قررت أتميّز...❤

ليه مهم مش بس إنك تنجز المهام اللي عليك إنما كمان تنجزهم بسرعة ؟! ليه السرعة في الأداء أهم مما انت متخيل ؟!

أول سبب هيجي في بالك دلوقتي هو إن أداء المهام بسرعة هيختصرلك وقت كبير ممكن تنجز فيه مهام أكتر .. وبالتالي السرعة مهمة علشان السرعة = وقت .. والوقت = فرصة لإنجاز أكبر

ده كلام منطقي وصحيح
لكن مش ده السبب الأساسي اللي جاي أكلمك فيه

السبب الأساسي لإنك تتعود تنجز أي مهمة عليك بسرعة هي إنك تقلل سعرها جوه دماغك ! وبالتالي ده يشجعك إنك تشتريها تاني وتالت ورابع بعد كده لإن سعرها مش كبير

بإختصار كده علشان تفهم النقطة دي .. أي مهمة هتعملها ليها سعر جوه دماغك .. السعر ده عبارة عن حاجتين مرتبطين ببعض : الطاقة اللي هتحتاجها علشان تنجز المهمة دي والوقت اللي هتحتاجه لإنجازها

أول ما بتتعرض المهمة المطلوبة على دماغك بيحسب علطول سعرها وهو الطاقة والوقت المطلوبين لإنجازها (فيديو بيشتغل جوه دماغك لشكلك وانت بتعملها) .. ولو لقى إن الطاقة والوقت المطلوبين ليها كتير بيفضل إنه يتجنبها بقدر الإمكان (علشان هو مخلوق يحافظ على موارده اللي دايماً محتاجها مش يهدرها)

فلو انت مثلاً مطلوب منك كل يوم مكالمة شغل والفيديو اللي اشتغل جوه دماغك إن المكالمة دي هتاخد منك ساعة يبقى غالباً هيفضل يأجلك فيها أو يهبطك كل يوم منها لإن سعرها عالي .. أو انتي مثلاً مطلوب منك توضيب الشقة كل يوم والفيديو اللي اشتغل جوه دماغك إنها هتاخد منك ساعتين تلاته يبقى غالباً هيهبطك كل يوم منها لإن سعرها عالي !

لكن لما تتعود إنك تنجز المهام اللي عليك بسرعة وفي أقل وقت ممكن فدماغك تلاقي إنها مش بالسعر العالي اللي هي كانت مفترضاه .. فتعيد تسعيرها من جديد وده معناه إنها هتتشجع في أوقات كتير إنها تنجز المهام دي لإن سعرها معقول (الطاقة والوقت اللي محتاجينهم مش كبير)

الجميل كمان في السرعة لما تتعود عليها إن السرعة بتجيب سرعة أكتر وبتجيب تمكن أكتر .. بمعنى إن السرعة زي ما قولنا هتشجعك إنك تكرر المهام دي بإستمرار (لإن المقاومة قليلة) وبالتالي التكرار الكتير هيخليك متمكن أكتر في أداء المهام دي فالسرعة تزيد أكتر والمقاومة تقل أكتر (دايرة إيجابية)

آخر حاجة عايز أقولها في الموضوع ده
إن السرعة اللي بنتكلم عليها هي سرعة لا تخل بإتقان العمل .. يعني مش المطلوب إنك تقلب وتعمل المطلوب أي كلام علشان تخلصه بسرعة .. السرعة المقصودة بتيجي من النية والعزم أولاً قبل ما تبدأ إنك تشتغل بسرعة ثانياً من تقليل الوقت المهدر في تفاصيل ملهاش لازمة أو في مشتتات بتلهيك في النص وثالثاً من التمكن في أداء العمل اللي بيجي من التكرار زي ما قولنا

اشتغل بسرعة
توفر وقت تنجز فيه أكتر
وتعيد تسعير المهام جوه دماغك فتتشجع إنك تكررها أكتر

#سلسلة_التغيير

#Ahmed_Samir

#Loly 💜

2.19K views19:25