كنت قاعده وماسكه تلفوني فجأه صحبتي اتصلت لي اول ما رديتها سمعت صوتها وهي بتبكي قلت ليها مالك؟! قالت لي : تعالي سرعه وقبل ما افهم منها حاجه قفلت...خفت عليها شديد وجري مشيت ليها ‘الحمدلله بيتهم ما بعيد مننا 5 دقائق ووصلت بيتهم لقيتها مستنياني جنب باب الشارع ووشها مورم من البكاء جرتني من يدي وقالت لي : اخوي اخوي ما عارفاهو مالو فجأه كدا اغمي عليهو وقدر ما حاولت اصحيهو مل صحى..قلت ليها : طيب روقي روقي ما ح تحصل ليهو حاجه اطمني...انتي مش قلتي لي انو عندو سكري؟...قالت لي: اي عندو ، قلت ليها : طيب عندك فكرة وين خاتي حقن الانسولين؟...قالت لي: اي عارفة، قلت ليها : امشي سرعه جيبي لي واحدة ، مشت وجات شايله واحدة فى يدها....شلتها منها بسرعه واديتها ليهو ، ومشيت منو قبل حتى ما يصحى... بعدها بكم يوم صحبتي جاتني ومن غير اي مقدمات قالت لي: انا عايزاك تعرسي اخوي...قلت ليها: كدي بسم الله...مالك يختي؟...اخوك دا لعبه مثلآ!...ما ينفع تفرضي عليهو حاجه هو عندو عنها فكرة قالت لي : ما عايزة افرض عليهو اي حاجه بس اخوي ذي ما انتي عارفه عندو سكري ومفروض يهتم بنفسو وكدا بس هو ما مدي الموضوع اي اهمية وممكن عادي يكون لافي اغلب اليوم او اليوم كلو وهو مياكل وجبة واحدة دا غير انو ما بهتم بمستوى السكر وعادي ياكل حاجه سكرها كتير او ما ياكل اصلآ وصراحه يعني الموضوع دا موترنا شديد انا وامي خايفين يضيع مننا ولقينا انسب حل اننا نعرس ليهو عشان الاقل يكون عندو زول بهتم بيهو وعشان احنا نطمن عليهو... قلت ليها : وما لقيتي زوله غيري؟...قالت لي: السبب الخلاني اختارك انتي بالذات هو انو اليوم داك لما هو صحى سألني :الأداني حقنة الانسولين منو؟...قلت ليهو : فلانه وقتها هو ابتسم ابتسامه مريحه وقال لي: فاتت!.. هزيت ليهو راسي قال لي : ليه يخ كنت عايزة اشكرها... فبس يعني انا حسيت انك الوحيدة البقدر اعتمد عليك وفى نفس الوقت حاسه انو فيكم خير لبعض...قلت ليها:بس.....قاطعتني : قولي خير...قلت ليها : طيب اديني فرصه استخير ولبكره بوريك قراري....اليوم عدا استخرت ونمت على طول واتفأجات اني صحيت مرتاحه شديد وقتها من غير اي تفكير رسلت لصحبتي "خير"...صحبتي ما صدقت كلمت اهلها واخوها وما تميت اسبوع لقيتهم فى بيتنا...كنت خايفه ومتوترة انا كيف ح ابدأ حياتي مع انسان ما بتجمعني بيهو علاقة حب ؟....بعد فترة من الخطوبة وقبل العرس بفترة لقيت نفسي بحبو كيف ومتين؟!.. الله اعلم، بقيت بهتم بأدق تفاصيلو ومعاهو فى يومو لحظة بلحظة ما لاني مفروض اعمل كدا لا لانو بجد بهمني انو يكون كويس وما يمسو اي اذى لانو بطريقة ما اذا هو اتأذى انا بتأذى اكتر منو.

مرات بتحصل معانا حاجات ما بنكون عاملين ليها حساب... حاجات بتودينا فى سكه ما عارفين نهايتها وين؟..بس اكيد نهايتها خير.

#فاطمة_عمر💙💫.

فى ليلة مظلمة كئيبة وبائسة التقيت به في إحدى طرق المدينة حينها ولأول مره لم ترتعش يداي ولم يرتجف قلبي ولم أعد أراه كما أريد او كما يريد قلبي بل أصبحت أراه كما هو....اراه على حقيقته المريعة الحقيقة التي تجاهلتها لأعوام..اصبحت واخيرآ منطفئه تجاهه....مررت بجانبه ولم انظر إليه قط فقد عاد غريبآ كما كان.

#فاطمه_عمر💙

قال : جاتني فترة فى حياتي كنت ماري بظروف صعبة شديد لأني كبير البيت وعلي مسؤولية أخواني وأمي واموري جايطة شديد وما فاهم آي شي في الدنيا....وسط كل دا هي دخلت حياتي عشان ترتبها، ما عارف كيف بس هي حبتني شديد حبتني من كل قلبها كانت صادقة فى مشاعرها... كانت معاي فى اسوأ لحظات حياتي ، ورغم أنو هي مفروض تتسند علي بس سبحان الله عمرها ما ضعفت بالعكس كانت هي البتسندني وتطمني كنت كل ما أشوف وشها بحس انو الدنيا لسه فيها حاجات حلوة...كنت بقول ليها: أنا حاسي إني مقصر فى حقك...بتقول لي: أنت عملت العليك وزيادة...بقول ليها : لطافتك دي ما كتيرة علي!....بتبتسم ابتسامتها المريحه دييك وبتقول لي : انت ماف شي كتير عليك،وروني بس كيف ما احبها؟؟....وهي حتى الحب قليل فى حقها.


قالت: كنت مخطوبة لواحد ما بحبو ، قررت انفصل عنو بس نزلت امتحانات وبقيت مضغوطة شديد فأجلت الموضوع بعد اخلص امتحانات...وفى الفترة دي بالذات عرفت شخصيتو حقيقية عرفت قدر شنو هو حنين وقدر شنو؟...هو يحبني ، جاءني لحظات كنت بنهار ويبكي لأني ما قادرة اقرأ وهو على طول كان بكون معاي بتصل لي ويساهر معاي ويحنسني ويطلعني مشاوير كل ما القراية تكتم فيني مع انو ما مجبور أصلا يعمل كدا بس هو بعمل كدا عشان بحبني، طب ينفع اسيبو بعد كل دا؟...ينفع اسيبو بعد ما انا بعتو وهو اشترى الدنيا كلها عشاني؟...بقيت متمسكه ليهو اكتر من حياتي لأني ح ابقى جاحدة للنعمه اذا سبتو.

#فاطمة_عمر💙💫.

قالت : لما اكون ماشه معاه م بمسك يدي بمشي جنبي بس بدخل يدينو فى جيوبو ومن ما ارتبطت معاه م حصل صافحني لما سألتو ليه بتعمل كدا قال لي: انا م عايز يدي تمسك يدك الا لما تكوني حلالي عايز احافظ عليك لاني دايراك لقدام .
#فاطمه_عمر💙💫

يوم كالعادة كنت قاعدة فى حوش الجامعه براي جو بنات من دفعتي ماشين بجنبي بكل استهتار واحده منهن قالت لي: ها المتوحدة دي وقعدت تضحك هي وصحباتها...اضايقت شديد قمت من مكاني وجريت اشوف لي مكان ابكي فيهو....ماشه سرعه سرعه ولما خلاص فاض بي وقفت وبقيت ببكي،فجأه كدا سمعت صوت زول وراي بناديني: يبت يبت...اتلفت عليهو من غير ما انتبه اني ما مسحت دموعي....عاين لي اتخلع لما شاف وشي قال لي: البطاقة دي وقعت من شنطتك وكنت بنادي فيك بس انتي ماشه سرعه وشكلك ما انتبهتي لي...شلتها منو من غير ما اقول ليهو شكرآ سكت مسافة وقال لي : بقدر اساعدك فى شي!...وانا اصلا قاعدة على الهبشه من قال لي كدا اخدت راحتي فى البكاء...والولد اتخلع وبقى ما عارف يتصرف كيف!...قال لي: بسم الله يبت كدي روقي مالك فى شنو!...قلت ليهو : اول شي ممكن نقعد!..قال لي: طيب ، قعدنا وبقيت متوترة وما عارفه اقول ليهو شنو...هو زهج شديد وقال لي: عايني انجزي ما فاضي ليك انا...زعلت شديد وقمت مشيت منو....لحقني وقال لي: اسف ما قصدي ازعلك بس مشكلتي اخلاقي ضيقه شديد، قلت ليهو: ما مشكله حصل خير...قال لي: ما ح تحكي لي!...قلت ليهو: احكي ليك شنو!..قال لي: الفى بالك...قلت ليهو: بس احنا ما بنعرف بعض...قال لي: المشكله وين!..هسي بنتعرف ولا يهمك يستي....وانا بعد كلمة يستي دي بقيت شايفه قلوب قلوب ، قعدنا واتعرفنا على بعض وبعدها حكيت ليهو قبل كذا سنه كدا مريت بفترة صعبه كانت قاسيه علي شديد بغض النظر عن الاسباب الانا بسببها دخلت فى اكتئاب ومنها اتطور الموضوع لما بقي توحد فقدت قدرتي على التواصل مع الناس بقي عندي فوبيا من المجتمع عمومآ والمشكله الكبيرة انو ماف زول فكر يساعدني بالعكس هم شايفين الموضوع مضحك لدرجة اني بقيت ما بطلع مكان عشان نظرات الناس لي بمشي بالدس اقابل دكتور نفسي متخيل معاي!..كل دا وانا ما طالبه منهم شي غير انهم يتقبلوني ذي ما انا وما يحاولو يصلحوني لاني ما ناقصه انا انسانه ذيهم بس مختلفه عنهم....حقيقي انا ما عارفه بتكلم معاك كيف من غير اي خوف او توتر...قال لي: بتقدري تثقي فيني وتعتبريني صحبك من اللحظه دي وتنسي تمامآ فكرة انك وحيدة!..قلت ليهو : ح تساعدني وتكون جنبي وتطمني لما اخاف !...قال لي: وح اتقبلك ذي ما انتي وما ح اسمح لزول يغلط فى حقك.


الفكرة انو ما من حقك تحكم على زول لمجرد تصرفاتو لانك لا مريت بالمر بيهو ولا حسيت بالحس بيهو.

#فاطمة_عمر💙💫

بقولوا لصائم دعوة لا ترد؛ كنت بدعي على طول" اللهم كما اذنت لعروقي ان ترتوي؛ فأذن لقلبي ان يرتوي به؛ حتى اقول ذهب ظمئي وابتلت روحي ولم يعد هناك من شوق يلتهب جوفي واللهم كما رزقتني ماءآ ذلالآ يرويني فأرزقني قلبه من حيث لا ادري ولا احتسب"...انا بحب ود خالتي...بحبو شديد بس ما عندي الجراءة اني اقول ليهو كدا...هو كان كراش الطفوله كنت بشوفو لما صغيره مره او مرتين فى السنه نسبة لانو كان بكون شغال جامعه وكدا بس مع ذالك كان فى كل مره بشوفو فيها كنت بحس انو بخطف قلبي اكتر ؛ بعدها بكم سنه انا دخلت الجامعه ولحكمه يعلمها الله دخلت نفس المجال ال هو كان بقراهو....المهم هو بطريقه ما عرف اني بقرأ نفس مجالو ؛ جانا فى البيت وانا طبعآ لما شفتو ما عارفتو الود طاقاهو سماحه كدا استغفر الله بس وانا ما باقي الا اسوح ؛ شال رقمي وقال لي: اها ي سجى من هسي كان غلبك شي رسلي لي طوالي من غير تردد...اي هسي انا اتخرجت واشتغلت ويمكن اكون نسيت حاجات كتيره بس برضو ح اساعدك قدر ما اقدر ؛ قلت ليهو: ان شاء الله....وكنت طايره من الفرح يعني واخيرآ ح اتكلم مع فادي ، بعدها بفترة رسل لي وبقيت متواصله معاهو عادي وبحاول بقدر الإمكان اني ما اتخافف ولا اتهور وانا اقسم بالله قاعده على الهبشه كان ضحك معاي ساي بقول ليهو بحبك؛ بس الحمدلله ربك ستر ونزلت جامعه وبقيت ما فاضيه للفارغه بس النصيحه بالي معاهو هو بس...المهم ما اطول عليكم فى النهايه الحمدلله دعواتي ديك كولها استجابت وربنا رزقني قلبو بعد طول انتظار...ولكم ان تتخيلو ردة فعلي لما عرفت انو فادي حبيب قلبي اتقدم لي لا عرفت اضحك لا عرفت ابكي...كنت بس بقول الحمدلله نلت الحمدلله ؛ على قدر ما انا كنت بريئه وانا بطلبو من ربنا على قدر ما ربنا ثبت حبو فى قلبي وحقق لي كل امنياتي بأني اكون معاهو.

#فاطمة_عمر💙💫

_انا بحبك.
_عارفه.
_حلوه عارفه دي... طيب انتي!
_لا انا ما بحبك.
_ليه بس!...وريني انا ناقصني شنو!
_ما ناقصك شي؛ بس كدا ما بقدر اتخيل اني معاك...ما عارفه ليه بس الفكره دي بترعبني شديد.
_ليه بس!..انا داير سبب مقنع عشان اقدر اخليك فى حالك، لي سنتين بحاول اقنعك اني بحبك بس انتي رافضه تمامآ الفكره دي ودائمآ اجابتك بتكون ما بقدر....داير اعرف ليه بتقدري!
_طيب ح اشرح ليك لأخر مرة ؛ عشان انا احب لي زول محتاجه حيل... وانا ما عندي حيل احب او اتحب ؛ بحس احساس الحب دا تقيل علي واني ما قدروا....عارفه كويس قدر شنو انت عانيت معاي فى السنتين الفاتو بس صدقني حاولت بقدر الإمكان اخلق ليك مكان فى قلبي بس ما قدرت....وحتى حبك الكبير لي انا شايفاهو بس ما قدرت احس بيهو ؛ ممكن عادي اكذب عليك واقول ليك بحبك بس لانك بتحبني لكن لمتين ح استمر فى الكذب لمتين ح امثل اني بحبك وانا ما حاسه ولا بشي تجاهك !.
_يعني دي نهاية الطريق!
_طريقنا من زمان انتهى بس انت ما اتقبلت الموضوع وفضلت عايش فى امل اني فى يوم ح احبك بس للاسف ما حصل وحتى لو انا حبيت زول ما يكون انت...اسفه.

ساعات بنقضي عمرنا كلو فى اننا نبرر لزول عدم تقبلنا ليهو....هو بكون مندفع تجاهنا بس احنا ما بقدر نمشي ولا خطوة تجاهو بس عشان ما هو الإنسان البنحس معاهو بالإنتماء.

#فاطمة_عمر💙💫

بعد ما اتشاكلو شكله كبيرهه وكان باين انو خلاص دي النهايه :
_مدام انا منكده عليك عيشتك كدا انت ليه معاي !..سيبني وشوف ليك واحده تانيه تسعدك انا ما بقدر اكمل بالطريقه دي...كل ما اكون عايزه افرحك بزعلك وبعصبك وبدل ما احببك فيني بكرهك فيني.
_لا يستي مستعد اتحمل غباءك وتصرفاتك الطفوله وعنادك ومشاكلنا بس كلو الا اسيبك هو انا لقيتك واقعه فى الشارع!..عشان اسيبك كدا ؛ المهم يستي انا الغلطان وانا الاسف.


#فاطمة_عمر💙💫

قالت : اول م اتعرفت عليهو كنت بكرهو وم بحب اتكلم معاه م عارفه ليه !...بس بعد مده كل الكره داك اتحول لحب لدرجة اني م بقدر اكمل يومي من غير صوتو الشين دا هو ولد عادي وم فيهو اي مميزات وكمان ملان عيوب بس انا حبيتو وم لي غيرو فى الدنياوصدق من قال " لا تجادلني فى شخص تراه بعينيك واراه بقلبي💙"

#فاطمه_عمر💙💫

حبيبي من النوع العصبي شديد واخلاقو دي ضيقة لدرجة كان هظرت معاهو ساي بجوط ويتنرفز ويتعصب ويقوم الدنيا ويقعدها وانا طبيعي فى حالة تهذيئ بسبب العصيبه دي بس برضو ما بقدر ما اعصبو اصلا انا بحبو شديد لما يعصب لدرجة اني مرات بخلق مشكله من ماف عشان بس اعصبو وهو حفظ الحاجه ف بقى بعد كل مشكله بقول لي اها ان شاء الله ارتحتي!...اها مره انا زوتها شويتين كدا وهو زعل مني على شنو ما عارفه!....ما اشتغلت بيهو اصلي ؛ عدا يوم ويومين وتلاته واسبوع وانا قلبي اكلني...اها طلعت من البيت ماشه لي مشوار كدا كان اشوف ليك زولي الما بغباني ماشي مع واحده ؛ مشيت قريب منهم اسمعها بتقول ليهو بصوت مايع كدا حبيبي وطبعآ ما سمعت الباقي اصلا...اسكتهم ليهم انا؟...وقفت قدامهم وقلت ليها : شنو شنو شنو!... حبيبي!...حبه تقوم ليك فى نص راسك؛ وبعدين دي شنو المياعه دي !...حركات البنات دي ما بحبها ،عاينت ليهو وقلت ليهو : من متين بقى زوقك كدا!...وهو كاتم الضحكه بالعافية...مسكتو من يدو وقلت ليها: عايني حبيبه دا حقي انا وكدي تاني ابقي مرا قربي عليهو عشان باقي خصلك العاجبك دي اطلعها ليك عشان كده احسن تتلمي ؛ البت ولا اتفاهمت معاي جرت طوالي...هو عمل نفسو زعلان وجادي وقال لي: دا شنو العملتي دا!...قلت ليهو : اسمعني هنا نتشاكل ونتنابز ونبلك بعض واي شي بس كان يوم لقيتك مع واحده بمعط ليها شعرها وبقلعك منها فاهم!...ضحك وقال لي: صراحة خفت منك ...وانا عملت دا كلو عشان اعرف هل بتحبيني ولا لا ؛ وماف اي بت ح تاخد مكانك فى قلبي اطمني يستهم بحبك ؛ وانا طبعآ اعجبكم فصلت ذي الما حصل شي 😂💙.

#فاطمة_عمر💙💫

مرحباً !..
لا أعلم لماذا احببتك لهذا الحد لا أعلم متى أو أين أو لماذا او حتى كيف احببتك لهذا الحد لقد جئتني فاحتحمتني ويآله من اقتحام مريح انت كنت ولا زلت إستثنائي عنهم أنت لمن تتحجب تحت غطاء انا أفضل منهم لا انت اخبرتني بكل عيوبك ومع أنها لا تعد عيوب تقول إنك عصبي المزاج سريع الغضب أحمق لا تحب المرأة كتيرة الكلام لا تميل إلى كلام الغزل جاف الطبع شديد الغضب هذه كنت تكررها لي عدة مرات ورغم كل هذه احببتك اكثر واكتر عندما وجدتك لا تحب الكذب هنا انا عشقتك ، حسنا لنأتي للجانب الأكثر إشراقا من الجانب الماضي انت لا تعلم أن خلف كل هذا الغضب وهذا البعد لا أدري ولكن يراودني شعور أنك أحن إنسان .
أتيت على حسب تخيلي لفتى الأحلام أبا الجميل ♥️.
لم تدرك أنك أتيت على حسب نظرتي للعالم وأنت لم تدري أنني اردت أن أدخل لحياتي رجل لحسم الفوضى فيها رجل ينهش كبريآئي وها انت ذا لا أنكر أنني في بادئ الأمر كنت اغضب لأنني لم اتعود على القسوة وإلى الآن لم اتعودها لأني لا أحبها لكني سأحبها لأجلك . ♥️
لن أنسى نبرة صوتك عندما قلت لي لا تبكي فإن الله يحاسبني على كل قطرة نزلت من جفنيك بسببي في وقتها قلت لك لا وبعدها شرحت لي معنى الكلام وسبحان الذي روحي بيده في صباح اليوم التالي فجأة وإذ انا أسمع قوله صلى الله عليه وسلم يقول " إذا دمعت عين أنثى بسبب ظلم رجل لعنته الملائكة ..... إلخ " لكن لا أعلم إلا أنك منذ ذلك اليوم وانا أقرر إلاّ أفرط في اشيائي .
أحبك عندما صافحتني أحبك عندما حدقت بي أحبك عندما أعلنت لي واحبك عندما تفعل كل شيء لاجلي واحبك عندما قبلت خدي اليسار وأتذكر إني حينها لم اغسل وجهي بالماء حتى ذهبت إلي المنزل ولم أقبل لصديقاتي أن يقبلنني فيه ♥️ .
عيناك مدائن قلبي ومدى تفكيري ♥️
"أحبك بعدد موتى الجزائر ♥️ ."

#زهراء_سليمان.

قالت ليهو انت ليه بتعصبني وبتخليني اتنرفز وبتغير لي مودي خلف خلاف ليه بس ممكن أفهم هل انا ما بستحق أعيش زي زي أي بت عايشة مع الإنسان اللي هي بتحبو .... اتفضل جاوبني م تفضل ساكت وتوترني ..... ؟! 😔
اخد نفسي عمييييق شديد وقال
" كل إنسان ليهو طريقتو في الحب ⁦♥️⁩ 🐾 وانا طريقتي مختلفة ومعقدة بس نتفق إنو انتي حبيتها واتعودتي عليها ....
قاطعتو قالت لأ م بحبها وما اتعودت عليها
قال ليها ليه لما يمر يوم وما ازعلك وانرفزك فيهو بتسأليني مالي الحاصل فيني شنو ، وبتقولي انا زعلان أو كدا ودا تعويد انتي اتعودتي
+ أنا بحب أحبك بالطريقة دي لأنها الأنسب معاك لما ازهجك وتتنفسي زي الثعبان ياخ انا بموت فيك ولما اتغزل فيك وتقعدي تتخجلي لياا هنا انا بفقد السيطرة على نفسي عديل والله ولأنو عارف تماماً لو غيرت طريقتي معاك بتحسي إني بآذيك ولاني ما برضى انو تتأذي بفضل الطريقة دي أحلى ♥️ 🐾 ،
قالت ليهو لخبطت لي كياني عفيت عنك يولدي
" الحاجة العايزة أوصلها ليكم إنو نحنا كنساء بنحب التناقض شديد بمعنى إنو تكون كدا لكن كداا او مثلاً عصبي لكن حنين 💙🔐 ، حاد الطبع لكن معاي عكس ، + بنحب الاختلاف يعني نحنا بنحب الإنسان البخلينا نحس إنو نحنا لازم لازم نتحب بطريقة مختلفة لازم الإنسان البنرتبط معاهو دا يتشاقى عشان ما يصل لي الطريقه الصحيحه الحيعاملنا بيها ♥️🐾 ، فشنو لازم تجتهدو وتعافروا عشان تلقو صاحبة النصيب ♥️♥️♥️🐾 "

#زهراء_سليمان.

قالت :
مره كدا الجو كان رهيب وفيهو ريحة مطرة كدا وانا اصلا حبقلبي طيب البحر ف ما قدرت امسك نفسي الجو فارض نفسو شديد اموت واكل لي طين بحر...حنكت اختي تمشي معاي البحر لانو ما بعيد مننا الحمدلله يعني ؛ بقيت بحاول اقنع امي وهي بترفض بس انا عويره ولايوقه وما بخليها الا تخليني امشي...عملتها ليها صداع عديل قالت لي : خلاص امشي بس اوعك تتأخري وكان اتأخرتي بكلم ليك ابوك؛ قلت ليها : ابوي دا خليهو علي انا بقدر عليهو ،لبست لي اقرب عباية ويالبحر جاك زول...اها مشينا هناك وكان فى شلة بتاعت اولاد سمحيين سماحه النصيحه عاد، بس انا ولا هببتهم...فاضيه ليهم انا!...همي الوحيد اكل طين بحر...شلت لي قطعه طين من الارض واكلتها هم لما اتخلعو بالله باكل فيها كأني باكل فى شوكولاته.

قال:
يوم انا وفردي مشينا البحر العصرية كدا ، كنا قاعدين فى امان الله فجأه جات واحده كدا مجنونه رسمييي نقرت شالت ليها قطعة طين واكلتها لا وكمان طلعت ليها كيس ملتو طين ومشت وشايفها كل مره تفتحو تشم ريحتو وتتبسم ذي الهبله ، انا ما عارف مالي بس لقيت نفسي مشيت ليها ووقفت قدامها وقلت ليها : يبت بتمرضي ح تاكلي دا كلو!..قالت لي: ويعني كان مرضت!..قلت ليها: لا انتي مثلا ما بتقرفي بتاكلي كدا ساي هسي كم انسان وحيوان ماشين فى الطين دا انتي عارفه هسي يمكن فيهو مرض....عاينت لي بنظرات ثابته وقالت لي: اي دونت كير....ومشت خلت خشمي ملح ملح.

قالت:
كنا مسافرين انا وامي واختي البلد ؛ ومعروف انو اثناء السفر العربية بتخش الطرمبه عادي....وانا واحده من الناس كنت بستني اللحظه دي بفارغ الصبر ؛ اول ما شفت اننا قربنا على الطرمبه قلت لأختي زحي لي اقعد جنب الشباك قالت لي: ابيت.....قلت ليها: بس مسافة ندخل الطرمبه ونطلع لانك اصلا بتتحسسي من الريحه ؛ زحت لي قعدت جنب الشباك وبقيت استنشق فى الهواء ذي الكأني بستنشق فى مخدرات لما حسيت نفسي سطلت عديل....اها بعد ما رجعت مكاني حصل موقف ما بنساهو طول عمري.

قال:
بعد ما لاقيتها فى البحر ما اتوقعت الاقيها مره تانيه بس لاقيتها...جاتني سفره ضروريه شديد وكانت سبحان الله لحكمه يعلمها الله....كنت قاعد عادي فى الباص ومركب سماعاتي فى شي قال لي طلع سماعتك دي اول ما طلعتها سمعت صوت ما غريب علي معقوله دي هي !..لا ما اظن لقيت نفسي بميل لورا اكتر عشان اسمع صوتها وكلامها ؛ لما وقفنا فى الطرمبه وسمعت العملتو اتأكدت تمامآ انها ما طبيعيه وانو راسها دا فيهو شي ما تمام...انسانه غريبه عجيبه بس برضو تصرفاتها كلها عفويه وطفوليه ويمكن دا الشي اللفت انتباهي؛ الصدفه لمتني بيها مرتين خليها للمره التالته!...اكيد لا ؛ من غير اي تفكير لقيت نفسي اتلفت عليهم ورا وقلت لأمها معليش انا عاوز بتك دي! قالت لي: كيف يعني ؟...قلت ليها: عديل على سنة الله ورسوله...قالت لي: بس ..قاطعتها: اديني رقم ابوها وانا بتصرف...ادتني رقم ابوها وهي ساكته ما قالت ولا كلمه؛ قلت ليها: معليش بتك ما عندها اعتراض فى الحاجه دي!...هي عاينت لي وقالت لي: ما عندي اي شك فى قرارات اهلي بثق فيهم وعارفه انهم ما بختارو لي الا كلو خير ؛ وقتها هي كبرت فى عيني شديد وقلت فى نفس : ما ح القى احسن منها تكون ام لأولادي وزوجه لي.... والحمدلله يعني على نياتكم ترزقون ؛ ربنا سهلها علي شديد ومن خطبتها ربنا فتحها علي ؛ بعد العرس بفتره مشينا البحر عشان كانت ح تجن لو ما اكلت ليها طين ؛ اي نعم هي متهوره ومجنونه وطفله واي شي بس هي احلى شي فى حياتي وانا بحبها شديد ومستعد اوديها البحر يومي عشان بس تكون مبسوطه.

#فاطمة_عمر💙💫

_انتي ليه م عندك صحبات!
_عندي وكتار كمان.
_طيب ليه م حصل شفتك بتتكلمي مع واحده ولا حتى حكيتي لي عن واحدة فيهم!
_اا....
_ها!
_عندي بس م بنتكلم كتتير وما جاء ف بالي احكي ليك عن واحدة فيهم.
_متأكده انهم صحبات بمعني صحبات؟!
_اااا.......

م تحسسو صحباتكم انهم م عندهم صحبات حبوهم شديد وخلو بالكم منهم.

#فاطمه_عمر💙💫

كنت واقفه مستنية المواصلات وكان فى ولدين واقفين قدامي ف من غير قصد سمعت الحوار البينهم واحد منهم قال لصاحبو:البت دي عجبتني يمان ماشي احنك معاها....صحبو قال ليهو : نفترض اتحنكت ليك وشلت رقمها ح تعمل شنو بعد داك؟...قال ليهو : ما عارف ح اعمل شنو بس هي دخلت مزاجي خلاص والا اوصل ليها ؛ صحبو: قال ليهو: ح تقدر تحافظ عليها !...يعني بعد ما تشيل رقمها وتتونس معاها وتملاها سعادة بكلامك المعسول ح تقدر تحافظ على السعادة دي!...ح تقدر تبعد عنها الحزن !..قال ليهو : وليه دا كلو داير احبها انا!...انا بس داير....وسكت ؛ صحبو قال ليهو: ها داير شنو!...تتونس بيها يعني مثلا!..تقضي بيها وقت !...لو كل واحد فينا عرف هو عايز شنو بالظبط ماف زول ح يكسر بخاطر التاني ولا يخونو ولا حتى يأذيهو بأفعالو.

#فاطمة_عمر💙💫

طفلٌ كبير

إنه لأمرٌ محزن أن تسبق نمو ذاتك باعوام، حينها ستضطر إلى إخفاء شعورك الحقيقي ليتماشى مع هيئتك الخارجية.
بالأمس، وفي طريق عودتي إلى المنزل، كان بالحافلة صغير يبكي على كتف والدته، بدى المشهد عاديٌ للجميع، بعيداً عن مدعاة الدهشة، إنه طفل صغير!
في الجانب الموازي كان هناك طفل آخر، ولكنه طفل كبير بداخله قلبٌ معبأ بالحزن والرهق، أراد البكاء كذلك، أراد أن يبكي دون أن يثير فضول أحد، تماماً كالصغير، هو يدري استحالة الأمر، لذا أخفى دموعه وراء ابتسامة كاذبة!
هذا الطفل كان أنا
الحياة لم تأبه لدواخلي يوماً، طالما كانت ترميني بقدر ما تراه علي، لن ترحم قلبي الوليد الذي يتعارض مع جسدي.
ذنبي أنني لم أعش طفولتي كاملة، فقد اختلطت بمسؤليات الكبار، كان عليّ أن أرمي ألعابي جانباً، وأبدأ بالبحث عن الرزق، كنت رجلاً في صغري، إلا أن الطفولة بقيت شرخاً فيّ يرفض أن يندمل.
الأمر ليس عادلاً، أن أدعي القوة في صغري وكبري، ولكنني منذ الأبد أقاوم.
#الاء_مالك

بكرة بتدوب الدموع..
الانكسارات..
والنحيب..
وتنجبر فيك الحكايات..
والجروح الفيك تطيب.. 💙
#الاء_مالك

لكــن أن يُشــيح المــوت عنــك ولــو مؤقتــاً، معنــاه أن تطــال نيوبــه أشــخاصا آخريــن بالنيابــة عنــك.

-سموفونية الجنوب..

الحب الحقيقي يأتيك ساعياً طائعاً يا صديقي، مطاردة الحب منهكة للروح..

#الاء_مالك..

فالحلم لن يبنيه بعضٌ من كسل!🧡

- ‏أنا من نوعية الناس اللي بتكتفى بناس معينة في حياتها بس ممكن أتعرف على العالم كله وأقعد معاهم لكن في الآخر هرجع للناس اللي برتاح معاهم وبحبهم !💙