሶት ወረደ። መድረክ መሪው ፈጠን ብሎ " ክቡር ዶክተር ሰለሞን መኃሪን እናመሰግናለን። በመጨረሻ ወደ ሚከናወነው እና ሁላችሁም በጉጉት ወደ ምትጠብቁት መርሀ-ግብር እናልፋለን። ይህ መርሀግብር የሽልማት ነው። በዚህ ወሰነ ትምህርትም እንደ ከዚህ ቀደሙ በልዩ ሁኔታ ከየ ቅርንጫፉ አንደኛ የወጡ ተማሪዎች ሜዳሊያ ሲሸለሙ ከሁሉም ቅርንጫፎች አንደኛ የወጣ ደግሞ የዋንጫ ተሸላሚ ይሆናል።ስለዚህ በቀጥታ የየቅርንጫፎቹን የምንሸልም ይሆናል"አለና ስም መጥራት ጀመረ የሁሉንም ቅርንጫፍ ጠርቶ የአራዳ ፒያሳ የቅርንጫፍ ብቻ ቀረ። እዚህ ላይ ትንሽ አየር እንደመሰብሰብ አድርጎ " እዚህ ቅርንጫፍ ነበር ባለፈው ሲሚስተር የሁሉንም ቅርንጫፍ በመብለጥ የዋንጫ አሸናፊ የሆነው ቀዳማዊ ነበር። አሁን ደግሞ ማን አንደኛ እንደወጣ በእናንተ ፊታ ፖስታውን ቀድጄ እናገራለሁ። አንድ ጊዜ ሰውን አንድ ጊዜ ፖስታውን እየተመለከተ ነው። ደሐብ የልብ ምቷ ጨመረ። አቶ እዮሲያስ የመድረክ መሪውን አፍ ይመለከታል። ሐምራዊ በፍርሀት ልቧ ይመታል። እጇን አስደግፋ ትጠብቃለች። ታሮስ አይኖቹን እያርገበገበ መድረክ መድረኩን ያያል። ቀዳማዊ ዝም ብሎ አይኖቹን ወዲያና ወዲህ ያንከራትታል። ማረፊያ ያጡ አይኖቹ ይባዝናሉ። ሔዋን ቀዳማዊን በስስት ትመለከታለች። ሔመንም እሱን እሱን ታያለች። የሁሉም ሰው ልብ ተንጠለጠለ። መድረክ መሪው ቀስ ብሎ ፖስታዋን ቀደዳትና ውስጥ ላይ የተቀመጠችውን የታጠፈች ወረቀት ቀስ አድርጎ ፈታት። "የአራዳ ፒፓሳ ቅርንጫፍ አንደኛ የወጣው የወጣችው ማን ይሆን?" ብሎ ወረቀቱን ከእንደገና ለያየው። ሁሉም ሰው ልቡ ተሰቀለ " ኧረ ባክህ ልባችንን አታስጨንቀን ንገረን? ምን አይነት ልጅ ነው። አስጨነቀን እኮ!" " ቆይ የኛ ቅርንጫፍ ሲሆን ነው እንዴ እንደዚህ የሚያደርገው የማይረባ "አለች ደሐብ " በነገራችሁ ላይ አሸናፊውን ከመግለፄ በፊት ስለዚህ ቅርንጫፍ የተወሰነ ነገር ማለት እፈልጋለሁ። ከዚህ በፊት እንዳየነው ከሆነ በየሴሚስተሩ የተለያየ ተሸላሚ ነው የሚኖረው። ነገር ግን ብዙ ጊዜ በመሸለም የምትታወቀው ደሐብ እዮሲያስ ነች። ባሀፈው ደግሞ ቀዳማዊ ነው። ቀዳማዊ እንደነገርኳችሁ የባለፈው የዋንጫ አሸናፊ እንደሆነ ይታወሳል። ነገር ግን አሁን እሱ ይሁን ሌላ እኔም የማውቀው ነገር የለም" " የማይረባ! ዝም ብሎ ወሬ ያስረዝማል ሲያናድድ ዝም ብሎ ተናግሮ አይወርድም! ሲያስጠላ" ብላ ደሐብ እጆቿን አኸራጨች " ተይው ልጄ መጥራቱ አይቀር ዝም ብሎ ድከም ቢለው ነው እንጅ"አለ የደሐብ አባት እሱም ልቡ እየተሰቀለ። " ኧረ ልጄ ልቤ ሊፈነዳ ነው! ይሄ ሰውዬ ሊገለኝ ነው!" አለች ሔዋን ልቧ ወጥቶ የሚሄድባት ይመስል ጥብቅ አድርጋ እየያዘች። " አያናድም እማዬ ይሄ ሰውዬ "አለች ሐምራዊ " እኔ ግን ምንም አልመሰለኝም። ይህ አይነቱ ክዋኔ ወይም ድርጊት ልብ አንጠልጣይ በይው። አንድ ፊልምም ልብ አንጠልጣይ ሲሆን ደስ ይላል። እና በልጁ ድርጊት ከመበሳጨት ይልቅ ዘና እያልኩ ነው "አለች ፊደላዊት " አሁን ገና የእናንተ ስራ ምን እንደሆነ ገባኝ ሲያስጠላ ቶሎ ቶሎ ነው እንጅ!"አለች ሐምራዊ " ከፈጠነማ ምኑን ታሪክ ሆነው አይስብም ደስም አይል። ታሪኩ በደንብ ተሰናስሎ ተተርኮ ሰዎች ቀጣይ ክፍሉ ምን ይሆን ብለው ሀሳብ ሲሰጡበት ሲወያዩበት ሲጓጉ ነው እንጅ ፊልም የሚባለው። እና ጉጉት ደግሞ ራሱን የቻለ ትልቅ አቅም ነው። እና ልጁም ይሄን ያደረገበት መንገድ እያንዳንዷ እንቅስቃሴው የሚገርም ነው። እንደዚህ ሲሆን ይጣፍጣል። ሰውን አታይውም ምን ያህል ልቡ እንደተሰቀለ ሊፈነዳ ደርሷል"አለች ፊደላዊት" መድረክ መሪው በመሀል ጉሮሮውን እንደመጠራረግ አደረገና"በመጨረሻ ልናገር የአራዳ ፒያሳ ቅርንጫፍ የወርቅ ሜዳሊያ ተሸላሚ ተማሪ......

#ክፍል_147

👍1

354 views16:56