العمته مسبيه يبجي يوميه وليله مينام
بكربله الباقر شاهد الحافر وحرك الخيام
المهدي بلا حيل ودمعاته تسيل وليله مينام
*****
الباقر كام للمهدي يشكي اليوم لوعاته
ويشوفه اشلون ذاك الصوط لاح امتون عماته
اشلون جروح كلبه اطيب المحتركات خيماته
عشر مرات شاغ حسين وشيحملها شوغاته

يشكي للمهدي ايكله يا جدي ضهري مكسور
بكل سنه اتعذب وما نست زينب ضيم عاشور
شيكضي الليل ودمعاته اتسيل وليله مينام
*******
مصايب كربله كلها شاف الباقر بعينه
ومثل عمته رقيه اهناك محروكات جفينه
اشكد بالطف ركض عالشوك وجانن اربعه اسنينه
امن الدخان كام ايصيح يا عمه الهوه وينه

دمه يتجاره وعمته محتاره بجمع الزغار
عالجمر ركضت وبالرمل ضلت اطفي بالنار
ورعبتها الخيل ودمعاته اتسيل وليله مينام
******





الباقر من يمر عاشور صحت يالمهدي شيصبره
شاف اشلون جده حسين حز بيده الشمر نحره
شاف حسين جوه الخيل وراح امن السحك صدره
شاف اشلون المثلث طلع يالمهدي من ضهره

عالرمل نايم وسلبو الخاتم وجسمه عريان
ايعاين الجده ودمعته بخده وكلبه عطشان
راوه الويل ودمعاته اتسيل وليله مينام
********
بدمعه ايخاطب المهدي الفاكد عمه شيسوي
عفنه اعله النهر تدري كمر مثل البدر يضوي
تدري بفركة العباس مثل ذيج الخيم تجوي
جانت شوفة العباس رغم ذاك العطش تروي

كطعو اجفوفه وزينب اتشوفه صاحب الجود
طاحت الرايه وعيلته بهايه تنطر ايعود
اشكد صحنه ادخيل ودمعاته اتسيل وليله مينام
********









يوصي الباقر المهدي وعجل صاح بالطلعه
كله الثار لا تنساه وسالت عالخد الدمعه
كل جمعه نكول اتعود ومرت شوف جم جمعه
سهم الصاب صدر حسين اشوكت بجفوفك اتشلعه

كوم اخذ ثارك ضاعت اخبارك وطال الغياب
اهلك انذبحو سم ذبح خلصو كل الاحباب
يا نجم اسهيل ودمعاته اتسيل وليله مينام
*******
تهد الحيل طبت السوك وعماتك صدك تعبن
وحده لاذت بوحده بخرابه وعالترب كعدن
يراموهن شفت بحجار وبالصوط اشكد انطكن
خدامات يردوهن وعماتك تره انهظمن

للقصر جينه وكلها تدرينه بجفنه الحبال
اتشمتت كلها وانه اصد الها والدمع سال
والصوط ايعيل ودمعاته اتسيل وليله مينام
******
تمت
تحسين الخفاجي

‏مقطع صوتي من تحسين الخفاجي

بعدهم مامشو وانه الهم اشتاكيت

بعده الضعن واكف خنگه صار البيت
انه عليلتهم انه عليلتهم

اكبالي همه وشكلي متغير صار
زغرت بعيني الدنيه ودموعي كبار
انه طبت كلتلهم وهسه بخير
كدامهم العب جنت وسط الدار
مشيت جدم صياد من امشي بخوف
عل لا يعثرني المرض كلبي بنار

بيه شكد وجع بس ماردت احجيه
حته وياهم امشي تحملت اخفيه
عليلتهم انه عليلتهم


ابيناتنه صار الحجي دمع عيون
خطار جنهم ساعه كلهم يرحون
ساعتها جنت اتمنه مانملك باب
وكدام عيني اهلي كلهم يبقون
كلولي ليش دواج عايفته اليوم
كلت المرض سهله الصعب من تمشون

تعبانه وحزن بيه يشيب الراس
بعد شويه ابوي يروح والعباس
انه عليلتهم انه عليلتهم


ضليت اخرهم وسولف بهداي
بلكت ابوي يكلي تمشين وياي
ياناكه اصعد بيها من هاي النوگ
حته احط اغراضي فوكاها وماي
حاجيتهم بس صوتي كلش مخنوگ
ماياخذوني وياهم انه ادري بهاي

الضعن لو راح مايبقه نحر بي صوت
ومن ازغر طفل لاخر چبير ايموت
انه عليلتهم انه عليلتهم


طلعو الباب وطلع مني الدخان
ماادري شنهي المحترك بيه الجان
محترك كلبي وروحي بس ماحسيت
ضل بالي صافن عل ضعن كلها احنان
الفزز صفنتي وكلي محتركه شبيج
لمن اجو فزعلولي كل الجيران

مايدرون بيه مفارگتلي احباب
يجرحوني اذا ذكرولي طاري الباب
انه عليلتهم انه عليلتهم

التارسين البيت وين اهل البيت
كالولي راحو وين وانه احتاريت
مايفهم المحروك بس المحروك
بضهر الضعن مو ماي انه تبديت
جانو بصفي اشتاك جا هسه شلون
لو ساحكتني الخيل هيج اتمنيت

جنت شجره ويأمن فوك راسي الطير
يبس ذاك الخضار وهسه موش بخير
انه عليلتهم انه عليلتهم

الشاعر
ابو فتيان الذهبي

‏مقطع صوتي من تحسين الخفاجي

بلياك ضاع العمر تانيتك انه اشكثر بويه يمسلم
محد مسحها الدمعه البعيني مو عادتك تمشي وتخليني
****
ردلي روحي يالخذتها الديره بعيده
انه طفله وصعبه بويه اصبح وحيده
اشلون كلي انطاك كلبك تترك حميده
كمت انادي بعالي صوتي مسلم اريده

يالفاركت دنيتي ياهو اليرد وحشتي بويه يمسلم
افراك الحبايب تدري ماذيني مو عادتك تمشي وتخليني
*****
فاركتني وبيك افكر ليلي ونهاري
بويه كامت بيه تحرك شمس الضهاري
فوك حزني وضيم كلبي مشتعله ناري
راسي شيب كلي يمته اتمر اعله داري

عايفني وانته الامل وغصني بغيابك ذبل بويه يمسلم
ارحمني بويه ولا تجافيني مو عادتك تمشي وتخليني
******








وين جنه بس وكتنه الما انصفانه
والتفارك حضن ابوها اتروح المكانه
ابنيتي تذكر من يكلها حلوه بلسانه
والابو اشكد بويه غالي وماكو بحنانه

بيمن اصبر الكلب ودموعي عالخد تصب بويه يمسلم
شوغات اخلص الليل تدريني مو عادتك تمشي وتخليني
****
دللتني وطول عمرك تعطف عليه
وبويه مسلم كل وكتنه جنه سويه
احلامي ضاعت من عفتني وشفت المنيه
بويه وينك شوف هجرك شمسوي بيه

عكبك حياتي انتهت والدنيه ظلمه اصبحت بويه يمسلم
ارجع دخيلك لا تبجيني مو عادتك تمشي وتخليني
*****











لا رساله ولا قميصك ويوسف غيابك
بس ونيني واثر جفك ضل اعله بابك
روحي صارت بويه هاجر وتبعت سرابك
وين اشوفك يالعذابي زيد عذابك

بالكوفه من تنذبح بطولي يصير الجرح بويه يمسلم
اتيتم ومحد يباريني مو عادتك تمشي وتخليني
*****
انته عمري وكل حياتي ومحلي دنياي
جنت انسه بويه همي من تكعد وياي
بالنيابه الماي اشربه عنك يرجواي
لان باجر راح بويه ما تشرب الماي

باجر تكلك هله بس طوعه المدلله بويه يمسلم
وياك رايح تاخذ اسنيني مو عادتك تمشي وتخليني
*******
تمت
تحسين الخفاجي

‏مقطع صوتي من تحسين الخفاجي

بايعناك يا كرار. جينه انجدد البيعه

تبقه انته ولينه. والرايه بدينه
**
هذا عيد الله الأكبر. علي مولانه علي
وطه رافع ايد حيدر. علي مولانه علي
الما يبايع علي يخسر. علي مولانه علي
والنبي هليله بشر. علي مولانه علي

والينه علي وللموت. حيدر والله منبيعه
عاهدنه نبينه. والرايه بدينه
*****
كل غدير انعيد احنه. علي مولانه علي
وللنجف نمشي بفرحنه. علي مولانه علي
يم علي يضمد جرحنه. علي مولانه علي
ما نعوفك والله صحنه. علي مولانه علي

بالكرار فرحانين وشمحلاها فرحتنه
ونبايع اجينه والرايه بدينه
*****
علي كلها هوستله. علي مولانه علي
والاملاك اتباركتله. علي مولانه علي
للصحن روحي خذتله. علي مولانه علي
وهاك هاي الروح كتله. علي مولانه علي


علكنه الورد والياس. وبحيدر تباهينه
غيرك ما هوينه. والرايه بدينه
*****
الله نزل بسمه ايه. علي مولانه علي
وعدنه ادله وجم روايه. علي مولانه علي
نفخر بحب الولايه. علي مولانه علي
امن البدايه للنهايه. علي مولانه علي


الما يعشك علي الكرار. لنحبه ولنريده
وبالهادي اقتدينه. والرايه بدينه
****
انكسر عيون الشماته. علي مولانه علي
علي بالبيعه اشحلاته علي مولانه علي
علي شفنه معجزاته. علي مولانه علي
وللنبي ناذر حياته. علي مولانه علي


ناده بالسمه جبريل. يله هنو مولاكم
وبشوك اعتنينه. والرايه بدينه
****
تمت
تحسين الخفاجي

نعي الليله التاسعه ليله الأكبر ع
***
ليلى تندعي ايعود بسلامه
وتفرفح بكت مثل الحمامه
تصيح الليل يبني اشلون انامه
ييمه اعليك كتلتني الملامه


رجع علي الاكبر من الميدان بعد قتل بكر ابن غانم وهوه يريد الجائزه من الحسين ع
***
يكله انطيني بس شربت اميه
بويه حسين ماضل حيل بيه
عطشان واحس ميتات اديه
ومن كثر العطش شفت المنيع

الساني امن العطش بويه تفطر
يبس ريجي وبعد عالعطش مكدر
انه سلوتك يابويه الاكبر
ونيران الضمه بالكلب تسعر

راح حسين لوليده وتعنه
ويموت بصف علي الأكبر تمنه
حضن بيده علي ورتفع ونه
وصاح اشلون جرحك اضمدنه

ينشال ينشال. ماضل بي كتر يا ناس ينشال
الهوه كال. ضاع اعليه يابويه الهوه كال
يوجع الدلال. تره افراك الولد يوجع الدلال
بيه الحمل مال. راح الاكبر وبيه الحمل مال

شبيه المصطفى اعله الترب نايم
واشوف بجثته اتسلب الوادم
عازم عالرحيل الولد عازم
وخلص دور الأكبر بعد جاسم

***
الشاعر
تحسين الخفاجي

نعي الليله العاشره ليله الحسين ع
******
ضل حسين وحده ايدير بالعين
ولا ناصر بكاله ولا بكه امعين
اعله حسين الزلم ملتمه صوبين
اشبيها الخيل داست صدر الحسين


ذبلان ذبلان وجها امن الشمس يا ناس ذبلان
عطشان عطشان. اشلون ايموت اخوي حسين عطشان
ميدان ميدان. لعبت فوك صدره الخيل ميدان
عريان عريان ثلث تيام ضل حسين عريان

بالمجاتيل بالمجاتيل. ادورنه رحت بين المجاتيل
اشمالها الخيل اشمالها الخيل هيج امكسره صدره اشمالها الخيل
يهدم الحيل يهدم الحيل حال حسين كلش يهدم الحيل
لو جلجل الليل لو جلجل الليل اتعنه للجسد لو جلجل الليل

امسلبينه امسلبينه. حرام حسين صحت مسلبينه
كاسرينه ضلع لحسين بالطف كاسرينه
ماخذينه. تره المحبس امن ايده ماخذينه
كالبينه جا ليش اعله وجها كالبينه


ويسيل دمه. ويسيل دمه لكيته اعله الترب ويسيل دمه
جسمه جسمه. انه امن الكاع الم اشلون جسمه
ونحت يمه ونحت يمه. لفيته بعباتي ونحت يمه
من الزمه من الزمه. اخاف الجم اجروحه من الزمه

ما يحجي وياي. حاجيته اشكثر ما يحجي وياي
مو عادتك هاي. صحت يبن امي ابد مو عادتك هاي
ما شارب الماي. صايرله اشكثر ما شارب الماي
سويتله افياي. عله جسمه اوكفت سويتله افياي

**
الشاعر
تحسين الخفاجي

نعي الليله السابعه ليله العباس ع
****
رديت رديت. ليش الوحدك يحسين رديت
ناديت ناديت. جا عباس اخيك وين ناديت
ونيت ونيت ونين الفاجده اعله الاخو ونيت
يظلم البيت. يظلم البيت. الاخو لو راح خويه يظلم البيت


متعوب متعوب صاح بصوت كلش خويه متعوب
والراس مصيوب عفته اعله النهر والراس مصيوب
خويه امشي يا صوب. اهناك تحيرت خويه امشي يا صوب
وجبدتي تذوب. احط كلبي اعله كلبه وجبدتي تذوب


يكلي حسين خليني بمجاني
ارد اشلون وسكينه تتاني
كلها امن العطش ضلت تعاني
وسهم العين ياخويه عماني



وجابني وياه. مو هوه الكفلني وجابني وياه
عباس فركاه. كاسر جم ضهر عباس فركاه
ذكراه. ذكراه. ابد ما راح عن البال ذكراه
بحماه. بحماه. جبت كل العمر عباس بحماه

كوم ردني. صحت عباس لهلي كوم ردني
نكع ردني. من كثر البواجي نكع ردني
اهواي هدني. تره افراكك يخويه اهواي هدني
تصدني. تصدني ردت عباس بعيونك تصدني

بالضيم اختكم. ضلت حايره وبالضيم اختكم
رايدتكم. رايدتكم. يخوتي لللشدايد رايدتكم
امجابلتكم. انه مثل اليتيمه امجابلتكم
امتانيتكم. امتانيتكم. تفزعولي يخوتي امتانيتكم

من عندي يخويه راح عباس
بعد بيمن ازامط ورفع الراس
صدرك راح جوه الخيل ينداس
وبخيمنه تكوم اتفرهد الناس

***
الشاعر
تحسين الخفاجي

نعي الليله الرابعه ليله ام البنين ع
***
فدوه يرحون فدوه يرحون. لحسين الولد فدوه يرحون
لو يقصرون لو يقصرون. من عدهم اتبره لو يقصرون
كلهم يضحون كلهم يضحون. انه ادري الولد كلهم يضحون
ويحسين يمشون ردت الكربله ويحسين يمشون

ربيت الأولاد ربيت الأولاد انه الهل وكت ربيت الأولاد
للشيب تنراد للشيب تنراد. تدرون الولد للشيب تنراد
بس كلشي ما فاد داويت الكلب بس كلشي ما فاد
ما هنه الزاد. من يوم الجفوني ما هنه الزاد

وديت وياه. وديت وياه. انه اشلون اربعه وديت وياه
فركاه. فركاه. عندي حسين غالي وصعب فركاه
وما اكدر انساه. انسه الاربعه وما اكدر انساه
اتريد ملكاه. اهواي ام البنين اتريد ملكاه

يبني يبني خل عينك عله اختك صحت يبني
ذبني ذبني يعباس الوكت بجفاك ذبني
كلبك يحبني. اخوك اتنصره اذا كلبك يحبني
سلبني. يبني النوم طاريكم سلبني

هاي انه اجيتك. اوكف يا بشر هاي انه اجيتك
تنعه لكيتك. شو بس عالولد تنعه لكيتك
ما ناشيديتك. عن ولدي ابد ما ناشديتك
بحميتك. بحميتك. وين حسين حاجيني بحميتك

تعالن يمي صحت وجابلني
وثغبن بالنواعي وساعدني
عله حسين الولد ما كطع وني
امن اتيهجن وضيع اعذرني
كل اولادي راحو سامحني
وين البي حميه راح مني
*****
الشاعر
تحسين الخفاجي

نعي الليله الاولى ليلة الهلال
*****
وياي وياي. جانو كل سنه ايكعدون وياي
عيناي عيناي راح امن البواجي تروح عيناي
بهداي بهداي. وي زينب صحت يا دنيه بهداي
رجواي رجواي عافوني اخوتي ونكطع رجواي



مالت مالت الدنيه اشبيها بس وياي مالت
شالت شالت وعني بعيد ذيج الزلم شالت
سالت سالت ذكروكم امس والعين سالت
كالت كالت. زينب وين اهلها الناس كالت

البي محنه ليش ايروح صحت البي محنه
ونه اعله ونه. كضيت العمر ونه اعله ونه
مشلوعه منه. احس وصله الكلب مشلوعه منه
اليوجعنه اليوجعنه تره كلش اثكال اليوجعنه

مدري شجاها. روحي تريدكم مدري شجاها
خذها خذها. الوكت دولبني واحبابي خذها
وراها وراها. تفر ايتامكم وركض وراها
احركاها احركاها. الخيم ليش الشمر خويه احركاها

وتريد خوان. تره العشره الطويله اتريد خوان
ما جان ما جان. افاركم يخوتي بساع ما جان
وليان وليان. ما عندي صفت يا ناس وليان
نحلان نحلان جسمي امن التعب والضيم نحلان

ما عندي كرابه ولا عشيره
ويحدي بناكتي الما عنده غيره
اطلعت بالهيمه والوادم جثيره
والمن ناضري احتاريت اديره

*****
الشاعر تحسين الخفاجي

نعي الليله السادسه ليله الانصار
****
انصار انصار كل احنه لبو السجاد انصار
وخذنه الداور. تقاسمنه المنيه وخذنه الدوار
ما تعرف اعذار ما تعرف اعذار تره انصارك ابد ما تعرف اعذار
ايبين الحار. امن عيونه يالغالي ايبين الحار


اجينه اجينه عفنه بيوتنه ولحسين اجينه
وعلينه علينه. ودم اركابنه شاهد علينه
وفينه وفينه. اشما ضحينه الك ماضن وفينه
بينه بينه. جمره امن الخيم يحسين بينه

طلع شيخ الأنصار وصاح حيهم
والانصار طلعو ركض كلهم
بجه وعن كربله ضل يحجي الهم
وزينب خايفه من عدنه كلهم

صاح بصوت زينب لا تخافين
انضحي ارواحنه ومنعوف الحسين
باجر ندخل السوح الميادين
وانتي رايح تشوفين بالعين


رفع جفه حبيب وصاح اطلعو
وبذيج الصوارم كومو هوسو
بخيمة بت علي استعراض سوو
ولحسين بدماكم رحو ضحو
***
الشاعر
تحسين الخفاجي

نعي الليله الخامسه ليله مسلم ابن عقيل ع
**
مسلم ضل وحيد ايدير بعيونه
وكلهم راس ابن عقيل يردونه
اشلون امن القصر مسلم يذبونه
سفير حسين يا وسفه يغدرونه

يكللها يطوعه كومي شجعيني
وبحملات حيدر عمي ذكريني
هذا اخر وداع البينج وبيني
ومن كل الجهات محاوطيني

ويدير بالعين. مسلم وحده ويدير بالعين
يحسين. يحسين. ارجع لا تجي للكوفه يحسين
وبديلك امنين. باعوها الذمم وبديلك امنين
والناس صوبين. ابن عمك وكع والناس صوبين

سدو البوب. بوجه مسلم الوادم سدو البوب
لو عدهم اكلوب. ما طردوه ابد لو عدهم اكلوب
وبعيده الدروب مسلم وحده وبعيده الدروب
بدوها الحبوب. بدوها الحبوب. من صاح العطش بدوه الحبوب

صاح حسين جيبولي حميده
ويمسح راسها كل ساع بيده
ون حسين والونه شديده
وكللها بعد صرتي وحيده

ولخوتها راحت. ركضت حايره ولخوتها راحت
خيمتنه طاحت. صاحت يخوتي خيمتنه طاحت
واخوتها ناحت. سمعت بالخبر وخوتها ناحت
يابويه صاحت. ليش تعوفنه يا بويه صاحت
****
الشاعر
تحسين الخفاجي

نعي الليله الثامنه ليله القاسم ع
**
خيبت الاحلام خيبت الاحلام. عفتني بغربتي وخيبت الاحلام
يوم امن الأيام. بيك افرح كلت يوم امن الأيام
الليل ما نام. الليل ما نام عكب عينك ييمه الليل ما نام
يبني يجسام. يبني يجسام دولبني الوكت يبني يجسام

من يكعد وياي. يمحلاته الولد من يكعد وياي
لتضيع ارباي. لتضيع ارباي يوليدي صحت لتضيع ارباي
وهملت عيناي. وهملت عيناي ذكرتك يالولد وهملت عيناي
من روحتك هاي. تره كلبي انشلع من روحتك هاي

ماكو بمعزته. يايمه الولد ماكو بمعزته
للشيب ردته. للشيب ردته. تدرون الولد للشيب ردته
وابني فكدته. صوبني الدهر وابني فكدته

جناز جناز. ردتك يبني بيه تروح جناز
تحتاز تحتاز. كل ام للولد تدرون تحتاز

عريس عريس حسبالي اشوفك يبني عريس
شو صاير ايجيس. افراكك بالعظم شو صاير ايجيس

المحنه. راحت يبني وياك المحنه
كتلنه. افراكك يالرحت والله كلتنه
شيريد منه فركنه الزمن شيريد منه
وحنان جنه. نضحك للهوه وحنان جنه
يبست الحنه. يجاسم من رحت يبست الحنه

شو محد يكلي اشلون صرتي
وبس الفاجده اتحس بعبرتي
يبني وياك راحت كل فرحتي
وما نشفت يبعد امك دمعتي

****
الشاعر
تحسين الخفاجي

نعي الليله الثالثه ليله العليله
****
يا دار يا دار. وحشه خاليه امن الاهل يا دار
مكطوعه الأخبار من عدهم صحت مكطوعه الاخبار
كلبي اشتعل نار. عكب الحملو كلبي اشتعل نار
يجوي الدمع صار. يبويه بفركتك يجوي الدمع صار

طفله وعليله. عافوني هلي طفله وعليله
واشتكيله.وشتكيله محد من هلي ضل وشتكيله
مينام ليله. المضيع ابو مينام ليله

ما خذوني ما خذوني. خذو كل البنات وما خذوني
وتعذروني وتعذروني. اجيت اعله الضعن وتعذروني
وجزوني وجزوني. عبر ليش مني يمي وجزوني
يعمن عيوني. اعله يا ساع صحت يمعن عيوني

يا حال حالي. من عكب الاهل يا حالي
الما عدها والي. تضل مدوهنه الما عدها والي
يرتاح بالي. يمته امن الحزن يرتاح بالي
والبيت خالي. ادور عالمشو والبيت خالي

واحبابي غياب دمع عيني يصب واحبابي غياب
واكعد عله الباب. كل يوم اليمر اكعد عله الباب
احا يالتراب. دافن جم عزيز احا يالتراب
يا ناس تنهاب. تره العده ابو يا ناس تنهاب

***
الشاعر
تحسين الخفاجي

نعي الليله الثانيه ليله الخدام
*****
خدام خدام. اشكد هاي السنه امضيعين خدام
الايام الايام. يبويه فركتنه اشلون الايام
كل عام كل عام عزاز افكد كمت يا ناس كل عام
يلتام يجرح الكلب كلي اشلون يلتام

نامو بالتراب اليسون العتب نامو بالتراب
وركض عله الباب. تندهني الصور وركض عله الباب
ما طاب ما طاب. تره جرح المشو لليوم
وتحمل اصواب بعد ما بيه اون وتحمل اصواب

حنيت ليهم. عرضو بالهوه وحنيت ليهم
واشلون اجيهم ركض لو ممشه حرت اشلون اجيهم
والزم اديهم امنيتي امن العمر الزم ايديهم
ونشد عليهم. كل مغرب اون ونشد عليهم

وفتر بالكبور. امر اعله النجف وفتر بالكبور
لو طاح معذور. عله احبابه الكلب لو طاح معذور
وشعل بالبخور. اصد لكبورهم وشعل بالبخور
رديت مكسور. توني امن الدفن رديت مكسور

اعمن يالعيون. صحت اعله المشو اعمن يالعيون
والما يزعلون. نامو بالكبور الما يزعلون
بيه يمرون. يمته احبابي جا بيه يمرون
واشلون بشلون. العمر خلصته كله اشلون بشلون

****
الشاعر
تحسين الخفاجي