الأسبوع الماضي شركة هواوي أعلنت إنها هتبني منصة للخدمات السحابية في مصر لخدمة منطقة شمال إفريقيا ☁️

الشركة كمان أعلنت عن إطلاق نموذج ذكاء اصطناعي بيدعم اللغة العربية، بيدعم خدمات زي التعرف على النطق بدقة تصل إلى 96%، ودي هتكون من ضمان الخدمات اللي هتقدمها المنصة السحابية، بخلاف خدمات الذكاء الاصطناعي المختلفة، وخدمات الاستضافة وقواعد البيانات وغيرها من الأمور.

هواوي أعلنت إنها هتستثمر 300 مليون دولار في مصر على مدار 5 سنوات، وهتدرب 10,000 مطور.

بكدة هواوي أصبحت أول شركة في العالم تبني منصة خدمات سحابية عامة في مصر.

شركة نيفيديا تصل لقيمة سوقية 3 تريليون دولار للمرة الأولى في تاريخها، لتصبح ثالت شركة أمريكية عامة تصل للرقم ده بعد آبل ومايكروسوفت.

الشركة زادت قيمتها أكثر من 10 أضعاف خلال أقل من سنتين بدعم من التطور الضخم في مجال الذكاء الاصطناعي، وارتفاع الطلب على منتجات الشركة.

الجدير بالذكر إن 7 من أكبر 10 شركات من حيث القيمة على مستوى العالم بينشطوا في مجال التكنولوجيا.

شركة أدوبي حدثت شروط الاستخدام الخاصة ببرنامج فوتوشوب، وأضافت فقرة بتنص إن الشركة عندها الحق في الوصول لكل المشاريع والمحتوى اللي بيتم إنشائها من خلال البرنامج 🙂

الشركة قالت إن ده عشان "إدارة المحتوى" والتأكد إن البرنامج مش بيتم استخدامه في حاجات بتخالف سياسة الاستخدام.. لكن الحقيقة إن أدوبي عايزة تسرق محتوى المستخدمين عشان تستخدمه لتدريب أدواتها ونماذج التصميم بالذكاء الاصطناعي الخاصّة بيها.

المضحك إن الشروط دي بتشمل المحتوى اللي بيكون محمي باتفاقية عدم إفصاح NDA.

لو عايز تستمر في استخدام الفوتوشوب لازم توافق على الشروط الجديدة.. ولو عايز تحذف الفوتوشوب من جهازك مش هتقدر إلا لما توافق على الشروط الجديدة بردو 🤡

تم إصدار النسخة الأحدث من توزيعة الهاكرز المفضلة Kali Linux مع 18 أداة اختراق جديدة.

الأدوات ضمت:

أداة للاستطلاع autorecon
أداة للبحث عن معلومات عن الثغرات sploitscan
أداة لأتمتة عملية استغلال واختبار أمن الشبكات netexec
أداة متطورة لمسح موجات الراديو horst
أداة لبناء وتطوير البايلود sickle
أداة لمراقبة عمليات لينكس بدون صلاحية الروت pspy
أداة لتشغيل التطبيقات عبر أنفاق VPN مؤقتة vopono

ده أول تحديث للتوزيعة في 2024.. وشهد تحسينات على مستوى واجهة المستخدم، زي دمج واجهة جنوم الجديدة GNOME 46.

متبقي نصف ساعة تقريبا عن بداية مؤتمر آبل للمطورين WWDC 2024 ⏳

المؤتمر هيغطي آخر تحديثات الشركة عن أجهزة الماك، مجال الذكاء الاصطناعي، بالإضافة لآخر التحديثات والإضافات لأنظمة منتجاتها.
iOS
macOS
iPadOS
watchOS

بعد 14 سنة من إطلاق الآيباد.. شركة آبل أعلنت إنها هتوفر تطبيق آلة حاسبة مجانا مع الجهاز 🔥

يوتيوب بيختبر إمكانية حقن الإعلانات من طرف الخادم "server-side ad injection" 🙂

ده معناه إن الإعلان هيتم إضافته في بث الفيديو بشكل مباشر من خلال خادم البث وكأنه جزء من الفيديو، ودي حاجة أدوات حظر الإعلانات متقدرش تتعامل معاها حاليا.

الطريقة دي كمان لو تم تفعيلها بالشكل ده هتفسد كل الطوابع الزمنية للفيديوهات على المنصة.

الشركة كمان بتختبر تقليل وصول المستخدمين بدون حسابات جوجل لمحتوى المنصة.

الحكومة الأمريكية أعلنت عن فرض حظر شامل على شركة Kaspersky الروسية المطورة لواحد من أقوى برامج مضادات الفيروسات 🚫

الحظر هيمنع الشركة من بيع أي منتجات أو خدمات الشركة للأفراد والمؤسسات داخل الولايات المتحدة بحجة إن الشركة الروسية بتمثل خطر على الأمن القومي الأمريكي.

فريق الهاكرز الروسي Lockbit نشروا على موقعهم إنهم اخترقوا البنك الاحتياطي الفيدرالي الأمريكي، أكبر مؤسسة مالية في العالم وسرقوا بيانات حساسة بحجم 33 تيرابايت!

حتى الآن لم يتم تأكيد أو نفي الاختراق، والفريق حاليا طالب فدية من الحكومة الأمريكية وإلا هيتم نشر البيانات بكرة.. وطلب منهم يبعتوا مفاوض تاني غير الكلاون اللي عرض عليهم 50 ألف دولار بس 🙂

خدمة ProtonVPN دلوقتي أصبحت متاحة للاستخدام على الأندرويد بدون حاجة إلى إنشاء حساب 🛡

الشركة كمان أعلنت عن إتاحة خوادم مجانية في 21 دولة معظمها هيكون فيها انتخابات العام الحالي من ضمنها الجزائر - تونس - الأردن - سوريا - تركيا.

الخطة المجانية من ProtonVPN بتوفر وصول لخوادم VPN في 6 دول بدون قيود على حجم استهلاك البيانات وبدون إعلانات.. وهي طبعا واحدة من أفضل خدمات الفي بي إن الآمنة، ودلوقتي تقدر تستخدمها على موبايلك الأندرويد مباشرة بدون تسجيل.

واحد من أغرب الأخبار اللي سمعتها في الفترة الأخيرة..

من كام سنة عدد كبير من الأشخاص في كوريا الجنوبية اشتكوا بشكل متزامن من حدوث أعطال في أجهزتهم وإن في ملفات بتختفي بالداتا اللي فيها وملفات تانية غريبة بتظهر وأحيانا الأجهزة بتتوقف عن العمل بالكامل..

المستخدمين كان بينهم حاجة مشتركة وهي إنهم كانوا بيستخدموا برنامج تورنت معين من تطوير شركة كورية لمشاركة الملفات بشكل جماعي P2P..

طبعا الشك كان إن البرنامج نفسه هو اللي سبب المشكلة.. لكن المستخدمين اللي اشتكوا من المشكلة بردو كان في بينهم حاجة مشتركة تانية وهي إن كلهم من عملاء شركة KT واحدة من شركات تزويد خدمة الإنترنت في كوريا الجنوبية.. واتضح إن الشركة نفسها كانت مش راضية عن استخدام عملائها للتورنت، فقررت إنها تخترق أجهزتهم وتزرع فيها مالوير يعمل أعطال في الأجهزة والداتا اللي عليها 🙂

الشرطة الكورية قبضت على 13 شخص متورطين في الموضوع ده.. وحتى الآن تم اكتشاف أكتر من 600 ألف عميل من عملاء الشركة تعرضوا للاختراق بنفس الطريقة!

شركة جوجل أعلنت عن إضافة 110 لغة جديدة لخدمة Google Translate 🔠

أهم اللغات المضافة:
اللغة العفارية Afar: لغة أفريقية آسيوية يتكلم بها 1. 4 مليون شخص في منطقة القرن الأفريقي في إثيوبيا وإريتريا وجيبوتي.
اللغة الكانتونيونة Cantonese: إحدى الفروع الرئيسية للغة الصينية.
اللغة الأمازيغية Tamazight: لغة يتم التحدث بها في بعض دول شمال أفريقيا.

حسب جوجل فاللغات الجديدة بتغطي عدد متحدثين يفوق 8% من عدد البشر حاليا / 614 مليون نسمة.

جوجل ذكرت إنها بتسعى لتطوير نماذج ذكاء اصطناعي بتدعم ترجمة كل لغات البشر اللي وصلت حاليا إلى 1000 لغة.

انتهت شركة تيسلا من تركيب 6 مراوح عملاقة لمركز بيانات الحوسبة في مصنع Giga Texas لتبريد 50 ألف وحدة معالجة رسوميات GPU تكلفتها تجاوزت 2 مليار دولار.

شركة ميتا قررت رفع الحظر عن استخدام مصطلح "شهيد" واعتبار وجوده سبب لحذف المنشورات بعد توصية من المجلس المستقل للإشراف على المحتوى، اللي استغرق أكثر من عام لمراجعة إذا كان استخدام المصطلح فيه انتهاك "لسياسة المنصة".

كلمة "شهيد" كانت أكثر كلمة تسببت في حذف منشورات من موقع فيسبوك!

شركة مايكروسوفت عملت تحديث لخدمة النسخ السحابي OneDrive على ويندوز 11 لنسخ بيانات المستخدم من الكمبيوتر إلى الخوادم الخاصة بيها بدون إذن منه 🙂

التحديث ظهر للمستخدمين اللي ثبتوا ويندوز 11 حديثا، وأصبح خيار نسخ البيانات لخدمة OneDrive هو الخيار الافتراضي ومش بيحتاج موافقة المستخدم.

حلقة جديدة من مسلسل استعباط شركة مايكروسوفت وهوسها بسرقة بيانات المستخدمين، خصوصا مع زيادة أهمية البيانات في الفترة الأخيرة لتدريب نماذج الذكاء الاصطناعي.

لو نزلت ويندوز 11 مؤخرا اتأكد إنك تدخل لإعدادات برنامج OneDrive وتعطل النسخ الاحتياطي من إعدادات المزامنة.

لو بتستخدم تطبيق المصادقة الثنائية Authy خلي بالك لأن التطبيق تعرض للاختراق وتم سرقة وتسريب 33 مليون رقم موبايل مرتبط بالتطبيق 🔴🔴

حاليا لازم تحدث التطبيق على الأندرويد أو iOS عشان تحصل على التحديثات الأمنية، ولازم تنتبه من أي محاولات تصيد ممكن تتعرض ليها فيما بعد بسبب التسريب.

نسخ التطبيق على الويندوز والماك واللينكس هيتم إيقافها بشكل نهائي بداية من الشهر القادم.

الحكومة اليابانية أعلنت الفوز في معركتها ضد الأقراص المرنة بعد النجاح في تحديث أنظمتها التقنية وإلغاء 1034 لائحة تنظيمية لإجراءات كان إلزامي فيها استخدام الأقراص المرنة 💾

بالرغم من الإنجاز الهائل للحكومة؛ ما زال استخدام الأقراص المرنة إلزامي في إجراءات مرتبطة بإعادة تدوير السيارات.

كوكب اليابان ❤️

من يومين تم تسريب قاعدة بيانات بتضم 10 مليار كلمة مرور ☠️

على أحد منتديات الهاكرز تم نشر ملف نصي باسم rockyou2024.txt بيحتوي على حوالي 10 مليار كلمة مرور حقيقة تم جمعها من تسريبات ضخمة حدثت على مدار السنين الماضية.

على عكس المنشورات اللي شوفتها بتتتكلم عن الموضوع ده فالقائمة دي مش جديدة، ولكن كانت موجودة باسم RockYou2021 وكان فيها 8.4 مليار كلمة مرور.. وخلال الـ 3 سنين الماضية تم إضافة 1.5 مليار باسورد جديد ليها.

القائمة دي موجودة من 2009 وبيتم تحديثها كل فترة بالتسريبات الجديدة، وخطورة القائمة دي إنها كلمات مرور حقيقة تم توليدها من مستخدمين مش من آلات، وده معناه إنها بتكون فعالة جدا في عمليات اختراق الحسابات بطريقة الـ Brute Force.

تقدر تستخدم الأداة الموجودة في التعليقات لمعرفة لو الباسورد بتاعك موجود في القائمة دي.. ويفضل إنك تفعل المصادقة الثنائية دايما على حساباتك المهمة لتفادي أي تأثير للتسريبات دي.

الفترة اللي فاتت كان عندي مشروع كنت محتاج فيه استخدام محتوى صوتي بلغات مختلفة، ولقيت تكلفة التعليق الصوتي عالية جدا فاستخدمت أداة AI لتوليد المحتوى المطلوب والنتيجة كانت ممتازة 👌

الأداة تقدر من خلالها تعمل أمور كتير أهمها:

▪️ إنشاء محتوى صوتي من نص.
▪️ إنشاء محتوى صوتي من ملف صوتي.
▪️ استنساخ صوت معين وتوليد محتوى باستخدام نفس الصوت.
▪️ بيدعم لغات مختلفة منها اللغة العربية، وكمان بيدعم لهجات وأصوات متنوعة.
▪️ بيدعم ترجمة المحتوى سواء نصي أو صوتي وتوليد محتوى صوتي بلغة مختلفة بشكل تلقائي.

دي مراجعة سريعة للأداة وطريقة استخدامها 👇
https://bit.ly/3VXh380

حلف شمال الأطلسي أعلن عن تمويله لمشروع بيطور تقنية لإعادة توجيه حركة مرور الإنترنت عبر الأقمار الاصطناعية في حالة تعرض الكابلات البحرية للتخريب 🛰

في ظل التوترات الجيوسياسية الحالية والمتوقعة؛ الكابلات البحرية قد تكون هدف لقطع أو تعطيل الاتصالات في حالة نشوب نزاع جديد خصوصا لو كان على مستوى متعدد الأقطاب.

المشروع اللي هيتم تمويله بيركز على تطوير تقنيات لاكتشاف التهديدات اللي بتتعرض لها الكابلات بشكل أسرع وأكثر دقة لتحديد الوقت المناسب لإعادة توجيه حركة المرور عبر الإقمار الاصطناعية.

في فبراير الماضي تم اتهام جماعة الحوثي باستهداف وتعطيل كابلات بحرية في البحر الأحمر مسئولة عن 17% من حركة مرور الإنترنت العالمية.

ميزة تسجيل المكالمات قادمة للآيفون 🔥

شركة آبل أعلنت عن ميزة جديدة لتطبيق الهاتف في الإصدار القادم من نظام التشغيل iOS 18، وهي ميزة تسجيل المكالمة بدون حاجة لتطبيقات أخرى.

بمجرد تشغيلها هتبدأ عملية تسجيل المكالمة، وهيكون فيه خيار لتفعيل عرض نصي للمحادثة.

اللغة العربية مش هتكون مدعومة لعرض المكالمة نصيا، وبمجرد تفعيل تسجيل المكالمة هيتم إعلام الطرف الآخر إن المكالمة بيتم تسجيلها.