Juda koʻp kitob o'qish oqibatida siz bilan qanday "muammolar" yuzaga keladi (boshimdan oʻtkazganlarim):

1. Atrofingizdagilar bilan ko‘p tortishib qolasiz. Har bir narsaning sabab va oqibatini tushuntiraverib, ularning "asabiga tegish" odat bo‘lib qolishi mumkin. Oddiygina nodon bo‘lib yashash ham bir "baxt" ekanligini tushunishni boshlaysiz.

2. Kim qayerda nima yegani-yu, qanaqa mashina olganini muhokama qilish o‘rniga, geosiyosiy masalalar yoki tarixiy shaxslar xatosi yoki dunyoning bugungi ahvoli haqida gapirib, oʻtirgan davrangizning "fayz"ini buzishingiz mumkin.

3. Sizni aldash va manipulyatsiya qilish juda qiyin bo‘lib qoladi. Hamma narsaga shubha va mantiq bilan qaraydigan bo‘lasiz. Yaqin atrofingizdagilar soddaligingiz uchun hamma narsaga ishonib, "ho‘p" deb ketaveradigan sodda kunlaringizni "sog‘inishadi".

4. Odamlar siz ishlatayotgan so‘zlarini tushunishlari uchun yonlarida atamalarning izohli lug‘atini olib yurish kerak bo‘ladi. Oddiygina, ko‘cha tilida gaplashishni miyangiz qabul qilmaydi.

5. Kino yoki serial ko‘rayotganda ssenariydagi mantiqsizliklarni darrov topib olasiz. Miyani o‘chirib qo‘yib, o‘zingni oqimga tashlab ko‘rish imkonsiz bo‘lib qoladi, kitob oʻqish aslida menga zarurmi degan savollar tugʻila boshlaydi.

6. Uyqu rejimingiz buzildi. Kechasi tinchgina uxlash o‘rniga, jamiyat qayerga qarab ketayapti, nega odamlar buncha passiv, deb bosh qotirib chiqasiz. Eski, hech narsani o‘ylamasdan darrov uxlaydigan vaqtlaringizni sogʻinasiz.

7. Ijtimoiy tarmoqlardagi sayoz videolarga kulolmay qolasiz. Yumor hissingiz shunchalik o‘sib ketadiki, endi sizga faqat intellektual hazillar kerak. Siz koʻrgan hazillarning kulguli ekanligini yoningizdagilarga sharhlab berishga majbur boʻlasiz. Sayoz narsalardan zavq olish "qobiliyatingizni" yo‘qotasiz.

8. Atrofingizdagi muammolarning asl ildizini darrov ko‘ra boshlaysiz. Ularni tahlil qilib doimo yechim izlab yurasiz, atrofingizdagi ko‘pchilikka o‘xshab shunchaki hayotdan va taqdirdan nolib yashash sizga yot tushuncha boʻlib boraveradi.

9. Eng yomoni — har bir narsani atrofdagilarga mayda detallarigacha tahlil qilib berishingiz (miyasini uygʻotishga harakat) ularga yoqmaydi! Sizni bittada tushuna oladigan kam sonli insonlar guruhingiz shakllanadi. Siz bilan munosabat oʻrnatish qiyinlashib qoladi.

p.s Yuqoridagilardan kelib chiqqan holda savol qoldiraman: siz shunday hayot tarziga tayyormisiz?

@didaskoloskundaligi