السلام عليكم، تعودتوا علينا ما ننزّل أي إعلانات أو أي شي جانبي خارج إطار الكلية والتبليغات وكل إعلان أو نشر جانبي چان يجيلنا نرفضه لأن هاي القناة أمانة وما نحب نزعج الطلاب ونخلط عليهم إشعارات التبليغات واشعارات الرسايل الجانبية، فحافظنا على هذا الشي طوال الكورس الحمد للّٰه، الآن فترة عطلة وماكو أي تبليغات تخص الدراسة والكلية ففكّرت وگلت ليش ما أستغل هذا الوقت وهاي المتابعين بشي يفيد الطلاب، فقرّرت أسوي فقرتين بهاي العطلة، الفقرة الأولى لدعم رواد الأعمال الناشئين (أصحاب الأعمال الصغيرة من الطلاب)، والثانية دعم صناع المحتوى، هاي الجمعة راح تكون لدعم المشاريع والجمعة الجاية لدعم صناع المحتوى.

راح يكون النشر مشترك بين قناتنا وقناة النظم (يعني رسالتك تُنشَر هنا وبقناة النظم، يعني أكثر من 700 طالب راح يشاهد مشروعك)، وكل هذا مجّانًا، والهدف منه إبراز المبدعين والناجحين من كليتنا، لذلك هذا الدعم راح يكون مخصّص لطلاب كليتنا فقط من كل الأقسام والمراحل، حتى تشوفون إمكانيات وقدرات طلابنا، يعني هم يستفادون بدعمكم وتشجيعكم إلهم، وأنتم تستفادون من الخدمات أو المنتجات اليقدموها، وكذلك من المحتوى.
وقد تَلقَى بعض المشاريع فرصة دعم مالي من مستثمرين، فنشرها هنا يجلب مهتمين حقيقيين مو مثل نشرها ببيجات وترويج، كذلك حتى لوما عندك مشروع قد ترى شيء يُعجِبَك ما كنتَ لتجده دون نشره هنا وتسليط الضوء عليه، وربما نفس توجهك وطموحك فتعرض على صاحبه أن تكون شريكًا معه، أو تعجبك منتجاته أو خدماته وتستفيد منه استهلاكيًا فتجد ضالتك من هذا النشر، أو تجد محتوى يعجبك ويناسب تفضيلاتك وتتابعه، والكثير من الأمور مختصرها الكل مستفيد من هاي الفقرتين المنتجين والمستهلكين، والصانعين والقارئين، إن شاءَ اللّٰه.