လွမ်းဆွတ်ဖွယ်ရာတွေကိုရော
နာကြည်းဖွယ်ရာတွေကိုရော
ကိုယ် မေ့ထားချင်သည်

ပုထုဇဥ်ဖြစ်၍ မတတ်စွမ်းလေသဖြင့်
ကိန်းချင်လည်း ကိန်းနေကြပါ
ပေါ်တော့ မပေါ်လာပါလေနှင့်

လွမ်းဖွယ်ရာတွေကို ကိုယ်မကြောက်ပါ
နာကြည်းဖွယ်ရာ တွေကိုတော့
ကိုယ်ကြောက်သည်

-တိမ်ညိုအလွင့် လအမြင့်

အမုန်းဆိုတာဟာ မကောင်းဘူး
ဒီလိုပဲ အချစ်ဆိုတာဟာလဲ မကောင်းဘူး

အချစ်အမုန်းလို့သာ ခွဲခြားပြောနေကြတယ် အမှန်တော့ အချစ်နဲ့ အမုန်းဟာ
သဘောတရားတခုတည်းရဲ့
အစွန်း နှစ်ဖက်က အသွင်တွေပါ
ရေဆူမှတ်တွေဟာ ပြဒါးတတိုင်ထဲမှာ
နေသလိုပေါ့

- လွမ်းပါလေရစ် သည်သောင်ငွေဦး

ငါဟာ အမြဲတမ်း ဒုတိယလူ
တစ်ယောက်ပဲ ဖြစ်ခဲ့ရတယ် မောင်
ဒါကို မင်းအသိဆုံးပဲ
ဒုတိယသာ အမြဲဖြစ်ခဲ့ရတော့
စိတ်ဓာတ်ဟာ ခေါက်ရိုး ကျိုးသလိုဖြစ်ပြီး ဒုတိယတန်းမှာသာ
အမြဲတမ်း နေဝံ့တယ်
ပထမတန်းကို မမှန်းရဲဘူး
ပထမတန်းကို ရောက်လိမ့်မယ်လို့လည်း မယုံဘူး
မယုံတဲ့အထဲက ပထမတန်းကို ရောက်ရမယ်ဆိုတော့ ကြောက်မိတယ် မောင် သိပ်ကြောက်မိတယ်….

-သူငယ်ချင်းလို့ပဲဆက်၍ခေါ်မည်ခိုင်

သူ မပန်ချင်လို့ အပစ်ခံရတဲ့ပန်း
မဟုတ်ပါဘူး မမမေရယ်
ကျွန်တော်နဲ့ထိုက်တန်လို့ ကံကြမ္မာက ကြံဖန်ဆောင်ပို့ပေးတဲ့
မြတ်ပန်းတော်ဝင်ပါ

- မောင့်ဘဝညအလားကွယ်

စာဆုံးရင် ပုဒ်မ ချရသတဲ့
နုငယ် ပုဒ်မ မချဘူး
နုငယ်ဆီ စာရေးရင်
စာအဆုံးမှာ ကိုယ်လည်း ပုဒ်မ မချရဘူး
ပုဒ်မ ချတယ်ဆိုတာ ဆုံးသွားတာပဲ
နုငယ် ဘာကိုမှ မဆုံးချင်ဘူး
စာကိုလည်း မဆုံးချင်ဘူး

ကြာပန်းဆို တာတောင်
တစ်နေ့ကျတော့ တုံးသွားတာပဲ
တုံးတယ်ဆိုတာ ဆုံးတာပဲ
ဒါကြောင့် နုငယ် ကြာပန်း မပန်ဘူး

- နွေကန္တာဦး

မမရီ မမှတ်မိဘူး ဆိုရင်
ကျွန်တော်အပြစ်မတင်ပါဘူး
သံသရာဆိုတာဟာလဲ မေ့လျော့ခြင်းဆိုတဲ့ ဘဝမြူ လွှမ်းမြဲ ဓမ္မတာ မဟုတ်လား

မေ့လျော့ခြင်းဆိုတာဟာလဲလေ
တခါတလေတော့
ကောင်းလိမ့်မယ် ထင်ပါရဲ့
ဥပါဒါန ပစ္စယာဘဝေါလို့ ဆိုတယ် မဟုတ်လား
မစွဲလန်းအပ်တဲ့ ဥပါဒါန်တွေကို
စွဲနေမဲ့အစား
မေ့ပစ်ခြင်းက ကောင်းပါတယ်လေ

- မိုးညအိပ်မက်မြူ

နှုတ်ဆက်တယ်ဆိုတာဟာ
ခွဲခွာရခြင်းကို အသိမှတ်ပြုတာပဲ

မောင်ဘယ်တော့မှ နှုတ်မဆက်ချင်ဘူး
မမနွယ် အနည်းဆုံးတော့
နှုတ်မဆက်ချင်ဘူး

- ကမ္ဘာကုန်ကျယ်သရွေ့ဝယ်

နောက်ဘဝဆိုတာကို
ကျွန်တော် ယုံချင်လိုက်တာ
ကိုဘုန်းနိုင်ရယ်

နောက်ဘဝဆိုတာ ရှိပါစေလို့
ဆုတောင်းရလို့လဲ မောလှပါပြီ
နောက်ဘဝဆိုတာဟာ
ဒီဆောင်းပမာဆိုရင် ဒီလိုနှင်းတွေထဲမှာ
သူ့ကို ပြန်တွေ့ရအုံးမယ်
အစောကို ပြန်တွေ့ရအုံးမယ်

-နှင်းရက် ကြွေစော

ချမ်းသာခြင်းမှာ အတူစံပြီး
ဆင်းရဲခြင်းမှာ အတူ ခံကြမယ်ဆိုတဲ့
ချစ်ခြင်းမေတ္တာရဲ့ သစ္စာသဘောကို
မောင် လေးစားဂုဏ်ပြုပါတယ်
ဒါပေမဲ့ မောင်ယုံကြည်ထားတဲ့
မေတ္တာကတော့
တဆင့်သာလွန်ပါသေးတယ်

ချမ်းသာခြင်းမှာအတူစံကြမယ်ဖြစ်ပေမဲ့
ဆင်းရဲခြင်းမှာတော့ ကိုယ်သာ ခံပါ့မယ်
သူတယောက်တော့ဖြင့်
ကြွင်းလွတ်ကျန်ပါရစေ

ဒီစေတနာဟာ
မောင့်ရဲ့ အချစ်အဘိဓမ္မာဘဲ နွဲ့
ဒီစေတနာကို နွဲ့သိစေချင်တယ်
ဒီစေတနာ အလျောက် နွဲ့ဆီက ရှောင်ပြေးတိမ်းရှောင်နေတဲ့ မောင့်ကို ခွင့်လွတ်စေချင်တယ်

- ညီမလေးရယ် စိုးရိမ်မိတယ်

နွဲ့ နားလည်ထားတဲ့
ချစ်ခြင်းမေတ္တာဆိုတာဟာ
ခွင့်လွတ်ခြင်း ပါပဲ မောင်

မောင့်ကို နွဲ့ချစ်တာသာ သိတယ်
ဘာကြောင့်ချစ်တယ်ဆိုတာ နွဲ့မသိဘူး
သိဖို့လဲ မလိုဘူး ထင်တယ်
နွဲ့အချစ်ကတော့ ဒီအတိုင်းပါပဲ
မောင်စွန့်ပစ်သွားတော့လဲ ချစ်တာဘဲ
ခု မောင်ပြန်ရောက်တဲ့အထိလဲ
နွဲ့အချစ်ဟာ မပြောင်းလဲသေးဘူး

-ညီမလေးရယ် စိုးရိမ်မိတယ်

ကောင်းကင်မှာ လက်ခနဲ ပေါ်လာတဲ့လျှပ်စီးဟာ ဘယ်မှာ ရှိသလဲ
မပေါ်ခင်မှာလည်း မရှိဘူး
ပေါ်ပြီးတော့လည်း မရှိဘူး အကြောင်းဆုံခိုက် ပေါ်လာတယ်

အတိတ်ဆိုတာဟာလည်း ဒီလိုပါပဲ ဒါပေမဲ့ ကျွန်တော်တို့က
ရှိတယ်ဆိုပြီး ဖက်တွယ်ထားမိကြတယ်

- မေတ္တာများနဲ့ စိန်ပန်းနီနီ

ဤသစ်ရွက်မှာဆန်းသည်ထင်သည်..

အညှာမှာတစ်ခုတည်း
တစ်ရွက်ပင်ဖြစ်သော်လည်းအလွှာမှာနှစ်ချပ်..

ဤသစ်ရွက်ကို ' စွယ်တော်ရွက် ' ဟု
နောင်အခါမှ..ကျွန်တော်သိရသည်...

#သူငယ်ချင်းလို့ပဲဆက်၍ခေါ်မည် ခိုင်

စစ်မှာ ကိုယ်က သူ့ကို မသတ်ရင်
သူက ကိုယ့်ကိုသတ်မယ်
အချစ်မှာ ကိုယ်က မပိုင်နိုင်ရင်
သူက ပိုင်နိုင်သွားမယ်

- ချစ်သော ဤကမ္ဘာ

ညနက်မှာကိုလဲ တားလို့မရဘူး
လထွက်တာကိုလဲ တားလို့မရဘူး
ညနက်မှ ထွက်တဲ့လ ဟာ
ဒီလောကမှာ အလှဆုံးပါ
အမှောင်ရိပ်တွေက မည်းလေလေ
ငွေလရောင်က ဖြူလေလေပဲ
ကိုယ့် မေတ္တာဆိုတဲ့ ငွေလ ဟာ
အမုန်းကမ္ဘာရဲ့ ညမှောင်မှောင်ပေါ်မှာမှ
သာချင်ပါသတဲ့

- ညနက်နက်မှာ လထွက်ခြင်း

သူ စိမ်းတယ်
ကိုယ် စိမ်းတယ်ဆိုရင်
မေတ္တာဆိုတဲ့ စကားကို
ဘယ်သွားထားရမလဲ

- တပြည်သူမရွှေထား

သံယောဇဥ်ဆို
ဘယ်သံယောဇဥ်မှ မကောင်းဘူး

သံယောဇဥ် မရှိသေးသူများ
မရှိတဲ့အတိုင်းပဲနေကြစေချင်တယ်
ရှိကြလို့ ရှိရင်လည်း
သံယောဇဥ်ကြိုးကို မရှည်ခင်
တိုတိုဖြတ်တာကောင်းတယ်

မုန်းစကိုတိုစေ၊ချစ်စကိုရှည်စေလို့
ဆိုရိုးစကားရှိတယ်
တခါတလေ ကျွန်တော်တွေးမိတယ်
ချစ်စကို တိုနိုင်ရင်
လူတွေဟာ ဒီထက်
ကံကောင်းကြမလားမသိဘူး

#မောင့်ဘဝညအလားကွယ်

မိခင်ကမ္ဘာမြေက ရင်သွေးလူသားတွေအပေါ်မှာ သိပ်ကြင်နာပြီး
သိပ်တာဝန်ကျေလှပါတယ်

ဒါကြောင့် သောက ပရိဒေဝလို့ ခေါ်တဲ့ မီးဆယ့်တစ်မီး သဘောတွေကို
ဆရာတို့ လွမ်းတို့ ရင်ဆိုင်ရရင်
မိခင်ကမ္ဘာမြေမှာ အပြစ်မရှိပါဘူး

အဝိဇ္ဇာလို့ ခေါ်တဲ့ လွမ်းတို့ ဆရာတို့ရဲ့
အမုန်းတွေ အမှားတွေ အယူသီးမှုတွေ ခွင့်မလွတ်နိုင်တာတွေ
ဒါတွေဟာသာ တရားခံပဲ လွမ်းရဲ့...

- လွမ်း

အားလုံးပဲ ဂရုစိုက်ကြပါဗျ 🙏

ပိတောက်ပန်းဆိုတော့
ခူးချင်ကြသည်
မိမိလည်း ခူးချင်ခဲ့သည်

မိမိက လူပါ
ပိတောက်ကို ချစ်တတ်သော လူပါ
ဤအတွက် ဘယ်တုန်းကမှ
မိမိကိုယ်ကို အပြစ်မတင်ပါ။

-လေရူးသည် စာမတတ်ပါ

အချစ်စစ် ဆိုရင်လေ
ပထမအနေနဲ့ သူ့ဆီက
ချစ်ခြင်းမှ လွဲပြီး
ကိုယ်ကဘာမှ မမျှော်လင့်နိုင်ရဘူး

ဒုတိယအနေနဲ့ကတော့ သူက
မတောင်းဘဲ ကိုယ်က ပေးချင်ရမယ်

- နွယ်ဦးမွန်မို့ ချစ်ထွဋ်တင်သည်