موظف في شركة في هونج كونج كان في اجتماع فيديو مع مجموعة موظفين والمدير المالي للشركة لمناقشة عملية تحويل مالي هتقوم بيها الشركة لأحد فروعها في دولة تانية..

بعد الاتفاق وانتهاء الاجتماع الموظف قام بتحويل قيمة المعاملة "25 مليون دولار" حسب التفاصيل اللي ناقشها معاه المدير المالي للشركة، والإيميلات اللي وصلتله.

المهم اتضح إن كل اللي كانوا في الاجتماع شخصيات مزيفة، وإن فيه هاكرز جمعوا داتا متاحة أون لاين عن الموظفين واستخدموها لإنشاء الشخصيات بتقنية DeepFake وعملوا اجتماع وهمي قدروا فيه يقنعوا الموظف بالتحويل وسرقوا 25 مليون دولار!

شركة ASML الهولندية كشفت عن أحدث ماكينة ابتكرتها لصناعة الرقائق بوزن 165 طن!

الماكينة متخصصة في صناعة الرقائق المتطورة بتقنية الليثوجرافيا فوق البنفسجية الفائقة (Extreme Ultraviolet Lithography)، ودي الماكينة اللي بتصنع الشرائح المتطورة اللي بيتم استخدامها في صناعة أحدث المعالجات، وشركة ASML هي الوحيدة في العالم اللي بتصنعها.

الإصدار الحديث من الماكينة بيقدر يصنع خطوط أشباه الموصلات بسمك أقل بنسبة 1.7 من الإصدار السابق، وده بيسمح بوضع عدد أكبر من الترانزستورز في نفس المساحة، وبالتالي القوة الحوسبية للشريحة بتكون أعلى، وبتوفر سرعة أكبر في المعالجة.

الماكينة وزنها 165 طن، سعرها 350 مليون دولار، بتتكون من عدد أجزاء يفوق 100 ألف جزء، بتحتاج 250 مهندس يجمّعوها، ومدة التجميع بتستغرق 6 شهور!

شركة OpenAI أعلنت قبل قليل عن نموذج Sora لإنشاء الفيديو من المحتوى النصي "Text-to-Video".

النموذج بيقدر يولد فيديو بجودة عالية وتفاصيل دقيقة وشخصيات متعددة وحركات كاميرا معقدة لمدة تصل إلى 60 ثانية.

النموذج حاليا غير متاح للاستخدام، لكن الشركة ذكرت إنها في الخطوات النهائية لإتاحة النموذج للمستخدمين بعد تضمين عدد من خطوات السلامة لضمان عدم إساءة استخدامه.

فيديو مهم عن العملات الرقمية المستقرة ومميزاتها وعيوبها وأفضل أنواعها وهل تصلح وسيلة لحفظ الثروة 👇
https://youtu.be/aZYsm6nPuS0

الاتحاد الأوروبي بيجهز لتوقيع غرامة تاريخية على شركة آبل بقيمة نصف مليار يورو بسبب انتهاك الشركة لقوانين مكافحة الاحتكار 💲💲

الشركة كانت بتمنع التطبيقات من السماح للمستخدمين بدفع الاشتراكات مباشرة من داخل التطبيق، وكانت بتجبرهم على الدفع من باستخدام اشتركات الآب ستور عشان آبل تاخد حصتها (30%) من قيمة الاشتراك.

آبل كمان يبدو إنها كانت بتمنع التطبيقات من إعلام المستخدمين بوجود طرق أرخص لدفع الاشتراك زي الاشتراك من موقع الخدمة بعيدا عن المتجر نفسه 😑

تطبيق المراسلة الشهير Signal وصله تحديث مهم وهو إمكانية إضافة اسم مستخدم للحساب 🔏

تطبيق سيجنال أحد أشهر تطبيقات التراسل الآمن المشفر ما زال حتى الآن بيعتمد على مشاركة الأرقام كوسيلة لو محتاج تتواصل مع حد على التطبيق، وده طبعا شيء مش كويس لخصوصية المستخدمين.

التحديث الجديد هيلغي ظهور رقم المستخدم على التطبيق، وهيمنح المستخدم إمكانية منع أي شخص من البحث عن حسابه من خلال الرقم، وبدلا من ده هيكون المستخدم قادر على إنشاء اسم فريد لحسابه يقدر يشاركه مع أي حد عايز يتواصل معاه.

التحديث اللي اتأخر كتير جدا حاليا متاح لمستخدمي البيتا فقط، وهيكون متاح لجميع المستخدمين قريبا.

سلام عليكم👋
معانا النهاردة مراجعة لطريقة عمل فيزا افتراضية بالدولار أو باليورو بسهولة وبدون حاجة لتقديم وثائق، وهيكون فيه توزيع لـ 6 بطاقات فيزا هدية، كل بطاقة قيمتها 50 يورو.

مميزات البطاقة:
▪️ تقدر تختار النوع فيزا | ماستركارد.
▪️ تقدر تشحن رصيد لغاية 1000 دولار.
▪️ تقدر تستخرج عدد غير محدود من البطاقات.
▪️ مش هتحتاج تفعل حساب أو تقدم أي وثائق هوية.
▪️ تقدر تدفع تكلفة البطاقة بالكريبتو بعملات مختلفة.

البطاقة جربتها بشكل شخصي ودفعت بيها على مواقع مختلفة، منها يوديمي - جوجل باي وإعلانات فيسبوك 💳

بالنسبة للمسابقة:
- معانا 3 بطاقات هنوزعهم على 3 أشخاص هنختارهم من فيديو اليوتيوب، اعمل لايك وشير وتعليق على الفيديو على يوتيوب عشان تكون مؤهل 👇
https://youtu.be/-YbkE3v8bcg

فيه 3 بطاقات تانية هنوزعهم على 3 أشخاص هنختارهم من فيسبوك، اعمل لايك وشير وتعليق على بوست الفيسبوك عشان تكون مؤهل ✅
https://www.facebook.com/Netaawy/posts/951423173015246

المسابقة هتستمر لمدة 48 ساعة إن شاء الله ⏳
لو عندك استفسار عن البطاقة اكتبه في تعليق وهجاوبك إن شاء الله 👇

بطاقة الفيزا الافتراضية اللي اتكلمت عليها امبارح دلوقتي بقت متاحة بتكلفة أقل، بداية من 25 يورو ✅

البطاقة تقدر تستخدمها للدفع على أي مواقع بتقبل فيزا، وبتشتغل مع إعلانات فيسبوك، وعلى الموبايل تقدر تربطها بجوجل باي وتدفع بيها في أي مكان.

البطاقة تقدر تشحنها بقيمة حتى 1000 دولار، وتقدر تستخرج أي عدد من البطاقات بدون حد، وكل ده بدون حاجة لتوثيق الهوية أو تقديم أي وثائق 🥷

تقدر تشحن البطاقة بعملات رقمية، بما في ذلك عملة Monero المشفرة تماما، ولأمان أكبر الموقع بيوفر نسخة على Tor.. بحيث تخفي وسيلة الدفع وتخفي معلوماتك الشخصية.

بذكر إن مسابقة توزيع 6 بطاقات بقيمة 300 يورو هتنتهي بكرة إن شاء الله، ولسه عندك فرصة تفوز بمشاركة بسيطة والتفاعل مع منشور الفيسبوك وفيديو اليوتيوب ♥️

الإعلان عن الفائزين في مسابقة البطاقات 🎉

الناس اللي فازت في مسابقة اليوتيوب تكتبلي كومنت على الفيديو فيه الإيميل الخاص بيها.

الناس اللي فازت في مسابقة فيسبوك تبعتلي رسالة على الصفحة فيها الإيميل الخاص بيها.

نشوفكم إن شاء الله في مسابقات قادمة ♥️

بعد 10 سنين من بداية المشروع..

شركة آبل قررت إنهاء مشروع السيارة الكهربائية ذاتية القيادة 🚗

الشركة واجهت مشاكل ضخمة من بداية المشروع لتطوير السوفتوير والخوارزميات الخاصة بالقيادة الذاتية للسيارة.. بالإضافة للمنافسة الشديدة في السوق، وسعر السيارة المرتفع اللي كان متوقع يوصل إلى 100 ألف دولار!

آبل استمرت في المشروع 10 سنوات.. اشتغل عليه 2000 شخص.. صرفت عليه 10 مليار دولار وفي الآخر فشل.

بعد 8 شهور من احتجازها.. الهند أفرجت عن حمامة متهمة بالتجسس لصالح الصين 🕵️

الحمامة اتمسكت بالقرب من ميناء مومباي، وكان فيه حلقتين معدن في رجلها عليهم كتابة صينية.

المخابرات الهندية أفرجت عن الحمامة بعد 8 شهور من احتجازها والتحقيق معاها، بعد ما تم التأكد إنها مش عنصر تجسس صيني، ولكن حمامة سباق تايوانية وصلت الهند بالخطأ.