القناة العامة للمعهد التقني/السماوة

ولدت سنة 2006، وكأن الدنيا استقبلت طفلة صغيرة مليانة براءة وحياة. أمي سمّتني "جنا"، ويمكن من البداية كانت تشوف بيّ شي مختلف… حلم، أو جناح يريد يطير رغم كل التعب.

كبرت ببيت جدي، بيت مليان ناس، بس مو مليان راحة. جدي كان يكره أبوي، والمشاكل ما كانت تنتهي. كل يوم صوت عالي، توتر، وخوف ساكن بالبيت. ومع هذا، أمي كانت تحاول تخلينا نعيش طبيعي، تزرع بينا الأمل حتى وإحنا وسط التعب.

مرت السنين، ولمن تخرجت من الابتدائية، صار الشي اللي غيّر حياتنا كلها. جدي طردنا من البيت، وفجأة لقينا نفسنا بلا مكان. تيهنا، وكأن الدنيا كلها سكرت أبوابها بوجهنا. بعد فترة، واحد من عمامي وقف ويانه، وتقاسم ويانه الميراث، وانطانا قطعة أرض صغيرة.

هناك بدت حياة جديدة… غرفتين وصالة بلا سقف، بس رغم الفقر والتعب، كانت أمي كل يوم توصينا بالدراسة. كانت تؤمن إن العلم هو الشي الوحيد اللي محد يكدر ياخذه منا. واني صدگت كلامها، وذبيت كل قوتي بالدراسة، لأن كنت أريد أطلع أهلي من هالحياة.

وصلت للثالث المتوسط، وهناك اجت كورونا. مرضت بيها، وشفت الموت بعيني. العالم كله صار إلكتروني، والطلاب يدرسون بالموبايلات، بس أني حتى موبايل ما عندي. كنت أخذ موبايل أخوي حتى أدرس، وأحاول ألحق الباقين رغم المرض والخوف.

ومن صغري، المرض كان يرافقني. دائمًا أتعب، دائمًا أتمرض، وأشوف التعب بعيون أهلي بسببي. كنت أحس نفسي حمل عليهم، بس بنفس الوقت ما كنت أستسلم.

وصلت للسادس الإعدادي، وهناك لأول مرة جابولي موبايل إلي وحدي، وحسّيت إن عندي شي خاص بي يساعدني أكمل حلمي. بديت أدرس وأتعب حتى أنجح، لكن حتى هالمرة المرض ما تركني.، بوقت الامتحانات. تأجلت سنتي، وانكسرت نفسيتي، لأن كلشي تعبّت عليه وقف فجأة.

بس رغم كل هذا… رجعت. عدت السنة، وقاومت، ونجحت من السادس. ويمكن الحياة ما أخذتني للمكان اللي كنت أخططله، وقدمت بقسم ما كان ببالي يوم من الأيام، بس بقيت أردد بنفس هدوء التعب والصبر:

"الحمدلله على كلشي."

لأن مو كل الناس تعرف شكد القوة تحتاجها حتى تبقين واقفة بعد كل هالسنين.

❤11💔8

1.87K views𝐀𝐁𝐃𝐔𝐋𝐋𝐀𝐇 𝐍𝐄𝐔𝐄𝐑, edited 19:55