"نحن وعم ننطر بسيارة الإسعاف بموقع عملية إنقاذ الطفل عسكر دياب، وزملاءنا كانوا عم يحفروا بمحيط المكان ليقدروا يوصلوا للطفل، عيوني كانت معلقة عالمكان وقلبي عم يخفق بشدة شعوري كان مختلف شوي عن أي عملية إسعاف نلبيها، يمكن لأنه الحالة قدامنا وفوراً من وصلتنا منسعف المصاب أو المريض، لكن مبارح كان الاختلاف بالانتظار والترقب لينجو الطفل بسلام من جوا البئر، كنا عم نتفقد معدات الإسعاف كل شوي لتكون جاهزة خاصةً أنه الطفل كان عم يعاني من نقص الأكسجة، ولما فجأة صرخوا الشباب أنهم طالعوا الطفل عايش فرحت كتير وفوراً بدأنا بعمليات الإسعاف الأولي مع الكادر الموجود معنا بالسيارة لنضمن وصول الطفل للمشفى بسلام والحمدلله الله وفقنا وقدرنا نوصله بسلام وفوراً دخل لغرفة العناية المركزة، نظرنا ساعات بالمشفى لنتأكد من صحته وهلأ عم نتابع أخباره أول بأول على أمل يرجع بصحته لأهله"
عبدالله عبجي، متطوع مشارك بفريق الإسعاف في عملية إنقاذ الطفل من البئر الارتوازي في قرية تل أعور غربي #إدلب.
#الخوذ_البيضاء

نسابق الزمن للانتهاء من مشروع بناء مسجد في قرية الملند في ريف #إدلب الغربي بعد أن دمر زلزال 2023 مسجد القرية، ولنزرع البسمة والأمل على وجوه الأهالي في يوم عيد الأضحى المبارك.
#الخوذ_البيضاء
#أضحى_مبارك

خطر مخلفات الحرب ليس خطراً عادياً أبداً، يمتد لسنوات طويلة ويهدد حياة المدنيين وخاصة المزارعين والأطفال، ويقوض حياة السكان وأنشطتهم الزراعية والصناعية، ويحتاج لجهود كبيرة للتخلص منه، فرقنا تبذل جهوداً متواصلة في إزالة هذه المخلفات وحماية السكان منها، إضافة لتوعيتهم بمخاطرها.
#الخوذ_البيضاء

"بمهامنا واستجاباتنا في الدفاع المدني السوري ممكن نواجه صعوبات كتير تفرض علينا نستهلك زمن أكتر بالعملية، مبارح أثناء عملية إنقاذ الطفل من بئر إرتوازي في قرية تل أعور في ريف إدلب الغربي من إحدى التحديات يلي واجهتنا أنه المصاب طفل ومحشور بمكان ضيق كتير وكان صعب يتجاوب معنا لنقدر نرفعه من المكان، هذا الأمر تتطلب مننا وقت أكتر، وكل دقيقة كانت عم تمر علينا كنا عم نفكر شو الخطوة التالية وكيف رح يكون موقعه لما رح نوصله، لكن الحمدلله قدرنا نحفر من حواليه بشكل جانبي لوصلنا لفتحة مقابل وجه الطفل وتواصلنا معه لنشعره بالأمان والطمأنينة، والحمدلله قدرنا ننقذ الطفل ونحرره من الكبال يلي كانت مشربكة على جسمه وسلمناه لزملائنا بفريق الإسعاف يلي كانوا عم ينطروا بالدقيقة خروجه بسلام، الطفل عسكر هلأ بالمشفى عم يتلقى العلاج بالعناية المركزة وهو بحاجة لدعائنا جميعاً إله لينجو ويرجع بخير وسلامة"
صلاح، متطوع مدرب في الدفاع المدني السوري، شارك بعملية إنقاذ الطفل عسكر دياب من البئر الارتوازي الذي سقط فيه أمس السبت في قرية تل أعور جنوب غربي #إدلب.
#الخوذ_البيضاء