"عام على الزلزال المدمّر في سوريا وتركيا، فقدنا فيه كتير من أهلنا، وكانت خسارتي كبيرة بفقدي صديقتي وزميلتي المتطوعة "فاطمة" مع عائلتها الصغيرة، زوجها وابنتاها تحت أنقاض منزلهم بمدينة جنديرس، "فاطمة" ماكانت فقط زميلة برحلة عملنا الإنساني، هي كانت صديقة وأخت وتربطني فيها علاقة قوية، للأسف كارثة الزلزال خطفت منا كتير ناس غالين على قلوبنا، مرت سنة وكأن الحدث مبارح، التفاصيل لسه موجودة بذاكرتنا.. مشاهد الركام والناس تحت الانقاض عم تستغيث والضحايا، بتذكر اللحظات الأولى للزلزال لما توجهت أنا وزميلاتي لمكان سكن فاطمة وحاولنا نسمع صوتهم لكن للأسف ماكان في أي صوت وكان البناء مهدم بالكامل، ولبعد يوم لوصلنا لجثامين فاطمة وعائلتها، رحيل فاطمة وباقي زملاءنا وكتير ناس فقدناهم بالزلزال ترك جواتنا شعور حزن كبير وألم، وبنفس الوقت مسؤوليتنا اتجاه مجتمعنا كبرت كتير، الناس صارت عندها حالة رعب من الشي يالي عاشوه ونحن مكملين معهم لحتى نتعافى من آثار الحرب والزلزال"
سماح - متطوعة في #الخوذ_البيضاء #زلزال_سوريا #لأجل_سوريا

احتراق غرفة مسكن مؤقت بالكامل، في مخيم عشوائيات سجو شمالي #حلب، إثر حريق اندلع بها بسبب المدفأة، اليوم الأربعاء 7 شباط، فرقنا أخمدت الحريق وبرّدت المكان، وتأكدت من عدم وقوع إصابات.
#الخوذ_البيضاء

"ذكرى مؤلمة كتير ما عم تروح من بالنا، لدرجة أنه ليلة مبارح ما قدرنا ننام ونحن عم نتذكر هديك الليلة وكيف بسرعة قدرت أنزل أنا وزوجي و أولادي من البيت، بينما جيرانا مالحقوا ينزلوا وتوفوا كلهم تحت الأنقاض، أكيد ذكراهم خالدة بعقولنا ما رح ننساهم، الله يعوضهم الجنة و إن شاء الله ما تتكرر هيك مآسي، بحاول أنا من خلال عملي قدم مساعدة لأكبر عدد ممكن من الناس وساعد المجتمع ليرجع يتعافى من هي الكارثة ومن سنوات الحرب الطويلة"
شيدة، ناجية من الزلزال، من سكان مدينة جنديرس بريف عفرين.
#زلزال_سوريا #لأجل_سوريا #الخوذ_البيضاء