အခုလို အစစအရာရာ ခက်ခဲတဲ့ကာလမှာ
စာအုပ်ဝယ်ဖို့ အဆင်မပြေတဲ့သူတွေအတွက်
စာအုပ်စာပေ မပြတ်ဖတ်ရှုနိုင်ရေး ရည်ရွယ်ပြီး
ဆရာတက္ကသိုလ်ဘုန်းနိုင်ရဲ့စာအုပ်တချို့ကို
Pdf file link နဲ့တကွ တင်ပေးထားပါတယ်
(အဆင်ပြေတဲ့သူတွေကတော့ စာအုပ်ဝယ်ဖတ်ဖို့ကိုပဲ တိုက်တွန်းပါရစေ) ဒီထဲမှာမပါတဲ့ စာအုပ်တချို့ကို Mm bookshelf app သို့
Shwe Mee Eain app မှာ
အခမဲ့ ဖတ်လို့ရပါတယ်နော်
မူရင်း link ပိုင်ရှင်တွေအကုန် credit
ပေးပါတယ်
အားတဲ့အချိန်ကို စာဖတ်ဖို့အတွက် အသုံးချပါ
Channel မှာလဲ စာတိုလေးတွေ မကြာခဏ
တင်ပေးသွားပါမယ်
အားလုံးပဲကျန်းမာရေးဂရုစိုက်ကြပါဗျ ❤️

"ကိန္နရီမောင်နှံဟာ မုန်းတိုင်းမိပြီး တစ်ညတာကွဲသွားကြသတဲ့၊ပြန်တွေ့တဲ့အခါမှာ နှစ်ပေါင်းခုနှစ်ရာငိုလို့ မပြီးကြဘူးတဲ့"
"အဲဒါက..အကြာကြီးငိုတာပဲဟာ၊အကြာကြီးချစ်တာမှမဟုတ်ဘဲ.."
"ဪ..ထားရယ်။အကြာကြီးငိုတာဟာ အကြာကြီးချစ်ခဲ့ရလို့ ဖြစ်မှာပေါ့"
"အကြာကြီးချစ်လို့ အကြာကြီးငိုရတယ်ဆိုရင် ထားတို့တော့ မချစ်ချင်ပေါင်၊အကြာကြီးမချစ်ချင်ပေါင်"
"ဒါဖြင့်..ခဏလေးပဲ ချစ်ချင်တယ်ပေါ့၊ဟုတ်လား"
"အိုး...ခဏလေးလဲ မချစ်ချင်ပေါင်၊ခဏလေးလဲ မငိုချင်ပေါင်"

#တပြည်သူမရွှေထား ❤️

ဤမြေကို သွေးအထပ်ထပ် ဖုံးလွှမ်းရန်
ကြံဖူးကြသည်
သွေးအထပ်ထပ်လဲကျဖူးခဲ့ပြီ
ကျွန်တော့အဘနှင့်ကျွန်တော့ဆရာ တို့၏
အချည်းနှီးသော အဓိပ္ပာယ်မဲ့ သွေးတို့ကို
ဤမြေသည် မကျေမနပ်လက်ခံခဲ့ရပြီးပြီ
သို့သော် ... စိမ်းသောမြေကို ယာယီသွေးတို့
ထာဝစဉ်မလွှမ်းနိုင် ။

#စိမ်းနေဦးမည့်ကျွန်တော့မြေ ❤️

"ဘာကြောင့် အသည်းနှလုံး မာချင်ရတာလဲ မောင်။ အသည်းနှလုံးမာသူတွေကို ခိုင် ကြောက်တယ်"

ကျွန်တော်က ရယ်မောရသည်။

"မောင့်ကိုတော့ မကြောက်ပါနဲ့ ခိုင်။ မောင့်အသည်းနှလုံးက ဘယ်လောက်မာပါစေ၊ ခိုင်နဲ့ သူငယ်ချင်းတွေအတွက်တော့ နူးညံ့တဲ့ တစ်နေရာ အမြဲရှိနေမယ်..."

#သူငယ်ချင်းလို့ပဲ ဆက်၍ခေါ်မည်ခိုင်

သမုဒယတနွယ်ငင်သည့် သံယောစဉ်
ဤဇာတ်လမ်း၌ တခန်းမှ ပါဝင်ခဲ့လေ၍
မင်သော ပိတောက်ကိုမြင်‌လေတိုင်း
မကြင်သော တယောက်ကို
ထင်ယောင်မိသဖြင့် မချိလှသောရင်မှာ
မသက်သာသော်လည်း သည်ဝေဒနာ၏
သံသရာကိုသာ တနှစ်တခါ
ထပ်ကာလည်စေမိသော ကိုယ့်ကိုကိုယ်သာ
အံ့ဩရမည် ထင်ပါ၏

#တန်ခူးလေနှင့်လျောတော့သည်💙

ကျက်သရေ မင်္ဂလာအပေါင်းနှင့်
ပြည့်စုံသော မဟာသင်္ကြန်အခါသမယ
မှာ မြန်မာပြည်သားအပေါင်း
စိတ်ချမ်းသာ ကိုယ်ကျန်းမာနှင့်
လိုအပ်ဆန္ဒများ ပြည့်ဝကြပါစေကြောင်း
ဆုမွန်ကောင်းတောင်းအပ်ပါသည် 💙

ပိတောက်တွေလည်း ပွင့်ချိန်နီးပြီ။
မနက်ဖြန်လော...သန်ဘက်ခါလော...။
တစ်ရက် နှစ်ရက် သုံးလေးရက်
ပွင့်တော့ပွင့်ရော့မည်။

ကျွန်တော့ရင်က ခုန်လာသည်။
နူးနူးညံ့ညံ့ သိမ်သိမ်မွေ့မွေ့ ခုန်လာသည်။

ပတ်ဝန််းကျင်မှာ သင်္ကြန်၏ အရိပ်နိမိတ်ကလေးများ
ပေါ်နေပြီ။ ကျွန်တော်၏ နှာခေါင်းတွင်ကား
သင်္ကြန်၏ အနံ့အသက်လေးများကိုပင် ရနေ၏။

တန်ခူးဆိုသည်က နှစ်သစ်တစ်ခု၏အစပါ။
နှစ်သစ်တစ်ခု၏ စခြင်းကို ပြသော လက္ခဏာတွေက ပတ်ဝန်းကျင်မှာ လှပထင်ရှားနေကြသည်။

ကျွန်တော့်ရှေ့၌ မြင်သမျှသော ပင်အိုနှင့်
ပင်ပျိုတို့သည် ရွက်သစ်တွေကို ဆင်ထားကြ၏။
ရွက်ဝါရွက်ဟောင်းတွေက တပေါင်းတည်းက
ကြွေစင်ကုန်ခဲ့ပြီ။ မနုတော့သော်လည်း
မရင့်သေးသော ရွက်သစ်တို့သည် ပျိပျိုလွင်လွင်
ရှိလှသည်။ နှစ်သစ် အချိန်သစ်မှာ လောကကို
တန်ဆာဆင်နေကြသည်။

#ပိတောက်ပွင့်ဆဲလသာဆဲဝယ်

ဟိုတစ်နွေက ပိတောက်ဦး
ကိုယ် ခူးမယ် ကြံလာ
ပန်းမခူးရတဲ့ ဥယျာဥ်မှူးရဲ့ ကမ္ဗည်းစာ
စိတ်ထားတော် မခံဝံ့ပြီမို့ စိုးရွံ့ရပ်နား မကြည်သာ...

ပိတောက်ဦးညှာ ပင်မြင့်မှာ ကြူကြူမွှေးပါဘိ
မြတ်လေးသူ ချူယူစမ်းပါ့ လက်ကမ်းကြို
ဖြူမနောနှင့် ပြောရော့လေသလား ခံစား ကိုယ့်ရင်မှာ...

ပိတောက်ပန်းဆိုတော့ ခူးချင်ကြသည်။
မိမိလည်း ခူးချင်ခဲ့သည်။ မိမိက လူပါ။
ပိတောက်ကို ချစ်တတ်သော လူပါ။
ဤအတွက် ဘယ်တုံးကမှ မိမိကိုယ်ကိုယ်
အပြစ်မတင်ပါ။

#လေရူးသည်စာမတတ်ပါ

ယနေ့ကျရောက်သော
မြန်မာသက္ကရာဇ် ၁၃၈၄ ခုနှစ်မှ
စ၍ မြန်မာပြည်သားအပေါင်း
လိုအင်ဆန္ဒများပြည့်ဝကြစေ
ကြောင်း ဆုမွန်ကောင်းတောင်းအပ်ပါသည် ♥️

နွေတွင်ဖြစ်သဖြင့် ရော်ရွက်တို့သည်
ပင်မကို စွန့်ခွါရပေမည်
လေသရမ်းသည် ကြမ်းရပေမည်
သို့သော် လရောင်ဖျော့ဖျော့ ပိတောက်ပင်ရိပ်
မြေမို့ပေါ်မှ လူနှစ်ယောက်၏
အတ္ထုပ္ပတ္တိ ပြီးဆုံးခြင်းကိုမူ
အဘယ်သူသည် သိလာလိမ့်အံ့နည်း ...

#မြေခရွက်ဝါ

စိန်ပန်းကို တော်၀င်ပန်းလို့
ဘယ်သူကမှ မသတ်မှတ်ဘူး
ဘယ်သူကမှလည်း
မြတ်မြတ်နိုးနိုး ခေါင်းမှာမဆင်ဘူး
ဒါပေမဲ့ သူက ဝတ္တရားမပျက်ဘဲ လေထန်ထန်
မိုးမှောင်မှောင်ထဲမှာ
လောကကိုအလှဆင်တတ်တယ်

#စွန့်ခွာရသည့်နွေညများ ❤️

ယနေ့ ၂၀၂၂ မေလ ၁၀ ရက်နေ့မှာ စာချစ်သူတို့ အားလုံး သဘောကျနှစ်ခြိုက်ကြတဲ့ စာရေးဆရာကြီး တက္ကသိုလ်ဘုန်းနိုင်
ကွယ်လွန်ခဲ့တာ နှစ်၂၀ ပြည့်ခဲ့ပြီဖြစ်ပါတယ်။ “သစ်တစ်ပင်ကောင်း ငှက်တစ်သောင်းနား” ဆိုတဲ့အတိုင်း ဆရာကြီးရဲ့ ရသမြောက်လက်ရာမွန်တွေဟာ ခေတ်ပြိုင်ကာလမှသည် ယနေ့ထိပင် မက်မောစွာ ဖတ်ရှုနေကြဆဲ ဖြစ်ပြီး နောင်နှစ်များစွာထိလည်း စာချစ်သူတို့ရဲ့ နှစ်ခြိုက်မှုကို ရရှိနေဦးမယ်ဆိုတာ မလွဲပါဘူး။

🙏🙏🙏

စာပေပါရမီ၊ ပညာနဲ့ လောကကို အကျိုးပြုမှုများအတွက် လေးလေးနက်နက် ဂါရဝပြု ပါတယ်

တက္ကသိုလ်ဘုန်းနိုင် ကိုယ်ရေးအကျဉ်း
-----------------------------------
ရန်ကုန်တိုင်း သန်လျင်မြို့၌ အဖ ဦးထွန်းဖေ၊ အမိ ဒေါ်ကြင်မေ တို့က ၁၆ ဇန်နဝါရီ ၁၉၃ဝ ကြာသပတေး နေ့တွင် မွေးဖွား ခဲ့သည်။ မွေးချင်း ငါးယောက်တွင် ဒုတိယမြောက် ဖြစ်သည်။ ငယ်မည် မောင်ဖေသိန်း၊ လက်ရှိ အမည်ရင်းမှာ ဦးခင်မောင်တင့် ဖြစ်သည်။

မက်သဒစ် ကျောင်းများ (သန်လျင်၊ တွံတေး၊ သုံးခွ)၊ အစိုးရ အထက်တန်း ကျောင်းများ (ပြည်၊ ပေါင်းတည်)၊ ဗုဒ္ဓ ဘာသာ စာပေကို ကိုးတောင်တွဲကျောင်း (ထုံးဘို)၊ တက္ကသိုလ်ဝင် စာမေးပွဲ (၁၉၄၈)၊ ရန်ကုန် တက္ကသိုလ် (၁၉၄၈)၊ စိတ်ပညာ ဝိဇ္ဇာ ဂုဏ်ထူးဘွဲ့ (၁၉၅၅)၊ အမေရိကန် ပြည်ထောင်စု နယူးယောက်မြို့ ကိုလံဘီယာ တက္ကသိုလ် ဘွဲ့လွန် မဟာ ဌာနမှ မဟာ ဝိဇ္ဇာဘွဲ့ (၁၉၅၉ - ၆၁) တို့ကို ဆည်းပူး အောင်မြင် ခဲ့သည်။

မန္တလေး ယူနီဗာစီတီ ကောလိပ် စိတ်ပညာ ဌာနမှူး (၁၉၅၅)၊ တောင်ကြီး ကောလိပ် ကျောင်းအုပ်ကြီး (၁၉၆၂ - ရ၂)၊ ပုသိမ် ဒီဂရီ ကောလိပ် ကျောင်းအုပ်ကြီး (၁၉၇၂ - ရ၇)၊ မော်လမြိုင် ဒီဂရီ ကောလိပ် ကျောင်းအုပ်ကြီး (၁၉၇၇ - ၈၅)၊ မော်လမြိုင် တက္ကသိုလ် ဒုတိယ ပါမောက္ခချုပ် (၁၉၈၆ - ၈၈)အဖြစ်တာဝန်ထမ်းဆောင်ခဲ့သည်။ပညာရေး တက္ကသိုလ် ပါမောက္ခချုပ် အဖြစ်တာဝန်ထမ်းဆောင်နေစဉ် ၁၉၈၈အရေးအခင်း၌ စစ်မှန်သောဒီမိုကရေစီကို တောင်းဆိုရာတွင် ပါဝင်ခဲ့မှုကြောင့် စစ်အာဏာပိုင်များက အငြိမ်းစားပေးခြင်းခံခဲ့ရသည်။

မြန်မာ ပညာရေး လေ့လာရေး အဖွဲ့ ခေါင်းဆောင် အဖြစ် ဂျပန် (၁၉၇၇) နှင့် တရုတ် (၁၉၈၃) သို့ လည်းကောင်း၊ မြန် ပညာရေး အထူး လေ့လာရေး အဖွဲ့ ဒုတိယ ခေါင်းဆောင် အဖြစ် ဂျပန် (၁၉၈၁) သို့ လည်းကောင်း၊ အာဆီယံ - ကိုရီးယား ယဉ်ကျေးမှု ခေါင်းဆောင် ဖလှယ်ရေး အစီအစဉ် တွေ့ဆုံ ပွဲများတွင် မြန်မာ ကိုယ်စားလှယ် အဖွဲ့ဝင် အဖြစ် ၁၉၉၉ နှင့် ၂ဝဝဝ ပြည့်နှစ်များ၌ ကိုးရီးယား သမ္မတ နိုင်ငံသို့ သွားရောက် ခဲ့ပြီး စာတမ်းများ ပြုစု ဖတ်ကြား ခဲ့သည်။

စာပေနယ်သို့ ရှုမဝ မဂ္ဂဇင်း ပါ "ဒွိဟ" ကဗျာဖြင့် ၁၉၄၉ ခုနှစ်တွင် စတင် ဝင်ရောက် ခဲ့သည်။ ထင်ရှားသည့် လုံးချင်း ဝတ္ထုရှည် (novel) အချို့မှာ ညီမလေးရယ် စိုးရိမ်မိတယ် (၁၉၅၈)၊ သူ့ကျွန်မခံပြီ (၁၉၅၉)၊ လွမ်း (၁၉၆၂)၊ မိုးည အိပ်မက်မြူ (၁၉၆၂)၊ ဤမြေမှသည် (၁၉၆၃)၊ စိမ်းနေဦးမည့် ကျွန်တော့်မြေ (၁၉၆၃)၊ မောင့်ဘဝ ညအလားကွယ် (၁၉၆၃)၊ သူငယ်ချင်းလို့ပဲ ဆက်၍ခေါ်မည် ခိုင် (၁၉၆၄)၊ ချစ်သော ဤကမ္ဘာ (၁၉၆၄)၊ လွမ်းတေး မဆုံးစေနှင့် စောသခင် (၁၉၆၅)၊ ကမ္ဘာကုန် ကျယ်သရွေ့ဝယ် (၁၉၆၆)၊ နွေကန္တာဦး (၁၉၆၈)၊ ဝသန် လေချိန်မှန်ကူး (၁၉၆၉)၊ တပြည်သူ မရွှေထား (၁၉၇၁)၊ နှင်းငွေ့တထောင့် မိုးတမှောင့် (၁၉၇၂)၊ ကိုယ့်အလှ ဘဝငွေလမင်း (၁၉၇၆)၊ စွန့်ခွာရသည့် နွေညများ (၁၉၈ဝ)၊ မိုးတွေ ရွာမှဖြင့် လျှင်ကွယ် (၁၉၈၄)၊ တိမ်ညိုအလွင့် လအမြင့် (၁၉၉ဝ)၊ ချစ်သူအိမ်အမိုး နောက်ဝယ် လ ပျောက်ခဲ့ခြင်း (၁၉၉၁)၊ မျက်ရည် လောကများ၏ ဟိုမှာဘက် (၁၉၉၂)၊ လေရူးသည် စာမတတ်ပါ (၁၉၉၅) စသည်တို့ ဖြစ်ကြသည်။ ထင်ရှားသည့် မဂ္ဂဇင်း ဝတ္ထုရှည် (novelette) များမှာ နှင်းရွက်ကြွေစော (၁၉၅၈)၊ မုန်းရစ်လေဦး (၁၉၅၈)၊ ရေပင်လယ်နှင် ငွေစင်ကြယ် (၁၉၅၈)၊ တန်ခူးလေနှင့် လျောတော့သည် (၁၉၆၁)၊ ပိတောက်နှင့် ကြိုပါမည် မာရီယာ (၁၉၆၃)၊ ကရုဏာ မိခင် (၁၉၆၃) တို့ ဖြစ်ကြသည်။ ဝတ္ထုတို အများ ကိုလည်း ရေးသားခဲ့ရာ ယင်းတို့ကို ပြန်လည် တင်ပြသည် (၁၉၆၅)၊ ဝတ္ထုတို ပေါင်းချုပ် အမှတ် ၁၊ ၂၊ ၃ (၁၉၆၉)၊ ဝိညာဉ်မှာ ဖူးသည့် ကြည်နူးမှု အလှပန်း (၁၉၉၃)၊ ကျွန်တော့် ဘဝ ပိတောက်ကမ္ဘာ (၁၉၉၃) စသည်ဖြင့် စုစည်း ခဲ့သည်။ စာပေ အနုပညာ ဆိုင်ရာ ကျမ်းများမှာ ဘုန်းနိုင့် အတွေး ဘုန်းနိုင့် အမြင် (၁၉၇၇)၊ ခမ်သိမ်းကလျာ ရှုဖွယ်သာတည်း ပထမတွဲ၊ ဒုတိယတွဲ (၁၉၉၄) တို့ ဖြစ်ကြသည်။ အင်္ဂလိပ် - မြန်မာ နှစ်ဘာသာ ဘာသာပြန် ကဗျာ စာအုပ် များမှာ ရှားလော့ဒေဝီ (၁၉၉၆)၊ တမ်းတမိခြင်း (၁၉၉၇) တို့ ဖြစ်ကြသည်။

နိုင်ငံခြား ဘာသာသို့ ပြန်ဆို ထုတ်ဝေ ခဲ့သည့် စာအုပ်များမှာ ရုရှား ဘာသာဖြင့် 'သူ့ကျွန်မခံပြီ' (၁၉၇ဝ)၊ တရုတ် ဘာသာဖြင့် 'စွန့်ခွာရသည့် နွေညများ' (၁၉၈၈)၊ ဟင်ဒီ ဘာသာဖြင့် 'သူငယ်ချင်းလို့ပဲ ဆက်၍ခေါ်မည် ခိုင်' (၁၉၉၄) တို့ ဖြစ်ကြသည်။ 'နှင်းငွေ့ တထောင့် မိုးတမှောင့်' ဖြင့် (၁၉၇၂) ခုနှစ်တွင် အမျိုးသား စာပေဆု ရရှိခဲ့သည်။

(၂၀၀၂) ခုနှစ် မေလ ၁၀ ရက်နေ့တွင် သန်လျင်မြို့၌ ကွယ်လွန်သည်။

Credit

သံယောဇဥ်အကြောင်းကို ညီလေးငယ်ကောင်းကောင်းသိရဲ့လား. . .
နှောင်ကြိုးလို့လည်းပြောကြတယ်၊ တွယ်တယ်လို့လည်းပြောကြတယ်။
ရုန်းမရတဲ့သဘော၊ ခွါမရတဲ့သဘော။
ဘယ်သူမပြု၊ မိမိမှုလို့ တရားကတော့ ပြောတယ်။
ပုထုဇဥ်အတွက်ကတော့ တရားဆိုတာဟာ စကားတစ်မျိုးသာပဲပေါ့။ မဟုတ်ဘူးလား ညီလေးငယ်...
နားထဲမှာအသံပေါ်လာတယ်၊ ပြီးတော့ပျောက်သွားတယ်။
နှလုံးသားမှာတော့ သံယောဇဥ်...
တစ်ဇဥ်လည်းမဟုတ်ဘူး၊ နှစ်ဇဥ်လည်းမဟုတ်ဘူး၊ သုံးဇဥ်လည်းမဟုတ်ဘူး။
ခိုင်လိုက်တာမျိုးကလည်း သံယော...လို့ မရေးဘဲ သံရော... အဲဒီလိုရေးဖို့ကောင်းတယ်။
သံနဲ့ရောထားသလို သိပ်...ခိုင်တယ်။ သိလား ညီလေးငယ်...

#လွမ်းပါလေရစ်သည်သောင်ငွေဦး

ချစ်ခြင်းဆိုတာ ပိုင်လိုတာ ဖြစ်ပေမဲ့
ပိုင်ဆိုင်ခြင်းဟာ အချစ်ရဲ့ အဆုံးမဟုတ်ဘူး
လူ့ဘဝကို သမုဒယ‌ချည်တိုင်နှောင်ပြီး
မဟီတောင်ကျယ်သရွေ့ နွဲ့လေရာမှာ
ဆရာ့ညီမလေး မေရီဟာ
ပျော်ရာမှာ ရွှင်တတ်သလို
ငြိုငြင်ရာမှာ မပင်ပန်းဘဲ ထာဝစဉ်လန်းတဲ့စိတ်နဲ့
ဆရာနဲ့အတူ ချီလှမ်းနိုင်ပါစေလို့
ချစ်လွန်းလို့ဘဲ ဆုတောင်းမိတယ် မေရီ...

#ညီမလေးရယ်စိုးရိမ်မိတယ်

လှတာကို လူတိုင်းနှစ်သက်ကြတယ်လေ
ဒါပေမဲ့ ဘယ်လိုနှစ်သက်ကြတာလဲ
ကာမအာရုံအဖြစ် နှစ်သက်ကြမှာလား
အဲ့ဒိလိုဆိုရင်တော့ ရင်ပူကြရလိမ့်မယ်
ဪ ... ဥပဓိသမ္ပတ္တိနဲ့ ပြည့်စုံလှပေတယ်လို့
မုဒိတာတရား ထားတတ်ရင် စိတ်ချမ်းသာမယ်
ရင်အေးမယ်

#မျက်ရည်လောကများ၏ဟိုမှာဘက်

မ ဖူးသာမှန်း သိသဖြင့်
ဤဆင်းရွှေမျက်နှာ
ငွေယုန်လွှာကို သူ မရှာခဲ့ပါ
ကြမ္မာတကွေ့ ပြန်တွေ့ရပြီဆိုတော့လည်း
လွမ်းတာ များခဲ့ရသူမို့ ရှုစား၍
မက်မပြေပါ

#လွမ်းတေးမဆုံးစေနဲ့ စောသခင်

ဪ.. ခိုင်ပြောတာ ရယ်စရာကောင်းလို့ပါ
ငါ့မှာ အသည်းနှလုံးရှိပါတယ်
မောင်ညွှန့်ရယ် ....
တခုခြားနားတာက ငါဟာ
ဘယ်သူ့အသည်းနှလုံးကိုမှ မလိုချင်ဘူး
ငါ့အသည်းနှလုံးကိုလဲ
ဘယ်သူ့ကိုမှ မပေးချင်ဘူး
ငါထားနိုင်တာက မေတ္တာတရားသာပါ
မေတ္တာတရားဆိုတာဟာ အနိုင်ယူလေ့လဲ
မရှိဘူး အရှုံးပေးခြင်းလဲ မဟုတ်ဘူး
ဘာကြောင့်ဆိုတော့ မေတ္တာတရားဆိုတာဟာ
တောင့်တခြင်းမှ မဟုတ်ဘဲ ပြီးတော့ ...
နှိမ်ချခြင်းလဲ မဟုတ်ပေဘူး

#သူငယ်ချင်းလို့ပဲဆက်၍ခေါ်မည်ခိုင်